کوردستان
لە سلێمانی رێوڕەسمی بڵاوکردنەوەی کتێبی بیبلیۆگرافی خەڵاتی زێڕینی بلە بەڕێوەچوو
دامەزراوەی بیرمەند و روناکبیر ئیبراهیم ئەحمەد رێورەسمی دابەشکردنی کتێبی (بێبلۆگرافیای خەڵاتی زێڕینی بلە) بەڕێوەبرد
لە ساڵیادی کۆچی دوایی بیرمەند و نووسەر و سیاسەتمەدار و ڕۆماننووسی بەناوبانگ، ئیبراهیم ئەحمەد، دەزگای ئیبراهیم ئەحمەد مەراسیمێکی دابەشکردنی کتێبی لە شاری سلێمانی بەڕێوەبرد، بە ناوی "بێبلۆگرافیای خەڵاتی زێڕینی بلە" کە کتێبەکە هەموو روداوەکانی ساڵانی پێش خەڵاتەکە بە بەڵگە دەکات کە ساڵانە لە 8ی نیسان بەڕێوەدەچێت.
شاناز ئیبراهیم ئەحمەد خانمی یەکەمی عیراق لە وتارێکدا باسی لە شاکارەکانی بیرمەند و روناکبیر ئیبراهیم ئەحمەد کرد لە بواری سیاسی و فیکری و ئەدەبی و رۆڵی لە بەرەنگاربوونەوەی نادادپەروەری و ستەمکاری و بڵاوکردنەوەی ئازادی و دادپەروەری و ئاماژەیکرد، بە بیرۆکەی پێشکەشکردنی خەڵاتی (بلە) بۆ بەدیهێنانی خەونی خوالێخۆشبوو ئیبراهیم ئەحمەد بۆ ستایشکردن و پێزانین بۆ هەر کەسێکی دڵسۆز کە وەک سەربازێکی ون لە خزمەتی گەلی کوردستان کاری کردووە.
خانمی یەکەمی عیراق ئاماژەی بەوەشکرد، عیراق پڕە لەو کەسایەتیانەی کە شایەنی دەستخۆشی و دانپێدانان و شکۆن بۆ هەڵوێستە نیشتمانپەروەرییە دڵسۆزەکانیان، جەختیشیکردەوە کە ئەوان وەک گەوهەر بەنرخن کە ماندوونەناسانە کاردەکەن بۆ خزمەتکردنی گەلەکەمان.
شاناز ئیبراهیم ئەحمەد باسی لە قۆناغەکانی دامەزراندنی ئەم فێستڤاڵەکرد کە لە ساڵی 2002 وە بەهای باڵای بۆ براوەی خەڵاتەکان بەخشیوە، چ لە ناوخۆی هەرێمی کوردستان و چ بۆ کەسایەتییە نێودەوڵەتییەکان کە لە کاتە سەختەکانی خەباتیان دژی دەسەڵاتی دیکتاتۆری پشتیوانی و هاوسۆزی خۆیان لەگەڵ گەلی کوردمان دەربڕیوە.
لە میانی مەراسیمەکەدا کە ژمارەیەک لێپرسراو ئەوانەی لە ساڵانی پێشوودا خەڵاتەکانیان بەدەستهێنابوو ئامادەبون ، خانمی یەکەمی عیراق روناکی خستە سەر لایەنە گەشاوەکانی ژیانی بیرمەند و سیاسەتمەدار ئیبراهیم ئەحمەد و بەرهەمە ئەدەبییەکانی، بەتایبەتی رۆمانە بەناوبانگەکەی بە ناوی "ژانی گەل" کە لە ساڵی 1956دا چاپ و بڵاوکرایەوە.
هەروەها خانمی یەکەم گەلەری زاموای کردەوە کە ماڵی بیرمەند و روناکبیر ئیبراهیم ئەحمەدە کە تابلۆی هونەری جیاواز لەخۆدەگرێت .
ئەمشەو لە سنوری سەرگەڕان شەش تراکتۆری جوتیارانی کورد لەلایەن سوپای عیراق دەستی بەسەردا گیرا.
یەکێک لە جوتیارانی گوندی شەناغەی سەر بە ناحیەی سەرگەڕان بە کوردسات نویزی راگەیاند: ئەو پارچە زەوییەی سەرقاڵی كێڵانی بووین هیچ كێشەیەكی یاسایی نییە، بەڵام سوپای عیراق هەڵیانکوتاوەتە سەر زەوییەکانمان و دەستیان بەسەر شەش تراکتۆردا گرتووە.
ئاماژەی بەوەشکرد، لەساڵی 2021 پارچە زەوییەكە بە یاسا گەڕێندراوەتەوە بۆ خاوەنە رەسەنەكەی، راشیگەیاند، لەئێستادا لایەنە پەیوەندیدارەكانمان ئاگادار كردووەتەوە و سەرقاڵی چارەسەری كێشەكەن.
رێبوار تەها پارێزگاری کەرکوک بڕیاریدا سبەینێ بکاتە پشووی رەسمی لە کەرکوک، هاوکات زانکۆکانی سەر پشک کرد لە بڕیاردان بۆ پشوو بەهۆی بوونی تاقیکردنەوەکان
ئاماژەی بەوەشکرد، سبەینێ چوارشەممە، 9ی نیسان، لە دیوانی پارێزگا و هەموو فەرمانگەکان پشووە، بەڵام فەرمانگە خزمەتگوزارییەکان ئەو زانکۆیانەی تاقیکردنەوەیان هەیە پشوەکە نایانگرێتەوە
دەست بەسەر بڕی 30 کیلۆگرام ماددەی هۆشبەردا گیرا، بەڕێوەبەرایەتی گشتی ئاسایشی سلێمانیش دەڵێت؛ تۆمەتباری بازرگان کەسێکی بیانی بووە و دەیویست بۆ تورکیا بیگوازێتەوە.
بەڕێوەبەرایەتی گشتی ئاسایشی سلێمانی بڵاویکردەوە، بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم بەهەماهەنگی بەڕێوەبەرایەتی گشتی ئۆپراسیۆنەکانی ئاسایش و بەڕێوەبەرایەتی ئاسایشی بازگەکان توانییان لەچالاکییەکی سەرکەتوودا دەستبەسەر بڕی (30)کیلۆگرام ماددەی هۆشبەر لەجۆری(کریستاڵ)دا بگرن.
ئاماژەی بەوەشکرد، شەوی 6/4/2025 لەسەر بنەمای زانیاری پێشوەختە و چاودێری ووردی هێزەکانمان لەسەر سنورەکانی هەرێمی کوردستانەوە تا گەیشتن بە یەکێک لەبازگەکان، لەچوارچێوەی ئۆپراسیۆنێکی سەرکەوتوودا توانرا رێگری لەگواستنەوەی بڕی (30)کیلۆگرام ماددەی هۆشبەر بکرێت.
بەڕێوەبەرایەتی ئاسایشی سلێمانی راشیگەیاند، تۆمەتباری بازرگان کەسێکی بیانی بوو، کەبەنیازی گواستنەوەی ماددە هۆشبەرەکە بوو بۆ وڵاتی تورکیا و دوای ئەنجامدانی پشکنین و دۆزینەوەی ماددەکە توانرا بازرگانەکە دەستگیربکرێت و دەستبەسەر سەرجەم ماددە هۆشبەرەکە بگیرێت.
ئەوەشی خستەڕوو، لەئێستادا تۆمەتبار بەبڕیاری دادوەر بەماددەی (25) لەیاسای بەرەنگاربوونەوەی ماددە هۆشبەرەکان و کارتێکارە ئەقڵییەکان ڕاگیراوە و لێکۆڵینەوە لەدۆسیەکەی بەردەوامە.
بەهۆی كەمبونەوەی بەرهەمی تەماتە، وەزارەتی كشتوكاڵی هەرێم بڕیاریدا بە هەڵگرتنی باج و قەدەغە لەسەر هاوردەكردنی تەماتەی هاوردە.
وەزارەتی كشتوكاڵ و سەرچاوەكانی ئاوی هەرێم نوسراوێكی ئاراستەی وەزارەتی دارایی و بەڕێوەبەرایەتی گشتی گومرگ كردووە، لە نوسراوەكەدا هاتووە دوای بەدواداچوون بۆ بەرهەمی تەماتە، دەركەوت لە پارێزگاكان و ئیدارە سەربەخۆكان بەرهەمی تەماتە لە بازاڕەكاندا كەمبوەتەوە، بەوهۆیەشەوە نرخەكەی بەرزبوەتەوە، لەبەرئەوە پاڵپشت بەیاسای پاراستن و پێشخستنی بەروبوومی كشتوكاڵ، بڕیاریاندا بە هەڵگرتنی باج و قەدەغە لەسەر هاوردەكردنی تەماتە لە دەرەوەی وڵات.
هاوكات ئەنجومەنی وزاری ئابووری عیراقیش رایگەیاندووە، بڕیاردراوە بۆ لەمەودوا رێگە نەدرێت بە هاوردەكردنی هێلكە لە وڵاتانی دەرەوە بۆ ناو بازاڕەكانی عیراق، بەڵام رێگە دەدرێت بە هاوردەكردنی تەماتە و پەتاتە و كەلەرم و كاهو و چەوەندەر، بەو پێیەی وەرزی كشتوكاڵی بۆ ئەو بەرهەمانە كۆتایی هاتووە.
لەمەودوا لە هەولێر مامەڵکردن بەهەموو جۆرە دراوێکی ئەلیکترۆنی و کانزایی قەدەغەیە، ئاسایشی هەولێریش رایدەگەیەنێت؛ هەر کۆمپانیا و هەر کەسێک مامەڵەی پێوەبکات روبەڕوی لێپرسینەوە دەبێتەوە.
بەڕێوەبەرایەتی گشتی ئاسایشی هەولێر لە راگەیەنراوێکدا بڵاویکردەوە، مامەڵەکردن بە هەموو دراوێکی ئەلیکترۆنی و کانزایی(فۆڕێکس) و (USTD) یاسایی نییە و قەدەغەیە.
ئاسایشی هەولێر راشیگەیاندووە، کۆمپانیاکانی فۆڕێکس و دراوی ئەلکترۆنی لە هەرێمی کوردستان و عیراق مۆڵەتی رەسمییان نییە، هەروەها بەپێی رێنمایی بانکی ناوەندی عیراق و هەردوو وەزارەتی دارایی هەرێم و فیدرال، هیچ یاسا و رێنماییەک نییە بۆ رێکخستنی ئەم جۆرە مامەڵانە، بۆیە رێگە پێدراونییە.
ئاسایشی هەولێر داوا لە هاووڵاتیان دەکات بە دووربن لەمامەڵەکردن بەو جۆرە دراوانە بۆ ئەوەی روبەڕوی زیانی مادی نەبنەوە، چونکە لەماوەکانی رابردودا ژمارەیەکی زۆری هاووڵاتی زیانی مادییان بەرکەوتووە.
لە کۆتایی راگەیەنراوەکە ئاسایشی هەولێر، ئاماژەی بەوەشکردووە، هەر کۆمپانیا و هەر کەسێک لەرێگەی سۆشیال رێکلام بۆ بۆ کاری فۆڕێکس و دراوە ئەلیکترۆنیەکان بکەن، روبەڕوی لێپرسینەوەی یاسایی دەبنەوە.
بۆ بەشداریكردن لە كۆڕبەندی ئابوریی دێڵفی، قوباد تاڵەبانی جێگری سەرۆكی حكومەتی هەرێم بەرەو یۆنان بەرێكەوت.
قوباد تاڵەبانی، بە یاوەری هەریەك لە وەزیری پلاندانان و جێگری لێپرسراوی فەرمانگەی پەیوەندییەكانی دەرەوە، بەشداری لە كۆڕبەندی ساڵانەی ئابووری دێڵفی دەكات، كە ژمارەیەكی زۆر لە سەرۆك و سەرۆك وەزیران و بەرپرسانی باڵا و بیرمەندان و ئەكادیمیستانی جیهان بەشداری تێدا دەكەن.
لە كۆڕبەندەكەدا گفتوگۆ دەكرێت لەبارەی دوایین پێشهاتە سیاسی و سەربازی و ئابوورییەكان و پلان و ستراتیژی گشتگیر بۆ چارەسەركردنی قەیرانەكان، قوباد تاڵەبانیش بۆ سێهەمین ساڵە بەشداری لەو كۆربەندە نێودەوڵەتییەدا دەكات.
قائیمقامی سلێمانی سەردانی بازاڕی دارەسوتاوەکەی کرد و لە نزیکەوە چاودێری پڕۆسەی پاککردنەوەی پاشماوەی ئاگرەکەی کرد، هەروەها سوپاسی تیمەکانی بەرگری شارستانی و شارەوانی کرد کە لە سەرەتای روداوەکەوە بەردەوام لە کاردان.
ئاوات محەمەد، قائیمقامی سلێمانی، ئەمڕۆ سێشەممە سەردانی گوزەری دارەسوتاوەکەی کرد و رایگەیاند کە تیمەکانی شارەوانی توانای کارکردنیان بۆ سێ هێندە زیاد کراوە، بە جۆرێک زۆربەی ئامێرەکانی شارەوانی بەردەوام لە کاردان بۆ ئەوەی بە زوترین کات پڕۆسەی پاککردنەوەکە تەواو بکەن.
لە میانەی سەردانەکەیدا، قائیمقامی سلێمانی سوپاسی قوباد تاڵەبانی و سکرتاریەتی سەرۆک مام جەلالی کرد کە سەرپەرشتی پڕۆسەکە دەکەن و ئەرکی قەرەبووکردنەوەی زیانلێکەوتووانیان گرتووەتە ئەستۆ.
هاوکات، بەڵێنی بە کاسبکارانی ناوچەکە دا کە هەمو هەوڵێک دەدات تا بە زووترین کات بگەڕێنەوە سەر کارەکانیان و ژیانی ئاسایی خۆیان.
شایەنی باسە، ئاگرەکەی بازاڕی دارەسوتاوەکە زیانێکی زۆری لێکەوتەوە و لەلایەن چەندین تیمی فریاکەوتن و بەرگری شارستانییەوە کۆنتڕۆڵ کرا، ئێستاش بەردەوام کارەکانی پاککردنەوە و هەڵسەنگاندنی زیانەکان بەڕێوە دەچێت.
کەشناسیی هەرێم پێشبینی نوێی بۆ کەشوهەوای ئەمڕۆ و سبەینێ راگەیاند و ئاماژەی بەوەکردووە، شەپۆلێکی تاوەباران و هەورەبروسکە ناوچە جیاوازەکانی هەرێم دەگرێتەوە.
کەشناسیی هەرێم رایگەیاندووە، ئەمڕۆ سێشەممە، بە گشتی ئاسمان هەور و نیمچەهەور دەبێت، لەگەڵ تاوەبارانی پچڕپچڕ، هەروەها ئەگەری هەورەبروسکە هەیە، کاریگەری ئەم ناجێگیرییە سەرەتا لە سنوری پارێزگای دهۆک و ناوچە شاخاوییەکانی سەرهەڵدەدات، پاشان درێژ دەبێتەوە بۆسەر بەشێک لە سنوری پارێزگای هەولێر و لە شەودا دەگاتە سنوری ئیدارەى راپەڕین.
ئاماژەی بەوەشکردووە، سبەینێ چوارشەممە، لە کاتەکانی بەیانی تاوەکو نیوەڕۆ، لە بەشێک لە ناوچە سنوریی و شاخاوییە بەرزەکان ئەگەری کەمێک نمەباران و هەورەبروسکە هەیە، لە دوای نیوەڕۆوە دووبارە کاریگەری ئەم ناجێگیرییە زیاد دەکات لە تەواوی هەرێمدا، هەروەها هەندێک کات ئەگەری بەرزبوونەوەی تۆز و خۆڵ هەیە لەگەڵ بارانباریندا.
کەشناسیی دەشڵێت، هەورەبروسکە لە چەند ناوچەیەکی وەک شاخ و لوتکەی شاخ و گردۆڵکە و دەشتاییەکاندا مەترسیدارە.
ئەوەش هاتووە، ئەمڕۆ و سبەینێ خێرایی با زیاد دەکات و هەندێکجار دەگاتە سەروو 30 کیلۆمەتر لە سەعاتێکدا، پلەکانی گەرماش بەگشتی جێگیر دەبن، تەنها لەو ناوچانەی کە کەش تیایاندا ناسەقامگیرە، نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی:
هەولێر: 30 پلەی سیلیزی
سلێمانی: 29 پلەی سیلیزی
دهۆک: 28 پلەی سیلیزی
کەرکوک: 34 پلەی سیلیزی
زاخۆ: 29 پلەی سیلیزی
هەڵەبجە: 30 پلەی سیلیزی
سۆران: 28 پلەی سیلیزی
حاجی ئۆمەران: 18 پلەی سیلیزی
گەرمیان: 35 پلەی سیلیزی
شارەوانی سلێمانی رایگەیاند، پێویستە لەماوەی هەفتەیەکدا ئەو یاری جەمپانەی لە گەڕەک و شەقامەکاندا دانراون لاببرێن.
شارەوانی سلێمانی رایگەیاند، پاڵپشت بە رێنماییەکانی قایمقامییەتی پارێزگای سلێمانی دانانی یاری جەمپ لەناو گەڕەکەکاندا و لەسەر موڵکی گشتی هیچ مۆڵەتێکی یاسایی نییە و رێگەپێدراو نییە.
ئاماژەی بەوەشکردووە، بەهۆی ئەو روداوە نەخوازراوانەی لێیان دەکەوێتەوە، ئەو یارییانە هۆکارێکن بۆ زیانگەیاندن بە تەندروستی منداڵان و ئازاردانیان، سەرباری ئەوەش ساڵانە لەگەڵ هاتنی وەرزەکانی بەهار و هاوین، دیاردەی دانانی جەمپ لەناو گەڕەکەکانی شاری سلێمانی بەردەوام روو لە هەڵکشان دەکات.
شارەوانی سلێمانی راشیگەیاندووە، ئاگاداری خاوەنەکانیان دەکاتەوە، لەماوەی هەفتەیەکدا هەستن بە لادانی زیادەڕەوییەکانیان، بەپێچەوانەوە پاش تێپەڕاندنی ئەو ماوەیە و لە ئەگەری پابەندنەبوون بەم ئاگادارییەوە، بەشی لابردنی زیادەڕەویی شارەوانی هەڵدەستێت بە لابردن و تێکدانی ئەو جەمپانەی جێگیرکراون.
بافڵ جەلال تاڵەبانی، سەرۆکی یەکێتیی نیشتمانیی کوردستان، لە یادی کۆچی دوایی مامۆستا ئیبراهیم ئەحمەد، یەکێک لە دامەزرێنەرانی بزووتنەوەی سیاسی کورد، پەیامێکی بڵاوکردەوە.
بافڵ تاڵەبانی لە پەیامەکەیدا رایگەیاند: "وەک هەمیشە بە وەفاداریمانەوە یادی مامۆستا ئیبراهیم ئەحمەد بەرز رادەگرین و ژیان و کۆشش و خەباتی لەبواری رووناکبیری و سیاسی، هاندەرمان دەبێت تا بەهەمان رۆحیەتی بەرزی نەتەوەیی خزمەتی گەل و وڵاتەکەمان بکەین."
سەرۆکی یەکێتی، مامۆستا ئیبراهیمی وەک "سیاسەتمەدار و رۆشنکەرەوەی رێگای راست و رەوانی خەباتی کوردایەتی" وەسف کرد و ئاماژەی بەوەدا کە "هەمیشە ئامۆژگاری و رێنوێنییەکانی دەبێت هاندەری هەموولایەکمان بێت بۆ یەکڕیزی و برایەتی و کارکردنی پێکەوەیی لەپێناو خزمەتکردنی خەڵکە خۆشەویستەکەمان و هێنانەدی ئامانجە باڵاکان و پاراستنی کوردستانەکەمان."
لە کۆتایی پەیامەکەیدا، بافڵ تاڵەبانی جەختی کردەوە: "یاد و یادەوەری مامۆستا ئیبراهیم ئەحمەد هەمیشە لە دڵ و دەرونماندا زیندووە و بەنەمری دەمێنێتەوە."
بەپێی ڕاگەیاندراوێکی وەزارەتی دارایی و ئابووری هەرێمی کوردستان کە ئەمڕۆ بڵاوکرایەوە، رۆژی پێنجشەممە، موچەی مانگی ئازاری مامۆستایانی گرێبەستی وەزارەتی پەروەردە لە سەرتاسەری هەرێمی کوردستان دابەش دەکرێت.
هەر بەپێی راگەیاندراوەکە، لە هەمان رۆژدا موچەی مانگەکانی کانوونی دوەم و شوباتی مامۆستایانی گرێبەستی وەزارەتی خوێندنی باڵاش لە سەرتاسەری هەرێمی کوردستان دابەش دەکرێت.
وەزارەتی دارایی و ئابووری ڕوونی کردووەتەوە کە سەرجەم تەمویلی ئەم موچانە لە داهاتی ناوخۆی هەرێمی کوردستان خەرج دەکرێت.
حکومەتی هەرێمی کوردستان رایگەیاند، سبەینێ لە سەرجەم دامودەزگا حکومیی و ناحکومییەکاندا پشووی رەسمی دەبێت.
حکومەتی هەرێم رایگەیاند، سبەینێ چوارشەممە، 9ی نیسان، بەبۆنەی ساڵیادی رووخانی رژێمی بەعسی دیکتاتۆر و ئازادکردنی عێراق، لە سەرجەم دامودەزگاكانی هەرێمی كوردستان پشووی رەسمییە.
ئاماژەی بەوەشکردووە، رۆژی پێنجشەممە، 10ی نیسان، دەست بە دەوامی رەسمی دەکرێتەوە.
حزبی بەعس، ئەو حزبەدیکتاتۆرە بوو کە 4ی نیسانی 1947 لەسەر دەستی میشێل عەفلەق، سەلاح بەیتار، جەلال سەید و وەهیب غانم لە سوریا دامەزرا، پابەندی بیری ناسیونالیستی عەرەبی بوو، لە کۆنگرەی 1947دا سێ پەیامیان هەبوو، کە گرنگترینیان بەلای خۆیانەوە ئەوە بوو، دەیانویست هەموو عەرەب لەژێر چەتری یەک دەوڵەتدا کۆبکەنەوە.
حزبی بەعسی عیراق لە ساڵی 1958 بە سەرۆکایەتی عەبدولسەلام عارف کودەتای بەسەر سیستمی پاشایەتی عیراقدا کرد، تاوەکو لە ساڵی 1963 جارێکی دیکە کودەتایەکی دیکە بەسەرکردایەتی عەبدولسەلام عارف ئەنجام درا، تاوەکو لە ساڵی 1969 بەعسییەکان ئەحمەد حەسەن بەکریان کردە سەرۆک کۆمار و سەدام حسێنی دیکتاتۆریش لە ساڵی 1979دا بوو بە سەرۆک کۆمار، کە دواین سەرۆکی ئەو حزبەش بوو.
دواجار لە 9ی نیسانی ساڵی 2003دا روخا و پۆل بریمەر حاکمی مەدەنی ئەمریکی لە عێراق، لە مانگی ئایاردا ە رەسمی هەڵوەشانەوەی حزبەکەی راگەیاند.
یەكێتی مامۆستایان رایگەیاند، بەهۆی پێنەدانی مافەكانیان پڕۆسەی خوێندن روبەڕوی كێشە بووەتەوە و داوا لە حكومەت دەكات موچە و مافەكانیان بۆ دابین بكات.
یەكێتیی مامۆستایان كوردستان لە راگەیەنراوێكی پێنج خاڵیدا داوا لە حكومەتی هەرێم دەكات هاوشێوەی مامۆستایان لە عیراق پشتیوانی لە مافە رەواكانی ئەو توێژە گرنگەی كوردستان بكات و موچە نەدراو و پاشكەوتكراوەكانیش بگەڕێتەوە.
هاوكات یەكێتییەكە داوای زیادكردنەوەی موچە و دەرماڵەی مامۆستایانی كردووە كە زیاتر نۆ ساڵە واتە لە 2016ەوە راگیراوە، هاوكات داوای كردووە بەپەلە پڕۆسەی بە هەمیشەیكردنی مامۆستایانی گرێبەست و پڕكردنەوەی شوێنی مامۆستایانی خانەنشین بخرێتە بواری جێبەجێكردنەوە.
لە راگەیەنراوەكەی یەكێتی مامۆستایاندا هاتووە، سەردەمی چاونوقاندن لە ئاست داواكاریی رەوای مامۆستایان بەسەرچووە و بە پێچەوانەشەوە ژمارەیەك رێكاری یاسایی و رێگەپێدراو هەیە كە بۆ بەدەستهێنانی مافەكانی مامۆستایان دەگیرێتەبەر.
هەشت تۆمەتبار بەهۆی روداوی شەڕە تەقەکەی دوێنێ شەوی ناحیەی گردەسێن دەستگیرکراون، پۆلیسی ئاکرێش دەڵێت: لێکۆڵینەوە لە روداوەکە بەردەوامە.
بەڕێوەبەرایەتی پۆلیسی ئاکرێ رایگەیاند: دوێنێ شەو دوای ئەوەی بنکەی پۆلیسی گردەسێن ئاگادارکرایەوە، لە سەنتەری ناحییەکە روداوێکی تەقەکردن هەیە، پۆلیسی گردەسێن بە هەماهەنگی سەرجەم هێزە ئەمنییەکان گەیشتنە شوێنی روداوەکە بۆ کۆنترۆڵکردنی بارودۆخەکە.
ئاماژەی بەوەشکرد، هەشت تۆمەتبار بەهۆی روداوەکەوە دەستگیرکراون و دەست بەسەر چەکەکانیشیان گیراوە.
پۆلیسی ئاکرێ ئەوەشی خستەڕوو، بە فەرمانی دادوەر پەراوی لێکۆڵینەوە بۆ تۆمەتبارەکان کراوەتەوە و لێکۆڵینەوەش لە روداوەکە بەردەوامە.
جێگەی ئاماژەیە، دوێنێ شەو لەنێوان دوو بنەماڵە شەرە تەقە رویدا و چەند کەسێک بەهۆی روداوەکە برینداربوون.
بەبۆنەی رۆژی جیهانی تەندروستی خانمی یەکەمی عیراق، پەیامێکی پیرۆزبایی ئاڕاستەی کارمەندانی بواری تەندروستی دەکات و رایدەگەیەنێت؛ سەرباری جەنگ و کەمیی پێداویستی و ئاڵنگارییە جۆراوجۆرەکان، بەردەوامن لە خزمەتکردن و پاراستنی ژیانی تاکەکان.
شاناز ئیبراهیم ئەحمەد خانمی یەکەمی عیراق رایگەیاند: لە رۆژی جیهانی تەندروستیدا رێز و پێزانین دەردەبڕین بۆ هەموو کارمەندانی بواری چاودێری تەندروستی لە عیراق کە سەرباری جەنگ و کەمیی پێداویستی و ئاڵنگارییە جۆراوجۆرەکان، بەردەوامن لە خزمەتکردن.
وتیشی؛ سەرباری ئەو ئالەنگارییانە بینیمان کە چەندین ساڵە پڕاوپڕ بوون لە داهێنان و خۆڕاگری لەپێناو پێشکەشکردنی خزمەتگوزاری تەندروستی و پاراستنی ژیانی تاکەکان و لێهاتووییان لەمامەڵەکردن لەگەڵ دژوارترین بارودۆخەکاندا.
شاناز ئیبراهیم ئەحمەد ئاماژەی بەوەشکرد، ئەمڕۆش لەکاتێکدا بنیاتی ژێرخانی تەندروستی و چاککردنی هۆیەکانی چاودێری تەندروستی رێکدەخەینەوە تا هەموو عیراقییەک بتوانێ لە نیشتمانی خۆیدا چارەسەر وەربگرێت، زۆر گەشبینم.
خانمی یەکەمی عیراق ئەوەشی خستەڕوو، پاڵپشت بەدروشمی ئەمساڵی رۆژی جیهانی تەندروستی، (سەرەتایەکی تەندروست و دوارۆژێکی پڕشنگدار) تەنیا شانازی بەو پاڵەوانانەوە ناکەین، بەڵکو بەڵێنی پابەندبونمان بە پاراستنی تەندروستی دایکان و کۆرپەلە دووپات دەکەینەوە تا ئەوە مسۆگەر بکەین کە هەر کۆرپەلەیەکی ساوا ژیانی پشتبەستوو بە هێز و چاودێریکردن دەست پێ بکات.