کوردستان
هاتوچۆی هەولێر رایگەیاندووە، لە دوو شوێی سوڕانەوەی ئۆتۆمبێل 'یوتێرن' کامێرای تۆمارکردنی سەرپێچی دەکەونە کار و هەر ئۆتۆمبێلێک بە پێچەوانەوە پێچ بکاتەوە، سزای سەرپێچی یاساکانی هاتوچۆی بۆ دەنووسرێت.
هاتوچۆی هەولێر شۆفێران ئاگادار دەکاتەوە، تا رۆژی 6ی ئەم مانگە و دوای سەعات 12:00ی شەو کامێراکانی تۆمارکردنی سەرپێچی بەشێوەی تاقیکردنەوە لە شوێنی سوڕانەوەکانی شەقامی 40 مەتری عەشتار و شەقامی 100 مەتری جەودەت ئەسعەدی دەکەونە کار.
ئەوەش هاتووە، لەدوای ئەو رێکەوتەوە و لە رۆژی 7ی ئەم مانگەوە، کە هاوکاتە لەگەڵ دووەم رۆژی جەژنی قوربان، کامێراکان بە شێوەی هەمیشەیی دەکەونە کار و لە قۆناغی تاقیکردنەوەدا نامێنن و سەرپێچییەکان تۆمار دەکەن.
داواش لە شۆفێران دەکەن، بەهیچ جۆرێک سوڕانەوە 'یوتێرن' بەشێوەی پێچەوانە ئەنجام نەدەن، بۆئەوەی هەم ژیانی خۆیان و شۆفێرانی دیکە نەخەنە مەترسییەوە، هەم دووربن لە سزای پێبژاردن.
ئەوەش لەکاتێکدایە، ماوەی نزیکەی دوو ساڵە کامێراکانی تۆمارکردنی تیژڕەوی و سەرپێچی لە ناو شارەکانی هەرێم و رێگاکانی دەرەوەی شاردا کەوتوونەتە کار و هاتوچۆش دەڵێت، دانانی ئەو کامێرایانە بەشێکی زۆری روداوەکانی هاتوچۆی کەمکردووەتەوە.
مهكتهبی سیاسی یهكگرتووی ئیسلامی كوردستان، پەیامێکی پیرۆزبایی ئاڕاستەی سەرۆکی یەکێتی و ئەندامانی مەکتەبی سیاسی و سەرکردایەتی ئەو حزبە دەکات.
دەقی پەیامەکە
بەرێز / كاك بافڵ تاڵەبانی ـــ سەرۆکی یەکێتی نیشتمانی کوردستان
بەرێزان / ئەندامانی مەکتەبی سیاسی و سەرکردایەتی
سڵاو و رێز ..
بەبۆنەی یۆبیلی ئاڵتونی یەکێتی نیشتمانی کوردستان جوانترین پیرۆزبایتان ئاراستە دەکەین و لە رێگەی ئێوەوە پیرۆزبایی گەرم لە سەرجەم ئەندام و لایەنگرانتان دەکەین .
پەنجا ساڵە یەکێتی نیشتمانی کوردستان رۆڵێکی کارا دەگێرێت لە گۆڕەپانی رزگاریخوازی کوردستان و لەو پێناوەدا قوربانیەکی زۆری بەخشیووە .
لەم بۆنەیەدا جێگای خۆیەتی رۆڵی کاریگەری خوالێخۆشبوو مام جەلال بەرز بنرخێنین، هیوادارین یەکێتی درێژه بدات بە هەمان رێرەوی چەپکە گوڵی مام جەلال .
دووبارە پیرۆز بێت …
مهكتهبی سیاسی
یهكگرتووی ئیسلامی كوردستان
1/6/2025
سەرۆکی هەرێم پەیامێکی بەبۆنەی یادی 50 ساڵەی دامەزراندنی یەکێتیی نیشتمانیی کوردستان بڵاوکردەوە و ئاماژەی بەوەکردووە، كاروانى پێنج دەیە خەبات و تێکۆشانى يهكێتى، شایستەی رێز و پێزانینە.
نێچیرڤان بارزانی سەرۆکی هەرێمی کوردستان پەیامێکی بەبۆنەی یادی 50 ساڵەی دامەزراندنی یەکێتیی نیشتمانیی کوردستانەوە بڵاوکردەوە و ئاماژەی بەوەکردووە، "لەم یادهدا بە رێزەوە دامەزرێنەری یەکێتی، خوالێخۆشبوو سەرۆک مام جەلال تاڵەبانی و هەموو ئهو شەهید و تێکۆشەرانه بەبیر دەهێنینەوە کە لە ڕیزەکانی یەکێتیی نیشتمانیی کوردستاندا، قوربانیيان بۆ ئازادى داوه".
دەقی پەیامەکەی نێچێرڤان بارزانی سەرۆکی هەرێم:
له یادی (50) ساڵەی دامەزراندن و يۆبيلى زێڕينى یەکێتیی نیشتمانیی کوردستاندا، گهرمترين پيرۆزبايى پێشكهش به بەڕێزتان و سەرکردایەتی و تەواوی ئەندامان و جەماوەری یەکێتيی نيشتمانيى كوردستان دەکەم، هیوای سەرکەوتن و پێشکەوتنی بەردەوامتان بۆ دەخوازم.
لەم یادهدا بە ڕێزەوە دامەزرێنەری یەکێتی، خوالێخۆشبوو سەرۆک مام جەلال تاڵەبانی و هەموو ئهو شەهید و تێکۆشەرانه بەبیر دەهێنینەوە کە لە ڕیزەکانی یەکێتیی نیشتمانیی کوردستاندا، قوربانیيان بۆ ئازادى داوه. كاروانى پێنج دەیە خەبات و تێکۆشانى يهكێتى، شایستەی ڕێز و پێزانینە.
جەخت لە ئامادهيى و ڕۆڵی گرنگی یەکێتى لە پرۆسهى سياسيى ههرێمى كوردستان و عێراقدا دهكهينهوه. هیوادارین ئەم یادە ببێتە هاندەرێکی بەهێزى پتهوکردنی یەکڕيزيى نیشتمانی و پێکەوەیی لەنێوان هەموو لایەنە سیاسییەکان و پێکهاتهکانی کوردستاندا بۆ بەرەنگاربوونەوەی ئاڵنگارييهكان، ههروهها بۆ کارکردنی هاوبەش لهپێناو پاراستنی دەستکەوتەکان و مافە دەستوورییەکانی هەرێمی کوردستاندا و دڵنیابوون لە داهاتوویەکی باشتر بۆ گەلى كوردستان.
ئەمڕۆ 50 ساڵ بەسەر دامەزراندنی یەکێتیی نیشتمانیی کوردستاندا تێپەڕ دەبێت، ئەو حزبەی خەبات و تێکۆشانەکانی کوردستانی گەیاندە لوتکەی ئازادی و دیموکراسی و دەرگای ئاوەدانکردنەوەی بە رووی عیراقیشدا کردەوە.
مەکتەبی سیاسیی یەکێتی، بۆ یادی یۆبیلی زێڕینی یەکێتیی نیشتمانیی کوردستان رایگەیاندووە، لە سایەی قوربانی و رەنج و هیلاکی یەکێتییەکەتاندا ئەزموونی دیموکراسیی لە هەرێمی کوردستان بەسەر هەموو تەنگژە و دژوارییەکاندا زاڵ بوو، کاروانی سەرکەوتووی خۆی گەیاندە قۆناغی رووخانی رژێمی دیکتاتۆر.
دەقی پەیامەکە:
سەروەریمان زۆرە و ئەرکمان زۆرتر
کەسوکاری سەرفرازی شەهیدان
پێشمەرگە قارەمانەکان و هەڤاڵانی یەکێتیی
کۆمەڵانی خەڵکی کوردستان
یادی پەنجا ساڵەی دەستپێکی خەباتی یەکێتییەکەتان، لە هەمووتان و لە هەموومان پیرۆز بێت.
پەنجا ساڵ پێشتر، لەساڵی 1975 ، حزبی شەهیدان بە دەستپێشخەری سەرۆک مام جەلال و هەڤاڵەکانی لەدەستەی دامەزرێنەر جاڕی تێکۆشانێکی درێژخایەنیان بۆ رزگاری و مافەکانی گەلی کوردستان-دا، کەمتر لە ساڵێکیش دوای ئەوە ، لە 1ی6ی1976دا بڵێسەی شۆرشی نوێ هەموو شاخ و دەشت و دۆڵی وڵاتەکەمانی گرتەوە.
لەم کاروانە زێڕینەدا هەزاران شەهیدی سەرکردە و فەرماندە و پێشمەرگەی ئازا و بەجەرگ، سەدان نەبەردی پێشمەرگانە و موقاوەمەی زیندان و سێدارە و چالاکی رێکخستن و خۆپیشاندان و مانگرتن، تێکڕایان بوونە ناونیشان و رەمزی قۆناغێکی نوێی بەرخۆدانی کوردایەتی و دیموکراتی بە ناوەرۆکێکی پێشکەوتنخوازی کۆمەڵایەتییەوە.
وێستگەکانی تێکۆشانی یەکێتیی کە هیوا و ئاواتی میللەتەکەمانی زیندووکردەوە، لەهەموو ئاست و بوارەکانی سیاسەتدا نوێ و دەگمەن و بێ وێنەبوو، تێکۆشانی ژنان و پیاوان، کچان و کوڕانی شۆڕشی نوێی گەلەکەمان واکۆمەڵانی خەڵکی جۆشدایەوە، کە کوردستان بە کردەوە بووە گۆڕەپانی جولانەوەیەکی هەمەلایەنەی سیاسیی، پێشمەرگایەتی، روناکبیری، ئیعلامی و جەماوەریش.
لە ماوەیەکی کورتدا، سەرەڕای ئاستەنگە ناوخۆیی و دەرەکییەکان ، وێڕای خۆخۆری و سەرکوت و ستەمی رژێمی بەعسی داگیرکەر ، یەکێتی توانی ویستی میللەتەکەمان بۆ ئازادی و دادپەروەری کۆمەڵایەتی، لە راپەڕینی سەرتاسەریدا سەربخات و بۆ یەکەمین جار لە ژیانی تێکۆشەراندا ئاواتەکانی رزگاری و دیموکراسیی و حوکمڕانی خۆبەخۆ و خۆمانی بە دیبێت.
سەرەنجام لە سایەی قوربانی و رەنج و هیلاکی یەکێتییەکەتاندا ئەزموونی دیموکراسیی لە هەرێمی کوردستان بەسەر هەموو تەنگژە و دژوارییەکاندا زاڵبوو کاروانی سەرکەوتووی خۆی گەیاندە قۆناغی روخانی رژێمی دیکتاتۆر و ئاواکردنی عیراقێکی فیدراڵی و دیموکراسیی و ئاوەدانکرنەوەی وڵات بە ئازادی کەرکوک و خانەقین و تێکڕای ناوچە دابڕاوەکانیشەوە کە نەخشەڕێگای دەستووری لە ماددەی 140دا بۆ دانراوە، دوای دەیان ساڵ لە داڕزان و داکەوتن، تەعریب و تەبعیس و تیرۆر و تەرهیبیش، کە بەسەر میللەتەکەماندا هێنرا.
هەر لە قۆناغی پرۆسەی دیموکراسی و دەستوریشدا سەرۆک مام جەلال، دامەزرێنەر و سکرتێری گشتیی یەکێتیی نیشتمانیی کوردستان، رابەر و پێشمەرگەی دیموکراتخواز بووە، یەکەم سەرۆک کۆماری هەڵبژێردراوی جێی متمانەی گەل و سەمام ئەمانی عیراقی فرە نەتەوە و فرە مەزهەب و فرە کێشە بووە، لەئەزموونی سەرۆکایەتی خۆیدا نموونەی جاویدان و مەزنی لەسەر لێوەشاوەیی تێکۆشەری یەکێتیی و لەخۆبووردویی حزبی شەهیدان پێشکەشی کوردستان و گەلانی عیراقیش کرد، کە بۆ هەتا هەتایە شانازییە بۆ میللەتەکەمان لە ئاستی دونیادا.
هەڤاڵان و کۆمەڵانی خەڵکی جوامێر و بەوەفای کوردەواری کە هێزی لە بن نەهاتووی یەکێتی و کوردایەتیین، لەم رێڕەوە پەنجا ساڵییەدا یەکێتی هەمیشە ئاوێتەی رەنج و قوربانی، ئازار و هیواکانی جەماوەر بووە و لێی دوور نەکەوتووەتەوە و لێی جیانەبووەتەوە، هەر لەبەر ئەوەش یاد و یادگارەکانی، شەهید و قوربانییەکانی دەیان ساڵەی بۆنە و سەروەری نەتەوەیی و نیشتمانین و کۆمەڵانی خەڵکی خۆیان لەگەڵ یەکێتی خاوەندارێتی لێ دەکەن و پێی شاد و سەربەرزن .
جا ئەمرۆش کە لەهەلومەرجێکی نوێدا یادی یۆبێلی زێڕین دەکەینەوە، کوردستان و یەکێتییەکەی، عیراق و ئەزموونەکەی ئەرک و فرمانی تازەیان لەسەر شانە و پێویستە لەگەڵ خۆشی و شانازی یادەکەدا هەموومان بۆ ئەرکەکانی نوێی خەباتی سیاسیی ئامادەبین، خۆمان مشتوماڵ بکەینەوە و لەسایەی یەکێتییەکی پتەوتر ، یەکریزتر و تۆکمەتردا وەڵامی ئەرکەکانی قۆناغ بدەینەوە، هەڤاڵانی دێرین و ئێستامانی بۆ سازبدەین و گەلەکەمانی بۆ جۆشبدەین، کچان و کوڕانی نەوەکانی تازەی کوردەواری بهێنینە پای ئەم خەباتە ستراتیژییە کە هێشتا زۆری ماوە بگاتە دوا مەنزڵی (ئاشتی، دیموکراسی، مافی مرۆڤ و چارەی خۆنووسین).
سڵاو و درود بۆ گیانی پاکی شەهیدانی کاروانی پەنجا ساڵە و تێکرای شەهیدانی کوردستان و عیراق.
سڵاو لە خەباتگێڕانی دێرینی هەموو قۆناغ و سەردەمەکان کە یەکێتییان کردە ئەم تەلارە بەرز و بڵندەی سەرتاسەری کوردستان.
بەڵێنی ئەمڕۆی یەکێتیش بە سەرۆکایەتی هەڤاڵ بافڵ جەلال تاڵەبانی هەر ئەوەیە کە ئەمانەتی حزبی شەهیدان دەپارێزین و ئاڵا سەوزەکەی بەشەکاوەیی دەهێڵێنەوە، پێکەوە ئەم ئەرکە بەدیدێنین و پێکەوەش دەیکەینە خەڵاتی شایستە بۆ کورد و کوردستان.
لەیادی یۆبیلی زێریندا وەک مامی گەورەمان دەیوت ( ئێوەش هەر شاد و سەربەرز و سەرکەوتووبن)
مەکتەبی سیاسیی
یەکێتیی نیشتمانیی کوردستان
ئەمڕۆ لە هەرێم تاقیکردنەوەی نیشتمانیی پۆلی 12 دەستی پێ کرد و لە سەرجەم شارەکانی هەرێمەوە خوێندکاران چوونە هۆڵەکانی تاقیکردنەوە و دەستیان بە تاقیکردنەوە کرد.
ئەمڕۆ یەشەممە، 1ی حوزەیران، پۆلی 12ی ئامادەیی یەکەم تاقیکردنەوەی نیشتمانیی خولی یەکەمی وەرزی خوێندنی 2024-2025یان دەست پێ کرد و لە سەعات 7:30 خولەکی بەیانییەوە لە هۆڵەکانی خوێندان.
بۆ خوێندنی ئەمساڵ، بە سەرجەم پارێزگاکانی هەرێمەوە 115 هەزار و 787 خوێندکار بەشداری تاقیکردنەوەکان دەکەن.
خوێندکارەکان بەسەر زیاتر لە دوو هەزار هۆڵدا دابەشکراون و سێ هەزار و 81 سەرپەرشتیار چاودێری هۆڵەکانی تاقیکردنەوە دەکەن.
قۆناغی 12ی ئامادەیی دوایین قۆناغی پەروەردەییە لە هەرێم، خوێندکاران لەدوای بڕینی ئەو قۆناغە دەچنە پەیمانگە و زانکۆکانی سەر بە خوێندنی باڵا، ئەوەشی دیاری دەکات لە چ بەشێکدا بخوێنن ئەو نمرەیەیە کە لە تاقیکردنەوەی نیشتمانیی بەدەستی دەهێنن.
ئێوارەی ئەمڕۆ تەرمی هاووڵاتییەک لە ماڵەکەی خۆیدا لە کۆمەڵگەی نەسر دۆزایەوە، پۆلیسی سلێمانیش دەڵێت: گیانلەدەستدانی ئەو هاووڵاتییە هیچ پەیوەندییەکی بەکاری تاوانکارییەوە نییە.
سەرکەوت ئەحمەد وتەبێژی پۆلیسی سلێمانی بە کوردسات نیوزی راگەیاند: هاووڵاتییەک بە ناوی حامید حسێن کە تەمەن 62 ساڵ بووە تەرمەکەی لە ماڵەکەی خۆیدا دۆزرایەوە، کە چەند رۆژێک لەمەوپێش گیانی لەدەستدابوو.
وتیشی: بەپێی لێکۆڵینەوەکان هۆکاری گیانلەدەستدانەکەی پەیوەندی بە کاری تاوانکاری نییە و دوای رەوانەی کردنی تەرمەکەی بۆ پزیشکی دادی سلێمانی دەرکەوتووە چەند رۆژێک لەمەوبەر بە نەخۆشی گیانی لەدەستداوە.
سەرکەوت ئەحمەد ئاماژەی بەوەشکرد، ئەو هاووڵاتییە دانیشتوی کۆمەڵگەی نەسرە و ئێوارەی ئەمڕۆ تەرمەکەی دۆزراوەتەوە.
شاناز ئیبراهیم ئەحمەد خانمی یەکەمی عیراق لە ساڵیادی دامەزراندنی یەکێتیی نیشتمانیی کوردستان سەردانی مەزاری سەرۆک مام جەلالی کرد و رایگەیاند: هێشتا روانگەی سەرۆک مام جەلال و رێبازەکەی بنەمایە بۆ ئەوانەی کە باوەڕی تەواویان بە ئایندەیەکی بە هێز و یەکریز هەیە.
دەقی پەیامەکەی شاناز ئیبراهیم ئەحمەد خانمی یەکەمی عیراق....
ئەم ئێوارەیە بۆ یادی پەنجا ساڵەی دامەزراندنی یەکێتی نیشتمانی کوردستان لەسەر مەزاری مام جەلال کۆبووینەوە وەک رێزێک لە خەبات و تێکۆشانی دەیان ساڵەی.
بەوپەڕی پێزانینەوە خولەکێک بێدەنگ راماین وەک هاوخەمیی بۆ خزمەتی بەردەوامی لە پێناوی کوردستان و عیراقدا.
گوڵەباخی سپیمان پێشکەش کرد بۆ دەربڕینی غەمباری بەلەدەستدانی و پێکەوە پەنجا مۆممان داگیرساند کە هەر مۆمێکیان ساڵێکی تەمەنی یەکێتیی نیشتمانیی کوردستان بوو.
هێشتا روانگەی مام جەلال و رێبازەکەی بنەمایە بۆ ئەوانەی کە باوەڕی تەواویان بە ئایندەیەکی بە هێز و یەکریز هەیە.
شاناز ئیبراهیم ئەحمەد
خانمی یەکەمی عیراق
لەهەولێر ژنێک بە دەستڕێژی گوللـە دەکوژرێت و تا ئێستا هۆکاری کوشتنەکەی دیار نییە.
پەیامنێری کوردسات نیوز: ئێوارەی ئەمرۆ لەشەقامی 40 مەتری هەولێر بەهۆکاری نادیار ژنێک بە نۆ گوللـە کوژرا و تائێستا بکوژەکەش دەستگیرنەکراوە.
ئاماژەی بەوەشکرد، روداوەکە لە گەڕەکی بەختیاری رویداوە و تا ئێستا هۆکاری کوشتنەکەی دیار نییە.
پەیامنێری کوردسات نیوز وتیشی: ژنەکە خەڵکی هەولێرە و پۆلیس لێکۆڵینەوەی لە روداوەکە دەستپێکردووە.
کۆبوونەوەی زۆربەی حزب و لایەنە سیاسیەکان لەسەر بڕینی موچەی فەرمانبەرانی هەرێم لە مەکتەبی سیاسی پارتی لە پیرمام بەڕێوەچوو کە زیاتر لە 40 پارت و لایەنی سیاسی تێیدا ئامادەبوون، لەدوای کۆتایی هاتنی کۆبوونەوەکە ئەندامێکی سەرکردایەتی یەکێتی بەشداربووی کۆبونەوەکە رایگەیاند: بە شێوەیەکی گشتی کۆبوونەوەکە ئەرێنی بوو، هەروەها جەختکرایەوە نابێت بە هیچ شێوەیەک موچە تێکەڵی ململانێ سیاسیەکان بکرێت.
د. مەجید حەمەد ئەمین ئەندامی سەرکردایەتی یەکێتی لە کۆنفڕانسێکی رۆژنامەوانیدا رایگەیاند، کێشەی موچەی فەرمانبەرانی هەرێمی کوردستان بە سیاسی کراوە و لە هەموو هەلومەرجێکدا بەپێی بڕیاری دادگای باڵای فیدڕاڵی دەبێت موچەی موچەخۆرانی هەرێم پارێزراوبێت.
وتیشی: چاوەڕوان دەکەین لە چەند رۆژی داهاتوودا کێشەی موچەی مانگی ئایار نەمێنێت و پێویستە لە رێگەی گفتوگۆ و دانوستانەوە کێشەکان لە نێوان هەردوو حکومەتی هەرێم و فیدراڵ چارەسەر بکرێت.
د. مەجید حەمەد ئەمین ئەوەشی خستەڕوو، ئەمڕۆ هەڵوێستی بەغداد بەرانبەر هەرێمی کوردستان گۆراوە و لەو بڕوایەداین حکومەتی فیدراڵ پێش جەژن بە شێوەیەی قەرز موچە رەوانەی هەرێم بکات تا دەگەنە رێککەوتن.
قوباد تاڵەبانی، جێگری سەرۆک وەزیران لەگەڵ سیناتۆر جاکی رۆوزن کۆبووەوە و پێکەوە لەبارەی پەیوەندییەکانی نێوان هەرێمی کوردستان و ئەمریکا و کێشەکانی نێوان هەولێر و بەغداد و چەند پرسێکی دیکەی جێی بایەخی هەردوولا گفتوگۆیان کرد.
لە کۆبوونەوەکەدا کە ستیڤن بیتنەر، کونسوڵی گشتیی ئەمریکا لە هەرێمی کوردستان ئامادەی بوو، سیناتۆر جاکی رۆوزن ستایشی هەوڵەکانی قوباد تاڵەبانی کرد بۆ پتەوترکردنی پەیوەندییەکانی نێوان ئەمریکا و هەرێمی کوردستان و ریفۆرم لە هێزەکانی پێشمەرگە و دامودەزگاکانی حکومەتدا و پشتیوانی ئەمریکاشیان بۆ هەرێمی کوردستان دووپات کردەوە.
جێگری سەرۆک وەزیران ئاماژەی بە گرنگیی پەیوەندیی و هاوپەیمانی نێوان ئەمریکا و هەرێمی کوردستان کرد و رایگەیاند، ئەم هاوپەیمانییە نەک تەنها بۆ روبەڕووبوونەوەی تیرۆر، بەڵکو بۆ گەشەپێدان و سەقامگیری کوردستان و ناوچەکە و بونیادنانی هێزێکی نیشتمانیی یەکگرتوو و ریفۆرم لە حکومڕانی کوردستاندا گرنگە.
لە تەوەرێکی دیکەدا باس لە پێکهێنانی حکومەتی نوێی هەرێم کرا. سیناتۆر جاکی رۆوزن بە گرنگی زانی لایەنەکان پەلە بکەن لە پێکهێنانی حکومەتێکی یەکگرتووی بەهێز. لەمبارەیەوە قوباد تاڵەبانی روونیکردەوە یەکێتی و پارتی لەسەر نەخشەڕێگەیەک بۆ حکومڕانی رێککەوتوون و هیوای خواست لە نزیکترین ماوەدا بگەنە رێککەوتنی کۆتایی بۆ پێکهێنانی حکومەت.
لە بەشێکی دیکەی کۆبوونەوەکەدا باس لە پەیوەندییەکانی نێوان هەرێم و بەغدا کرا. جێگری سەرۆکوەزیران بە ئاماژەدان بە کێشەکان و بە تایبەتیش کێشەی بودجە و موچە، جەختیکردەوە لەسەر چارەسەرکردنی کێشەکان لەڕێگەی گفتوگۆوە و لەمبارەیەوە یەکڕیزی و هاوهەڵوێستی نێوان لایەنە کوردستانییەکانیشی بۆ چارەسەرکردنی کێشەکان بە پێویست زانی.
پەیامنێری کوردسات نیوز رایگەیاند: لە هەولێر منداڵێکی تەمەن شەش ساڵ سەگ پەلاماریداو، دوای مانەوەی بۆ ماوەی چەند رۆژێک لە نەخۆشخانە ئەمڕۆ گیانی لە دەستدا.
ئاماژەی بەوەشکرد، ئەو منداڵە ناوی محەمەدە و تەمەنی شەش ساڵە و دانیشتوی گوندی قوچەبلباسی سەر بە قەزای قوشتەپەی هەولێرە، بەهۆی قورسی برینەکەی ئەمرۆ گیانی لەدەستدا.
خاتوو گەلاوێژ لە یادی 50 ساڵەی دامەزراندنی یەکێتیی نیشتمانیی کوردستاندا پەیامێکی بڵاوکردووەتەوە.
دەقی پەیامەکە
نیوسەدە خەبات و قوربانیدان
وا 50 ساڵ بەسەر یادی دامەزراندنی یەكێتیی نیشتیمانیی كوردستاندا تێپەڕی. پەنجا ساڵی پڕ لە خەبات و قوربانیدان. خەباتی سەختی شاخ و پێشمەرگایەتی و شار و ڕێكخستن و ئیدارەدان و ڕۆشنبیریی، قورانیدانێكی بێشوومار و ئەوەندە زۆر كە ناسناوی حیزبی شەهیدانی بە باڵادا بڕیوە.
ئەوێ ڕۆژێ، كە یەكێتیی نیشتیمانی وەك حیزبێكی نیمچەبەرەیی لەسەر فیكری چەپ و بیری نیشتیمانیی پێشكەوتووخواز، لەسەردەستی كۆمەڵێك تێكۆشەری قاڵبووی كوردایەتی، لە پێشیانەوە، ڕابەر و سەركردە و سەرۆك مام جەلال دامەزرێنرا، دەنگی میللەتێكی چەوساوە، بووە بڵندگۆی جاڕدانەوەی شۆڕش و شانی مەردانەی خستە بەر باری گلاوی نسكۆی شۆڕش، دوای تەنیا ساڵێكیش پۆل پۆل كوڕان و كچانی ئازادیخوازی ڕێكخستنەكان، چەكی شەرەف و مەردایەتییان كردەشان و لەژێر سەركردایەتی و ڕێنومایی مام و هاوڕێكانیدا، خەباتی چەكدارییان دەستپێكرد.
ئیدی، كاروان كەوتەڕێ و یەك-یەك و دوو-دوو و دەستە-دەستە، ژمارەی شەهیدەكانی یەكێتی هەڵدەكشا، تا گەیشتە ئەو ئاستەی ببێتە حیزبی شەهیدان، بەڵام ڕۆڵەكانی گەل، كە پەروەردەی ڕێكخستنەكان و خاوەنی بیری تیژی ڕەتكردنەوەی زوڵم و ستەم بوون، نەك هەر جێی شەهیدەكانیان پڕدەكردەوە، بەڵكو پێدەشت و بنار و لووتكەكانیان پڕكرد لە پێشمەرگە و ئینجایش دابەزینە شارەكانەوە.
خەبات و قوربانیدانی یەكێتیی نیشتیمانیی كوردستان، ئەوەندە زۆرن كە مەگەر هەر لەلاپەڕەكانی مێژوودا جێگەیان ببێتەوە، ئەگەرنا هەرگیزا و هەرگیز لەهیچ بۆنەیەكدا ناتوانرێت ڕێژەیەكی یەكجار كەمیشی بهێنینەوە یادی خۆمان، بۆیە لەم ڕۆژ و یادە مەزنەدا، هەر ئەوەندەمان پێدەكرێت كە سەری ڕێز و نەوازش بۆ شەهیدان نەویی بكەین و دەست بەسنگەوە بۆ كەسوكاری ئەوان و خەڵكی خۆڕاگری كوردستان ڕابوەستین و سڵاوی ڕێز و ئەمەكداری بۆ مام-ی ڕابەر و سەرۆك و هاوڕێبازەكانی بنێرین.
نیوسەدە خەبات و تێكۆشان و قوربانیدان، لە یەكێتیی نیشتیمانیی كوردستان پیرۆزبێت.
گەلاوێژ
وتەبێژی پۆلیسی راپەرین بە کوردسات نیوزی راگەیاند: هاووڵاتیەک لەنێو بازاڕی چواڕقورنە تەقەی لە خەسویی و ژنەکەی کردوە، خەسووی کوشتووە و ژنەکەشی بریندارە.
شۆڕش ئیسماعیل وتەبێژی پۆلیسی چوارقوڕنە بە کوردسات نیوزی راگەیاند، روداوەکە لە ناو بازاڕی چوارقوڕنە بووە و تەقەی لە خەسووی کردووە و کوشتویەتی، هەروەها تەقەی لە هاوسەرەکەی و خوشک و برای هاوسەرەکەی کردووە و برینداری کردوون.
نوێدەکرێتەوە...
پێش نیوڕۆی ئەمڕۆ لە ناحیەی عەباسی سەر بە قەزای حەویجە، کرێکارێک لە کاتی ئەنجامدانی کارەکەیدا بە هۆی کارەبا گرتنەوە گیانی لەدەستداوە.
سەرچاوەیەکی ئەمنی لە پۆلیسی ناحیەی عەباسی بە کوردسات نیوزی راگەیاند کە قوربانیەکە گەنجێکی 29 ساڵە بە ناوی (فاروق غازی).
بەپێی زانیاریەکان، فاروق غازی لە کاتی کارکردن لە باخێکدا لە ناو ناحیەی عەباسی کارەبا گرتویەتی و دەستبەجێ گیانی لەدەستداوە.
مەکتەبی سیاسیی یەکێتیی نیشتمانیی کوردستان بەبۆنەی 50 هەمین ساڵیادی دامەزراندنی حزبەکەوە پەیامێکی بڵاوکردەوە و تێیدا هاتووە، "یەکێتی نیشتمانیی کوردستان: یەکڕیزتر و تۆکمەتر وەڵامی ئەرکەکانی قۆناغی داهاتوو دەدەینەوە".
دەقی پەیامەکە
پەیامی مەکتەبی سیاسیی
بۆ یادی یۆبیلی زێرینی یەکێتیی نیشتمانیی کوردستان
سەروەریمان زۆرە و ئەرکمان زۆرتر
———
کەسوکاری سەرفرازی شەهیدان
پێشمەرگە قارەمانەکان و هەڤاڵانی یەکێتیی
کۆمەڵانی خەڵکی کوردستان
یادی پەنجا ساڵەی دەستپێکی خەباتی یەکێتییەکەتان، لە هەمووتان و لە هەموومان پیرۆز بێت.
پەنجا ساڵ پێشتر ، ساڵی ١٩٧٥ ، حزبی شەهیدان ، بە دەستپێشخەری سەرۆک مام جەلال و هەڤاڵەکانی لەدەستەی دامەزرێنەر جاڕی تێکۆشانێکی درێژخایانیان بۆ رزگاری و بۆ مافەکانی گەلی کوردستان دا، کەمتر لە ساڵێکیش دوای ئەوە، لە ١-٦-١٩٧٦دا بڵێسەی شۆرشی نوێ هەموو شاخ و دەشت و دۆڵی وڵاتەکەمانی گرتەوە.
لەم کاروانە زێڕینەدا هەزاران شەهیدی سەرکردە و فەرماندە و پێشمەرگەی ئازا و بەجەرگ، سەدان نەبەردی پێشمەرگانە و موقاوەمەی زیندان و سێدارە و چالاکی رێکخستن و خۆپیشاندان و مانگرتن، تێکڕایان بوونە ناونیشان و رەمزی قۆناغێکی نوێی بەرخۆدانی کوردایەتی و دیموکراتی بە ناوەرۆکێکی پێشکەوتنخوازی کۆمەڵایەتییەوە. وێستگەکانی تێکۆشانی یەکێتیی کە هیوا و ئاواتی میللەتەکەمانی زیندووکردەوە، لەهەموو ئاست و بوارەکانی سیاسەتدا نوێ و دەگمەن و بێ وێنەبوو، تێکۆشانی ژنان و پیاوان، کچان و کوڕانی شۆڕشی نوێی گەلەکەمان وا کۆمەڵانی خەڵکی جۆشدایەوە کە کوردستان بە کردەوە بووە گۆڕەپانی جوڵانەوەیەکی هەمەلایەنەی سیاسیی، پێشمەرگایەتی، روناکبیری، ئیعلامی و جەماوەریش. لە ماوەیەکی کورتدا، سەرەڕای ئاستەنگە ناوخۆیی و دەرەکییەکان ، وێڕای خۆخۆری و سەرکوت و ستەمی رژێمی بەعسی داگیرکەر، توانی ویستی میللەتەکەمان بۆ ئازادی و دادپەروەری کۆمەڵایەتی لە راپەڕینی سەرتاسەریدا سەربخا و بۆ یەکەمین جار لە ژیانی تێکۆشەراندا ئاواتەکانی رزگاری و دیموکراسیی و حوکمڕانی خۆبەخۆ و خۆمانی بە دیبێت. سەرەنجام لە سایەی قوربانی و رەنج و هیلاکی یەکێتییەکەتاندا ئەزموونی دیموکراسیی لە هەرێمی کوردستان بەسەر هەموو تەنگژە و دژوارییەکاندا زاڵبوو و کاروانی سەرکەوتووی خۆی گەیاندە قۆناغی روخانی رژێمی دیکتاتۆری و ئاواکردنی عیراقێکی فیدراڵی و دیموکراسیی و ئاوەدانکرنەوەی وڵات بە ئازادی کەرکوک و خانەقین و تێکڕای ناوچە دابڕاوەکانیشەوە کە نەخشەرێگای دەستووری لە ماددەی ١٤٠دا بۆ دانراوە دوای دەیان ساڵ لە داڕزان و داکەوتن، تەعریب و تەبعیس و ئینجا تیرۆر و تەرهیبیش کە بەسەر میللەتەکەماندا هێنرا.
هەر لە قۆناغی پرۆسەی دیموکراسی و دەستوریشدا سەرۆک مام جەلال، دامەزرێنەر و سکرتێری گشتیی یەکێتی نیشتمانیی کوردستان ، رابەر و پێشمەرگەی دیموکراتخواز بووە یەکەم سەرۆک کۆماری هەڵبژێردراوی جێی متمانەی گەل و سەمام ئەمانی عێراقی فرە نەتەوە و فرە مەزهەب و فرە کێشە و لە ئەزموونی سەرۆکایەتی خۆیدا نموونەی جاویدان و مەزنی لەسەر لێوەشاوەیی تێکۆشەری یەکێتیی و لەخۆبوردوویی حزبی شەهیدان پێشکەشی کوردستان و گەلانی عیراقیش کرد کە بۆ هەتا هەتایە شانازییە بۆ میللەتەکەمان لە ئاستی دونیادا.
هەڤاڵان و کۆمەڵانی خەڵکی جوامێر و بەوەفای کوردەواری کە هێزی لە بن نەهاتووی یەکێتیی و کوردایەتیین، لەم رێڕەوە پەنجا ساڵییەدا یەکێتیی هەمیشە ئاوێتەی رەنج و قوربانی، ئازار و هیواکانی جەماوەر بووە. لێی دوور نەکەوتۆتەوە و لێی جیانەبۆتەوە، هەر لەبەر ئەوەش یاد و یادگارەکانی ، شەهید و قوربانییەکانی دەیان ساڵەی بۆنە و سەروەری نەتەوەیی و نیشتمانین و کۆمەڵانی خەڵکی خۆیان لەگەڵ یەکێتی خاوەندارێتی لێ دەکەن و پێی شاد و سەربەرزن .
جا ئەمرۆش کە لەهەلومەرجێکی نوێباودا یادی یۆبێلی زێڕین دەکەینەوە، کوردستان و یەکێتییەکەی ، عێراق و ئەزموونەکەی ئەرک و فرمانی تازەیان لەسەر شانە و پێویستە لەگەڵ خۆشی و شانازی یادەکەدا هەموومان بۆ ئەرکەکانی نوێی خەباتی سیاسیی ئامادە بین ، خۆمان مشتوماڵ بکەینەوە و لەسایەی یەکێتییەکی پتەوتر ، یەکریزتر و تۆکمەتردا وەڵامی ئەرکەکانی قۆناغ بدەینەوە ، هەڤاڵانی دێرین و ئێستامانی بۆ ساز بدەین و گەلەکەمانی بۆ جۆشبدەین، کچان و کوڕانی نەوەکانی تازەی کوردەواری بهێنینە پای ئەم خەباتە ستراتیژییە کە هێشتا زۆری ماوە بگاتە دوا مەنزڵی ( ئاشتی، دیموکراسی ، مافی مرۆڤ و چارەی خۆنووسین).
سڵاو و درود بۆ گیانی پاکی شەهیدانی کاروانی پەنجا ساڵە و تێکرای شەهیدانی کوردستان و عێراق.
سڵاو لە خەباتگێڕانی دێرینی هەموو قۆناغ و سەردەمەکان کە یەکێتییان کردە ئەم
تەلارە بەرز و بڵندەی سەرتاسەری کوردستان.
بەڵێنی ئەمڕۆی یەکێتیش بە سەرۆکایەتی هەڤاڵ بافل جەلال تاڵەبانی هەر ئەوەیە کە ئەمانەتی حزبی شەهیدان دەپارێزین و ئاڵای سەوزەکەی بە شەکاوەیی دەمێنێتەوە.
پێکەوە ئەم ئەرکە بەدیدێنین و پێکەوەش دەیکەینە خەڵاتی شایستە بۆ کورد و کوردستان.
لەیادی یۆبیلی زێریندا وەک مامی گەورەمان دەیوت ( ئێوەش هەر شاد و سەربەرز و سەرکەوتووبن)
مەکتەبی سیاسیی
یەکێتیی نیشتمانیی کوردستان
وەزارەتی پەروەردەی حکوومەتی هەریمی کوردستان رایگەیاند؛ کە نمرەکانی پۆلە ناکۆتاکانی قوتابخانە حکوومییەکانی هەرێم لە ئەپڵیکەیشنی "ئی-هەڵسەنگاندن" بڵاوکراونەتەوە.
بەپێی راگەیەنداوی ئەم وەزارەتە، زیاتر لە یەک ملیۆن و سێسەد هەزار قوتابی پۆلە ناکۆتاکان لە پۆلی چوارەمی بنەڕەتییەوە تا یازدەیەمی ئامادەیی دەتوانن ئەنجامی کۆتایی وەرزی دووەم کە خولی یەکەمە وەربگرنەوە.
وەزارەتی پەروەردە جەختی لەسەر ئەوە کردووەتەوە کە قوتابییان و خێزانەکانیان دەبێت بە وردی و دڵنیاییەوە کۆدی بەکارهێنەر و وشەی نهێنی بەکاربهێنن بۆ ئەوەی بتوانن بە دروستی دەست بە ئەنجامەکانیان بگەن.
وەزارەتەکە رونکردنەوەی داوە کە نوسینی ژمارەکان پێویستە بە ژمارەی ئینگلیزی بێت، بەبێ بەکارهێنانی سپەیس یان هەر جۆرە ئاماژەیەک.
بەپێی ئاماژەکانی وەزارەتەکە، لە کاتی دەرکردنی ئەنجامی پۆلی نۆی بنەڕەتیدا، ژمارەیەکی زۆر لە قوتابییان بەهۆی بەکارهێنانی ژمارەی کوردی و سپەیس و هەندێک ئاماژە لەگەڵ هەڵەکردن لە وشەی نهێنیدا هەوڵیان بۆ چوونە ناو سیستمەکە داوە کە لە ئەنجامدا سیستم هەژمارەکانی لۆک کردوون.
بۆیە وەزارەتەکە داوای لە هەموو قوتابییان کردووە کە دڵنیابن لە بەکارهێنانی دروستی زانیارییەکان بۆ دەستگەیشتن بە ئەنجامەکانیان.