رێبوار تەها، پارێزگاری کەرکوک، رایگەیاند کە بۆ ئەم مانگە نرخی ئەمپێری کارەبای مۆلیدە ئەهلییەکان لە کەرکوک لە نێوان 4500 بۆ 5500 دینار دەبێت، کە بە وتەی خۆی، نزمترین نرخە لەسەر ئاستی سەرجەم پارێزگاکانی عیراق و هەرێمی کوردستان.

پارێزگاری کەرکوک لە پەیامێکدا ئاماژەی بەوەکردووە: "بۆ ئەم مانگەش بەڵێنەکەمان بردەسەر و نرخی ئەمپێری مۆلیدەی ئەهلی لە کەرکوک لە نێوان 4500 - 5500 دینارە."

رێبوار تەها جەختی لەوەشکردووەتەوە، کە لەم مانگەدا کە بە گەرمترین مانگی ساڵ دادەنرێت، لە ساڵانی رابردوودا پێدانی کارەبا کەمبووە و نرخی ئەمپێر بەرزبووە، بەڵام ئەمساڵ دۆخەکە لە کەرکوک جیاوازە.

روونیکردەوە، بە بەراورد بە ساڵانی رابردوو، پێدانی کارەبای نیشتمانی زیاتر بووە و نرخی مۆلیدەش کەمترە، ئەمەش وەک جێبەجێکردنی ئەو بەڵێنەیە کە بە هاوڵاتیانی کەرکوکیان دابوو.

پەری نوری، راوێژکاری سەرۆکایەتیی کۆمار، لە میانی بەشداریکردنی لە گەشتی هەواڵەکانی کاتژمێر هەشتی کوردسات نیوزدا، وردەکاریی دەستگیرکردنی تاوانبارێکی ئەنفالی بە ناوی "عەجاج ئەحمەد حەردان" ئاشکراکرد و رایگەیاند، دەستگیرکردنەکە دوای هەوڵێکی زۆر و کاری هەشت مانگە هاتووە.

پەری نوری راوێژکاری سەرۆکایەتیی کۆمار وتی: "بە هەوڵی خانمی یەکەمی عیراق و نووسینگەی سەرۆک کۆمار، توانیمان لە رێگەی سەرچاوەکانی خۆمانەوە شوێنی تاوانبار 'عەجاج ئەحمەد حەردان' دەستنیشان بکەین." هەروەها ئاشکرایکرد، "پرۆسەی دەستگیرکردنەکە بە هاوکاریی دەزگای ئاسایشی نیشتمانیی عیراق ئەنجامدراوە."

پەری نوری ئاماژەی بەوەشکرد، تاوانبارەکە بۆ ئەوەی خۆی بشارێتەوە و نەناسرێتەوە، "جوانکاری بۆخۆی کردووە، ئێستا پیر بووە و سەری سپی بووە." وتیشی: "لە کاتی لێکۆڵینەوەدا، ناوبراو نکۆڵی لەوە دەکات کە خۆی بێت و دان بەو تاوانانەدا نانێت کە ئەنجامی داون."

بەپێی زانیارییەکان، "عەجاج ئەحمەد حەردان" یەکێک بووە لە سەرپەرشتیارە دڕندەکانی زیندانی نوگرە سەلمان لە پارێزگای سەماوە، کە تێیدا هەزاران هاوڵاتیی کورد لە کارەساتی ئەنفالدا زیندانیکراون و رووبەڕووی ئەشکەنجە و مەرگ بوونەتەوە.

لە چوارچێوەی ئەمەشدا، نووسینگەی خانمی یەکەمی عیراق لە راگەیەندراوێکدا داوای لە سەرجەم زیندانیان و کەسوکاری قوربانیان و بێسەروشوێنبووانی دەستی ئەو تاوانبارە کردووە، پەیوەندییان پێوە بکەن بۆ تۆمارکردنی سکاڵای یاسایی، تا بە سزای عادیلانەی خۆی بگات.

عەقید جاسم عەلی بەڕێوەبەری هاتووچۆی دەربەندیخان بە کوردسات نیوزی راگەیاند: ماتۆڕسکیڵێک لەناو تونێلەکە دەرچوونی هەڵەی ئەنجامداوە و خۆی کێشاوە بە ئۆتۆمبێلکدا و لە ئەنجامدا شۆفێری ماتۆڕسکیلەکە گیانی لەدەستداوە.

بەڕێوەبەری هاتووچۆی دەربەندیخان وتیشی بەهۆی ئەو رووداوەوە، دوو ئۆتۆمبیلی تر لەناو تونێلەکە بەیەکیاندا داوەو تا ئیستاش دوو کەس برینداربووە.

بەپێی زانیاریەکانی کوردسات نیوز، ئەو کەسەی گیانی لەدەستداوە ناوی رەحمان حەسەنە و لەدایکبوی ساڵی 1994 و دانیشتووی قەزای کەلارە.

قوباد تاڵەبانی، جێگری سەرۆکوەزیران پێشوازیکرد لە ژەنەراڵ کێڤن لامبێرت، فەرماندەی نوێی هێزەکانی هاوپەیمانیی نێودەوڵەتی لە عێراق و سوریا و پێکەوە لەبارەی پەیوەندییەکانی نێوان هێزەکانی هاوپەیمانان و پێشمەرگە و دۆخی سوریا و چەند پرسێکی دیکە گفتوگۆیان کرد.

لە کۆبوونەوەکەدا کە رۆژی پێنج شەمە(31/7/2025) بە ئامادەبوونی ستیڤن بیتنەر، کونسوڵی گشتیی ئەمریکا لە هەرێمی کوردستان بەڕێوەچوو، قوباد تاڵەبانی سوپاسی ژەنەراڵ کێڤن لێیهی، فەرماندەی پێشووی هاوپەیمانیی نێودەوڵەتی لە عێراق و سوریا کرد بۆ هاوکاریی و هەماهەنگییەکانی لەگەڵ هێزەکانی پێشمەرگە و هیوای سەرکەوتنیشی بۆ فەرماندەی نوێ خواست لە ئەرکەکەیدا.
هەردوولا هاوڕابوون داعش هێشتا مەترسییەکی گەورەیە و شانە نووستووەکانی ئەو گروپە هەوڵ دەدەن جارێکی دیکە ناسەقامگیری و بۆشایی ئەمنی ناوچەکە وەک دەرفەتێک بۆ خۆڕێکخستنەوە بەکاربهێنن. جەختیشیان کردەوە لەسەر پێویستیی بەردەوامبوون و بەهێزترکردنی ئاستی هاوکاری و هەماهەنگی لەنێوان هێزەکانی هاوپەیمانان و پێشمەرگە و هێزە عێراقییەکان بۆ رێگریکردن لە هەر چەشنە جموجوڵێکی داعش و گروپە تیرۆریستییەکان لە ناوچەکەدا.
لە تەوەرێکی دیکەی کۆبوونەوەکەدا باس لە دۆخی سوریا کرا، جەختکرایەوە لەسەر ئەوەی کە دەبێت کورد و هەموو پێكهاتەکانی دیکە مافەکانیان پارێزراوبێت و رۆڵ و پێگەی شیاویان لە سیاسەت و حکومڕانی سوریای نوێدا هەبێت. 

سەبارەت بە هێرشە درۆنییەکانیش بۆ سەر ژێرخانی ئابوری هەرێمی کوردستان، ئاماژە بەوەدرا کە هێرشەکان مەترسین بۆسەر ئاسایش و سەقامگیری عێراق و بە پێویست زانرا لایەنی ئەنجامدەر رووبەڕووی لێپرسینەوەی یاسایی بکرێت و حکومەتی هەرێم و حکومەتی فیدراڵ پێکەوە ڕێوشوێنی گونجاو بگرنەبەر بۆ رێگریکردن لە بەردەوامبوونی ئەم هێرشانە.

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە د. محەمەد حەسان، نوێنەری تایبەتیی سکرتێری گشتیی نەتەوەیەکگرتووەکان لە عیراق کرد.
لە دیدارێکدا کە د. جوان ئیحسان و رزگار حاجی حەمە، ئەندامانی مەکتەبی سیاسی ئامادەبوون دوایین پێشهاتە سیاسی و ئەمنییەکان لەسەر ئاستی هەرێمی کوردستان، عیراق و ناوچەکە تاوتوێکران.
سەرۆکی یەکێتیی نیشتمانیی کوردستان جەختی لە گرنگیی گفتوگۆ کردەوە بۆ چارەسەرکردنی کێشەی مووچە لە نێوان هەرێمی کوردستان و بەغدا، هاوکات پابەندبوون بە رێککەوتنەکانی بە پێویست زانی.
هێرشە درۆنییەکانی سەر هەرێمی کوردستان تەوەرێکی دیکەی کۆبوونەوەکە بوو، هەردوولا جەختیان لە پاراستنی ئارامی و سەقامگیریی وڵات و گرتنەبەری رێکاری یاسایی بۆ وەستاندنی هێرشەکان کردەوە.
لە کۆبوونەوەکەدا بەڕێوەچوونی هەڵبژاردنی ئەنجوومەنی نوێنەرانی عیراق خرایە بەر باس و بافڵ جەلال تاڵەبانی و د. محەمەد حەسان جەختیان لە ئەنجامدانی هەڵبژاردنێکی پاک و بێگەرد کردەوە.

بە هاوكاری نوسینگەی سەرۆك كۆمار و خانمی یەكەمی عیراق تاوانبارێكی شاڵاوەكانی ئەنفال بە ناوی "عەجاج ئەحمەد حەردان" دەستگیر كرا.

بەپێی زانیارییەکان، تاوانبار "عەجاج ئەحمەد حەردان" یەکێک بووە لە سەرپەرشتیارانی زیندانی نوگرە سەلمان لە پارێزگای سەماوە لە باشوری عیراق.

نوسینگەی خانمی یەكەمی عیراق رایگەیاندووە: داوا لە زیندانیكراوان و كەسوكاری زیندانیكراوان و بێسەرشوێنبووەكان دەكەین پەیوەندیمان پێوەبكەن بۆ تۆماركردنی سكاڵا دژی ئەو تاوانبارە.

عەجاج کێیە؟

عەجاج یان حەجاج، ناوی (عەجاج ئەحمەد حەردان) تکریتیە، خەڵکی تکریتە و لە عەشیرەتی ئەلبوناسر و هۆزی نزارە، واتە عەشیرەتەکەی سەدام حسێن، هەروەها پلەی رائیدی ئەمن بووە.

لەدوای روخانی رژێمی بەعس، ماڵی لە کەرکوک بووە، دواتر بەرەو سوریا رایکردوە و لە گەڕەکی جەرمانەی دیمەشقی پایتەختی سوریا لە شوقەیەکدا ژیاوە.

لەکاتی دادگایکردنی سەرانی رژێمی بەعس، بەردەوام سەیری پرۆسەکەی کردوە و ئاگاداری ئەوە بووە ناوی وەک تاوانبار لە تاوانی ئەنفالدا هاتووە. 

سێ کوڕی هەبووە، دووانیان بوونەتە چەکداری قاعیدە و لە شەڕێکدا لە ناحیەی (زلوعیە)ی پارێزگای سەڵاحەدین کوژراون، هەروەها کوڕە بچووکەکەی ناوی رائید بووە و لە سوریا لەگەڵ باوکی ژیاوە.

عەجاج دوو پاسەوانی تایبەتی هەبووە بەناوەکانی سەخر و شەوقی، چارەنووسی سەخر نادیارە، شەوقی لە ساڵی ٢٠١١ چووەتە ئەڵمانیا و داوای مافی پەنابەری کردوە.

سکرتێری گشتیی پارتی سۆسیال دیموکراتی کوردستان رەخنە لەم دۆخەی ئێستای نێوان هەرێم و بەغداد دەگرێت و دەڵێت: دەسەڵاتی بەغداد فیدڕاڵی نییە و فشارەکانی لە موچە و بودجەدا کۆکردووەتەوە.

محەمەد حای مەحمود سکرتێری گشتیی پارتی سۆسیال دیموکراتی کوردستان لە لاپەڕەی رەسمی خۆی لە تۆڕی کۆمەڵایەتی فەیسبووک رەخنە لە دۆخی ئێستای هەرێم دەگرێت و نووسینێکی بڵاوکردووەتەوە.

محەمەد حاجی مەحمود نووسیویەتی، "حکومەتی هەرێم هەموو شتێکی بە کردەیی رادەستی بەغداد کردووە، بەغداش فشارەکانی لە موچە و بودجەدا کۆکردووەتەوە و بە لوتبەرزییەوە وەڵامی داخوازییە رەواکانی کورد دەداتەوە، لەبەرانبەردا لایەنی کوردستانی هەمیشە دووپاتی پابەندی و گوێڕایەڵی خۆی دەکاتەوە".

دەشڵێت: ئەمڕۆ گوایە نەوتی هەرێم لە رێگەی حکومەتی فیدڕاڵ و کۆمپانیای سۆمۆی دروستکراوی سەردەمی بەعس هەناردە دەکەن، بۆ ئەوەی موچە و بودجەیان بداتێ.

سکرتێری گشتیی پارتی سۆسیال دیموکراتی کوردستان رەخنە لە حکومەتی ناوەند دەگرێت و نووسیویەتی، ئەو دەسەڵاتەی لە بەغداد هەیە بەس فیدڕاڵ نییە، جگە لە کورد کەس بە فیدڕاڵ ناوی نابات.

لە نووسینەکەیدا باسی لەوەشکردووە، "تەسلیمکردنی نەوت بە عیراق، بەبێ رێککەوتنێک کە مافەکانی کوردی تێدا زامن کرابێت، گەورەترین ستەمە لە خۆیان و میللەتەکەمان. ئەوەی تا ئێستا هەیە هیچ رێککەوتن نییە، بەڵکو تەسلیمبوونە لەپێناو موچە بەشێوەی قەرز و سوکایەتیکردن بە کوردستان".

ئاماژەی بەوەشکردووە: دەبێت بەر لە هەرشتێک ئەو بڕیارانەی عێراق لە ۲٠۱٤ داویەتی بۆ بێبەشکردن و سڕینەوەی خەڵکی کوردستان لە میزانییە هەڵبوەشێتەوە و کۆتایی بەو سیاسەتە بهێنرێت کە مانگێک بە قەرز و مانگێک خاترانە و مانگێک بە فشاری ئەملاولا موچەی خەڵکی کوردستان بنێرێت.

لەبارەی ئەو نووسراوەی خوێندنی باڵای عیراقیشەوە کە تیایدا باس لەوە کرابوو، "دەبێت تاقیکردنەوەکان بە زمانی خوێندن بێت و هیچ روونکردنەوەیەک بە زمانی دیکە نەدرێت" لە ناوچە کوردستانییەکانی دەرەوەی ئیدارەی هەرێم و ئەو شارانەی دانیشتووانی کورد بەشێکی زۆری پێکدەهێنن، محەمەد حاجی مەحمود ئەوەی خستووەتە روو، بڕیاری وەزیری خوێندنی باڵای عیراق بۆ قەدەغەکردنی زمانی کوردی لە زانکۆ و پەیمانگەکان لە پارێزگاکانی کەرکوک، دیالە، تکریت، موسڵ و سەڵاحەدین، راشکاوانە پێمان دەڵێت، ئەگەر کێشەی موچە چارەسەر ببێت ئەوا کێشەی زمان سەرهەڵدەدات و ئەگەر کێشەی زمان چارەسەر ببێت، زەوی جوتیارەکانمان داگیر دەکەن، ئەوان کێشەیان لەگەڵ کوردبوونماندا هەیە.

کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و بەپێی پێشبینییەکان، سەرەڕای ئەوەی ئەمڕۆ پلەکانی گەرما 3 بۆ 5 پلە دابەزیون، سبەینێ زیاتر دادەبەزن.

کەشناسیی هەرێم رایگەیاند، ئەمڕۆ پێنجشەممە، ئاسمان ساماڵ دەبێت لەگەڵ دروستبوونی کەمێک پەڵەهەور لە هەندێک ناوچەدا.

ئاماژەی بەوەشکردووە، سبەینێ هەینی، بەهەمان شێوە کەش جێگیر دەبێت و ئاسمان بە تەواوی ساماڵ دەبێت.

سەرەڕای ئەوەی دوێنێ کەشناسیی هەرێم رایگەیاند، پلەکانی گەرما 3 بۆ 5 پلە نزم دەبنەوە، بەپێی پێشبینییەکان سبەینێ 1 بۆ 2 پلەی دیکە دادەبەزن.

بەرزترینپلەکانی گەرمای پێشبینیکراو بۆ سبەینێ بەمجۆرە دەبن:

هەولێر :  43 پلەی سیلیزی 

سلێمانی : 41 پلەی سیلیزی

دهۆک :  42  پلەی سیلیزی

کەرکوک : 45 پلەی سیلیزی 

زاخۆ  :  42 پلەی سیلیزی

هەڵەبجە : 43 پلەی سیلیزی

سۆران :  42 پلەی سیلیزی

حاجی ئۆمەران : 31 پلەی سیلیزی

گەرمیان : 45 پلەی سیلیزی

بەڕێوەبەرایەتی گشتی ئاوی سلێمانی، لە روونکردنەوەیەکدا دەنگۆی شکانی هێڵی ئاوی دوکان - سلێمانی رەتدەکاتەوە و رایدەگەیەنێت، ئەو دیمەنانەی بڵاوبوونەتەوە، تایبەتن بە تاقیکردنەوەی پڕۆژەی پەرەپێدانی هێڵەکە.

ئامانج جەلال، وتەبێژی بەڕێوەبەرایەتی ئاوی سلێمانی، رایگەیاند: "ئەو کارە، تاقیکردنەوەی بۆری پەرەپێدانی هێڵی یەکی ئاوی دوکان-سلێمانییە و دوای تەواوبوونی کارەکانی، پێدانی ئاو لەو هێڵەوە زیاد دەکات."

ئەم روونکردنەوەیە لە کاتێکدایە، کە بەردەوام لەلایەن هاووڵاتیانی ئەو سنوورەوە وێنە و ڤیدیۆی بۆریی ئاوی دوکان بڵاودەکرێتەوە و نیگەرانیی خۆیان لە شکانی هێڵەکە دەردەبڕن، بەڵام بەڕێوەبەرایەتی ئاوی سلێمانی جەختدەکاتەوە کە هێڵەکە نەشکاوە و کارکردن تیایدا بۆ پەرەپێدان و زیادکردنی ئاوە.

بەڕێوەبەرایەتی هاتووچۆی راپەڕین رایگەیاند، لەمەودوا هاووڵاتیان دەتوانن بۆ ئەنجامدانی مامەڵەکانیان لە بەشەکانی "مۆڵەت" و "تۆماری ساڵانەی ئۆتۆمبێل"، سیستمی نۆرەگرتنی ئەلیکترۆنی "حجز" بەکاربهێنن.

بەپێی راگەیەندراوێکی بەڕێوەبەرایەتییەکە، هاووڵاتیانی سنووری ئیدارەی سەربەخۆی راپەڕین پێویستە پێش سەردانکردنیان، لە رێگەی لینکی (raparintraffic.com) نۆرە تۆمار بکەن.

هاتووچۆی راپەڕین ئاماژەی بەوەشکردووە، بۆ نۆرەگرتن پێویستە هاووڵاتیان کارتی نیشتمانی و کارتی زانیارییان پێبێت، هەروەها پاسپۆرت ئەگەر هەبێت.

قوباد تاڵەبانی، جێگری سەرۆک وەزیران پێشوازیکرد لە وەفدێکی باڵای سەربازی بەریتانیا بە سەرۆکایەتی ئیدوارد ئاڵگرن، ‌راوێژكارى باڵای وەزارەتی به‌رگريى به‌ريتانیا بۆ کاروباری‌ رۆژهه‌ڵاتى ناوه‌ڕاست و باكورى ئەفریقا و پێکەوە تاوتوێی پەیوەندییەکانی نێوان هەردوولا و دواین گۆڕانکارییە سیاسی و ئەمنییەکانی عیراق و ناوچەکەیان کرد.

لە تەوەرێکی کۆبوونەوەکەدا کە رۆژی چوارشەمە (30/7/2025) لە هەولێر بە ئامادەبوونی شۆڕش ئیسماعیل، وەزیری پێشمەرگە بەڕێوەچوو، ئاڵوگۆڕی بیروڕاکرا لەبارەی دۆخی ئەمنی عیراق و ناوچەکە، هەردوولا هاوڕابوون لە شەڕ و بارگرژییەکانی ماوەی رابردووی ناوچەکەدا سیاسەت و هەڵوێستی حکومەتی فیدراڵی عیراق ئەرێنی بووە و جەختیشیان کردەوە پێویستە حکومەتی فیدراڵ لەسەر ئەم سیاسەتە بەردەوام بێت و هەموو لایەنەکانیش بۆ پاراستنی ئاسایش و سەقامگیری عێراق بە وریاییەوە مامەڵە بکەن.

سەبارەت بە هێرشە درۆنییەکان و بە ئامانج گرتنی ژێرخانی ئابوری هەرێمی کوردستانیش، جێگری سەرۆک وەزیران ئاماژەی بەوەدا لەگەڵ ئەوەی لە ماوەکانی رابردوودا هەنگاوی باش نراوە بە ئاراستەی سەقامگیری عیراق، بەڵام دووبارەبوونەوەی ئەمجۆرە هێرشانە مەترسییە بۆسەر ئاسایش و سەقامگیری هەرێمی کوردستان و عیراقیش و هیواشی خواست ئەنجامدەرانی هێرشەکان بۆ رای گشتی ئاشکرا بکرێن و رووبەڕووی سزای یاسایی بکرێنەوە.

لە بەشێکی دیکەی کۆبوونەوەکەدا باس لە چۆنییەتی بەهێزترکردنی هاوکاری و هەماهەنگی نێوان هێزە ئەمنییەکانی کوردستان و عیراق لەگەڵ بەریتانیا کرا.

لەمبارەیەوە وەفدی سەربازی بەریتانیا جەختیان کردەوە، بەریتانیا وەک هاوبەش و هاوپەیمان لە هەرێمی کوردستان دەڕوانێت و کار دەکەن بۆ پتەوکردنی پەیوەندییەکان بە تایبەت لەڕووی راوێژی سەربازی و راهێنانی زیاتر بە پێشمەرگە و هێزە ئەمنییەکانی کوردستان.

 ئەمڕۆ چوارشەممە، 30ی تەمموزی 2025، ئەنجومەنی وەزیرانی هەرێمی کوردستان کۆبووەوە و تیایدا دوا هەنگاوەکانی خەرجکردنی موچەی مانگەکانی حوزەیران و تەمموزی تاوتوێ کرد.

لە کۆبوونەوەکەدا، وەزیری دارایی و ئابووری رایگەیاند، لیستی موچە و تەرازووی پێداچوونەوەی مانگی حوزەیران رەوانەی وەزارەتی دارایی فیدراڵ کراوە، بۆیە ئەرکی وەزارەتی دارایی عیراقە کە لە بەرامبەردا، موچەی ئەو مانگەی موچەخۆرانی هەرێم خەرج بکات.

ئەنجومەنی وەزیران نوێنەرانی هەرێمی لە لیژنە هاوبەشەکان راسپارد کە لەگەڵ هاوتاکانیان لە حکومەتی فیدراڵ گفتوگۆ بکەن بۆ یەکلاییکردنەوەی دۆسیەی داهاتی نانەوتی

سەبارەت بە دەستپێکردنەوەی هەناردەی نەوتی هەرێم، ئەنجومەنی وەزیران بڕیاریدا ئەو بڕە نەوتەی ئامادەیە بۆ هەناردەکردن، رادەستی کۆمپانیای بە بازاڕکردنی نەوتی عیراق (سۆمۆ) بکرێت بەمەبەستی هەناردەکردنی لە رێگای بەندەری جەیهانەوە.
 حکومەتی هەرێمیش بەرپرسیارێتی قەرەبووکردنەوەی ئەو کۆمپانیا نەوتیانە لە ئەستۆ دەگرێت کە نەوتەکەیان بۆ بەکار‌هێنانی ناوخۆ تەرخانکراوە.

ئەنجومەنی وەزیران جەختی لەوە کردەوە کە هەرێمی کوردستان بەردەوامە لە پابەندبوونی بە لێکتێگەیشتنە هاوبەشەکانی نێوان هەولێر و بەغدا و لە بەرامبەردا پێویستە حکومەتی فیدراڵ موچەی مانگەکانی حوزەیران و تەمموز هاوشێوەی موچەخۆرانی تری عیراق خەرج بکات، چونکە هەرێم پابەندییەکانی خۆی لە دۆسیەی نەوت و داهاتی نانەوتیدا جێبەجێ کردووە.

دەرباز کۆسرەت رەسوڵ ئەندامی مەکتەبی سیاسی و لێپرسراوی مەکتەبی پەیوەندییەکانی یەکێتیی نیشتمانیی کوردستان لە شاری هەولێر لەگەڵ ئەرمان تۆپچو کونسوڵی گشتیی تورکیا لە هەرێمی کوردستان کۆبووەوە.

ئەمڕۆ چوارشەممە، دەرباز کۆسرەت رەسوڵ ئەندامی مەکتەبی سیاسی و لێپرسراوی مەکتەبی پەیوەندییەکانی یەکێتیی نیشتمانیی کوردستان لە شاری هەولێر لەگەڵ ئەرمان تۆپچو کونسوڵی گشتیی تورکیا لە هەرێمی کوردستان کۆبووەوە و گفتوگۆیان لەبارەی رێککەوتنی نێوان هەرێم و بەغداد کرد.

لەو بارەیەوە دەرباز کۆسرەت رەسوڵ رایگەیاند، باپەندبوون بە رێککەوتنەکان و دوورخستنەوەی پرسی موچە لە ململانێ سیاسییەکان بە پێویست دەزانن.

تەوەرێکی تری گفتوگۆکان لەبارەی دوایین پێشهات و گۆڕانکارییە سیاسیی و ئەمنەییەکانی ناوچەکە و پشتگیرییەکانی یەکێتی بوو بۆ پرۆسەی ئاشتی لە کوردستانی باکور و تورکیا.

هەر لە کۆبوونەوەکەدا جه‌خت كرایه‌وه‌ له‌سه‌ر هه‌ماهه‌نگی و هاوكاری هه‌موو لایه‌نەكان له‌پێناو پاراستنی سه‌قامگیری سیاسی و ئه‌منی بۆ ئه‌وه‌ی ناوچه‌كه‌ له‌ گرژی و ئاڵۆزییه‌ سیاسییه‌كان دوور بخرێتەوە.

وەزارەتی خوێندنی باڵا وردەکاریی دامەزراندنی سێ یەکەمەکان و خاوەن بڕوانامە باڵاکانی دانیشتوی دەرەوەی هەرێم لەسەر میلاکی حکومەتی فیدراڵی بڵاوکردەوە.

دەقی وردەکاریی و رێنماییەکان:

1.دەرچووانی ساڵی (٢٠٠٣) تا ئەمڕۆ دەگرێتەوە.

2. دەرچووانی دەرەوەی عێراق لە زانکۆى پارێزگاکانی خۆیان بەپێی کارتی زانیاری داوکاری پێشکەش دەکەن.

3.پێشکەشکار فۆرمی داوکاری دامەزراندن و فۆرمی وەرگرتنی کۆد بەدەستی پڕ دەکاتەوە و ئیمزاى لەسەر دەکات.

4.تۆماری کۆلێژ و پەیمانگەکان فۆرمی ئۆنلاین بۆ دەرچووان پڕ دەکەنەوە.

5.پێویستە دەرچوو ئەم بەڵگەنامانە لەگەڵ خۆی ببات لە کاتی پێشکەشکردن:

-کارتی نیشتمانی دەرچوو لەگەڵ کارتی نیشتمانی دایک و باوکی دەرچوو.

-کارتی زانیاری یان بەڵگەنامەی نیشتەجێبوونی مۆرکراو لە یەکێک لە پارێزگاکانی دەرەوەی هەرێمی کوردستان.

-هەر دەرچوویەک سەردانی تۆمارى کۆلێژ نەکات و فۆرمی دەستی پڕنەکاتەوە بێ بەش دەبێت لە وەرگرتنی کۆد و دامەزراندن.

-لە ئێستادا تەنها کۆد دروست دەکرێت و لە داهاتوودا دامەزراندنەکە لەسەر میلاکی حکومەتی فیدراڵی دەبێت بەپێی شوێنی نیشتەجێبوون.

6.ئەم پرۆسەیە تەنها دانەمەزراوەکان دەگرێتەوە.

7.ئەم پرۆسەیە تا رۆژی (2025/9/15) سەعات (4)ى ئێوارە بەردەوام دەبێت.

8.ماوەی سکاڵا لە (2025/9/16) دەست پێ دەکات تا (2025/9/30).