شارەوانی سلێمانی رایگەیاندوە، لە پێناو زیادکردنی رێژەی سەوزایی زیادکردنی نەمام، هەمەتی چاندنی هەزار نەمامیان لە پارکی هەواری شار دەستپێکردوە، کە لە جۆری سنۆبەر و داری زەیتون بوون.

ئەمڕۆ چوارشەممە، سەرۆکایەتی شارەوانی سلێمانی رایگەیاندوە، بە مەبەستی پاراستنی ژینگە و لە پێناو زیادکردنی رێژەی سەوزایی و بایەخدان هەڵمەتێکیان ئەنجامداوە و لە پارکی هەواری شار هەزار نەمامیان چاندوە.

ئاماژەیان بەوەشکردوە؛ پرسی ژینگە پارێزی بەشێکی گرنگی کارنامەی سەرۆکایەتیی شارەوانیی سلێمانییە و پێویستە ئەرک و خەمی هەموومان بێت .

جەختیشیانکردوەتەوە لەوەی  دەبێت ژینگە و سروشتی جوانی کوردستان بە پاکی رابگیرێت، چونکە  ئەو کارە ئەرکی هەموو لایەکە.

قائیمقامیەتی قەزای رانیە رایگەیاند، ئەو هاووڵاتیانەی تا ئێستا بەشە نەوتیان وەرنەگرتووە، تەنها 15 رۆژیان لەبەردەمدایە بۆ وەرگرتنی پشکی خۆیان.

لە راگەیەنراوێکدا کە ئاماژەی بە نوسراوی بەڕێوەبەرایەتیی نەوت و کانزاکانی راپەڕین کردووە، قائیمقامیەتی رانیە هۆشداری دەداتە دانیشتوانی قەزاکە و ناحیەکانی، کە ئەگەر لەو ماوەیەدا نەوتەکەیان وەرنەگرن، مافی وەرگرتنیان نامێنێت.

قائیمقامیەتییەکە جەختی کردەوە، بە کۆتاییهاتنی ئەو 15 رۆژە، پرۆسەی دابەشکردنی نەوت لە سنورەکەدا بە تەواوی کۆتایی دێت.

 

وەزارەتی دارایی و ئابوریی حکومەتی هەرێمی کوردستان رایگەیاند، ئەمڕۆ چوارشەممە،  بڕی 120 ملیار دینار وەک داهاتی نانەوتیی هەرێم بۆ مانگی ئەیلول، رادەستی حکومەتی فیدراڵی کراوە.

بەپێی راگەیەنراوێکی وەزارەتەکە، پارەکە لە لقی هەولێری بانکی ناوەندیی عیراق، خراوەتە سەر هەژماری بانکیی وەزارەتی دارایی حکومەتی فیدراڵی.

 

وەزارەتی دارایی حکومەتی هەرێمی کوردستان رێکارەکانی ناردنی داهاتی نانەوتی بۆ بەغداد دەستپێکرد و وابڕیارە ئەمڕۆ ئەو پارەیە رادەستی بەغداد بکرێت، بەپێی زانیارییەکانی پەیامنێری کوردسات نیوزیش بەرەبەیانی ئەمڕۆ پارەی سلێمانی گەیشتە هەولێر.

وەزارەتی دارایی دوێنێ رایگەیاند، کە سبەینێ؛ واتە (ئەمڕۆ چوارشەممە) بڕی 120 ملیار دینار وەک پشکی گەنجینەی فیدراڵی لە داهاتی نانەوتیی مانگی ئەیلول، بەشێوەی کاش دەخرێتە سەر هەژماری بانکیی وەزارەتی دارایی عیراق لە لقی هەولێری بانکی ناوەندی.

قوباد تاڵەبانی، جێگری سەرۆک وەزیران لە هەولێر بە جیا لەگەڵ هەر یەکە لە عیرفان سدیق، باڵیۆزی بەریتانیا و نيكۆلۆ فۆنتانا، باڵيۆزى ئيتاڵيا و محەمەد ئەلحەسان، نوێنه‌رى تايبه‌تى سكرتێرى گشتیی نەتەوەیەكگرتووەكان لە عیراق کۆبووەوە و تاوتوێی ئەنجامی هەڵبژاردنەکان و رەوشی عیراق کرا

لە هەر سێ کۆبوونەوەکەدا کە ئەمڕۆ سێ شەممە لە هەولێر بەڕێوەچوون، تاوتوێی رەوشی عیراق لە دوای بەڕێوەچوونی هەڵبژاردنەکانی ئەنجومەنی نوێنەرانی عیراق کرا.

جێگری سەرۆک وەزیران بەڕێوەچوونی سەرکەوتووانەی هەڵبژاردنەکانی بە دەستکەوتێکی گەورە بۆ خەڵکی عیراق وەسف کرد و هیوای خواست بەپێی ئەنجامەکانی ئەم هەڵبژاردنە حکومەتێک پێکبهێنرێت کە لە ئاست داواکارییەکانی هاوڵاتییانی عیراقدابێت و مافەکانی هەموو پێکهاتەکان تیایدا پارێزراوبێت.

قوباد تاڵەبانی جەختیشی کردەوە کە پێویستە ئەولەوییەتی هەر دوو حکومەتی داهاتووی عیراق و هەرێم چارەسەرکردنی بنەڕەتی کێشەکانی نێوان هەرێم و بەغدا بێت بەپێی دەستور و رایگەیاند چارەسەرکردنی کێشەکان دەرگا دەکاتەوە بەرەو عیراقێکی سەقامگیرتر و هەنگاونان بەرەو گەشەپێدانی ئابووری و باشترکردنی دۆخی خزمەتگوزارییەکان.

سەبارەت بە چۆنییەتی بەشداریکردنی لایەنە کوردستانییەکان لە حکومەتی داهاتووی عیراقدا، جێگری سەرۆکوەزیران بە پێویستی زانی لایەنە کوردستانییەکان لەڕێی گفتوگۆی بنیاتنەرانەوە لەسەر بەرنامە و پلانی هاوبەش رێکبکەون و بە یەکڕیزییەوە لەگەڵ لایەنە عیراقییەکان بکەونە دانووستانەوە بۆ ئەوەی باشتر بتوانن داکۆکی لە مافە دەستورییەکانی خەڵکی کوردستان بکەن.

پاسپۆرتی سلێمانی راگەیەندراوێکی بڵاوکردوەتەوە و دەڵێت؛ بۆ نۆرەگرتن و پێدانی پاسپۆرتی ئەلیکترۆنی، ئەگەر لە رێگەی ئەلیکترۆنییەوە(حجز الكتروني ) نۆرەبگرن ئەوا تەنها بڕی 91 هەزار دیناری تێدەچێت، ئەگەر وانەبێت دەبێت 100 هەزار دیناری زیادەی روسمات بدەن، جگە لە91 هەزار دیناری تێچوی پاسپۆرتەکە.

هەروەها ئاماژەی بەوەشکردوە؛ بۆ هاووڵاتییان واباشترە لە رێگەی ئەلیکترۆنییەوە نۆرەبگرن، بۆ ئەوەی تێچوی کەمتر بکەوێت لەسەریان و تەنها 91 هەزار دینار بدەن، نەک 191 هەزار دینار.

داوا لەو هاوڵاتیانەش دەکات کە لە رێگەی ئەلیکترۆنییەوە نۆرەیان گرتوە، بە گوێرەی کاتی دیاری کراوی خۆیان کە بە نامەی ئەلیکترۆنی بۆیان دیاریکراوە سەردانیان بکەن. 

پاسپۆرتی سلێمانی دەشڵێت؛ سەعات و رێکەوتی نۆرەکەیان لە رێگەی ئەلیکترۆنییەوە لە چ کات و رێکەوتێکدا بوو، ئەوا لەو کاتەدا سەردانیان بکەن ، بۆ ئەوەی لە کاتی خۆیدا مامەڵەکانیان بۆ رایی بکەن.

هەروەها هاووڵاتییانیش ئاگاداردەکاتەوە بۆ رایکردنی کارەکانیان، تەنها کار بە کارتی نیشتیمانی دەکرێت و پێناسی باری شارستانی و رەگەزنامەی عیراقی کاریان پێناکرێت، لەم لینکەشەوە  www.epp.iqهاووڵاتییان دەتوانن نۆرەی ئەلیکترۆنی بۆخۆیان دابنێن.

شارەوانی سلێمانی داوا لەو خانەنشینانە دەکات کە لە تیروپشکی وەرگرتنی زەویدا ناویان هاتوەتەوە بۆ رایکردنی مامەڵەکانیان سەردانی بەڕێوەبەرایەتی خانەنشینی سلێمانی بکەن، نەک شارەوانی. 

شارەوانی سلێمانی رونکردنەوەیەکی تایبەت بە زەوی خانەنشینان بڵاوکردوەتەوە و تێیدا هاتووە؛ بەهۆی سەردانیكردنی زۆری خانەنشینانی بەڕێزو وە پرسیاركردنێكی زۆر لە سەرۆکایەتییان تایبەت بەو ناوانەی کە بەشێوەی تیروپشکی ئەلیکترۆنی كاری دابەشكردنی زەوییان بۆ ئەنجام درا لە لایەن سەرۆکایەتیی شارەوانیمان لە رێکەوتی 28ی ئابی 2025سەرجەم ناوەکان ئاراستەی خانەنشینی سلێمانی کراوە.

ئاماژەیان بەوەشکردوە؛ ناوەکان ئێستا  لە بینای بەڕێوەبەرایەتیی خانەنشینی سلێمانی بڵاوكراوەتەوە بەمەبەستی تەواوکردنی رێکاری ماوە لەلیژنەی پەیوەندیداری فەرمانگەی ناوبراو.

شارەوانی سلێمانی داوا لەو خانەنشینانە دەکات کە ناویان لە لیستەکەدایە سەردانی بەڕێوەبەرایەتیی خانەنشینی سلێمانی بكەن و ئەو بەرایی و زانیارییانەی داواكراوە لێیان رادەستی بەڕێوەبەرایەتیی خانەنشینانی سلێمانی بکرێت نەك سەرۆكایەتی شارەوانی سلێمانی.

بەڕێوەبەری ئۆفیسی سلێمانی کۆمسیۆن پیرۆزبایی سەرکەوتنی بەرێوەچونی هەڵبژاردن دەکات و دەڵێت: پرۆسەیەکی دەنگدانی پابەند بە بنەماکانی دیموکراسی بە شێوەیەکی رێک و پێک بەرێوەچوو.

ئامانج عەزیز، بەڕێوەبەری ئۆفیسی سلێمانی کۆمسیۆنی باڵای سەربەخۆی هەڵبژاردنەکان لە پەیامێکدا رایگەیاند، پیرۆزبایی سەرکەوتن لە لایەنە بەشداربووەکانی هەڵبژاردن دەکات، دەستخۆشی لە هاووڵاتیانی شاری سلێمانی و هەموو ئەو لایەنانە دەکات کە سەرەڕای کۆبونەوەی ژمارەیەکی زۆری هاووڵاتیان لە وێستگەو بنکەکانی دەنگدان، لەگەڵ هەبوونی چەند گرفتێکی کەمی تەکنیکی و هونەری، تەواوی پرۆسەی دەنگدان بەسەرکەوتویی و بەبێ هیچ روداوێکی نەخوازراو ئەنجام دران.

ئاماژەی بەوەشکرد، سەرباری هۆشیاری و دڵسۆزی هاووڵاتیانی شارەکە، هێزە ئەمنییەکان دەزگای ئاسایش و پۆلیس، بەرگری فریاکەوتن، بەرگری شارستانی، پارێزگای سلێمانی و پارێزگای هەڵەبجە و ئیدارە سەربەخۆکانی راپەرین و گەرمیان ، بەرێوەبەرایەتی گشتی پەروەردەی سلێمانی، بەرێوەبەرایەتی فرۆکەوانی سلێمانی، رێکخراوەکانی کۆمەڵگەی مەدەنی و تەواوی کارمەندانی رۆژی دەنگدان، بەوپەڕی دڵسۆزییەوە وەکو یەک تیم لەگەڵ کارمەندانی کۆمسیۆن کاریان کردووە، رێگەیان نەدا روداوی نەخوازراو رەوشی بەرێوەچونی پرۆسەی دەنگدان گرفتی بۆ دروست ببێت و  پرۆسەکە تێک بدات.

ئامانج عەزیز ئەوەشی خستەڕوو، جارێکیتر پیرۆزبایی سەرکەوتنی پرۆسەی هەڵبژاردنی نوێنەرانی عیراق، لەهەموو کوردێک دەکات، هاوکات پشت بە خوای گەورە و کەسانی دڵسۆز ئەو پلانە یاسای و کارگێری و هونەری و ئەمنییەی، کە دانرابوو لە هەردوو رۆژی دەنگدانی تایبەتی و گشتی بەتەواوی جێبەجێ کرا،هەروەها پرۆسەیەکی دەنگدانی پابەند بە بنەماکانی دیموکراسی بە شێوەیەکی رێک و پێک بەرێوەچوو.

بەپێی پێشبینییەکانی کەشناسی لە 48 سەعاتی داهاتوودا ئاسمان ساماڵ و پەڵە هەور دەبێت، پلەکانی گەرماش بەرز دەبنەوە.

بەڕێوەبەرایەتی گشتی کەشناسی هەرێم، پێشبینییەکانی بۆ ئەمڕۆ و سبەینێ بڵاوکردەوە و رایگەیاند، ئەمڕۆ ئاسمان ساماڵ و پەڵە هەور دەبێت بەشێک لە ناوچە شاخاوییەکان نیمچە هەور دەبێت، هاوکات پلەکانی گەرما به‌رز دەبنەوە بەراورد بە تۆمارەکانى دوێنێ.

ئاماژەی بەوەشکرد، سبەینێ پلەکانی گەرما (1-3) پلەى سیلیزى بەرز دەبێتەوە بەراورد بە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی

هەولێر : 20 پلەی سیلیزی

سلێمانی : 19 پلەی سیلیزی

دهۆک : 19 پلەی سیلیزی

زاخۆ : 20 پلەی سیلیزی

کەرکوک : 21 پلەی سیلیزی

هەڵەبجە : 19 پلەی سیلیزی

سۆران : 17 پلەی سیلیزی

حاجی ئۆمەران : 10 پلەی سیلیزی

گەرمیان : 24 پلەی سیلیزی

ئەو وشە كوردییانەی لە بودجەی توركیا تۆماركران جارێكی تر لابران، پەرلەمانتارێكی دەم پارتیش دەڵێت، توركیا وشە كوردییەكان سانسۆر دەكات.

رۆژی دووشەممە بۆ یەكەمجار وشەی شارەوانی خەڵفەتی لە تۆمارەكانی بودجەی توركیا بە زمانی كوردی تۆماركرا، محەمەد روشتو پەرلەمانتاری پارتی یەكسانی دیموكراسی گەلان "دەم پارتی"ش رایگەیاند، دوای چەند سەعاتێك پەرلەمانی توركیا تۆمارەكانی نوێكردووەتەوە و وشە كوردییەكانی لابردووە.

وتیشی، توركیا لە رابردووشدا وشە كوردییەكانی سانسۆر دەكرد و وشەی توركی لە جێگەیان بەكاردەهێنا، یاخود لە جێگەی وشە كوردییەكان بۆشایی یان سێ‌ خاڵی دیاری دەكرد.

کۆمسیۆنی باڵای سەربەخۆی هەڵبژاردنەکانی عیراق، لە کۆنگرەیەکی رۆژنامەوانیدا ئەنجامی کۆتایی هەڵبژاردنی خولی شەشەمی ئەنجومەنی نوێنەرانی عیراقی بۆ سەرجەم پارێزگاکان راگەیاند. بەپێی ئەنجامەکان، لەسەر ئاستی هەرێمی کوردستان، یەکێتیی نیشتمانیی کوردستان 18 کورسی بەدەستهێناوە.

ئەنجامی تەواوی پارێزگاکان:

پارێزگای بەغداد (71 کورسی)

• هاوپەیمانیی ئاوەدانکردنەوە و گەشەپێدان: 15 کورسی
• حیزبی تەقەدوم: 10 کورسی
• دەوڵەتی یاسا: 9 کورسی
• هاوپەیمانیی هێزەکانی دەوڵەت: 5 کورسی
• بزووتنەوەی سادیقوون: 5 کورسی
• هاوپەیمانیی عەزمی عێراقی: 5 کورسی
• رێکخراوی بەدر: 4 کورسی
• هاوپەیمانیی سیادەی نیشتمانی: 4 کورسی
• هاوپەیمانیی ئەساسی عێراقی: 4 کورسی
• بزووتنەوەی حقوق: 3 کورسی
• حەسمى نیشتمانى: 2 کورسی
• ئەبشر یا عێراق، خەدەمات، ئیشراق کانوون: هەر یەکەیان 1 کورسی
• کۆتاکان: ئیڤان فایەق (کریستیان) و بەسام جاسم (سابیئە)

پارێزگای سلێمانی (18 کورسی)

• یەکێتیی نیشتمانیی کوردستان: 8 کورسی
• رەوتی هەڵوێست: 3 کورسی
• نەوەی نوێ: 2 کورسی
• پارتی دیموکراتی کوردستان: 2 کورسی
• یەکگرتووی ئیسلامیی کوردستان: 2 کورسی
• کۆمەڵی دادگەریی کوردستان: 1 کورسی
  
  

پارێزگای هەولێر (16 کورسی)

• پارتی دیموکراتی کوردستان: 9 کورسی
• یەکێتیی نیشتمانیی کوردستان: 3 کورسی
• رەوتی هەڵوێست: 2 کورسی
• نەوەی نوێ: 1 کورسی
• کۆتای کریستیان: کلدۆ رەمزی
  
  

پارێزگای کەرکوک (12 کورسی)

• یەکێتیی نیشتمانیی کوردستان: 4 کورسی
• حیزبی تەقەدوم: 3 کورسی
• بەرەی تورکمانی عێراقی یەکگرتوو: 2 کورسی
• پارتی دیموکراتی کوردستان: 1 کورسی
• هاوپەیمانیی عەرەبی: 1 کورسی
• هاوپەیمانیی عەزم: 1 کورسی

پارێزگای دهۆک (11 کورسی)

• پارتی دیموکراتی کوردستان: 9 کورسی
• یەکگرتووی ئیسلامیی کوردستان: 2 کورسی

پارێزگای نەینەوا (34 کورسی)

• پارتی دیموکراتی کوردستان: 5 کورسی
• حیزبی تەقەدوم: 4 کورسی
• ئاوەدانکردنەوە و گەشەپێدان: 3 کورسی
• نەینەوا بۆ خەڵکەکەی: 3 کورسی
• هاوپەیمانیی عەزمی عێراق: 3 کورسی
• حەسمى نیشتمانى، بەدر، سیادە، یەکێتی خەڵکی نەینەوا: هەر یەکەیان 2 کورسی
• پرۆژەی عەرەبی، ناسنامە، دۆزی ئێزدی، مەشروعی عەرەبی: هەر یەکەیان 1 کورسی
  
  
  

پارێزگای بەسڕە (25 کورسی)

• هاوپەیمانیی تەسمیم: 6 کورسی
• بزووتنەوەی سادیقوون: 5 کورسی
• هاوپەیمانیی ئاوەدانکردنەوە و گەشەپێدان: 4 کورسی
• دەوڵەتی یاسا، هێزەکانی دەوڵەت، حقوق: هەر یەکەیان 2 کورسی
• رێکخراوی بەدر، ئەبشر یا عێراق، گردبوونەوەی فاو-زاخۆ، ئەساسی عێراقی: هەر یەکەیان 1 کورسی
  
  

پارێزگای دیالە (14 کورسی)

• رێکخراوی بەدر: 3 کورسی
• حیزبی تەقەدوم: 3 کورسی
• هاوپەیمانیی سیادە، سادیقوون، عەزم: هەر یەکەیان 2 کورسی
• هاوپەیمانیی دیالە ئەوەلەن، سابیتون: هەر یەکەیان 1 کورسی
  
  

پارێزگای ئەنبار (15 کورسی)

• حیزبی تەقەدوم: 5 کورسی
• ئەنبار هەویەتونا: 3 کورسی
• قیمەم: 3 کورسی
• هاوپەیمانیی عەزمی عێراق: 2 کورسی
• هاوپەیمانیی تەفوق، سیادە: هەر یەکەیان 1 کورسی
  
  

پارێزگای بابل (17 کورسی)

• ئاوەدانکردنەوە، سادیقوون، دەوڵەتی یاسا: هەر یەکەیان 3 کورسی
• ئیشراق کانوون، هێزەکانی دەوڵەت: هەر یەکەیان 2 کورسی
• خەدەمات، سۆمەریون، ئیدراک، بەدر: هەر یەکەیان 1 کورسی
  
  
  
  
  

پارێزگای زیقار (19 کورسی)

• ئاوەدانکردنەوە، دەوڵەتی یاسا، سادیقوون: هەر یەکەیان 3 کورسی
• هێزەکانی دەوڵەت، بەدر: هەر یەکەیان 2 کورسی
• سۆمەریون، خەدەمات، ئەبشر یا عێراق، ئیشراق کانوون، دەعمی دەوڵەت، حقوق: هەر یەکەیان 1 کورسی

پارێزگای سەلاحەدین (12 کورسی)

• تەقەدوم، ئاوەدانکردنەوە، عەزم، جەماهیری نیشتمانی: هەر یەکەیان 2 کورسی
• سەڵاحەدینی یەکگرتوو، شەراکەتونا، حەسم، تەفوق: هەر یەکەیان 1 کورسی

پارێزگای واست (12 کورسی)

• واست ئەجمەل: 4 کورسی
• دەوڵەتی یاسا، ئاوەدانکردنەوە، سادیقوون: هەر یەکەیان 2 کورسی
• هێزەکانی دەوڵەت، کۆتای کوردی فەیلی: هەر یەکەیان 1 کورسی

پارێزگای نەجەف (12 کورسی)

• ئاوەدانکردنەوە، هێزەکانی دەوڵەت، دەوڵەتی یاسا، سادیقوون: هەر یەکەیان 2 کورسی
• خەدەمات، ئەبشر یا عێراق، ئەساسی عێراقی، ئیشراق کانوون: هەر یەکەیان 1 کورسی

پارێزگای کەربەلا (11 کورسی)

• ئاوەدانکردنەوە: 3 کورسی
• دەوڵەتی یاسا، ئیشراق کانوون: هەر یەکەیان 2 کورسی
• ئەساسی عێراقی، سادیقوون، هێزەکانی دەوڵەت، بەدر: هەر یەکەیان 1 کورسی

پارێزگای قادسیە (11 کورسی)

• ئاوەدانکردنەوە: 3 کورسی
• دەوڵەتی یاسا: 2 کورسی
• بەدر، سادیقوون، هێزەکانی دەوڵەت، خەدەمات، ئیشراق کانوون: هەر یەکەیان 1 کورسی

پارێزگای میسان (10 کورسی)

• ئاوەدانکردنەوە: 3 کورسی
• بەدر، دەوڵەتی یاسا، سادیقوون: هەر یەکەیان 2 کورسی
• هێزەکانی دەوڵەت: 1 کورسی

پارێزگای موسەننا (7 کورسی)

• ئاوەدانکردنەوە، دەوڵەتی یاسا: هەر یەکەیان 2 کورسی
• سادیقوون، هێزەکانی دەوڵەت، ئەساسی عێراقی: هەر یەکەیان 1 کورسی

 

کۆمسیۆنی باڵای سەربەخۆی هەڵبژاردنەکان، ئەنجامی کۆتایی هەڵبژاردنی ئەنجومەنی نوێنەرانی عیراقی بۆ پارێزگای سلێمانی راگەیاند، کە تێیدا یەکێتیی نیشتمانیی کوردستان توانیی بە شێوەیەکی بەرچاو پلەی یەکەم بەدەستبهێنێت.

یەکێتیی نیشتمانیی کوردستان براوەی یەکەمە: 

بەپێی ئەنجامە فەرمییەکان، لە کۆی 18 کورسیی پارێزگاکە، یەکێتیی نیشتمانیی کوردستان بە بەدەستهێنانی 241,143 دەنگ، 8 کورسیی مسۆگەر کردووە و بەمەش بووە گەورەترین هێزی سیاسی لە پارێزگاکە. ئەکرەم ساڵح، کاندیدی یەکێتی، بە بەدەستهێنانی 34,996 دەنگ، زۆرترین دەنگی لەسەر ئاستی لیستەکە بەدەستهێناوە.

دابەشبوونی کورسیی لایەنەکانی دیکە
لایەنەکانی دیکە بەم شێوەیە کورسییەکانیان بەدەستهێناوە:

• رەوتی نیشتمانی (تیار الموقف الوطنی): 3 کورسی بە 75,375 دەنگ.

• نەوەی نوێ: 2 کورسی بە 69,781 دەنگ.

• پارتی دیموکراتی کوردستان: 2 کورسی بە 68,834 دەنگ.

• یەکگرتووی ئیسلامیی کوردستان: 2 کورسی بە 65,312 دەنگ.

• کۆمەڵی دادگەریی کوردستان: 1 کورسی بە 34,563 دەنگ.

ناوی کاندیدە دەرچووەکان:
ناوی ئەو کاندیدانەی کە کورسیی پەرلەمانیان لە پارێزگای سلێمانی بەدەستهێناوە بریتیین لە:

• یەکێتیی نیشتمانیی کوردستان (8 کورسی):

  1. ئەکرەم ساڵح غەفور: 34,996 دەنگ

  2. ئاوات محەمەد غەفور مەعروف: 19,812 دەنگ

  3. رێکەوت حەمەڕەشید کەریم محەمەد: 19,354 دەنگ

  4. رامیار حەیدەر سەعید: 15,319 دەنگ

  5. ئاسۆس عەلی ئەحمەد عەبدوڵا: 10,063 دەنگ

  6. پۆڵا مەعروف علی مەجید: 8,906 دەنگ

  7. بڕیار رەشید شەریف: 8,842 دەنگ

  8. سروە محەمەد رەشید (مێ): 6,940 دەنگ

• رەوتی نیشتمانی (3 کورسی):

  1. غالب محەمەد عەلی: 52,328 دەنگ

  2. رێبوار کەریم مەحمود: 6,441 دەنگ

  3. بەرزی ئەزمڕ ساڵح حمید (مێ): 3,654 دەنگ

• نەوەی نوێ (2 کورسی):

  1. سروە عەبدولواحید قادر (مێ): 21,987 دەنگ

  2. مژدە مەحمود محەمەد (مێ): 14,206 دەنگ

• پارتی دیموکراتی کوردستان (2 کورسی):

  1. ئەشواق نەجمەدین : 8,214 دەنگ

  2. فاروق محەمەد سعید: 4,529 دەنگ

• یەکگرتووی ئیسلامیی کوردستان (2 کورسی):

  1. موسەنا ئەمین نادر: 36,689 دەنگ

  2. عومەر محەمەد کەریم: 15,631 دەنگ

• کۆمەڵی دادگەریی کوردستان (1 کورسی):

  1. ئەحمەد حەمە رەشید: 20,525 دەنگ

 

کۆمسیۆنی باڵای سەربەخۆی هەڵبژاردنەکان، ئەنجامی کۆتایی هەڵبژاردنی ئەنجومەنی نوێنەرانی عیراقی بۆ پارێزگای هەولێر راگەیاند، کە تێیدا یەکێتیی نیشتمانیی کوردستان سێ کورسی بەدەستهێناوە.

پارتی دیموکراتی کوردستان براوەی یەکەم
بەپێی ئەنجامە فەرمییەکان، لە کۆی 16 کورسیی پارێزگاکە، یەکێتیی بە بەدەستهێنانی97,411  دەنگ، 3 کورسی مسۆگەر کردووە و بەمەش بووە دووەمی پارێزگاکە.

دابەشبوونی کورسیی لایەنەکان:

• یەکێتیی نیشتمانیی کوردستان: 3 کورسی بە 97,411 دەنگ.
  
   پارتی دیموکراتی کوردستان بە بەدەستهێنانی 369,724 دەنگ، 9 کورسی
  

• رەوتی نیشتمانی (تیار الموقف الوطنی): 2 کورسی بە 63,298 دەنگ.

• نەوەی نوێ: 1 کورسی بە 38,921 دەنگ.

• کورسی کۆتای کریستیانەکان: 1 کورسی بۆ کلدۆ رمزی هرمز.

ناوی کاندیدە دەرچووەکان:

ناوی ئەو کاندیدانەی کە کورسیی پەرلەمانیان لە پارێزگای هەولێر بەدەستهێناوە بریتیین لە:

• پارتی دیموکراتی کوردستان:

  1. ڕێبوار هادی عەبدولڕەحمان: 31,608 دەنگ

  2. سەفین یاسین محەمەدئەمین: 21,892 دەنگ

  3. بایز ئیسماعیل ئەسعەد: 20,430 دەنگ

  4. عەلی خاڵس جەواد: 16,164 دەنگ

  5. دانە عەبدولغەفار عەزیز: 15,893 دەنگ

  6. سیبان عەزیز حەدو: 15,825 دەنگ

  7. جیمەن حسێن عەزیز (مێ): 15,264 دەنگ

  8. نافستە مام یحیی عوسمان (مێ): 10,497 دەنگ

  9. جیمەن بایز محەمەد (مێ): 9,250 دەنگ
     
     

• یەکێتیی نیشتمانیی کوردستان:

  1. هەرێم کەمال خورشید: 19,922 دەنگ

  2. ئومێد زوبێر عومەر: 17,711 دەنگ

  3. جوان حوسێن رەسوڵ: 2,933 دەنگ
     
     

• رەوتی نیشتمانی:

  1. عەلی حەمە ساڵح: 48,921 دەنگ

  2. هێوا ئەحمەد فەقێ: 2,964 دەنگ
     
     

• نەوەی نوێ:

  1. کاوە عەبدولقادر حوسێن: 19,164 دەنگ
     
     

• کۆتای کریستیانەکان:

  1. کلدۆ رمزی هرمز شابۆ: 18,517 دەنگ

 

قوباد تاڵەبانی، جێگری سەرۆکی ئەنجومەنی وەزیران، لە میانی کۆبوونەوەی لەگەڵ زیاد بەتارسە، کونسوڵی گشتیی نوێی ئۆردن، رایگەیاند کە دەبێت کاری لەپێشینەی حکومەتی داهاتووی عیراق و هەرێمی کوردستان، چارەسەرکردنی بنەڕەتیی کێشەکانی نێوان هەردوولا بێت.

لە کۆبوونەوەکەدا کە ئەمڕۆ دووشەممە، 17/11/2025، بەڕێوەچوو، جێگری سەرۆکی ئەنجومەنی وەزیران ئاماژەی بەوەدا کە هەڵبژاردنەکانی ئەنجومەنی نوێنەران بە شێوەیەکی سەرکەوتوو بەڕێوەچوو و هیوای خواست حکومەتی نوێی عیراق بە زووترین کات پێکبهێنرێت.

بەشێکی دیکەی کۆبوونەوەکە تەرخانکرا بۆ باسکردن لە پەیوەندییە مێژووییەکانی نێوان کوردستان و ئۆردن. هەردوولا جەختیان لەوە کردەوە کە پێویستە ئەو پەیوەندییانە لە بوارەکانی بازرگانی، کلتوری، پەروەردە و خوێندنی باڵادا پەرەی زیاتریان پێبدرێت.

لەم چوارچێوەیەدا، ئاماژە بە دامەزراندنی "کۆمیسیۆni فیلمی کوردستان" کرا و بە رۆڵێکی گرنگ وەسفکرا بۆ ئەوەی وەک پردێکی پەیوەندیی بەهێز لەنێوان هەرێم و ئۆردندا کار بکات.

 

قوباد تاڵەبانی، جێگری سەرۆکوەزیران پێشوازیکرد لە لى جۆن ئيل، باڵيۆزى نوێى كۆرياى باشوور و پێکەوە گفتوگۆیان کرد لەبارەی چۆنییەتی پەرەپێدانی پەیوەندییەکانی نێوان کۆریای باشوور و هەرێمی کوردستان.

لە دەستپێکی کۆبوونەوەکەدا کە ئەمڕۆ دووشەمە بە ئامادەبوونی سێنچول لیم، کونسوڵی گشتیی کۆریای باشوور لە هەرێم بەڕێوەچوو، هەڵسەنگاندن کرا بۆ ئەنجامەکانی هەڵبژاردنەکانی ئەنجومەنی نوێنەرانی عیراق. جێگری سەرۆکوەزیران هیوای خواست حکومەتی نوێی عیراق بەزوویی پێکبهێنرێت و تیایدا مافەکانی هەموو پێکهاتەکان پارێزراوبێت.

قوباد تاڵەبانی هاوکارییەکانی حکومەتی کۆریای باشووری بۆ هەرێمی کوردستان بەرز نرخاند و رایگەیاند کۆریای باشوور دەتوانێت رۆڵێکی کاریگەرتر لە پرۆسەی گەشەپێدانی ئابوری هەرێمی کوردستاندا بگێڕێت بە تایبەتیش کە هەرێم پێویستیی بە ئەزمونی دەوڵەمەندی کۆریا هەیە لە بواری گەشەپێدانی کەرتە جیاوازەکان.

لە تەوەرێکی دیکەدا باس لە بەڕێوەچوونی کۆبوونەوەیەک کرا لە ماوەکانی داهاتوودا کە تیایدا گفتوگۆ دەکرێت لەبارەی بەشداریی ستراتیژیی کۆریای باشوور لە پرۆسەی گەشەپێدانی هەرێمی کوردستاندا.

به‌رێوه‌به‌رایه‌تی گشتی حه‌ج و عومره‌ی كوردستان رایگەیاند، گەشتی وشکانیان نابێت بۆ ساڵی ئایندە و تێچوی  حەجکردنیش بۆ هەر کەسێک حەوت ملیۆن و  100 هەزار دینارە، ئاماژەیان بەوەشکردوە؛ ئەو هاووڵاتیانەی دوێنێ ناویان هاتوەتەوە دەتوان لە سبەینێوە سەردانی نووسینگه‌كانی حه‌ج و عومرە بکەن بە مەبەستی تەواوکردنی مامەڵەکانیان.

ئەمڕۆ دووشەممە، به‌رێوه‌به‌رایه‌تی گشتی حه‌ج و عومره‌ی كوردستان، راگەیەندراوێکی بڵاوکردوەتەوە  و تێیدا تێچوی حەجکردنی ئاشکرا کردوە و ئەو هاووڵاتییانەیشی کە دوێنێ لە تیروپشکەکەدا ناویان هاتوەتەوە ئاگادار دەکاتەوە.

به‌رێوه‌به‌رایه‌تی گشتی حه‌ج و عومرە راشیدەگەیەنێت؛  به‌ پێی ئه‌و داتای له‌ ژمێریاری حه‌ج و عومره‌ وه‌رگیراوه‌ ئه‌مساڵ حكومه‌تی هه‌رێمی كوردستان به‌ بڕه‌ پاره‌یه‌كی باش پاڵپشتی پرۆسه‌ی حه‌جی كردووه‌ به‌مه‌به‌ستی كه‌مكردنه‌وه‌ی تێچووی حه‌ج له‌سه‌ر هاووڵاتیان، هاوشێوەی ساڵانی رابردوو.

لە راگەیەندراوەکەدا ئاماژەیان بەوەشکردوە؛ ئه‌مساڵ گه‌شتی وشكانی له‌ هه‌رێمی كوردستان بۆ حەجخوازان نابێت و تەواوی ئەو کەسانەی ناویان هاتوەتەوە بۆ حەج  لە هەرێمی کوردستان بە گەستی ئاسمانی گەشت دەکەن.

سه‌باره‌ت به‌ پێداویستییه‌كانیش بۆ دەستپیکردنەوەی مامەڵەکان،  بەڕێوەبەرایەتییەکە، ئاگاداری ئەو کەسانە دەکاتەوە کە ناویان هاتوەتەوە پێویسته حەوت ملیۆن و 100 هەزار دینار ئاماده‌ بكه‌ن، له‌گه‌ڵ پاسپۆرت و هه‌ریه‌ك له‌ كۆپی ره‌نگاوڕه‌نگی پاسپۆرت و كارتی نیشتیمانی و كارتی زانیاری، کە هەموویان لەیەک لاپەرەدا کۆپی کرابن.

حەج و عومرەی هەرێم هۆشداریشیداوە؛ دوا کات بۆ وەرگرتنی پارە و مامەڵەکانیان رۆژی پێنج شه‌ممه‌یە کە دەکاتە رێکەوتی27-11-2025.