ئەمڕۆ، لە شاری مۆسکۆی پایتەختی روسیا، رێکخراوی یەکێتیی کوردناسان بەمەبەستی بەهێزکردنی پەیوەندییە زانستی و فەرهەنگییەکانی نێوان روسیا و کوردستان، بە شێوەیەکی رەسمی دامەزرا.

کۆنفرانسی دامەزراندنی رێکخراوەکە بە بەشداریی ژمارەیەکی بەرچاو لە نوێنەرانی رێکخراوە کوردییەکان و نوێنەری شەش دامەزراوەی زانستی و ئەکادیمی بەرێوەچوو، کە کار لەسەر پرسی کورد دەکەن. هەروەها، پەیام و پشتیوانیی سەرجەم پارت و لایەنە سیاسییەکانی هەر چوار پارچەی کوردستان بە کۆنفرانسەکە گەیشتبوو.

ئامانجی سەرەکیی یەکێتیی کوردناسان بریتییە لە بەهێزکردنی پەیوەندییە زانستی و فەرهەنگییەکانی نێوان روسیا و کوردستان. هەروەها، ئەم رێکخراوە هەوڵدەدات وەک پلاتفۆرمێک بۆ کۆکردنەوەی سەرجەم لایەنە سیاسییە جیاوازەکانی کوردستان کار بکات. یەکێکی دیکە لە ئامانجەکان ئەوەیە کە توێژینەوەکانی تایبەت بە مێژوو، فەرهەنگ، ئایین و بارودۆخی سیاسیی کورد، لە روانگەیەکی کوردیانەوە و لەلایەن توێژەرانی کوردەوە ئامادە بکرێن و بڵاو بکرێنەوە، هاوکات هاوکاریی توێژەران و کوردناسانیش بکرێت.

لە یەکەم کۆنفرانسی خۆیدا، دەستەی بەڕێوەبەرایەتیی یەکێتییەکە هەڵبژێردرا، کە پێکهاتبوو لە:

• سوارە شاکەلی، وەک سکرتێری رێکخراو

• ئیلیا ڤیدێنێڤ، ئەندامی دەستەی بەڕێوەبەرایەتی

• شۆڕش ئابی، ئەندامی دەستەی بەڕێوەبەرایەتی

• تاتیانە ئۆدینسۆڤا، ئەندامی دەستەی بەڕێوەبەرایەتی

• وەزیری کاشاخی، ئەندامی دەستەی بەڕێوەبەرایەتی
  
  
  وێنەکان: 
  
  
  

دوای روداوەکەی شەوی 21 لەسەر 22ی ئەم مانگە، سەرۆکایەتی داواکاری گشتیی هەرێمی کوردستان راگەیەندراوێکی بڵاوکردەوە و تێیدا داواکاری گشتیی سلێمانی راسپاردووە بۆ بەدواداچوونی روداوەکە.

لە راگەیەندراوەکەدا، کە ئەمڕۆ دەرچووە، سەرۆکایەتی داواکاری گشتی ئاماژەی بەوە کردووە کە ئامانجی سەرەکیی یاساکان پاراستنی ماف و ئازادی و ئاسایشی هاوڵاتیانە و پێویستە لە کاتی جێبەجێکردنی هەر فەرمانێکی دادگادا، دەسەڵاتی جێبەجێکار "بەوپەڕی پەرۆشییەوە رەچاوی بنەما یاسایی و دەستوورییەکان بکات لە پاراستنی گیان و کەرامەتی هاوڵاتیان و پاراستنی سامانی گشتی و تایبەت."

هەروەها جەخت لەوە کراوەتەوە کە یاسا رێوشوێنی گونجاوی دیاریکردووە بۆ جێبەجێکردنی بڕیارەکان بە شێوەیەک کە نەبێتە هۆی "پشێوی و نائارامی و زیان گەیاندن بە سامانی گشتی و تایبەتی هاوڵاتیان".

داواکاری گشتی داوا لە سەرجەم دەزگاکانی راگەیاندن و خاوەنی پەیج و هەژمارەکانی تۆڕە کۆمەڵایەتییەکانیش دەکات کە "بە شێوەیەکی بەرپرسانە و دوور لە ئاڵۆزکردنی زیاتر، مامەڵە لەگەڵ ئەم روداوە و لێکەوتەکانی بکەن."

لە کۆتایی ڕاگەیەندراوەکەدا، سەرۆکایەتی داواکاری گشتی، فەرمانگەی داواکاری گشتیی سلێمانی ڕاسپاردووە بۆ بەدواداچوونی وردی ڕووداوەکە و "پاراستنی مافی هەمووان لە چوارچێوەی یاسا و دەستوردا.

داواکاری گشتی بۆ دەزگاکانی راگەیاندن وخاوەنی پەیج وهەژمارەکانی تۆڕە کۆمەڵایەتیەکان: بە شێوەیەکی بەرپرسانە و دوور لە ئاڵۆزکردنی زیاتر، مامەڵە لەگەڵ ئەم روداوە و لێکەوتەکانی بکەن

لیژنەی باڵای تاقیکردنەوە گشتییەکان لە وەزارەتی پەروەردەی حکومەتی هەرێمی کوردستان، سەرجەم قوتابیان و خوێندکارانی پۆلی 12ی ئامادەیی ئاگاداردەکاتەوە کە پرسیار و وەڵامی تاقیکردنەوەکانی خولی دووەمی ساڵی خوێندنی (2024_2025) رۆژانە بڵاودەکرێتەوە.

بەپێی راگەیەندراوێکی لیژنەی باڵای تاقیکردنەوە گشتییەکان، قوتابیان و خوێندکاران دەتوانن لەدوای تەواوبوونی هەر تاقیکردنەوەیەک، لە رێگەی لینکێکی دیاریکراوەوە دەستیان بە پرسیار و وەڵامە رەسمییەکان بگات. ئەم هەنگاوە بەمەبەستی ئاسانکاری بۆ قوتابیان و دڵنیابوونەوەیان لە وەڵامەکانیان نراوە.

لە راگەیەندراوەکەدا ئاماژە بەوەشکراوە کە پرۆسەکە بە تاقیکردنەوەی بابەتی (زمان و ئەدەبی کوردی) دەستیپێکردووە و پرسیار و وەڵامەکانی لەسەر هەمان لینک بەردەستە، هەروەها رۆژانە و بەپێی خشتەی تاقیکردنەوەکان، پرسیار و وەڵامی وانەکانی دیکەش دادەنرێت.

وەزارەتی پەروەردە جەختی لەوە کردووەتەوە کە ئەم لینکە تاکە سەرچاوەیرەسمییە بۆ وەرگرتنی پرسیار و وەڵامەکان و داوا لە قوتابیان دەکات پشت بە هیچ سەرچاوەیەکی نافەرمی نەبەستن.

وەفدی حکومەتی هەرێم لەگەڵ تەیف سامی وەزیری دارایی عیراق کۆبوونەوە، سەرجەم گرفت و خاڵی ناکۆکەکان گفتوگۆیان لەبارەوە کرا، هاوکات رۆژی سێشەممە لە کۆبوونەوەی ئەنجومەنی وەزیران بڕیار لەسەر موچەی مانگی شەش دەدرێت.

بەپێی زانیارییەکانی محەمەد عەبدولرەحمان پەیامنێری کوردسات نیوز لە بەغداد، ئەمڕۆ وەفدی حکومەتی هەرێمی کوردستان کە پێکهاتبوون لە سێ بەڕێوەبەری گشتی وەزارەتی دارایی و  سێ بەڕێوەبەری گشتی دیوانی چاودێری دارایی سێ کۆبونەوەیان ئەنجامداوە، لەگەڵ وەزارەتی دارایی عیراق و دیوانی چاودێری دارایی و محەمەد تمیمی سەرۆکی لیژنە وزارییەکەی حکومەتی عیراق.

پەیامنێری کوردسات نیوز ئاشکرای دەکات، وەفدی هەرێم لەگەڵ وەزارەتی دارایی عیراق و بە ئامادەبوونی تەیف سامی وەزیری دارایی و راوێژکارێکی سەرۆک وەزیرانی عیراق، کۆبونەوەیەکی چڕییان ئەنجامداوە و تێدا سەرجەم خاڵی ناکۆک و گرفتەکان لەبارەی داهاتی نانەوتی هەرێمەوە گفتوگۆی لەبارەوەکراوە، بەڵام لە کۆبوونەوەکەدا نەگەیشتوون بە خاڵێکی هاوبەش و کۆتایی لەبارەی داهاتی نانەوتیی هەرێم.

بەپێی زانایرییەکانی پەیامنێری کوردسات نیوز لە بەغداد، وەفدی هەرێم لەگەڵ محەمەد تمیمی سەرۆکی لیژنە وزراییەکەی حکومەتی عیراقیش کۆبوەتەوە و تێیدا، تێبینی و داواکارییەکانی حکومەتی هەرێمی لە راپۆرتێکدا پێشکەش بە سەرۆکی لیژنەکە کردووە. 

پەیامنێری کوردسات نیوز راشیگەیاند، چاوەڕوان دەکرێت رۆژی سێشەممە لە کۆبونەوەی ئەنجومەنی وەزیرانی عیراق، لیژنە وزارییەکە راپۆرتی وەفدی هەرێم و وەزارەتی دارایی عیراق، پێشکەش بە سەرۆک وەزیرانی عیراق بکات و ئەوکات بڕیار لەسەر چارەنووسی موچەی مانگی شەشی هەرێم دەدرێت.

وتەبێژی دەزگای ئاسایشی هەرێم دەڵێت: ئەو چەکدارانەی لە لالەزار دەستگیرکران، کە پیلانیان هەبووە ئارامی شاری سلێمانی تێکبدەن.

عەقید سەلام عەبدولخالق وتەبێژی دەزگای ئاسایشی هەرێم لە میانەی بەشداریکردنی لە بەرنامەی فایل و دیاردەی کوردسات نیوز رایگەیاند: ئەو تۆمەتبارانەی دەستگیرکراون ژمارەیان 150 کەسە، هەروەها ئەموتۆمەتبارانە لەلایەن یاساوە پۆلێن دەکرێن کامیان دەستیان سورە بە خوێنی شەهیدەکان، هاوکات ئەوەی لەو رۆژەدا چەکی بەکارهێنانبێت، یاخود ئەوانەی دەستیان نەبووە لە روداوەکەدا نەبووە بەپێی یاسا مامەڵەیان لەگەڵ دەکرێت، لە دوای لێکۆڵینەوە ئەگەر تۆمەتبار نەبن، بڕیاری دادوەر ئازاد دەکرێت.

وتیشی، بەشێکی زۆری تۆمەتبارەکان لە دەرەوەی سلێمانی هاتوون و ئەو چەکانەی کە لە لالەزار دەستی بەسەردا گیراوە، بریتین لە دۆشکە و ئێم فۆر و نارنجۆک، هەروەها چەکی نیشانەشکێن و چەکی بێدەنگ و چەندین درۆنی بۆمبڕێژکراو دەستی بەسەردا گیراوە.

عەقید سەلام عەبدولخالق ئاماژەی بەوەشکرد، دەستبەسەراگرتنی ئەم جۆرە چەکانە دەرخەری ئەوەن کە ئەو چەکدارانە نیازی پیلانگێری و تێکدانی ئەمنییان هەبووە.

وتەبێژی دەزگای ئاسایشی هەرێم راشیگەیاند، پیلانی بەئامانجگرتنی کەسێکی گرنگ لە سلێمانی لەلایەن ئەو چەکدارانەوە داڕێژرابوو.

ئەوەشی خستەڕوو، دەزگای ئاسایشی هەرێم بەردەوام لەپێناو چەسپاندنی یاسا و سەروەری یاسادا قوربانی گەورەی داوە و لەسەر ئەو رێبازەش بەردەوام دەبێت.

مەکتەبی راگەیاندن و هۆشیاری یەکێتیی نیشتمانیی کوردستان لە پەیامێکدا دەڵێت، "سێ رۆژە میدیا رەسمی و نارەسمییەکانی پارتی بە پلانی سەروی خۆیان پەلاماری سلێمانی و یەکێتی دەدەن".

مەکتەبی راگەیاندن و هۆشیاریی یەکێتیی نیشتمانیی کوردستان راگەیەندراوێکی بڵاوکردووەتەوە و تێێدا هاتووە: سێ رۆژە میدیای رەسمی و ناڕەسمیەكانی پارتی بە ئیعاز و پلانی سەروی خۆیان و بەدڵێكی رەشی پڕ لە قین پەلاماری شاری سلێمانی و یەكێتیی نیشتمانیی كوردستان دەدەن و هەواڵی ناڕاست و چەواشەكارانە بەناوی سەرۆك و سەركردەكانی یەكێتی لەسەر روداوەكەی لالەزار و پرۆسەی چەسپاندنی یاسا بلاودەكەنەوە، ئێمە بە میدیای پارتی و ئاغاكانیان دەڵێین نەك سێ رۆژ، بەڵكو سێ هەزار شەو و رۆژی تر پەلاماری یەكێتی و سلێمانی بدەن ناتوانن شكستی خۆتان و هێزەكانتان بەرامبەر خورشید هەركی و ناڕەزاییەكانی ئەو ناوچەیە داپۆشن.

ئاماژەی بەوەشداوە: هەموو خەڵكی كوردستان ئەو راستیە دەزانن ئەم پەلامارەی ئێوە بۆ ئەوەیە شكستي خۆتان و هێزەکانتان و سوتانی هەمەر و جێهێشتنی چەک و ڕاکردنتان بەرامبەر خورشید هەرکی لە بیر خەڵک ببەنەوە بەڵام دیسانەوە دووبارەی دەکەینەوە سێ هەزار شەو و ڕۆژی تر ئەم دۆڕانەتان لەبیر هۆزی هەرکی وخەڵکی کوردستان ناچێتەوە.

بەڕێوەبەرایەتی گشتیی باجەکان و خانووبەرەی میری سکاڵای لەسەر شاسوار عەبدولواحید، خاوەنی کۆمپانیای چاڤی بۆ وەبەرهێنانی گەشتیاری، تۆمارکردووە بە تۆمەتی "نەدانی باج" و داوای داخستنی کۆمەڵگەی چاڤی لاندی کردووە. 

بەپێی نووسراوێک کە بە واژووی کەمال تەیب، بەڕێوەبەری گشتیی باجەکان، ئاراستەی قایمقامییەتی سلێمانی کراوە، هاتووە کە "پاش چەندین جار ئاگادارکردنەوەی ئەم خاوەن کۆمپانیایە، کە ناو و ناونیشانی لە نووسراوی بەڕێوەبەرایەتیی گەورە باجدەران ژمارە ١٣٩٤ لە ١٥ـی تەممووزی ٢٠٢٥ دا هاتووە و بەناوی کۆمپانیای چاڤی بۆ وەبەرهێنانی گەشتیاری، بەمەبەستی دانی باجەکەی، بەڵام تاوەکو ئێستا ئەو باجەی کە بە یاسا لەسەری چەسپاوە پاکتاو نەکردووە".

بەڕێوەبەرایەتیی گشتیی باجەکان و خانووبەرەی میری، لە ڕێگەی پارێزەرەکەیانەوە، هەفتەی ڕابردوو لە سلێمانی سکاڵای لەسەر شاسوار عەبدولواحید تۆمارکردووە.

لە نووسراوەکەدا، بەڕێوەبەری گشتیی باجەکان، داوای لە قایمقامییەتی سلێمانی کردووە بەگوێرەی بڕیاری ئەنجوومەنی وەزیران، ژمارە ١٣ لە ٧ـی ئابی ٢٠١٩، شوێنەکە، واتە چاڤی لاند، دابخات

ئەمڕۆ، وەفدێکی وەزارەتی دارایی و ئابووریی حکومەتی هەرێمی کوردستان، بەمەبەستی ئەنجامدانی گفتوگۆ، گەیشتە بەغدادی پایتەخت و بڕیارە لەگەڵ بەرپرسانی حکومەتی فیدراڵی کۆببنەوە.

بەگوێرەی زانیارییەکان، وەفدەکەی هەرێم لە ژمارەیەک بەرپرسی باڵا و پسپۆڕ پێكهاتووە، لەوانە بەڕێوەبەری گشتیی یاسایی، بەڕێوەبەری گشتیی ژمێریاری، سەرۆکی دیوانی چاودێریی دارایی و بەڕێوەبەرێک لە دیوانی چاودێریی دارایی، لەگەڵ چەند بەڕێوەبەرێکی گشتیی دیکە.

وەزارەتی ناوخۆی هەرێم ئاشکرایکرد، کامێراکانی تیژڕەوی تابلۆی ئۆتۆمبێلەکانی عیراقیش تۆماردەکات.

وەزارەتی ناوخۆی حکومەتی هەرێمی کوردستان بڵاویکردەوە، ئەو ئۆتۆمبێلانەی کە هەڵگری تابلۆی ناوەڕاست و خواروی شارەکانی عیراقن یاخود بیانین، لە سەرپێچی تیژڕەوی ئەنجام بدەن لە کامێراکانی هەرێم تۆماردەکرێن.

ئاماژەی بەوەشکرد، پێویستە شۆفێران پاپەندی رێنماییەکانی هاتوچۆ بنن، بە پێچەوانە سزای دارایی دەدرێن.

لە روداوێکی سەختی هاتوچۆدا لە قوشتەپەی سنوری هەولێر دوو کەس گیانیان لەدەستدا.

پەیامنێری کوردسات نیوز رایگەیاند، ئێوارەی ئەمڕۆ لەسەر رێگای کەرکوک – هەولێر، روداوێکی سەختی هاتوچۆ لەنێوان سێ ئۆتۆمبێل و ماتۆڕسکیلێکدا رویدا.

وتیشی، بەهۆی روداوەکەوە دوو کەس گیانیان لەدەستداوە و چوار کەسی دیکەش برینداربوون.

 

 

بۆ بینینی روداوی هاتوچۆکە کلیک لێرە بکە

وەزارەتی دارایی عیراق بۆ رەوانەکردنی موچەی مانگی شەشی فەرمانبەرانی هەرێم، داوای رادەستکردنی داهاتی نانەوتی و بەبانکیکردنی موچەی فەرمانبەران و یەکلایکردنەوەی پرسی هەناردەکردنەوەی نەوت دەکات.

محەمەد عەبدولرەحمان پەیامنێری کوردسات نیوز لە بەغداد، لە سەرچاوەیەکی باڵای نێو حکومەتی هەرێمی کوردستانەوە زانیاری دەستکەوتووە، لە کۆبونەوەکەی رۆژی چوارشەممەی رابردووی نێوان وەفدی حکومەتی هەرێم لەگەڵ وەزارەتی دارایی عیراق، تەیف سامی وەزیری دارایی رەتی کردوەتەوە بڕی 120 ملیار دینار وەکو داهاتی نانەوتی بۆ مانگی شەش لە وەزارەتی دارایی هەرێم وەربگرێت.

ئەو سەرچاوە باڵایەی حکومەتی هەرێم بە پەیامنێری کوردسات نیوزی رایگەیاندووە، وەزارەتی دارایی عیراق، ئەوەی بە وەفدی هەرێم وتوە کە بۆ مانگی حوزەیران ئامادە نیە 120 ملیار دینارەکە وەربگرێت، بەڵکو تەیف سامی داوای کردوە پشت ببەسترێت بە بڕیارەکانی 550ـی ئەنجومەنی وەزیران عیراق، کە ئاماژە بۆ جێبەجێکردنی سیاسەتی کارگێڕی دارایی وڵات دەکات، هەر ئەمەش وایکردوە حکومەتی هەرێم بڕی پارەکە رەوانە نەکات، چونکە دارایی عیراق وەری ناگرێت و دەڵێت ئەو بڕە پارەیە بۆ (کاتی) بووە.

محەمەد عەبدولرەحمان پەیامنێری کوردسات نیوز ئەوەشی خستە روو، وەزارەتی دارایی عیراق داوای تەواوی داهاتەکانی باج و رسوماتی لە وەفدی هەرێم کردووە، کە ئەمە پێچەوانەی مادەی 29ـیە لە یاسای کارگێڕی دارایی عیراق و ئاماژەی بەوەکردوە، کە دەبێت تەواوی داهاتەکانی باج و رسومات بۆ حکومەتی هەرێمی کوردستان بێت.

لەبارەی هەناردەکردنەوەی نەوتی هەرێمی کوردستان، ئەو سەرچاوە باڵایەی هەرێم ئاشکرایکرد، ئێستا گرفتێکی نوێ هاتووەتە ئاراوە، ئەویش کۆمپانیا نەوتییە ئەمریکییەکانە و پێداگری دەکەن کە دەبێت گرێبەستێکی رەسمیان لەگەڵ وەزارەتی نەوتی عیراق هەبێت، بەتایبەت کۆمپانیای HKN کە سەرپەرشتی کۆمپانیا ئەمریکییەکان دەکات، هاوکات باڵیۆزخانەی ئەمریکاش لە بەغداد هاتوەتە سەر هێڵ و پشتیوانی لە داوای کۆمپانیاکان دەکات، بۆ ئەنجامدانی ئەو گرێبەستە کە وەزارەتی نەوتی عێراق ئەمەی پێ قبوڵ نیە و رەتیکردوەتەوە.

ئەوەشی روون کردەوە، حکومەتی هەرێم سەرجەم داواکانی حکومەتی عیراقیان جێبەجێکردوە بۆ هەناردەکردنەوەی نەوت، باشترین رێگەچارەش بۆ دەستپێکردنەوەی نەوتی هەرێم، بەغداد گفتوگۆ لەگەڵ کۆمپانیا نەوتییە ئەمریکییەکان بکات، بۆ ئەوەی دەست بە بەرهەمهێنانی نەوت بکەن لە بیرە نەوتییەکان.

لەلایەکی دیکەوە پەیامنێری کوردسات نیوز لە بەغداد لە سەرچاوەیەکی دیکەی حکومەتی هەرێمی کوردستانەوە رایدەگەیەنێت، ئەمشەو وەفدێکی راوێژی و هونەری سەر بە وەزارەتی دارایی حکومەتی هەرێمی کوردستان، کە پێکدێن لە بەڕێوەبەری یاسایی و ژمێریاری و دیوانی چاودێری دارایی و لەگەڵ چەند بەڕێوەبەرێکی گشتی، لە فڕۆکەخانەی نێودەوڵەتی هەولێرەوە بەرەو بەغداد بەڕێدەکەون. 

وەك پەیامنێری کوردسات ئەوەشی خستەڕوو، هاتنی وەفدەکەی هەرێم بەمەبەستی درێژەدان بە گفتوگۆکانە لەگەڵ حکومەتی عیراق، لەبارەی هەناردەکردنەوەی نەوتی هەرێم و پرسی موچەی مانگی شەش و مانگەکانی داهاتوو.

وەزارەتی پەروەردەی حکومەتی هەرێمی کوردستان ئاگاداریی سەرجەم قوتابیان و خوێندکارانی پۆلی 12ی ئامادەیی دەکاتەوە کە پرسیار و وەڵامی تاقیکردنەوە گشتییەکانی خولی دووەم بۆ ساڵی خوێندنی (2024-2025) رۆژانە بڵاودەکرێتەوە.

لیژنەی باڵای تاقیکردنەوە گشتییەکان لە وەزارەتی پەروەردە لە راگەیەندراوێکدا ئاماژەی بەوەدا، قوتابیان دەتوانن رۆژانە لە رێگەی لینکێکی تایبەتەوە دەستیان بە پرسیار و وەڵامی ئەو بابەتە بگات کە تاقیکردنەوەی تێدا ئەنجام دەدەن.

بەپێی راگەیەندراوەکە، لینکەکە لە رۆژانی تاقیکردنەوەکاندا نوێدەکرێتەوە و بۆ ئەمڕۆش پرسیار و وەڵامی تاقیکردنەوەکانی هەردوو بابەتی "زیندەزانی" و "مێژوو" لەسەر هەمان لینک دانراون.

قوتابیان و خوێندکاران دەتوانن لە رێگەی ئەم لینکەوە پرسیار و وەڵامەکان ببینن:
https://tinyurl.com/12-2025-X2

 

ئەمڕۆ، ئاگرێکی گەورە لە کۆگایەکی هەڵگرتنی پەتاتە لە سنووری ناحیەی کەلەکچی سەربەقەزای شێخان لە پارێزگای دهۆک کەوتەوە، بەهۆیەوە زیانێکی ماددیی زۆر بەر خاوەنەکەی کەوت.

بە گوێرەی زانیارییە سەرەتاییەکان، کۆگاکە زیاتر لە سێ هەزار تۆن پەتاتەی تێدا بووە و بەهۆی ئاگرەکەوە، زیانێکی ماددی کە بە نزیکەی 800 هەزار دۆلاری ئەمریکی دەخەمڵێندرێت، بەر خاوەنی کۆگاکە کەوتووە.

دەستبەجێ دوای ڕووداوەکە، تیمەکانی بەرگریی شارستانی گەیشتوونەتە شوێنی ئاگرەکە و هەوڵەکانیان بۆ کۆنترۆڵکردنی ئاگرەکە دەستپێکردووە.

تا ئێستا هۆکاری ئاگرکەوتنەوەکە روون نییە و لێکۆڵینەوە لەوبارەیەوە بەردەوامە.

 

قوباد تاڵەبانی جێگری سەرۆک وەزیرانی هەرێم پەیامێکی بەهۆی شەهیدبوونی سێ ئەندامی هێزە ئەمنییەکان لەکاتی رووبەڕووبوونەوەکەی لالەزار بڵاوکردەوە و رایگەیاند، "هەموو لایەک دڵنیا دەکەینەوە ناهێڵین خوێنی شەهیدانی چەسپاندنی یاسا بەفیڕۆ بچێت".

دەقی پەیامەکە...

زۆر دڵگران بووین بە شەهیدبوونی سێ ئەندامی هێزە ئەمنییەکان، شەهیدان (سەرمەند عەلی، دیار سەردار حەکیم و ئاری شێخ سوعاد تاڵەبانی) کە لە کاتی جێبەجێکردنی ئەرکی چەسپاندنی یاسا و پاراستنی ئاسایشدا گیانیان بەخت کرد.

لە دڵەوە پرسە و سەرەخۆشی ئاراستەی خانەوادە و کەسوکاری سەربەرزیان و هەموو هەڤاڵ و هاوسەنگەرەکانیان دەکەم و خۆم بە هاوبەشی خەمیان دەزانم و داواکارم خوای گەورە روحی ئەم شەهیدە سەربەرزانە بە بەهەشتی بەرین شاد بکات. هەروەها هیوای چاکبوونەوەی خێراش بۆ بریندارەکان دەخوازم.

هەموو لایەکیش دڵنیا دەکەینەوە ناهێڵین خوێنی شەهیدانی چەسپاندنی یاسا بەفیڕۆ بچێت و تاوانباران رووبەڕووی سزای یاسایی دەکرێنەوە.

لە بەردەڕەش پێنج ئەندامی یەک خێزان بەهۆی روداوێکی هاتوچۆوە گیانیان لەدەستدا.

نەشوان بەرزنجی لێپرسراوی راگەیاندنی تەندروستی بەردەڕەش بە کوردسات نیوزی راگەیاند، کەمێک پێش ئێستا لەسەر رێگای بەردەڕەش-کەڵەک، روداوێکی هاتوچۆ لەنێوان ئۆتۆمبێلێک و بارهەڵگرێک رویدا.

وتیشی، بەهۆی روداوەکەوە ئوتۆمبێلەکە بە تەواوەتی سوتا و تێیدا پێنج ئەندامی یەک خێزان گیانیان لەدەستدا.

دەزگای ئاسایشی هەرێمی كوردستان راگەیەنراوێكی لەبارەی كۆنتڕۆڵكردنی لالەزار بڵاوكردەوە و دەڵێت: بەرەبەیانی ئەمڕۆ هێزەكانمان توانییان هۆتێلی لالەزار لە گەڕەكی سەرچناری سلێمانی كۆنتڕۆڵ بكەن و هەموو ئەو چەكدارانە دەستگیر بكەن كە روبەرووی هێزەكانمان بوونەوە.

دەزگای ئاسایشی هەرێمی كوردستان رایگەیاندووە، لە روبەڕوونەوەیەکی چەکداریدا کە زیاتر لە سێ کاتژمێری خایاند، بەرەبەیانی ئەمڕۆ هێزەکانییان توانییان ئوتێل لالەزار لەگەڕەکی سەرچناری سلێمانی کۆنتڕۆڵ بکەن و هەموو ئەو چەکدارانە دەستگیربکەن کە روبەڕووی هێزەکانیان بوونەوە.

ئاماژەی بەوەشكرد، دوای ئەوەی لەلایەن دادگای لێکۆڵینەوەی ئاسایشەوە فەرمانی دەستگیرکردن بەمادەی (406) لەیاسای سزادانی عیراقی بۆ داواکراو لاهور جەنگی بورهان و ژمارەیەك داواکراوی دیکە دەرچوو، فەرمانەكە ئاڕاستەی هێزەکانییان كرا، بەڵام دوای هەوڵی زۆری هێزەکانییان بۆ خۆڕادەست بوونی داواکراوان بەیاسا و ئاگادارکردنەوەیان لەرێگەی پەیوەندی تەلەفۆنییەوە لەگەڵ خودی داواکراوان و هەروەها لەرێگەی بڵندگۆوە بەناونیشانی (هەر کەس خۆی رادەست بکات ژیانی پارێزراو دەبێت، دڵنیاتان دەکەینەوە ژیانتان پارێزراوە) بەڵام بەهۆی پابەندنەبوون بە یاساوە و لەسەر زاری خۆیان رایانگەیاند؛ کە میلیشیای چەکداریان هەیە و روبەڕووی هێزی ئاسایش دەبنەوە کە هێزێکی رەسمی حکومەتی هەرێمە و بەئەرکی خۆیان هەڵدەستن،  ئەوان دەستیانکرد بە تەقەکردن لەهێزەکانییان و روبەڕوویان بوونەوە بۆ ئەوەی رێگربن لە دەستگیرکردنی تۆمەتبارانی لالەزار.

دەزگای ئاسایشی هەرێمی کوردستان، هەموو لایەک دڵنیا دەکاتەوە کە ئەم پرۆسەیە پاڵپشت بە بڕیاری دادگا هەنگاوەکانی نراوون  لەپێناو جێبەجێکردنی فەرمانی دەستگیرکردن کەلەلایەن دادوەر دەرچووێندراوە، تا هیچ تاقم و لادەرێک لە یاساوە نەبێت و ئاسایش و ئارامی پارێزراو بێت وەک هەمیشە.

ئاشکراشیکرد،، هێزەکانی ئاسایشی سلێمانی، لە بەرەبەیانی ئەمڕۆ توانیان شوێنی مانەوەی تۆمەتباران و ناوچەکە لە لالەزار بەتەواوەتی لەتۆمەتبارانی دەرچوو لە یاسا و میلیشیا چەکدارەکانیان کە هەر شەوی رابردوو خۆیان رایانگەیاند، روبەڕووی هێزە رەسمەکانییان دەبنەوە، کۆنترۆڵ بکەن.

دەزگای ئاسایشی هەرێمی کوردستان راشیگەیاند، بەداخەوە لەئەنجامی روبەڕووبونەوەکان سێ کارمەند لە هێزەئەمنییەکان شەهید بوون و (19) کارمەندی دیکەش بریندار بوون، وێڕای پرسەو وسەرەخۆشی و هاوخەمی قوڵمان لەهەمان کاتدا هیوای زووچاکبوونەوە بۆ بریندارەکان دەخوازن.

ئەوەشی خستەڕوو، لەئێستادا رەوشی سلێمانی ئارام بووەتەوە و هاووڵاتییان بە ئاسایی لە شەقامەکان هاتووچۆدەکەن ودڵنیایی دەدەین کە؛ ئارامی سلێمانی هێڵی سورە و رێگە بە هیچ تاقم و میلیشیا و گروپێکی لەیاسا دەرچوو نادرێت کە ببێتە هۆکاری تێکدانی ئاسایشی هەرێمەکەمان و تەواوی تۆمەتبارانی لالەزار بەپێی یاسا دەستگیرکران و روبەڕووی یاسا دەکرێنەوە.