سەرچاوەیەك لە وەزارەتی دارایی عیراق رایگەیاند ، وردبینی لە لیستی موچەی مانگی شوباتی موچەخۆرانی هەرێم تەواو بووە . 

ئەو سەرچاوەیە بە كوردسات نیوزی راگەیاند ، وەزارەتی دارایی كاری وردبینیكردنی  لیستی موچەی مانگی شوباتی فەرمانبەرانی هەرێمی تەواو كردوە  و تەنها نوسراوێك ماوە تا بدرێتە تەیف سامی وەزیری دارایی عیراق بۆ ئەوەی ئیمزای بكات و بیداتە بەشی ژمێریاری تا پارەكە خەرج بكرێت.

رۆژی 26 ی شوبات ، وەزارەتی دارایی هەرێم رایگەیاند ، لە رێگەی تیمی تەكنیكی وەزارەتەكەوە لیستی موچەی مانگی شوبات رەوانەی بەغداد كراوە. 

لەسەر هەناردەكردنەوەی نەوتی هەرێم، وەزارەتی نەوتی عیراق و وەزارەتی سامانە سروشتییەكانی هەرێم و ئەپیكۆر ئەمڕۆ لە بەغداد كۆدەبنەوە، لیژنەی نەوت و وزەی ئەنجومەنی نوێنەرانیش دەڵێت، هیوادارن لە چەند رۆژی داهاتوودا هەناردەكردنەوەی نەوت لەڕێی بۆری نەوتی جەیهان دەستپێبكاتەوە. 

وەزارەتی نەوتی عیراق ئەمڕۆی بۆ كۆبوونەوەیەك لەگەڵ وەزارەتی سامانە سروشتییەكانی هەرێم و ئەپیكۆر دیاری كردووە، بۆ تاوتوێ كردنی پرسەكانی تایبەت بە گرێبەستەكان و لێكتێگەیشتن سەبارەت بە پەرەدان بە كێلگە نەوتییەكان.

هاوكات سەباح سوبحی ئەندامی لیژنەی نەوت و وزە و سامانە سروشتییەكان لە ئەنجومەنی نوێنەرانی عیراق بە رۆژنامەی "سەباح"ی وتووە، وەزارەتی نەوت لیژنەی تایبەتی رەوانەی زاخۆ كردووە بۆ دڵنیابوونەوە لەسەرجەم بۆریە نەوتییەكان كە لە كێڵگەی كۆرمۆرەوە دەگەن بەرەو خاكی توركیا. 

هەروەها ئاماژەی بەوەكرد، سەرجەم رێكارەكانی تایبەت بە دەستپێكردنەوەی هەناردەی نەوتی هەرێم لەڕێی بۆری نەوتی جەیهان تەواو بووە، بەڵام عیراق چاوەڕێی وەڵامی توركیایە سەبارەت بە رەوشی ئەو بۆرییانە و دەستپێكردنەوەی هەناردەكردنەكە لە ماوەی چەند رۆژی داهاتوودا.

وتەبێژی یەکێتی رایدەگەیەنێت: لە دانوستانەکاندا یەکێتی و پارتی لێکنزیکبوونەوەی باش هەیە لەنێوانیان و پێویستە حکومەتێکی کارا و چالاک پێکبهێنێرێت بۆ رووبەرووبونەوەی ئاڵەنگارییەکان.

سەعدی ئەحمەد پیرە وتەبێژی یەکێتیی نیشتیمانیی کوردستان لەمیانی بەشداریکردنی لەبەرنامەی پانۆرامای کوردسات نیوز رایگەیاند: لێک نزیکبوونەوەیەکی باش لەنێوان یەکێتیی نیشتیمانی کوردستان و پارتی هەیە و بەئومێدین بە زووترین کات حکومەتێکی چالاک و کارا پێکبهێنین.

سەعدی ئەحمەد پیرە وتیشی: بۆ چوار ساڵی داهاتوو پێویستمان بە پەرلەمان و حکومەتێکی بەهێز هەیە، دەشڵێت: خەڵک چاوەڕێی رێککەوتنێکی تەندروست لەنێوان یەکێتی و پارتی دەکات.

ئاماژەی بەوەشکرد، لە پرسی حکومڕانی لەهەرێم هیچ لایەنێک پەراوێز ناخرێت، دەرگای گفتوگۆش بەرووی هەموو لایەنەکاندا کراوەیە.

ئەمڕۆ سەرۆکی شارەوانیی و قائیمقامی سلێمانی، لەبارەی گەڕەک و خانووە کەلەپورییەکان کۆبوونەوە و جەختیان لەپاراستنی ئەو گەڕەکانە کردووە.

سەرۆکایەتیی شارەوانی سلێمانی بڵاویکردەوە،لە کۆبوونەوەکەدا لەبینای قائیمقامیەتی سلێمانی بەڕێوەچوو تاوتوێ لەسەر هەماهەنگی نێوان هەموو لایەک بۆ پاراستنی گەڕەک و خانووە کەلەپورییەکان کرا ،  بەجۆرێک دانیشتوانی ئەو گەڕەکانەش هاوکار بن و رێگەش نەدرێت تووشی زیان ببن.

ئاماژەی بەوەشکرد،هەر لە میانەی کۆبوونەوەکەدا رێکاری نوێ دیاریکرا بۆئەوەی لیژنەی شوێنەوار و کەلەپوری سەر بە لیژنە هاوبەشەکان دەستکراوەتربن و رێگە لە هەموو هەوڵێک بگرن کە بیەوێت زیان بەو گەڕەکانە بگەیەنێت.

سەرچاوەیەك لە وەزارەتی دارایی عیراق بە كوردسات نیوزی راگەیاند، هێشتا وردبینی لە لیستی موچەی موچەخۆرانی هەرێم دەكرێت و پێدەچێت لە دوو رۆژی داهاتووشدا موچە نەیەت.

ئەو سەرچاوەیە بە كوردسات نیوزی وت، وەفدێكی وەزارەتی دارایی هەرێم لە بەغدادن و لەگەڵ تەیف سامی وەزیری دارایی عیراق لەبارەی موچەوە كۆبوونەتەوە، بەڵام پێناچێت لە دوو رۆژی داهاتووشدا موچەی هەرێم رەوانە بكرێت.

پێنج رۆژ لەمەوبەریش، وەزارەتی دارایی هەرێم رایگەیاندبوو، لیستی موچەی مانگی شوباتی موچەخۆرانی هەرێم رەوانەی بەغداد كراوە.

رۆژی پێنجی شوباتی رابردووش، موچەی مانگی كانونی دووەمی موچەخۆرانی هەرێم دابەشكرا و بە چوار رۆژ كۆتاییهات.

وەزارەتی پەروەوردە رایگەیاند، تاقیکردنەوەکانی نیوەی وەرزی دووەم لە دوو کاتی جیاوازدا ئەنجام دەدرێن و پشوو دەکەوێتە نێوانیانەوە.

وەزارەتی پەروەردەی حکومەتی هەرێم رایگەیاند، لە سەرجەم قوتابخانە حکومی و ناحکومییەکان 'جگە لە نێودەوڵەتییەکان' بەهۆی پشووەکانی مانگی ئازار و نەورۆزەوە، تاقیکردنەوەی نیوەی وەرزی دووەمەوە دەبن بە دوو بەشەوە.

ئاماژەی بەوەشکردووە، لە رۆژانی 4 تاوەکو 9ی ئازار، تاقیکردنەوە ئەنجام دەدرێت، پاشان چوار رۆژ لەدوای جەژنی نەورۆزەوە کە دەکاتە 24 تاوەکو 27ی ئازار، تاقیکردنەوەکان تەواو دەکرێن.

ئەوەش لە کاتێکدایە، دوێنێ وەزارەتی پەروەردە پشووی بەهارە و جەژنی نەورۆزی راگەیاند و ئاماژەی بەوەکرد، کە 11 تاوەکو 23ی ئازار پشوو دەبێت.

پۆلیسی سلێمانی رایگەیاند، بە تۆمەتی كوشتنی هاووڵاتیەك، تۆمەتبارێك لەلایەن بەشی پۆلیسی نەهێشتنی تاوانی سلێمانییەوە دەستگیركرا.

بەڕێوەبەرایەتی پۆلیسی پارێزگای سلێمانی لە راگەیەنراوێکدا رایگەیاند، شەوی رابردوو لە گەڕەكی سەرچنار لە شاری سلێمانی لە روداوێكدا هاووڵاتییەك بە گولـلە كوژرا و تۆمەتبار هەڵات.

ئاماژەی بەوەشکرد، دەستبەجێ‌ هێزەكانیان گەیشتنە شوێنی روداوەكە و لێكۆڵینەوە بۆ دەستگیركردنی تۆمەتبار دەستیپێكرد، سەرەنجام توانرا لەلایەن بەشی پۆلیسی نەهێشتنی تاوانی سلێمانییەوە لەماوەی كەمتر لە هەشت سەعاتدا تۆمەتبار بدۆزرێتەوە و دەستگیربكرێت.

پۆلیسی سلێمانی ئاشکراشیکرد، لە ئێستادا تۆمەتبار کە لەدایكبووی 1972 بە بڕیاری دادوەر و بەپێی ماددەی 406 لە یاسای سزادانی عیراقی راگیراوە و دانی ناوە بە تاوانەكەیدا.

کەشناسی پێشبینی نوێی کەشوهەوای راگەیاند و ئاماژەی بەوەکردووە، شەپۆلێکی نوێی بەفر و باران روو لە هەرێم دەکات.

کەشناسیی هەرێم رایگەیاند، ئەمڕۆ دووشەممە، ئاسمان لەنێوان نیمچە هەور بۆ هەوری تەواو دەبێت بەتایبەتی لە ناوچە شاخاوییەکان و لەکاتەکانی ئێوارەدا ئەگەری کەمێک بەفربارین هەیە بەتایبەتی لەناوچە شاخاوییە سنووریەکانی باکوور و رۆژهەڵات .

ئاماژەی بەوەشکردووە، سبەی سێشەممە، ئاسمان تەنکەهەوری بەرز دەبێت لە زۆربەی کاتەکاندا.

کەشناسیی هەرێم دەشڵێت، ئەمڕۆ پلەکانی گەرما 1 بۆ 3 پلەی سیلیزی نزم دەبنەوە، بەڵام سبەینێش بە گشتی 2 بۆ 4 پلە بەرزدەبنەوە.

لەلایەکی دیکەوە کەشناسیی عیراق ئاماژەی بەوەکردووە، لە کۆتایی ئەم هەفتەیەدا شەپۆلێکی بارانبارین بە گشتی عیراق و بە پچڕ پچڕی هەرێم دەگرێتەوە.

بەرزترین پلەکانی گەرمای پێشبینیکراو بە پلەی سیلیزی :

هەولێر: 18 پلەى سیلیزى

سلێمانی: 13 پلەى سیلیزى

دهۆک: 15 پلەى سیلیزى

کەرکوک: 19 پلەى سیلیزى

زاخۆ: 16 پلەى سیلیزى

هەڵەبجە: 14 پلەى سیلیزى

حاجی ئۆمەران: 2 پلەى سیلیزى

سۆران: 14 پلەى سیلیزى

گەرمیان: 18 پلەى سیلیزى

بەڕێوەبەرایەتی گشتیی هاتوچۆی هەرێمی کوردستان رایگەیاند، سیستمی دەرهێنانی مۆڵەتی شۆفێری گۆڕدراوە و پێنج خاڵی بۆ دەرهێنانی مۆڵەتی شۆفێری خستووەتە روو.

هاتوچۆی هەرێم ئاماژەی بەوەکردووە، جێبەجێکردنی ئەو سیستمە نوێیە بۆ ئەوەیە شۆفێران زیاتر هۆشیار بن و سەرجەم سێکتەرە گرنگەکانی شۆفێریکردن بزانن و جێبەجێی بکەن.

دەقی رێنماییەکانی هاتوچۆی هەرێم:

1.نۆرەی دەرهێنانی مۆڵەتی شۆفێری جۆرەكانی (A B C1) كە چوونەتە پڕۆسەی تاقیكردنەوەی تیۆری و پراكتیكی هەر بە سیستەمی بەركاری پێش دەرچوونی ئەو بڕیارە مۆڵەت دەردەهێنن.

2.هەر نۆرەیەك كە نەچووبێتە پڕۆسەی كرداری و هەموو نۆرە گرتنێكی نوێ بۆ دەرهێنانی مۆڵەتی شوفێری گشت جۆرەكانی(A B C D T) بە سیستمی نوێ جێبەجێ دەكرێت.

3.دەكرێت خاوەنی مۆڵەتی جۆری (B) ئۆتۆمبێلێک لێبخورێت، كە كۆی گشتی (ئۆتۆمبێل و سەرنشین و بارەكەی) لە (3.5) سێ تۆن و نیو زیاتر نەبێت کە جۆرەكانی پیك ئاپ و ئۆتۆمبیلی دوو تەنیش دەگرێتەوە. هەروەها دەكرێت ئامێرەكانی بیناسازی و كشتوكاڵیش لێبخورێت بە مەرجێك كێشی لە (3.5) سێ تۆن و نیو زیاتر نەبێت. پێویستە خێرایی ئامێری بیناسازی لە (60)كم لە كاتژمێرێكدا زیاتر نەبێت و ئامێری كشتوكاڵی خێرایی لە (40)كم زیاتر نەبێت.

4.وانەکانی تیۆری (21) سەعات وانەکان دەخوێنن، دابەشیدەکەن و رۆژانە 3 سەعات وانەدەخوێنن و بە هەفتەیەک تەواو دەبێت.

5.وانەکانی پراکتیکی (12) کاتژمێر بە کرداری لەگەڵ راهێنەر شۆفێری دەکەن پاشان لە بەڕێوەبەرایەتی هاتوچۆ لە بەشی مۆڵەت شۆفێری تاقی کردنەوەکانی تیۆری ئەنجام دەدەن.

چەند کەسێک بەناوی بەشی زیادەڕۆی سەرۆکایەتیی شارەوانیی سلێمانیەوە داوای پارەیان لەهاووڵاتیان کردوە، سەرۆکایەتیی شارەوانیش دەلێت: ئەو بابەتە هیچ پەیوەندییەکی بە شارەوانییەوە نییە

سەرۆکایەتیی شارەوانیی سلێمانیی سلێمانی ئاگاداری هاووڵاتیان دەکاتەوە، ئەمڕۆ دوای بەدواداچوون بۆ کێشەی هاووڵاتییەک، دەرکەوت بەناوی بەشی زیادەڕەوی سەرۆکایەتیی شارەوانییەوە چەند کەسێک داوای پارەیان لە هاووڵاتییان كردووه.

بۆیە ئاگاداری هاووڵاتییان دەکەین كە ئەو بابەتە هیچ پەیوەندییەکی بە شارەوانیی سلێمانییەوە نییە و لەکاتی رودانی هەر حاڵەتێکی لەم جۆرە، دەستبەجێ بەشی یاسای سەرۆکایەتیی شارەوانیی یاخود نزیکترین بنکەی پۆلیسی لێ ئاگادار بکەنەوە ، بۆ مەبەستی گرتنەبەری رێکاری یاسایی لەگەڵ ئەو جۆرە کەسانە کە تاوانی لەو جۆرە ئەنجام دەدەن .

لەرۆژی 11 تاوەکو 23ی ئەم مانگە پشووی بەهارە لە ناوەندەکانی خوێندن دەستپێدەکات، وتەبێژی وەزارەتی پەروەردەش دەڵێت: ئەو ناوەندانەی خوێندن دەگرێتەوە کە ساڵنامەی وەزارەتییان وەک خۆی پیادەکردوە.

سامان سیوەیلی وتەبێژی وەزارەتی پەروەردە رایگەیاندووە: ئەو ناوەندانەی خوێندنی حکومی کە ساڵنامەی وەزارەتییان وەک خۆی پیادەکردوە، هەروەها هەموو ناوەندەکانی خوێندنی ناحکومی، پشووی بەهارە  لەرۆژی  11ی 3ی 2025 ، تا 23ی 3ی 2025 دەستپێدەکات.

ئاماژەی بەوەشکرد، رۆژی دووشەممە  24ی 3ی 2025 دەوامی ئاسایی ناوەندەکانی خوێندن دەستپێدەکاتەوە.

پێشنیوەڕۆی دوێنی دوومنداڵ لە گوندی سۆفیانی  ناحیەی بنگردی لە قەزای دوکان  لەبەردەم ماڵەکەیاندا عەلاگەیەک دەدۆزنەوە کەتەقەمەنی تێدابووە، دەستکاری دەکەن و پیاندا دەتەقێتەوە.

فەرمان ئەحمەد بەڕێوەبەری کارگێڕی نەخۆشخانەی فریاکەوتنی رانیە بە کوردسات نیوزی ڕاگەیاند؛ دوو منداڵ بە برینداری گەیەنراونەتە نەخۆشخانە کە خوشک و برای یەکترن بەهۆی تەقینەوەیەک پیاندا بەسەختی بریندار بوون  دوای وەرگرتنی چارەسەری سەرەتایی بەهۆی سەختی برینەکەیان رەوانەی سلێمانی کراون.

ئەو دوو منداڵە  خوشک و برای یەکترن یەکێکیان تەمەنی حەوت ساڵە و ناوی  کەژێ میقداد و ئەوی دیکەش تەمەنی نۆ ساڵە و ناوی كێوار میقدادە و بەهۆی تەقینەوەکەوە دەستێکی لەدەستداوە.

قائیمقامییەتی سلێمانی رایگەیاند، دەستیان بەسەر زیاتر لە 60 تۆن گۆشتی بەستووی ئاژەلدا کە هاوردەی سلێمانی کرابوو.

قائیمقامییەتی سلێمانی ئاماژەی بەوەکردووە، ئەو گۆشتە لە کۆگایەکدا دانرابوو و لیژنەکان دەستیان بەسەردا گرتووە، کە هەندێکیان پارچە پارچە کراون و هەندێکیان لاکی ئاژەڵن و لەناو کارتۆندان.

ئەوەشی خستە روو، گۆشتەکە دووجار پشکنینی بۆکراوە شیاو نییە بۆ خواردن، بۆیە لەلایەن لیژنەکانەوە لەناو دەبرێت.

 حکومەتی هەرێم راگەیاند، بەهۆی مانگی رەمەزانەوە یەک سەعات دەوامی رەسمی سەرجەم فەرمانگەکان کەمکرانەوە.

حکومەتی هەرێم رایگەیاند، بەهۆی مانگی رەمەزانەوە لە سەرجەم دامودەزگا رەسمییەکانی حکومەتی هەرێم یەک سەعات دەوامی فەرمیی کەمدەکرێتەوە و فەرمانبەران یەک سەعات زووتر دەچنەوە ماڵەوە.

ئەوەش لە کاتێکدایە، بەر لە دەستپێکی مانگی رەمەزان حکومەتی هەرێم دەوامی قوتابخانەکانی یەک کاتژمێر کەمکردەوە.

ساڵانە لەگەڵ هاتنی مانگی رەمەزاندا بەشێوەیەکی گشتی دەوام لە ناوەندە حکومی و بەشێکی کەرتی تایبەتیشدا کەمدەکرێتەوە.