کوردستان
وەزارەتی خوێندنی باڵا ئاگاداری سێ یەکەمەکان و خاوەن بڕوانامە باڵاکانی دەرەوەی ئیدارەی هەرێم دەکاتەوە، لەمڕۆوە سەردانی تۆماری زانکۆکانیان بکەن.
وەزارەتی خوێندنی باڵا و توێژینەوەی زانستیی هەرێم رایگەیاندووە، لەمڕۆوە سێ یەکەمەکان و خاوەن بڕوانامە باڵاکانى ناوچەکانی دەرەوەى هەرێم، دەتوانن سەردانى تۆمارى زانکۆکان بکەن بۆ وردەکاریى لەبارەى پێشکەشکردنى فۆڕمی زانیارییەکانیان.
ئاماژەی بەوەشکردووە، فۆڕمی زانیارییەکان بۆ سێ یەکەمەکان و هەڵگرانی بڕوانامە باڵاکانى زانکۆکانى هەرێمە کە دانیشتوی پارێزگاکانى دەرەوەی ئیدارەی هەرێمن؛ بۆ ئەوەی لەسەر میلاکی حکومەتی فیدراڵی دابمەزرێنرێن.
ئەوەشی خستووەتە روو، لینکى ناردنى داتاکانى ئەنجومەنى راژەى گشتى فیدڕاڵى لەلایەن وەزارەتەوە ئاراستەى سەرجەم تۆمارى گشتى زانکۆکان کراوە.
ئەوەش هاتووە، دوای پڕکردنەوەی فۆڕمەکان داتاکان بۆ ئەنجوەنی راژەی گشتیی فیدڕاڵی دەنێردرێتەوە.
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکردووە، پلەکانی گەرما زیاتر نزم دەبنەوە و خۆڵ دەبارێت.
کەشناسیی هەرێم رایگەیاند، ئەمڕۆ چوارشەممە، ئاسمان ساماڵ و پەڵەهەور دەبێت، لەگەڵ ئەگەرى خۆڵبارینێکی کەم و دابەزینى پلەکانى گەرما، هەروەها خێرایی با کەمێک زیاد دەکات و دەگاتە 25 کیلۆمەتر لە سەعاتێکدا.
ئاماژەی بەوەشکردووە، سبەینێ پێنجشەممە، ئاسمان ساماڵ و پەڵەهەور دەبێت، لەگەڵ ئەگەری بوونی خۆڵبارینێکی کەم بە هەمان شێوەی ئەمڕۆ.
لەبارەی پلەکانی گەرماوە کەشناسیی ئەوەی خستووەتە روو، ئەمڕۆ پلەکانی گەرما 3 بۆ 5 پلەی دیکە دادەبەزن و سبەینێش هاوشێوەی ئەمڕۆ دەبن.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەم جۆرە دەبن:
هەولێر : 45 پلەی سیلیزی
سلێمانی : 44 پلەی سیلیزی
دهۆک : 44 پلەی سیلیزی
کەرکوک : 46 پلەی سیلیزی
زاخۆ : 45 پلەی سیلیزی
هەڵەبجە : 45 پلەی سیلیزی
سۆران : 43 پلەی سیلیزی
حاجی ئۆمەران : 34 پلەی سیلیزی
گەرمیان 46 پلەی سیلیزی
روانگەی ئابوریی "ئیكۆ عیراق" رایگەیاند، ئاستی بەرهەمهێنانی نەوت لە كێڵگە نەوتییەكانی هەرێمی كوردستان بەرزبووەتەوە بۆ نزیكەی 120 هەزار بەرمیلی رۆژانە، چاوەڕوانیش دەكرێت تاكو كۆتایی مانگی داهاتوو ئاستی بەرهەمهێنان بگاتە نزیكەی 280 هەزار بەرمیل.
روانگەی ئابوریی "ئیكۆ عیراق" بڵاویكردەوە، دوای ئەوەی بەهۆی هێرشە درۆنییەكانی چەند هەفتەی رابردووەوە بۆ سەر كێڵگە نەوتییەكانی هەرێم ئاستی بەرهەمهێنانی نەوت لەو كێڵگانە بۆ 81 هەزار بەرمیلی رۆژانە دابەزی، ئێستا ئاستی بەرهەمهێنان لەو كێڵگانە بەرزبووەتەوە و گەیشتووەتە نزیكەی 120 هەزار بەرمیل.
ئەوەشی خستەڕوو، چاوەڕوان دەكرێت تاكو كۆتاییەكانی مانگی داهاتوو ئاستی بەرهەمهێنانی نەوت لە كێڵگە نەوتییەكانی هەرێمی كوردستان بگاتە نزیكەی 280 هەزار بەرمیلی رۆژانە.
ئاماژە بەوەشكراوە، ئاساییبوونەوەی ئاستی بەرهەمهێنانی نەوت لە كێڵگە نەوتییەكانی هەرێمی كوردستان بەشدارییەكی بەرچاوی دەبێت لە چارەسەركردنی ناكۆكییەكانی نێوان بەغداد و هەولێر لەسەر دۆسییەی نەوت و میكانیزمی هەناردەكردنی.
جەختی لەوەشكردووەتەوە، تاكو ئێستا بەغداد و هەولێر نەگەیشتوونەتە رێككەوتن لەسەر وادەیەك بۆ دەستیپێكردنەوەی هەناردەی نەوتی هەرێم.
قوباد تاڵەبانی، جێگری سەرۆک وەزیرانی هەرێم پێشوازیکرد لە محەمەد ئەلحەسان، نوێنهرى تايبهتى سكرتێرى گشتیی نەتەوەیەكگرتووەكان له عیراق و لە کۆبوونەوەی نێوانیاندا چەند پرسێکی جێی بایەخی هەردوولا تاوتوێ کران.
لە تەوەرێکی کۆبوونەوەکەدا کە ئەمڕۆ لە هەولێر بەڕێوەچوو، باس لە دواین هەوڵەکانی پێکهێنانی کابینەی نوێی حکومەتی هەرێم کرا. هەردوولا هیوایان خواست لە ماوەیەکی نزیکدا حکومەتی نوێ پێکبهێنرێت.
لەم چوارچێوەیەدا، جێگری سەرۆک وەزیران بە ئاماژەدان بە دۆخی ناوخۆی هەرێمی کوردستان و هەروەها ئەو هێرشانەی لە ماوەی رابردوودا کرانەسەر ژێرخانی ئابوری کوردستان، بەپێویستی زانی پەلە بکرێت لە پێکهێنانی حکومەتێکی بەهێز و یەکگرتوو کە لەلایەکەوە بتوانێت لە ئاستی جێبەجێکردنی داواکارییەکانی هاووڵاتییاندابێت و لەلایەکی دیکەشەوە، بە هاوکاری و هەماهەنگی لەگەڵ حکومەتی فیدراڵ و لایەنە پەیوەندیدارەکان سەقامگیری کوردستان بپارێزێت.
سەبارەت بە رێککەوتنی نێوان هەرێم و بەغدادش لەسەر پرسی موچە و هەناردەکردنەوەی نەوت، قوباد تاڵەبانی جەختیکردەوە لەسەر پێویستیی پابەندبوونی هەردوولا بە جێبەجێکردنی رێککەوتنەکە.
قوباد تاڵەبانی، جێگری سەرۆک وەزیران پێشوازی لە ستیڤ بیتنەر، کونسوڵی گشتیی ئەمریکا لە هەرێمی کوردستان کرد و پێکەوە پەیوەندییەکانی نێوان هەرێم و بەغداد و چەند پرسێکی دیکەیان تاوتوێ کرد.
لە کۆبوونەوەکەدا کە ئەمڕۆ رۆژی سێشەمە 29ـی 7ـی 2025 لە هەولێر بەڕێوەچوو، هەردوولا هاوڕابوون لەسەر پێویستیی چارەسەرکردنی کێشەکانی نێوان هەرێم و بەغداد بەپێی دەستور و لەڕێگەی گفتوگۆ و دانووستانی بەردەوامەوە. لەمبارەیەوە جێگری سەرۆکوەزیران جەختی کردەوە لەسەر پێویستیی پابەندبوونی هەردوولا بە جێبەجێکردنی رێککەوتنی ئەم دواییەی نێوانیان بۆ چارەسەرکردنی کێشەی موچەی فەرمانبەرانی هەرێم.
لە بەشێکی دیکەی کۆبوونەوەکەدا باسی هێرشە درۆنییەکان بۆ سەر هەرێمی کوردستان کرا. لەم چوارچێوەیەشدا قوباد تاڵەبانی بە ئاماژەدان بە زیانەکانی ئەو هێرشانە بۆسەر ژێرخانی وزەی هەرێم، جەختیکردەوە کە بەردەوامبوونی ئەم هێرشانە سەقامگیری عیراق دەخاتە مەترسییەوە و نابێت رێگە بە دووبارەبوونەوەیان بدرێت. هیواشی خواست حکومەتی فیدراڵ لایەنی ئەنجامدەری ئەو هێرشانە بۆ رای گشتی ئاشکرا بکات و رووبەڕووی سزای یاساییان بکاتەوە.
لە سبەینێوە دوو شەقامی لاوەکی لە بازنەیی مەلیک مەحمود بە ئاڕاستەی رۆشتن بەرەو بەرزەپردی خاڵە شیهاب بەربەرست دەکرێت، هاوکات شارەوانی سلێمانیش داوا لە شۆفێران دەکات شەقامی سەرەکی بەکاربهێنن.
شارەوانی سلێمانی لە راگەیەنراوێکدا بڵاویکردەوە، ئاگاداری سەرجەم هاووڵاتیان شاری سلێمانی و شۆفێران دەکاتەوە، بەمەبەستی کارکردن لەپرۆژەی یەکتربڕی تۆفیق وەهبی، سبەینێ چوارشەممە کاتژمێر هەشتی سەرلەبەیانی هەردووشەقامی لاوەکی بازنەیی مەلیک محموود بەئاراستەی ڕۆشتن بەرەو بەرزەپردی خاڵە شیهاب بەربەست دەکرێت.
ئاماژەی بەوەشکرد، وەک ئەوەی لەسەر نەخشەکە بە رەنگی "سور" دیاریکراوە بەربەستدەکرێت، شۆفێران دەتوانن ئەو شەقامە بەکاربهێنن کە بەرەنگی سەوز دیاریکراوە.
بكوژی هاووڵاتییەكەی قەزای سەیدسادق دەستگیركرا، پۆلیسی سلێمانیش دەڵێت: تۆمەتبارەکە کوڕی تاوان لێکراوەکەیە.
بەڕێوەبەرایەتی پۆلیسی سلێمانی لە راگەیەنراوێکدا ئاشکرایکرد، لەلایەن مەفرەزەكانی بنكەی پۆلیسی سەیدسادقەوە بكوژی ئەو هاووڵاتییە دەستگیركرا كە چەند رۆژێك پێش ئێستا لەقەزای سەیدسادق كوژرا.
ئاماژەی بەوەشکرد، دوای كەشف و هێڵكاری شانۆی شوێنی تاوان ئەنجامدراو توانرا دوو كەس بەتۆمەتی ئەنجامدانی تاوانەكە دەستگیربكرێن، دوای لێكۆڵینەوەكان بەڵگەی پێویست كۆكرایەوە تا گەیشتنە ئەو ئەنجامەی كە یەكێك لەتۆمەتبارە دەستگیركراوەكان هەستاوە بەئەنجامدانی تاوانەكە.
پۆلیسی سلێمانی ئەوەشی خستەڕوو، لەئێستادا تۆمەتبار (ك، ب، ق لەدایكبووی 2001) بەبڕیاری دادوەر و بەپێی مادەی 406 لەیاسای سزادانی عیراقی راگیراوەو دانی ناوە بەتاوانەكەیدا.
دوای چەند رۆژێک لە کاریگەریی شەپۆڵێکی گەرما لەسەر ناوچەکانی هەرێمی کوردستان، کەشناسی پێشبینی دابەزینی بەرچاوی پلەکانی گەرما دەکات و رایدەگەیەنێت کە شەپۆلەکە کۆتایی دێت.
بەپێی پێشبینییەکانی بەرێوەبەرایەتی کەشناسی هەرێم، ئەمڕۆ سێشەممە، هێشتا پلەکانی گەرما بە بەرزی دەمێننەوە، بەجۆرێک لە سەنتەری پارێزگاکان پلەی گەرما لە سەرووی 45پلەی سیلیزییەوە دەبێت. هاوکات لە ناوچە شاخاوییەکان نزیکەی 42 پلە و لە ئیدارەی گەرمیانیش نزیکەی 49 پلەی سیلیزی تۆمار دەکرێت.
بەڵام لە سبەینێوە، چوارشەممە، کاریگەریی شەپۆلە گەرمەکە لەسەر ناوچەکەمان کۆتایی دێت و پلەکانی گەرما دەگەڕێنەوە بۆ ئاستی ئاسایی خۆیان.
پێشبینی دەکرێت پلەکانی گەرما (3 بۆ 6) پلەی سیلیزی داببەزن و تا چوارشەممەی داهاتوو هیچ شەپۆلێکی دیکەی گەرما روو لە ناوچەکە ناکاتەوە.
بەپێی رێکارێکی نوێی بەڕێوەبەرایەتی گشتیی هاتوچۆ، سزای دارایی بۆ ئەو کەس و کۆمپانیایانە دیاریکرا کە پابەندی وادەی یاسایی نابن بۆ تۆمارکردنی ئۆتۆمبێلەکانیان.
لەمبارەیەوە، موقەدەم ڕێژەن بورهان، لێپرسراوی تۆماری هاتوچۆی سلێمانی، لە لێدوانێکی تایبەتدا بۆ کوردسات نیوز رایگەیاند، "بەپێی بڕیارێکی نوێی وەزارەتی ناوخۆ، لەدوای ئەنجامدانی گرێبەستی کڕین و فرۆشتنی ئۆتۆمبێل، خاوەنی نوێ تەنها 60 رۆژی لەبەردەستدایە بۆ ئەوەی ئۆتۆمبێلەکەی بەناوبکات و تۆماری بکات."
وتیشی، "هەر هاوڵاتییەک دوای تێپەڕبوونی ئەو 60رۆژە مامەڵەی تۆمارکردن پێشکەش بکات، ئەوا رووبەڕووی سزای دارایی دەبێتەوە کە بڕەکەی هەشت هەزار دینارە."
لێپرسراوی تۆماری هاتوچۆی سلێمانی ئاماژەی بەوەشکرد، سزاکە بۆ کۆمپانیاکانی فرۆشتنی ئۆتۆمبێلیش جێبەجێ دەکرێت و ئەگەر پابەند نەبن، بە بڕی 24 هەزار دینار سزای دارایی دەدرێن.
پڕۆژەی روناکی ئاشکرایکرد: هەر کەسێک سەرپێچی لە بەکارهێنانی کارەبادا بکات و بە نایاسایی بەکاری بهێنێت روبەرووی سزای یاسایی دەبێتەوە.
پرۆژەی روناکی لە راگەیەنراوێکدا ئاماژەی بەوەکرد، سەرپێچی و کارەبای نایاسایی لەلایەن هاووڵاتی یاخود کارەباچییەوە، بەچەتاڵکردن یان دەستکاریکردنی پێوەر بکرێت، سەرپێچییە و سزای یاسایی توندی دەبێت.
راشیگەیاند، هەر کەسێک سەرپێچی بکات کارەباکەی دەبڕدرێت، هەروەها پێبژاردنی دەکرێت تاوەکو چوار ملیۆن دینار.
پڕۆژەی روناکی ئەوەشی خستەڕوو، رێکاری یاسایی بەرانبەر سەرپێچیکار دەگیرێتەبەر، هاوکات ئەو بڕە کارەبایەی بە نایاسایی بەکاریهێناوە پێی دەبژێردرێت.
لە هەولێر ژنێک بە تۆمەتی دزیکردن دەستگیرکرا، ئاسایشی هەولێریش دەڵێت: تۆمەتبارەکە دزی لە کەسانی بەتەمەن و بەساڵاچوو کردووە.
بەڕێوەبەرایەتی ئاسایشی هەولێر رایگەیاند، دوای ئەنجامدانی بەدواداچون لە لایەن تیمەکانیانەوە لەسەر بوونی چەند حاڵەتێکی تاوانی دزیکردن ، بە فەرمانی دادوەری لێکۆڵینەوەی ئاسایشی هەولێر ،تۆمەتبارێکی ژن دەستگیرکرد بەناوی (و ، ح ، ع) ، کە خەڵکی دەرەوەی هەرێمی کوردستانە.
ئاماژەی بەوەشکردووە، تۆمەتبارەکە هەڵساوە بە ئەنجامدانی چەند تاوانێکی دزیکردن ،بەتایبەت لەو کەسانەی کە تەمەنیان گەورەیە و بەساڵاچوون ،دەشڵێت، تۆمەتباری ناو هاتوو چاودێری ئەو کەسانەی کردوە و لە کاتێکی گونجاو تاوانی دزیکردنەکەی ئەنجامداوە، یەکێک لە تاوانەکانی دزینی بڕی پێنج هەزار دۆلاری ئەمریکی بووە لە شۆفێرێکی تاکسی.
ئاسایشی هەولێر ئەوەشی خستەڕوو، لە کاتی دەستگیرکردنیدا دەستیان گرتووە بەسەر ئەو بڕە پارەی کە لە شوفێری تەکسیەکەی دزی بوو لەگەل چەند پارچە زێڕ و ئامێری مۆبایلدا.
ئەمڕۆ لەسەر راسپاردەی سەرۆک بافڵ جەلال تاڵەبانی ، قوباد تاڵەبانی ، مەکتەبی سکرتارییەتی سەرۆک مام جەلال لە شارۆچکەی ئەڵایی سەردانی هونەرمەند و ئەکتەری دیاری بواری شانۆ و دراما (نەرمین قادر یونس ) یانکرد.
لەو بەسەرکردنەوەیەدا مەکتەبی سکرتارییەت ستایشی رۆڵ و کۆشش و خزمەتەکانی نەرمین قادر یانکرد وەک یەکێک لە کارەکتەرە دیارو دێرینەکانی نواندن و درامای کوردی و بەڕێزەوە لەتەمەنی بەخشش و ئەو خزمەتانەی پێشکەشی کردوە رووانی و هیوای سەلامەتی هەمیشەیی و تەندروست باشییان بۆ خواست .
هونەرمەند نەرمین قادر سوپاسی ئەو بەسەرکردنەوەیەی کرد و وتی، وەک خێزانەکەیان بەشێک بوون لە خەباتی رزگاریخوازی گەلی کورد و قوربانیشیان داوە بۆیە بە شانازییەوە هەوڵمانداوە بەشێک بین لە خزمەتکردنی خەڵکی کوردستان و ئەوەی کردوشمانە تەنها بۆ ئەوە بووە لەروویەکی ترەوە خزمەت بکەین و ئەگەر لایەنی تەندروستیشم کە ماندویکردوم رێبدات بە دڵنیایەوە بەردەوام دەبین .
لە کاتی هەوڵدان بۆ کوژاندنەوەی ئاگرەکەی بەرزاییەکانی ئاویەر لە سنەی رۆژهەڵاتی کوردستان، تا ئێستا سێ چالاکوانی بواری ژینگە گیانیان لەدەستداوە و چواری دیکە بریندارن کە رەوشی تەندروستیی دووانیان ناجێگیرە.
سامان سلێمانی، پەیامنێری کوردسات نیوز رایگەیاند: ئەمڕۆ خەبات ئەمینی، چالاکەوان و ژینگەپارێزی سنە بەهۆی زۆریی رێژەی سووتاویی جەستەیەوە، گیانی لەدەستدا.
ئەمەش لەکاتێکدایە، پێنجشەممە، حەمید مورادی چالاکەوانی ژینگە بەهۆی سووتاویی جەستەیەوە گیانی لەدەستدا و دوێنێش چیاکۆ یوسفی نەژاد، چالاکەوانی ژینگە و وەرزشکاری سنە، دوای چوار رۆژ مانەوە لە نەخۆشخانە بەهۆی زۆریی رێژەی سووتاویی جەستەیەوە گیانی لەدەستدا.
پەیامنێری کوردسات نیوز راشیگەیاند: پارێزگاری سنە بۆ رێزگرتن لە قوربانیان دوو رۆژ ماتەمینیی گشتیی راگەیاندووە.
ئاماژەی بەوەش کرد، دووان لە بریندارەکان دوای وەرگرتنی چارەسەر نەخۆشخانەیان جێهێشتووە، دوو ژینگەپارێزی دیکە دۆخی تەندروستییان ناجێگیرە و لەژێر چاودێریی وردی پزیشکیدان.
پۆلیسی ئاکرێ رایگەیاند، کەسێکیان بە تۆمەتی ئەنجامدانی کاری سحر و جادوو دەستگیر کردووە، کە جادووی بۆ لێکجیاکردنەوە و نزیککردنەوەی هاوسەران کردووە.
عیماد حسێن بەرپرسی راگەیاندنی پۆلیسی ئاکرێ بە کوردسات نیوزی راگەیاند، کەسێکیان بە تۆمەتی ئەنجامدانی کاری سحر و جادوو دەستگیر کردووە، کە دانی بە تاوانەکەیدا ناوە.
ئاماژەی بەوەشکرد، تۆمەتبارەکە تەمەنی 39 ساڵە و دانیشتووی قەزای ئاکرێیە.
بە وتەی پۆلیس، ئەو تۆمەتبارە بەرانبەر بە بڕێک پارە کاری سحر و جادووی بۆ لێکجیاکردنەوە و لێکنزیککردنەوەی هاوسەران کردووە.
پۆلیسی ئاکرێ ئەوەشی بۆ کوردسات نیوز خستە روو، دوای سکاڵای چەند هاووڵاتییەک، بە بڕیاری دادوەر و بەپێی ماددەی 240 ئەو تۆمەتبارەیان دەستگیر کردووە، لەکاتی دەستگیرکردنیشیدا دەست بەسەر چەندین بەڵگە و کەلوپەلی تایبەت بە ئەنجامدانی کارەکەیدا گیراوە.
لە رانیە بەهۆی ریکلامکردن بۆ بەرهەمەکانیان بەشێوەیەکی دوور لە بنەما زانستییە پزیشکییەکان و نەبوونی پسپۆڕی خۆراک، کارگەیەکی چەرەسات و دروستکردنی شیرینی داخرا.
قائیمقامییەتی رانیە بڵاویکردووەتەوە، لە ئەنجامی پشکنین و بەدواداچوون بۆ سکاڵای هاووڵاتیان، کارگەیەکی چەرەسات و دروستکردنی شیرینیان داخستووە، کە پێشتریش رێنمایی پێدراوە و ئاگادار کراوەتەوە، بەڵام پابەندی رێنماییەکان نەبووە.
ئاماژەی بەوەشکردووە، کارگەکە ریکلامی بۆ بەرهەمەکانی کردووە بە شیوەیەکی نازانستی، کە هاوتەریب نییە لەگەڵ سیستمی خۆراکیدا، هەروەها هیچ پسپۆڕێکی بواری خۆراک لە کارگەکەدا نەبووە، لەکاتێکدا کاری دروستکردنی خۆراکیان کردووە، جگە لەوەی یەکێک لە کارمەندەکانیان کارتی تەندروستیی نەبووە.
ئەوەش هاتووە، هەر لە شوێنی کارەکەدا قۆزاخە و مێروو هەبووە بەهۆی بوونی شێ، جگە لەوەش پێکهاتەکانی دروستکردنی شیرینیان بۆ چەند جارێک بەکارهێناوەتەوە.
قائیمقامییەتی رانیە راشیگەیاندووە، کارگەکە ریکلامی تەندروستییان کردووە بۆ نەخۆشانی شەکرە و فشاری خوێن و قەڵەوی، لەکاتێکدا ریکلامەکانیان بەدەر بووە لە رێنماییە تەندروستییەکان.
لیژنەکانی قائیمقامییەت، چەند لیژنەیەکن لە بوارە جیاوازەکاندا و لە سەرجەم شارەکانی هەرێمی کوردستاندا رۆژانە سەردانی دوکان و بازاڕەکان دەکەن و رێنمایی دەدەنە کاسبکار و خاوەنکارەکان، جگە لەوەی سەرپێچیکاران ئاگادار دەکەنەوە و لە ئەگەری پابەند نەبوونیان رووبەڕووی رێکاریی یاساییان دەکەنەوە.
کۆبوونەوەی وەفدی ئەمنی عیراق لەگەڵ بەرپرسانی هەرێم لەبارەی هێرشە درۆنییەکان کۆتایی هات و رایانگەیاند، ئەمڕۆ یەکەم رۆژی دەستپێکردنی کاری لیژنەکە بووە و لێکۆڵینەوەکان دەستیان پێ کردووە.
لەبارەی کاری لیژنەکەوە قاسم ئەعرەجی راوێژکاری ئاسایشی نیشتمانیی عیراق رایگەیاند، ئیدانەی هێرشەکان دەکەن، دەبێت تۆمەتباران بدۆزرێنەوە و رەوانەی دادگا بکرێن.
باسی لەوەشکرد، پاشماوەی هێرشەکان وا دەردەکەوێت پارچەی تێدا بێت لە دەرەوە دروست کرابن و بۆ ئەو مەبەستەش چاوەڕوانی ئەنجامی لیژنەی لێکۆڵینەوە دەکەن.
ئاماژەی بەوەشکرد، نازانرێت سەرچاوەی هێرشەکان یەک لایەنە یان نا، ئەوەش لەدوای دەرئەنجامی لێکۆڵینەوەکان دەردەکەون.
هاوکات، رێبەر ئەحمەد وەزیری ناوخۆی هەرێم رایگەیاند، ئامادەن هەموو هاوکارییەک پێشکەش بەو لیژنیەی عیراق بکەن و هیواخوازن ئەمە کۆتا لیژنە بێت و بگەنە دەرئەنجامێکی دروست.
وتیشی، هێرشەكان لە سنوری خۆی دەرچووە و نابێت دووبارە ببنەوە.
وەزیری ناوخۆی هەرێم راشیگەیاند، بەهۆی هێرشەكانەوە كۆمپانیاكانی نەوت كشاونەتەوە و بەرهەمهێنانی نەوت دابەزیوە.
ئەوەشی خستە روو، "پێویستمان بە کاتە بۆئەوەی كێڵگەكان بۆ بەرهەمهێنانی نەوت بگەنەوە توانای راستەقینەی خۆیان".
ئەوەش لە کاتێکدایە، لە سەرەتای ئەم مانگەوە هێرشی فڕۆکەی بێفڕۆکەوان بۆسەر کێڵگە نەوتییەکانی هەرێم بەردەوام بووە و بەهۆیەوە زیانی ماددی بەر کێڵگەکان کەوتووە.