کوردستان
پێشەوا ھەورامانی بە دەنگی ئەمریکای وتووە، ئەوەی لەسەرشانیان بووە لە بابەتی داھاتی ناوخۆ و نەوت و پێدانی ھەموو وردەکاریی و بەرچاو روونییەک کردوویانە، ھەموو داواکارییەکی حکومەتی عێراقییان جێبەجێکردووە، بەڵام حکومەتی عێراق بە ناردنی مووچەی ھەرێم بە کەموکورتی ستەم لە مووچەخۆرانی ھەرێم دەکات.
وتیشی، حکومەتی ھەرێم دەبێت چیتر بکات بۆ ئەوەی بەغداد مووچە بنێرێت و ھیوادارن چیتر حکومەتی عێراق ئەو بابەتە نەکاتە کارتێکی سیاسی و فشارێک بۆ برسیکردنی خەڵکی ھەرێم.
حکومەتی ھەرێم دەڵێت، بۆ دابینکردنی مووچە پێویستیان بە زیاتر لە ٩٠٠ ملیار دینارە، بەڵام حکومەتی عێراق لە چەند رۆژی رابردوودا ٥٩٨ ملیار دیناری وەک بەشێک لە مووچەی فەرمانبەرانی ھەرێمی کوردستان رەوانەکرد، ئێوارەی رۆژی پێنجشەممەش وەزارەتی دارایی خشتەی دابەشکردنی مووچەی مانگی حوزەیرانی بەشێک لە مووچەخۆرانی بڵاوکردەوە کە تا ١٤ی مانگ بەردەوام دەبێت.
پێش نیوەڕۆی ئەمڕۆ پێنچ شەممە ٣/٨/٢٠٢٣ سەعدی ئەحمەد پیرە ئەندامی مەکتەبی سیاسی یەکێتی نیشتیمانی کوردستان، بە یاوەری لیوا فەتاح کەریم، فاتیح مەلا قەرە سەرۆکی لقی ھەولێری پێشمەرگە دێریینەکان، کاروان گەزنەیی، شەمۆل ئاشتی ئەندامانی خولی پێشووی پەرلەمانی کوردستان، دیدار ئەبوبەکر خۆشناو، رێباز شەھید شێرۆ سەردانی مەڵبەندی ٢٤ی ڕێکخستنی ڕاپەڕینی یەکێتی نیشتمانی کوردستانی کردو لەلایەن ئەحمەد زرار لێپرسراوی مەڵبەندی ڕاپەڕین و کادیرانی مەڵبەندەوە پێشوازی لێکرا.
لەمیانی سەردانەکەیدا سەعدی ئەحمەد پیرە ھیوای سەرکەوتنی بۆ لێپرسراوی مەڵبەند خواستو، باسی لەگرنگی ڕۆڵ و پێگەی دەڤەری ڕاپەرین لەکوردستان بەگشتی و بۆ یەکێتی نیشتمانی کوردستان بە تایبەتی کرد و رایگەیاند، یەکێتی نیشتمانی کوردستان وەک ھێزێکی کاریگەری سەر گۆڕەپانی سیاسی ھەرێمی کوردستان وعێراق وناوچەکەیە، بەتایبەت دوای ھەموو ئەو سەرکەوتنانەی کە بۆ ڕزگاری وئازادی و لەقۆناغەجیاجیاکانی حوکمڕانی وپەرلەمانی ودیموکراسی بەدیھاتن و زاڵبوون بەسەر ھەموو ئەو بەربەستانەی کەھاتوونەتە پێش و بۆ بەرگریکردن لەسنورەکانی نیشتمان وقوربانیدان بۆ پارێزگاری لەدەستکەوتەکانی گەلەکەمان.
لای خۆیەوە ئەحمەد زرار لێپرسراوی مەڵبەندی ٢٤ی راپەرینی یەکێتی نیشتمانی کوردستان، سوپاسی سەعدی ئەحمەد پیرە یکرد و جەختی لەوەکردەوە، کە کاردەکەن بۆ سەرخستنی بەرنامەکانی یەکێتی نیشتمانی کوردستان.
شایانی باسە ھەریەک لە فەرماندە فەریق عەبدوڵا بۆر و لیوا سەردار وەھاب، بەشێک لە فەرماندە سەربازییەکانی سنورەکە و جێگرانی مەڵبەندی پێشمەرگە ئامادەی کۆبوونەوەکە بوون.
دەقی پەیامەکە...
جینۆسایدکردنی خوشک و برا ئێزیدییەکانمان درێژرکراوەی ھەمان ئەو کولتورە وەحشیگەرانەیە کە پڕۆسەی کۆمەڵکوژی دژ بە نەتەوەکەمان ئەنجامدا
دەقی پەیامەکە..
نۆ ساڵ لەمەوبەر، رێکخراوی تیرۆریستی داعش پەلاماری شەنگالیداو زۆر بێ بەزەییانە دەستیان لە ھیچ شتێک نەپاراست، بەو ھۆیەشەوە بە ھەزاران کەس لە ژن و منداڵ، گەنج و پیر جینۆساید کران، و بە ھەزارانی دیکەش ئاوارەبوون، و ژمارەیەکی زۆریش لە کچ و ژنانی ئێزیدی لەلایەن ئەو رێکخراوە تیرۆریستییەوە ڕفێنران.
جینۆسایدکردنی خوشک و برا ئێزیدییەکانمان درێژرکراوەی ھەمان ئەو کولتورە وەحشیگەرانەیە کە لە رابردوودا پڕۆسەی کۆمەڵکوژی دژ بە نەتەوەکەمان ئەنجامدا، ئەو رووداوە ئەوەمان پێدەڵێت کە لە سەردەمی عەولەمەشدا ھێشتا عەقڵییەتێک ماوە کە باوەڕی بە کوشتن، سڕینەوەی بەرامبەرکەی، بیری فاشیزم و کۆنەپەرستی ھەیە.
رووداوی جینۆسایدکردنی خوشک و برا ئێزیدییەکانمان راستییەکی حاشاھەڵنەگری بیر خستینەوە؛ ئەویش ئەوەیە ھێشتا نەتەوەکەمان لە بەردەم ھەڕەشە و مەترسیدایە، و دەبێت خۆمان بۆ ئەگەر و پێشھاتی ھاوشێوەی شەنگال ساز و ئامادە بکەین! ئەم یادە مەرگەساتە بە دەرفەتێک دەزانم؛ کە تیایدا جەخت لە یەکڕیزی و ھاوھەڵوێستی سەرجەم حزب و لایەنە کوردستانییەکان بکەمەوە، و بە یەک گوتار و ھەڵوێستی ھاوبەش رووبەڕووی ئاڵنگارییەکان ببینەوە.
ھەروەھا لەسەر ھەردوو لایەنی حکومەتی فیدڕاڵ و حکومەتی ھەرێمی کوردستانیش پێویستە کە ھەوڵەکانیان خێرا بکەن بە ئاراستەی ئاساییکردنەوەی دۆخی شەنگال و گێڕانەوەی سەرجەم ئاوارەکان بۆ زێدی خۆیان و دەستەبەرکردنی ژیانێک کە شایستە بێت بە گەورەیی ئەو مەرگەساتەی کە بەسەر خوشک و برا ئێزیدییەکانمان ھات.
سڵاو لە روحی پاکی جینۆسایدکراوانی خوشک و برا ئێزیدییەکانمان، سەربەرزی و مانەوە بۆ شەنگالییەکان
ئاسۆ مامەند
کارگێڕی مەکتەبی سیاسی یەکێتیی نیشتمانیی کوردستان
بەڕێوەبەرایەتی کۆنتڕۆلی جۆری دەرمان لە ھەرێمی کوردستان رایگەیاند، لەسەر بڵاوبوونەوەی ھەواڵێک لە چەند پەیج و ماڵپەڕێک لە ناوخۆ و دەرەوە سەبارەت بە دەرمانی کۆڵد ئاوت، دوای بەدواداچوونی وردی زانستی و پیشەییانەی روونی دەکەنەوە، کە بە دەرمانەکە بە شێوەیەکی رەسمی ھاوردەی ھەرێمی کوردستان کراوە و ھەڵسەنگاندنی تاقیگەیی بۆ ئەنجامدراوە و کارگەی بەرھەمھێن تۆمارکراوە.
دەشڵێت، بۆ دڵنیابوونەوە لە سەلامەتی دەرمانەکە و پاراستنی تەندروستی ھاوڵاتیان بڕیاریاندا بە راگرتنی مامەڵەکردن و بەکارھێنانی دەرمانەکە و راکێشانەوەی ھەموو ئەو ژمارە باجانەی کە لە بازاڕەکانی ھەرێمی کوردستاندا بوونیان ھەیە.
ئاماژەی بەوەشکردووە، ھەروەھا بڕیادراوە بە ھەڵپەساردنی کارگەی بەرھەمھێنەر و راگرتنی ھاوردەکردنی بەرھەمەکانی کارگەکە تا دەرچوونی ئەنجامی کۆتایی لێکۆڵینەوە.
پێشتریش وەزارەتی تەندروستی عێراق وەڵامی ئاژانسی بلومێرگی ئەمریکی داوەتەوە لەبارەی ژەھراویبوونی دەرمانی "کۆڵد ئاوت"، کە بۆ نەخۆشی سەرمابوونی منداڵ بەکاردەھێندرێت، ئاماژەی بەوەکردبوو، بابەتێکی نوێ نییە و پێشتر وەزارەتی تەندروستی بەدواداچوونی بۆ کردووە.
لە پەیامەکەی سەرۆکی دامەزراوەی سەرۆک جەلال تاڵەبانی ئاماژە بەوەشکراوە، لەمەودوا زیاتر دەستی ئاوەدانکردنەوە بگەێنن بە ناوچە زیان لێکەوتووەکان، چونکە بەھۆی کێشمەکێشی سیاسی تائێستا خەڵکێکی زۆر لەناو کەمپ و چادرگەکاندا ژیانێکی تاڵ بەسەردەبەن.
دەقی پەیامەکە...
وا نۆ ساڵ بەسەر کارەساتی جینۆسایدکردنی کوردانی ئێزدی تێدەپەرێت ، ئەم کارە تیرۆریستییە جیھان و مرۆڤایەتی بەگشتی ھەژاند؛ کە لەسەدەی بیست و یەک بە بەرچاوی پارێزەرانی مافی مرۆڤەوە جەھالەت لەژێرپەردەی ئاییندا کۆمەڵگەی ئێزیدی بەئامانج بگرن و بە خراپترین شێوە جینۆسایدبکرێن و کچ و منداڵیش بکرێنە دەستکەوتی جەنگ و لە بازارەکاندا وەک کاڵا کڕین و فرۆشتنیان پێوەبکرێت.
تیرۆریستانی داعش بوونەتە قێزەونترین گرووپ کە بەکردەکانیان بێ ئەوەی مرۆڤایەتییان لا گرنگ بێت دیوە جوانەکەی پێکەوەژیانیان لەم کۆمەڵگەیە تێکداو برینێکی قوڵیان لەجەستەی یەکتر قبوڵکردن و پێکەوەژیان دروستکردوو بوونە پەڵەیەکی رەشی نێومێژوو.
سەرباری ھەوڵە بەردەوامەکان لە ئاستی کوردستان و ھەوڵەکانی حکومەتی ئیتیحادی و بەھاوکاری ھەمەلایەنەی مرۆڤدۆستان لە ناوخۆ و جیھان کاری جدی کراوە بۆ ساڕێژبوونی برینی قوڵی کۆمەڵگەی ئێزدی و ھەوڵدراوە کە قوربانیان لەدەست تیرۆریستان رزگاربکرێن و بچنەوە نێو ژیانی ئاسایی خۆیان.
زۆر گرنگە کە لە لەلایەن ھەردوو حکومەتی ھەرێمی کوردستان و حکومەتی عێراقی فیدراڵ کاری راستەقینە بکرێت بۆئەوەی ئەم تاوانە قێزەونە لە سەرتاسەری جیھان و کۆمەڵگەی نێودەوڵەتیدا بە جینۆساید بناسێنرێت وە بۆ لەمەودوا زیاتر دەستی ئاوەدانکردنەوە بگەێنن بە ناوچە زیان لێکەوتووەکان، چونکە بەھۆی کێشمەکێشی سیاسی تائێستا خەڵکێکی زۆر لەناو کەمپ وچادرگەکاندا ژیانێکی تاڵ بەسەردەبەن.
لەم بۆنە پڕ ژان و ئازارەدا درود بۆ رۆحی بەرزی شەھیدانی دەستی غەدری تاوانی شەنگال دەنێرین و یادوو بیرەوەریان لە دڵماندا زیندووە و خۆڕاگری ئەوانیش وەک سیمبولی شانازی نەتەوەییمان سەیر دەکرێت کە ھیچ گرووپ و تاقمێک ھێزی لەناوبردنی کوردانی رەسەنی ئێزیدی نییە.
باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی
٣/٨/٢٠٢٣
دەقی پەیامەکەی بافڵ جەلال تاڵەبانی:
ئەمڕۆ نۆ ساڵ بەسەر جینۆسایدی خوشک و برا ئێزدییەکانمان تێدەپەڕێت و هێشتا ئەم برینە گەورەیە خوێنی لێدەچۆڕێت. تاوەکو ئێستا نەک هیچ هەنگاوێکی کردەیی بۆ قەرەبووکردنەوەی خوشک و برایانی ئێزدی نەنراوە، بەڵکو دەکرێنە قوربانیی ململانێ سیاسییەکان و شەنگالی خۆشەویستیش کە زێدی ئەوانە، وەک وێرانەی دوای جەنگ ماوەتەوە.
ناکرێت دڵسۆزی و وەفاداری بەرامبەر کوردانی ئێزدی تەنیا لە دروشمدا بمێنێتەوە و دەبێت هەمووان هەنگاوبنێین، هەنگاوێک کە بە رۆحێکی نەتەوەیی و مرۆڤدۆستانەوە بنرێت و بەشێکبین لە گەڕانەوەی هیوا بۆ خوشک و براکانمان نەک قووڵکردنەوەی برینەکانیان. بەرپرسیارێتیی هەموومانە ئەم تاوانە گەورەیە لەبیر نەکەین و کار بۆ بەجینۆسایدناساندنی بکەین، بێگومان هەڵوێستی ئەو وڵاتانەش لەیادناکەین کە بە فەرمی تاوانەکەیان وەک جینۆساید ناساندووە.
داوا لە حکومەتی عیراق دەکەین ئەرک و بەرپرسیارێتیی یاسایی و مرۆیی خۆی بەرامبەر ئێزدییەکان بەجێبهێنێت و چیتر لە قەرەبووکردنەوەی ئێزدییەکان و ئاوەدانکردنەوەی شەنگال کەمتەرخەم نەبێت،
درود و سڵاو بۆ گیانی شەهیدان و قوربانییانی ئەم تاوانە لەبیرنەکراوە و سەرفرازیی بۆ خوشک و برا ئێزدییە خۆڕاگرەکانمان.
بافڵ جەلال تاڵەبانی
سەرۆکی یەکێتیی نیشتمانیی کوردستان
وەزارەتی دارایی و ئابوری حکومەتی ھەرێم لە راگەیەندراوێکدا بڵاویکردەوە، سەعات ٩:٣٠ی ئەمڕۆ ٥٩٨ ملیار دینار لە لقی ھەولێری بانکی ناوەندی عێراق رادەستی وەزارەتی دارایی کراو رەوانەی بانکەکان کرا، ھەر ئەمڕۆش دابەشکردنی مووچە بە وەزارەتی تەندروستی دەستپێدەکات و خشتەی سەرجەم وەزارەتەکانیش رادەگەیەنرێت و ئەو کورتھێنانەشی دروستبووە لە داھاتی ناوخۆ پڕدەکرێتەوە.
وەزارەتی دارایی روونیکردەوە، حکومەتی عێراق و وەزارەتی دارایی عێراق بەھیچ جۆرێک پابەندنەبوون بە رێککەوتنی ھەرێم و بەغداد و جێبەجێکردنی یاسای بودجە.
راشیگەیاند، ھەرێمی کوردستان مانگانە پێویستی بە زیاتر لە ٩٤٠ ملیار دینارە تەنھا بۆ مووچە، ئەوە جگە لە خەرجی بەکاردبردن و دامودەزگاکان و بودجەی وەبەرھێنان و تێچووی بەرھەمھێنانی کارەبا. ماف و شایستە داراییەکانی ھەرێمی کوردستانیش بەپێی یاسای بودجە مانگانە زیاتر لە یەک ترلیۆن ٣٧٤ ملیار دینارە، تەنھا بۆ مووچەی فەرمانبەران و خانەنشیان و پێشمەرگە مانگانە ٩٠٦ ملیار دینار لە یاساکە تەرخانکراوە.
ئاماژەی بەوەشدا، پێویستبوو وەزارەتی دارایی عێراق یەک ترلیۆن و ١٧٤ ملیار دینار بۆ ھەرێم رەوانە بکات، بەڵام ئەو بڕە پارەیەی نێردراوە پێچەوانەی یاسای بودجە و ھەموو ئەو رێکەوتنانەیە کە لەنێوان ھەردوولا ئەنجامدراوە.
سەرۆک کۆماری عێراق لە تویتێکدا بڵاویکردەوە، پشوو نادەن و ویژدان و دەروونیان ئارام نابێت، تا ئەو کاتەی تاوانبارانی جینۆسایدی ئێزدییەکان دادگایی دەکرێن و رفێندراوەکان دەگەڕێنەوە و مافەکان وەردەگیرێتەوە.
وتیشی، لە نۆیەمین ساڵیادی جینۆسایدی ئێزدییەکاندا، ھەوڵەکان بۆ گەڕان بە دوای چارەنووسی بێسەروشوێنببووەکان چڕدەکەنەوە.
لە سێی ئابی 2014، تیرۆریستانی داعش دەستیان بەسەر قەزای شنگال و گوند و کۆمەڵگاکانی دەوروبەریدا گرت، هەزاران کوردی ئێزدیی قەزاکە بەرەو چیای شنگال هەڵاتن و بەهۆی بەرزیی پلەی گەرما و کەمیی ئاو و خۆراکەوە چەندین هاووڵاتی گیانیانلەدەستدا.
لە هەڵمەتێکی رەشەکوژیشدا، تیرۆریستانی داعش نزیکەی 5000 هەزار کوڕ و پیاوی ئێزدییان کۆمەڵکوژ کرد و زیاتر لە شەش هەزار کچ و ژنیشیان رفاند، کە بەپێی بەدواداچوونەکان، هەتا ئێستا ژمارەیەکی زۆریان بێسەروشوێنن.
مەسرور بارزانی سەرۆکی حکومەتی ھەرێمی کوردستان لە پەیامەکەیدا رایگەیاند، نۆ ساڵ لەمەوبەر، تیرۆریستانی داعش ھێرشێکی دڕندانەیان کردە سەر شنگال و دەورووبەری و بەوھۆیەوە، ھەزاران کەس لە دانیشتووانی ئەو دەڤەرە، کۆمەڵکوژ و بێسەروشوێن و ئاوارە کران.
دەشڵێت، دەستخۆشی لە ھەموو ئەو وڵاتانە دەکەن، کە تاوانەکانی تیرۆریستانی داعشیان لە دژی کوردی ئێزیدی بە رەسمی بە جێنۆساید ناساندووە، ھیوادارن کۆمەڵگەی نێودەوڵەتی ھاوکار و یارمەتیدەریان بێت لە کەمکردنەوەی ئێش و ئازارەکانی خوشک و برا ئێزیدییەکانیان .
ئاماژەی بەوەشکرد، دوای تێپەڕبوونی نۆ ساڵ بەسەر کارەساتەکەدا، کەچی ھێشتا بارودۆخی دەڤەری شنگال ئاسایی نەبووەتەوە، پشتیوانیی خۆیان بۆ داخوازییە رەواکانی ئێزیدییەکانمان دووپاتدەکەنەوە و پێویستە کۆتایی بە دۆخی نائاسایی شنگال بھێنرێت، ھەروەھا جەخت لە جێبەجێکردنی رێککەوتننامەی شنگال دەکەنەوە.
دەقی پەیامەکە...
لە نۆیەمین ساڵیادی کۆمەڵکوژی خوشک و برا ئێزیدییەکانمان لەلایەن تیرۆریستانی داعشەوە، یادی تاڵی ھەموو قوربانیانی ئەو تاوانە گەورەیە بەرز و پیرۆز رادەگڕین.
ئێزدییەکان لەپێشتریش رووبەڕووی کۆمەڵکوژی و ستەمی گەورە بوونەتەوە کە جینۆساید کردنیان بە دەستی داعش دوا وێستگەی ئەو ستەمە گەورەیە بوو، بەڵام ئەوەی جێگای ھیوایە، ئەمجارەیان بە تەنھا نەمانەوە، بەڵکو ھەموو کورد و کۆمەڵگای نێودەوڵەتی و مرۆڤایەتی ھاوسۆز و پشتیوانیان بوون.
یادی نۆ ساڵەی ئەم تاوانە گەورەیە جیاوازتریش بوو چونکە حکومەتی شانشینی یەکگرتووی بریتانیا چووە ڕیزی ئەو وڵاتانەی کە بە فەرمی ئەم کۆمەڵکوژییەیان وەک جینۆساید ناساندوە، ئەمەش ھەنگاوێکی گەورەیە بۆ چەسپاندنی دادپەروەری و پاراستنی ئێزدییەکان لە داھاتوودا. سوپاسی حکومەتی بەریتانیا و ھەموو ئەو وڵاتانەش دەکەم کە ئەم ھەنگاوە پێویست و گرنگەیان ناوە.
قوباد تاڵەبانی
جێگری سەرۆکی ئەنجومەنی وەزیران
ھونەر جەمال، وتەبێژی وەزارەتی دارایی و ئابووریی ھەرێم بە کوردسات نیوزی راگەیاند، ئەمڕۆ بەغداد ٥٩٨ ملیار دیناری وەک بەشێک لە پشکی ھەرێمی کوردستان رەوانەکرد و سبەینێ لقی ھەولێری بانکی ناوەندی عێراق رێکارەکانی ناردنی پارەکە بۆ وەزارەتی دارایی تەواو دەکات.
وتیشی، لە دەوروبەری کاتەکانی نیوەڕۆی سبەینێ وەزارەتی دارایی لیستی مووچە رادەگەینێت و مووچەی چەند وەزارەت پێڕاگەشتن دابەشی دەکەن و رۆژانی داھاتوو مووچەی وەزارەتەکانی تر و دەستەکان و خانەنشینان دابەش دەکرێت.
پێشتریش پێشەوا ھەورامانی، وتەبێژی حکومەتی ھەرێم رایگەیاند، بۆ دابینکردنی مووچە پێویستیان بە ٩١٢ ملیار دینارە کە لە عێراقەوە بێت، بەڵام پارەی پێویست نەنێردراوە و تەنھا ٥٩٨ ملیار دینار ھاتووە.
ئەنجومەنی وەزیران لە کۆبوونەوەدا، داوای لە ھێز و پارت ولایەنە کوردستانییەکان کرد کە ھاوھەڵوێست و یەکدەنگ بن لە سەر داکۆکیکردن لە مافە دەستوورییەکانی خەڵکی کوردستان و دابینکردنی شایستە داراییەکانی ھەرێمی کوردستان کە لە ناو بودجەدا جێگیرکراوە، ھەروەھا ھەردوو وەزارەتی کارەبا و سامانە سروشتییەکانی راسپارد، کە رێوشوێنی پێویست بگرنەبەر بۆ دابینکردنی کارەبا و سووتەمەنی بۆ ھاوڵاتییان.
لە بڕگەیەکی دیکەی کۆبوونەوەکەدا، سەرۆک وەزیرانی سوپاسی قوباد تاڵەبانی جێگری سەرۆک وەزیرانی ھەرێمی کرد، کە لە کابینەی پێشووی حکومەتی ھەرێمەوە کاری لەسەر بە دیجیتاڵکردنی کاروباری فەرمانگە حکومییەکان کردووە.
لە کۆتایی کۆبوونەوەکەدا، ئەنجومەنی وەزیران پشتیوانی خۆی بۆ ھەوڵەکانی سەرۆکایەتی ھەرێمی کوردستان دووپاتکردەوە بۆ دەستنیشانکردنی وادەیەکی نوێ بۆ ھەڵبژاردنی خولی شەشەمی پەرلەمانی کوردستان، داواشی لە حزب و لایەنە سیاسییەکان کرا پشتیوانی لەو ھەنگاوە بکەن.
دەقی پەیامەکەی سەرۆک کۆماری عێراق:
گەلەکەمان بە ئازار و توڕەیەوە یادی چل ساڵەی ئەو جینۆسایدە دەکاتەوە کە ھەزاران لە ڕۆڵەکانی کوردستان لە بارزانییەکانی لە نێوان شەھید و بێ سەرو شوێنکراوانی کردە قوربانی لە ھەرێمی کوردستان.
ئەو تاوانە قێزەونەی کە ڕژێمی دیکتاتۆری ئەنجامیدا، دەربڕینی ئەو دڕندەییەیە کە تایبەتمەندی ڕەفتاری ستەمکارانەی نیشاندا، کەدرێغی نەدەکرد لە ئەنجامدانی قێزەونترین تاوان.
تاوانی بەئامانجگرتنی ھاونیشتمانیانی بارزانییەکان زنجیرەیەک تاوانی جینۆسایدی بەدوای خۆیدا ھێنا لە چوارچێوەی ئەوەی کە بە ئۆپەراسیۆنەکانی ئەنفال ناسرابوو، دواتر تاوانی ھەڵەبجە بە بەکارھێنانی چەکی کیمیاوی دژی ھاونیشتمانیانی مەدەنی، و ھەموو ئەو تاوانانەش بە ئامانجی کۆمەڵکوژی بوو ، بەرامبەر بە ھەزاران پیاو ، گەنج و پیر، ژن و منداڵ بەبێ گوێدانە ھیچ بەھایەکی مرۆیی.
زۆریش زەحمەت نیە پەیوەندی نێوان ئەو تاوانانەی ڕژێمی دیکتاتۆرییەت پێشتر ئەنجامیدا و تاوانەکانی تیرۆر و جینۆساید کە بە ھەزاران ھاوڵاتی بونە قوربانی پێکەوە گرێبدرێت، وەک ئەوەی لەسەر دەستی داعش لەکاتی داگیرکردنی ژمارەیەک پارێزگا و شار و گوندی عێراقدا ڕوویدا.ئەمانەیش شێوازی جۆراوجۆری ڕەگەزپەرستی و تایەفەگەری نەتەوەی وئایینیە .
چەسپاندنی دیموکراسی و پتەوکردنی دەسەڵاتی یاسا و باوەڕی ڕاستەقینە بە قبوڵکردنی فرەچەشنی و جیاوازییەکانی بنەمای سەرەکین بۆ دەستەبەرکردنی ئاسایش و ئارامی ھاونیشتمانیان لە وڵاتێکدا کە ھەست بە مافەکانی خۆیان بکەن و بەرگری لەسیستمە دیموکراسییە دادپەروەرەکەی بکەن و ئاستیشی بەرزبکەنەوە بۆ ڕیزی دیموکراسییە چەسپێنراوەکان لە جیھانی ھاوچەرخماندا.
یادی شەھیدە سەربەرزەکان و قوربانیانی جینۆساید دەکەینەوە و لەگەڵ قوربانیدان و ئازارەکانی بنەماڵەکانیانین وەک وانەیەکیش زیاتر ئیرادەمان بەھێز دەکات بۆ ڕێزگرتن لە قوربانیەکان و شکۆمەندکردنی قارەمانێتی و کارکردن بۆ پاراستنی مافی خێزانە زەحمەتکێشەکان .
سەربەرزی بۆ شەھیدان.
و پرسە و سەرەخۆشی قووڵم بۆ خانەوادەی قوربانیانی گەلەکەمان، لە کاتێکدا کە کاروان بەردەوامە بەرەو بونیادنانی عێراقێکی فیدراڵی و دیموکراسی و دادپەروەر و شکۆمەند.
دکتۆر لەتیف جەمال ڕەشید
سەرۆک کۆمار
دەقی پیرۆزباییەکە...
جەژنی چلەی ھاوین لە ھەموو خوشک و برا ئێزدییەکان پیرۆز دەکەم و ھیوادارم ئەم جەژنە لە دڵخۆشی و کامەرانیدا بەسەربەرن.
ئەم بۆنەیە بە دەرفەت دەزانم پشتیوانی تەواوی یەکێتیی نیشتمانیی کوردستان دووپاتبکەمەوە بۆ پاراستن و بەدیھێنانی ماف و خواستەکانتان، ھەروەھا یەکخستنی ھەوڵەکان لەپێناو ئاوەدانکردنەوەی شەنگال و گەڕانەوەی خەڵکە خۆشەویستەکەی بۆ زێدی خۆیان.
شاد و سەرفرازبن
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
بەڕێوەبەرایەتی گشتی بازرگانی ھەرێم رایگەیاند، بەشێکی دیکەی شایستە داراییەکانی گەنمی جوتیاران بۆ ساڵی ٢٠٢٣ خراوەتە سەر ھەژماری وەزارەتی بازرگانی ھەرێم و دوای تەواوکردنی رێکارە کارگێڕی و داراییەکان بەسەر جوتیاراندا دابەشدەکرێت.
بەپێی راگەیەنراوەکە، بڕی ٥ ملیار دینار بۆ پارێزگای سلێمانی و ٣ ملیار دینار بۆ ھەولێر و ٢ ملیار دیناریش بۆ جوتیارانی پارێزگای دھۆک تەرخانکراوە.
کاروان یاروەیس ئەندامی ئەنجومەنی نوێنەرانی عێراق لە فراکسیۆنی یەکێتی رایگەیاند، لەسەر داوای ئەوان و لە رێگەی نوێنەریان لە لیژنەی تەندروستی پەرلەمان د.گەیلان قادر، وەزیری تەندروستی عێراق رەزامەندی پیشاندا لەسەر ناردنی بەشێک لە دەرمانی نەخۆشانی درێژخایەن لە نەخۆشخانەکانی گەرمیان، کە بەپێ لیستێک ئیدارەی نەخۆشخانەی گشتی کەلار ناردبووی.
ئاماژەی بەوەشکرد، ژمارەیەکی زۆر لە ھاوڵاتیانی گەرمیان بەدەست نەخۆشییە درێژخایەنەکانەوە دەناڵێنن و بەھۆی نەبوونی دەرمان ناچارن لە بازاڕدا دەرمان بکڕن.