بەئامادەبوونی خاتوو شاناز ئیبراهیم ئەحمەد و جەماوەرێکی زۆری دڵسۆزی هونەر و رەسەنایەتی لەپایتەختی رۆشنبیری، ئێوارەیەکی وەفاداری بۆ رێزلێنان لە ژیان و بەرهەمەکانی هونەرمەند قادر کابان لەهۆڵی تەلاری هونەر بەڕێوەچوو.

لەو بۆنەیەدا تیپی مۆسیقای سلێمانی بەسپۆنسەری ئانزۆ فاوندەیشن و دەزگای میدیایی کوردسات کۆنسێرتێکی هونەری رێکخست و ناوەندی هونەری زەنێش ژیان و کاری هونەری و هەڵوێستە نیشتمانییەکانی قادر کابانی بەشێوەی دیکۆدرامی بەناونیشانی 'شەوقی چاوەڕوانی' پێشکەش کرد، کە هونەرمەندی شەهیدی بەپەرۆشی بەرەوپێشبردنی هونەر و موزیک و خەبات و کوردپەروەری و نهێنی پارێزی رێکخستنەکان وەسفکرد.

هەر لەو میانەیەدا خانمی دڵسۆزی هونەر و فەرهەنگی کوردی ، خاتوو شاناز ئیبراهیم ئەحمەد قەڵغانی رێزلێنانی بەخشییە هاوسەری هونەرمەند و هەردوو هونەرمەندی کۆچکردوو کەریم کابان و ولیەم یوحەننا، هەروەک شەش قەڵغانی تریش بەخشرایە هونەرمەندان و هاوڕێ و یاوەرانی قادر کابان.

ئێوارەهونەرییەکە لەنێو چەپڵەرێزان و رەزامەندی ئەو جەماوەرە بەرچاوەی ئامادەبوودا بەپێشکەشکردنی پێنج بەرهەمی گۆرانی و میوزیک کۆتایی هات.

پڕۆژەی رووناکی ئاگادارییەکی ئاراستەی هاوبەشانی کارەبا دەکات و رایدەگەیەنێت، لە رۆژی دەرچوونی پسووڵەوە 50 رۆژ مۆڵەت دەدرێت بۆ دانەوەی ئابوونەی کارەبا، بە پێچەوانەوە کارەبای سەرپێچیکاران دەپچڕێندرێت.

پڕۆژەی رووناکی لە راگەیەنراوێکدا هاوبەشانی کارەبا ئاگادار دەکاتەوە کە ماوەی پارەدانی پسووڵەی کارەبا 50 رۆژە. ئەم ماوەیەی پارەدان لە رۆژی دەرچوونی پسووڵەکەوە لەسەر سەکۆی "ئی-پسوولە" (e-Psula) دەست پێ دەکات، نەک لە کاتی گەیشتنی پسووڵەی کاغەزی.

ئاماژەی بەوەشکرد، ئەو هاوبەشانەی لە ماوەی دیاریکراودا '50 رۆژ' پارەی پسووڵەکەیان نادەن، رێکاری یاساییان لەسەر جێبەجێ دەکرێت و کارەباکەیان دەپچڕێندرێت.

پڕۆژەی رووناکی ئەوەشی خستەڕوو، لە حاڵەتی پچڕانی کارەبادا بەهۆی پارەنەدانەوە، گەڕاندنەوەی کارەبا تەنها دوای دانی تەواوی بڕی پسووڵەکە دەست پێ دەکات و بە گشتی تا 24 سەعات دەخایەنێت؛ بەڵام ئەگەر پارەکە لەڕێگەی کارمەندی کۆکەرەوەوە درابێت، پرۆسەکە کاتێکی زیاتری دەوێت.

راشیگەیاند، لە ئێستادا نوێترین پسووڵەی کارەبا بۆ زۆربەی هاوبەشان لە سەکۆی "ئی-پسوولە" بەردەستە و داوا لە هاوبەشان دەکرێت مانگانە بەدواداوچوون بۆ پسووڵەکانیان بکەن.

لەکۆتایی راگەیەنراوەکەدا، بۆ ئاگاداربوون لە دەرچوونی پسوولە و زانیارییە نوێیەکان بە بەردەوامی، پڕۆژەی رووناکی داوا لە هاوبەشان دەکات یەکەکانیان لە رێگەی ماڵپەڕی رەسمیی رووناکییەوە تۆمار بکەن.

لیژنەی ئاوارەکانی گرێ سپی ئاشکرایکرد، زیاتر لە 100 خێزانی کورد لەژێر هەڕەشەدان و لەناو باڵەخانەی بەڕێوەبەرایەتیی ناوچەکە گەمارۆ دراون، هاوکات ئیدانەی ئەو بەئامانجگرتن و دەستدرێژییانە دەکات کە دەکرێنە سەر ئەو هاووڵاتییانەی دەگەڕێنەوە سەر ماڵ و زێدی خۆیان.

لیژنەی ئاوارەکانی گرێ سپی لە راگەیەنراوێکدا بڵاویکردەوە، بە توندی ئیدانەی ئەو پەلامار و دەستدرێژییانە دەکات کە کراونەتە سەر هاووڵاتییە کوردە گەڕاوەکان بۆ ناوچە و ماڵ و حاڵی خۆیان.

ئاماژەی بەوەشکردووە، زیاتر لە 100 خێزانی کورد، کە ژمارەیەک ژن و منداڵیان تێدایە، لەناو باڵەخانەی بەڕێوەبەرایەتیی ناوچەی گرێ سپی گەمارۆ دراون و لە مەترسیدان.

لە راگەیەنراوەکەدا ئەوەشخراوەتەڕوو، داوا لە لایەنە پەیوەندیدارەکان دەکەن دەستبەجێ دەستوەردان بکەن بۆ پاراستنی ئەو خێزانانە و دڵنیابوونەوە لە سەلامەتییان.

ئاشکراشیکرد، داوا لە دەسەڵاتداران دەکەن رێوشوێن و رێکاری پێویست بگرنەبەر بۆ رێگریکردن لە دووبارەبوونەوەی پێشێلکارییەکان و دابینکردنی زەمینەی گەڕانەوەی ئارام و شکۆمەندانە بۆ سەرجەم ئاوارەکان.

لیژنەکە جەخت لەسەر پێویستیی ئەنجامدانی لێکۆڵینەوەیەکی جدی و شەفاف لەسەر سەرجەم دەستدرێژییەکان و سزادانی ئەنجامدەرانیان دەکەنەوە، هەروەها لیژنەکە داوا لەو هاووڵاتییانە دەکات کە خواستی گەڕانەوەیان بۆ گرێ سپی هەیە، پێشوەختە سەردانی لیژنەی ئاوارەکان بکەن و هەماهەنگی بکەن بۆ رێکخستن و بەدواداچوونی پرۆسەی گەڕانەوەکەیان.

عەلی زەیدی، سەرۆك وەزیرانی عیراق بە مەبەستی پاراستنی بەرژەوەندیی گشتی، كۆتاییهێنانی بە گرێبەستی كاری 69 راوێژكاری لە نوسینگەكەی خۆیدا راگەیاند.

بەپێی بەڵگەنامەیەكی رەسمیی نوسینگەی سەرۆكایەتیی ئەنجوومەنی وەزیران کە بڵاوکراوەتەوە، لەسەر راسپاردەی راستەوخۆی سەرۆك وەزیران بڕیاردرا بە هەڵوەشاندنەوەی گرێبەستی 69 راوێژكار لە ناو نوسینگەی سەرۆكایەتیی حكومەتدا.

لە بڕیارەكەدا روونكراوەتەوە ئەم هەنگاوە لە پێناو بەرژەوەندیی گشتی و رێكخستنەوەی كارگێڕیی فەرمانگەكانی سەرۆكایەتی دراوە، بە مەبەستی كەمكردنەوەی خەرجییەكان و رێكخستنەوەی میلاكی راوێژكاری لە سەرجەم بوارەكاندا.

عەلی زەیدی سەرۆكی هێزە چەكدارەكانی عیراق بە فەرمانێك كۆتایی بە ئەركی حەمید شەتری سەرۆكی دەزگای هەواڵگریی نیشتمانی وڵاتەكە هێنا.

لە نوسراوێكدا عەلی زەیدی سەرۆك ئەنجومەنی وەزیران و سەرۆكی هێزە چەكدارەكانی عیراق، كۆتایی بە ئەرك و خزمەتەكانی حەمید شەتری لە پۆستی سەرۆكی دەزگای هەواڵگریی نیشتمانی عیراق هێناوە.

نوسراوەكە رۆژی دووشەممە بڵاوبووەتەوە و ئیمزای رەشاد خەڵەف هاشم، بەڕێوەبەری نوسینگەی سەرۆك وەزیرانی عیراقی لەسەرە.

لە نوسراوەكەدا باس لەوە كراوە، بڕیارەكە پاڵپشت بە رێنماییەكانی فەرماندەی گشتیی هێزە چەكدارەكان دراوە و لە رۆژی دەرچوونییەوە جێبەجێ دەكرێت.

حەمید شەتری، یەكێكە لە كەسایەتییە ئەمنییە دیارەكانی عیراق و لە مانگی كانوونی یەكەمی 2024وە بە بڕیاری محەمەد شیاع سودانی سەرۆك وەزیرانی پێشووی عیراق كراوە بە سەرۆكی دەزگای هەواڵگریی نیشتمانی، ناوبراو یەكێك بوو لە ناوە دیارەكان بۆ وەرگرتنی پۆستی سەرۆك وەزیرانی عیراق لەم كابینەیەدا.

دادگای باڵای فیدراڵیی عیراق ئەمڕۆ بۆ یەكلاكردنەوەی سێ سكاڵای هەستیار لەسەر چارەنووسی پەرلەمان و دەسەڵاتەكانی حكومەتی هەرێمی كوردستان کۆبووەوە و سکاڵاکەی عەلی حەمەساڵحیشی رەتکردەوە.

دادگای باڵای فیدراڵیی عیراق ئەمڕۆ کۆبووەوە بۆ تاوتوێكردنی سێ سكاڵای دەستووریی كە كاریگەریی راستەوخۆیان لەسەر پێگەی یاسایی دامەزراوەكانی هەرێمی كوردستان هەیە و ئەگەر سکاڵاکان قبوڵبکرابووبان، ئەگەری هەڵوەشانەوەی خولی شەشەمی پەرلەمانی هەرێم دەهاتە ئاراوە.

لەوبارەیەشەوە، پەیامنێری کوردسات نیوز رایگەیاند، سكاڵای یەكەم کە لە لایەن عەلی حەمەساڵحەوە، ئەندامی پەرلەمانی كوردستان تۆمار كراوە و لە سكاڵاکەیدا داوا دەكات خولی شەشەمی پەرلەمانی كوردستان بەهۆی كۆتاییهاتنی وادەكەیەوە بكرێتە 'كاربەڕێكەر'، بەڵام دادگای فیدراڵ سکاڵاکەی رەتکردەوە.

وتیشی، شێوازی تۆمارکردنی سکاڵاکە بەجۆرێکە کە دەبووایە لەسەر بەتەمەنترین ئەندامی پەرلەمان سکاڵاکە تۆماربکرێت، چونکە بەتەمەنترین ئەندامی پەرلەمانی هەرێم تا پێکهێنانی دەستەی ئەنجوومەنی سەرۆکایەتیی پەرلەمان، راستەوخۆ دەبێتە سەرۆکی پەرلەمان، لە دادگاشدا پێویستە سکاڵا لەسەر کەسێک تۆماربکرێت تاوەکو قبوڵبکرێت، بۆیە سکاڵاکە بە مەبەستی هەڵوەشاندنەوەی خولی شەشەمی پەرلەمانی كوردستان و بە 'کاربەڕێکەر' لەقەڵەمدانی کابینەی حکومەت بووە، بەڵام داواکەی رەتکرایەوە.

لەلایەکی دیکەشەوە رێبوار ئەورەحمان ئەندامی ئەنجومەنی نوێنەرای عیراق لە فراکسیۆنی نەوەی نوێ بە کوردسات نیوزی راگەیاند، دوو سكاڵای دیكەش لە لایەن پەرلەمانتارانی جووڵانەوەی نەوەی نوێ، رێبوار ئەورەحمان و ئەكبەر غەریب، لە دژی سەرۆكی حكومەتی هەرێم تۆمار كراون، بە هۆکاری ئەوەی ماوەی كاركردنی بەسەرچووە و دەبێت دەسەڵاتەكانی لێبسێنرێتەوە، بەڵام دادگا ئەو داوایەشی دواخست بۆ 14ـی 12ـی 2026.

سكاڵاكاران دووپاتی دەكەنەوە تەمەنی یاسایی حكومەت و پەرلەمان بەسەرچووە و دەبێت سەرجەم بڕیارەكانیان رابگیرێن و تەنها وەك كاربەڕێككەر مامەڵە بكەن.

سندوقەکانی دەنگدان لە ئیسرائیل کرانەوە، هەڵبژاردنە چارەنووسسازەکە دەستی پێکرد و هەموو جیهان لە چاوەڕوانی ئەنجامی ئەو هەڵبژاردنەن.

چوار ساڵ دوای پێکهێنانی حکومەت و سێ ساڵ دوای روداوەکانی 7ـی تشرینی یەکەم، سەعات 7ـی  بەیانی ئەمڕۆ سندوقەکانی دەنگدان کە زیاتر لە ١٢ هەزار سندوق بۆ حەوت ملیۆن و 331 هەزار و 981 کەس لەوانەی مافی دەنگدانیان هەیە کرانەوە.

پرۆسەی دەنگدان لە سەعات 10ـی شەو بە کاتی ئەو وڵاتە هاوكات لەگەڵ بڵاوکردنەوەی ئەنجامە بەرایی و خەمڵێنراوەکان (دەستبەجێکان) کۆتایی پێدێت، جگە لە ناوچە و شارۆچکە بچووکەکان، نەخۆشخانەکان و زیندانەکان.

میدیاکانی ئیسرائیل بڵاویانکردەوە، 12 هەزار و 18 سندوقی دەنگدان لە سەرتاسەری وڵاتدا کرانەوە و هاووڵاتیانی ئیسرائیل رویان لە سندوقەکانی دەنگدان کردووە بۆ هەڵبژاردنی پەرلەمان 'کنێست'، ئەمەش چوار ساڵ دوای هەڵبژاردنی بنیامین ناتانیاهۆ بۆ شەشەمین خولی سەرۆکایەتی حکومەت و سێ ساڵ دوای شکست و کۆستەکەی حەوتی تشرینی یەکەم، ململانێ و گرژییەکان لە سەعات 10ـی شەو دەگەنە لوتکە لەگەڵ داخرانی سندوقەکان و بڵاوکردنەوەی ئەنجامە بەراییەکان، کە وێنەیەکی سەرەتایی دەخەنەڕوو دەربارەی پرسیارە سەرەکییەکە: ئایا ناتانیاهۆ حەوتەمین حکومەتی خۆی پێکدەهێنێت یان دەسەڵات ئاڵوگۆڕ دەکرێت و گۆڕانکاری رودەدات.

بەپێی کۆمسیۆنی باڵای هەڵبژاردنەکانی ئیسرائیل، حەوت ملیۆن و 331 هەزار و 981 هاووڵاتی لە تۆماری دەنگدەراندا ناویان تۆمارکراوە و مافی دەنگدانیان هەیە، کە ئەمەش بەراورد بە هەڵبژاردنی رابردوو زیاتر لە نیو ملیۆن دەنگدەر زیادی کردووە، لە کۆی گشتی سندوقەکانی دەنگدان.

لایەنە سەرەکییەکانی بەشداربوو...

لایەنە سەرەکییەکانی کێبڕکێ لەسەر کورسییەکانی پەرلەمانی ئیسرائیل 'کنێست' کە دوای کشانەوەی دوو لایەن لە کێبڕکێکە بۆ 36 کورسی کەمکراوەتەوە، بریتین لە:

لیکود (یەکێتی)

پارتێکی راستڕەو بە سەرۆکایەتی ناتانیاهۆ.

ژمارەی کورسییەکانی ئێستای کنێست: 32 کورسی لە کۆی 120 کورسی.

لە ساڵی 2009ەوە نزیکەی بەردەوام دەسەڵاتی بەدەستەوەیە و ناسیۆنالیزم لەگەڵ لیبرالیزمی ئابوری تێکەڵ دەکات.

بەگوێرەی راپرسییەکان، ناتانیاهۆ لە ناو شاری لیکوددا بەناوبانگترین کاندیدە.

ناتانیاهۆی تەمەن 77 ساڵ، کە لە ئەمریکا گەورە بووە، بە مانۆڕی سیاسی و توانای پێکهێنانی هاوپەیمانی حوکمڕانی ناسراوە.

هەروەها رووبەڕووی ڕەخنەی توند دەبێتەوە بەهۆی ئەوەی نەیتوانیوە رێگری لە هێرشی حەماس لە 7ی ئۆکتۆبەر بکات، لەو کاتەوە سەرکردایەتی ئۆپەراسیۆنە سەربازییە بەرفراوانەکانی کردووە، سەرەتا لە کەرتی غەززە، دواتر دژی حزبوڵا و دواتر دژی ئێران، بە هاوکاری ئەمریکا.

یاشار (راست)

پارتێکی ناوەندگەرایە بە سەرۆکایەتی گادی ئایزنکۆت، سەرۆکی پێشووی ئەرکانی IDF، کە لە نێوان مانگی تشرینی یەکەمی 2023 تا حوزەیرانی 2024 وەک وەزیرێکی بێ پۆرتفۆلیۆ لە حکومەتەکەی ناتانیاهۆدا بووە، پارتێکی نوێیە و هیچ کورسییەکی لە کنێست نییە.

ئایزنکۆت بە رەفتاری ئارام و خۆبەدوورگرتن ناسراوە، وەک رکابەری سەرەکی دەرکەوتووە کە هەوڵدەدات ناتانیاهۆ لە پۆستەکەی دووربخاتەوە، ئەم پارتە لە ساڵی 2025 دامەزرا و تیشکی خستە سەر ناسنامەی "جولەکە و دیموکراسی" ئیسرائیل و یەکخستنی ئیسرائیلییەکان دوای ئەو دابەشبوونە تیژانەی کە ئیسرائیل لە سەردەمی ناتانیاهۆدا تووشی بوو.

بیهاد (پێکەوە)

هاوپەیمانییەکی ناوەڕاست و راست بە سەرۆکایەتی نەفتالی بینێت سەرۆک وەزیرانی پێشوو (2021-2022) کە بازرگانێکە و بینێت یایر لاپید سەرۆکی ئۆپۆزسیۆنی پارتەکەی هێنایە ناو پارتەکەیەوە، کە لە ئێستادا 24 کورسی لە کنێستدا هەیە.

ئەو دوو سیاسەتمەدارە پێشتر لە نێوان ساڵانی 2021 بۆ 2022 هاوکاری پێکهێنانی حکومەت بوون و دوای یەکگرتنەوە لە دژایەتیکردنی ناتانیاهۆ، بڕیاریاندا لەسەر لیستێکی هاوبەش خۆیان کاندید بکەن.

بینێت خۆی بە راستڕەو وەسف دەکات و مێژوویەکی تێوەگلانی لەگەڵ بزووتنەوەی نیشتەجێبوون لە کەناری رۆژئاوا هەیە، بەڵام لە هەڵبژاردنەکانی ئێستادا خۆی وەک سیاسەتمەدارێکی عەلمانی پیشان دەدات، هاوکات لاپید هاوبەشەکەی خۆی وەک کەسێکی عەلمانی پیشان دەدات.

دیموکراتەکان

پارتێکی چەپ بە سەرۆکایەتی یایر گۆلان جێگری سەرۆکی پێشووی ئەرکانی سوپا، لە ئێستادا خاوەنی چوار کورسی لە کنێست (لە ژێر ئاڵای پارتی کرێکاران).

جۆلان پارتی کرێکارانی کە لە مێژوودا پێشەنگی پارتی چەپەکانی ئیسرائیل بوو لەگەڵ پارتی مێرێتز تێکەڵکرد کە لە ساڵی 2022دا نەیتوانی بەربەستی هەڵبژاردنەکان ببڕێت و بچێتە ناو کنێستەوە.

دیموکراتەکان تاکە پارتی غەیرە عەرەبن کە پشتیوانی لە چارەسەری دوو دەوڵەتی بۆ کێشەی ئیسرائیل و فەلەستین دەکەن.

شاس

پارتێکی سەروو ئۆرتۆدۆکسە بە سەرۆکایەتی ئاریە دێری وەزیری پێشوو. ژمارەی کورسییەکانی لە کنێست 11 کورسییە.

ئەم پارتە لە ساڵی 1984 بۆ نوێنەرایەتیکردنی دەنگدەرانی جولەکە سەفاردی بە رەچەڵەک رۆژهەڵاتی ناوەڕاست و باکوری ئەفریقا دامەزراوە.

پارتەکە جەخت لەوە دەکاتەوە کە نوێنەرایەتی هەژارترین چینەکانی کۆمەڵگە دەکات و هاوپەیمانی پەسەندکراوی ناتانیاهۆ بووە لە حکومەتە هاوپەیمانەکانیدا.

ئۆتزما یەهودیت (دەسەڵاتی جولەکەکان)

پارتێکی راستڕەوی توندڕەو بە سەرۆکایەتی ئیتامار بن گەڤیر وەزیری ئاسایشی نیشتمانی، شەش کورسی لە کنێستدا هەیە.

ناتانیاهۆ ئەم پارتەی هێنایە ناو حکومەتەکەیەوە دوای ئەوەی پێشتر بەهۆی هەڵوێستە توندڕەوەکانیەوە دوورخرابووەوە.

بن گەڤیر چەندین جار بە داوای بەکارهێنانی توندوتیژی توڕەیی نێودەوڵەتی وروژاندووە، ناوبراو لەم دواییانەدا داوای کوشتنی 30 بۆ 40 فەلەستینی کرد هەموو شەوێک لە کەرتی غەززە.

زایۆنیزمی ئایینی

پارتێکی راستڕەوی توندڕەو بە سەرۆکایەتی وەزیری دارایی بیزالیل سمۆتریچ، حەوت کورسی لە کنێست هەیە.

ئەو پارتە بەشێکە لە هاوپەیمانی راستڕەوی توندڕەو لە حکومەتی ئیسرائیل و داکۆکی لە لکاندنی تەواوی کەناری رۆژئاوا بە ئیسرائیل و بەهێزکردنی سیمای جولەکەکانی دەوڵەت دەکات.

سمۆتریچ پۆستەکەی وەک وەزیری دارایی بەکارهێنا بۆ پەرەپێدانی فراوانکردنی نیشتەجێبوون و راگرتنی داهاتی باج کە قەرزاری دەسەڵاتی فەلەستین بوو.

جولەکەیەکی یەکگرتووی تەورات (یەهدەت هاتۆرا)

پارتێکی توندڕەو بە سەرۆکایەتی یاکۆڤ ئاشەر، حەوت کورسیی لە کنێست هەیە.

ئیسرائیل بەیتینو

بە سەرۆکایەتی وەزیری پێشوی بەرگریی و دەرەوە و دارایی ئەڤیگدۆر لیبەرمان. ژمارەی کورسییەکانی کنێستی شەش کورسییە، لیبرمان، بەڕێوەبەری پێشووی نوسینگەی ناتانیاهۆ، لە ساڵی 1999 پارتی ناسیۆنالیستی عەلمانی دامەزراندووە، بە پارتێکی ئۆپۆزسیۆن دادەنرێت و داکۆکی لە جیاکردنەوەی ئایین و دەوڵەت دەکات.

هاوپەیمانی لیستی هاوبەش

ئەمە هاوپەیمانییەکی چەپ ناسیونالیستییە کە پێکهاتووە لە سێ لایەن، بەرەی دیموکراتی بۆ ئاشتی و یەکسانی (حەداش)، مەجلیسی دیموکراسی نیشتمانی (بەلەد) و بزووتنەوەی عەرەبی بۆ گۆڕانکاری، بە سەرۆکایەتی یوسف جەبارین. پێنج کورسی لە کنێستدا هەیە.

لیستەکە تیشک دەخاتە سەر بەرگریکردن لە مافەکانی کەمینەی عەرەب لە ئیسرائیل و پشتیوانیکردن لە چارەسەری دوو دەوڵەتی.

لیستی یەکگرتووی عەرەبی (رەعم)

ئەمە حزبێکی عەرەبییە و خاوەنی ئاڕاستەی ئایینییە، نزیکە لە بزووتنەوەی ئیسلامی و بە سەرۆکایەتی مەنسور عەباس، 5پێنج کورسی لە کنێستدا هەیە.

دووەم کاندیدی ناو لیستەکە یۆاڤ سێگالۆڤیچ جێگری پێشووی سەرۆکی ئەنجومەنی ئاسایشی نیشتمانییە، کە دەیەوێت بەرەنگاربوونەوەی تاوان لە کۆمەڵگەی عەرەبیدا بێت.

فەرماندەیەكی باڵای هێزی دەریایی ئێران بە ئامانجگرتنی كەشتیی فڕۆكەهەڵگری ئەمریكی ئەبراهام لینكۆڵن بە مووشەكی ئێرانی رادەگەیەنێت، و جەخت دەكاتەوە زیانپێگەیاندنی بووەتە هۆی پاشەكشەكردنی لە ئاوەكانی ناوچەكە.

فەرهاد فەتاحی، جێگری فەرماندەی ئۆپەراسیۆنەكانی هێزی دەریایی ئێران ئاشكرای كرد لە رۆژانی سەرەتای جەنگدا، مووشەكێكی هێزەكانیان كەشتیی فڕۆكەهەڵگری ئەمریكی ئەبراهام لینكۆڵنی پێكاوە و ناچاری كردووە بكشێتەوە. و مووشەكەكە زیانی گەورەی پێگەیاندووە و ئەركە سەربازییەكەی لە ناوچەكەدا پەكخستووە.

باسی لەوەشكرد هێزەكانیان لە رێگەی فڕۆكەی بێفڕۆكەوان و مووشەكی پێشكەوتووەوە چاودێریی جموجۆڵەكان دەكەن؛ راشیگەیاند تاران بە هەموو شێوەیەك رێگری دەكات لەوەی كەشتییە جەنگییەكانی ئەمریكا لە سنوورە ئاوییەكانی ئێران و گەرووی هورمز نزیك ببنەوە.

ئاژانسی رۆیتەرز ئاشکرای دەکات، حزبوڵای لوبنانی بە هاوکاریی دارایی ئێران دووبارە دەستی بە پڕچەککردنەوەی سەربازیی خۆی کردووەتەوە و ئامادەکاری بۆ جەنگێکی نوێ لەگەڵ ئیسرائیل دەکات.

ئاژانسی هەواڵی رۆیتەرز لەسەر زاری لێپرسراوانی ئەمنیی لوبنانیی ئاگادار لە چالاکییەکانی حزبوڵاوە بڵاویکردەوە، ئەو گروپە ماوەی سێ مانگە بە بەکارهێنانی هاوکاری دارایی کە لەلایەن ئێرانەوە پێی گەیشتووە، سەرقاڵی خۆئامادەکردنە بۆ ئەگەری دەستپێکردنەوەی شەڕ و پێکدادانەکان لەگەڵ ئیسرائیل.

حزبوڵای لوبنانی، لە دوو جەنگی لەدوای یەکدا لەگەڵ ئیسرائیل لە ساڵی 2024ەوە تووشی زەبر و زیانی سەخت بووەتەوە، کە بووەتە هۆی کوژرانی هەزاران چەکدار و ژمارەیەک لە فەرماندە دیارەکانی، جگە لە وێرانبوونی بەشێکی گەورە لە کۆگاکانی چەک و تەقەمەنییەکانی.

لە ئێستادا هێزەکانی ئیسرائیل لە گوندەکانی باشوری لوبنان کە بە پێگە سەرەکییەکانی حزبوڵا دادەنرێن جێگیربوون، هاوکات فشارە سیاسییەکانیش لە بەیروت بۆ داماڵینی چەکی ئەو گرووپە ڕوویان لە زیادبوون کردووە.

بەپێی زانیارییەکانی دوو سەرچاوەی ئەمنیی لوبنانی کە رۆیتەرز دەستیکەوتووە، باڵی سەربازیی حزبوڵا سودی لەو هێمنییە وەرگرتووە کە لە مانگی حوزەیرانی ڕابردووەوە لە کردەوە جەنگییەکاندا هاتبووە ئاراوە، بۆ ئەوەی دووبارە خۆی پڕچەک بکاتەوە؛ بەجۆرێک گرنگیی زۆریان داوە بە کڕینی مادەی تەقەمەنی و دروستکردنی فڕۆکەی بێفڕۆکەوان 'دڕۆن' تا و ئاراستەی پێگە و ئامانجەکانی ئیسرائیلیان بکەن.