کوردستان
وەزیری نەوتی عیراق رایگەیاند، بەمزووانە هەناردەكردنی نەوتی هەرێمی كوردستان لە رێگەی بۆریەوە بۆ بەندەری جەیهانی توركیا دەستپێدەكاتەوە.
وەزارەتی نەوتی عیراق بڵاویكردەوە، حەیان عەبدولغەنی وەزیری نەوت سەرپەرشتی كۆبونەوەیەكی هاوبەشی عیراق – توركیای كردووە بۆ تاوتوێكردنی دۆسیەی ئاو و نەوت.
لە كۆبوونەوەكەدا وەزیری نەوت جەختی لە چارەسەركردنی دۆسیەی ئاو كردووەتەوە كە خزمەت بە بەرژەوەندییەكانی عیراق بكات و پشكەكەی بەشێوەیەكی دادپەروەرانە بەدەستبێت.
وتوشیەتی، هەناردەكردنەوەی نەوتی هەرێمی كوردستان لە رێگەی بۆرییەوە بۆ بەندەری جەیهانی توركیا بەم نزیكانە دەستپێدەكاتەوە.
وەزارەتی نەوت راشیگەیاندوە، لە كۆبونەوەكەدا گفتوگۆ كراوە لەسەر كارنامەی لیژنە لاوەكیەكان لە بوارەكانی ئاو و وزە و پەروەردە و دەروازە سنورییەكان و ئاڵوگۆڕی بازرگانی.
ئەمڕۆ لە گەرمیان کۆنفرانسی ئامادەکاریی یەکێتیی نیشتمانیی کوردستان بۆ دووەم دیداری حزبەکە بەڕێوەدەچێت.
یهكێتیی نیشتمانیی كوردستان له رۆژی 15ی مانگی رابردووەوە دهستی كردووه به بهستنی كۆنفرانس بۆ ئهنجامدانی دووهم دیداری خۆی.
دووەم دیداری یەکێتی به دروشمی "به دیدگایهكی نوێ؛ بههێزی و بهرهوپێشچوون و خزمهتگوزاری" دهستی به كارهكانی كردووه.
بە گوێرەی پەیڕەوی ناوخۆی پەسەندکراوی کۆنگرەی پێنجەم، دیداری یەکێتی چالاکییەکی رەسمیی دەورییە و بەشێکە لە وێستگەکانی خەباتی فراوانی هەڤاڵان.
یەکەم دیداری یەکێتی بەسەرپەرشتی قوباد تاڵەبانی لە ئازاری 2022 دەستی پێکرد و دەستپێکرد و لە ئایاری هەمان ساڵ کۆتایی بەکارەکانی هێنا و سیاسەتەکانی یەکێتی لە بوارە جیاجیاکاندا داڕشت و بووە بنەمایەک بۆ سیاسەتی گشتی یەکێتی.
کەشناسیی هەرێم پێشبینییەکانی کەشوهەوای ئەمڕۆ و سبەینێی راگەیاند و بەپێی پێشبینییەکان، پلەکانی گەرما بەشێوەیەکی بەرچاو بەرز دەبنەوە.
کەشناسیی هەرێم رایگەیاند، ئەمڕۆ پێنجشەممە، ئاسمان بەگشتى لەنێوان پەڵەهەور بۆ نیمچەهەور دەبێت و خێرایی با لەسەرخۆ و مامناوەند دەبێت، پلەکانی گەرماش نزیکدەبنەوە لە تۆمارکراوەکانی دوێنێ.
ئاماژەی بەوەشکردووە، سبەینێ هەینی، ئاسمان نیمچەهەور بۆ هەوری تەواو دەبێت و پلەکانی گەرما 3 بۆ 4 پلەی سیلیزی بەرز دەبنەوە .
بەرزترین پلەکانی گەرمای پێشبینیکراو بە پلەی سیلیزی:
هەولێر: 23 پلەی سیلیزی
سلێمانی: 21 پلەی سیلیزی
دهۆک: 22 پلەی سیلیزی
کەرکوک: 25 پلەی سیلیزی
زاخۆ: 22 پلەی سیلیزی
هەڵەبجە: 20 پلەی سیلیزی
سۆران: 18 پلەی سیلیزی
حاجی ئۆمەران: 7 پلەی سیلیزی
گەرمیان: 23 پلەی سیلیزی
هاوسەرۆكی دەم پارتی رایگەیاند، پێویستە توركیا ئۆپەراسیۆنە سەربازییەكانی رابگرێت بۆ ئەوەی پڕۆسەی ئاشتی خێراتر بێت.
تولای حاتمئوغڵاری، هاوسەرۆكی پارتی یەكسانی و دیموكراسی گەلان دەم پارتی رایگەیاند: پەیامی عەبدوڵا ئۆجەلان هۆكارێكە بۆ خێراكردنی پڕۆسەی چارەسەریی ئاشتییانەی پرسی كورد لە توركیا، بەڵام پێویستە بۆ جێبەجێكردنی ئەو پڕۆسەیەی هەنگای خێرا بنرێت.
هاوسەرۆكی دەم پارتی وتویەتی: دیموكراسی دەتوانێت رێگە بۆ سەركەوتنی پەیامەكەی ئۆجەلان و پڕۆسەی ئاشتیی بكاتەوە و بە پێچەوانەوەشەوە توندوتیژی و شەڕ هۆكارە بۆ شكستی پڕۆسەكە.
بە وتەی حاتمئوغڵاری ، پەیامەكەی ئۆجەلان دەنگدانەوەی زۆری هەبووە و پارتی كرێكارانی كوردستان پەكەكە تەنها رۆژێك دوای پەیامەكە ئاگربەستی راگەیاندوە و ئەوەش بۆ ناوچەكە بە هەنگاوێكی گرنگ لە قەڵەم دەدرێت.
هاوسەرۆكی دەم پارتی جەختی لەوە كردوەتەوە كە پێویستە توركیا سەرجەم ئۆپەراسیۆنە سەربازیی و ئەمنییەكانی دەرەوەی سنورەكانی وڵاتەكەی رابگرێت بۆ ئەوەی پڕۆسەی چارەسەریی خێراتر بێت، ئەمە لە كاتێكدایە كە تا ئێستاش هێرشی فڕۆكەكانی توركیا بەردەوامە و شەوی رابردوو بۆردومانی دەوروبەری گوندی گەڵاڵەی لە شارباژێر كرد.
دلسۆز مستەفا، ژنێکی رزگاربووی دەستی داعش و خەڵکی تل ڤەسەبی شنگال، لە ماڵەکەی خۆی بەدەستی مێردەکەی بەچەقۆ کوژرا.
بەپێی زانیارییەکانی کوردسات نیوز، ئەم ژنە، کە منداڵێکی تەمەن 3ساڵی هەیە، لە ئەنجامی لێدانی بە چەقۆ گیانی لەدەست داوە.
سەرچاوەیەکی ئەمنی بە کوردسات نیوزی راگەیاند: کە بکوژەکە هەوڵی داوە ئاسەواری تاوانەکە بشارێتەوە و دواتر هەڵهاتووە.
لە ئێستادا گەڕان و پشکنین لەلایەن هێزە ئەمنیەکانەوە بۆ دەستگیرکردنی بکوژەکە بەردەوامە و چەند شوێنێکیان گەمارۆ داوە.
شایەنی باسە، قوربانییەکە یەکێک بووە لەو ژنانەی کە لە کارەساتی شنگال و لەژێر دەستی تیرۆریستانی داعش رزگاری بووە و پاش ماوەیەک گەرابووەوە شنگال.
هاوکات جەختیشی کردەوە: بۆ هەر پێشکەوتن و داهێنانی زیاتر وەک هەمیشە پشتیوانی تەواوی بۆ دەربڕین.
سەرۆكی یەكێتیی نیشتمانیی كوردستان دەڵێت، لەچەند رۆژی داهاتوودا چاوپێكەوتنێكی رۆژنامەوانی لە كوردسات دەبێت و راشكاوانە لەسەر زۆر پرسی گرنگ قسە دەكات.
بافڵ جەلال تاڵەبانی سەرۆكی یەكێتیی نیشتمانیی كوردستان بە یاوەری دلێر سەید مەجید سەردانی دەزگای میدیایی كوردساتی كرد و لەلایەن دێرین لەتیف رەشید بەڕێوەبەری گشتی دەزگای میدیایی كوردسات و كارمەندانی دەزگاكە پێشوازی لێكرا.
دواتر سەرۆكی یەکێتی لەگەڵ بەڕێوەبەری گشتی و لێپرسراوانی بەشە جیاجیاكانی دەزگای میدیایی كوردسات كۆبووەوە و بەشەكانی دەزگاكەشی بەسەركردووە و لە لێدوانێكیشدا رایگەیاند، لە یادی راپەڕیندا بە پێویستی زانی سەردانی دەزگای میدیایی كوردسات بكات و دڵخۆشە بەوەی دەزگاکە هەمیشە لە بەرپێشچوون و گەشەسەندنی بەردەوامدایە.
وتیشی، لە چەند رۆژی داهاتوودا چاوپێكەوتنێكی راشكاوانەی لەگەڵ كوردسات دەبێت و لەبارەی زۆر پرسی گرنگی پەیوەست بە رەوشی هەرێمی كوردستان و عیراق و گفتوگۆ و دانوستانەكانیان لەگەڵ پارتی و لایەنەكانی دیكە لە بارەی پێكهێنانی حكومەتی نوێی هەرێمی كوردستان قسە دەكات.
وەهاب هەڵەبجەیی ئەندامی ئەنجومەنی سەرکردایەتی یەکێتیی نیشتمانیی کوردستان، لە ساڵیادی راپەڕیندا پەیامێکی بڵاوکردەوە و دەڵێت، "ئەرکی سەرشانی هەموومانە میراتی راپەڕین، ئەو ئازادییەی ئێستامان موڵکی کۆمەڵانی خەڵکی کوردستانە، بە هێز و بازووی ئەوان و پشتیوانیی یەکێتی نیشتیمانیی کوردستان بەدیهاتووە".
دەقی پەیامەکە...
لە ساڵیادی ڕاپەڕینی مەزنی کوردستاندا، بە دڵێکی پڕ شانازییەوە پیرۆزبایی لە بنەماڵەی سەربەرزی شەهیدان، پێشمەرگە قارەمانەکان و سەرجەم خەڵکی کوردستان دەکەم.
راپەڕین بەرهەمی خوێن و ماندووبوونی نەوەکانی پێش ئێمە و دەنگدانەوەی ئیرادەی ئازادیخوازی گەلەکەمان بوو ئەو هەستانەوەیە، پەیامێکی روونی بە جیهان گەیاند کە سەرەڕای هەموو ستەمێک، گەلی کورد هەرگیز دەست لە ویستی ژیانێکی سەربەرزانە هەڵناگرێت، ئەمە لەوکاتەدا ڕاست بووە و لە ئێستاشدا ڕاستە.
ئەو ئازادییەی ئێستامان موڵکی کۆمەڵانی خەڵکی کوردستانە، بە هێز و بازووی ئەوان و پشتیوانیی یەکێتی نیشتیمانیی کوردستان بەدیهاتووە، ئەرکی سەرشانی هەموومانە میراتی ڕاپەڕین و دەستکەوتەکانی بپارێزین و لە ئاست کەم و کورتییەکانیش چاو نەپۆشین و ئەوەی دەکەوێتە سەر شانمان هەوڵی ڕاستکردنەوەی بدەین.
دروود بۆ گیانی پاکی شەهیدان و سەربەرزی و سەرفرازی بۆ کەسوکاریان.
وەهاب هەڵەبجەیی
ئەندامی ئەنجومەنی سەرکردایەتی یەکێتیی نیشتمانیی کوردستان
کەشناسیی هەرێم پێشبینی نوێی بۆ کەشوهەوای ئەمڕۆ و سبەی راگەیاند و ئاماژەی بەوەکردووە، کاریگەریی نزمەپاڵەپەستۆی دەریای سوور لەسەر چەند ناوچەیەکی هەرێم دەبێت و باران دەبارێت.
کەشناسیی هەرێم رایگەیاندووە، ئەمڕۆ چوارشەممە، ئاسمان نیمچە هەوردەبێت پاشان لە ئێوارەدا دەگۆڕێت بۆ هەورى تەواو، لەگەڵ هاتنى کاریگەرى نزمە پاڵەپەستۆی دەریای سوور بۆسەر ناوچەکانى باشوورى هەرێم و ئیدارەى گەرمیان و هەڵەبجە و سەنتەرى پارێزگاى سلێمانى و ناوچە کانى رۆژهەڵاتى شارەکە و دەستپێکردنى بارینى نمەباران لەو ناوچانە بەتایبەت لە کاتەکانى درەنگانى شەودا، بەڵام لە هەردوو پارێزگای دهۆک و هەولێر و ناوچەکانى پێشبینى باران بارین زۆر لاوازە.
ئاماژەی بەوەشکردووە، سبەینێ پێنجشەممە، ئاسمان دەبێتەوە بە نیمچەهەور و پەڵەهەور.
ئەوەش هاتووە، ئەمڕۆ پلەکانی گەرما هاوشێوەی دوێنێ دەبن و سبەینێش 1 بۆ 2 پلەی سیلیزی بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی :
هەولێر: 21 پلەى سیلیزى
سلێمانی: 19 پلەى سیلیزى
دهۆک: 20 پلەى سیلیزى
کەرکوک: 2 پلەى سیلیزى
زاخۆ: 21 پلەى سیلیزى
هەڵەبجە: 16 پلەى سیلیزى
حاجی ئۆمەران: 9 پلەى سیلیزى
سۆران: 18 پلەى سیلیزى
گەرمیان: 23 پلەى سیلیزى
شاناز ئیبراهیم ئەحمەد خانمی یەکەمی عیراق لە یادی راپەڕیندا پەیامێکی بڵاوکردەوە و رایگەیاند؛ پابەندبوونی خۆمان دووپات دەکەینەوە کە جارێکی تر هیچ هاوڵاتییەکی عێراق بەدەست ستەمکارانەوە نەناڵێنێت.
دەقی پەیامەکەی :
پێنجی ئازاری ساڵی 1991، بوێری ڕووبەڕووی ستەمکاری بۆوە.
لەم ڕۆژەدا گەلی کورد دژی ڕەفتاری دڕندانەی ڕژێمی سەددام ڕاپەڕی. ئەمەش بووە شۆڕشێکی نیشتمانی لەپێناو ئازادیدا. شانبەشانی شۆڕشگێڕانی ڕاپەڕینی شەعبانییە لەباشوور، کە پەیامی میللەتی بەڕوونی دەرخست: گەلی عیراق هەرگیز چەوساندنەوە و سەرکوتکردن و کۆمەڵکوژی یان لەناوبردنی شارستانییە دێرینەکەی قبوڵ ناکات. لەو پێناوەشدا باجی قورسی دا، بەڵام بوێری گەل و ڕۆحیەتی برایەتیی هێشتا زیندووە.
ئەمڕۆ ڕێز لەو قوربانیدان و بەرگەگرتنە دەگرین، پابەندبوونی خۆمان دووپات دەکەینەوە بۆ دوا ڕۆژێک کە جارێکی تر هیچ هاوڵاتییەکی عێراق بەدەست ستەمکارانەوە نەناڵێنێت.
قوباد تاڵەبانی رایگەیاند، راپەڕین بەرهەمی دەیان ساڵ خەبات و قوربانیدان و یەکگرتوویی خەڵک و لایەنە سیاسییەکان بوو. دەشڵێت، ئەمساڵ لە کاتێکدا یادی راپەڕین دەکەینەوە کە هیوا و گەشبینی لەبارەی ئاشتی و دابینکردنی مافەکانی کورد لە تورکیا دروست بووە.
قوباد تاڵەبانی جێگری سەرۆکی حکومەتی هەرێم رایگەیاندووە، "بەوپەڕی رێز و شکۆوە یادی راپەڕینە مەزنەکەی گەلەمان دەکەینەوە. راپەڕین لەلایەکەوە دەرئەنجامی دەیان ساڵ خەبات و قوربانیدانی رۆڵەکانی گەلی کورد بوو، لەلایەکی ترەوە بەرهەمی یەکگرتوویی و یەکڕیزیی خەڵک و لایەنە سیاسییەکانی کوردستان لەو کاتەدا بوو".
ئاماژەی بەوەشکردووە، "دابینکردنی مافەکانی گەلی کوردستان و ئازادی و دادپەروەری لە ئامانجە سەرەکییەکانی راپەڕین بوون، راستە بەهۆی کەموکووڕی لە پرۆسەی حکومڕانی و هۆکاری دیکەوە هێشتا نەتوانراوە بەشێک لە ئامانجەکانی راپەڕین وەک خۆی بەدیبهێنرێن، بەڵام لەم قۆناغەدا بەئەرکی خۆمانی دەزانین".
دەشڵێت، "پێمان وایە بە راستکردنەوەی رێڕەوی حکومڕانی و پێکهێنانی حکومەتێکی بەهێز و کارا و بە بەهێزترکردنی دامەزراوەکانی حکومڕانی دەتوانین هەنگاوێک لە بەدیهێنانی یەکجاریی ئامانجەکانی راپەڕین نزیکتر ببینەوە".
قوباد تاڵەبانی روونیشیکردووەتەوە، "ئەمساڵ لە کاتێکدا یادی راپەڕین دەکەینەوە کە هیوا و گەشبینییەک سەبارەت بە ئاشتی و دابینکردنی مافەکانی گەلی کورد لە تورکیا دروست بووە، ئێمە هیوادارین ئەمجارەیان پرۆسەی ئاشتی سەربگرێت و گەلی کورد لە تورکیاش بە مافە بنەڕەتییەکانی خۆی شاد بێت".
لە کۆتاییدا وتووشییەتی، "لەم یادەدا سەری رێز دادەنوێنین لە ئاست شەهیدانی راپەڕین و هەموو شەهیدانی بزووتنەوەی رزگاریخوازی میللەتەکەمان".
ئەمڕۆ 5ی ئازار، 34 ساڵ تێدەپەڕێت بەسەر راپەڕینە مەزنەکەی خەڵکی کوردستاندا کە دژ بە رژێمی بەعسی پێشوو ئەنجامیدا، کە لە ساڵی 1991 لە دەروازەی راپەڕینەوە دەستی پێ کرد و شارە و شار و گوند بە گوند درێژەی کێشا.
بەهۆی هێرشی ئاسمانیی توركیاوە بۆسەر سایلۆیەكی گەنم لە كۆبانێ، 500 تۆن گەنم لەناوچوون.
گوڵستان ئەحمەد سەرۆكی لیژنەی هاوبەشی سایلۆ و ئاشەكان لە كانتۆنی فورات رایگەیاند، بڕی 500 تۆن گەنم بەهۆی هێرشەكانی توركیاوە لە شارۆچكەی سڕین لە باشوری كۆبانێ لەناوچوون.
وتیشی، هێرشەكان لە 29ی شوباتی رابردوو لە رێی فڕۆكەی جەنگی و فڕۆكەی بێفڕۆكەوانەوە كراوەتەسەر سایلۆكە و بەهۆیەوە زیانی زۆری پێگەیاندووە.
بەوتەی گوڵستان ئەحمەد، توركیا كەرتە خزمەتگوزاریی و زیندووەكان لە رۆژئاوای كوردستان دەكاتە ئامانج، لەنێوشیاندا سایلۆكان كە بە مەبەست لە سێ مانگی رابردوودا چەندین جار دووبارەی كردووەتەوە، وتیشی، جگە لەوە دامەزراوەكانی كارەبا و ئاو و پرۆژە خزمەتگوزارییەكانی تر هێرشیانكراوەتەسەر بە ئامانجی ئاوارەكردنی دانیشتوانی ناوچەكان.
هاتوچۆی هەرێم نرخی نوێی بۆ وانەکانی دەرهێنانی مۆڵەتی شۆفێری بە هەردوو وانەی تیۆری و پراکتیکییەوە دیاری کرد.
هاتوچۆی هەرێم رایگەیاندووە، بۆ ئەو کەسانەی دەیانەوێت مۆڵەتی شۆفێری لە جۆری B دەربکەن، کە مۆڵەتی شۆفێری ئۆتۆمبێلی تایبەت دەگرێتەوە، چەند نرخێکی دیاری کردووە، داواش لە نووسینگەکانی دەرهێنانی مۆڵەتی شۆفێری دەکات، پابەندی نرخەکە بن.
بەپێی راگەیەنراوەکە، بۆ هەر وانەیەکی تیۆری 45 خولەکی، بڕی 3 هەزار دینار لە فێرخواز وەردەگیرێت.
بۆ هەر وانەیەکی پراکتیکی یەک سەعاتیش بڕی 20 هەزار دینار لە فێرخواز وەردەگیرێت.
هاتوچۆی هەرێم راشیگەیاندووە، پێویستە سەرجەم نوسینگەکان پابەندی بڕیارەکە بن و دەشڵێت، دەبێت فێرکردن بەو میکانیزمە بێت، کە لە رێنمایی ژمارە 12ی ساڵی 2024 دیاریکراوە.
پێشتریش هاتوچۆی هەرێم رایگەیاند، سیستمی نوێ بۆ دەرهێنانی مۆڵەتی شۆفێری دیاری کراوە و رێنماییەکانی بڵاو کردەوە. بەپێی سیستمە نوێیەکە، دەبێت فێرخوازان 21 سەعات وانەی تیۆری و 12 سەعاتیش وانەی پراکتیکی بخوێنن.
وەزارەتی کشتوکاڵ و سەرچاوەکانی ئاو رایدەگەیەنێت: قەدەغەکردنی راوە ماسی لەمساڵدا لە ڕۆژی 10ی 3 بۆ 20ی 6ی 2025 دەستپێدەکات.
رابەر محەمەد بەڕێوەبەری سامانی ئاژەڵ و ڤێتەرنەری لەوەزارەتی کشتوکاڵ لەراگەیەنراوێکدا ئاگاداری سەرجەم بەڕێوەبەرایەتییە گشتییەکانی کشتوکاڵ لەهەرێم دەکاتەوە، بۆ ئەمساڵ قەدەغەی راوە ماسی لە 10ی ئەم مانگەوە تاوەکو 20-6-2025 دەستپێدەکات.
هەر لەراگەیەنراوەکەدا ئاماژەی بەوەشکردووە، راوکردن بە (کارەبا، ماددە تەقەمەنییەکان، ماددە ژەهراوییەکان و تۆڕی کون ورد) هەر شتێک کەببێتە لەناوبردنی بەکۆمەڵی زیندەوەرە ئاوییەکان لەهەموو کاتێکدا قەدەغەیە.
ئاشکراشیکردووە، لە 21ی 6ی2025 راوە ماسی ئاسایی دەبێتەوە
بەریتانیا كەمپینێكی دیجیتاڵی لە هەرێمی كوردستان بۆ هۆشیاری لەبارەی كۆچنەكردن بۆ ئەو وڵاتە و هۆشداریدان بە قەچاخچییەكان راگەیاند.
وەزارەتی ناوخۆی بەریتانیا بڵاویكردەوە، هەڵمەتێكی دیجیتاڵییان لە رێی رێكلامەوە لە تۆڕە كۆمەڵایەتی و ماڵپەڕەكان دەسپێكردووە بۆ ئەوە هاووڵاتیانی هەرێم ئاگادار بكەنەوە لە فێڵ و بەڵێنی پوچەڵی قاچاخچییەكان.
ئەنجێڵا ئیگڵ وەزیری ناوخۆی بەریتانیا ئاماژەی بەوە كردووە، لە درێژەی كەمپەینە نێودەوڵەتییەكانیاندا ئەمجارە هەرێمی كوردستانیان بە ئامانج گرتووە و دەیانەوێت پەڕینەوەی بەلەمی بچووك لە نۆكەندی ئینگلیز كەمبكەنەوە.
وتیشی چەندان باندی تاوانكاریی، درۆی مەترسیدار لە تۆڕە كۆمەڵایەتییەكان بڵاودەكەنەوە و بێبەزەییانە خەڵك بۆ پارە دەچەوسێننەوە، بۆیە لەڕێی چیرۆكی قوربانییەكانەوە راستی بابەتەكە دەخەنەڕوو.
بەپێی ئامارەكانی وەزارەتی ناوخۆی بەریتانیا، تەنها رۆژی یەكشەممە 592 كۆچبەر بە 11 بەلەمی بچووك نۆكەندی ئینگلیزیان بڕیوە و لە فەرەنساوە خۆیان گەیاندووەتە بەریتانیا.
سەرۆک بافڵ بەبۆنەی سی و چوارهەمین ساڵیادی راپەڕینە مەزنەکەی گەلی کوردستان پەیامێکی پیرۆزبای ئاراستەی کەسوکاری شەهیدان و پێشمەرگە دێرینەکان دەکات و دەڵێت: یەکێتی وەک ئەندازیاری راپەڕین، لەبەردەم قوربانیدان و خوێنی شەهیدان و بەرپرسیارێتیی نیشتمانی وەک رابردوو بەردەوام دەبێت
دەقی پەیامەکەی سەرۆک بافڵ......
بەبۆنەی سی و چوارهەمین ساڵیادی راپەڕینە مەزنەکەی گەلی کوردستان، لە دڵەوە پیرۆزبایی گەرم دەکەم لە کەسوکاری سەربەرزی شەهیدان و پێشمەرگە دێرینەکان و تێکۆشەرەکانی رێگای خەباتی کوردایەتی و شۆڕشی نوێ و کۆمەڵانی خەڵکی کوردستان.
راپەڕین کە لە رانیەی سەربەرزەوە ئاگری بڵێسەی سەند، خاوەندارێتییەکەی دەگەڕێتەوە بۆ یەکێتیی نیشتمانیی کوردستان و قارەمانێتیی رێکخستنەکان و شانەچەکدار و پارتیزانەکانی شۆڕشی نوێ و دواتر یەکگرتوویی هێزە کوردییەکان لە بەرەی کوردستانیدا، ئەمەش سەلماندی کە زوڵم و ستەم و نادادی هەرگیز ناتوانێت دەنگ و ئیرادەی گەلەکەمان کپ بکات.
ئەمڕۆ دوای زیاتر لە سێ دەیە بەرپرسیارێتیی هەموومانە کە هەوڵەکانمان یەکبخەین لەپێناو پتەوکردنی گیانی برایەتی و پێکەوەیی و بنیادنانەوەی متمانە تاوەکو روومان لە پێکهێنانی حکومەتێکی بەهێز و دادپەروەر بێت و بە ئیرادە و ئیدارەیەکی نوێوە کەموکوڕییەکان چارەسەر بکەین و خزمەتی زیاتری خەڵکە خۆشەویستەکەمان بکەین و پێکەوە کار بۆ پاراستنی ئامانجە باڵاکانمان بکەین.
یەکێتیی نیشتمانیی کوردستان وەک ئەندازیاری راپەڕین، لەبەردەم قوربانیدان و خوێنی شەهیدان و بەرپرسیارێتیی نیشتمانی وەک رابردوو بەردەوام دەبێت لە داکۆکیکردن لە هێنانەدی مافەکانی گەلەکەمان و باشترکردنی ژیان و گوزەرانی خەڵکە خۆشەویستەکەمان.
سڵاو و درود بۆ گیانی پاکی شەهیدانی راپەڕین و سەرجەم شەهیدانی رێگای رزگاریی گەلەکەمان.
بافڵ جەلال تاڵەبانی
سەرۆکی یەکێتیی نیشتمانیی کوردستان