عیراق
ئەنجومەنی باڵای دادوەری عیراق ئەو ماددانەی ئاشكراكرد كە عەجاجی پێ سزا درا.
ئەنجومەنی باڵای دادوەری بڵاویكردەوە، دادگای باڵای تاوانەكانی عیراق سزای لەسێدارەدانی بۆ تاوانبار عەجاج ئەحمەد حەردان دەركردووە كە بە جەلادی ئەنفال ناسراوە، ئەم بڕیارەش لەسەر بنەمای بەشداریكردنی لە تاوانەكانی كۆمەڵكوژی دژی دەستگیركراوانی كورد لە بیابانی سەماوە دراوە كە تێیدا هەزاران كەس بوونە قوربانی.
ئاماژەی بەوەشكرد، عەجاج سیاسەتی دڕندانەی دژی هەزار و 68 هاووڵاتی ئەنفالكراو پەیڕەو كردووە، كە پێكهاتبوون لە ژن و منداڵ و بەساڵاچووان، هەروەها جەختی لەوە كردەوە، سزاكە بەپێی ماددەكانی 11، 12، 15 و 24 لە یاسای دادگای باڵای تاوانەكان دەركراوە و هیچ بوارێكی تری بۆ تانەدان نەهێشتووەتەوە.
دەستەی گشتی کەشناسی و بوومەلەرزەزانی عێراق هۆشداری دەداتە هاووڵاتیان لە هاتنی شەپۆلێکی چڕی خۆڵبارین کە لە رۆژی هەینییەوە زۆربەی ناوچەکانی وڵات دەگرێتەوە و کاریگەرییەکی بەرچاوی لەسەر مەودای بینین دەبێت.
بە پێی راپۆرتی بەشی پێشبینی کەشوهەوا، پێشبینی دەکرێت لە رۆژی هەینی بەهۆی کاریگەریی بارستە هەوایەکی مامناوەند و چالاکبوونی خێرایی با، شەپۆلێکی خۆڵبارین لە ناوچەکانی رۆژئاوا، ناوەڕاست و باشوری رۆژئاوای عیراق دەست پێبکات.
دەستەی کەشناسی عیراق ئاشکرایکرد، سبەینێ خێرایی با لە نێوان (50 بۆ 60) کم/سەعات دەبێت، ئەمەش دەبێتە هۆی بەرزبوونەوەی تۆز و خۆڵێکی زۆر.
ئاماژەی بەوەشکرد، لە ناوچە بیابانی و کراوەکاندا، مەودای بینین بۆ کەمتر لە یەک کیلۆمەتر کەمدەبێتەوە.
کەشناسی عیراق راشیگەیاند، شەپۆلەکە لە کاتەکانی شەوی هەینیدا بەرەو ناوچەکانی تری وڵات درێژدەبێتەوە و تا رۆژی شەممە لە ناوچەکانی ناوەڕاست و باشور بەردەوامی دەبێت.
کەشناسی داوا لە هاووڵاتیان دەکات، بەتایبەت شۆفێرانی رێگا دەرەکییەکان و ئەو کەسانەی نەخۆشیی (رەبۆ و هەستیاریی)یان هەیە، رێکاری پێویست بگرنەبەر و لە کاتی شەپۆلەکەدا بە وریاییەوە مامەڵە بکەن بۆ پاراستنی تەندروستییان.
محەمەد شیاع سودانی سەرۆک وەزیرانی عیراق باس لە کەمبووەنەوەی قەرزە دەرەکییەکان و ئیمزاکردنی گرێبەستەکانی عیراق دەکات.
محەمەد شیاع سودانی لە کۆنگرەیەکی رۆژنامەوانیدا رایگەیاند: لە ماوەی سێ ساڵی تەمەنی حكومەت متمانەمان بۆ خەڵك گەڕاندوەتەوە و دوو دڵ نەبووین لە بەگژداچوونەوەی ئاستەنگییەكان، عیراق گرێبەست و رێككەوتنی لەگەڵ كۆمپانیا گەورەكانی جیهان ئیمزا كردووە، هەروەها توانای گشتی پاڵاوتنی پاڵاوگەكانی عیراق بەرزبوەتەوە
سودانی وتیشی: قەرزە دەرەكییەكان لە ماوەی چوار ساڵدا لە 13 ملیار دۆلارەوە كەمبوەتەوە بۆ 10 ملیار دۆلار، هەروەها گەیشتوینەتە دابینكرنێكی ناوازە لە بواری ئاو و ئاوەڕۆ.
محەمەد شیاع سودانی ئاماژەی بەوەشدا: 1143 بینای نوێی خوێندنگەمان دروست كردووە.
وتەبێژی وەزارەتی پلاندانان رایگەیاند، كۆمەڵێك پڕۆژەی نوێی بۆ كەمكردنەوەی رێژەی هەژاری دەخرێنە بواری جێبەجێكردنەوە.
عەبدولزەهرە هینداوی، وتەبێژی وەزارەتی پلاندانانی عیراق بە رۆژنامەی سەباحی رایگەیاند، كۆمەڵێك پڕۆژەی نوێی وەك بەشێك لە سێیەمین ستراتیژیی كەمكردنەوەی رێژەی هەژاری لەلایەن وەزارەتەكەیانەوە جێبەجێ دەكرێن، بەڵام دەستپێكردنی ئەو پڕۆژانە پەیوەستە بە پەسەندكردنیان لەلایەن حكومەتی نوێوە لە قۆناغی داهاتوودا.
عەبدولزەهرە وتیشی: ئامانجی ئەنجامدانی ئەو پرۆژانە بەهێزكردنی ژێرخانی ئابوری و دابینكردنی هەلی كار و باشتركردنی گوزەران وبەرزكردنەوەی ئاستی خزمەتگوزارییە لە گوند و ناوچە دوورەدەستەكان.
راشیگەیاند، ستراتیژییە نوێیەكە لایەنی ئابوری، پاراستنی كۆمەڵایەتی و باشتركردنی خزمەتگوزارییە سەرەتاییەكان لەو پارێزگایانەی زۆرترین پێویستییان پێیەتی، لەخۆدەگرێت.
کۆمپانیای ئاسیاسێڵ، وەک پێشەنگی دابینکاری خزمەتگوزارییە دیجیتاڵییەکان لە عیراق، لە چوارچێوەی پڕۆژەکانی بەرپرسیارێتی کۆمەڵایەتیدا، بەخشینێکی دارایی بە بڕی 125 ملیۆن دینار بۆ پاڵپشتیکردنی کەرتی تەندروستی و چاودێری منداڵان راگەیاند.
ئەم هەنگاوەی کۆمپانیاکە بە مەبەستی بەهێزکردنی ژێرخانی مرۆیی و پزیشکی ئەو دامەزراوانەیە کە خزمەتگوزاریی سەرەکی پێشکەش بە هاووڵاتیان دەکەن.
بڕی بەخشینەکە بە شێوەیەکی یەکسان و بە بڕی 62.5 ملیۆن دینار بۆ هەر لایەنێک، بەسەر هەریەکە لە "ماڵی عیراقی بۆ داهێنان" لە بەغدا و "نەخۆشخانەی هیوا" بۆ نەخۆشییەکانی شێرپەنجە لە سلێمانی دابەشکرا.
دەقی راگەیەنراوەکەی ئاسیاسێڵ
کۆمپانیای ئاسیاسێڵ پێشەنگی دابینکاری خزمەتگوزاری پەیوەندییەکان و چارەسەرە دیجیتاڵییەکان لە عێراق، ڕایگەیاند کە بڕی 125 ملیۆن دیناری وەکو بەخشینی دارایی پێشکەش کرد بە کەرتی تەندروستی و چاودێریی منداڵان، ئەمەش لە چوارچێوەی دەستپێشخەرییە بەردەوامەکانیەتی لە بواری بەرپرسیارێتیی کۆمەڵایەتیدا.
بڕی بەخشینەکە بەشێوەیەکی یەکسان دابەشکرا لە نێوان ماڵی عێراقی بۆ داهێنان لە بەغدا و نەخۆشخانەی هیوا بۆ نەخۆشییەکانی شێرپەنجە لە سلێمانی، کە بۆ هەر لایەنێک بڕی 62.5 ملیۆن دینار تەرخانکرا، بە مەبەستی پاڵپشتیکردنی پێداویستییە پزیشکی و مرۆییەکانی هەردوو دامەزراوەکە و بەهێزکردنی هەوڵەکانیان لە خزمەتکردنی منداڵان و نەخۆشاندا.
لە ماوەی هەفتەی ڕابردوودا شاندێکی ئاسیاسێڵ، دوو سەردانی فەرمییان بۆ هەردوو دامەزراوەکە لە بەغدا و سلێمانی ئەنجامدا و تێیدا بەخشینەکە ڕادەستکرا، ئەمەش وەک دووپاتکردنەوەی پابەندبوونی کۆمپانیاکە بە پاڵپشتیکردنی دەستپێشخەرییە مرۆیی و تەندروستییەکان کە کاریگەرییەکی ڕاستەوخۆیان لەسەر ژیانی کۆمەڵگا هەیە.
بەم بۆنەیەوە، بەڕێز فاروق مستەفا ڕەسوڵ، سەرۆکی ئەنجومەنی بەڕێوەبردنی ئاسیاسێڵ، ڕایگەیاند:
"لە ئاسیاسێڵ، باوەڕمان وایە کە ڕۆڵی ئێمە تەنها کورت نابێتەوە لە پێشکەشکردنی خزمەتگوزارییەکانی پەیوەندییەکان و چارەسەرە دیجیتاڵییەکان، بەڵکو درێژ دەبێتەوە بۆ پاڵپشتیکردنی کۆمەڵگا و وەستان شان بە شانی ئەو چین و توێژ و دامەزراوانەی کە پێویستیان بە هاوکاری هەیە. ئەم بەخشینە لە چوارچێوەی ستراتیژی ئاسیاسێڵدایە بۆ بەرپرسیارێتیی کۆمەڵایەتی، کە ئامانج لێی پاڵپشتیکردنی کەرتە گرنگەکانە، لە پێش هەموویانەوە کەرتەکانی تەندروستی و چاودێریی منداڵان. ئێمە شانازی دەکەین بە پاڵپشتیکردنی ماڵی عێراقی بۆ داهێنان و نەخۆشخانەی هیوا بۆ نەخۆشییەکانی شێرپەنجە لەپای ئەو خزمەتگوزارییە مرۆییە گەورانەی پێشکەشی دەکەن."
ئەم بەخشینە لە چوارچێوەی پەرۆشیی ئاسیاسێڵدایە بۆ بەهێزکردنی بەرپرسیارێتییە کۆمەڵایەتییەکەی و پاڵپشتیکردنی منداڵان و نەخۆشان، و وەستان شان بەشانی دامەزراوە مرۆیی و تەندروستییەکان، کە بەشدارن لە بنیاتنانی کۆمەڵگایەکی پێکەوە گرێدراو و سەقامگیرتر.
ئاسیاسێڵ جەختی لە بەردەوامیی خۆی کردەوە لە گرتنەبەری ئەو دەستپێشخەریانەی کە گەشەپێدانی کۆمەڵگا بەهێز دەکەن و پاڵپشتی کەرتە گرنگەکانی عێراق دەکەن، ئەمەش لەسەر بنەمای باوەڕی بە گرنگیی هاوبەشیی نێوان کەرتی تایبەت و دامەزراوە مرۆییەکان لە دروستکردنی کاریگەرییەکی ئەرێنی و بەردەوام.
(کۆتایی)
دەربارەی ئاسیاسێڵ:
ئاسیاسێڵ "کۆماندەکاتەوە"، دابینکاری سەرەکی خزمەتگوزاریى پەیوەندییەکانی مۆبایل و خزمەتگوزارییە دیجیتاڵییەکانە لە عێراق و ژمارهى بهشدرابووانی زیاتر لە 20 مليۆنە. ئاسياسێڵ وەکو یەکەمین کۆمپانیاى خزمەتگوزاریى مۆبایل ناسێنراوە لە عێراق و یەکەمین کۆمپانیاشە تۆڕەکەی هەموو بەشەکانی عێراق دابپۆشێت. ئاسیاسێڵ خزمەتگوزارییەکانی +4G بە کواڵیتییەکی بەرز لە سەرجەم پارێزگاکانی عێراق دابیندەکات و تۆڕەکەشى زیاتر 06.99٪ ـى دانيشتوانى عێراق دهگرێتهوه، ئهمهش وا دهكات كه تۆڕهكهى ببێته بەربڵاوترین تۆڕى مۆبايل بە فراوانترین ڕووماڵەوە لە نێو کۆمپانیاکانی تری پەیوەندی لە عێراق. ئاسیاسێڵ شانازی بەوەوە دەکات کە لە کانونی دووەمی 2015ــەوە باشترین دابینکاری خزمەتگوزاری ئینتەرنێتە کە باشترین تۆڕی پەیوەندی بە بەرزترین کواڵیتی لە عێراق دابیندەکات.
پەیوەندییەکانی ئاسیاسێڵ، بەشی پەیوەندییە گشتییەکان: [email protected]
بۆ زانیای زیاتر: www.asiacell.com
ئەندامێکی چوارچێوەی هەماهەنگی ئاشکرای دەکات، کە گۆڕانکاری نوێ لە دابەشکردنی پۆستە وەزارییەکاندا هاتوەتە ئاراوە و پێشبینی دەکرێت نەخشەی چەند وەزارەتێک پێش دانیشتنی رۆژی پێنجشەممە بگۆڕدرێت.
عەدی عەبدولهادی، ئەندامی چوارچێوەی هەماهەنگی، بە میدیاکانی عیراقی راگەیاندوە، کە کۆبوونەوە بەردەوامەکانی چەند سەعاتی رابردوو بوونەتە هۆی گۆڕینی هاوکێشەکان سەبارەت بە دوو وەزارەت، هەروەها ئاماژەی بەوەش کرد کە ئەگەری هەیە سێ وەزارەتی دیکەش بکەونە ژێر کاریگەری ئەم تێگەیشتنە نوێیانە و لایەنی بەڕێوەبەریان بگۆڕدرێت.
ئەم جوڵە سیاسییە خێرایە لە کاتێکدایە، کە بڕیارە ئێوارەی ئەمڕۆ تەواوی رێککەوتنەکان کۆتاییان بێت بۆ ئەوەی وێنەی کابینە وەزارییەکەی عەلی زەیدی ڕوون بێتەوە.
ئەنجومەنی نوێنەرانیش بە رەسمی رایگەیاندوە کە سبەینێ پێنجشەممە، دانیشتنی تایبەت بە دەنگدان لەسەر کارنامەی وەزاری و پێکهاتەی حکومەتەکەی زەیدی بەڕێوە دەچێت.
ئەنجوومەنی نوێنەرانی عیراق سبەینێ پێنجشەممەی دیاری کردوە، بۆ دەنگدان لەسەر بەرنامەی وەزاری و حکومەتی سەرۆک وەزیرانی راسپێردراو.
ئەنجومەنی نوێنەرانی عیراق، کارنامەی دانیشتنی ژمارە (24)ی خۆی بڵاوکردەوە کە بڕیارە سبەینێ پێنجشەممە، 14ی ئایاری 2026،. تەوەری سەرەکی و یەکلاکەرەوەی دانیشتنەکە، دەنگدان دەبێت لەسەر کارنامەی وەزاری و پێکهاتەی حکومەتی نوێی عێراق بە سەرۆکایەتیی عەلی فالح ئەلزەیدی، سەرۆک وەزیرانی راسپێردراو.
بە گوێرەی کارنامەکە، سەبەینێ سەعات 4:00ـی عەسر کۆبونەوەکە بەڕێوەدەچێت، کە لە چوارچێوەی خولی شەشەمی هەڵبژاردن و یەکەم وەرزی یاسادانانی ساڵی یەکەمدایە.
وەک لە کارنامەکەدا هاتووە، دوای خوێندنەوەی چەند ئایەتێک لە قورئانی پیرۆز، ئەندامانی ئەنجومەنەکە دەست بە کۆبوونەوەکە دەکەن بۆ تاوتوێکردن و دەنگدان لەسەر ئەو بەرنامەیەی لەلایەن سەرۆک وەزیرانی راسپێردراوەوە ئامادە کراوە، تاوەکو متمانەی یاسایی بۆ کابینەکەی وەربگرێت.
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ عەلی زەیدی، سەرۆک وەزیرانی راسپێردراوی عیراق کۆبووەوە.
لە کۆبوونەوەکەدا دوایین پەرەسەندنە سیاسییەکانی عیراق تاوتوێکرا و هەردوولا هاوڕابوون لەسەر چڕکردنەوەی هەوڵەکان بۆ پێکهێنانی حکومەتێکی نیشتمانیی بەهێز تاوەکو رووبەڕووی ئاڵنگارییەکانی ئەم قۆناغە ببێتەوە.
هەروەها جەخت لە پێکهێنانی حکومەتێکی گشتگیر کرایەوە کە نوێنەرایەتیی هەموو پێکهاتەکان بکات و ئامانجی خزمەتکردنی تەواوی هاوڵاتییان بێت.
بانکی ناوەندیی عیراق، ئەمڕۆ سێشەممە، رایگەیاند کە بەردەوامن لە جێبەجێکردنی بەرنامەی چاکسازیی کەرتی بانکی بە ئامانجی بەهێزکردنی سیستەمی دارایی و گونجاندنی لەگەڵ پێوەرە نێودەوڵەتییەکان.
بانکی ناوەندی لە بەیاننامەیەکدا ئاشکرای کرد کە بانکە عیراقییەکان قۆناغی دووەمی چاکسازییان دەستپێکردووە، کە تێیدا جەخت لەسەر شەفافیەت و بەرزکردنەوەی ئاستی کارگێڕی دەکرێتەوە. هەروەها ئاماژەی بەوە کرد کە ئێستا لە پرۆسەی گرێبەستکردندان لەگەڵ کۆمپانیایەکی وردبینی سەربەخۆ و پسپۆڕ بۆ هەڵسەنگاندنی کۆتایی ئەو بانکانەی کە مەرجەکانی قۆناغی یەکەمی چاکسازییان تەواو کردووە.
بەپێی بەیاننامەکە، ئەم هەنگاوانە رێگە خۆش دەکەن بۆ ئەو بانکانەی پابەندی رێنماییەکانن تاوەکو جارێکی تر دەستیان بە کەناڵەکانی حەواڵەی دەرەکی بگاتەوە، بەتایبەت بۆ مامەڵەکردن بە دراوەکانی وەک (یۆرۆ، درهەمی ئیماراتی، و یوانی چینی).
لە بەشێکی دیکەی بەیاننامەکەدا، بانکی ناوەندی هۆشداری دا لە بڵاوکردنەوەی هەواڵی ناڕاست و داوای لە دەزگاکانی راگەیاندن و هاووڵاتیان کرد، زانیارییەکان تەنیا لە پێگەی رەسمی بانکی ناوەندییەوە وەربگرن و نەکەونە داوی ئەو دەنگۆیانەی لە سۆشیاڵ میدیا بڵاو دەکرێنەوە.
وەزارەتی کشتوکاڵی عیراق، ئەمڕۆ سێشەممە، رایگەیاند، کە هاوکات لەگەڵ نزیکبوونەوەی جەژنی قوربانی پیرۆز، زنجیرەیەک رێکاری تەندروستی و ڤێتێرنەریی پێشوەختەیان گرتووەتەبەر بۆ رێگری لە بڵاوبوونەوەی نەخۆشیی "تای خوێنبەربوون".
بەپێی بەیاننامەیەکی وەزارەتەکە، محەمەد عەزیز مەیحی، بەڕێوەبەری گشتیی فەرمانگەی ڤێتێرنەری، سەرپەرشتی کۆبوونەوەی لێژنەی ناوەندیی بۆ کۆنترۆڵکردنی تای خوێنبەربوون کردووە و تێیدا چەند بڕیارێکی گرنگ دراون، لەوانە: داوا لە پارێزگارەکان کراوە لێژنەکانی چاودێری و پشکنین کارا بکەن بە بەشداری تەندروستی، ژینگە، ئاسایشی نەتەوەیی و ناوخۆ بۆ رێگری لە سەربڕینی ئاژەڵ لە شوێنە گشتییەکان، هەروەها قەدەغەکردنی گواستنەوەی ئاژەڵ لەو ناوچانەی نەخۆشییەکەی تێدا بڵاوبووەتەوە، مەگەر بڕوانامەی تەندروستی ڤێتێرنەرییان هەبێت کە بسەلمێنێت ئاژەڵەکە بێبەرییە لە "گەنە". و چڕکردنەوەی هەڵمەتەکانی هۆشیاری و دابەشکردنی نامیلکە و پۆستەر بۆ ئاشناکردنی ئاژەڵداران و هاووڵاتیان بە مەترسییەکانی ئەم نەخۆشییە و ڕێگاکانی خۆپاراستن لێی.
ئەم رێکارانە ئامانجیان پاراستنی تەندروستی گشتی و دڵنیابوونەوەیە لە سەلامەتی قوربانییەکان لە ماوەی رۆژانی جەژندا.
بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە موسەنا سامەڕائی، سەرۆکی ھاوپەیمانیی عەزم کرد.
لە کۆبوونەوەکەدا کە دەرباز کۆسرەت رەسوڵ و د. خالید شوانی، ئەندامانی مەکتەبی سیاسی ئامادەیبوون، دوایین گۆڕانکاریی و پێشهاتەکانی عیراق و ناوچەکە گفتوگۆیان لەسەر کرا.
لە کۆبوونەوەکەدا جەخت لە یەکخستنی هەوڵەکان بۆ تەواوکردنی رێکارە یاساییەکان و پێکهێنانی حکومەتی نوێی عیراق لە وادەی دەستووری خۆیدا کرایەوە.
وەزارەتی تەندروستیی عیراق تۆمارکردنی 15 تووشبووی نوێ و حاڵەتێکی گیانلەدەستدانی بە 'تای خوێنبەربوون' راگەیاند و ئاماری تەواوی ئەمساڵیشی بڵاوکردەوە و داواکارییەکیش لە کاسبکاران و هاووڵاتیان دەکات.
سەیف بەدر وتەبێژی وەزارەتی تەندروستیی عیراق، ئەمڕۆ دووشەممە، تۆمارکردنی 15 تووشبووی نوێ و حاڵەتێکی گیانلەدەستدانی بە تایی خوێنبەربوون راگەیاند.
وتەبێژەکە ئەوەشی روونکردەوە: "ئاماری کۆی گشتی ساڵی 2026، دوای تێپەڕبوونی 19 هەفتە بەسەر چاودێرییە پەتا نائاسییەکان، گەیشتووەتە 48 تووشبوونی پشتڕاستکراوە و چوار حاڵەتی گیانلەدەستدانیش هەبوون.
هاوکات، هۆکارە راستەوخۆکانی نەخۆشییەکە و نیشانەکانی بیرهێنایەوە و ئاماژەی بەوەش کرد، دەستنیشانکردنی پێشوەختە و چارەسەری ناو نەخۆشخانە دەبێتە هۆی چاکبوونەوە، پێویستیشە گۆشتفرۆشان و ئاژەڵداران جلوبەرگی پارێزەر، دەستکێش و دەمامک بەکاربهێنن و گۆشت لە پلەی گەرمی نزمدا و لەناو فرێزەردا هەڵبگرن.
بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە موحسین مەندەلاوی، سەرۆکی هاوپەیمانیی ئەساسی عیراقی کرد.
لە کۆبوونەوەکەدا کە دەرباز کۆسرەت رەسوڵ، ئەندامی مەکتەبی سیاسی ئامادەبوو، دۆخی گشتی وڵات تاوتوێکرا و بەردەوامی دیالۆگی نیشتمانیی نێوان هێز و لایەنەکان لەپێناو سەرخستنی هەنگاوەکانی پێکهێنانی حکومەتی نوێ و پاراستنی ئاسایش و ئارامی جەختی لەسەر کرایەوە.
هەردوولا جەختیان لە پابەندبوون بە رێککەوتن و پشتبەستن بە بنەما دەستوورییەکان بۆ چارەسەرکردنی کێشەکان و گەیشتن بە حکومەتێکی بەهێز و خزمەتگوزار کردەوە.
هەناردەی خورمای عیراق لەم ساڵدا زیادیكردووە و داهاتەكەی نیو ترلیۆن دیناری تێپەڕاندووە.
محەمەد حەنون وتەبێژی وەزارەتی بازرگانیی عیراق بە رۆژنامەی "سەباح"ـی راگەیاند، خواست لەسەر خورمای عیراق لە بازاڕەكانی جیهاندا زیادیكردووە و وڵاتانی هیندستان، چین، توركیا و كەنداوی عەرەبی دیارترین وڵاتانی هاوردەكاری خورمای عیراقن، ئەمە جگەلەوەی بۆ بازاڕەكانی ئەوروپا و ئاسیاش هەناردە دەكرێت.
وتەبێژەكەی وەزارەتی بازرگانی ئاماژەی بەوەشدا، لە ماوەی چەند ساڵی رابردوودا داهاتی هەناردەی خورما زۆر بەرزبووەتەوە، بەشێوەیەك لە ساڵی 2024دا، 600 هەزار تۆن هەناردە كراوە و داهاتەكەی 500ملیار دیناری تێپەڕاندووە.
