کوردستان
حاڵەتێکی دیکەی توشبوون بە تای خوێنبەربوون لە قەزای رانیە دەستنیشانکرا، هاوکات وەزارەتی تەندروستی دەلێت: توشبووەکە تەمەنی 29 ساڵە و پیشەی ئاژەڵدارە.
وەزارەتی تەندروستی هەرێم بڵاویکردەوە، حاڵەتێکی دیکەی تای خوێنبەربوون تۆمارکرا و توشبووەکە پیاوێکی دانیشتوی ناحیەی بۆسکینە لە قەزای رانیەیە و تەمەنی 29 ساڵە.
ئاماژەی بەوەشکردووە، توشبووەکە پیشەی ئاژەڵدارە و بەرکەوتەی لەگەڵ ئاژەڵی تووشبوو هەبووە، دوای گومانلێکردن بە نەخۆشی تای خوێنبەربوون و بوونی نیشانەکانی و چەندین رێکاری دەستنیشانکردن و چارەسەری پزیشکی گیراوەتەبەر، لە ئێستادا لەژێر چاودێری چڕ لە نەخۆشخانە خەوێندراوە و چارەسەر وەردەگرێت و تا ئێستا باری تەندروستی جێگیرە.
وەزارەتی تەندروستی داوا لە هاووڵاتیان دەکات و جەخت دەکاتەوە لەسەر جێبەجێکردنی رێنماییەکانی وەزارەتی تەندروستی، دەشڵێت؛ لەکاتی بوونی گومان و نیشانەکانی نەخۆشی لەسەر ئاژەڵ پێویستە تیمەکانی ڤێترنەری ئاگاداربکەنەوە.
ئەوەشی خستەڕوو، هاووڵاتیانی بەرکەوتووانی بەخێوکردنی ئاژەڵ یان بەرهەمەکانی ئاژەڵ لەکاتی بوونی هەر نیشانەیەکی ناتەندروست، پێویستە بەخێرایی سەردانی نەخۆشخانەکان بکەن بێ دواکەوتن.
جێگەی ئاماژەیە لەماوەی دوو مانگی رابردوو تەنها چوار حالەت دەسنیشانکراون و پشتڕاستکراوەتەوە، کە حالەتێکیان لەبەر قورسی باری تەندروستی گیانی لەدەستدا و حالەتەکانی دیکە بەتەواوی چاکبوونەتەوە و لە نەخۆشخانە دەرچوونە.
سوپای توركیا بەردەوامە لە هێرشەكانی بۆ سەر هەرێمی كوردستان و لە ماوەی هەفتەیەكدا زیاتر لە 120 جار بۆردومانی ئامێدی كردووە.
كامەران عوسمان، ئەندامی رێكخراوی سی پی تی ئەمریكی رایگەیاندووە، لە رۆژی 24ی ئەم مانگەوە، سوپای توركیا 83 جار هێرشی كردوەتە سەر چیای نزاركێ لە سنوری ناحیەی شیلادزێ لە قەزای ئامێدی.
دەشڵێت، تەواوی هێرشەكان بۆ سەر یەك شوێنی دیاریكراوبوون و هەموو رۆژێك لە رێگەی تۆپخانەكانیەوە، سوپای توركیا ئەو شوێنەی تۆپباران كردووە، لە هەمان كاتیشدا، بە تەنیا لە ماوەی یەك هەفتەی رابردوودا، سوپای توركیا 45 جار تۆپبارانی گوندەكانی بەری گارێی لە سنوری ناحیەی دێرەلوك لە قەزای ئامێدی كردووە.
بەمەش لە ماوەی یەك هەفتەی ڕابردوودا، هێرشەكانی سوپای توركیا بۆ سەر هەرێمی كوردستان گەیشتۆتە 128 هێرش و هەمووشی تۆپباران بووە.
بەوتەی كامەران عوسمان، هیچ هاووڵاتییەكی مەدەنی لەو بۆردومانانەدا نەبووەتە قوربانی، بەڵام بەردەوامی هێرشەكان بوونەتە مایەی ترس و دڵەڕاوكێ بۆ دانیشتووانی سنوری قەزای ئامێدی.
حزبی شیوعی چین بەبۆنەی 50 ساڵەی دامەزراندنی یەکێتیی نیشتیمانیی کوردستانەوە پەیامێکی پیرۆزبایی ئاراستەی یەکێتی دەکات و دەڵێت: هیواخوازین حزبەکەتان بە سەرکردایەتی سەرۆک بافڵ تاڵەبانی بەردەوام بێت لە پێشکەوتن و رۆڵی کارا لە گەشەسەندنی ئابوری و کۆمەڵایەتی عیراق بەتایبەتی هەرێمی کوردستان.
دەقی پەیامەکەی حزبی شیوعی چین:
نامەی پیرۆزبایی بەشی نێودەوڵەتی کۆمیتەی ناوەندی CPC:
بەبۆنەی 50 ساڵەی دامەزراندنی یەکێتیی نیشتمانیی کوردستان، بەشی نێودەوڵەتیی کۆمیتەی ناوەندیی حزبی شیوعی چین پیرۆزبایی گەرم ئاراستەی یەکێتی دەکات.
هیواخوازین حزبەکەتان بە سەرکردایەتی سەرۆک بافڵ تاڵەبانی بەردەوام بێت لە پێشکەوتن و ڕۆڵی کارا لە گەشەسەندنی ئابووری و کۆمەڵایەتی عیراق بەتایبەتی هەرێمی کوردستان.
حزبی شیوعی چین گرنگییەکی زۆر بە پەرەپێدانی پەیوەندی دۆستانە لەگەڵ یەکێتیی نیشتمانیی کوردستان لە عێراق دەدات و ئامادەیە زیاتر ئاڵوگۆڕی ئەزموون لە حوکمڕانی دەوڵەت لەگەڵ یەکێتی قووڵتر بکاتەوە، هەروەها یارمەتی پەرەپێدانی هاوبەشی ستراتیژی چین و عێراق دەدات کە سوود بە هەردوو وڵات و گەلەکەیان بگەیەنێت.
بەشی نێودەوڵەتی کۆمیتەی ناوەندی حزبی شیوعی چین
دەستەی مافی مرۆڤ دەڵێت: بڕینی قوتی خەڵک کە مافی خۆیانە بۆ ژیان کردن تاوانێکی گەورەیە ئەوە جگە لەوەی موچەخۆران توشی دڵە ڕاوکێ و ترس دەکات.
دەستەی سەربەخۆی مافی مرۆڤ لە هەرێمی کوردستان لەسەر نەناردنی موچەی فەرمانبەران لەلایەن بەغداوە پەیامێک بڵاودەکاتەوە و داوای چارەسەری ئەو پرسە دەکات پاڵپشت بە دەستورو بڕیاری دادگای فیدڕاڵی.
دەستەی سەربەخۆی مافی مرۆڤ رایگەیاندووە، دیسان پرسی نەناردنی موچەی فەرمانبەران و مامۆستاو خانەنشینانی هەرێمی کوردستان لەلایەن بەغداوە سەری هەڵداوەو بوە باس و پرسی خەڵک.
ئاماژەی بەوەشکردووە، بڕیاری راگرتنی موچەی هەرێمی کوردستان لەلایەن بەغداوە بەهەر بیانوەک بێت پێچەوانەی بنەماکانی دەستورو بڕیاری دادگای باڵای فیدڕاڵیە کە نابێت بابەتی موچە تێکەڵی کێشەو پرسە سیاسیەکان بکرێت.
ئەوەشی خستەڕوو، بڕینی قوتی خەڵک کە مافی خۆیانە بۆ ژیان کردن تاوانێکی گەورەیە ئەوە جگە لەوەی موچەخۆران توشی دڵە ڕاوکێ و ترس دەکات و کاریگەری گەورە لەبازاڕ و کاسبی هاووڵاتیان دەکات.
دەستەی سەربەخۆی مافی مرۆڤ داوا لە سەرۆک وەزیرانی عیراق دەکات هەرچی زووە موچەی هاووڵاتیانی هەرێمی کوردستان بنێرن و بۆ چارەسەری کێشەکانیش هەوڵ بدەن بگەڕێنەوە بۆ سەر مێزی گڤتوگۆو دانوستاندن و پشت بەستن بەدەستورو رێککەوتنەکان .
هاتوچۆی هەرێم چەند رێنماییەکی بۆ رێگریکردن لە گڕگرتنی ئۆتۆمبێل لە وەرزی هاویندا بڵاوکردووەتەوە و داوا دەکات، لەکاتی راگرتنیدا جامی سەیارەکانیان بە تەواوی دانەخەن.
بەهۆی ئەوەی لە وەرزی هاویندا پلەکانی گەرما بەرزدەبنەوە و لە هەرێمی کوردستانیش زۆر جار نزیک دەبنەوە لە 50 پلەی سیلیزی، روداوەکانی ئاگرکەوتنەوە زیاتر دەبن، کە ئۆتۆمبێلەکانیش بەدەر نین لەو رووداوانە.
هاتوچۆی هەرێم لە راگەیەنراوێکدا چەند رێنماییەکی تایبەت بە رێگریکردن لە گڕگرتنی ئۆتۆمبێل بڵاوکردووەتەوە و دەڵێت، داوا لەهاووڵاتیان دەکەن کە لە وەرزی هاویندا چەند کەرستەیەک هەیە لەناو ئۆتۆمبێلدا جێی نەهێڵن، کە ئەمانەن:
-خواردنەوە گازییەکان بە هەموو جۆرەکانییەوە.
-بتڵی ئاو.
-چاوێلکە.
-چەرخ.
-بۆن و سپڕا.
-پاوەربانک و ئامێرە ئەلیکترۆنییەکان بە گشتی.
رێنماییەکانی دیکە:
-پێویستە لەکاتی وەستانی ئۆتۆمبێلدا کەمێک جامی ئۆتۆمبێل بە کراوەیی جێبهێڵرێت.
-نابێت تانکی سوتەمەنی بە تەواوی پڕ بکرێت.
-نابێت تایەی ئۆتۆمبێل زیاد لەپێویست هەوای تێبکرێت.
-پێویستە دڵنیابنەوە لەوەی هەمیشە ئاگرکوژێنەوەی دەستی لەناو ئۆتۆمبێلەکانتاندا هەبێت و ماوەی بەسەرچوونی تەواو نەبووبێت.
سكرتێری ئەنجومەنی وەزیرانی هەرێم ئاشكرایكرد، بەپێی بڕیاری دادگای فیدراڵی دەبێت مامەڵەی هەموو فەرمانبەران و خانەنشینان و سوودمەندانی تۆڕی كۆمەڵایەتی، لە هەرێم بە هەمان شێوەی دامەزراوەكانی حكومەتی فیدراڵ مامەڵەیان لەگەڵ بكرێت.
ئامانج رەحیم سكرتێری ئەنجومەنی وەزیرانی هەرێم دەقی بڕگەی دووەمی لە بڕیارەكانی دادگای فیدراڵی سەبارەت بە موچەی موچەخۆرانی هەرێم بڵاوكردووەتەوە، كە بڕیارەكەی دادگای فیدراڵی دەبێت لەلایەن هەموو دەسەڵاتەكانەوە جێبەجێ بكرێت و نابێت هیچ یاسا و بڕیار و نووسراوێك پێچەوانەی ئەوە دەربچێت.
لە بڕیارەكەی دادگادا هاتووە، پتەوكردنی دادپەروەریی وا دەخوازێت یەكسانی بەرپا بكرێت لە نێوان ئەندامانی كۆمەڵگە لە سەرجەم ماف و ئەركەكاندا، ماددەی 14 لە دەستوری كۆماری عیراق ساڵی 2005 حوكمی داوە بە بەرجەستەكردنی یەكسانی لە نێوان عیراقییەكان بەبێ جیاوازی.
ئاماژەی بەوەشكردووە، بۆ جێبەجێكردنی دادپەروەریی لە نێوان هەموو هاووڵاتییان بە تایبەتیش ئەوەی پەیوەندیدارە بە مووچەی هەرێم بە جۆرێك دەبێت حكومەتی فیدراڵی و حكومەتی هەرێم توانای خۆیان بخەنەگەڕ بۆ جێبەجێكردن و لابردنی بەربەست و بیانووەكان كە ببێتە هۆی ڕێگریی لە خەرجكردنی موچە یان دواكەوتنی.
پۆلیسی سلێمانی رایگەیاند، کەسێکیان بە تۆمەتی کوشتنی دراوسێکەی بە بەرد لە شارۆچکەی پیرەمەگرون دەستگیر کردووە.
پۆلیسی سلێمانی رایگەیاند، دوای ئەوەی بەیانی ئەمڕۆ زانیاری گەیشتە دەست مەفرەزەكانی بنكەی پۆلیسی پیرەمەگرون كە لە گەڕەكی ئاسۆس لە شارۆچكەی پیرەمەگرون شەڕ روویداوە و كەسێك بریندار بووە، هێزەكانی پۆلیس دەستبەجێ گەیشتنە شوێنی رووداوەكە و بریندارەکەش بۆ نەخۆشخانە گواسترایەوە.
ئاماژەی بەوەشکردووە، بریندارەکە بەرد بە سەریدا کێشرابوو، بەڵام بەهۆی سەختی برینەکەیەوە لە نەخۆشخانە گیانی لەدەستداوە.
پۆلیسی سلێمانی راشیگەیاندووە، تۆمەتباری رووداوەکە بە ناوی 'س، ح، ع' لەدایكبووی ساڵی 1980 دەستگیر کراوە و لە ئێستادا بە بەبڕیاری دادوەر و بەپێی ماددەی 405 لە یاسای سزادانی عیراقی راگیراوە و لێكۆڵینەوە لە رووداوەكە بەردەوامە .
کەشناسیی هەرێم پێشبینییەکانی کەشوهەوای بۆ ئەمڕۆ و سبەینێ بڵاوکردەوە و ئاماژەی بەوەکردووە، کەش جێگیر دەبێت و ئەمڕۆ پلەکانی گەرما نزم دەبنەوە.
کەشناسیی هەرێم رایگەیاند، ئەمڕۆ هەینی، ئاسمان ساماڵ و پەڵەهەور دەبێت و پلەکانی گەرما 1 تا 3 پلەی سیلیزی نزمتر دەبنەوە بەراورد بە پلە تۆمارکراوەکانی دوێنێ.
ئاماژەی بەوەشکردووە، سبەینێ شەممە، ئاسمان ساماڵ دەبێت لەگەڵ هەندێک پەڵەهەور ، هەروەها پلەکانی گەرما 1 بۆ 2 پلەی سیلیزی بەراورد بەمڕۆ بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی بەمجۆرە دەبن:
هەولێر : 35 پلەی سیلیزی
سلێمانی : 34 پلەی سیلیزی
دهۆک : 34 پلەی سیلیزی
کەرکوک : 37 پلەی سیلیزی
زاخۆ : 35 پلەی سیلیزی
هەڵەبجە :36 پلەی سیلیزی
سۆران : 34 پلەی سیلیزی
حاجی ئۆمەران : 23 پلەی سیلیزی
گەرمیان :38 پلەی سیلیزی
قائیمقامی پێنجوێن بە کوردسات نیوزی راگەیاند، بەهۆى تەقینەوەى مینەوە حەوت کرێکار لە سنووری گوندی کێلوو بریندار بوون.
هێمن ئیبراهیم قائیمقامی قەزای پێنجوێن بە كوردسات نیوزی راگەیاند، بەهۆی تەقینەوەی مینەوە لە گوندی کێلووی پێنجوێن حەوت کەس برینداربوون، کە سەرجەمیان پیشەیان کرێکارە.
ئاماژەی بەوەشکرد، ئەو کرێکارانە لەکاتی کارکردندا بوون و دەستکاری مینەکەیان کردووە، بەوهۆیەوە پیایاندا تەقیوەتەوە.
پەیامنێری کوردسات نیوز باسی لەوەکرد، کرێکارەکان راستەوخۆ رەوانەی نەخۆشخانە کراون، بەڵام بەهۆی سەختی برینەکەیانەوە، دووانیان بۆ نەخۆشخانەی شار لە سلێمانی گواستراونەتەوە.
مین و چەندین جۆری دیکەی تەقەمەنی، پاشماوەی جەنگی نێوان عیراق و ئێرانن کە نزیکەی چوار دەیە پێش ئێستا و لە سەردەمی رێژێمی پێشووی عیراقدا لەنێوان ئەو دوو وڵاتەدا هەبوو. کە وەک بەشێک لە پلانی سەربازییان حکومەتی ئەوکاتی عیراق ناوچە سنوورییەکانی مینڕێژ کردبوو، ئەگەرچی زیاتر لە 30 ساڵ بەسەر رووخانی ئەو رژێمەشدا تێپەڕیوە و بەشێکی زۆری خاکی کوردستان لە پاشماوەکانی جەنگ پاککراوەتەوە، بەڵام هێشتا بەشێکی ناوچەکان مین و تقەمەنیان لێماوە و زۆر جار روودەدات بە هاووڵاتیاندا دەتەقێتەوە و رووداوی نەخوازراوی لێدەکەوێتەوە.
هاتوچۆی سلێمانی لە ڤیدیۆیەکدا باسی لە دوایین کارەکانی شەقامی هەواری شار بۆ تونێلی پێشڕەو کردووە و داواش لە هاووڵاتیان دەکات، تا دەتوانن لە رێگای شاخی ئەزمڕەوە هاتوچۆ بکەن.
هاتوچۆی سلێمانی باسی لەوەکردووە، شەقامی هەواری شار بۆ تونێلی پێشڕەو لە قۆناغەکانی کۆتاییدایە، تیمەکانی کە کار لە شەقامەکەدا دەکەن زیاتر دەچنە بەردەم تونێلەکە، بۆیە فراوانی شەقامەکە کەم دەبێتەوە وئاستەنگی هاتوچۆ دروست دەبێت.
ئاماژەی بەوەشکردووە، شەقامێکی لاوەکی دروستکراوە بۆئەوەی شەقامی تونێلی پێشڕەو بەربەست نەکرێت، بەڵام دەبێتە هۆی دروستبوونی ئاستەنگی هاتوچۆ.
رێگای شاخ بەکاربهێنن
داواش لە هاووڵاتیان دەکەن، بۆ دووربوون لە قەرەباڵغی و کەمبوونەوەی فشار لەسەر شەقامی تونێلەکە بەتایبەت لە رۆژانی گەشت و سەیراندا، رێگای شاخ 'شاخی ئەزمڕ' بەکاربهێنن تاوەکو کارەکانی دیکە کۆتاییان پێدێت.
هاتوچۆ ئاماژەی بەوەشکردووە، لە ئێستادا تیمەکانی هاتوچۆ رێگای شاخی ئەزمڕیان دەستکاری کردووە و چاڵ و چۆڵییەکانیان چاککردووە بۆئەوەی هاتوچۆی هاووڵاتیان ئاسانتر ببێت.
پەیامنێری کوردسات نیوز رایگەیاند؛ لە روداوێکی هاتوچۆدا لە زاخۆ کەسێک گیانی لەدەستدا و دوو کەسی تر بریندار بوون.
بەپێی زانیارییەکانی پەیامنێری کوردسات نیوز، ئەمشەو لەسەر جادەی سەرەکی قەزای باتیفای سنووری زاخۆ، شۆفێرێک کۆنتڕۆڵی لەدەست داوە و وەرگەڕاوە.
لەئەنجامی ئەم روداوەدا شۆفێری ئۆتۆمبێلەکە "گوڤان زوهیر" گیانی لەدەستداوە و دوو کەسی تر بریندار بوون.
وێنەی شپفێری ئۆتۆمبێلەکە، کە لە روداوەکەدا گیانی لەدەست داوە.
وەزارەتی پەروەردەی هەرێم راگەیەندراوێکی بڵاوکردەوە و تیایدا هاتووە، ئاگاداری سەرجەم قوتابیانی پۆلی نۆی بنەڕەتی دەكەینەوە ئەنجامی تاقیكردنەوەی نیشتمانی خولی یەكەم لە ئەپڵیكەیشنی ئی هەڵسەنگاندن (e-halsangandn) بەردەستە.
بەپێی راگەیەندراوێكی وەزارەتی پەروەردەی هەرێم، ئاگاداری سەرجەم قوتابیانی پۆلی نۆی بنەرەتی دەكەینەوە كەوا لە ئێستادا ئەنجامی تاقیكردنەوەی نیشتمانی خولی یەكەمی ساڵی خوێندنی 2024 -2025 لە ئەپڵیكەیشنی ئی هەڵسەنگاندن (e-halsangandn) لەسەر هەردوو سیستمی كارپێكردنی Android و IOS بەردەستە .
هەر لە راگەیەندراوەكەدا هاتووە، كار لەسەر دوایین ڤێرژنی ئەپدەیتكراوی ئەپڵیكەیشنەكە بكەن.
وەزارەتی کارەبای حکومەتی هەرێمی کوردستان بڵاوی کردەوە، لە چوارچێوەی قۆناغی دووەمی پرۆژەی روناکیدا، کارەبای 24 سەعاتی بۆ 14 گەڕەکی دیکەی شاری سلێمانی دابین کراوە.
بەپێی راگەیاندنی وەزارەتی کارەبا، ئەم گەڕەکانەی خوارەوە لە خزمەتگوزاری کارەبای بەردەوامدا بەشداری دەکەن:
کازیوە 1 و 2، سەیوان، گۆیژە و گۆیژەی نوێ، هەوارە بەرزە، توی مەلیک، عەلی کەمال، ئازادی، شەهیدانی ئازادی، ئیسکان، ئیسلاح، ئیبراهیم ئەحمەد نزیک مزگەوتی بەهەشت، و سەرکارێز پشت ئامادەیی سلێمانی کچان.
هەروەها چوار ستیی: گۆیژە سیتی، شاری خەونەکان، شاری دایک، و گوندی ئەڵمانی 3 یش لەم خزمەتگوزارییە سوودمەند بوون.
وەزارەتی کارەبا ئاماژەی بەوە کردووە کە لەم قۆناغەدا، 25,813هاوبەشی کارەبا لە سلێمانی لە کارەبای 25 سەعات سوودمەند دەبن، کە 23,733 هاوبەشی ماڵان و 2,080 هاوبەشی بازرگانی لەخۆ دەگرێت.
ئەم هەنگاوە لە چوارچێوەی هەوڵەکانی حکومەتی هەرێم بۆ باشترکردنی خزمەتگوزاری کارەبا و چارەسەرکردنی کێشەکانی ئەم بوارە لە پارێزگای سلێمانی دێت.
فراكسیۆنە كوردستانییەكان لە ئەنجومەنی نوێنەرانی عیراق بڕیارەكەی وەزارەتی دارایی عیراق لەبارەی موچەی هەرێم رەتدەكەنەوە.
هەرێم كەمال ئاغا سەرۆكی فراكسیۆنی یەكێتی لە لێدوانێكدا بە كوردسات نیوزی راگەیاند، بڕیارەكەی تەیف سامی وەزیری دارایی نایاساییە و دژی بڕیارەكانی دادگای فیدڕاڵییە.
باسی لەوەشكرد، لە داهاتوودا وەكو فراكسیۆنە كوردستانییەكان هەڵوێستی دیكەیان دەبێت و پێویستە لایەنە كوردییەكان بەردەوام هاوهەڵوێست بن.
ئەمەش لەكاتێكدایە، لەسەر بڕیارەكەی وەزیری دارایی عیراق تایبەت بە نەناردنی موچەی مانگی پێنجی فەرمانبەرانی هەرێم، فراكسیۆنە كوردستانییەكانی ئەنجومەنی نوێنەران لە بەغداد كۆبوونەوە و هاوهەڵوێستی خۆیان لەوبارەوە دووپات كردەوە.
مەکتەبی سیاسی پارتی دیموکراتی کوردستان لەبارەی نەناردنی موچەی مانگی پێنجی موچەخۆرانی هەرێمەوە راگەیەنراوێکی بڵاوکردەوە و ئاماژەی بەوەکردووە، ئەگەر پێش جەژن بەغدا موچەی هەرێم رەوانە نەکات، هەڵوێستی جدییان دەبێت.
مەکتەبی سیاسی پارتی دیموکراتی کوردستان لە راگەیەنراوێکدا ئاماژەی بەوەکردووە، "حکومەتی فیدراڵی بەردەوامە لە پێشێلکردنی مافە دەستوورییەکانی هەرێمی کوردستان و دوا پێشلکاریشی نووسراوەکەی دوێنێی وەزارەتی داراییە کە دژی دەستوور و بنەماکانی رێککەوتنی پێکهێنانی حکومەتە و بە سیاسیکردنی قوتی خەڵکە".
دەشڵێت، "ئەگەر تا پێش جەژنی قوربان ماف و شایستە داراییەکانی خەڵکی هەرێمی کوردستان رەوانە نەکرێت هەڵوێستی جدیمان دەبێت و رایدەگەیەنین".
پەیامنێری کوردسات نیوز باسی لەوەکرد، تەرمی ئەو منداڵە نۆ ساڵانەی خورماتوو دۆزرایەوە کە لە دوێنێوە لەکاتی یاریکردن لەگەڵ هاوڕێکانیدا دیار نەمابوو.
لە پاشنیوەڕۆی دوێنێ چوارشەممەوە، منداڵێکی تەمەن نۆساڵان لە گەڕەکی تینی سەر بە قەزای خورماتوو لەکاتی یاریکردن لەگەڵ هاوڕێکانیدا دیار نەمابوو، دوای ئەوەی کەسوکارەکەی بەدوایدا گەڕاون و هێزە ئەمنییەکانیان لێئاگادار کردووەتەوە.
دوای گەڕانێکی زۆر بەیانی ئەمڕۆ تەرمەکەی لەناو قوڕولیتەی پشت کارگەیەکی خورماتوو دۆزراوەتەوە.
ئەو منداڵە نۆ ساڵانە ناوی بەرائـ ریاز بووە و خوێندکاری پۆلی سێیەمی سەرەتایی بووە.
بەپێی زانیارییەکانی کوردسات نیوز، منداڵەکە هەوڵی داوە خۆی رزگار بکات، بەڵام وادەردەکەوێت نەیتوانیبێت، لەو کاتەشدا ئاوی پرۆژەی ئاودێری ناوچەکە زیادیکردووە و بەهۆیەوە گیانی لەدەستداوە.