رێکخراوی ھەنگاو بۆ مافەکانی مرۆڤ بڵاویکردەوە، لە سێ مانگی سەرەتای ئەمساڵدا ١٤١ کەس لە سەرانسەری ئێران لەسێدارەدراون، کە لانی کەم ٤٨ ھاووڵاتییان کورد بوون و لە گرتووخانەکانی ئێران و رۆژھەڵاتی کوردستان لەسێدارەدراون.

ئاماژەی بەوەشکردووە، ئاماری لەسێدارەدان لە سێ مانگی یەکەمی ئەمساڵدا بەراورد بە ھەمان ماوە لە ساڵی رابردوو ٢٧٠% زیادی کردووە، کە لە سێ مانگی سەرەتای ساڵی رابردوو ١٣ بەندکراوی کورد لەسێدارەدراو بوون.
بەپێی ئامارەکەی رێکخراوی ھەنگاو، ١٩ کەس لە پارێزگای ورمێ و ٨ کەس لە کرماشان و ٣ کەس لە سنە و ٢ کەس لە ئیلام لەسێدارەدراون.

زیاد جەبار، لە لێدوانێکیدا بۆ کوردسات نیوز ئاماژەی بەوەکرد، رۆژی چوارشەممە ھەردوو دەزگای ھەڵبژاردنی یەکێتی و پارتی سەبارەت بە ھەموارکردنەوەی یاسای ھەڵبژاردن و کاراکردنەوەی کۆمسیۆن ھاوتەریب بەیەکەوە کۆدەبنەوە. 

راشیگەیاند، لەکۆبوونەوەکانی پێشوودا لێکتێگەیشتن ھەبووە لەسەر پرسەکانی، چوار بازنەیی، پشت بەستن بە بایۆمەتری عێراق بەھەموو پێداویستییەکانییەوە لەگەڵ ئاماری وەزارەتی پلاندانانی عێراق بۆ ھەڵبژاردنەکانی ھەرێمی کوردستان.

سەرۆکی فراکسیۆنی یەکێتی باسی لەوەشکرد، خاڵی جیاوازیان ھەیە و کۆبوونەوەکان بەردەوام دەبن بۆ گەیشتن بە ڕێککەوتن.

 

پارتی دیموکراتی گەلان-ھەدەپە، بۆ ھەڵبژاردنی سەرۆکایەتی و پەرلەمانی تورکیا، لەسەر لیستی پارتی چەپی سەوز بەشداری دەکات، لە باکووری کوردستانیش ھاوپەیمانیی لەگەڵ ژمارەیەک پارتی کوردی کردووە.

ھاوپەیمانێتییەکەی ھەدەپە و پارتە کوردییەکان، لەژێر ناوی ھاوپەیمانیی ئازادی و دیموکراسیی کورد دەبێت و بەشداری ھەڵبژاردنەکان لە باکووری کوردستان دەکەن.

بافڵ جەلال تاڵەبانی سەرۆکی یەکێتی نیشتمانی کوردستان سەبارەت بە دۆسیەی نەوت و ئیدارەدانی پەیامێکی بڵاوکردەوە و رایگەیاند، دوای بڕیارەکەی دادگای پاریس و راگرتنی ھەناردەکردنی نەوتی ھەرێم لەڕێگەی تورکیاوە، لەپێناو داھاتووی میللەتەکەمان و رێگریکردن لە دروستبوونی گرفت و قەیرانی گەورە، کاتی ئەوەیە بڕیارە دروستەکە بدرێت، کۆمپانیای سۆمۆ نەوتی ھەرێم بفرۆشێت و کۆی داھاتی نەوت لە سەرتاسەری عیراق بچێتە یەک خەزێنەوە.

داواشیکرد، پشکی ھەرێم لە بودجە و داھاتی عیراق دیاری بکرێت و مووچەی فەرمانبەر و خانەنشینانی ھەرێم گەرەنتی بکرێت، ‎سیستەمی بەنزین، نەوت و گازوایلی ھەرێم ببەسترێتەوە بە عیراق و بەھەمان نرخ بدرێتەوە بە ھاوڵاتیان، نوێنەری ھەرێمی کوردستان لە کۆمپانیای سۆمۆ و کۆی سیستەمی نەوت و غازی عیراق ھەبێت و بەشێکبن لە بەڕێوەبردن و بڕیاردان.

‏‎سەرۆک بافڵ  راشیگەیاند، یەکێتیی نیشتمانیی کوردستان ساڵانێکە ھەوڵ بۆ رێککەوتن لەگەڵ بەغداد و کۆتاییھێنان بە ناکۆکییەکان دەدات، بیرکردنەوەی دروست، ھەماھەنگی و کاری پێکەوەییە نەک دورکەوتنەوە و قووڵکردنەوەی کێشەکان.

دەشڵێت، ناکۆکییە ناوخۆییەکان و تاکڕەوی، قەوارەکەمان لاواز دەکات و ھەرێمەکەمان دەخاتە مەترسییەوە نەک کاری ھاوبەش و داواکردنی مافەکانمان لە بەغداد. 

بافڵ جەلال تاڵەبانی لە پەیامەکەیدا جەختی لەوە کردووەتەوە، یەکێتیی نیشتمانیی کوردستان روبارێک خوێنی لەپێناو سەربەرزی و سەرفرازیی کوردستان رشتووە و ھیچ ھێز و لایەنێک لە خۆیان بە دڵسۆزتر نازانن بۆ کوردستان و بەدیھێنانی بەرژەوەندییە باڵاکانی، بۆیە ھەنگاوی لۆژیکی و بەرپرسیارانە، رێککەوتنە لەگەڵ بەغداد و دەستەبەرکردنی مافەکانیان.

دەقی روونکردنەوەکە:

ڕوونکردنەوەیەک لە دەزگای ئاسایشی هەرێمی کوردستان
دەربارەی ڕووداوی تەقەکردنەکەی ئەمڕۆی شاری سلێمانی:

کاتژمێر  ١٢ ی نیوەڕۆ لە نزیک پڕۆژەیەکی نیشتەجێبوون لە شاری سلێمانی ، لەسەر کێشەی کۆمەڵایەتی ڕووداوی تەقەکردن لە نێوان چەند کەسێک ڕوودەدات لە ئەنجامدا ( دوو ) کەس بریندار دەبن و ڕەوانەی نەخۆشخانە دەکرێن ، دەستبەجێ هێزەکانی بەڕێوەبەرایەتی ئۆپراسیۆنەکانی سلێمانی و بەڕێوەبەرایەتی ئاسایشی سلێمانی دەگەنە شوێنی ڕووداوەکەو هەردوو لایەنی تەقەکەر دەستگیردەکرێن و لێکۆڵینەوە لە ڕووداوەکە بەردەوامە.

لێرەوە بۆ هەموو هاوڵاتیانی خۆشەویستی هەرێمی کوردستان دوپات دەکەینەوە کە هیچ کەسێک لە سەروو یاساوە نیە و هەر کەسێک ببێتە هۆکاری تێکدانی ئارامی و ئاسایش دەستگیردەکرێن و ڕوبەڕووی یاسا دەکرێنەوە .

دەزگای ئاسایشی هەرێمی کوردستان
٢٠٢٣/٤/٢

بەڕێوەبەرایەتی کەشناسی و بوومەلەرزەزانی سەر بە وەزارەتی گواستنەوە و گەیاندنی حکومەتی ھەرێم رایگەیاند، کۆی گشتی بارانبارینی ئەمساڵ تاوەکو یەکی نیسان لە تەواوی پارێزگاکانی ھەرێم گۆرانکاریی بەسەردا ھاتووە و کەمترین رێژەش لە پارێزگای ھەولێر بووە، بەشێوەیەک لە پارێزگای ھەولێر (١٩٦.٤) ملم، پارێزگای سلێمانی ( ٥٨٧.٧ )ملم، پارێزگای دھۆک (٣٠٣.١) ملم، پارێزگای کەرکوک (٢١٧.٥) ملم و پارێزگای ھەڵەبجەش (٤١٦.٥) ملم بووە.

جیاوازی بارانبارینی ئەمساڵ لەگەڵ ساڵی رابردوو تاوەکو یەکی نیسان، لە پارێزگای ھەولێر (٣٦.٨) ملم، لە پارێزگای سلێمانی (٢١٠) ملم، لە دھۆک (١٢٦.٨) ملم، لە کەرکوک (١١٣.١) ملم، و لە پارێزگای ھەڵەبجەش (٤٢.٣) ملم بووە.

بەڕێوەبەرایەتی کەشناسی و بوومەلەرزەزانی ھەرێم کۆی گشتی بڕی بارانبارینی ساڵی رابردووی لە سەرجەم پارێزگاکانی ھەرێمی کوردستان خستووەتەڕوو و رایگەیاندووە، ساڵی رابردوو لە  پارێزگای ھەولێر (٣٠٣.١) ملم، لە سلێمانی (٤٣٤.٦) ملم، لە دھۆک (٢٤٩.٣) ملم، لە کەرکوک (١٢٢.٩) ملم و لە پارێزگای ھەڵەبجەش (٤١٠.٣) ملم باران باریوە.

دیلان غەفور، پەرلەمانتاری فراکسیۆنی یەکێتی لە پەرلەمانی عێراق سەبارەت بە بڕیاری دامەزراندنەکە بە کوردسات نیوزی راگەیاند، لەگەڵ ئەوەداین کارمەندانی گرێبەست و وانەبێژان پلەکانیان بەفەرمی لە دامەزراندنەکەدا جێگیر بکرێت بەڵام پێمان وایە دۆسیەی دامەزراندنەکە گەندەڵی زۆری تێدا کراوە ناهاوسەنگیش لەنێوان پێکهاتەکان دی دەکرێت.

ئەوپرلەمانتارە داواش لەوەزیرە کوردەکانی حکومەتی عێراق دەکات، جەخت لەسەر راگرتنی هاوسەنگی بۆ شاری کەرکوک بکەن.

وتیشی داوا لە سەرۆکوەزیرانی عێراق دەکەین بۆ ئێستاو داهاتوش، رەچاوی تایبەتمەندی کەرکوک بکات، بۆ هەر دامەزراندنێک کە لە کەرکوک دەکرێت بەپێی زانیارییان.

 دامەزراندنەکە زیاتر لە 17 هەزار وانەبێژ و گرێبەست دەگرێتەوە کە لەو ژمارەیە زیاتر لە 10 هەزاریان لە پێکهاتەی عەرەبن.

لە کۆبوونەوەکەدا، نرخى ئه‌مپێرێك كاره‌باى مۆلیده‌ى ئه‌هلیى بۆ مانگی ئازار، به‌پێى نرخى گازوایل و كاتژمێره‌كانى كاركردن، دیاریکرا.

ئاماژەی بەوەشکردووە، کە نرخی هەر ئەمپێرێک کارەبای مۆلیدە بۆ مانگى رابردوو له‌نێوان حەوت هەزار و ٧٥٠ دینار بۆ هەشت هەزار و ٧٥٠ دینار ده‌بێت.

بەڕێوبەرایەتیی کارەباى سلێمانى دەشڵێت، به‌هۆی جیاوازیی كارپێكردنی مۆ‌لیده‌كانیش له‌ گه‌ڕه‌كێك بۆ گه‌ڕه‌كێكی دیكە، نرخی ئه‌مپێرێك كاره‌بای مۆ‌لیده‌ی جیاواز ده‌بێت.

محەمەد حەنون، وتەبێژی وەزارەتی بازرگانی عێراق بە رۆژنامەی سەباح-ی راگەیاند، پێش دەستپێکی وەرزی وەرگرتنی گەنم لەلایەن سایلۆکانەوە، حکومەت بڕی ٥٠٠ ملیار دیناری خستوەتەسەر ھەژماری بانکی وەزارەتی بازرگانی، بۆیەش لەئێستادا سایلۆکان لە سەرانسەری وڵاتدا ئامادەن بۆ وەرگرتنی گەنمی جوتیاران و راستەوخۆ خەرجکردنی پارەکانیان.

ساڵی رابردو ئاستی بەرھەمھێنانی گەنم لە عێراق  وھەرێمی کوردستان گەیشتە ملیۆنێک و ٢٠٠ ھەزار تەن کە ٤٠%ـی پێداویستی وڵات بوو بۆ گەنم، بەوھۆیەش حکومەتی عێراق ناچاربوو بۆ دابینکردنی بەشەئاردی مانگانەی ھاوڵاتیان لە ئوسترالیا، کەنەدا و ئەمریکا گەنم ھاوردە بکات.

وتەبێژی وەزارەتی بازرگانی دەڵێت، بۆ ئەمساڵ پێشبینی دەکرێت ئاستی بەرھەمھێنانی گەنم بگاتە نزیکەی ٤ ملیۆن تۆن، حکومەتیش بڕیاریداوە سەرجەم ئەو گەنمە بە پلەی یەک و ھەر تۆنێکیش بە ٨٥٠ ھەزار دینار وەربگرێت، جگەلەوەش سەرجەم دەروازەکان بەڕوی ھێنانی گەنم دادەخرێن تاوەکو بەرھەمی ناوخۆیی بوژانەوە بەخۆیەوە ببینێت.

 

دەقی پرسەنامەکەی قوباد تاڵەبانی...

بەڕێز کاک ئەحمەد ئاغای زیرۆغای ھەرکی 
بەڕێزان خێزان و خانەوادەی کۆچکردوو بەداخو پەژارەیەکی زۆرەوە ھەواڵی کۆچی دوایی خاتوو (جیلێ) کچی کەسایەتی دیار و نیشتمانپەروەر(ئەحمەد ئاغای زیرۆغای ھەرکی)م بیست. بۆ ئەم کۆستە، پرسە و سەرەخۆشی ئاڕاستەی بنەماڵە تێکۆشەرەکەتان دەکەم و بەشداری خەمی ئێوە و کەسوکارتانم.خوای گەورە سەبوریی و دڵنەوایی بەھەموو لایەک ببەخشێت و کۆچکردوو بەبەھەشتی بەرین شاد بکات و ئەمەش دوا ناخۆشیتان بێت.

انا للە و انا الیە راجعون

قوباد تاڵەبانی، سەرپەرشتیاری مەکتەبی سکرتارییەتی سەرۆک مام جەلال

دەقی پرسەنامەکەی سەرۆک بافڵ جەلال تاڵەبانی... 

بەرێز کاک ئەحمەد ئاغای زیڕۆ ئاغای ھەرکی، تێکۆشەری دیاری گەلەکەمان

بۆ کۆچی دوایی خاتوو (جیلێ) کچی بەڕێزتان، پرسە و ھاوخەمی قووڵی خۆمان ئاڕاستەی ئێوە و بنەماڵە تێکۆشەرەکەتان دەکەم کە نموونەی باڵای خەبات و قوربانیدانن لەپێناو کوردستان.

لەخوای گەورە داواکارم کۆچکردوو بە بەھەشتی بەرین شاد بکات و سەبووری و ئارامی بەھەموولایەک ببەخشێت.
دڵسۆزتان 
بافڵ جەلال تاڵەبانی 
سەرۆکی یەکێتیی نیشتمانیی کوردستان

سەرچاوەیەک لە حکومەتی ھەرێمی کوردستان بە کوردسات نیوزی راگەیاند، دوێنی ھەینی فوئاد حسێن، وەزیری دەرەوە و بەنگین رێکانی وەزیری ئاوەدانکردنەوەی عێراق بە نوێنەرایەتی ھەرێمی کوردستان لەگەڵ محەمەد شیاع سودانی سەرۆکوەزیرانی عێراق و وەزیری نەوتی عێراق کۆبوونەتەوە و رێککەوتوون کە ھەردوو وەزارەتی نەوت و سامانە سروشتییەکانی ھەرێمی کوردستان بەھاوبەشی نەوتی ھەرێم بفرۆشن.

بەگوێرەی رێککەوتنەکە لیژنەیەکی ھاوبەش دروست دەکرێت بۆ دۆزینەوەی کڕیار بۆ نەوتی ھەرێمی کوردستان، بە گوێرەی میکانیزمە تازەکە نەوتی ھەرێمی کوردستان بە ھەمان نرخی سۆمۆ دەفرۆشرێت، لەکاتێکدا پێشتر ھەرێمی کوردستان نەوتەکەی بە ھەرزانتر دەفرۆشت.

سەرچاوەکە ئەوەشی خستەڕوو، کە کۆبوونەوەکە ئیجابی بووە و گەیشتوون بە رێککەوتن لەسەر پرسی ھەناردەکردنی نەوتی ھەرێمی کوردستان. 

دەقی پیرۆزباییەکە...

جەژنی ئەکیتۆ و سەری ساڵی نوێی بابلی لە خوشک برایانی کلدانی، سریانی و ئاشوورییەکان پیرۆز دەکەم و ھیوادارم ئەم جەژنە لە دڵخۆشی و کامەرانیدا بەسەربەرن.

‎یەکێتیی نیشتمانیی کوردستان باوەڕی نەگۆڕی بە فرەیی و ھەمەڕەنگیی کوردستان ھەیە و بە رێزێکی زۆرەوە لە جیاوازییە ئاینی و نەتەوەییەکان دەڕوانێت. ئەمڕۆش لەم بۆنە تایبەتدا جەخت لە پاراستن و پەرەپێدانی گیانی تەبایی و پێکەوەژیان دەکەینەوە. ھیوادارم سەرباری جیاوازییەکانمان، ھەموومان پێکەوە بە رۆحێکی برایانەوە کار بۆ کوردستانێکی ئاوەدانتر و پرشنگدارتر بکەین.

‎بافڵ جەلال تاڵەبانی 
‎سەرۆکی یەکێتیی نیشتمانیی کوردستان

دەقی پیرۆزباییەکە...

بەبۆنەی جەژنی ئەکیتۆ و سەری ساڵی نوێی بابلی ئاشوورییەوە، پیرۆزباییەکی گەرم ئاراستەی گەلانی کلدانی، ئاشووری و سریانی لە کوردستان و عێراق و ھەموو جیھان دەکەم، ھیوای ساڵێکی پڕ لە ئاشتی و ئارامی بۆ ھەموو لایەک دەخوازم.

کوردستان شانازی بەوەوە دەکات کە پێکەوەژیانی ئاشتییانەی نێوان پێکھاتە نەتەوەیی و ئاینییە جیاوازەکانی تێدا بەرجەستە بووە، بەم مێژووە پڕشنگدارەوە بە دڵنیاییشەوە لە داھاتووشدا بەم جۆرە بەردەوام دەبێت.

لەم قۆناغەدا ئەرکی ھەموو لایەکمانە ئەم کلتور و روحی پێکەوەژیانە زیاتر پەرە پێ بدەین و پێکەوە بەرەو ئایندەیەکی گەشتر ھەنگاوبنێین.

قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال

رۆژی یەکشەممە دووی نیسان، ئەنجومەنی نوێنەرانی عێراق کۆدەبێتەوە و بەپێی کارنامەی کۆبوونەوەکە، ئەنجومەنی نوێنەران خوێندنەوەی یەکەم بۆ پڕۆژە یاسای بەپارێزگابوونی ھەڵەبجە دەکات.

رۆژی ١٣ی مانگی ئاداری ئەمساڵ، ئەنجومەنی وەزیرانی عێراق بە پارێزگابوونی ھەڵەبجەی پەسەندکرد، بەوەش ھەڵەبجە بوو بە پارێزگای ژمارەی ١٩ی عێراق، ئەوکات بڕیاردرا پڕۆژە یاسای بەپارێزگابوونی ھەڵەبجە رەوانەی ئەنجومەنی نوێنەران بکرێت تاوەکو بەیاسایەکی فیدڕاڵی وەکو پارێزگای ژمارە ١٩ی عێراق ھەژمار بکرێت.

لە بەرەبەیانی ئەمڕۆوە شەپۆلێکی بەفربارین ناوچە شاخاوییەکانی سنوری بامەڕنێ و ئامێدی و کانی ماسی و چیای پێرس لە قەزای ئاکرێی سەر بە پارێزگای دھۆک گرتووەتەوە و پلەکانی گەرما بۆ ژێر سفری سلیزی دابەزیوون.

بەڕێوەبەرایەتی گشتی کەشناسی و بومەلەرزەزانی ھەرێیش بڵاویکردەوە، ئەمرۆ ئاسمانی ھەرێمی کوردستان ھەوری تەواو دەبێت و لە زۆربەی ناوچەکان باران و لە شاخەکانیش بەفر دەبارێت.

کەشناسی ھەرێم پێشبینیکردووە لە سنوری پارێزگای دھۆک دابارین زیاتر بێت و لە ھەندێ ناوچەش ئەگەری بەرزبوونەوەی تۆز و خۆڵ ھەیە، بەشێوەیەکی گشتیش پلەکانی گەرما نزمدەبنەوە و لە ناوچە شاخاوییەکان دەچێتە ژێر سفری سیلیزی.

بەپێی پێشبینییەکانی کەشناسی رۆژی شەممە ئاسمان نیچمە ھەور دەبێت و لە ناوچە شاخاوییەکان ئەگەری نمەباران ھەیە.