چوپێکی کۆچەران بە نزیکەی 70 سەرنشینەوە لە کەناڵی ئینگلیز کون بووە و داوای بە هاناوەچوون دەکەن. رەنج پشدەری رۆژنامەنووسیش بۆ کوردسات نیوز باسی لەوەکرد، زیاتر لە 20 سەرنشینیان کوردن.

چوپەکە نزیکەی 100 سەرنشینی لەسەرە و رەنج پشدەری رۆژنامەنووس بە کوردسات نیوزی راگەیاند، تاوەکو سەعات 10 و 30 خولەکی پێنیوەڕۆی ئەمڕۆ کۆچەرەکان هێڵی ئینتەرنێتیان هەبووە و لە پەیوەندیدا بوون لەگەڵیاندا، بەڵام ئێستا پەیوەندییەکانیان پچڕاوە.

باسی لەوەشکرد، زیاتر لە 20 کرد لەناو کۆچەرەکاندا هەن و زۆرینەیان خەڵکی دەڤەری راپەڕینن.

وتیشی، لەگەڵ پۆلیسی فەرەنسا قسەیان کردووە و داوای لۆکەیشنی شوێنی رووداوەکەیان لێکردوون، بەڵام کۆچەرەکان هێڵی ئینتەرنێتیان نەماوە تاوەکو لۆکەیشنیان بۆ بنێرن.

 

 

هەپەگە داوای لە سەرجەم هێزەكانی لە شاخ و ناوخۆی باكوری كوردستان و  توركیا دەكات چالاكییەكانیان رابگرن بەڵام مافی خۆپاراستنیان هەیە لە ئەگەری هەر هێرشێكدا.

ناوەندی فەرماندەیی هێزەكانی پاراستنی گەل نەپەگە لە راگەیەنراوێكیدا رۆژی یەكشەممە پابەندبوونی سەرجەم هێزەكانی بە پەیامەكەی عەبدوڵا ئۆجەلان، راگەیاند و داوای كردووە هاوكات لەگەڵ گەریلا، یەكینەكانی پاراستنی گەل یەپەسە چالاكییەكانیان لە ناوخۆی باكوری كوردستان و توركیا راگرن.

هەپەگە ئاماژەی بەوەكردوە كە لە یەكی مانگەوە سەرجەم هێزەكانیان چالاكییەكانیان راگرتوە و تاكلایەنە ئاگربەستیان راگەیاندوە و لە هەمانكاتیشدا جەختی لەوە كردوەتەوە كە لە هەر شوێنێك هێرش بكرێتە سەر هێزەكانیان ئەوا لە چوارچێوەیی مافی خۆپاراستندا وەلامیان دەبێت.

لە راگەیەنراوەكەدا هاتووە ئەوان باوەڕیان بە سەرجەم هێزەكانیان هەیە كە بەهەستیاری و هەست بە بەرپرسیارێتی بە دەم بانگەوازی ئاگربەستەوە دێن و پابەندی ئەو پڕۆسەیە دەبن كە لە دوای پەیامەكەی ئۆجەلانەوە راگەیەندراوە.

 

کەشناسیی هەرێم پێشبینییەکانی کەشوهەوای ئەمڕۆ و سبەینێی ئاشکرا کرد و رایگەیاند، بەگشتیی کەش جێگیر دەبێت و پلەکانی گەرما بەرز دەبنەوە.

کەشناسیی هەرێم رایگەیاندووە، ئەمڕۆ یەکشەممە، ئاسمان ساماڵ و پەڵەهەور دەبێت و پلەکانی گەرما 1 بۆ 2 پلەی سیلیزی بەرز دەبنەوە.

ئاماژەی بەوەشکردووە، سبەی دووشەممە، ئاسمان ساماڵ و پەڵەهەور دەبێت و لە کاتەکانى دواى نیوەڕۆدا دەگۆرێت بۆ نیمچەهەور پلەکانی گەرماش 1 بۆ 2 پلەی دیکە بەرز دەبنەوە.

بەرزترین پلەکانی گەرمای پێشبینیکراو بە پلەی سیلیزی :

هەولێر: 16 پلەى سیلیزى

سلێمانی: 12 پلەى سیلیزى

دهۆک: 14 پلەى سیلیزى

کەرکوک: 17 پلەى سیلیزى

زاخۆ: 16 پلەى سیلیزى

هەڵەبجە: 12 پلەى سیلیزى

حاجی ئۆمەران: 2 پلەى سیلیزى

سۆران: 12 پلەى سیلیزى

گەرمیان: 18 پلەى سیلیزى

کارەبای سلێمانی رایگەیاند، نرخی یەک ئەمپێری کارەبای موەلیدە بۆ مانگی رابردوو لەنێوان 14 بۆ 15 هەزار دیناردایە. لیژنەی ئەنجومەنی موەلیدە ئەهلییەکانی هەولێریش رایگەیاندووە، نرخی یەک ئەمپێر بەپێی کارکردنی کاتژمێرەکانیان، لەنێوان 14 هەزار و 500 بۆ 22 هەزار و 500 دینارە.

بەڕێوەبەرایەتی گشتیی کارەبای سلێمانی رایگەیاند، نرخی هەرکاتژمێرێکی کارکردنی کارەبای موەلیدە بە 44 دینار دیاریکراوە و بەوەش لەناو شاری سلێمانی بۆ مانگی رابردوو نرخی یەک ئەمپێر لەنێوان 14 بۆ 15 هەزار دیناردایە.

لیژنەی ئەنجومەنی موەلیدە ئەهلییەکانی هەولێریش رایگەیاندووە، کارەبای موەلیدە لە هەولێر لە گەڕەکەکاندا بەشێوەی جیاواز کاردەکات، بەپێی جیاوازی کاتژمێرەکانی کارکردنیان نرخەکەی لەنێوان 14 هەزار و 500 بۆ 22 هەزار و 500 دیناردایە.

لە دهۆکیش هێشتا بە فەرمی نرخی موەلیدە دیاری نەکراوە، بەڵام پێشبینی دەکرێت نرخی یەک ئەمپێر لەنێوان 19 بۆ 20 هەزار دیناردا بێت.

لە هەرێم موەلیدە ئەهلییەکان هاوشانی کارەبای نیشتمانی، کارەبا بۆ ماڵان دابین دەکەن، لە وەرزە سارد و گەرمەکانیشدا کە کارەبای نیشتمانی کەمدەبێتەوە و زۆرکات تەنها 4 سەعات لە رۆژێکدا دەدرێتە هاووڵاتیان، موەلیدە ئەهلییەکان تەواوکەری پێدانی کارەبا دەبن، بەوەش لەو مانگانەدا نرخەکەی بەشێوەیەکی بەرچاو زیاد دەکات بەراورد بە مانگەکانی دیکە.

 

کەشناسیی سلێمانی رایگەیاند، مانگی رابردوو، ساردترین مانگی شوبات بووە لەماوەی 30 ساڵی رابردوودا. دەشڵێت، تێکڕای پلەی گەرمی 5.5 پلە بووە.

کەشناسیی سلێمانی رایگەیاند، بەپێی داتا تۆماركراوەكانی وێسگەی كەشناسی سلێمانی نزمترین پلەی گەرمی لە مانگی شوباتی ئەمساڵدا 5.5 پلە لە ژێر سفری سیلیزییەوە بووە و و بەرزترین پلەی گەرمیش 16.4 پلە بووە.

ئاماژەی بەوەشکردووە، تێكڕای پلەی گەرمی لەم مانگەدا 5.5 پلە بووە، كە بەراورد بە تێكڕای پلەی گەرمی مانگی شوباتی سی ساڵی رابوردوو ئەمساڵ 2.9 پلە نزمتر بووە.

کەشناسیی سلێمانی راشیگەیاندووە، سەرەڕای ئەوەی مانگی رابردوو سادترین مانگ بووە، بەڵام بڕی بارانبارین تیایدا 78.2 ملم بووە، كە بەراورد بە تێكڕای بارانبارینی مانگی شوباتی 30 ساڵی رابردوو نزیكەی ٣٥ ملم كەمتر بووە.

ئەوەش لە کاتێکدایە، مانگی رابردوو چەند شەپۆلێکی بەفربارین و سەرما هەرێمی کوردستانیان گرتەوە و لە چەندین شوێنیش بەتەواوی رێگای هاتوچۆ گیرا.

ئەندامێكی سەركردایەتی كەجەكە رایگەیاند، ماوەیەكی درێژە وەفدێکی چوار كەسی لە ژێر ناوی دەوڵەت سەردانی ئیمراڵی دەكەن و سەرۆك كۆماری توركیاش ئاگاداری هەموو وردەكارییەكانیەتی. وتیشی، "دەبێت بە زوورترین کات ئۆجەلان ئازاد بکرێت".

زوبەیر ئایدار ئەندامی كۆنسەی بەڕێوەبەری كۆما جڤاكێن كوردستان 'كەجەكە'، سەبارەت بە پەیامەكەی عەبدوڵا ئۆجەلان رێبەری زیندانیكراوی کورد بە ئاژانسی فوڕاتی راگەیاند، پەیامەكە تەنیا سەبارەت بە چەكدانانی پەكەكە نییە، بەڵكو دەستپێكێكە بۆ كردنەوەی رێگەی سیاسەتی دیموكراسی.

ئایدار راشیگەیاندووە، هەموو دیدارەكانی ئیمراڵی بە فەرمانی ئەردۆغان سەرۆك كۆماری توركیا ئەنجامدراوە و ئاگاداری هەموو وردەكارییەكانی پرۆسەكەیە.

ئەندامی كۆنسەی بەرێوەبەری كەجەكە جەختی لەوەشكردەوە، دەبێت بە زووترین كات ئۆجەلان ئازاد بكرێت و پڕۆسەكەش لە پەرلەمانی توركیادا بەڕێوەبچێت.

زوبەیر ئایدار وتیشی، پەیامەكەی ئۆجەلان بۆ هەسەدە و یەپەگە نییە و ئەوەی ئێستا لە میدیای توركیا باس لە چەكدانانی هەسەدە و یەپەگە دەكرێت شتێكە قەت روونادات.

سەرەڕای راگەیاندنی ئاگربەست لە لایەن پەكەكەوە،  توركیا هەندێك ناوچەی سنوری ئامێدی بۆردومان كرد و شەڕ و پێكدادانیش لە نێوان سوپای توركیا و گەریلادا دروست بووە.

پەیامنێری كوردسات نیوز لە ئامێدی رایگەیاند: دوو رۆژە شەڕ و پێكدادان لە سنورەكانی ناحیەی دێرەلەوك لە نێوان گەریلا و سوپای توركیا بەردەوامە و فڕۆكە جەنگییەكانی ئەو وڵاتەش چەند ناوچەیەكیان لە سنوری قەزای ئامێدی بۆردومان كردوە.

شەڕ و پێكدادانەكانی دێرەلوك تا درەنگانی شەوی رابردو بەردەوام بوە و تا ئێستا زیانی شەڕەكە و بۆردومانەكانی توركیا دەرنەكەوتوە.

بۆردومان و هێرشەكانی توركیا لە كاتێكدایە رۆژی شەممە پارتی كرێكارانی كوردستان پەكەكە وەك وەڵامێك بۆ پەیامەكەی عەبدوڵا ئۆجەلان، ئاگربەستی یەك لایەنەی راگەیاند.

ئێوارەی ئەمڕۆ لە گوندی باکوورمان لە سنووری ئاکرێ گەنجێک لەلایەن ئامۆزایەکییەوە کوژرا و پۆلیسی قەزاکەش دەڵێت، لە دوای روداوەکە تۆمەتبارەکە خۆی رادەستی هێزەکانیان کردووە.

نێچیرڤان فەخرەدین بەرپرسی راگەیاندنی تەندروستی ئاکرێ بە کوردسات نیوزی راگەیاند، کوژراوەکە ناوی "وەیوەت لەزگین"ـە و تەمەنی ٢٣ ساڵە و بەمەبەستی توێکاری، تەرمەکەی رەوانەی پزیشکی دادی دهۆک کراوە. 

ئاماژەی بەوەشکرد، بەهۆی شەڕەکەوە، برایەکی کوژراوەکە برینداربووي.

هاوکات پۆلیسی ئاکرێ رایگەیاند، لە دوای روداوەکە تۆمەتبارەکە خۆی رادەستی هێزەکانی پۆلیس کردووە و بە بڕیاری دادوەر و بە پێی ماددەی 406 راگیراوە و لێكۆڵینەوەكان لەگەڵیدا بەردەوامەوە.

شاناز ئیبراهیم ئەحمەد، خانمی یەکەمی عیراق، پەیامێکی هاوخەمی بەبۆنەی کۆچی دوایی ئەو شاخەوانانەی کە لە شاخەکانی بانە لە رۆژهەڵاتی کوردستان گیانیان لەدەستدا، بڵاوکردەوە.

لە پەیامەکەیدا، خاتوو شاناز رایگەیاند: "بەبیستنی هەواڵی مەرگی ناوادەی (شەهلا رەحمانی، رووناک دانشمەند، عومر عەبدوڵڵاهی، کاروان ئەحمەدپوور، خالق محەممەد نەژاد و یاسا سادقی)، زۆر غەمباربووم."

هەروەها خانمی یەکەمی عیراق ئاماژەی بەوە کرد کە ئەم شاخەوانانە لەئاکامى کەوتنە ژێر رەنووە بەفرەوە لەشاخێکى سەر بە بانە لەرۆژهەڵاتی کوردستان گیانیان سپاردووە.

لە کۆتایی پەیامەکەیدا، خاتوو شاناز ئیبراهیم ئەحمەد نووسیویەتی: "خواى گەورە لەکۆچکردووان خۆش بێت، وجێگەیان بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت."

شایانی باسە شەش شاخەوان لە رووداوێکی دڵتەزێندا لە شاخەکانی ناوچەی بانە لە رۆژهەڵاتی کوردستان بەهۆی رەنووی بەفرەوە گیانیان لەدەستدا.

نرخی یەک ئەمپێر کارەبای موەلیدەی ئەهلی لەناو شاری هەولێر لە نێوان 14 هەزار و 500 بۆ 22 هەزار و 500 دیناردایە.

لیژنەی ئەنجومەنی موەلیدە ئەهلییەکانی پارێزگای هەولێر بڵاویكردەوە، تێکڕا کارکردنی موەلیدە ئەهلییەكان و دابینكردنی كارەبای رۆژانە بۆ مانگی 2ـی 2025 لە 14 كاتژمێر پێكهاتووە و نرخی یەک کاتژمێری کارکردنی موەلیدە بە 43.5 دینار دیاریکراوە.

 ئەوەش هاتووە، نرخی یەك ئەمپێر كارەبای موەلیدەی ئەهلی لەناوشاری هەولێر، لە نێوان 14.500 دینار بۆ  22.500 دینارە، هەروەها نرخی كارەبای موەلیدە لە ناوبازاڕی شاری هەولێر لە نێوان پێنج هەزار دینار بۆ 13هەزار هەزار دینار و نرخی ئەمپێر/ کاتژمێر 45دینار دیاریكراوە.

لیژنەی ئەنجومەنی موەلیدە ئەهلییەکانی پارێزگای هەولێر ئاماژەی بۆ ئەوەشكردوە، نرخی كارەبای موەلیدەی ئەهلی لە دەوروبەری هەولێر و قەزا و ناحییە و گوندەکان، لە نێوان 11 هەزار و 750 دینار بۆ20 هەزار دینار دیاریكراوە.

ئەمڕۆ ئەنجومەنی راژەی گشتی حکومەتی هەرێمی کوردستان لیستی نوێی دامەزراندنی بەشێوەی گرێبەست بۆ سنووری پارێزگای هەڵەبجە راگەیاند.

بەپێی راگەیەندراوێک کە وێنەیەکی دەست کوردسات نیوز کەوتووە، لیستەکە ناوی 500 فەرمانبەری گرێبەستی لەخۆگرتووە کە بەسەر فەرمانگە و دامەزراوەکانی سنووری پارێزگای هەڵەبجەدا دابەش دەکرێن.

ئەم هەنگاوە لە چوارچێوەی هەوڵەکانی حکومەتی هەرێمدایە بۆ چارەسەرکردنی کێشەی بێکاری و پێشخستنی خزمەتگوزاریەکان لە پارێزگای هەڵەبجە.

شایانی باسە ناوی فەرمانبەرە گرێبەستەکان لە ماڵپەڕی فەرمی ئەنجومەنی راژەی گشتی بڵاوکراوەتەوە و دەتوانن سەردانی بکەن بۆ وەرگرتنی زانیاری زیاتر. https://www.facebook.com/share/p/12AG9eXKACB/

لە روداوێکی هاتوچۆدا لەسەر رێگای کەرکوک – هەولێر ، چوار کەس گیانیان لەدەستدا.

پەیامنێری کوردسات نیوز رایگەیاند؛ لەسەر رێگای کەرکوک – هەولێر بەرانبەر گوندی دارەمان، چوار ئەندامی خێزان گیانیان لەدەستدا، کە هەموویان ئەندامی یەک خێزانن.

ئاماژەی بەوەشکرد، روداوەکە لەنێوان ئۆتۆمبێلێکی تایبەت و بارهەڵگرێک رویداوە، راشیگەیاند، ئەو خێزانەی کە گیانیان لەدەستداوە عەرەبن و خەڵکی بەغدادن کە پێکهاتوون لە دایک و باوک و دوو منداڵ.

تەرمی ئەو شاخەوانانەی لە بانە كەوتنە ژێر هەرەسی بەفرەوە دۆزرانەوە و مانگی سوریش گیانلەدەستدانی شەش شاخەوانی راگەیاند.

بەڕێوەبەری مانگی سور لە پارێزگای سنە بە میدیاكانی راگەیاند، ماوەی 24 سەعات گەڕان بەدوای ئەو شاخەوانانەی لە چیای كەڵەكەجاڕ كە 40 كیلۆمەتر لە بانەوە دوورە و كەوتنە ژێر هەرەسی بەفرەوە، بەردەوام بووە و بە دوو قۆناغ تەرمی شەش شاخەوان دەرهێنراونەتەوە.

ئاماژەی بەوەشكرد، حەوت شاخەوان لە چیای كەڵەكەجاڕ كەوتنە ژێر هەرەسی بەفر و سەرەتا تەرمی دوو كەسیان دۆزرایەوە و شاخەوانێكیش بە زیندووی دەرهێنراوەتەوە و رەوانەی نەخۆشخانەی شاری بانە كراوە.

لە قۆناغی دووەمیشدا دواتر بە هەوڵی تیمەكانی فریاگوزاریی، تەرمی چوار شاخەوانی  دیكەشیان دۆزرانەوتەوە.

پەكەكە رایگەیاند، بەمەبەستی جێبەجێكردنی بانگەوازەكەی ئۆجالان لەئەمڕۆوە ئاگربەست رادەگەیەنن و چالاكی چەكداری ئەنجام نادەن.

كۆمیتەی بەڕێوەبەری پارتی كرێكارانی كوردستان"پەكەكە" راگەیەنراوێكی سەبارەت بە بانگەوازەكەی عەبدوڵا ئۆجەلان رێبەری زیندانیكراوی پەكەكە بڵاوكردەوە و رایگەیاند، لە ئەمڕۆوە ئاگربەست رادەگەیەنن و چالاكی چەكداری ئەنجام نادەن، بەمەبەستی جێبەجێكردنی بانگەوازەكەی ئۆجەلان بۆ ئاشتی و كۆمەڵگەیەكی دیموكراسی، بانگەوازەكەش رێگەی هەموو هێزەكان بۆ ئازادی و دیموكراسی رۆشن دەكاتەوە و وەك مانیفێستی سەردەم وایە.

لە بەشێكی تری راگەیەنراوەكەدا هاتووە، ئەو بانگەوازە پڕۆسەیەكی مێژوویی لە كوردستان و رۆژهەڵاتی ناوەڕاست دەستپێكردووە. ئەوەش كاریگەرییەكی گەورەی دەبێت لەسەر پەرەپێدانی حوكمڕانی دیموكراسی و ژیانی ئازاد لە سەرانسەری جیهاندا، لەو روەشەوە پێویستە هەموو كەسێك بەرپرسیارێتی لە ئەستۆ بگرێت و جێبەجێی بكات.

جەختی لەوەشكردوەتەوە بانگەوازێكی لەو شێوەیە زۆر گرنگ بوو؛ ئێستاش جێبەجێكردنی سەركەوتووانەی ناوەڕۆكەكەی زۆر گرنگە، و بەپێی مەرجەكانی بانگەوازەكە مامەڵە دەكەن و جێبەجێیان دەكەن و دەچنە ناو پڕۆسەیەكی نوێی خەبات، جێبەجێكردنی پرسی وەك داماڵینی چەك تەنیا بە سەركردایەتی پراكتیكی ئۆجەلان دەبێت.

سەبارەت بە بەستنی كۆنگرەی حزبیش رایگەیاندووە، لەسەر داوای ئۆجەلان ئامادەن كۆنگرەی حزب ببەستن، بۆ ئەوەی كۆنگرەش سەركەوتوو بێت، پێویستە ڕێبەر ئۆجەلان بە شێوەیەكی شەخسی سەركردایەتی كۆنگرە بكات، هەروەها پێویستە مەرجەكان بۆ ئۆجەلان مسۆگەر بكرێن بۆ ئەوەی بتوانێت بە شێوەیەكی فیزیكی ئازادانە بژی و كار بكات.

دەزگای ئاسایشی هەرێم  دەستبەسەراگرتنی 29 کیلۆگرام حەبی هۆشبەر لە جۆری (کپتاگۆن) راگەیاند و دەشڵێت: دوو گەورە بازرگانی ماددەی هۆشبەر دەستیگرکراون

دەزگای ئاسایشی هەرێم بڵاویکردەوە، بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایش هەرێم بەهەماهەنگی پاسەوانی سنوور و بەڕێوەبەرایەتی ئاسایشی ڕاپەڕین، توانیان لەسەر سنوری (پشدەر) دەستبەسەربڕی (29)کیلۆگرام حەبی هۆشبەر لەجۆری کپتاگۆن بگرن، لەم چالاکییەدا (دوو)گەورە بازرگانی ماددەی هۆشبەر دەستگیرکران کە بەنیازبوون ماددەکە لەشارەکانی هەرێمی کوردستان و عیراق ساغ بکەنەوە.

ئاماژەی بەوەشکرد، شەوی 27/2/2025  لەسەر سنوری پشدەر لەلایەن پاسەوانی سنور (29)کیلۆگرام حەبی هۆشبەر لەجۆری کپتاگۆن دەستیبەسەرداگیرا و دوای ئەنجامدانی بەدواداچوون لەماوەی کەمتر لە 24 سەعاتدا لەسەر بڕیاری دادوەری لێکۆڵینەوەی ئاسایش، بەهەوڵی وورد و زانیارییەکانی بەڕێوەبەرایەتی گشتی نەهێشتنی ماددە هۆشبەرەکان و ئاسایشی ڕاپەڕین، توانیان دوو گەورە بازرگانی ماددەی هۆشبەر دەستگیربکەن و ڕووبەڕوی یاسا بکرێنەوە.

دەزگای ئاسایشی هەرێم راشیگەیاندووە، لەئێستادا تۆمەتباران بەماددەی (25) لەیاسای بەرەنگاربوونەوەی ماددە هۆشبەرەکان و کارتێکارە ئەقڵیەکان راگیراون و لێکۆڵینەوە لەدۆسیەکانیان بەردەوامە.

بافڵ جەلال تاڵەبانی سەرۆکی یەکێتیی نیشتیمانیی کوردستان بەبۆنەی ھاتنی مانگی رەمەزانی پیرۆزەوە پەیامێک بڵاودەکاتەوە و رایدەگەیەنێت: ھیوادارم لەم مانگە پیرۆزەدا، هەوڵ و هەنگاوەکان بەرەو تەبایی و یەکڕیزیی سەرکەوتووبن

دەقی پەیامەکەی سەرۆک بافڵ....

بەبۆنەی هاتنەوەی مانگی رەمەزانی پیرۆزەوە، گەرمترین پیرۆزبایی لە موسڵمانانی کوردستان و عیراق و جیهان دەکەم. ھیوادارم لەم مانگە پیرۆزەدا، هەوڵ و هەنگاوەکان بەرەو تەبایی و یەکڕیزیی سەرکەوتووبن تاوەکو داهاتوویەکی گەشتر بۆ گەلەکەمان بەدیبهێنین و بەسەر ئاڵنگارییەکاندا زاڵبین.

خوای گەورە گەل و وڵاتمان بپارێزێت و رۆژوو و خواپه‌رستيى هەموولایەک قبووڵ بکات.

بافڵ جەلال تاڵەبانی

سەرۆکی یەکێتیی نیشتمانیی کوردستان