وەزارەتی دارایی هەرێم ئاشكرایكرد، كۆی قەرز و سودە كەڵەكەبووەكانی كۆمپانیای نالیا و چاڤی لەئێستادا گەیشتووەتە نزیكەی 92 ملیار دینار، ئەوەش 76%ی ئەو بڕە پارەیەیە كە عیراق مانگانە داوا دەكات هەرێمی كوردستان وەك داهاتی ناوخۆ رادەستی بكات.

بەڕێوەبەرایەتی گشتی بانكە بازرگانییەكان لە وەزارەتی دارایی هەرێم لە راگەیەنراوێكدا ئاماژەی بەوەكردووە، لەسەر داوای وەزارەتی دارایی و ئابوری دەستگیرا بەسەر ژمارەیەك موڵكی كۆمپانیای نالیا و چاڤی و لە زیادكردنێكی ئاشكرادا هەموو ئەو موڵكانە دەفرۆشرێن كە دەستیانبەسەرداگیراوە و ژمارەیان 60 موڵكە.

لە بەشێكی تری راگەیەنراوەكەدا هاتووە، پاڵپشت بە بڕیاری سەرۆكایەتی دادگای پێداچوونەوەی هەرێم و دەستەی شارستانی تێهەڵچوونەوە ژمارە 90ی دەستەی شارستانی تێهەڵچوونەوە، لە 20/10/2021، تایبەت بە یەكلایی كردنەوەی دۆسیەی قەرزەكانی كۆمپانیای نالیا لە بەرژەوەندی وەزارەتی دارایی، بە بڕیاری بەڕێوەبەرایەتی جێبەجێكردنی دووەمی سلێمانی لە 22/9/2024، تایبەت بە دانانی نیشانەی گلدانەوە "حجز" لەسەر كۆی موڵكەكانی هەردوو كۆمپانیای نالیا و چاڤی.

وەزارەتی دارایی هەرێم لە رێگەی بەڕێوەبەرایەتی گشتی بانكە بازرگانییەكان موڵكە دەستبەسەرداگیراوەكانی كۆمپانیای چاڤی دەفرۆشێت كە ژمارەیان 60 موڵكە و پێكهاتووە لە چەندین پارچە زەوی و هۆتێل و كافتریا و كابینەی گەشتیاریی، كە پێشتر دەستی بەسەرداگیراوە بۆ وەرگرتنەوەی كۆی قەرز و سوودە كەڵەكەبووەكانی كە لەئێستادا گەیشتووەتە 91 ملیار و 760 ملیۆن و 660 هەزار و 350 دینار.

ئەوەش لە كاتێكدایە ئێستا حكومەتی عیراق بەپێی رێككەوتنەكان لەگەڵ وەفدی دانوستانكاری هەرێم، بۆ چارەسەركردنی كێشە داراییەكان لەگەڵ بەغداد، داوا دەكات هەرێمی كوردستان مانگانە 120 ملیار دیناری داهاتی ناوخۆ رادەست بكات، بۆ چارەسەركردنی كێشەی موچەی موچەخۆرانی هەرێم، كۆی قەرزەكانی كۆمپانیای نالیا و چاڤیش، 76%ی ئەو بڕە پارەیەیە كە عیراق لە هەرێمی داوا دەكات، ئەگەر ئەو قەرزانەش بگەڕێتەوە بۆ گەنجینەی وەزارەتی دارایی هەرێم، دەتوانرێت بەشێكی كێشەكان لەگەڵ بەغداد چارەسەر بكرێن، بەڵام شاسوار عەبدولواحید لە كۆنفرانسێكی رۆژنامەوانیدا رایگەیاند، قەرزدارە و بە هەوەس نایداتەوە، باجیش نادات و حساب بۆ حكومەتیش ناكات.

وەزارەتی دارایی هەرێم جەختیشیكردووەتەوە، لەسەر داوای بانكی سلێمانی یەك، سەر بە بەڕێوەبەرایەتی گشتی بانكە بازرگانییەكانی وەزارەتی دارایی دوای چەندین جار ئاگاداركردنەوەی كۆمپانیای نالیا بۆ گەڕاندنەوەی قەرزەكان و پابەند نەبوونی، وەزارەتی دارایی بەمافی یاسایی خۆی دەزانێت لە رێگەی زیادكردنی ئاشكراوە هەموو ئەو موڵكانە بفرۆشێت كە نیشانەی گلدانەوە "حجز"یان خراوەتەسەر.

وەزارەتی کارەبا بۆ ماوەی دوو رۆژ تاقیکردنەوەی فشار ئەنجام دەدات، هاووڵاتیانیش ئاگاداردەکاتەوە ئەگەر پچڕانی نەخوازراوی رویدا پەیوەندی بە تاقیکردنەوەکە هەیە.

وەزارەتی کارەبای هەرێم لە راگەیەنراوێکدا بڵاویکردەوە، هەڵدەستن بەئەنجامدانی تاقیکردنەوەی فشاری سەر تۆڕی کارەبای نیشتمانی لەهەر سێ پارێزگای هەولێر، سلێمانی و دهۆک، ئەم تاقیکردنەوەیە ناوچەکانی ناوەوە و دەرەوەی پڕۆژەی روناکی دەگرێتەوە.

ئاماژەی بەوەشکردووە، ئەو تاقیکردنەوەیە رێکارێکی رۆتینیە کە بۆ تۆڕی کارەبا ئەنجام دەدرێت لەلایەن وەزارەتی کارەبای حکومەتی هەرێمی کوردستان، کە ئامانج لێی دیاریکردنی کێشە و خاڵە لاوازەکانی تۆڕەکانی گواستنەوە و دابەشکردنی کارەبایە، لە ماوەی دوو رۆژی تاقیکردنەوە بۆ هەر پارێزگایەک کە تییایدا هاووڵاتیان کارەبای بەردەوامییان دەبێت.

وەزارەتی کارەبا ئاگاداری هاووڵاتیان دەکاتەوە، لە ماوەی ئەو دوو رۆژەدا ئەگەری پچڕانی نەخوازراوی کارەبا پەیوەندی بە ئەنجامدانی تاقیکردنەوەکە هەیە.

ئاشکراشیکردووە، ئەو تاقیکردنەوەیە لە رۆژی 1 و 2 ی ئەیلول لە پارێزگای هەولێر دەستپێدەکات.

وەزارەتی دارایی عیراق بەشێك لە پارەی موچەی مانگی شەشی خستەسەر هەژماری وەزارەتی دارایی هەرێم و بڕیارە سبەینێش تەواوكارییەكەی بنێرێت، حكومەتی هەرێمیش جەخت دەكاتەوە لە بەردەوامبوونی گفتوگۆكان لەگەڵ حكومەتی عیراق بۆ گەیشتن بە رێككەوتن لەسەر ناكۆكییەكانیان.

پەیامنێری كوردسات نیوز رایگەیاند، وەزارەتی دارایی عیراق زیاتر لە 615 ملیار دیناری وەك بەشێك لە پارەی موچەی مانگی شەشی موچەخۆران خستەسەر هەژماری دارایی وەزارەتی دارایی هەرێم و بڕیارە سبەینێش، تەواوكارییەكەی كە نزیكەی 350 ملیار دینارە بنێرێت.

وتیشی، بڕیارە لەگەڵ ناردنی تەواوكاریی موچەی مانگی شەشی موچەخۆران لەلایەن وەزارەتی دارایی عیراقەوە، وەزارەتی دارایی هەرێم لیستی موچەی مانگی شەش بڵاوبكاتەوە.

هەر تایبەت بە پرسی موچە و ناكۆكییەكانی نێوان هەولێر و بەغداد، سەرۆكی حكومەتی هەرێم لەگەڵ وەفدی دانووستانكاری هەرێم بۆ گفتوگۆ لەگەڵ حكومەتی عیراق كۆبووەوە و دوایین پێشهاتەكانیان لەبارەی دانوستانەكانەوە تاوتوێكرد و جەختیانكردەوە، لە بەردەوامبوونی گفتوگۆكان و دانوستان بە ئاراستەی گەیشتن بە رێككەوتن و دابینكردنی مافە دەستوریی و یاساییەكان و موچە و شایستە داراییەكانی هەرێمی كوردستان.

عەبدوڵا ئۆجەلان دەڵێت، بە بانگەوازی ئاشتی هەم لە توركیا و هەم لە سەرانسەری رۆژهەڵاتی ناوەڕاست، دەرگای سەردەمێكی نوێ كراوەتەوە.

عەبدوڵا ئۆجەلان رێبەری زیندانیكراوی پارتی كرێكارانی كوردستان "پەكەكە" پەیامێكی بەبۆنەی رۆژی ئاشتیەوە بڵاوكردەوە و رایگەیاند، بانگەوازەكەیان بۆ ئاشتی و چارەسەری دیموكراتی، هەنگاوێكی سیاسی ئاسایی نییە، بەڵكو هەنگاوێكی ستراتیژیی و قۆناغێكی مێژووییە و بەو بانگەوازە هەم لە توركیا و هەم لە سەرانسەری رۆژهەڵاتی ناوەڕاست، دەرگای سەردەمێكی نوێ كراوەتەوە، بۆئەوەی ژیانی ئاشتییانە و دیموكراتی جێگەی شەڕ و وێرانكاریی بگرێتەوە.

ئاماژەی بەوەشكردووە، پێویستە پرۆسەی ئاشتی و چارەسەریی بە هەلی بەهێز و هەنگاوی پراكتیكی بەدی بهێنرێت، چونكە ئاشتی راستەقینە تەنها بە بێدەنگكردنی چەك و كۆتاییهاتنی شەڕ و پێكدادان بەدی نایەت و هەركاتێكیش ئازادی و دیموكراسی و دادپەروەری هەموو بوارەكانی ژیانی گرتەوە، ئاشتییەكی راستەقینە دێتەدی.

ئۆجەلان داوا لە گەلانی توركیاش دەكات، خاوەنداری لەو ئەركە مێژووییە بكەن و رێپێوانی ئاشتی و ئازادی فراوانتر بكەن و بە رۆحییەتێكی ئاشتیخوازانەوە هەنگاوبنێن.

بافڵ جەلال تاڵەبانی سەرۆکی یەکێتیی نیشتمانیی کوردستان پەیامێکی لەبارەی روداوەکەی لالەزار بڵاوکردەوە و رایگەیاند، گروپێكی میلیشیای نایاسایی هێرشیانكردە سەر هێزە ئەمنییەكان كە ئەركی دەستگیركردنی داواكراوانیان پێ سپێردرابوو.

 

دەقی پەیامەکەی بافڵ جەلال تاڵەبانی.......

 

هەفتەی رابردوو، سلێمانی شاهێدی کۆمەڵە روداوێک بوو، کە بووە هۆی خەم و پەژارە بۆ خێزانەکانیان و نیگەرانیی بۆ رای گشتی.

گرووپێکی میلیشیای نایاسایی، کە لە دەرەوەی یاسا کاریان دەکرد، چەند ناوچەیەکی نیشتەجێبوونیان بە سەربازگە کردبوو، هێرشیان کردە سەر هێزە فەرمییە ئەمنییەکان، کە لەو کاتەدا ئەرکی دەستگیرکردنی داواکراوانیان پێ سپێردرابوو، کە ئەرکیان پاراستنى گیان و ماڵى هاووڵاتیان و سەقامگیریی شارەکەیە. ئەم کارانەى گرووپەکە ژیانی خەڵکی بێتاوانی خستە مەترسییەوە و بوونە هۆی ئەوەی ئەو دامەزراوانەش، کە ئەرکیان پاراستنی کۆمەڵگەیە بە کەم بزانرێن.

لەم بارودۆخانەدا، ئاسانە کە دەنگۆ و زانیاریی نادروست بڵاوببێتەوە. رکابەریی دامەزراوە میدیاییەکان زۆر جار لەجیاتی ئەوەی کە ناڕوونییەکان روون بکەنەوە، دەبنە هۆی سەرلێتێکدان. دەبێت بەڕوونی بڵێم؛ کە هیچ کەسێک و هیچ گرووپێکی میلیشیایی لە سەرووی یاساوە نییە. چارەنووسی ئەو کەسانەی کە ئەو ئاسایش و سەقامگیرییەی کە قوربانییەکی زۆرمان لە پێناویدا داوە، دەخەنە مەترسییەوە، دەبێت لە رێگەی پرۆسەی یاسایی و دیموکراسییەوە بڕیاری لێبدرێت، نەک لە رێگەی مەزەندەکردن و بانگەشەی میدیایی.

ئاسایش، وەک دامەزراوەیەکی ئەمنیی یاسایی حکومەتی هەرێمی کوردستان، سەبارەت بە رووداوەکە راپۆرتی خۆی بۆ راى گشتی بڵاوکردووەتەوە، کە تێیدا زانیارییەکانى بە تەواوى باسکردووە، کە ئەرکی هەموومانە رێگە بە دەسەڵاتى دادوەرى بدەین، بەبێ هیچ دەستتێوەردانێک بەردەوام بن لە کارەکانی خۆیان.

هەربۆیە داوام لە هەموو دامەزراوە میدیاییەکانی سەر بە حزبەکەمان کردووە، هیچ جۆرە بەرپەرچدانەوەیەکیان نەبێت بۆ گەورەکردنی ئەو بانگەشە بێبنەمایانەی کە میدیاکانی دیکە بڵاوی دەکەنەوە. ئێمە خۆمان بۆ ئاستێکی وا دانابەزێنین، ئەرکی ئێوە ئەوەیە کە بەرپرسیارانە راستییەکان بخەنەڕوو و متمانەی گشتی بپارێزن. دەبێت پێشینەى کارەکانمان پاراستنی ژیان و مافی هاووڵاتیانمان بێت، پارێزگاریی لە سەروەریی یاسا و رێگریی لەو کەسانە بکەین کە پشت بە هێز و تۆقاندن دەبەستن، نەک متمانەی گشتی.

داوا لە دەسەڵاتی دادوەریی دەکەین، ئەرکی خۆیان بە پابەندبوون بە یاسا جێبەجێ بکەن و دادپەروەر و شەفاف بن، لە هەمانکاتدا دڵنیاببنەوە لەوەی کە مافی هەموو تاکێک پارێزراوە. نابێت کاری گرووپێکی میلیشیایی زاڵ بێت بەسەر ویستی هاونیشتمانیان بۆ ئاشتی، یەکڕیزیی و دیموکراسی.

بافڵ جەلال تاڵەبانی

سەرۆکی یەکێتیی نیشتمانیی کوردستان

بافڵ جەلال تاڵەبانی، سەرۆکی یەکێتیی نیشتمانیی کوردستان لە مەکتەبی سیاسی لە سلێمانی پێشوازی لە رێکخەرانی هاوپەیمانیی پێشکەوتنخواز (Progressive Alliance) کرد. 

لە دیدارێکدا کە شاڵاو کۆسرەت رەسوڵ ئامادەیبوو، بەڕێوەچوونی کارەکانی کۆنفرانسی هاوپەیمانیی سۆسیال دیموکرات لە جیهانیی عەرەبی لە سلێمانی خرایەبەر باس. 

هاوپەیمانیی پێشکەوتنخواز، کۆمەڵەیەکی نێودەوڵەتییە لە پارتە سۆسیال دیموکراتەکانی جیهان، پیرۆزباییان لە بافڵ جەلال تاڵەبانی کرد بەبۆنەی هەڵبژاردنی بە سەرۆکی هاوپەیمانیی سۆسیال دیموکرات لە جیهانیی عەرەبی و کارنامەی کارەکانی داهاتوویان پێکەوە تاوتوێ کرد.

سەرچاوەیەك لە وەزارەتی دارایی هەرێم رایدەگەیەنێت، هەرچەندە چاوەڕێن ئەمڕۆ بەغداد موچەی مانگی شەشی هەرێم رەوانە بكات، بەڵام تاوەكو ئێستا هیچ بڕە پارەیەك نەخراوەتە سەر هەژماری دارایی هەرێم.

پەیامنێری كوردسات نیوز لە زاری سەرچاوەیەكی وەزارەتی دارایی هەرێم رایگەیاند، هەرچەندە چاوەڕێن ئەمڕۆ بەغداد موچەی مانگی شەشی هەرێم رەوانە بكات، بەڵام تاوەكو ئێستا هیچ بڕە پارەیەك لە لقی هەولێری بانكی ناوەندیی نەخراوەتە سەر هەژماری دارایی هەرێم.

پەیامنێری كوردسات نیوز لە بەغدادیش رایگەیاند، هەموو رێكارەكانی ناردنی موچە بۆ هەرێم لە بەغداد تەواو كراوە، بەڵام هێشتا ئیمزای كۆتایی محەمەد شیاع سودانی سەرۆك وەزیرانی عیراقی ماوە بۆ خەرجكردنی.

لە پاش ئەوەی بافڵ تاڵەبانی، سەرۆکی یەکێتیی نیشتمانیی کوردستان، وەک سەرۆکی هاوپەیمانیی حیزبە سۆسیال دیموکراتەکانی وڵاتانی عەرەبی هەڵبژێردرا، شێخ جەعفەر شێخ مستەفا، لە پەیامێکی پیرۆزباییدا رایگەیاند؛ "هەموومان لە ژێر دروشمی یەکڕیزی یەکێتییەکەمان پاڵپشت دەبین بۆ سەرخستنی ئەرکەکانت."

دەقی پەیامی پیرۆزباییەکەی "شێخ جەعفەر شێخ مستەفا:

بەڕێز کاک بافڵ جەلال تاڵەبانی
سەرۆکی یەکێتیی نیشتیمانیی کوردستان 

بە بۆنەی هەڵبژاردن و دیاریکردنی بەڕێزتان بە سەرۆکی هاوپەیمانیی سۆسیال دیموکرات لە جیهانیی عەرەبی، پیرۆزباییەکی گەرمت ئاراستە دەکەم و هیوای سەرکەوتنت بۆ دەخوازم.

یەکێتیی نیشتیمانیی کوردستان لە ڕابردوودا بە ڕابەرایەتی هەڤاڵی خوالێخۆشبوو مام جەلال، ڕۆڵێکی کاریگەری هەبووە لە بەرەوپێشچوونی پەیوەندییە هەرێمی و نێودەوڵەتییەکان، لە قۆناغی ئێستاشدا لەسەر هەمان ڕێبازی مام بەردەوامە لەسەر پەرەپێدان و فراوانکردنی پەیوەندییەکان بەشێوەیەکی گشتیی، لەپێناو فەراهەمکردنی ئاشتی و ئارامیی بۆ گەلانی جیهان و بەدەستهێنانی مافە ڕەواکانی گەلی کورد و کوردستان.

لە ئەمڕۆوە ئەرکی سەر شانی بەڕێزتان لە ئاست بەرپرسیارێتیدا قورستر دەبێت، بەڵام هەموومان لە ژێر دروشمی یەکڕیزی یەکێتییەکەمان پاڵپشت دەبین بۆ سەرخستنی ئەرکەکانت، لەپێناو خزمەتکردنی گیانی پێکەوەیی و پاراستنی ئاشتیی و سەقامگیری بۆ جیهانی مرۆڤایەتی.

شێخ جەعفەر شێخ مستەفا
جێگری سەرۆکی هەرێمی کوردستان
٢٠٢٥/٨/٣٠

ئەدهەم عوسمان شێخ ئەحمەد بارزانی، بەبۆنەی هەڵبژاردنی بافڵ جەلال تاڵەبانی، سەرۆکی یەکێتیی نیشتمانیی کوردستان، بە سەرۆکی هاوپەیمانیی سۆسیال دیموکراتەکانی وڵاتانی عەرەبی، پەیامێکی پیرۆزبایی ئاراستە کرد. لە پەیامەکەیدا، ئەدهەم بارزانی ئەم هەڵبژاردنەی بە دەستکەوتێکی مێژوویی ناوبرد بۆ گەلی کورد.

لە پەیامەکەیدا، ئەدهەم عوسمان شێخ ئەحمەد بارزانی نووسیویەتی: "لەناخی دڵەوە پیرۆزبایی لە بەڕێزتان و تەواوی لایەنگر و ئەندامانی حزبە تێکۆشەرەکەتان دەکەم، بەبۆنەی هەڵبژاردنی بەڕێزتان بە سەرۆکی هاوپەیمانیی سۆسیال دیموکراتەکانی وڵاتانی عەرەبی."

ناوبراو جەختی لەسەر گرنگیی ئەم پۆستە کردەوە و رایگەیاند: "هەڵبژاردنی بەڕێزتان بۆ ئەو پۆستە گرنگە دەستکەوتێکی مێژووییە، بێجگە لە یەکێتیی نیشتمانیی کوردستان، بۆ تەواوی نەتەوەی کورد." هەروەها هیوای سەرکەوتن و بەردەوامیی بۆ بافڵ تاڵەبانی خواستووە لە ئەرکە نوێیەکەیدا.

لە کۆتایی پەیامەکەیدا، ئەدهەم بارزانی دووپاتی کردەوە: "دووبارە پیرۆزبایتان لێ دەکەم و بێگومانم لەوەی لەم ئەرکە نوێیەدا رۆڵی گەورەتان دەبێت لە پێشخستنی پێگەی هەرێم و گەلی کوردستان لە عیراق و ناوچەکە."

لە پەراوێزی کۆنگرەی هاوپەیمانیی سۆسیال دیموکرات کە ئەم هەفتەیە لە شاری سلێمانی بەڕێوەچوو، شاناز ئیبراهیم ئەحمەد، خانمی یەکەمی عیراق، دیدار و کۆبوونەوەی گرنگی لەگەڵ ژمارەیەک سەرکردەی باکووری کوردستان ئەنجامدا.

خانمی یەکەمی عیراق لە پەیامێکدا رایگەیاند: "خۆشحاڵبووم بەدیداری تونجەر باکرهان، هاوسەرۆکی پارتی یەکسانی و دیموکراسی گەلان (دەم پارتی) و کەسکین بایندر، هاوسەرۆکی پارتی هەرێمە دیموکراتیکەکان (دەبەپە) و سیاسەتمەدار و نووسەر جەنگیز چاندار."

لە بەشێکی دیکەی پەیامەکەیدا، شاناز ئیبراهیم ئەحمەد جەختی لەسەر هەڵوێستی مەبدەئی خۆیان کردەوە و وتی: "پابەندبوونی مەبدەئی خۆمان لەپشتیوانی خەباتی دادپەروەرانەی گەلەکەمان لە باکوور دووپات دەکەینەوە."

هەروەها، خانمی یەکەمی عیراق سوپاسگوزاریی خۆی بۆ ئەو وەفدە دەربڕی سەبارەت بە "رێزلێنانە بە نرخەی لەجیاتی بزووتنەوەی ژنانی باکوور پێشکەشیان کردین."

مەکتەبی سیاسیی یەکێتیی نیشتمانیی کوردستان بەبۆنەی هەڵبژاردنی بافڵ تاڵەبانی سەرۆکی یەکێتی، وەک سەرۆکی هاوپەیمانیی حیزبە سۆشیال دیموکراتەکانی وڵاتانی عەرەب، پەیامێکی ئاڕاستەی بافل جەلال تاڵەبانی کرد کە تیایدا هاتووە: هەڵبژاردنتان بە سەرۆکی ئەم محفەلە نێودەوڵەتییەی خەباتی سۆشیال دیموکراتی بەڵگەیەکی تری لێوەشاوەیی سەرکردایەتیتانە.

دەقی پەیامی مەکتەبی سیاسی یەکێتیی نیشتمانیی کوردستان:

بەرێز هەڤاڵ سەرۆک بافل جەلال تاڵەبانی، سەرۆکی یەکێتیی نیشتمانیی کوردستان

بەبۆنەی هەڵبژاردنت وەک سەرۆکی هاوپەیمانیی حیزبە سۆسیال دیموکراتەکانی وڵاتانی عەرەبی، بەناوی هەڤاڵانت لە مەکتەبی سیاسیی و ئەنجومەنی سەرکردایەتی و سەرجەم ئەندامان و لایەنگرانی  یەکێتییەوە، گەرمترین پیرۆزبایتان ئاراستە دەکەین.

هەڤاڵ سەرۆک بافڵ

هەڵبژاردنتان بە سەرۆکی ئەم محفەلە نێودەوڵەتییەی خەباتی سۆشیال دیموکراتی بەڵگەیەکی تری لێوەشاوەیی سەرکردایەتیتانە لە خزمەتی تێکۆشانی یەکێتیی نیشتمانیی کوردستان و گەلەکەمان لەپێناو ئاشتی، دیموکراسی، مافی مرۆڤ و چارەی خۆنووسین و لەسەر هەمان رێبازی سەرۆک مام جەلال کە هەمیشە تەئکیدی لەسەر ئامادەیی دیبلۆماسی یەکێتیی لە کۆڕ و کۆمەڵە نێودەوڵەتییەکان دەکردەوە.

دڵنیاین ئەم  ئەرکە سیاسییە هەرێمی و نێودەوڵتییە رۆڵی گەورەی دەبێت لە پێشخستنی پێگەی یەکێتیی و خەباتی گەلی کوردستان لە ئاستی عیراق و جیهان، بەرەو سەرکەوتنی یەکجارەکی.

جارێکی تر پیرۆزە 

مەکتەبی سیاسیی 
یەکێتیی نیشتمانیی کوردستان 
٣٠-٨-٢٠٢٥

وتەبێژی یەكێتیی نیشتمانیی كوردستان بەبۆنەی هەڵبژاردنی بافڵ تاڵەبانی سەرۆکی یەکێتی، وەک سەرۆکی هاوپەیمانیی حیزبە سۆسیال دیموکراتەکانی وڵاتانی عەرەب، پەیامێکی بڵاوکردەوە و تیایدا هاتووە: ئەمە دەستکەوێتێکی دیرۆکی یەکجار گرنگە بۆ گەلەکامان و هەرێمەکەمان و یەکێتیی نیشتمانیی کوردستانیش.

دەقی پەیامەکەی وتەبێژی یەکێتیی نیشتمانیی کوردستان:

بەناوی خودای گەورە و میهرەبان

هەڵبژاردنی سەرۆک بافڵ، دەستکەوتێکی مێژووییە بۆ گەلەکەمان...

کوردستانییانی خۆشەویست، لە هەرکوێیک هەن، ڕۆژتان باش

 لە چوار ڕۆژی ڕابردوو، هەرێمی کوردستان و شاری سلێمانی جارێکی تر وەکو ناوەندێکی گرنگی دیپلۆماسی، باوەشی ئارامی خۆی کردەوە بۆ کۆنفڕانسی هاوپەیمانی پارتە سۆسیال دیموکراتەکان لە جیهانی عەرەبی بە هەماهەنگی لەگەڵ هاوپەیمانی پێشکەوتووخوازی جیهانی بە ئامادەبوونی دەیان سەرکردەی جیهانی لە رۆژهەڵاتی ناوەڕاست، باکووری ئەفەریقا، باشووری ئاسیا و ئەمریکا و ئەمریکای لاتین، بە خانەخوێی یەکێتیی نیشتمانیی کوردستان.

 پرسە هەنووکەییە ئەمنی، دیمۆکراسی، دادپەروەری، و یەکسانی و دادی کۆمەڵایەتی لە پرسە هەرە لەپێشەکانی گفتوگۆکان بوون، هاوڕابووین لە وەی برسیکردن و جەنگ خزمەت بە هیچ لایەک ناکەن و تەنها چارەسەر بۆ پرسە ئەمنییەکانی رۆژهەڵاتی ناوەڕاست گەڕانەوەیە بۆ مێزی گفتوگۆ، تا بەئاشتی ئاڵەنگارییەکانی بەردەم گەلانی ناوچەکە تێبەپەڕینین.

ئەمڕۆ شەممە، لە دوایین ڕۆژی کۆنفرانس، هەڤاڵ بافڵ جەلال تاڵەبانی، سەرۆکی یەکێتیی نیشتمانیی کوردستان، وەکو سەرۆکی هاوپەیمانیی پارتە سۆسیال دیموکراتەکان لە جیهانی عەرەبی لە رۆژهەڵاتی ناوەراست و باکووری ئەفریقا هەڵبژێردرا، ئەمەش دەستکەوێتێکی دیرۆکی یەکجار گرنگە بۆ گەلەکامان و هەرێمەکەمان و یەکێتیی نیشتمانیی کوردستانیش.

لێرەوە پیرۆزباییەکی گەرم لە تەواوی کادر و دەنگدەر و لایەنگرانی یەکێتیی و تەواو خەڵکی کوردستان دەکەین بە بۆنەی ئەو دەستکەوتە مێژووییە، و دڵنییان خاڵێکی وەرچەرخانی گرنگ دەبێت بۆ هەرێمەکەمان. 

هەڵبژاردنی سەرۆك بافڵ، بە سەرۆكی هاوپەیمانێتییەكە دەرفەتێکی دیكەیە بۆ پارتە سۆشیاڵ دیموکراتەکان لەرۆژهەڵاتی ناوەراست، کە چۆن چەسپاندنی یاسا و بوونی دامەزراوەکان ببنە سەرچاوەیەک بۆ فرە رەنگی سیاسی، لەهەمانکاتدا پەرەپێدانی ژێرخانی ئابوریی و بوژانەوەی ئابوری و بوونی میدیای ئازاد، دەتوانن هاوتەریب بن بۆ ئایندەیەکی گەشتر بۆ ناوچەکەمان. 

کوردستان ئاوەدان و ئێوەش هەر سەرفرازبن

كاروان گەزنەیی 
وتەبێژی یەكێتیی نیشتمانیی كوردستان

لە پاش ئەوەی بافڵ تاڵەبانی، سەرۆکی یەکێتیی نیشتمانیی کوردستان، وەک سەرۆکی هاوپەیمانیی حیزبە سۆسیال دیموکراتەکانی وڵاتانی عەرەبی هەڵبژێردرا، قوباد تاڵەبانی، لە پەیامێکی پیرۆزباییدا رایگەیاند؛"هەڵبژاردنی سەرۆک بافڵ، وەک سەرۆکی هاوپەیمانیی حیزبە سۆسیال دیموکراتەکانی وڵاتانی عەرەبی، بۆ من دووجار جێگەی دڵخۆشی و شانازییە، یەکەم وەک برایەکی گەورە و دووهەم وەک سەرۆکی حیزبەکەم."

لە پەیامەکەیدا ئاماژەی بەوەداوە، کە گەیشتنی بافڵ تاڵەبانی بەم ئاستە بەرزە لەسەر ئاستی ناوخۆی هەرێم، عیراق و ناوچەکە، سەرەرای هەموو ئاڵنگارییەکان، "دەرخەری توانا و حەکیمییەتیەتی لەئاست رووداوەکان و گرفت و کێشەکان."

لە کۆتایی پەیامەکەیدا، قوباد تاڵەبانی نووسیوێتی "هیچ ئاستەنگییەک و پیلانگێڕییەک نابێتە بەربەست لەبەردەم سەرکەوتنەکانت، بەردەوام بە. دووبارە پیرۆزە و وەک هەمیشە لەپشتت دەبین تا دواهەناسە…"