کوردستان
قوباد تاڵەبانی جێگری سەرۆکی حکومەتی هەرێمی کوردستان بە بۆنەی ساڵیادی کارەساتی 1ـی شوباتەوە پەیامێکی بڵاوکردەوە و رایگەیاند: یەکی شوبات بۆ هەمیشە وەک سیمبولی هاوچارەنووسی و یەکڕەنگیمان لە یادەوەریی مێژووییماندا دەمێنێتەوە.
لە پەەیامەکەی قوباد تاڵەبانیدا هاتووە: لە یەکی شوباتی 2004دا خوێنی شەهیدەکانمان یەکڕەنگ بوون. تیرۆریستان و خۆکوژان جیاوازییان لەنێوان خوێنی هاوڵاتییەکی مەدەنی و خوێنی کادر و سەرکردەیەکی یەکێتی و خوێنی کادر و سەرکردەیەکی پارتی نەکرد.
دەشڵێت: یەکی شوبات بۆ هەمیشە وەک سیمبولی هاوچارەنووسی و یەکڕەنگیمان لە یادەوەریی مێژووییماندا دەمێنێتەوە.
خەڵاتی نۆبڵی ئاشتی ساڵانە لە ئۆسلۆی پایتەختی نەرویج پێشوازی لە کاندیدان و براوەکانی دەکات و بۆ ئەمساڵ 2025یش دوو کەسایەتی کورد، ئیلهام ئەحمەد و شێروان شێروانی کاندیدن بۆ ئەو خەڵاتە.
شێروان شێروانی یەکێک لە زیندانیانی بادینانە و ئیلهام ئەحمەدیش بەرپرسی پەیوەندییەکانی دەرەوەی بەڕێوەبەرایەتیی خۆسەری باکوور و رۆژهەڵاتی سووریایەوهەردوکیان کاندیدن بۆ وەرگرتنی خەڵاتی نۆبڵی ئەمساڵ.
لە ساڵی 1901ـەوە کە خەڵاتی نۆبڵ بۆ ئاشتی دابەش دەکرێت، تاوەکو ئێستا 103 کەس و 27 دامەزراوە ئەو خەڵاتەیان وەرگرتووە و دووجار خەڵاتەکە بە هاوبەشی دراوە بە سێ کەس. 18 ژن لەنێو براوەکانی خەڵاتەکەدان.
رۆژی 7ـی تشرینی یەکەمی 2020، رۆژنامەنووس، شێروان شێروانی لە دهۆک دەستگیرکرا و تا ئێستاش لە زینداندایە.
لە ساڵانی رابردوشدا ژنە چالاکوان و زیندانی سیاسی کورد، نێرگز محەمەدی بووە براوەی خەڵاتی نۆبڵی ئاشتی.
21 سال لەمەوبەر یەکەم رۆژی جەژنی قوربان بەهۆی تەقینەوەیەکەوە لەشاری هەولێرە 105کەس بوونە قوربانی
21 ساڵ لەمەوبەر لە 1ی شوباتی ساڵی 2024، كە هاوكات بوو لەگەڵ یەكەم رۆژی جەژنی قوربان، لە كاتی جەژنە پیرۆزەی هاووڵاتییان و بەخێرهاتنی میوانەكان، لە هەردوو بارەگای مەڵبەندی سێی یەكێتیی نیشتمانیی كوردستان و لقی دووی پارتی دیموكراتی كوردستان لە شاری هەولێر دوو تەقینەوەی خۆكوژی روویاندا، بەوهۆیەشەوە 105 كەس لە هەردوو بارەگاكە شەهیدبوون، 246 كەسیش برینداربوون.
ئەوەش لە كاتێكدابوو لە كاتی جەژنە پیرۆزە، چەند خۆكوژ و تیرۆرستێك بە پشتوێنی بۆمبڕێژكراوەوە لە یەك كاتدا لە ناو مەڵبەندی یەكێتی و لقی پارتی خۆیان دەتەقێننەوە.
یەكێتیی نیشتمانیی كوردستان رایدەگەیەنێت، ساڕێژبوونی برینی كارەساتی یەكی شوبات هەر یەكێتی و پێكەوەیی و خۆپاراستنە لە پیلانی دوژمنان.
مەكتەبی سیاسیی یەكێتیی نیشتمانیی كوردستان لە راگەیەنراوێكدا بۆ یادی شەهیدانی یەكی شوبات ئاماژەی بەوە كردووە، كردەوەی تیرۆرستی دوژمنانی گەلی كورد لە دوو بارەگای مەڵبەند و لق، دەرخەر و دووپاتكردنەوەی ئەو راستییە تاڵەبوو كە نەیارانی ئەم میللەتە لە تیرۆرستان و دوژمنان هیچ جیاوازییەك لە نێوان رەنگ و ئاماژەكان ناكەن و هەموو كورد لای ئەوان یەكە و مایەی یەك ئامانجی پەلاماردان و كوشتنن.
راشیگەیاندووە، بێگومان ساڕێژبوونی كۆی زامەكانیش هەر یەكێتی و پێكەوەیی و خۆپاراستنە لە پیلانی دوژمنان و نەیارانی ئەزموونی هەرێمی كوردستان و پتەوكردنی پایەكانی حوكمڕانییە لەرێی راستكردنەوەی رێڕەوەكەی و مشتوماڵكردنی ئەدا و كاراكردنێتی لە خزمەتی ژیان و گوزەرانی خەڵك، بێ جیاوازی بە هەموو رەنگەكانەوە.
پەیامنێری کوردسات نیوز لە بەغداد رایگەیاند، ئەمشەو وەفدێکی تەکنیکی وەزارەتی دارایی هەرێم دەگاتە بەغداد و سبەی سەعات 8ـی بەیانی لەگەڵ تەکنیکی دارایی عیراق دەستدەکەن بە کارەکانیان بۆ رێکخستنەوە و دانانی لیستی کۆتایی تایبەت بە موچەی موچەخۆرانی هەرێم.
پەیامنێری کوردسات نیوز ئاماژەی بەوەشدا، لە کۆبونەوەکەی ئەمڕۆی نێوان وەفدی هەرێم و حکومەتی عیراق، وەزیری دارایی عیراق پێی راگەیاندوون کە سبەینێ ناتوانێت ئامادەی کۆبونەوەکان بێت و ئەوەشی وتووە، ئەگەر گرفتەکانی ناو لیستی موچە لەسەر ئەو بنەمایانەی کە داوای کردوە چارەسەرکران، بۆ رۆژی یەکشەممە جارێکی تر کۆدەبنەوە.
وتیشی، ئەگەر تەیف سامی لە کۆبونەوەی داهاتودا هیچ تێبینییەکی لەسەر لیستی موچە نەبوو، بە ئەگەرێکی زۆرەوە رۆژی یەکشەممە تەمویلی موچەی مانگی یەکی فەرمانبەرانی هەرێم دەکرێت.
وەزارەتی دارایی هەرێم راگەیەنراوێکی لەبارەی کۆبونەوەی وەفدی هەرێم و حکومەتی فیدڕاڵ بڵاوکردەوە و ئاماژەی بەوەکرد، بۆ چارەسەرکردنی ئەو تێبینییە هونەریانەی ماوە سبەینێ شەممە کۆبونەوەکان بەردەوام دەبێت.
دەقی راگەیەنراوەکە...
رۆژی هەینی ٣١ ی کانوونی دووەمی ٢٠٢٥، لە شاری بەغداد بەسەرپەرشتی دکتۆر فواد حسێن جێگری سەرۆک وەزیران و سەرۆکی ئەنجومەنی ئابووری عیراق کۆبوونەوەیەکی هاوبەش لەنێوان وەفدی هەرێمی کوردستان بە سەرۆکایەتی ئاوات شێخ جەناب وەزیری دارایی و ئابووری و دکتۆر ئومێد سەباح سەرۆکی دیوانی ئەنجومەنی وەزیران و دکتۆر ئامانج ڕەحیم سکرتێری ئەنجومەنی وەزیران و دکتۆر عەبدول حەکیم خەسرەو سەرۆکی فەرمانگەی هەماهەنگی و بەدواداچوون و شاندی وەزارەتی دارایی عێراق بەسەرۆکایەتی تەیف سامی وەزیری دارایی عێراق بەڕێوەچوو.
لە کۆبونەوەکەدا کە ژمارەیەک لە راوێژکار و بەڕێوەبەرە گشتیەکانی هەردوو وەزارەت ئامادە بوون، لەکەشێکی ئیجابی و بەرپرسیارانەدا گفتوگۆ لەسەر بودجە و موچەی فەرمانبەران و خانەنشینانی هەرێمی کوردستان کراو تیشک خرایە سەر ئەو ڕاپۆرت و داواکارییانەی کە لەلایەن تیمی تەکنیکی هاوبەشی هەردوولاوە لە سەر داواکاری وەزارەتی دارایی فیدراڵ لەماوەی ١٠ رۆژی رابردوودا لە هەرێمی کوردستان ئامادە کرابوون، وەفدی هەرێمی کوردستان ئامادەیی خۆیان دووپاتکردەوە بۆ هەماهەنگی و کاری هاوبەش بەمەبەستی گەیشتن بەچارەسەری گشتگیر بۆ چەسپاندنی تەرخانکراوی پێویست بۆ دەستەبەرکردنی موچەی فەرمانبەران و موچەخۆرانی هەرێمی کوردستان لەمساڵدا.
بڕیارە سبەی شەممە کۆبونەوەکان لە نێوان تیمەکانی وەزارەتی دارایی هەرێم و حکومەتی فیدراڵ بەردەوام بێت بۆ چارەسەرکردنی ئەو تێبینییە هونەریانەی ماوە تا هەردوولا بگەنە ڕێكکەوتن لەسەر موچەی فەرمانبەران و موچەخۆرانی هەرێمی کوردستان بۆ ساڵی ٢٠٢٥.
ڕاگەیاندنی وەزارەتی دارایی و ئابوری.
حاجی مەسیفی سکرتێری ئەنجومەنی پشتیوانی یەکێتیی نیشتمانیی کوردستان لە ساڵیادی کارەساتی یەکی شوباتدا پەیامێکی بڵاوکردەوە و دەڵێت، "لەیادی ئەو رۆژە ماتەمینەدا دەبێت ھەموو لایەک تێ بگەین کە دوژمنان ھیچ جیاکاریەک لەنێوانمان ناکەن".
دەقی پەیامەکە..
لە ساڵیادی كارەساتە پر خوێناویەکەی یەکی شوبات سەری رێز و نەوازش بۆ تەواوی شەھیدەکان و خانەوادەکانیان دادەنەوێنین.
کارەساتی یەکی شوبات بە ھەمووانی گوت و ئاگاداری کردینەوە کورد لای ئەوان ھەر کوردە و ھیچ جیاوازیەکی نییە لە رەنگ و بیرکردنەوەیان.
بیست ساڵ پێش ئەمڕۆ تاریک پەرستان لە ھەولێر لە دوو تەقینەوەی جیادا، بەڵام ھەردووکیان دەرھەق بە کورد ئەنجامدا کە بووە ھۆی شەھیدبوونی چەندین سەرکردە و کادیری رێبازی کوردایەتی و بریندار بوونی چەندانی تر.
لەیادی ئەو رۆژە ماتەمینەدا دەبێت ھەموو لایەک تێبگەین کە دوژمنان ھیچ جیاکاریەک لەنێوانمان ناکەن.
دەبا ئێمەش بە ھەموو لایەکمان خۆمان رێکبخەینەوە و یەکگرتووبین بۆ ئەوەی دوژمن و نەیارەکانمان نەتوانن جارێکی تر دەستمان بۆ درێژبکەن.
سڵاو و درود بۆ گۆڕی شەھیدان بە گشتی و شەھیدانی یەکی شوبات بە تایبەتی
حاجی مەسیفی
سکرتێری ئەنجومەنی پشتیوانی یەکێتیی نیشتمانیی کوردستان
وەفدێكی حكومەتی هەرێم لە بەغداد لەگەڵ تەیف سامی وەزیری دارایی عیراق کۆبوەتەوە بۆ چارەسەركردنی كێشەی موچە و هەمواری یاسای بودجە، دوای كۆبونەوەكەش وەزیری دارایی هەرێم رایگەیاند، كۆبونەوەكە ئەرێنی بووە و سبەینێش بەردەوام دەبن.
بەپێی ئەو زانیاریانەی دەست پەیامنێری كوردسات نیوز كەوتووە، لە كۆبونەوەكەدا یەكێك لە داوا سەرەكییەكانی وەزیری دارایی عیراق بەبانكیكردنی موچە بووە كە دەبێت جێبەجێ بكرێت و سەرجەم تێبینییەكانی وەفدی هەرێمیشی لەبارەی لیستی موچە رەتكردووەتەوە.
وتیشی، وەفدەكە لە بەغداد دەمێنێتەوە و دووبارە رێكخستنەوە بۆ لیستی موچە دەكەن لەسەر بنەمای ئەو داواكارییانەی تەیف سامی لە كۆبونەوەكەدا خستوونیەتەڕوو و سبەینێش جارێكی تر وەفدەكەی هەرێم لەگەڵ تەیف سامی کۆدەبێتەوە و لیستی موچە بە جێكردنەوەی تێبینییەكان دەخەنەوەڕوو.
پەیامنێری كوردسات نیوز ئاماژەی بەوەشكرد، تەیف سامی بە وەفدەكەی هەرێمی وتووە ئەگەر لیستی موچە چاكبكرێت، لە ماوەی 48 سەعاتدا تەمویلی موچەی مانگی یەكی فەرمانبەرانی هەرێم دەكات.
داهاتی نانەوتی ئەم هەفتەیەی سنوری پارێزگاكانی سلێمانی و هەڵەبجە زیاتر لە 14 ملیار و 941 ملیۆن دیناربووە و بەراورد بە هەفتەی رابردوو شەش ملیار دینار كەمیكردووە.
ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی راپەڕین و گەرمیان دەكات، بڵاویكردەوە، داهاتی نانەوتی ئەم هەفتەیە لە رۆژی 25ی مانگی یەك تا ئەمڕۆ، زیاتر لە 14 ملیار و 941 ملیۆن و 646 هەزار و 545 دینار بووە، كە 88%ی نەختینە و 12%ی چەك بووە.
ئاماژەی بەوەشكردووە، داهاتەكە بەراورد بە هەفتەی رابردوو، شەش ملیار دینار كەمیكردووە كە لەو هەفتەیەدا داهات زیاتر لە 21 ملیار دینار بووە.
بەپێی ماڵپەری شەفافیەت، داهاتی نانەوتی سنوری پارێزگاكانی سلێمانی و هەڵەبجە لە 2024دا ، زیاتر لە 900 ملیار دینار بووە.
وەفدێكی حكومەتی هەرێم لە بەغدادە و لەگەڵ تەیف سامی لە ماڵی فوئاد حسێن لە كۆبوونەوەدان بۆ چارەسەركردنی كێشەی موچە و هەمواری یاسای بودجە.
پەیامنێری كوردسات نیوز رایگەیاند، وەفدێكی وەزارەتی دارایی و ئابوریی هەرێم بە سەرۆكایەتی ئاوات جەناب نوری وەزیری دارایی كە لیستی موچەی مانگی یەكی فەرمانبەران و موچەخۆرانی هەرێمی كوردستانی پێیە لە بەغدادە و لە ماڵی فوئاد حوسێن وەزیری دەرەوە، لەگەڵ تەیف سامی وەزیری دارایی و وەفدێكی حكومەتی عیراق بۆ چارەسەركردنی كێشەی موچە و هەمواری یاسای بودجە لە كۆبوونەوەدان.
وتیشی، نەهێشتنی كەموكوڕی لیستی موچەی هەرێم و رێكخستنی یاسای خانەنشینی و دیاریكردنی پشكی تەرخانكراوی هەرێم لە بودجەی 2025 سەرەكیترین تەوەری گفتوگۆكان دەبن.
ئەوەش لە كاتێكدایە، شەوی چوارشەممەی رابردوو محەممەد شیاع سودانی سەرۆك وەزیرانی عیراق لەگەڵ سەرۆكی فراكسیۆنەكانی ئەنجومەنی نوێنەرانی عیراق كۆبووەوە و تەوەرەی سەرەكی كۆبوونەوەكەش تێپەڕاندنی هەمواری یاسای بودجە بوو لە ئەنجومەنی نوێنەران.
ئەمڕۆ 10 ساڵ بەسەر شەهیدبوونی لیوا حسێن مەنسور تێپەڕدەبێت، كە لە كاتی كۆنتڕۆڵكردنەوەی گوندی مەلا عەبدوڵڵا و رووبەڕووبوونەوەی تیرۆرستانی داعش لەو ناوچەیە شەهیدبوو.
لیوا حوسێن مەنسور، فەرماندەیی هێزەكانی پشتیوانی دووی هێزی پێشمەرگەبوو یەكێك بوو لە ئەفسەرە قارەمانەكانی دەستەی هێرش بردن بۆ سەر گوندی مەلا عەبدوڵڵا، بەڵام بەداخەوە لە كۆنترۆڵكردنەوەی گوندی مەلا عەبدوڵڵا دا شەهیدبوو و خوێنی خۆی بەخشییە ئازادی كوردستان.
لە شەڕی رووبەڕووبوونەوەی تیرۆرستانی داعش و بەرگریكردن لە خاكی پیرۆزی كوردستان، چەندین سەركردەی قارەمانی یەكێتیی نیشتمانیی كوردستان، گیانی خۆیان كردە قوربانی، بۆ بەرگری لە كورستان، میللەتەكەیان، وەك چۆن هەر لە برادوشدا یەكێتیی نیشتمانیی كوردستان حزبی شەهیدان بووە، بە هەزاران شەهیدی قارەمانی بەخشیوەتە خاكی كوردستان، هەمان كات دەیان فەرماندەی و سەركردەی قارەمانی گیان بەخشانە لە هەموو كات و سەردەمێكدا لە مەیدانەكانی بەرگریدا، سنگی خۆیان كردوەتە قەڵغان بۆ پاراستنی خاكی كوردستان و میللەتەكەیان.
عیرفان عەلی عەبدولعەزیز، رابەری بزووتنەوەی ئیسلامی كوردستان سەردانی ئەنکەرەی كرد و لەگەڵ یاریدەدەرەكەی هاكان فیدان كۆبووەوە.
وەزارەتی دەرەوەی توركیا لە تۆڕی ئێكس بڵاویكردەوە، وەفدێكی بزووتنەوەی ئیسلامی كوردستان بە سەرۆكایەتی عیرفان عەلی عەبدولعەزیزی رابەری بزوتنەوەكە سەردانی ئەنکەرەیان كرد و لەگەڵ نوح یەڵماز یاریدەدەری وەزارەتی دەرەوەی توركیا كۆبوونەوە.
لەم مانگەدا ئەمە پێنجەم كەسایەتی كوردە سەردانی توركیا دەكەن، پێشتر مەسرور بارزانی جێگری سەرۆكی پارتی و شاسوار عەبدولواحید سەرۆكی جوڵانەوەی نەوەی نوێ و سەڵاحەدین بەهادین ئەمینداری گشتی یەكگرتووی ئیسلامی كوردستان و مەنسور بارزانی فەرماندەی هێزی تایبەت و گوڵان، بە نۆرە بانگێشتی توركیا كران.
ئەو سەردانانە هاوكاتە لەگەڵ كردنەوەی بنكە و بارەگای نوێی توركیا لە بادینان و درێژكردنەوەی گەمارۆی سەر فڕۆكەخانەی نێودەوڵەتی سلێمانی و بۆردومانكردنی باشوور و رۆژئاوای كوردستان، لە دوایین هێرشی توركیاش كە رۆژی دووشەممەی رابردوو بۆ سەر ئاكرێ و چوارقوڕنە ئەنجامیدا، بەهۆیەوە شەش هاووڵاتی هەرێمی كوردستان شەهید بوون.
وەزارەتی سامانە سروشتییەكانی هەرێم رایگەیاند، دادگای تێهەڵچونەوەی كەرخی بەغداد بڕیاریدا بەیاساییبونی گرێبەستەكانی حكومەتی هەرێم لەگەڵ كۆمپانیاكانی نەوت و غاز.
وەزارەتی سامانە سروشتییەكان لە راگەیەنراوێكدا بڵاویكردەوە، دوای چەندین دانیشتنی دادگا و تانە لێدانی وەزارەتی سامانە سروشتییەكان لە بڕیارەكانی دادگای كەرخ، كە دوابەدوای بڕیارەكانی دادگای باڵای فیدڕاڵی عیراق دژ بە یاسای نەوت و گازی كوردستان دەرچو بوو، دادگاكە دوای ماوەیەكی زۆر لە وردبینین بڕیاری هەڵوەشانەوەی بڕیارەكانی پێشوی خۆیدا.
دەشڵێت، هەرچەندە وەزارەتی نەوتی عیراقی دووبارە تانەی لە بڕیارەكاندا، بەڵام دادگای پێداچونەوەی عیراق بڕیاری دایەوە بە پەسەندكردنی بڕیارەكانی دادگای تێهەڵچونەوەی كەرخ، بەمەش لە رووی یاساییەوە یەكلابوەوە كە گرێبەستەكانی نێوان وەزارەتی سامانە سروشتییەكان و كۆمپانیاكانی نەوت و غاز لە هەرێمی كوردستان كارا و دروستە.
وەزارەتی نەوتی عیراقی لە دادگای تێهەڵچونەوەی كەرخ لە ساڵی 2022 و دوابەدوای بڕیارەكەی دادگای فیدڕالی بۆ راگرتنی هەناردەی نەوتی هەرێم سكاڵایەكی تۆماركردبوو بۆ هەڵوەشاندنەوەی گرێبەستە نەوتییەكانی هەرێمی كوردستان و كۆمپانیە نەوتییەكان.
بافڵ جەلال تاڵەبانی سەرۆکی یەکێتیی نیشتمانیی کوردستان لە ساڵیادی شەهیدبوونی هەردوو فەرماندەی قارەمان و دیاری گەلەکەمان، لیوا شێرکۆ فاتیح شوانی و لیوا حوسێن مەنسوور پەیامێکی بڵاوکردەوە و رایگەیاند؛ ئەو دوو فەرماندەیە بەگیان و خوێنی خۆیان ئێمەو کەرکوک قودسی کوردستانیان لە تیرۆریستانی داعش پاراست.
....دەقی پەیامەکەی
لەیادی دە ساڵەی شەهیدبوونی هەردوو فەرماندەی قارەمان و دیاری گەلەکەمان، لیوا شێرکۆ فاتیح شوانی، لیوا حوسێن مەنسوور و هاوڕێکانیان، سەری رێزو نەوازش دادەنەوێنین و یادو یادەوەرییان بۆ هەمیشە بەرزڕادەگرین.
شەهید شێرکۆ فاتیح شوانی و شەهید حوسێن مەنسوور دوو تێکۆشەری بەوەفای کوردو یەکێتی کە نموونەو سونبولی ئازایەتین کە ئامادەنەبوون سەنگەری بەرگری چۆڵبکەن و هەڵبێن، بەگیان و خوێنی خۆیان ئێمەو کەرکوک قودسی کوردستانیان لە تیرۆریستانی داعش پاراست.
ئەوان دوو شەهیدی نەمری خەباتی کوردایەتین، رەمزی کوڕانی یەکێتین کە قەت سەنگەریان چۆڵ نەکردووە لەپێناو شکۆی گەلەکەیان.
یەکێتی و هەڤاڵەکانتان بۆ هەمیشە بەڕێزو شکۆوە یادتان دەکەینەوە و هەرگیز لەیادتان ناکەین و درێژەپێدەری رێبازی پیرۆزتان دەبین بۆ پاراستنی گەلەکەمان.
سەربەرزی بۆ کەسوکارتان و درودو سڵاو بۆ گیانی پیرۆزی شەهیدان کاک شێرکۆ فاتیح شوانی و کاک حوسێن مەنسوور و هاوڕێکانیان و سەرجەم شەهیدانی گەلی کوردستان.
بافڵ جەلال تاڵەبانی
سەرۆکی یەکێتیی نیشتمانیی کوردستان
وەفدێكی حكومەتی هەرێم لە بەغدادە و لیستی موچەی مانگی یەك رادەستی دارایی عیراق دەكەن و چەند كۆبوونەوەیەكیش بۆ چارەسەركردنی كێشەی موچە و هەمواری یاسای بودجە ئەنجام دەدەن.
پەیامنێری كوردسات نیوز رایگەیاند، وەفدێكی وەزارەتی دارایی و ئابوریی حكومەتی هەرێمی كوردستان بە سەرۆكایەتی ئاوات جەناب نوری، وەزیری دارایی هەرێم كە لیستی موچەی موچەخۆرانی هەرێمی پێیە گەیشتە بەغداد.
دەشڵێت، سبەینێ وەفدەكەی هەرێم لە ماڵی فوئاد حوسێن وەزیری دەرەوەی عیراق لەگەڵ وەفدێکی حكومەتی عیراق بۆ چارەسەركردنی كێشەی موچە و هەمواری یاسای بودجە كۆدەبێتەوە.
ئەوەش لە كاتێكدایە، شەوی رابردوو محەممەد شیاع سودانی، سەرۆك وەزیرانی عیراق لەگەڵ سەرۆك فراكسیۆنەكانی ئەنجومەنی عیراق كۆبووەوە و تەوەرەی سەرەكی كۆبوونەوەكەش تێپەڕاندنی هەمواری یاسای بودجە بوو لە ئەنجومەنی نوێنەران.
كۆمیسیۆنی هەڵبژاردنەكانی عیراق بڕیاریدا بە هەڵوەشاندنەوەی ئەنجامدانی كۆنگرەی بزووتنەوەی گۆڕان.
كۆمیسیۆنی هەڵبژاردنەكانی عیراق لە نوسراوێكدا كە 29ی ئەم مانگە دەرچووە بڕیاریدا بە هەڵوەشاندنەوەی كۆنگرەی بزووتنەوەی گۆڕان كە بڕیاربوو لە 25ی مانگی داهاتوو ئەنجام بدرێت.
لە رۆژی 28ی 9ی 2024، لە رێوەڕەسمێكدا لە سلێمانی دانا ئەحمەد مەجید بە وەكالەت بە رێكخەری گشتیی بزووتنەوەی گۆڕان هەڵبژێردرا و عومەری سەید عەلی تەواوی دەسەڵاتەكانی رادەستی رێكخەری گشتیی نوێی بزووتنەوەی گۆڕان كرد و بەهۆیەوە بزوتنەوەكە بوو بە دوو بەرەوە.