دەزگای ئاسایشی هەرێم باندێکی بەقاچاغ هێنانە ناوەوەی هاووڵاتیانی بیانی بۆ هەرێم دەستگیرکرد، کە 14 کۆچبەریان لەناو بارهەڵگرێکدا شاردبووەوە.

دەزگای ئاسایشی هەرێم رایگەیاند، بەرێوەبەرایەتی لێکۆڵینەوەی دەزگای ئاسایش، بەهەماهەنگی بەرێوەبەرایەتی ئاسایشی بازگەکان ، توانیان بازگانێکی هێنانی کۆچبەری نایاسایی و شەش تۆمەتباری هاوکاریکردنی دەستگیربکەن.

ئاماژەی بەوەشکرد، دوای بەدواداچوون و چاودێری ورد و کۆکردنەوەی زانیاری لەسەر باندێکی بەقاچاغ هێنانە ناوەوەی هاووڵاتی بیانی بۆ هەرێمی کوردستان، شەوی 14ـی8ـی2025 بازرگانێکی هێنانی کۆچبەری نایاسایی و شەش تۆمەتباری هاوکاری دەستگیرکران.

دەزگای ئاسایشی هەرێم راشیگەیاندووە، لەچالاکییەکەدا 14 هاووڵاتی کۆچبەری نایاسایی لەکاتی هێنانیان بۆ هەرێمی کوردستان دەستگیرکران کە لەناو بارهەڵگرێکدا شاردرابوونەوە.

ئەوەشی خستەڕوو، لەئێستادا تۆمەتباران بەپێی مادەی 39 لەیاسای مانەوە راگیراون و لێکۆڵینەوە لەدۆسیەکانیان بەردەوامە.

بۆ بینینی چالاکییەکەی دەزگای ئاسایشی هەرێم کلیک لێرە بکە...

 

ئەنجومەنی وەزیرانی هەرێم داوا لە حکومەتی عیراق دەکات، پێشنیازی حکومەتی هەرێم بکاتە بنەما بۆ یەکلاییکردنەوەی بابەتی داهاتە نانەوتییەکان.

ئەمڕۆ ئەنجومەنی وەزیرانی هەرێمی کوردستان کۆبوونەوەی ئەنجامدا و داوا دەکات یاسا فیدراڵییەکان و بڕیاری دادگای فیدراڵی بکرێتە بنەما بۆ بابەتی داهاتی نانەوتییەکان، تا چیتر نەبێتە ئاستەنگی بەردەم خەرجکردنی موچە و شایستەی دارایی موچەخۆرانی هەرێم.

ئەنجومەنی وەزیرانی هەرێم لەدوای کۆبوونەوەکە راگەیەنراوێکی بڵاوکردەوە و رایگەیاندووە، پێشنیازی هەرێم سەبارەت بە پۆلێنکردنی داهاتی نانەوتی و شێوازی هاوبەشی پێکردنی لەگەڵ حکومەتی فیدڕاڵ پشتبەست بە هەردوو یاسای فیدراڵیی بەڕێوەبردنی دارایی ژمارە 6ی ساڵی 2019 و یاسای بودجەی فیدراڵ ژمارە 13 ساڵی 2023 و بڕیاری دادگای باڵای فیدراڵی کە بە ڕوونی چوارچێوەی یاسایی ئەم بابەتەیان دیاریکردووە.

ئاماژەی بەوەشکردووە، ئەنجومەنی وەزیران، داوا لە حکومەتی فیدراڵ دەکات پێشنیازی حکومەتی هەرێم بکاتە بنەما بۆ یەکلاییکردنەوەی بابەتی داهاتە نانەوتییەکان کە پشتبەستە بە یاسا فیدڕاڵییەکان و بڕیاری دادگای فیدڕاڵی، تا چیدی نەبێتە ئاستەنگی بەردەم خەرجکردنی موچە و شایستەی دارایی موچەخۆرانی هەرێم، لەکاتێکدا حکومەتی هەرێم داوای شایستەکانی خۆی بەگوێرەی یاسا دەکات ئەمەش وا دەخوازێت حکومەتی فیدراڵ، پێشنیاز و تێڕوانینى یاسایی حکومەتی هەرێم لەمبارەیەوە قبوڵ بکات.

لە راگەیەنراوەکەدا هاتووە، سەبارەت بەهەناردەکردنەوەی نەوتی هەرێمیش، وەزیری سامانە سروشتییەکان بە وەکالەت، هەموو ئەو هەنگاو و رێکار و ئاسانکارییانەی وەزارەتەکەی خستەڕوو کە لەپێناو دەستپێکردنەوەی هەناردەی نەوتی هەرێم ئەنجامیان داوە و بەردەوامیشە لە هەوڵەکانی خۆی لەگەڵ وەزارەتی نەوتی عیراق و کۆمپانیا نەوتییەکان بۆ گەیشتن بە رێککەوتنێکی هاوبەش و هاوسەنگی سێ لایەنە کە لە بەرژەوەنديی گشتی بێت، بە ئاراستەی هەرچی زوو دەستپێکردنەوەی هەناردەی نەوت بۆ بازاڕە جیهانییەکان لە رێگەی کۆمپانیای سۆمۆ و گەڕانەوەی داهاتەکەی بۆ گەنجینەی فیدڕاڵی، بۆ ئەم مەبەستەش وەزارەتی سامانە سروشتيیەکان راسپێردراوە بۆ چڕکردنەوەی هەوڵەکان لەگەڵ کۆمپانیا نەوتییەکان بۆ یەکلاییکردنەوەی بابەتە هەڵپەسێردراوەکان و لابردنی هەر بەربەست و ئاستەنگێک.

ئەنجومەنی وەزیران راشیگەیاندووە، بڕیاریدا ئاسانکاریی پێویست بۆ ئەو هاووڵاتییانەی کە پێشتر سوودمەند بوون لە پێشینە و قەرزەکانی بانکەکانی سەر بە وەزارەتی دارایی بکات، ئەویش بە لێخۆشبوون بە رێژەی 15٪ ی بڕی ئەو پێشینە و قەرزانە، سەرەڕای لێخۆشبوون لە تەواوی سوودی بانکی و پێبژاردنی دواکەوتنی دانەوەی قەرزەکان، ئەم ئاسانکارییەش تا 31-12-2025  بەرکار دەبێت بۆ ئەو هاووڵاتیيانەی دەیانەوێت سوود لەم دەرفەتە وەربگرن.

بۆ دەربڕینی پشتیوانی لەکارە هونەرییەکان، شاناز ئیبراهیم ئەحمەد خانمی یەکەمی عیراق ئامادەی یەکەم نمایشی فیلمی سینەمایی (زەوی سەخت و ئاسمانی دوور) بوو کەلەهۆڵی سینەما سالم لەشاری سلێمانی نمایشکرا. 

ئەو فیلمەی کە هەوراز محەمەد کاری دەرهێنانی بۆ کردبوو، رووناکی دەخستەسەر وردەکاری ژیانی ئەو کەسانەی کاریگەریی جەنگ لەسەر باری دەروونی و کۆمەڵایەتی و ژیانیان بە گشتی دەرکەوتبوو، بەتایبەت بەهۆی جەنگی چەندین ساڵە و توندوتیژییەوە کە رەنگە ماڵ نەبێت لە عێراقدا کە شەهید و بریندار و بێ سەرو شوێن و بەدیل گیراوی نەبووبێت و رووبەرووی ئەم نەهامەتیانە نەبووبێتەوە. 

دوای نمایشەکە خانمی یەکەمی عیراق چەپکەگوڵی پیرۆزبایی پێشکەشی دەرهێنەری فیلمەکە کرد و هیوای سەرکەوتنی بۆ ستافەکەش خواست.

قوباد تاڵەبانی، جێگری سەرۆک وەزیرانی هەرێم پێشوازیکرد لە وەفدێکی باڵای ئیمارات بە سەرۆکایەتیی سەعید الهاجری، نێردەی تایبەتی وەزیری دەرەوەی ئەو وڵاتە بۆ کاروباری ئابوری و لە کۆبوونەوەی نێوانیاندا گفتوگۆ لەبارەی چۆنییەتی بەهێزترکردنی پەیوەندیی بازرگانی نێوان هەردوولا و دەرفەتەکانی وەبەرهێنان لە هەرێمی کوردستان کرا.

لە کۆبوونەوەکەدا کە ئەمڕۆ لە هەولێر بەڕێوەچوو، جێگری سەرۆک وەزیرانی هەرێم رایگەیاند، حکومەتی هەرێمی کوردستان بە گرنگییەکی تایبەتەوە دەڕوانێتە پەیوەندییەکانی لەگەڵ ئیمارات و  خوازیارە کۆمپانیا و وەبەرهێنەرانی ئیماراتی بەشدارییەکی گەورەیان هەبێت لە پرۆسەی گەشەپێدانی کوردستان.

وەفدە ئیماراتییەکە کە بە مەبەستی دۆزینەوە و هەڵسەنگاندنی دەرفەتەکانی وەبەرهێنان سەردانی کوردستانیان کردوە، رایانگەیاند ئامانجیانە پڕۆژەی گەورە و درێژخایەنی وەبەرهێنان لە هەرێمی کوردستاندا جێبەجێ بکەن.

لە کۆبوونەوەکەدا جێگری سەرۆک وەزیرانی هەرێم روونی کردەوە کە لە هەرێمی کوردستان بە تایبەت لە بوارەکانی کشتوکاڵ و گەشتوکاڵ و گەشتوگوزار و وزەی نوێبووەوەدا دەرفەتی گەورە هەیە بۆ وەبەرهێنەرانی ئیماراتی و ئاماژەی بەوەشکرد، کوردستان دەتوانێت ببێتە سەبەتەی خۆراکی هەموو عیراق و تەنانەت بەرهەمە کشتوکاڵییەکانی رەوانەی بازاڕەکانی دەرەوەش بکات.

هەر لەم چوارچێوەیەدا قوباد تاڵەبانی داوایکرد وەفدەکە هانی وەبەرهێنەرەکانی وڵاتەکەیان بدەن لەم بوارانەدا وەبەرهێنان لە کوردستاندا بکەن، چونکە جگە لەوەی حکومەتی هەرێم هەموو جۆرە کارئاسانییەکیان بۆ دەکات، هەرێمی کوردستان خاوەنی هێزی کاری شارەزاشە لەم بوارانەدا.

بڕیارە ئەمڕۆ چوارشەممە، ئەنجومەنی وەزیرانی هەرێمی کوردستان کۆبوونەوەی ئاسایی خۆی ئەنجام بدات و تێیدا گفتوگۆ لەسەر چەند پرسێکی گرنگی ئابووری و یاسایی بكات

بەپێی کارنامەی کۆبوونەوەکە، یەکێک لە تەوەرە سەرەکییەکان تاوتوێکردنی دواپێشهاتەکانی دۆسیەی داهاتە نانەوتییەکان و هەوڵەکان بۆ دەستپێکردنەوەی هەناردەی نەوتی هەرێمی کوردستان دەبێت. لەم چوارچێوەیەدا، بڕیارەکانی کۆبوونەوەی رۆژی 9ی ئەیلوولی ئەنجومەنی وەزیرانی عیراقی فیدڕاڵ دەخرێنەڕوو.

هەروەها، لە بەشێکی دیکەی کۆبوونەوەکەدا، کۆنووسی هاوبەشی وەزارەت و لایەنە پەیوەندیدارەکان سەبارەت بە پێشنیازەکانیان بۆ جێبەجێکردنی یاسای راژە و خانەنشینیی پێشمەرگە، ژمارە (38)ی ساڵی 2007، تاوتوێ دەکرێت.

تەوەرێکی دیکەی گرنگی کۆبوونەوەکە بریتی دەبێت لە خستنەڕووی ڕاسپاردەکانی وەزارەتی دارایی و ئابووری سەبارەت بە پێشکەشکردنی ئاسانکاری بۆ ئەو پێشینە و قەرزانەی کە تایبەتن بە بوژاندنەوەی کەرتەکانی خانووبەرە، کشتوکاڵ، پیشەسازی، نیشتەجێبوون و گەشتیاری.

لەکۆتاییدا، وەک هەنگاوێک لە چوارچێوەی پرۆسەی یەکخستنەوەی ڕێکارە داراییەکان لەگەڵ حکومەتی فیدڕاڵی، وەزارەتی دارایی چەند پێشنیاز و ڕاسپاردەیەک بۆ یەکخستنی ڕێکار و ڕێنماییەکانی باج و ڕێژەکانیان لەنێوان دامەزراوەکانی هەردوو حکومەتدا دەخاتەڕوو.

د. عادل باخەوان: هێرشەکەی ئیسرائیل بۆ سەر دەوحە رۆژهەڵاتی ناوەڕاست بەرەو هەڵوەشاندنەوە دەبات؛ یەکخستنی هێزی پێشمەرگە پێویستییەکی بەپەلەیە

د. عادل باخەوان، شرۆڤەکار و توێژەری سیاسی، لە بەرنامەی "پانۆراما لەگەڵ زانا حەسەن؛ تیشکی خستە سەر چەندین پرسی گرنگی ناوچەیی و ناوخۆیی، بە تایبەت لەبارەی کاریگەرییەکانی هێرشەکەی ئیسرائیل بۆ سەر دەوحە و دۆخی سیاسی و ئابووری هەرێمی کوردستان.

د. باخەوان رایگەیاند، "هێرشەکەی ئیسرائیل بۆ سەر دەوحە نزیكمان دەکاتەوە لە هەڵوەشاندنەوەی رۆژهەڵاتی ناوەڕاست." ناوبراو پێی وایە "هەڵوەشاندنەوەی سنوورەکانی رۆژهەڵاتی ناوەڕاست لە بەرژەوەندی پرسی کوردە."

رەوشی سیاسی و ئابووری هەرێمی کوردستان:

سەبارەت بە رەوشی ناوخۆیی هەرێمی کوردستان، د. باخەوان نیگەرانی خۆی دەربڕی و ئاماژەی بەوەدا کە "نزیکەی ساڵێکە هەڵبژاردن کراوە و حکومەتی هەرێم پێکنەهێنراوە." هاوکات جەختی لەسەر ئەوە کردەوە کە "رەوشی ئابووری هەرێم باش نییە."

ئەم توێژەرە سیاسییە داوای کرد "دەبێت هەرێم لەو قەیران و شەڕانە بپارێزرێت کە روبەڕوی ناوچەکە بووەتەوە." ئەو پێی وایە "کۆمەڵی نێودەوڵەتی گوشار دەکات بۆ پێکهێنانی حکومەتی هەرێم" و "پێکهێنانی حکومەتی هەرێم بۆ هەر چوار پارچەی کوردستان گرنگە."

یەکڕیزی و ئۆپۆزیسیۆن:

لەبارەی یەکڕیزی لایەنەکان، د. باخەوان جەختی لەسەر گرنگیی "یەکێتی و پارتی" کردەوە کە "لە قۆناغی ئێستادا حکومەتێکی بەهێزی یەکگرتوو دروست بکەن." هەروەها داوای کرد "گرنگە ئۆپۆزیسیۆنێکی بەهێز لە پەرلەمانی کوردستان هەبێت."

مەترسییەکانی ناوچەکە و کاریگەرییان لەسەر هەرێم:

د. باخەوان ئاماژەی بەوەدا کە "روداوەکانی ناوچەکە کاریگەرییان لەسەر هەرێم هەیە." ئەو هۆشداریدا کە "ئەگەر شەڕی نێوان ئێران و ئیسرائیل سەرهەڵبداتەوە، لە جەنگی 12 رۆژە مەترسیدارتر دەبێت." هەروەها "کشانەوەی ئەمریکا لە عیراق"ـی بە "مەترسییەکی تر" ناوبرد "کە روبەڕوی هەرێم دەبێتەوە."

لە کۆتاییدا، د. عادل باخەوان پێداگری لەسەر ئەوە کرد کە "یەکخستنەوەی هێزی پێشمەرگە بووەتە پێویستی."

وەزارەتی پەروەردەی حکومەتی هەرێمی کوردستان، ئەنجامی تاقیکردنەوەکانی خولی دووەمی پۆلی 12ی ئامادەیی بۆ ساڵی خوێندنی 2024-2025 راگەیاند. و تیایدا هاتووە؛ قوتابیان و خوێندکاران دەتوانن لە ئێستادا ئەنجامەکانیان لە رێگەی ئەپڵیکەیشنی ئی هەڵسەنگاندن (e-halsangandn)ـەوە وەربگرنەوە، کە لەسەر هەردوو سیستەمی کارپێکردنی ئەندرۆید (Android) و ئای ئۆ ئێس (IOS) بەردەستە.

لیژنەی باڵای تاقیکردنەوەکان لە وەزارەتی پەروەردە، داوا لە قوتابیان دەکات کار لەسەر دواین ڤێرژنی ئەپدەیتکراوی ئەپڵیکەیشنەکە بکەن.

ماوەی ناڕەزایەتی (پەڵپ):

وەزارەتی پەروەردە ئاماژەی بەوەدا کە ماوەی پێشکەشکردنی ناڕەزایەتی (پەڵپ) لە رۆژی چوارشەممە، رێکەوتی 10ی 9ی 2025 دەستپێدەکات و تاوەکو رۆژی دووشەممە، رێکەوتی 15ی 9ی 2025 بەردەوام دەبێت. وەزارەت دڵنیایی داوەتە قوتابیان و خوێندکاران کە بە وردی کار لەسەر سەرجەم ناڕەزایەتییەکان دەکەن.

بینینی فۆرمی وەڵام (سۆما):

دوای راگەیاندنی ئەنجامەکان، قوتابیان دەتوانن لە پاش کاتژمێر 11ی شەو، لە رێگەی ئەم لینکەی خوارەوەوە فۆرمی وەڵام (سۆما)ی سەرجەم ئەو بابەتانەی تاقیکردنەوەی تێدا ئەنجام داوە ببینن:
https://soma.azmwnakan.com

ئەم راگەیاندنە لەلایەن وەزارەتی پەروەردە و لیژنەی باڵای تاقیکردنەوەکانەوە بڵاوکراوەتەوە.

کۆبوونەوەی ئەنجومەنی وەزیرانی عیراق کۆتایی هات، هەولێر و بەغداد لەسەر پرسی نەوت گەیشتونەتە رێککەوتن بەڵام لەسەر پرسی داهاتی ناوخۆ خاڵی ناکۆکیان هەبووە. 

پەیامنێری کوردسات نیوز لەبەغداد رایگەیاند، چەند خاڵێکی ناکۆک لەنێوان هەولێر و بەغداد هەبووە و لەمبارەیەوە بڕیاردراوە ئەو پرسە رەوانەی ئەنجومەنی دەوڵەت بکرێت.

وتیشی، حکومەتی هەرێمی کوردستان داوایی کردووە پرسی داهاتی ناوخۆی هەرێم ببرێتە دادگای فیدراڵی یەکلای بکرێتەوە.

سەبارەت بە پرسی هەناردەکردنەوەی نەوت، بڕیاردراوە رۆژانە 50 هەزار بەرمیل بۆ ناوخۆیی بەکاربهێندرێت و ئەوەی کە دەمێنێتەوە رادەستی حکومەتی عیراق بکات.

بەپێی پێشبینییەکانی کەشناسی، پلەکانی گەرما 1 بۆ 2 پلە نزمتر دەبنەوە و ئەگەری دروستبوونی خۆڵبارینێکی کەم هەیە .

بەڕێوەبەرایەتی کەشناسی هەرێم پێشبینییەکانی بۆ 48 کاتژمێری داهاتوو بڵاوکردەوە و رایگەیاندووە، ئەمڕۆ ئاسمان ساماڵ دەبێت و ئەگەری دروستبوونی تۆزێکی کەم هەیە لە ناوچەکانی ناوەڕاست و باشوری هەرێم، لە درەنگانی شەودا.

ئاماژەی بەوەشکردووە، سبەینێ چوارشەممە، پلەکانی گەرما (1-2) پلەى سیلیزى نزم دەبێتەوە بەراورد بە تۆمارکراوەکانی ئەمڕۆ.

 

 

بەرزترین پلەکانی گەرمای پێشبینیکراو:

هەولێر : 38 پلەی سیلیزی

سلێمانی : 37 پلەی سیلیزی

دهۆک : 37 پلەی سیلیزی

کەرکوک : 42 پلەی سیلیزی

زاخۆ : 38 پلەی سیلیزی

هەڵەبجە : 36 پلەی سیلیزی

سۆران : 37 پلەی سیلیزی

حاجی ئۆمەران : 27 پلەی سیلیزی

گەرمیان 42 پلەی سیلیزی

وەزارەتی دارایی هەرێم لیستی موچەی مانگی هەشت رادەستی حکومەتی فیدراڵ کرد.

وەزارەتی دارایی و ئابوری حکومەتی هەرێم لە راگەیەنراوێکدا بڵاویکردەوە، ئەمڕۆ لیستی موچەی مانگی هەشتی فەرمانبەران و موچەخۆرانی هەرێم رادەستی حکومەتی فیدراڵ کرا.

ئاماژەی بەوەشکردووە، لیستەکە لەلایەن تیمی تەکنیکی و وەزارەتی دارایی و ئابوری حکومەتی هەرێمە رادەستی فەرمانگەی ژمێریاری وەزارەتی دارایی حکومەتی فیدراڵ کراوە.

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە حاکم قادر حەمەجان کرد و رایگەیاند، یەکێتی سوود لە ئەزموونی ئەو هەڤاڵانەی وەردەگرێت کە بەشێک بوون لە خەباتی شۆڕشی نوێ و قوربانییان بۆ گەلەکەمان داوە.

لە دیدارێکدا بافڵ جەلال تاڵەبانی، ستایشی حاکم قادر حەمەجانی کرد کە بەشێکی گرنگە لە مێژووی پڕ شانازی یەکێتیی نیشتمانیی کوردستان و خزمەتەکانی بۆ کوردستان جێگەی رێز و پێزانینە، هەروەها وتی، ئەمڕۆش یەکێتی سوود لە ئەزموون و خزمەتەکانی هەموو ئەو هەڤاڵانەی وەردەگرێت کە بەشێک بوون لە خەباتی شۆڕشی نوێ و قوربانییان بۆ گەلەکەمان داوە.

لای خۆیەوە، حاکم قادر حەمەجان جەختی کردەوە کە لەسەر هەمان رێبازی سەرۆک مام جەلال درێژە بە خەبات دەدات و هەر کار و هەنگاوێک لە خزمەتی بەرژەوەندی گشتی و یەکێتیدا بێت وەک هەمیشە بە دڵسۆزییەوە رایدەپەڕێنێت.

بافڵ جەلال تاڵەبانی، سەرۆکی یەکێتیی نیشتمانیی کوردستان لە سلێمانی سەردانی حامید حاجی غالی کرد و رایگەیاند، "ئێمە بە شوێن هەنگاوەکانی سەرکردە و تێکۆشەرە دێرینەکانماندا دەڕۆین".

لە دیدارێکدا کە پۆلو شاڵاو عەلی عەسکەری، لێپرسراوی هەواڵگریی هێزەکانی 70ـی پێشمەرگە ئامادەیبوو، بافڵ جەلال تاڵەبانی بە پێزانینەوە باسی لە رۆڵ و مێژووی پڕ شانازی حامید حاجی غالی کرد، وەک یەکێک لە پێشمەرگە سەرەتاییەکانی شۆڕشی نوێ و سەرکردەیەکی دیاری یەکێتیی نیشتمانیی کوردستان و وتی، "ئێمە بە شوێن هەنگاوەکانی سەرکردە و تێکۆشەرە دێرینەکانماندا دەڕۆین و وەفاداریشین بەرانبەر ئەو قوربانییە گەورانەی لەپێناو گەلەکەمان داویانە".

لای خۆیەوە، حامید حاجی غالی سوپاسی بافڵ جەلال تاڵەبانی کرد و جەختی لە درێژەپێدانی سیاسەتی سەرۆک مام جەلال بە سەرۆکایەتیی سەرۆک بافڵ کردەوە.

جێگری سەرۆک وەزیرانی هەرێم دەڵێت، "لەگەڵ وەفدی ژووری بازرگانیی ئەمریکا بە سەرۆکایەتیی ستیڤ لۆتس، جێگری سەرۆکی ژووری بازرگانیی ئەمریکا و بە ئامادەبوونی ئەنجومەنی ئابووریی ئەمریکا _ عیراق، گفتوگۆمان کرد لەبارەی چۆنییەتی سوودوەرگرتن لە تەکنەلۆژیای نوێ و زیرەکیی دەستکرد لە پرۆسەی گەشەپێدانی ئابووریی کوردستان".

قوباد تاڵەبانی جێگری سەرۆک وەزیرانی هەرێم سەبارەت بە دیدارەکە رایگەیاند، "باسمان لە هەوڵەکانمان کرد لە پەرەپێدانی تواناکانی گەنجانی کوردستان لە بوارەکانی تەکنەلۆژیا و کارسازیدا، چونکە ئەم گەنجە بەهرەمەند و داهێنەرانەن کە دەتوانن ڕۆڵ ببینن لە بەکارهێنانی تەکنەلۆژیای نوێ و زیرەکیی دەستکرد لە پرۆسەی گەشەپێدانی کوردستان و هەروەها لە رێگەی تواناکانیان لە بواری تەکنەلۆژیادا بەشداردەبن لە بەهێزکردنی پەیوەندیی بازرگانی نێوان ئەمریکا و کوردستان".

ئاماژەی بەوەشدا، بەهێزترکردنی پەیوەندیی بازرگانی نێوان کوردستان و ئەمریکا یارمەتیدەر دەبێت لە گەیشتن بە ئامانجەکەیان کە دەیانەوێت لە داهاتوودا هەرێمی کوردستان وەک ناوەندێکی گرنگی ئابووری و هەروەها وەک ناوەندێکی گرنگی تەکنەلۆژیا لە ناوچەکەدا دەربکەوێت.

جێگری سەرۆک وەزیرانی هەرێم وتیشی، "زۆر دڵخۆش بووین بە سەردانی ئەم وەفدە بازرگانییەی ئەمریکا و بە دڵنیاییەوە لە کوردستان دەرفەتی زۆر گەورە هەیە کە ببێتە هاوبەشێکی گرنگی بازرگانیی ئەمریکا لە ناوچەکەدا".

بافڵ جەلال تاڵەبانی، سەرۆکی یەکێتیی نیشتمانیی کوردستان سەردانی مەحمود سەنگاوی کرد.

لەو سەردانەدا عەدنان حەمەی مینا و پۆلو شاڵاو عەلی عەسکەری، لێپرسراوی هەواڵگریی هێزەکانی 70ـی پێشمەرگە ئامادەیبوون.

بافڵ جەلال تاڵەبانی پرسە و سەرەخۆشی لە مەحمود سەنگاوی کرد، بەبۆنەی کۆچی دوایی (کەریم حاجی حەمەئەمین سەنگاوی) برای و ستایشی خانەوادە و بنەماڵە سەربەرزەکەیانی کرد کە نموونەیەکی باڵان لە خەبات و تێکۆشانی کوردایەتیدا و هیوای خواست ئەمە دوایین ماتەمیان بێت و خوای گەورە سەبووری و ئارامییان پێببەخشێت.