عیراق
دەزگای ئاسایشی نیشتمانیی عیراق، ئەمڕۆ سێشەممە، رایگەیاند لە چوارچێوەی ئۆپراسیۆنی "سێبەری دادپەروەری"دا کە لەلایەن دەزگاکەوە جێبەجێ دەکرێت، تاوەکو ئێستا زیاتر لە 500 تۆمەتبار دەستگیر کراون.
ئەرشەد حاکم، وتەبێژی رەسمیی دەزگای ئاسایشی نیشتمانی رایگەیاند: زانیارییەکانی ئۆپراسیۆنی سێبەری دادپەروەری کە بە هەماهەنگی لەگەڵ لایەنە دادوەرییەکان جێبەجێ دەکرێت، پێکهاتووە لە جێبەجێکردنی بڕیارەکانی دەستگیرکردنی پێشوو و ئێستا لە بەغداد و پارێزگاکان.
ناوبراو روونیشی کردەوە: تاوەکو ئێستا زیاتر لە 500 تۆمەتبار دەستگیر کراون و ئۆپراسیۆنەکەش بۆ بەدواداچوون و دەستگیرکردنی داواکراوانی تر بەردەوامە.
ئەمریكا گرێبەستی فرۆشتنی چەندین هێلیكۆپتەری جەنگیی و كەرەستەی سەربازی بە عیراق پەسەندكرد كە بەهاكەی دەگاتە نزیكەی 800 ملیۆن دۆلار.
وەزارەتی دەرەوەی ئەمریكا لە راگەیاندراوێكدا ئاشكرایكردووە، دوای ماوەیەكی زۆر لە گفتوگۆ و دانوستان، گرێبەستی فرۆشتنی چەندین هێلیكۆپتەری جەنگیی و كەرەستەی سەربازییان بە عیراق پەسەندكردووە كە بەهاكەی دەگاتە نزیكەی 800 ملیۆن دۆلار و هێلیكۆپتەرەكانی جۆری بێڵ 412 و بێڵ 407 و سیستمەكانی پەیوەندی و ئاراستەكردنی موشەك دەگرێتەوە.
ئاماژەی بەوەشكردووە، بڕیارە كۆمپانیای بێڵ-تێكسترۆن ئەركی جێبەجێكردنی گرێبەستەكە بگرێتە ئەستۆ، ئیدارەی ئەمریكاش بە رەسمی كۆنگرێسی لەو بڕیارە ئاگادار كردووەتەوە و یاسادانەرانیش 30 رۆژ مۆڵەتیان هەیە بۆ پێداچوونەوە بە وردەكارییەكان.
وەزارەتی دەرەوەی ئەمریكا جەختیشیكردووەتەوە، ئەو هەنگاوە دوای داواكارییەكی پێشووتری حكومەتی عیراق دێت بە مەبەستی بەهێزكردنی تواناكانی سوپا و پاراستنی ئاسایشی وڵاتەی.
كەشناسیی عیراق دەستپێكی وەرزی پاییزی راگەیاند و دەڵێت، لە ئەمڕۆ بەدواوە پلەكانی گەرما بەشێوەیەكی بەرچاو گۆڕانكارییان بەسەردادێت.
دەستەی كەشناسیی و بومەلەزەزانی عیراق رایگەیاند، لە ئەمڕۆوە كەشی عیراق بە گشتیی گۆڕانكاریی بەسەردا دێت و دەچێتە ناو كەشێكی پاییزە و فێنكەوە، چونكە بەپێی پێشبینییەكان، پلەكانی گەرما لە ئەمڕۆوە گۆڕانكاری بەرچاویان بەسەردا دێت و تا كۆتایی ئەم مانگەش پلەكانی گەرما زیاتر نزم دەبنەوە وەك ئامادەكارییەك بۆ چوونە ناو چالاكترین نیوەی وەرزی بارانبارین.
كەشناسیی عیراق ئاماژەی بەوەشكردووە، سەرەڕای ئەوەی لە سەرەتای مانگی ئەیلولدا هەندێك لە تایبەتمەندییەكانی كەشی هاوینە دەمێنێتەوە، بەڵام بە گشتی شەوان و بەرەبەیان فێنك دەبێت و تیشكی خۆریش وەك مانگەكانی هەشت و حەوت هەراسانكەر نابێت.
ئاژانسی سه‌لامه‌تیی فڕۆكه‌وانیی یه‌كێتیی ئه‌وروپا، هۆشداریەکی بەپەلەی ئاڕاسەتی کۆمپانیاکانی هێڵی ئاسمانی کردوە و داوای لێکردون تاوەکو کۆتایی مانگی ئەیلولی خۆیان لە بەکارهێنانی ئاسمانی عیراق و ئێران بەدور بگرن.
دوای دەستپێکردنەوەی هێرشەکانی ئەمریکا و ئێران، ئاژانسی سه‌لامه‌تیی فڕۆكه‌وانیی یه‌كێتیی ئه‌وروپا رایدەگەیەنێت، لە ئێستادا ئاسمانی عیراق و ئێران بۆ گەشتی فڕۆکەوانی سەلامەت نییە.
ئاژانسەکە دەڵێت؛ ئەم راسپاردەیە لە چوارچێوەی هەڵسەنگاندنی بەردەوامی مەترسییە ئەمنییەکاندا دەرچوە، بە ئامانجی پاراستنی گیانی گەشتیاران و سەلامەتیی فڕۆکە مەدەنییەکان، داواش دەکات رێگەی جێگرەوە بگرنبەر.
ئەم هۆشدارییە لە کاتێکدایە، ئاڵۆزییه سه‌ربازییه‌كانی نێوان واشنتن و تاران و چالاكیی فڕۆكه بێفڕۆكه‌وان و موشه‌كه‌كان له ناوچه‌كه‌دا، به‌رده‌وام مه‌ترسی بۆ سه‌ر هێڵه ئاسمانییه مه‌ده‌نییه‌كان دروستده‌كات و ده‌بێته هۆی گۆڕینی رێڕه‌وه نێوده‌وڵه‌تییه‌كان.
حەیدەر عەبودی وتەبێژی حكومەتی عیراق رایگەیاند، زەیدی پێشنیازی مانەوەی بەشێك لە هێزەكانی هاوپەیمانانی رەتكردووەتەوە، لە مانگی داهاتووشدا دەنگ لەسەر پڕۆژە بودجەی 2027 دەدرێت.
عەبودی لە كۆنفرانسێكی رۆژنامەوانیدا رایگەیاند: پڕۆژە بودجەی 2027 جیاواز دەبێت و بڕیارە ئەنجومەنی وەزیران لە مانگی ئەیلولی ئەمساڵدا دەنگی لەسەر بدات.
وتیشی: حكومەت تاوتوێی پرسی بەهەمیشەیی كردنی گرێبەستەكان و دیاریكردنی تێچووی داراییان دەكات.
حەیدەر عەبودی باسی لەوەشكرد: گەڕانەوەی چەك بۆ دەستی دەوڵەت لەپێشینەی كارەكانی حكومەتی عیراقە و ئەو رێكارانەشی حكومەت لەوبارەیەوە ئەنجامی دەدات، بەپێی یاسا و دەستورە.
بە وتەی عەبودی: عەلی زەیدی سەرۆك وەزیرانی عیراق پێشنیازێكی بۆ هێشتنەوەی بەشێك لە هێزەكانی هاوپەیمانی نێودەوڵەتی لە دوای 30ی ئەیلول رەتكردووەتەوە.
ئەوەشی ئاشكرا كرد: زەیدی گەشتێك بۆ وڵاتانی ئەوروپا لە ناوەڕاستی مانگی ئەیلول ئەنجام دەدات، كە پاریس و بەرلین لەخۆدەگرێت و باسی پرسی ئەمنی و چەندین بابەتی تر دەكرێت.
سەبارەت بە پرسی گەندەڵیش وتی: حكومەتی عیراق دەستكەوتی وای بەدەستهاتووە كە لە ساڵی 2003ەوە بەدەستنەهاتووە و هەروەها تاوتوێی هەمەجۆركردنی سەرچاوەكانی داهات دەكات.
دادگای لێکۆڵینەوەی تاوانەکانی دژە گەندەڵی ناوەندی بە سەرۆکایەتیی دادوەر ضیاء جەعفەر، ئەمڕۆ دووشەممە، دەستبەسەرداگرتنی بڕە پارەیەکی زۆر، موڵک و ئۆتۆمبێلی سەر بە تۆمەتباری دەستبەسەرکراو (عەلاء موحسین خەلەف)، بەڕێوەبەری نووسینگەی تۆمەتباری دەستبەسەرکراو (عەدنان جومەیلی) ئاشکرا کرد، ئەمەش لەسەر بنەمای لێکۆڵینەوە بەردەوامەکانی لەگەڵیدا.
دادوەری لێکۆڵینەوەی تایبەتمەند لە راگەیەندراوێکدا روونی کردەوە، رێکارەکانی لێکۆڵینەوە و بەدواداچوون بوونە هۆی دەستبەسەرداگرتنی بڕی حەوت ملیار دیناری عیراقی، جگە لە پێنج ملیۆن و نیو دۆلاری ئەمریکی.
دادوەر ئاماژەی بەوەش دا: لێکۆڵینەوەکان بوونە هۆی دەستبەسەرداگرتنی 35موڵک و 6 ئۆتۆمبێلی سەر بە تۆمەتبارەکە.
وەزارەتی کار و پێداویستییە کۆمەڵایەتییەکان، ئەمڕۆ دووشەممە، خەرجکردنی موچەی مانگی ئەیلوولی 2026ی بۆ کرێکارانی خانەنشینکراوی دەستەبەرکراو لە بەغداد و سەرجەم پارێزگاکان راگەیاند.
خولود حەیران فنجان، بەرێوەبەری گشتیی فەرمانگەی خانەنشینی و دەستەبەری کۆمەڵایەتیی کرێکاران، رایگەیاند: فەرمانگەکە تەواوی رێکارەکانی پەیوەست بە بەخشینی موچەی کرێکارانی خانەنشینکراوی دەستەبەرکراوی لە نێوەڕۆی ئەمڕۆ دووشەممە، رێکەوتی 31/8/2026 ەوە کۆتایی پێ هێناوە.
لە راگەیەندراوەکەدا، فنجان داوای لە سەرجەم خانەنشینکراوان کردوووە سەردانی بنکەکانی دابەشکردن بکان بۆ وەرگرتنەوەی موچەکانیان.
پشتگیری سەرۆکی ئەنجومەنی نوێنەرانی عیراق و ئیمزای پێویست بۆ سێ داواکاری گرنگ لە کۆکراوەتەوە و ئاڕاستەی لیژنەی دارایی ئەنجومەنەکە کراوە.
د. بڕیار رەشید، ئەندامی ئەنجومەنی نوێنەرانی عیراق رایگەیاندووە: بە ئیمزای بەشێک لە پەرلەمانتاران و پشتگیری سەرۆکی پەرلەمان؛ سێ داواکاریی گرنگ ئاڕاستەی لیژنەی دارایی کران، تا لە بودجەی داهاتوودا چارەسەر بکرێن.
د. بڕیار رەشید دەڵێت: لە ماوەی رابردوودا، بۆ هەر یەکێک لەو سێ داواکارییە گرنگە، ئیمزای پێویستی ئەندامانی ئەنجومەنی نوێنەرانی عیراقمان کۆکردووەتەوە و بە پشتگیری سەرۆکی پەرلەمانەوە، بە شێوەیەکی رەسمی ئاڕاستەی لیژنەی دارایی کراون، بۆ ئەوەی لە چوارچێوەی بودجەی گشتیی داهاتوودا چارەسەرێکی یاسایی و دارایییان بۆ بدۆزرێتەوە
د. بڕیار رەشید دەڵێت سێ داواکارییەکە بریتین لە:
یەکەم؛ دەرچووانی کۆلێژەکانی پزیشکی ددان و دەرمانسازی، داواکاری بۆ دابینکردنی دەرفەتی دامەزراندن و تەرخانکردنی پلەی تایبەت بۆ ئەو دەرچووانەی کە بەهۆی بارودۆخی دارایی و ئابووریی ساڵانی رابردووەوە، دەرفەتی دامەزراندنیان بۆ نەڕەخساوە، بە تایبەتی لەبەر پێویستیی بەردەوامی نەخۆشخانە و دامەزراوە تەندروستییەکان بە پسپۆڕییەکانیان.
دووەم؛ پلەبەرزکردنەوە و شایستە داراییەکانی فەرمانبەرانی هەرێمی کوردستان، داوامان کردووە ماف و شایستە دارایی و کارگێڕییەکانی پلەبەرزکردنەوەی فەرمانبەران، کە لە ساڵانی رابردوودا بەهۆی کێشە داراییەکان دواخراون، بە شێوەیەکی دادپەروەرانە جێبەجێ بکرێن و جیاوازی لەنێوان فەرمانبەرانی هەرێم و ناوچەکانی دیکەی عیراق نەکرێت.
سێهەم؛ مامۆستایانی وانەبێژی لادراو، پشتیوانیمان لە داواکاریی نزیکەی 700 مامۆستای وانەبێژ کردووە، کە هەندێکیان بۆ ماوەی 10 تا 12 ساڵ خزمەتیان کردووە، بەڵام لە پرۆسەی گۆڕینی وانەبێژان بۆ گرێبەست بەشدار نەکراون داوامان کردووە مافیان بگەڕێندرێتەوە، خزمەتەکانیان لەبەرچاو بگیرێت و پێداویستیی دارایی بۆ گەڕاندنەوەیان بۆ دامەزراوە پەروەردەییەکان دابین بکرێت.
د. بڕیار رەشید ئاماژەی بەوەشداوە: ئەم هەنگاوانە لە چوارچێوەی هەوڵ و کاری پەرلەمانیدان و بە مانای دڵنیایی سەد لە سەدی جێبەجێبوونیان نییە، بەڵام بەدواداچوونمان بەردەوام دەبێت، هیوامان وایە سەرجەم پەرلەمانتاران، لە هەموو فراکسیۆنەکان و بەتایبەتی فراکسیۆنە کوردستانییەکان، هاوکار و پشتیوانی ئەم داواکارییانە بن تا بە هەوڵی هاوبەش بگەنە ئەنجام.
چەند رۆژێكە بەنزینی جۆری موحەسەن پاڵپشتیكراو لە وێستگەكانی دابەشكردنی سووتەمەنی لە پارێزگای كەركوك نەماوە، ئەمەش نیگەرانی و ناڕەزایەتییەكی زۆری لای شۆفێران دروستكردووە.
سەرچاوەیەك لە بەشی دابەشكردنی بەرهەمە سووتەمەنییەكانی كەركوك بەپەیامنێری كوردسات نیوز ی راگەیاند، ئەم كێشەیە تەنیا كەركووكی نەگرتووەتەوە بەڵكو سەرجەم پارێزگاكانی عیراقی گرتووەتەوە، هۆكارەكەشی بوونی كێشەیەكی تەكنیكیلە پاڵاوگەكاندا.
لێپرسراوانی بەشەكە ئاماژەیان بەوە كردووە كە بڕیارە لە دوای نیوەڕۆی ئەمڕۆوە كەمێك لەو بەنزینە بگاتەوە وێستگەكان و بەسەر شۆفێراندا دابەش بكرێت.
بەیانی ئەمڕۆ دووشەممە، جووڵەی فڕۆکە لە ئاسمانی عیراقدا بە تەواوی گەڕایەوە بۆ دۆخی ئاسایی، ئەمەش دوای راگرتنێکی کاتی کە بۆ چەند کاتژمێرێک لە شەودا خایەند بەهۆی پێشهاتە ئەمنییەکان و ئاڵۆزییە سەربازییەکانی نێوان ئێران وئەمریکا لە ناوچەکەدا.
ئاسمانی عیراق بۆ چەند کاتژمێرێک دوای نیوەشەوی رابردوو چۆڵبوونی نیمچە تەواوەتیی لە شەپۆلی فڕۆکە رێبوارەکاندا بەخۆیەوە بینی، بەبێ ئەوەی هیچ بڕیارێکی رەسمی بۆ داخستنی ئاسمانەکە دەربچێت یان هەڵوەشاندنەوە و دواخستنی گەشتە ئاسمانییە هاتوو و رۆیشتووەکان تۆمار بکارێت.
جووڵەی تێپەڕبوونی فڕۆکەکان بە شێوەیەکی پلەبەپلە و سنووردار بەرەو فرۆکەخانەی نێودەوڵەتیی هەولێر دەستی پێ کردەوە، پێش ئەوەی بەیانی ئەمڕۆ لە سەرانسەری ئاسمانی عیراقدا بگەڕێتەوە ئاستی ئاسایی خۆی، لەگەڵ جەختکردنەوەی کەشناسی و گەشەپێدەرانی فڕین لەوەی دۆخی ئاسمانی وڵات بە تەواوی جێگیر و ئارامە.
سەرۆك وەزیرانی عیراق فەرمانیكرد بە دیاریكردن هەزار دۆنم زەوی لە هەر پارێزگایەك بۆ ئەنجامدانی پڕۆژەی پیشەسازی.
عەلی زەیدی، سەرۆك وەزیرانی عیراق، لە دانیشتنی سێیەمی ئەنجومەنی هەماهەنگی پیشەسازیەكان رێنماییدا بە هەموو پارێزگاكان بۆ تەرخانكردنی زەوییەك بە رووبەری (1000) دۆنم بۆ ئەو پڕۆژە پیشەسازیانەی كە لەلایەن بەڕێوەبەرایەتی گشتی گەشەپێدانی پیشەسازییەوە مۆلەتیان پێدەدرێت دەكرێن.
هەر لە كۆبونەوەكەدا، سەرۆك وەزیرانی عیراق جەختی لە گرنگی بووژاندنەوەی پیشەسازی نیشتمانی كردەوە وەكو كۆڵەكەی سەرەكی ئابووری، و ئاماژەی بەوەدا، بەدیهێنانی ناسنامەی پیشەسازی وڵات پێویستی بە كۆنتڕۆڵكردنی سنوورەكان، جێبەجێكردنی سیستمی ئەسیكۆدا، و وەرگرتنی پێشوەختەی باج و گومرك هەیە.
دەستەی دەسپاکی فیدراڵی رایگەیاند، کۆتایی بە رێکارەکانی فرۆشتنی موڵکێک بە رووبەری 550 دۆنم لە پارێزگای ئەنبار هێناوە و رێگریی لە بەهەدەردانی نزیکەی 19.25 ملیار دینار لە سامانی گشتی کردووە.
دەستەکە ئاماژەی بەوە داوە کە موڵکەکە دەکەوێتە چوارچێوەی نەخشەی فراوانکردنی داهاتووی شارۆچکەی رەمادی. لێکۆڵینەوەکانی تیمی دەستەکە پێشێلکارییان لە رێکارەکانی راگەیاندن و فرۆشتندا دۆزیوەتەوە، جگە لە دیاریکردنی نرخێک بۆ موڵکەکە کە زۆر کەمتر بووە لە بەهای راستەقینەی خۆی و بەبێ وەرگرتنی رەزامەندییە یاساییەکان لە شارەوانیی رەمادی ئەنجام دراوە.
روونیشی کردەوە: موڵکەکە بە بڕی 13.75 ملیار دینار فرۆشرابوو، لە کاتێکدا لێکۆڵینەوەکان دەریانخستووە بەهای راستەقینەی دەگاتە 33 ملیار دینار، بە جیاوازیی 19.25 ملیار دینار.
دەستەی دەستپاكی عیراق فەرمانی حەوت ساڵ زیندانیكردنی بۆ تەڵال زوبەعی و بریكاری وەزارەتی نەوت دەركرد، لەگەڵ پێدانی 123 ملیار دینار وەك سزای ماددیی.
دەستەی دەستپاكی لە راگەیەنراوێكدا ئاماژەی بەوەكرد، دادگا بڕیاری حەوت ساڵ زیندانیكردنی بۆ هەریەك لە تەڵال زوبەعی پەرلەمانتاری پێشوو و عەلی بەهادلی بریكاری وەزارەتی نەوت بۆ عەمباركردن و دابەشكردن دەركردووە، بە تۆمەتی تێوەگلانیان لە تاوانی زیادكردنی سامانیان بە شێوەیەكی نایاسایی و گوماناوی.
بەپێی فەرمانەكە، تەڵال زوبەعی 35 ملیار دینار لە سەروەتەكەی بە بێ ئەوەی سەرچاوەكانی دیاربێت زیادیكرئەوە، دادگاكەش لەگەڵ سزای زیندانیكردنەكەدا بری 70 ملیار دینار سزای پێبژاردن كردوە، ئەوەش دوو هێندەی ئەو پارەیە كە بە نارەوا دەستیكەوتوە.
بریكاری وەزارەتی نەوتیش بۆ كاتی دابەشكردن، نزیكەی 26 ملیار و 500 ملیۆن دیناری لە سامەنەكەی زیادیكردوە، دادگاكەش پابەندیكردوە بە پێدانی 53 ملیار دینار وەك سزای پێبژاردن.
خالید شوانی، وەزیری دادی عیراق لە تازەترین لێدوانیدا وردەکاریی نوێی دەربارەی دۆسیەی گواستنەوەی زیندانییان لە زیندانەکانی سوریاوە بۆ عیراق و پرۆسەی جێبەجێکردنی سزای سێدارە ئاشکرا کرد، لە کاتێکدا ئامارەکان رەگەزنامە و پێکهاتەی هێزە خۆکوژ و زیندانییەکان لە وڵاتدا دیاری دەکەن.
وەزیری داد لە چاوپێکەوتنێکدا رایگەیاند: بە هەماهەنگی لەگەڵ هاوپەیمانی نێودەوڵەتی و بە رەزامەندیی ئەنجومەنی وەزاریی ئاسایشی نیشتمانی، لە ماوەی 24 رۆژدا 5704 زیندانیی تیرۆریست لە زیندانەکانی سوریاوە گوازراونەتەوە بۆ عیراق، بەبێ ئەوەی هیچ پێشێلکارییەکی ئەمنی یان مافی مرۆڤ تۆمار بکرێت.
شوانی ئاماژەی بەوەش کرد: فایەق زەیدان، سەرۆکی ئەنجومەنی باڵای دادوەری بە شێوەیەکی راستەوخۆ سەرپەرشتی پرۆسەی لێکۆڵینەوەکان دەکات و لیژنەیەکی تایبەتی لە 11 دادوەر پێکهێناوە کە لێکۆڵینەوەی سەرەتاییان تەواو کردووە و دۆسیەکان دەنێردرێنە دادگا پەیوەندیدارەکان.
جەختیشی کردەوە: ئەو کەسانەی تاوانیان بەرانبەر گەلی عیراق ئەنجامداوە لە عیراق دادگایی دەکرێن، لە کاتێکدا بیانییەکانی تر دوای لێکۆڵینەوە ڕەوانەی وڵاتەکانیان دەکرێنەوە.
سەبارەت بە دواکەوتنی جێبەجێکردنی سزای سێدارەی 14 هەزار سزادراو، شوانی روونی کردەوە: هیچ فشارێکی نێودەوڵەتی لە پشتەوە نییە، بەڵکو پەیوەستە بە مافی یاسایی تۆمەتباران بۆ داواکردنی دووبارە دادگاییکردنەوە لە کاتی خستنەڕووی بەڵگەی نوێ، کە ئەمەش پرۆسەی جێبەجێکردن دوادەخات.
هاوکات بەپێی زانیارییەکانی سەنتەری نەخیل بۆ مافەکان و ئازادیی رۆژنامەگەری، لە نێوان ساڵانی 2003 بۆ 2013 زیاتر لە 2 هەزار خۆکوژ خۆیان لە عیراق تەقاندووەتەوە بەم شێوەیەیی لای خوارەوە:
_فەلەستینی و ئوردنییەکان: بە 1200 خۆکوژ لە پلەی یەکەمدا دێن.
_سعودییەکان: 300 خۆکوژ بوون، و لە ئێستادا تەنها 10 سزادراوی سعودی لە زیندانەکانی عیراقدا ماون.
_یەمەنی و سورییەکان: 250 خۆکوژی یەمەنی و 200 خۆکوژی سوری تۆمارکراون.
_وڵاتانی کەنداو: کەمترین ژمارە هی وڵاتانی قەتەر، ئیمارات و بەحرێن بوون کە کۆی گشتییان تەنها 20 خۆکوژ بووە.
سەنتەری نەخیل ئاشکرایشی کرد: لە ئێستادا 1400 سزادراوی بیانی و عەرەب لە زیندانەکانی عیراقدا هەن، لە کاتێکدا زۆرینەی ئەو زیندانییانەی لە سوریاوە وەردەگیڕێنەوە خەڵکی عیراق، تونس و مەغریبن.
نزار ئامێدی، سەرۆک کۆماری عیراق، ئەمڕۆ یەکشەممە 30ـی ئابی 2026، لە کۆشکی سەلامی بەغداد، پێشوازی لە رێبوار تەها، جێگری یەکەمی پارێزگاری کەرکوک کرد.
بەپێی راگەیەندراوێکی سەرۆکایەتی کۆمار، لە دیدارەکەدا سەرۆک کۆمار جەختی کردووەتەوە لە پێویستی باشترکردنی خزمەتگوزارییەکان لەپارێزگای کەرکوک و دابینکردنی پێداویستییەکانی هاووڵاتیان و کارکردن بۆ تێپەڕاندنی ئەو ئاستەنگانەی رووبەڕوویان دەبنەوە، بەجۆریک کە هاوکاربن لەباشترکردنی پێشکەشکردنی خزمەتگوزارییەکان و بەرجەستەکردنی سەقامگیری و گەشەپێدان لەپارێزگاکەدا.
لە راگەیەندراوەکەی سەرۆکایەتی کۆماردا هاتووە، سەرۆک کۆمار گوێی لە روونکردنەوەیەکی وردی ریبوار تەها گرتووە سەبارەت بە رەوشی ئێستای پارێزگای کەرکوک و پێویستییە هەرە سەرەکیەکانی و پلانەکان داهاتوو بۆ باشترکردنی خزمەتگوزاری و گەشەپێدانی شارەکە.
دەستەی گشتیی گومرک، رایگەیاند کە رێگرییان لە هەوڵێکی قاچاغبردنی بڕی 83 هەزار دۆلاری ئەمریکی کردووە لە فڕۆکەخانەی نێودەوڵەتیی بەغداد.
لە بەیاننامەیەکی دەستەکەدا بڵاوی کردووەتەوە: دەستمان بەسەر 83 هەزار دۆلاری ئەمریکی گرت لە فڕۆکەخانەی نێودەوڵەتیی بەغداد، و ئاماژەی بەوە دا: گەشتیارێکی عیراقی هەوڵی داوە ئەو بڕە پارەیە بێ ئەوەی رایبگەیەنێت، بیباتە ژوورەوە، بەڵام لە کاتی پشکنینی وردی کەلوپەلەکانیدا لە هۆڵی گەیشتنی فڕۆکەخانەکەدا دۆزراوەتەوە.
دەستەی گشتیی گومرک جەختیشی کردەوە: رێکارە یاساییەکان بەرانبەر گەشتیارەکە و بڕە پارە دۆزراوەکە بەپێی یاسا و رێنماییە کارپێکراوەکان گیراونەتە بەر، ڕوونیشی کردەوە کە ئەم ئۆپراسیۆنە لە چوارچێوەی هەوڵە بەردەوامەکانیاندایە بۆ بەرەنگاربوونەوەی هەوڵەکانی قاچاغبردن و پاراستنی ئابووریی نیشتمانی.