کوردستان
دەستەی گەشتوگوزاری هەرێم ئامادەكاریەكانی بۆ پێشوازیكردن لە هاتنی گەشتیاران بۆ پشووەكانی ساڵی نوێ دەستپێكردووە.
ئیبراهیم مەجید وتەبێژی دەستەی گەشتوگوزاری هەرێم بە كوردسات نیوزی راگەیاند، ساڵی رابردوو بۆ پشووەكانی هاتنی ساڵی نوێ نزیكەی ٢٠٠ هەزار گەشتیار روویان لە هەرێم كرد و بۆ ئەمساڵیش پێشبینیدەكەن ژمارەكە زیاتر بێت.
لە راگەیەندراوێکدا، ئەنجومەنی مامۆستایانی پشدەر رۆژی یەکشەممەیان وەک کاتی بایکۆت دیاریکردوە و چەند داواکارییەکیشیان هەیە.
ئەنجومەنی مامۆستایانی پشدەر ئەمڕۆ هەینی ٦ـی ١٢ـی ٢٠٢٤، راگەیەندراوێکیان بڵاوکردووەتەوە و رایانگەیاندووە: لەسەرەتا و دەستپێکی ساڵی خوێندن بەڕوونی هۆشداریماندا کە لەئەگەری جێبەجێنەکردنی داواکارییە ڕەواکانی مامۆستایان و فەرمانبەران دووبارە و وەک ساڵانی پێشتر و بەگڕوتینێکی زیاترەوە دێینەوە مەیدانی خەباتی مەدەنی و بێ ماندوو بوون و سڵەمینەوە هەر ڕێگایەکی مەدەنی و یاسایی پێویست بێت دەیگرینەبەر.
لە راگەیەندراوەکەشدا هاتووە، "پێشوازی دەکەین لەو بایکۆتە ناچارییەی مامۆستایان دەستیان پێکردوە و لەیەک شەممەی داهاتووشەوە بایکۆتی سەرجەم هۆڵ و ناوەندەکانی خوێندن دەگرێتەوە".
ئەنجومەنی مامۆستایانی پشدەر چەند داواکارییەکیان خستووەتەڕوو کە بریتییە لە؛
١- دەست پێکردنەوەی پلە بەرزکردنەوەی مامۆستایان و فەرمانبەرانی مەدەنی
٢- پێدانی مووچەکانی مانگەکانی دە و یانزە لە نزیکترین کاتدا، هەروەها پێدانی موچەی مانگی دوانزە لەکاتی خۆیدا
٣- بەخێرای جێبەجێکردنی هەنگاوەکانی تەوتین کردنی مووچە لەلایەن بانکەکانی سەر بە حکومەتی فیدڕاڵی.
فەرماندەی گشتی هێزەكانی سوریای دیموكرات رایدەگەیەنێت، دۆخێكی نوێ لە سوریا هاتووەتە ئاراوە و داعش دەستیكردووەتەوە بە هێرشكردن.
مەزڵوم كۆبانێ فەرماندەی گشتی هێزەكانی سوریای دیموكرات "هەسەدە" رایگەیاند، لە حەلەب بەرگری لە دانیشتووانی هەردوو گەڕەكی ئەشرەفیە و شێخ مەقسود دەكەن و پەیوەندییان لەگەڵ "تەحریر شام" هەیە و گفتوگۆ دەكەن، تائێستا بڕیاریان نەداوە دژی ئەو گروپە شەڕ بكەن.
راشیگەیاند، لە ئێستادا ژیانی ٢٥٠ هەزار هاووڵاتی كورد لە حەلەب لە مەترسیدایە، دەشیانەوێت كێشەكانیان لەگەڵ توركیا بە دیالۆگ چارەسەر بكەن.
سەبارەت بە ئاوارەكانی شەهبا مەزڵوم كۆبانێ وتی، بەهاوكاری ئەمریكا توانیوانە تەواوی ئاوارەكانی شەهبا رزگاربكەن، بەڵام داعش لە نزیك كەمپی هۆل هێرشیكردووە و مەترسی لەسەر دانیشتووانەكەی هەیە.
ئاماژەی بەوەشدا، هەماهەنگییان لەگەڵ روسیا و عیراقدا هەیە و داوای لە حكومەتی سووریاش كرد، چارەسەرێكی سیاسی بۆ دۆخی وڵات بدۆزێتەوە.
داهاتی نانەوتی ئەم هەفتەیەی سنووری پارێزگاكانی سلێمانی و هەڵەبجە، زیاتر لە ٨ ملیار ٨٦٣ ملیۆن دینارە و بەراورد بە هەفتەی رابردوو ١٤ ملیار دینار كەمیكردووە.
ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی راپەڕین و گەرمیان دەكات بڵاویكردەوە، داهاتی نانەوتی ئەم هەفتەیە لە رۆژی ٣٠ـی مانگی ١١ـەوە تا ئەمڕۆ، زیاتر لە ٨ ملیار و ٨٦٣ ملیۆن دینار بووە كە لە ٧٢٪ـی نەختینە و ٢٨٪ـی چەك بووە.
باس لەوەشكراوە، داهاتەكە بەراورد بە هەفتەی رابردوو، ١٤ ملیار دینار كەمیكردووە كە لەو هەفتەیەدا داهاتەكە زیاتر لە ٢٣ ملیار دینار بووە.
هاوكات بەپێی ماڵپەری شەفافیەت، داهاتی نانەوتی سنووری پارێزگاكانی سلێمانی و هەڵەبجە لە سەرەتای ئەمساڵەوە تائێستا، زیاتر لە ٨٥٢ ملیار و ٧ ملیۆن دینار بووە، بەراورد بە هەمان ماوەی ساڵی رابردوو لە ٢٧٪ كەمیكردووە.
وەفدێكی ئەنجومەنی راژەی هەرێمی كوردستان لە بەغداد لەگەڵ سەرۆكی دیوانی چاودێری دارایی عیراق كۆبووەوە و تاوتوێی رێكخستنەوەی میلاكات و پلەبەرزكردنەوە و دامەزراندنیان كرد.
فەرمانگەی میدیا و زانیاری بڵاویكردەوە، لە كۆبوونەوەكەدا سیراج بارزانی سەرۆكی ئەنجومەنی راژەی هەرێم لەگەڵ عەمار سوبحی سەرۆكی دیوانی چاودێری دارایی عیراق ئاماژەی بە رێكخستنەوەی میلاكاتی هەرێم كردووە.
دەشڵێت، چاودێری دارایی فیدڕاڵ، پشتگیریی خۆی بۆ جێبەجێكردنی بڕیاری ئەنجومەنی وەزیرانی هەرێم، تایبەت بە پەسەندكردنی میلاكاتی گشتی، وەكو هەنگاوێك بە ئاراستەی ڕێكخستنەوەی میلاكاتی هەرێم دەربڕیوە كە كاریگەریی ڕاستەخۆی دەبێت لەسەر كردنەوەی دەرگای دامەزراندن، هەروەها دووبارە دەستپێكردنەوەی بەرزكردنەوەی پلەی ڕاسپێردراوان بە خزمەتی گشتی، بەپێی یاسای بودجەی.
هەروەها چاودێریی دارایی فیدڕال ئاماژەی بەوەشداوە، بەپێی یاسای ژمارە ٧ی ٢٠١١ی ئەنجومەنی ڕاژەی هەرێم، پێویستە دۆسیەی دامەزراندن لەسەر میلاكی گشتی، هاوشێوەی حكومەتی فیدڕال ئەنجام بدرێت.
وەفدێكی ژوورەكانی بازرگانی شارەكانی هەرێمی كوردستان لەسەر كێشەی كارگەكانی هەرێم و رێگریكردن لە بەرهەمەكانیان لەلایەن بازگەكانی عیراق سەردانی بەغداد دەكات.
گەیلان حاجی سەعید سەرۆكی ژووری بازرگانی و پیشەسازی هەولێر رایگەیاند، سبەینێ وەفدەكە سەردانی بەغداد دەكات بۆ دوو بابەتی سەرەكی كە یەكێكیان بەشداریكردنە لە كۆبوونەوەی ئاسایی خولی یەكێتی ژوورەكانی بازرگانی عێراق.
دەشڵێت، بابەتی دووەم گفتوگۆكردنە لەسەر كێشەی كارگەكانی هەرێمی كوردستان و رێگریكردن لە بەرهەمەكانیان لەلایەن بازگەكانی عیراق و هەوڵ بۆ چارەسەركردنی ئەم كێشەیە دەدەن لەگەڵ سەرۆكی یەكێتی پیشەسازییەكانی عێراق.
وتیشی, لە كۆبوونەوەی یەكێتی ژوورەكانی بازرگانی عیراق ئەم بابەتە دەوروژێنن و كاری جدی لەسەر دەكەن.
لە زانکۆی پۆلیتەکنیکی سلێمانی بەهۆی دروستبوونی شەڕەوە لە كەمپی كۆلێژە تەكنیكییەكان، ژمارەیەك خوێندكار و هاوڵاتیی بریندار بوون، كە برینی هەندێكیان سەختە.
لە كەمپی كۆلێجە تەكنیكییەكانی زانکۆی پۆلیتەکنیکی سلێمانی، شەڕ لە نێوان ژمارەیەك خوێندكار و هاوڵاتیی روویداو بەهۆیەوە چەند كەسێك برینداربوون.
بەگوێرەی زانیارییەكانی كوردسات نیوز، شەڕەكە لەناو حەوشەی كەمپی كۆلێجە تەكنییەكانی چوارچرا لەنێوان دوو خوێندكاری بەشی ژمێریاری روویداوەو یەكێك لەو خوێندكارانە كە دانیشتووی شاری سلێمانییە، برا و خزمەكانی لە شەڕەكە ئاگاداركردووەتەوە.
بە وتەی شایەتحاڵەكانیش كە قسەیان بۆ كوردسات نیوز كرد، دواتر دەمەقاڵێ و شەڕ لەنێوان هەردوولا ڕوویداو ئەوانەی لە دەرەوەی زانكۆ بۆ بەشداری لە شەڕەكە هاتبوون چەكوش و چەقۆیان پێ بووە، لەگەڵ ژمارەیەك خوێندكاری بەشەناوخۆیی شەڕیان كردووە.
راشیانگەیاند، یەكێك لەو خوێندكارانەی بەشە ناوخۆیی، چەكوش بەر سەری كەوتووە و بەهۆیەوە بە سەختی برینداربووە و بەپەلە رەوانەی نەخۆشخانە كراوە.
بەگوێرەی زانیارییەكانی كوردسات نیوز، لەو شەڕەدا، چوار كەس بریندار بوون كە برینی دوانیان سەختە.
بافڵ جەلال تاڵەبانی، سەرۆکی یەکێتیی نیشیمانیی کوردستان بۆ کۆچیدوایی مامۆستا "محەمەدی شەڵماشی" کەسایەتیی نیشتمانپەروەر و زانای ئاینی و پرسەنامەیەکی ئاڕاستەی خانەوادەکەی دەکات و رایگەیاند؛ مامۆستا مەلا محەمەد شەڵماشی زانایاكی پایەبەرز، نووسەرێكی لێهاتوو و وەرگێڕێكی شارەزا بوو. هەوڵ و بەرهەمەكانی بۆ هەمیشە لە یادەوەریماندا دەمێنێتەوە.
دەقی پرسەنامەکە...
کۆچی دوایی مامۆستا مەلا محەمەدی شەڵماشی، زانا و نووسەری دیاری کورد لە دڵەوە نیگەرانیكردین.
بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی كەسوكار و بنەماڵە سەربەرزەكەی دەكەم كە رۆڵێكی كارگەریان لە بزووتنەوەی سیاسی و رووناكبیریی كوردستان گێڕاوە و مایەی شانازیی هەموومانن.
مامۆستا مەلا محەمەد شەڵماشی زانایاكی پایەبەرز، نووسەرێكی لێهاتوو و وەرگێڕێكی شارەزا بوو. هەوڵ و بەرهەمەكانی بۆ هەمیشە لە یادەوەریماندا دەمێنێتەوە و لەیادی ناكەین.
خوای گەورە مامۆستای پایەبەرزمان بە بەهەشتی بەرین شادبکات و سەبووری بەهەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
مەکتەبی سیاسی یەکێتیی نیشیمانیی کوردستان بۆ کۆچیدوایی مامۆستا "محەمەدی شەڵماشی" کەسایەتیی نیشتمانپەروەر و زانای ئاینی و نووسەر و وەرگێر پرسەنامەیەکی ئاڕاستەی خانەوادەکەی دەکات و رایدەگەیەنێت؛ کۆچکردوو بە دەیان بابەت و بەرهەمی بەبڕشت خزمەتێکی گەورەی بە ئاینی ئیسلام و فەرهەنگی کوردی کردوە.
دەقی پرسەنامەکە...
بەڕێزان کەسوکاروخانەوادەی نووسەرو زانای ئاینی مامۆستا ( محەمەدی شەڵماشی)
بۆ كۆچی دوایی مامۆستا ( محەمەدی شەڵماشی) کەسایەتیی نیشتمانپەروەر و زانای ئاینی و نووسەر و وەرگێری بەتوانای گەلەکەمان و برای شەهید مەلا ئاوارە ، لەناخی دڵمانەوە پرسەو ماتەمی خۆمان ئاڕاستەی خانەوادە تێکۆشەرەکەتان دەکەین .
مامۆستای کۆچکردوو بە دەیان بابەت و بەرهەمی بەبڕشت خزمەتێکی گەورەی بە ئاینی ئیسلام و فەرهەنگی کوردی کردوە و بەهۆی هەڵوێستە نیشتمانی و نەتەوەییەکانیەوە دۆستایەتیەکی دێرینی لەگەڵ سەرۆک مام جەلالدا هەبوو .
لەیەزدانی مەزن داواکارین کۆچکردوو بە بەهەشتی بەرین شاد بکات وسەبوری بەهەموو لایەک ببەخشێت.
انا لله وانا الیەراجعون
مەكتەبی سیاسی
یەكێتیی نیشتمانیی كوردستان
ئەندامێکی لیژنەی دارایی ئەنجومەنی نوێنەران رایدەگەیەنێت، بڕیاردراوە نەوتی هەرێم هەناردە بكرێتەوە.
موعین كازمی ئەندامی لیژنەی دارایی ئەنجومەنی نوێنەرانی عیراق بە كوردسات نیوزی راگەیاند، "بۆ دەرهێنانی هەر بەرمیلێك نەوت بڕی ١٦ دۆلار دیاریكراوە، بەڵام ئەمە پێداچوونەوەی تێدا دەكرێت، چونكە پێدەچێت تێچووی دەرهێنانەكە زیاتر بێت لەو بڕە پارەیە".
ئەمڕۆ سودانی لە ئەنجومەنی نوێنەران رایگەیاند، بەهۆی هەناردەنەكردنی نەوتی هەرێم ١٢ ترلیۆن دینار زیان بەر عیراق كەوتووە.
ئاسایشی هەولێر رایدەگەیەنێت، دەرمانخانەیەکیان داخستووە و دوو کەسیشیان دەستگیرکردووە کە هەڵساون بە بازرگانیکردن بە دەرمانی هۆشبەر و فرۆشتن و پێدانی بە کەسانی ئالودەی ماددەی هۆشبەر.
بەڕێوەبەرایەتی ئاسایشی هەولێر لە راگەیەنراوێدا ئاماژەی بەوەکرد، دوای ئەنجامدانی بەدواداچوون لەلایەن تیمەکانیانەوە بەهەماهەنگی لەگەل لێژنەی کوالێتی کۆنتڕۆڵی دەرمان لە وەزارەتی تەندروستی، بە فەرمانی دادوەری لێکۆڵینەوەی ئاسایشی هەولێر دەرمانخانەیەکیان داخست و دوو تۆمەتباریان دەستگیرکردووە، کە هەڵساون بە بازرگانیکردن بە دەرمانی هۆشبەر و کارتێکەرە هۆشییەکان و بەبێ پسوڵەی پزیشک و دوور لە رێنمایە پزیشکییەکان و فرۆشتن و پێدانی بە کەسانی ئالودەی ماددەی هۆشبەر.
راشیگەیاند، لە کاتی پشکنین بۆ دەرمانخانەکە دەرکەوت، ژمارەیەکی زۆر دەرمانی قاچاخ و رێگە پێنەدراوی تەندروستی لە دەرمانخانەکە هەیە و دەستیبەسەردا گیراوە و پاشان رێوشوێنی یاسایی دژی دەگیرێتەبەر.
ماوەی ٤٧ رۆژە موچەخۆرانی هەرێم موچەیان وەرنەگرتووە و دژی دواكەوتنی موچەی مانگی ١٠، بایكۆتی دەوام لە بەشێك لە خوێندنگە و فەرمانگەكانی سنووری پارێزگای سلێمانی بەردەوامە، ئەنجومەنی مامۆستایانی ناڕازی راپەڕینیش بایكۆتی دەوامی راگەیاند.
پەیامنێری كورسات نیوز رایگەیاند، ماوەی چەند رۆژێكە بایكۆتی دەوام لە بەشێك لە خوێندنگە و فەرمانگە و بەڕێوەبەرایەتییەكان سنووری پارێزگای سلێمانی دەستپێكردووە، فەرمانبەران و مامۆستایانیش دەڵێن، "تا موچە دابەشنەكرێت ناچنەوە دەوام".
هاوكات ئەنجومەنی مامۆستایانی ناڕازی راپەڕین لە راگەیەنراوێكدا داوا لە مامۆستایان و فەرمانبەران دەكات، "لە بەرانبەر بێ باكیی دەسەڵات بێدەنگ نەبن و هەڵوێست وەرگرن لە بەرانبەر هەر ٣٠ رۆژ جارێك موچەیەكی شایستە هەیە، چەند رۆژ مووچە دواكەوت ئەوەندە بایكۆت بكەن، چونكە ئەرك بەرانبەر مافە".
ماوەی چەند رۆژێكە بەغداد ٧٦١ ملیار دیناری بۆ موچەی مانگی ١٠ خستووەتە سەر هەژماری بانكی وەزارەتی دارایی هەرێم، بەڵام بەهۆی ئەوەی ٢٣٥ ملیار دینار كورتهێنانی هەیە، تائێستا وەزارەتی دارایی هەرێم ئەو پارەیەی وەرنەگرتووە بۆ ئەوەی موچەی مانگی ١٠ـی پێبدرێت، ناشزانرێت كەی موچەی مانگی ١٠ دابەشدەكرێت.
ئەمڕۆ ڕێوڕەسمی کۆتایی هاتنی خولی یەکی مەشق و ڕاهێنانی بنەڕەتی لە لیوای ٧١٣ بەڕێوەچوو و تیایدا ۱۰۱ پێشمەرگەی بەشداربوو لە خولەکە بۆ ماوەی مانگێک مەشق و ڕاهێنانیان پێکرا و وانە سەربازیەکانیان وەرگرت.
لەم خولەدا ١٠١ پێشمەرگە ئاشنا کران بە دسپلین و بنەما بنەڕەتیەکانی سەربازی و چۆنێتی بەکارهێنانی چەک بەشێوەیەکی دروست، جگە لە چەندین مەشق و ڕاهێنانی جەستەیی و وانەی سەربازی دیکە.
لەوبارەیەوە عەمیدی مافپەروەر "یاسین مەولود عەوڵا" فەرماندەی لیوای ٧١٣ هەوڵ و ماندوبوونی مامۆستایان و ڕاهێنەران و ئەفسەران و سەرپەرشتیارانی خولەکەی بەرز نرخاند و دەست خۆشی لێکردن لەپای بەڕێوەبردنی خولەکە بەشێوەیەکی سەرکەوتوو، هەروەها پیرۆزبایی لە پێشمەرگە بەشداربووەکانی خولەکە کرد کە توانیان سەرکەوتوانە تەواوی قۆناغەکانی خولەکە ببڕن و هیوای سەرکەوتنی زیاتری بۆخواستن.
لە بەشێکی تری ڕێوڕەسمەکەدا خەڵات بەخشرایە ڕاهێنەر و مامۆستا و سەرپەرشتیارانی خولەکە و بڕوانامەی سەرکەوتن بەخشرایە تەواوی بەشداربووانی خولەکە، دواتر بە چەند چالاکی و نمایشێکی سەربازی کۆتایی بەڕێوڕەسمەکە هات.
قوباد تاڵەبانی جێگری سەرۆکوەزیرانی هەرێم لەگەڵ عەبدوڵا مەتەر ئەلمەزروعی باڵیۆزی نوێی ئیمارات لە عێراق کۆبووەوە و باسیان لە پەیوەندییە بازرگانییەکانی نێوان هەردوولا و کارئاسانی بۆ بازرگانان کرد.
کۆبوونەوەکە لە هەولێر بەڕێوەچوو و قوباد تاڵەبانی پیرۆزبایی دەستبەکاربوونی لە باڵیۆزی نوێی ئیمارات کرد و هیوای خواست لە ماوەی ئەرکەکەیدا پەیوەندییەکانی نێوان هەرێمی کوردستان و وڵاتی ئیمارات لە هەموو بوارەکاندا گەشەی زیاتر بەخۆیەوە ببێنێت.
هەر لەم چوارچێوەیەدا ستایشی رۆڵی باڵیۆزخانەی ئیمارات و کونسوڵخانەی ئەو وڵاتەی کرد لە هەرێم کە لە ماوەکانی رابردوودا رۆڵی بەرچاویان بینیوە لە پێشخستنی پەیوەندییەکانی نێوان هەردوولا لە بوارە جیاوازەکاندا.
لە تەوەرێکی کۆبوونەوەکەدا گفتوگۆکرا لەبارەی چۆنییەتی پەرەپێدانی پەیوەندییە بازرگانییەکان. لەمبارەیەوە جێگری سەرۆکوەزیران ئاماژەی بەوەدا لە هەرێمی کوردستان دەرفەتی زۆر گەورە بە تایبەت لە بوارەکانی وەبەرهێنان لە کەرتەکانی کشتوکاڵ و گەشتوگوزار و گەشتوکاڵ هەیە کە لە بەرژەوەندی هەردوو لادایە حکومەتی ئیمارات هانی وەبەرهێنەران و بازرگانەکانی وڵاتەکەی بدات لە هەرێمی کوردستان وەبەرهێنان بکەن.
قوباد تاڵەبانی داواشیکرد باڵیۆزخانەی ئیمارات کارئاسانی زیاتر پێشكەشی بازرگانانی هەرێمی کوردستان بکات و لەمبارەیەشەوە باڵیۆزی ئیمارات ئامادەیی خۆی دەربڕی هەموو جۆرە کارئاسانییەک بۆ بازرگانانی هەرێم بکات تا بۆ پەرەپێدانی پەیوەندییە بازرگانییەکان سەردانی ئەو وڵاتە بکەن.
لە بەشێکی دیکەی کۆبوونەوەکەدا جێگری سەرۆکوەزیران هەوڵەکانی بۆ هەمەجۆرکردنی ئابوری و گەشەپێدانی کەرتەکانی کشتوکاڵ و گەشتوگوزار و پشتگیریکردنی گەنجانی کارساز و داهێنەر و هەنگاوەکانی بە ئەلیکترۆنی کردنی دامەزراوەکانی حکومەت بۆ باڵیۆزی ئیمارات روون کردەوە و ئاماژەی بەوەشدا لەم بوارانەدا دەکرێت سود لە ئەزمونی سەرکەوتووی وڵاتی ئیمارات وەربگیرێت و داواشیکرد حکومەتی ئیمارات لەمبارەیەوە هاوکاری هەرێمی کوردستان بکات.
هاوكاریی هێزەكانی هاوپەیمانان بۆ مانگی ١١ـی هێزی پێشمەرگە خرایە سەر هەژماری بانکی وەزارەتەکە و بڕیارە یەکشەممەی داهاتوو دەست بە دابەشکردنی بکرێت.
فەرمانگەی میدیا و زانیاری حکومەتی هەرێم بڵاویکردەوە، دوای ئەوەی هاوکاریی هێزەکانی هاوپەیمانان بۆ هێزی پێشمەرگە خرایە سەر هەژماری وەزارەتی پێشمەرگە، بەڕێوەبەرایەتیی گشتیی بودجە و بەرنامەکان (ژمێریاریی سەربازی)، رێکارە دارایی و ژمێریارییەکانی ئەنجام داون.
ئاماژەی بەوەشکرد، بۆ ئەو مەبەستە رۆژی یەکشەممە، ٨ـی کانوونی یەکەمی ٢٠٢٤، هاوکاریی مانگی ١١ دابەشدەکرێت.
بافڵ جەلال تاڵەبانی سەرۆکی یەکێتیی نیشتمانیی کوردستان، پرسەنامەیەک ئاڕاستەی جەمال یوسف لێپرسراوی مەڵبەندی رێکخستنی بادینان دەکات.
دەقی پرسەنامەکە
بەڕێز هەڤاڵ جەمال یوسف، لێپرسراوی مەڵبەندی رێکخستنی بادینان
بەداخێكی زۆرەوە هەواڵی کۆچی دوایی (بایز کەمال یوسف بۆتانی) برازای بەڕێزتانم پێگەیشت.
بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوە و بنەماڵە تێكۆشەرەكەتان دەكەم كە هەمیشە لە ریزی پێشەوەی خەبات و تێكۆشانبوون لەپێناو كوردستان.
لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان