وەزارەتی ناوخۆی عیراق رفاندنی كچە رۆژنامەنووسێكی بیانی لە بەغداد لە لەلایەن چەند كەسێكی نەناسراوەوە راگەیاند و دەشڵێت، لێكۆڵینەوە لە روداوەكە دەستیپێكردووە و یەكێك لەو ئەنجامدەرانی تاوانەكەش دەستگیركراوە.

وەزارەتی ناوخۆی عیراق لە راگەیەنراوێكدا بڵاویكردەوە، كچە رۆژنامەنووسێكی بیانی لە بەغداد لەلایەن چەند كەسێكی نەناسراوەوە رفێندراوە، روداوەكەش بەجۆرێك بووە، رفێنرەكان بە ئۆتۆمبێل شوێن ئۆتۆمبێلی رۆژنامەنووسەكە كەوتوون و لەئەنجامدا ئۆتۆمبێلی رۆژنامەنووسەكە وەرگەڕاوە، دواتریش رفێنەرەكان رۆژنامەنووسەكەیان رفاندووە.

ئەوەشی خستووەتەڕو، دەستبەجێ هێزە ئەمنییەكان لێكۆڵینەوەی مەیدانیان لە رووداوەكە دەستپێكردووە و لەسەر بنەمای زانیاری هەواڵگری ورد، توانیویانە رفێنەرێك دەستگیربكەن، هەروەها دەستبگرن بەسەر یەكێك لەو ئۆتۆمبێلانەی تاوانەكەی پێ ئەنجامدراوە.

وەزارەتی ناوخۆی عیراق دڵنیاییش دەدات، لێكۆڵینەوەكان لە روداوەكە بەردەوامە و هەوڵەكانیان چڕكردووەتەوە بۆ رزگاركردنی رۆژنامەنووسە بیانییەكە و دەستگیركردنی سەرجەم رفێنەرەكان.

بە فڕۆكەی بێفڕۆكەوان هێرشكرایەسەر سێ ناوچەی جیاواز و بارەگانی حەشدی شەعبی لە بەغداد و بابل و ئەنبار.

میدیاكانی عیراق بڵاویانكردەوە، شەوی رابردوو دوو جار هێرشكراوەتە سەر بنكەیەكی سەربازیی لە ناوچەی جورف سەخر سەر بە پارێزگای بابل و لە قەزای موسیەب سەر بە هەمان پارێزگاش دەستبەسەر چەند فڕۆكەیەكی بێفڕۆكەواندا گیراوە، كە ئامادەكرابوون بۆئەوەی بارەگای پشتیوانی دیپلۆماسی لە فڕۆكەخانەی بەغداد بكەنە ئامانج.

لەلایەكی ترەوە، بە فڕۆكەی بێفڕۆكەوان لیوای 27ی سەر بە حەشدی شەعبی لە قەزای فەلوجە سەر بە ئەنبار بۆردومانكرا و تائێستا هیچ وردەكارییەك لەبارەی هێرشەكە بڵاونەكراوەتەوە.
جارێكیتریش هێرش كرایە سەر بنكەی پاڵپشتی لۆجستی هێزەكانی ئەمریكا ناسراو بە بنكەی ئاسمانیی ڤیكتۆریا لەناو فڕۆكەخانەی نێودەوڵەتی بەغداد و میدیاكانی عیراقیش باس لەوە دەكەن، فڕۆكەكە ئامانجەكەی پێكاوە، بەڵام هیچ وردەكارییەكی تر لەسەر هێرشەكە بڵاونەكراوەتەوە.

ئەوەش دوای ئەوەدێت، شەوی رابردوو وەزارەتی ناوخۆی عیراق رایگەیاند، بە فەرمانی وەزیری ناوخۆ، بەڕێوەبەرانی پۆلیس و هەواڵگریی و فەرماندەی فەوجی دووی لیوای 4ی پۆلیسی فیدراڵی بەغداد لە پۆستەكانیان لادراون و فەرمانی دەستبەسەركردنیشیان بۆ دەرچووە، بڕیاریشدراوە لیژنەیەك بۆ لێكۆڵینەوە و دۆزینەوەی كەلێنە ئەمنییەكان و كەمتەرخەمی ئەو لێپرسراوانە پێكبهێنرێت.

 

د.لەتیف رەشید، سەرۆک کۆماری عیراق ئەمڕۆ دووشەممە لە بەغداد، پێشوازیکرد لە محسن مەندەلاوی، سەرۆکی هاوپەیمانی ئەساسی عیراقی.

لە دیدارەکەدا، دوایین گۆڕانکاری و پێشهاتەکانی گۆڕەپانی عیراق و پەرەسەندنە نێودەوڵەتی و هەرێمییەکان تاوتوێ کران.

سەرۆک کۆمار جەختی لە گرنگیی پەیڕەوکردنی دیالۆگ و هێورکردنەوەی رەوشەکە کردەوە بۆ رێگری لە هەر گرژییەک، هەروەها ئاماژەی بە سیاسەتی هاوسەنگی عیراق کرد لە پاڵپشتیکردنی سەقامگیریی ناوچەکە و پاراستنی بەرژەوەندیی گەلان.

هاوکات جەختیشی کردەوە لەسەر بەردەوامبوون لە رێڕەوەکانی چاکسازی و باشترکردنی ئاستی خزمەتگوزاری و بژێوی هاووڵاتییان، بە جۆرێک کە هاوکار بێت لە چەسپاندنی ئاسایش و سەقامگیری و بەهێزکردنی متمانەی هاووڵاتییان بە دامەزراوەکانی دەوڵەت.

لای خۆشییەوە، محسن مەندەلاوی پاڵپشتی هاوپەیمانییەکەی بۆ ئاڕاستە و رێنماییەکانی سەرۆک کۆمار دەربڕی و ئاماژەی بە گرنگیی یەکخستنی هەڵوێستە نیشتمانییەکان کرد بۆ رووبەڕووبوونەوەی ئاڵنگارییەکانی ئێستا، لەپێناو بەدیهێنانی بەرژەوەندییە باڵاکانی وڵاتدا.

سەرۆکایەتی ئەنجومەنی نوێنەرانی عێراق کۆبوونەوەیەکی لەگەڵ سەرۆک فراکسیۆنەکان ئەنجامدا و تێیدا بڕیاردرا، رۆژی شەممە 11ـی نیسان دیاریبکرێت بۆ ئەنجامدانی دانیشتنی تایبەت بە هەڵبژاردنی سەرۆک کۆمار.

سەرۆکایەتی ئەنجومەنی نوێنەران ئاشکرایکرد، رۆژی شەممە 11ـی نیسان وەک وادەی هەڵبژاردنی سەرۆک کۆمار دیاریکراوە. لە کۆبوونەوەکەدا گفتوگۆ لەسەر چەند یاسایەکی گرنگ و تەواوکردنی دەنگدان لەسەر لیژنە هەمیشەییەکان کرا.

هەروەها ئاماژەی بەوەکرد، پێویستە لایەنەکان بەرپرسیارێتی تەواو هەڵگرن بۆ کۆتاییهێنان بەو رەوشە نالەبارە. سەرۆک فراکسیۆنەکان فراکسیۆنەکان جەختیان لە پێکهێنانی حکومەتێک کردەوە کە بتوانێت رووبەڕووی ئاڵنگارییەکان ببێتەوە.

ئەم بڕیارانەی پەرلەمان وەک هەوڵێک بۆ تێپەڕاندنی قەیرانەکان و جێبەجێکردنی ئەرکە یاساییەکان لە بەرژەوەندی گشتی وڵات دەبینرێت.

باڵیۆزخانەی ئەمریکا لە بەغداد، لە راگەیەندراوێکدا هۆشداری دەداتە هاووڵتیانی ئەمریکیو  داوایان لێدەکات بە زوترین کات عیراق جێبهێڵن و ، هۆشداریی داوە لە بونی مەترسیی جددی بۆ سەر زانکۆ ئەمریکییەکان لە شارەکانی بەغداد، سلێمانی و دهۆک، لەگەڵ ئەو ناوەندانەی تر کە پەیوەندییان بە ئەمریکاوە هەیە.

 باڵیۆزخانەکە ئاماژەی بەوە کردووە کە ئێران و گروپە چەکدارە هاوپەیمانەکانی، هەڕەشەی راستەوخۆیان لە دژی هاووڵاتییان و بەرژەوەندییەکانی ئەمریکا لە هەرێمی کوردستان و عیراق کردووە، بەتایبەت لە رێگەی موشەک و فڕۆکەی بێفڕۆکەوانەوە، کە هێشتا مەترسییان لەسەر ئاسمانی ناوچەکە بەردەوامە.

لە بەشێکی تری هۆشدارییەکەدا، لایەنی ئەمریکی جەختی لەوە کردووەتەوە، کە حکومەتی عیراق نەیتوانیوە رێگری لەم هێرشانە بکات، هەر بۆیە داوا لە سەرجەم هاووڵاتیانی وڵاتەکەی دەکات دەستبەجێ عیراق جێبهێڵن. 

باڵیۆزخانەکە ئاستی مەترسی گەشتکردنی بۆ عیراق گەیاندووەتە "پلەی چوارەم" کە بەرزترین ئاستی مەترسییە، و هۆشداری داوە کە گروپە چەکدارەکان ئەگەری هێرشکردنیان بۆ سەر ژێرخانی وزە، فڕۆکەخانە بازرگانییەکان و هۆتێلەکان هەیە، جگە لە مەترسی رفاندنی هاووڵاتیانی بیانی.

د. لەتیف رەشید سەرۆک کۆماری عیراق لەبارەی هێرشەکەی سەر ماڵی نێچیرڤان بارزانی سەرۆکی هەرێمی کوردستان لە دهۆک، بەیاننامەیەکی بڵاوکردەوە و تێیدا ئیدانەی هێرشەکە دەکات

دەقی راگەیەنراوەکە:

سەرکۆنەی ئەو پەلامارە دەکەین کە ماڵی نێچیرڤان بارزانی سەرۆکی هەرێمی کوردستانی کردە ئامانج لە پارێزگای دهۆک. ئەم هێرشە سەرپێچییەکی جددیە کە هەڕەشە لە ئاسایش و سەقامگیری وڵات دەکات و هەوڵەکان بۆ کەمکردنەوەی گرژییەکان و پاراستنی ئاشتی ناوخۆیی تێکدەدات.

داوا لە لایەنە ئەمنییەکان دەکەین بەدواداچوون بۆ ڕووداوەکە بکەن و بە پێی یاسا لێپرسینەوە لە بەرپرسیارانی بکەن.

ئێمە جەخت دەکەینەوە لەسەر گرنگی بەهێزکردنی هاریکاری و هەماهەنگی نێوان لایەنە پەیوەندیدارەکان لە حکومەتی فیدراڵی و حکومەتی هەرێمی کوردستان بۆ ڕێگریکردن لە دووبارەبوونەوەی ئەو جۆرە پەلامارانە و پاراستنی ئاسایشی هاوڵاتیان و دەزگاو دامەزراوەکانی حکومەت و ڕێگریکردن لە هەر هەوڵێک کە عێراق پلکێش دەکات بۆ ناو ململانێ ناوچەییەکان و کارکردن بۆ بەهێزکردنی یەکێتی نیشتمانی و پەنابردن بۆ گفتوگۆ لە پێناو پاراستنی سەقامگیری عێراق و پاراستنی ئاسایشی نیشتمانیی وڵات.

د.لەتیف جمال ڕەشید
سەرۆک کۆمار
٢٨-٣- ٢٠٢٦

 

د. لەتیف رەشید سەرۆک کۆماری عیراق پەیوەندییەکی تەلەفونی لەگەڵ مەسعود پزیشکیان سەرۆک کۆماری ئێران ئەنجامدا و تیایدا ەرچەشنە هێرشێکی سەربازی بۆ سەر خاکی عیراق رەتکردەوە

دەقی گفتوگۆی نێوان هەردوو سەرۆک کۆمار:

 

لە میانەی ئەو پەیوەندییە تەلەفونیەدا، ئێوارەی ڕۆژی چوارشەممە ٢٥-٣- ٢٠٢٦، سەرۆک کۆمار سەرەخۆشی و ماتەمی خۆی گەیاند بە ڕێبەران و گەلی ئێران  بۆ شەهید بوونی ئایەتوڵڵا سەماحەتی سەید عەلی خامنەیی و ژمارەیەک لە سەرکردە باڵاکانی ئێران و  ژمارەیەک لە مەدەنی بێدیفاع کە لە ئەنجامی ئۆپراسیۆنە سەربازییەکان، بەتایبەتی بە ئامانجگرتنی قوتابخانەیەکی سەرەتایی کچان دەیان کەس بونە قوربانی.

سەرۆک کۆمار هەڵوێستی رەسمی عێراقی دووپاتکردەوە لە ڕەتکردنەوەی جەنگ و نیگەرانیی قوڵی خۆی دەربڕی بەرامبەر پەرەسەندنی ململانێکان و داوای ڕاگرتنی دەستبەجێی دوژمنکارییەکانیکرد و داوایکرد  وتووێژ وەک ئامرازێک بۆ چارەسەرکردنی قەیرانەکان بەکاربێت.

سەرۆک کۆمار جەختیکردەوە کە درێژەدان بە جەنگ خزمەت بە بەرژەوەندی هیچ وڵاتێکی ناوچەکە ناکات، بەڵکوو هەڕەشە لە ئاسایش و سەقامگیری خۆرهەڵاتی ناوەڕاست دەکات.

سەرۆک کۆمار  ئاماژەی بەوەدا کە عێراق گەل و  حکومەتەکەی داوای ئاشتی دەکات و هاوسۆزی خۆی لەگەڵ گەلی دۆستی ئێران دەربڕی و دەستخۆشی لە خۆڕاگرییانکرد لە بەرامبەر دەستدرێژییەکان ، هەروەها ڕوونی کردەوە کە حکومەتی هەرێمی کوردستان و عێراق یەکدەنگن و بە ویستی بەهێز کار دەکەن بۆ پاراستنی سنوورەکانیان و ڕێگرتن لە هەر هەوڵێک بۆ بەکارهێنانی خاکی عێراق بۆ هەڵکشانی گرژییەکان یان هەڕەشەکردن بۆ سەر ئاسایش و سەقامگیری وڵاتانی دراوسێ، لەوانە کۆماری ئیسلامی ئێران.

سەرۆک کۆمار ئیدانەی ئەو هێرشانەی کرد کە هەرێمی کوردستانیان کردۆتە ئامانج و جەختیکردەوە کە ئەم جۆرە کارانە نەک هەر کاریگەری خراپ لە سەقامگیری ناوچەکە دروست دەکەن بەڵکو گرژی و پەرەسەندنەکان زیاتر دەکەن.

سەرۆک کۆمار دووپاتی کردەوە کە عێراق هەرچەشنە هێرشێکی سەربازی بۆ سەر خاکەکەی رەت دەکاتەوە و، بە پێشێلکردنی سەروەری و بە مایەی نیگەرانییەکی گەورە لە قەڵەمی دەدات.

سەرۆک کۆمار جەختیکردەوە لە پێویستی کۆنتڕۆڵکردنی ململانێکان و کارکردن بە پەرۆشەوە بۆ ڕێگریکردن لە فراوانبوونی بۆ وڵاتانی دیکەی ناوچەکە، جەختیکردەوە لە گرنگی ڕاگرتنی دوژمنکارییەکان بۆ پاراستنی ئاشتی ناوچەکە و بەرژەوەندییە هاوبەشەکانی گەلان. 

لای خۆیەوو سەرۆک کۆماری ئیسلامیی ئێران، سوپاس و پێزانینی خۆی بۆ سەرۆک کۆمار دەربڕی بۆ هە ست و هەڵوێستی دڵسۆزانەی و دوپاتیکردەوە لەسەر پەیوەندی قووڵ و پتەوی مێژوویی نێوان عێراق و ئێران و پابه ندبوونی وڵاتەکەی بەپتەوکردنی هاریکاری و دۆستایەتی نێوان هەردوو گەل .
سەرۆک کۆماری ئیسلامیی ئێران ویستی خۆی نیشاندا  بۆ دامەزراندنی سیستەمێکی یەکێتیی ناوچەیی بوو کە وڵاتانی ناوچەکە لەخۆ بگرێت، کە بەشدار بێت لە پەرەپێدانی پەیوەندیی ئابووری و بازرگانیی و چەسپاندنی هاریکاری و شەراکەتی ڕاستەقینە لە نێوان نەتەوە و گەلان و کردنەوەی ڕێگاکانی پەیوەندی لە نێوانیاندا و بەمەش گەشەپێدان و سەقامگیری ناوچەیی بێتە کایەوە.

قوباد تاڵەبانی پیرۆزبایی لە د.دیار محەمەد سدیق و عەلی محەمەد دەکات بەبۆنەی هەڵبژاردنیان بۆ دوو پۆستی جیاواز لە یەکێتیی تۆپی باسکەی عیراق.

قوباد تاڵەبانی پیرۆزبایی لە هەریەک لە د.دیار محەمەد سدیق، بەبۆنەی هەڵبژاردنی وەک سەرۆکی نوێی یەکێتیی تۆپی باسکەی عیراق و عەلی محەمەد، وەک ئەندامی نوێی دەستەی سەرۆکایەتیی یەکێتیی تۆپی باسکەی عیراق کرد.

قوباد تاڵەبانی رایگەیاندووە، "هیوادارم هەردوو بەڕێز لە ئەرکەکانی خۆیاندا سەرکەوتووبن و هاوکار و یارمەتیدەربن لە پێشخستنی تۆپی باسکەی عیراق و کوردستان و هەر ئەوەشیان لێ چاوەڕوان دەکرێت".

وەزارەتی نەوتی عیراق رایگەیاند، مانگی رابردوو هەناردەی نەوتی عیراق 99 ملیۆن بەرمیلی تێپەڕاندووە كە لەو بڕە زیاتر لە 5 ملیۆن بەرمیلی نەوتی هەرێمی كوردستان بووە .

وەزارەتی نەوتی عیراق لە راگەیەنراوێكدا بڵاویكردوەتەوە ، بەپێی ئامار و داتاكانی كۆمپانیای سۆمۆ ، كۆی گشتی هەناردەی نەوتی خاوی عیراق لە مانگی شوباتدا ، گەیشتوەتە 99 ملیۆن و 872 هەزار و 220 بەرمیل و داهاتەكەی زیاتر بووە لە 6 ملیار و 814 ملیۆن و 585 هەزار دۆلار.

هەروەها رونكراوەتەوە ، لە كۆی گشتی هەناردەی نەوتی عیراق لە مانگی شوباتدا ، 93 ملیۆن و 349 هەزار و 840 بەرمیل نەوت لە كێڵگە نەوتییەكانی ناوەراست و باشوری عیراقەوە هەناردەكراوە و 5 ملیۆن و 551 هەزار و 610 بەرمیلیش لە كێڵگە نەوتییەكانی هەرێمی كوردستان لە رێی بەندەری جەیهانی توركی هەناردەكراوەو بڕی هەناردەش لە كیڵگەی گیارەوە 971 هەزار و 130بەرمیل نەوت بووە .

بەهۆی بەردەوامی جەنگی دژی ئێران و داخستنی گەروی هورمز، عیراق بەرهەمهێنانی نەوتی لە كێڵگەكانی باشور بە رێژەی 80% كەمكردووەتەوە.

ئاژانسی رۆیتەرز لە زاری سێ لێپرسراوی كەرتی وزەی عیراقەوە ئاشكرایكردووە، بەهۆی داخستنی گەروی هورمز و وەستاندنی هەناردەی نەوت لەو رێگەیەوە، بڕی نەوتی كۆگاكراو لە عیراق بەشێوەیەكی بەرچاو زیادیكردووە.

ئاماژەی بەوەشكردووە، بەهۆی زۆری بڕی نەوتی كۆگاكراو، حكومەتی عیراق بەرهەمهێنانی نەوتی لە كێڵگەكانی باشوور بە رێژەی 80% كەمكردووەتەوە و لەئێستادا رۆژانە تەنها نزیكەی 800 هەزار بەرمیل نەوت بەرهەمدەهێنرێت، لەكاتێكدا پێشتر رۆژانە نزیكەی 1.3 ملیۆن بەرمیل بەرهەم دەهێنرا.

رۆیتەرز ئاشكراشیكردووە، حكومەتی عیراق داوای لە كۆمپانیای بی پی بەریتانی كردووە بەرهەمهێنانی نەوت لە كێڵگەی نەوتی رومێلە لە 450 هەزار بەرمیلەوە بۆ 350 هەزار بەرمیل كەمبكاتەوە، داوای لە كۆمپانیای "ئینی" ئیتاڵیش كردووە، بەرهەمهێنانی نەوت لە كێڵگەی نەوتی زوبێر لە 330 هەزار بەرمیلەوە بۆ 260 هەزار بەرمیل كەمبكاتەوە.

دژی ئەو هێرشانەی لەسەرەتای جەنگی ئێرانەوە دەكرێتە سەری، عیراق لە ئەنجومەنی ئاسایشی نێودەوڵەتی سكاڵا تۆمار دەكات . 

سەباح نوعمان، وتەبێژی فەرماندەی گشتی هێزە چەكدارەكانی عیراق لە راگەیەندراوێكدا بڵاویكردوەتەوە ، سكاڵایەك بە بەڵگە و وردكارییەوە پێشكەشی ئەنجومەنی ئاسایشی نێودەوڵەتی دەكەن لە دژی ئەو هێرش و پێشێلكارییانەی لە سەرەتای دەستپێكردنی جەنگی ئێرانەوە دەكرێتە سەر عیراق ، هەروەها ئاماژەی بۆ ئەوە كردوە ئامانجیانە لە رێی ئەو سكاڵایەوە  مافی گەلی عیراق بگەرێننەوە . 

هاوكات خالد یەعقوبی، ڕاوێژكاری ئەمنی سەرۆك وەزیرانی عیراق رایگەیاندووە ، بەغداد  لە ئەنجومەنی ئاساشی نێودەوڵەتی سكاڵا تۆمار دەكات دژی هێرشەكان و دەشڵێت ، لە 28 ی شوباتەوە تا ئێستا 80 ئەندامی هێزە ئەمنییەكانی عیراق 

وەزارەتی بەرگریی عیراق لەبارەی هێرشەکەی ئەمڕۆ بۆسەر بنکەی سەربازیی حەبانیە راگەیەنراوێکی بڵاوکردەوە و تێیدا هاتووە، ئیدانەی هێرشەکە دەکەن و ئاماژەی بەوەشدا کە وەڵامیان دەبێت

وەزارەتی بەرگریی عیراق رایگەیاند، بەهۆی بۆردومانكردنی بنكەیەكی تەندروستیی سەربازی لە  ناوچەی حەبانییەی سەر بە پارێزگای ئەنبار كە سەر بە وەزارەتی بەرگرییە، حەوت سەربازی سوپای عیراق گیانیان لەدەستدا و 13 سەربازی تر بریندار بوون و لە ئێستاشدا گەیەنراونەتە نەخۆشخانە.

ئاماژەی بەوەشكردووە، تا ئێستا تیمەكانی فریاكەوتن سەرقاڵی گەڕان و پشكنینن بەناو داروپەردوی بنكە بۆردومانكراوەكەدا.

وەزارەتی بەرگری عیراق ئەوەشی ئاشکرا کردووە، ئەم بەئامانجگرتنە پێشێلكارییەكی زەق و مەترسیداری سەرجەم یاسا نێودەوڵەتییەكانە و بە مافی خۆیانی دەزانن کە سەرجەم رێكارەكان بگرنەبەر بۆ وەڵامدانەوەی ئەم هێرشە.

چوارچێوەی هەماهەنگی ئیدانەی هێرشی سەر دامەرزاەكانی عیراق  و نێردە دیپلۆماسییەكان دەكات و پشتیوانی بڕیارێكی حكومەتی عیراقیش دەكات لەبارەی هێزە ئەمنییەكان.

لە كۆبونەوەی چوارچێوەی هەماهەنگیدا كەشەوی رابردوو بەبەشداری سەرۆكی دەسەڵاتی دادوەری و سەرۆكی دستەی حەشدی شەعبی بەرێوەچوو، تێدا  ئیدانەی  هێرشەكانی سەر حەشدی شەعبی كرا و بەپیشێلكردنی  سەروەری عیراق وەسفكرا.  چوارچێوەی هەماهەنگ ی ئیدانەی هێرشی سەردامەزراوەكانی دەوڵەت و نێردە دیپلۆماسییەكانی كردووە و جەختی لەسەر  گرتنەبەری ڕێكاری یاسایی بەرامبەر ئەنجامدەرانی كردەوە.

بەپێی راگەیەنراوێكی چوارچێوەی هەماهەنگی، لە كۆبونەوەكەدا پشتیوانی لە بڕیارەكەی ئەنجومەنی ئاسایشی نیشتمانی كراوە كە دەسەڵات دەدات بە هێزە ئەمنییەكانی عێراق بۆ بەرگریكردن لە خۆیان.

 

میدیا عیراقییەکان بڵاویانکردەوە، سەرچاوە باڵاکانی حکومەتی عیراق ئاشکرایان کردوە، کە ئەنجومەنی وەزاری بۆ ئاسایشی نیشتمانی، بڕیارێکی گرنگی دەرکردووە و تێیدا دەسەڵاتی تەواوی داوە بە دەستەی حەشدی شەعبی و سەرجەم دەزگا ئەمنییەکانی تری وڵات، تاوەکو بەپێی پرەنسیپی مافی وەڵامدانەوە و بەرگری لە خۆکردن مامەڵە بکەن.

بەگوێرەی زانیارییەکان،  بڕیاری دەسەڵاتی وەڵامدانەوە بە حەشدی شەعبی،  بە مەبەستی روبەڕووبوونەوەی ئەو هێرشە سەربازییانەیە، کە دەکرێنە سەر بنکە و بارەگاکانیان، بەجۆرێک هێزەکان دەتوانن دەستبەجێ بەرپەرچی هەر دەستدرێژییەک بدەنەوە.

لای خۆیەوەئاژانسی هەواڵی عیراقی (واع) لە زاری بەرپرسانی عیراقەوە رایگەیاندوە، کە ئەنجومەنەکە بڕیارێکی توندتری دەرکردووە سەبارەت بە تێکدەرانی ئاسایشی ناوخۆ و  بەپێی بڕیارەکە، فەرمانی دەستگیرکردن بۆ هەموو ئەو کەسانە جێبەجێ دەکرێت کە تێوەگلاون لە هێرشکردنە سەر دامەزراوە ئەمنییەکان، بەرژەوەندییەکانی هاووڵاتیان و نێردە دیپلۆماسییەکان.

هەروەها جەخت کراوەتەوە کە پێویستە ئەو لایەنانەی لە پشت ئەم هێرشانەوەن بۆ رای گشتی ئاشکرا بکرێن.

ئەم هەنگاوانە لە کاتیكدایە، کە گرژییە ئەمنی و سەربازییەکان لە ناوچەکە زیادیان کردووە و حکومەتی عیراق دەیەوێت لە رێگەی ئەم دەسەڵاتانەوە پارێزگاری لە سەروەریی خاکی وڵات و سەلامەتیی هێزە چەکدارەکانی بکات

سەرۆکایەتی کۆمار ئیدانەی بۆردومانکردنی هێزەکانی پێشمەرگە دەکات و لە پەیامێکدا دەڵێت: جەخت دەکەینەوە کە هێزەکانی پێشمەرگە هەمیشە کۆڵەکەیەکی سەرەکی بوون لە سیستمی بەرگریی نیشتمانیدا و بەشداریکی کاریگەریان هەبووە لە بەرەنگاربوونەوەی تیرۆر و چەسپاندنی ئاسایش و سەقامگیری.

 

دەقی پەیامەکەی سەرۆکایەتی کۆمار

 

سەرۆکایەتی کۆمار بە توندترین شێوە سەرکۆنە و ئیدانەی ئەو بۆردومانە دەکات کە هێزەکانی پێشمەرگەی لە سنووری ناوچەی سۆران کردە ئامانج، کە بووە هۆی شەهیدبوونی ژمارەیەک تێکۆشەر و برینداربوونی چەندانی دیکە.

 

وێڕای ئاراستەکردنی پرسە و سەرەخۆشی و هاوخەمی قووڵمان بۆ بنەماڵەی شەهیدانی سەربەرز، بە شکۆوە یادی قوربانیدانی پێشمەرگە قارەمانەکان دەکەینەوە کە گیانی خۆیان لە پێناو پاراستنی ئاسایش و سەقامگیریدا بەخت کرد، هەروەها هیوای چاکبوونەوەی خێرا بۆ بریندارەکان دەخوازین.

سەرۆکایەتی کۆمار جەخت دەکاتەوە کە هێزەکانی پێشمەرگە هەمیشە کۆڵەکەیەکی سەرەکی بوون لە سیستمی بەرگریی نیشتمانیدا و بەشداریکی کاریگەریان هەبووە لە بەرەنگاربوونەوەی تیرۆر و چەسپاندنی ئاسایش و سەقامگیری.

 

لەکاتێکدا داوای پێویستیی ڕێزگرتن لە سەروەریی عێراق و ڕەتکردنەوەی هەموو جۆرە دەستدرێژییەک دەکەین کە هێزە ئەمنییەکان دەکاتە ئامانج، جەختیش دەکەینەوە سەر گرنگیی بەهێزکردنی هەماهەنگی و هاوکاری نێوان هەموو هێزە نیشتمانییەکان، بەو شێوەیەی کە ئاسایشی وڵات بپارێزێت و خوێنی ڕۆڵەکانی بپارێزێت.

 

سەرۆکایەتی کۆمار

٢٤ی ئاداری ٢٠٢٦

دەستەی حەشدی شەعبی كوژرانی فەرماندەیەك و  14 چەكداری لە بۆردومانێكدا لە سنوری پارێزگای ئەنبار راگەیاند.

دەستەی حەشدی شەعبی لە راگەیەنراوێكدا بڵاویكردووەتەوە، هێزەكانیان لە پارێزگای ئەنبار لەلایەن ئەمریكاوە كراونەتە ئامانج و بەهۆیەوە سەعد دوای بعێجی فەرماندەی حەشدی شەعبی لە ئەنبار كوژراوە و لیستی ناوی 14 چەكداری تریشی بڵاوكردووەتەوە كە لەو بۆردومانەدا كوژراون.

لە پارێزگای بابلیش فەرماندەیی ئۆپراسیۆنەكانی جزیرە سەر بە دەستەی حەشدی شەعبی لە جورف سەخر بۆردومانكراوە و لە ئەنجامدا دوو چەكداری لیوای 47 برینداربوون.

حەشدی شەعبی دوپاتیكردووەتەوە ئەو بۆردومانانە پێشێلكردنی سەروەری عیراقە و بەرپرسیارێتی پاراستنی سەروەری وڵاتیشی خستووەتە ئەستۆی هەموو هێز و لایەنە سیاسییەكان كە پێویستە رێگری لەو پێشێلكاری و هێرشانە بكەن.