مستەفا سەند، وەزیری پەیوەندییەکانی عیراق جەختی کردەوە لە هەوڵەکانی وەزارەتەکەی بۆ راگەیاندنی خزمەتگوزاریی نەوەی پێنجەم (5G) لە پاریزگاکانی عیراق و هەرێمی کوردستان بە شێوەیەکی هاوکات، ئاماژەی بەوەش کرد کە کێشەکانی نێوان بەغدا و هەرێم ئاسانن و کارکردن بەردەوامە بۆ گەیشتن بە تێگەیشتنی هاوبەش.

مستەفا سەند لە لێدوانێکدا بۆ ئاژانسی رەسمیی دەنگوباسی عیراق رایگەیاند: نوێنەری هەرێمی کوردستان لە بەغداد، لە یەکەم هەفتەی دەستبەکاربوونم وەک وەزیر، داوەتنامەیەکی نووسراوی لەلایەن سەرۆکی حکومەتی هەرێمی کوردستانەوە پێشکەش کردم بۆ سەردانیکردنی هەرێم، وەزیری گواستنەوە و پەیوەندییەکانی هەرێمیش لە سەردانێکیدا پێش هەفتەیەک ئەم داوەتنامەیەی دووپاتکردەوە، ئێمەش سوورین لەسەر ئەنجامدانی سەردانەکە بۆ هەولێر."

وتیشی: وەزارەت کۆمەڵێک کێشەی بڕیارنەدراوی ئاسانی لەگەڵ هەرێمدا هەیە، وەک ئینتەرنێتی کێبڵ کە لە بەسرەوە بەرەو ئەوروپا دەڕوات و بە هەرێمی کوردستاندا تێپەڕ دەبێت، چونکە لە کاتی گەیشتنی بە هەرێم پێویستی بە تێگەیشتن هەیە لەگەڵ ئەو کۆمپانیایانەی لەوێ کار دەکەن.

روونیشی کردەوە: وەزارەت داوای کردووە عیراق وەک یەک قەوارە لە بەرانبەر کۆمەڵگەی نێودەوڵەتیدا دەربکەوێت، هەروەها دەکرێت تێگەیشتن لە نێوان حکومەتی فیدراڵی و هەرێمدا هەبێت بۆ ئەوەی رێککەوتنە نێودەوڵەتییەکان راستەوخۆ لەرێی وەزارەتی پەیوەندییەکانی فیدراڵییەوە ئەنجام بدرێن.

وەزیری پەیوەندییەکان ئاماژەی بە چەند بابەتێکی تریش کرد: لە هەرێمی کوردستان، وەزارەتی پەیوەندییەکان بەرپرسە لە کۆمپانیاکانی پەیوەندی لەنێویاندا 'کۆڕەک'، چونکە حکومەتی هەرێم دەستەی سەربەخۆی پەیوەندییەکانی نییە بەو شێوازەی لە حکومەتی ناوەندیدا هەیە، ئەمەش وا دەکات لە کاتی رودانی هەر حاڵەتێکی لەناکاودا ئاڕاستەی قسەکانیان بەرەو وەزارەتی فیدراڵی بێت لەبری دەستەکە.

لە کۆتاییدا ئاماژەی بەوەش دا: بابەتێکی تر پەیوەستە بە خزمەتگوزاریی (5G)، چونکە هەرێم هەنگاوی پێشتری ناوە بەراورد بە حکومەتی ناوەندی لە کاراکردنیدا، لە ئێستاشدا کار دەکەین بۆ ئەوەی بگەینە رێککەوتن تاوەکو لە یەک کاتدا ئەم خزمەتگوزارییە لە سەرانسەری وڵاتدا رابگەیەنرێت.

هادی عامری دڵنیای دەداتە شەقامی عیراقی و رایگەیاند، هیچ رووبەڕووبوونەوەیەك لەنێوان دەوڵەت و بەرەی مقاوەمەدا روونادات، ئەعرەجیش دەڵێت چەكی پێشمەرگە دەستوریە.

هادی عامری، ئەمینداری گشتیی رێكخراوی بەدر لە وتارێكدا رایگەیاند، بە هیچ جۆرێك هیچ رووبەڕووبوونەوەیەك لەنێوان دەوڵەت و هێزەكانی بەرگری دا روونادات، هاوكات ئاماژەی بەوەشكرد، دۆسیەی بەرەنگاربوونەوەی گەندەڵی و گەندەڵكاران بڕیارێكە چوارچێوەی هەماهەنگی لەسەری رێككەوتووە، پشتیوانی لە هەنگاوەكانی سەرۆك وەزیران دەكەن لەم بوارەدا.

روونیشی كردەوە، رێكخستنی چەك ئامانجێكی نیشتمانی، دەستووری و رەوایە، لە كۆتاییدا ئاماژەی بەوەش كرد، رێكخستنی چەك بڕیارێكی دەرەكی نییە، بەڵكو بڕیارێكی تەواو عیراقییە.

هاوكات، قاسم ئەعرەجی راوێژكاری ئاسایشی نەتەوەیی سەرۆك وەزیرانی عیراق رایگەیاند، گفتوگۆ لەگەڵ گروپە چەكدارەكان بەردەوامە بۆ گەڕاندنەوەی چەك بۆ دەستی دەوڵەت و چەكی پێشمەرگەش لە چوارچێوەی دەستووردایە، بڕیاری كۆكردنەوەی چەك ئەو چەكانە دەگرێتەوە كە لە دەرەوەی دەستوورن.

ئاماژەی بەوەشكرد لە ئێستادا گروپە چەكدارەكان پابەندن بە ئەنجامنەدانی هیچ كارێك دژ بە وڵاتانی دراوسێ یاخود لەناوخۆی عیراقدا، و ڕژدین لەسەر كۆتاییهێنان بەو دۆسیانەی دەبنە هۆی زیانگەیاندن بە عیراق و دراوسێكانی

وتەبێژی حكومەتی عیراق رایگەیاند، لە چوارچێوەی هەڵمەتی بەرەبەیاندا زیاتر لە یەك ترلیۆن و 359 ملیار دینار گەڕێنراوەتەوە بۆ خەزێنەی دەوڵەت.

حەیدەر عەبودی، وتەبێژی حكومەتی عیراق ئاماژەی بەوە كرد، بە بەهای زیاتر لە یەك ترلیۆن و 359 ملیار دینار پارە و موڵك و ماڵی گشتی لەلای گەندەڵكاران گەڕێنراوەتەوە بۆ خەزێنەی دەوڵەت.

ئەوەشی خستەڕوو، هەر لە چوارچێوەی هەڵمەتەكەدا زیاتر لە 26 هەزار هەواڵ گەیشتووەتە دەستەی دەستپاكی لەسەر دۆسییەی گەندەڵی و گەندەڵكاران.

عەبودی ئاماژەی بەوەشدا، بەپێی یاسای پاداشتكردنی هەواڵدەر، هەر هەواڵدەرێك نزیكەی 5%ی ئەو بڕە پارەیە پاداشت دەكرێت كە لە دۆسییەكی گەندەڵیدا دەستی بەسەردا دەگیرێت، وتیشی، حكومەتی عیراق هەنگاوی گەورەی ناوە لە رێڕەوی چاكسازی و بنبڕكردنی سەرچاوەكانی گەندەڵی.

 

بۆ یەكەمجار لەدوای هەڵگیرسانی جەنگی ئەمریكا و ئێرانەوە، كۆمپانیای سۆمۆ ئامادەیی نیشاندا بۆ فڕۆشتنی نەوتی عیراق لە دەرەوەی گەروی هورمز و لەڕێگەی بەندەرەكانی عوممانەوە.

ماڵپەڕی بلومبێرگ بە پشتبەشتن بە چەند نووسراوێكی كۆمپانیای سۆمۆ بۆ بە بازاڕكردنی نەوتی عیراق ئاشكرایكردووە، كۆمپانیاكە ئامادەیی نیشانداوە بۆ فڕۆشتنی نەوتی عیراق لەڕێگەی بەندەرەكانی عوممانەوە.

ئەوەشی خستووەتەڕوو، بۆ یەكەمجارە لەدوای هەڵگیرسانی جەنگی ئەمریكا و ئێرانەوە، عیراق ئامادەیی نیشاندەدات بۆ فڕۆشتنی نەوتەكەی لە دەرەوەی گەروی هورمز و لەڕێگەی بەندەرەكانی عوممانەوە.

ئەوەش لەكاتێكدایە، ئێران لەبەرانبەر تێپەڕبوونی كەشتییە بارهەڵگرەكانی عیراق بە گەروی هورمزدا، داوادەكات عیراق قەرزەكانی لەو وڵاتە پاكتاو بكات كە نزیكەی 12 ملیار دۆلارە و خۆی لە قەرزی غاز و كارەبادا دەبینێتەوە.

 

مەزهەر محەمەد ساڵح، راوێژکاری دارایی سەرۆک وەزیرانی عیراق رایگەیاند، یەدەگی دراوی بیانیی وڵات هیچ مەترسیەکی لەسەر نییە، ئاماژەی بەوەشکردوە بەپێی خەمڵاندنەکانی سندوقی نێودەوڵەتیی دراویش بۆ ساڵی 2026، کۆی یەدەگی عیراق گەیشتوەتە نزیکەی 79.2 ملیار دۆلار.

مەزهەر محەمەد ساڵح، راوێژکاری دارایی سەرۆک وەزیرانی عیراق ئاماژەی بەوەکردوە، ئەو بڕە دراوە بیانییە بەشی دابینکردنی هاوردەکردنی کەلوپەل و خزمەتگوزارییەکانی زیاتر لە نۆ مانگ دەکات.

ناوبراو رونیشی کردوەتەوە، بەپێی پێوەرەژمێرییەکان، دابینکردنی زیاتر لە شەش مانگی هاوردەکردن بە ئاستێکی ئارام دادەنرێت، بەڵام دابەزینی تۆمارکراوی ئەمساڵ پێویستی بە وشیاری و بەدواداچوونی زیاتر هەیە تاوەکو ئاستی دڵنیایی لە دەست نەدرێت.

مەزهەر محەمەد ساڵح ئاماژەی بەوەش کرد، یەدەگی دراوی بیانی رۆڵێکی سەرەکی لە پاراستنی سەقامگیریی نرخی ئاڵوگۆڕی دیناری عیراقیدا دەگێڕێت و وەک هێڵی یەکەمی بەرگریی دەستنیشان دەکرێت، چونکە بانکی ناوەندیی لە رێگەی دابینکردنی دۆلار و پڕکردنەوەی داواکارییە یاساییەکانەوە ڕێگە لە فشارەکان دەگرێت.

دەستەی دەستپاکی عیراق دۆسیەیەکی گەورەی گەندەڵی لە پارێزگای سەڵاحەدین ئاشکرادەکات.

بەپێی راگەیەندراوێکی دەستەی دەستپاکی عیراق، لە ماڵی جێگری بەڕێوەبەری تۆماری خانوبەرەی پارێزگای سەڵاحەدین، دەستیان بەسەر تاپۆی 95 موڵک و خانودا گرتووە.

لە راگەیەندراوەکەشدا هاتووە، ژنە تۆمەتبارەکە موڵکەکانی بەناوی خزم و کەسە نزیکەکانیەوە کردووە، هەروەها موڵکەکان لە هەر سێ پارێزگای (بەغداد، دیالە و سەڵاحەدین)ـن.

لە ماڵی ئەو ژنە بەرپرسەدا، دەست بەسەر پارە و زێڕیشدا گیراوە، لە هەمان کاتدا هاوسەری تۆمەتباریش دەستگیرکراوە کە 27 موڵکی بەناوەوە کراوە.

بانكی ناوەندیی عیراق دەستی بەسەر سامانی گوازراوە و نەگوازراوەی 12 ئەندامی ئەنجومەن و لێپرسراوی عیراقدا گرت كە بە تۆمەتی گەندەڵی دەستگیركراون.

بانكی ناوەندیی عیراق بڕیاریدا دەستبەسەر موڵك و ماڵ و سەرمایەی 12 كەسایەتی سیاسی و دیاری عیراقدا بگرێت كە بە تۆمەتی گەندەڵی و لە چوارچێوەی هەڵمەتی بەرەبەیاندا دەستیگركراون.

بەپێی ئەو لیستەی بانكی ناوەندیی بڵاویكردەووەتەوە، ئیبراهیم سمێدعی راوێژكاری پێشووی سەرۆك وەزیران و پەرلەمانتاران بەها نوری، زیاد جەنابی، عەبدولڕەحمان خالید، محەمەد فەرمان جبوری، هند عەباسی، بوشرا قەیسی، موزەر كرەوی، موسەنا سامەڕایی، ئەشواق جبوری، عالیە نوسەیف و محەمەد سەعدون سەیهود لە خۆدەگرێت.

بانكی ناوەندیی عیراق داوای لە سەرجەم بانكەكانیش كردووە لە كاتی دۆزینەوەی هەر هەژمار و پارەیەكی ئەو كەسانەدا، بەزووترین كات لایەنی دادوەریی پەیوەندیدار ئاگادار بكەنەوە.

وەزیری پێشووی دارایی عیراق رایدەگەیەنێت؛ ناوی نەخراوەتە لیستی چاودێری تیرۆری ئەمریکاوە.

تەیف سامی، وەزیری پێشووی دارایی عیراق لە راگەیەنراوێکدا ئەو دەنگۆیانەی رەتکردەوە، کە باس لە خستنەناوی بۆ ناو لیستی چاودێریکردنی تیرۆر لە ئەمریکا یان رێگری لێکردنی بۆ چوونە ناو خاکی ئەو وڵاتە دەکەن.

تەیف سامی ئاماژەی بەوەکرد، ئەو زانیارییانەی لەبارەی چوونە دەرەوەی لە عیراق یان رێگریکردن لە بەشداریکردنی لە کۆبوونەوەکانی سندوقی نێودەوڵەتیی دراو لە واشنتۆن بڵاوکراونەتەوە دوورن لە راستییەوە و جەختی کردەوە لە ناوخۆی عیراقدا ماوەتەوە.

وەزیری پێشووی دارایی راشیگەیاند، هیچ بڕیارێکی دادوەری یان رێکارێکی رەسمی لە دژی دەرنەچووە و ئەوەی بڵاودەکرێتەوە تەنها لێدوانی سیاسیی هەندێک لە ئەندامانی کۆنگرێسە و پشتی بە هیچ بەڵگەنامەیەکی رەسمی نەبەستووە؛ هاوكات جەختیشی کردەوە مافی یاسایی خۆیەتی بۆ پەنابردنە بەر دادگا بەرانبەر هەر کەس و لایەنێک کە زانیاریی ناڕاست بڵاوبکاتەوە.

وەزیری پێشووی دارایی عیراق خرایە لیستی چاودێریی تیرۆریستی ئەمریكا و ڤیزای ئەو وڵاتەشی لێسەندرایەوە.

تۆڕی هەواڵی فۆكس نیوزی ئەمریكی لە زاری لێپرسراوێكی باڵای وەزارەتی دەرەوەی ئەمریكاوە ئاشكرایكرد، بەرەسمی ڤیزای تەیف سامی وەزیری پێشووی دارایی عیراق هەڵوەشێنراوەتەوەو رێگری لێكراوە لە چوونی بۆ ئەمریكا و دەزگای لێكۆڵینەوەی فیدڕاڵیش ناوی لە لیستی چاودێری تیرۆریستی تۆماركردووە.

ئاماژە بەوەشكراوە، تائێستا وەزارەتی دەرەوەی ئەمریكا روونی نەكردووەتەوە بڕیاری خستنە ناو لیستی تیرۆر پەیوەندیی بە تۆمەتی دابینكردنی دارایی بۆ تیرۆر هەیە كە لەلایەن ئەندامانی كۆنگرێسەوە ئەو دۆسێیە وروژێنراوە، یان پەیوەستە بە دۆسێی گەندەڵی لە عیراق و زانیارییە هەواڵگرییەكانی ئەمریكا.

لە ساڵی 2022یش ئەنتۆنی بلینكن وەزیری دەرەوەی پێشووتری ئەمریكا بە ژنی ئاسنین تەسیف سامی ناوبرد و خەڵاتی ساڵانەی ئازاترین ژنی جیهانی پێبەخشی بەهۆی ئەوەی كەسێكە كە روبەڕوی گەندەڵی دەبێتەوە.

وەزارەتی ناوخۆی عیراق، ئەمڕۆ هەینی، دەستگیرکردنی چوار کەسی لەسەر روداوەکەی دوێنێ راگەیاند، و جەختی لەسەر دەرچوونی فەرمانی گرتنی دادوەری بۆ ژمارەیەک لە دەستپێوەداربووان و بەردەوامیی بەدواداچوون بۆ ئەوانی تر کردەوە.

لیوا میقداد میری، بەڕێوەبەری فەرمانگەی راگەیاندن و پەیوەندییەکان لە وەزارەتی ناوخۆ، رایگەیاند: دەزگا ئەمنییەکان هەوڵێکی گەورەیان داوە کە بووە هۆی دەستگیرکردنی چوار کەس، و لە ئێستادا لێکۆڵینەوەیان لەگەڵدا دەکرێت و بەدواداچوون بۆ ئەوانی تریش بەردەوامە، رونیشی کردەوە: فەرمانی گرتنی دادوەری بۆ ژمارەیەک لە تۆمەتباران دەرچووە.

ئاماژەی بەوەش کرد: راسپاردەیەک لەلایەن سەرۆکی ئەرکانی سوپا، عەلی زێدییەوە هەیە بۆ بەدواداچوونی تاوانباران و رادەستکردنیان بە دادگا، و باسی لەوەش کرد: وه‌کیلی پێشكەوتووی وەزارەتی ناوخۆ و سەرجەم لایەنە ئەمنییەکان بەدواداچوون بۆ دۆسیەکە دەکەن و کار بۆ دەستگیرکردنی تاوانباران و رادەستکردنیان بە دادپەروەری دەکەن.

میری جەختی کردەوە: رێکاری یاسایی دەگیرێتە بەر بەرانبەر هەر کەسێک کە یاسای لەو ناوچانەدا بەزاندبێت، چ ئەوانەی بەشدارییان لە فرۆشتنی سەرەڕۆیانە کردووە یان زێدەڕۆیی و رەفتاری تر، رونیشی کردەوە: لێکۆڵینەوەکان لەم بارەیەوە کراوەن و هەوڵێکیش لەلایەن پارێزگاریی بەغدادەوە هەیە بۆ بەدواداچوونی دۆسیەکە، و هەر کەسێک تێوەگلانی لە هەر بابەتێکدا بسەلمێندرێت دەستگیر دەکرێت.

سەبارەت بەو چەکەش کە لە روداوەکەدا بەکارهاتووە، رونی کردەوە: چەکی قورس بە هیچ شێوەیەک لە ناوچەکەدا بەکارنەهێنراوە، بەڵکو چەکی سووک بەکارهاتووە، و جەختی کردەوە: مامەڵەکردن بە چەک لە دەرەوەی یاسایە و رێکاری وا هەن لەلایەن وەزارەتی ناوخۆوە دەگیرێنە بەر کە بەم زووانە و دوای تەواوبوونیان رادەگەیەندرێن.

 

وەزارەتی گواستنەوەی عیراق، لە رێگەی کۆمپانیای گشتیی بەڕێوەبردنی گواستنەوەی تایبەتەوە، مەرج و تێچووی پێدان و نوێکردنەوەی مۆڵەتی بۆ نووسینگەکانی تاکسی دیاریکرد.

بەپێی رێنماییە نوێیەکان، پێویستە هەر نووسینگەیەک خاوەنی 50 تا 100 ئۆتۆمبێلی مۆدێل پێنج ساڵی کۆتایی بێت، هەروەها شۆفێران بەستنی نیشانەی رەسمیی تاکسی، پۆشینی جلی یەکپۆش و بەکارهێنانی پێوەری ئەلیکترۆنی یان ئەپڵیکەیشنی زیرەکیان بەسەردا دەسەپێندرێت.

هاوکات نووسینگەکان پابەندکراون بە بەستنی ئامێری دیاریکردنی شوێن (جی پی ئیس) لەسەر ئەرکی خۆیان و پێشکەشکردنی خزمەتگوزاریی 24 سەعاتی.

رێنماییەکان کارکردنی ئۆتۆمبێلی تایبەت و فەرمانبەرانی دەوڵەتیان لەم نووسینگانەدا قەدەغەکردووە و دیاریکردووە کە کارکردنیان تەنها لە سنووری ئەو پارێزگایە دەبێت کە لێی تۆمارکراون.

تێچووی وەرگرتنی مۆڵەتی نوێ یەک ملیۆن دینار و نوێکردنەوەی ساڵانەش 500 هەزار دینارە بە مەرجی پێشکەشکردنی پاکتاوی باج، ئەمەش وەک هەنگاوێک بۆ رێکخستنەوەی کەرتەکە و دابینکردنی خزمەتگوزارییەکی ئارامتر بۆ هاووڵاتییان.

راوێژكاری دارایی سەرۆك وەزیرانی عیراق رایگەیاند، مانگانە عیراق پێویستی بە نزیكەی هەشت ملیۆن دینار هەیە و نزیكەی 40 ملیۆن كەس سودمەندن لە موچەی دەوڵەت. 

مەزهەر محەمەد ساڵح، راوێژكاری دارایی عەلی زەیدی سەرۆك وەزیرانی عیراق رایگەیاند، تێچوی موچەی مانگانەی عیراق حەوت ترلیۆن و 700 ملیار دینارە و 10 ملیۆن فەرمانبەران و خانەنشین و چاودێری كۆمەڵایەتی وەردەگرن و هەر موچەیەك لەلایەن دەوڵەتەوە خەرج دەكرێت بە شێوەیەك سەیر دەكرێت كە بژێویی چوار ئەندامی خێزان یان سوودمەند دابین دەكات، بەمەش نزیكەی 40 ملیۆن هاووڵاتیی عیراقی لە موچەی دەوڵەت سوودمەند دەبن.

وتیشی، نرخی نەوت لە بودجە لە نێوان 50 بۆ 60 دۆلار جێگری دەكرێت و بەرهەمهێنانی نەوتی عیراق دەگاتە سێ ملیۆن بەرمیل لە رۆژێدا و لە ئێستادا عیراق خاوەنی 78 ملیار دۆلار یەدەگی دراوی بیانی هەیە. 

دەشڵێت، قەرزی ناوخۆی عیراق لە نێوان 12 بۆ 14 ترلیۆن دینار دەبێت. 

سەرۆكی ئەنجومەنی وەزیرانی عیراق رایگەیاند، گەندەڵی مەترسیدارترین ئاستەنگە لە بەردم دەوڵەتدا و حكومەت لە جەنگێكی سەختدایە بۆ بنبڕكردنی.

عەلی زەیدی سەرۆك وەزیرانی عیراق لەگەڵ سەرۆك و ئەندامانی لیژنەی دەستپاكی ئەنجومەنی نوێنەرانی عیراق كۆبووەوە و رایگەیاند، گەندەڵی مەترسیدارتین ئاستەنگە لەبەردەم دەوڵەتدا لەمڕۆدا و حكومەت لە جەنگدایە بۆ نەهێشتنی لەگەڵ لەناوبردنی سەرچاوەكانیشی.

سەرۆك وەزیرانی عیراق جەختی لە گرنگی یەكخستنی هەوڵەكان كردەوە لە نێوان هەردوو دەسەڵاتی یاسادانان و جێبەجێكردندا بۆپاڵپشتیكردنی رێكارەكانی روبەڕوبوونەوەی گەندەڵی لە دۆزینەوەی ئەو كەسانەی تێوەگلاون. 

وتیشی، گەندەڵی لە زیادڕەویكردن لە خەمڵانی تێچووی پرۆژەكانەوە دەستپێدەكات.

سەرۆك وەزیرانی عیراق باسی لەوەشكرد، حكومەت كاردەكات لەسەر پەیڕەوكردنی وردبینی پێشوەختە و دوای تەواوبوونی پرۆژەكان بە مەبەستی كەمكردنەوەی بەفیڕۆدان و پاراستنی سامانی گشتی.

لە هەڵمەتێکی لادانی زێدەڕۆیی لە بەغداد گرژی دروستبوو، لەئەنجامدا ئەفسەرێکی پۆلیس کوژرا و چوار کارمەندی تریش برینداربوون.

شانەی راگەیاندنی ئەمنیی عیراق ئاشکرایکرد، لە کاتی جێبەجێکردنی ئەرکێکی رەسمیدا بۆ لادانی زێدەڕۆیی نیشتەجێبوون لە ناوچەی 'دۆرە' لە باشوری بەغداد، هێزە ئەمنییەکان و مەفرەزەکانی خزمەتگوزاری رووبەڕووی تەقەکردن بوونەوە.

ئاماژەی بەوەشکرد، لە ئەنجامی دەستڕێژی گلولەکەدا، بەڕێوەبەری بەشی پۆلیسی ئەمیندارییەتی بەغداد، کە پلەی عەمیدە کوژرا، هەروەها چوار کەسی دیکە برینداربوون کە پێکهاتوون لە کارمەندێکی پۆلیسی فیدراڵی، دوو کارمەندی پۆلیسی ئەمیندارییەتی و موچەخۆرێکی ئەمندارییەتی بەغداد.

لەلایەکی ترەوە، بە فەرمانی فەرماندەی ئۆپراسیۆنەکانی بەغداد، هێزە ئەمنییەکان گەمارۆیەکی توندیان بەسەر ناوچەکەدا سەپاندووە و دەروازەکانیان داخستووە، لە ئۆپراسیۆنێکی کێوماڵکردنی فراواندا تا ئێستا کەسێکی تۆمەتبار دەستگیرکراوە و گەڕان بەدوای تاوانبارانی تردا بەردەوامە.

دادگای رەسافە فەرمانە سالارییەکەی کۆمپانیای کۆڕەک تیلیکۆمی هەڵوەشاندەوە و پشتگیری لە بڕیارەکەی دەستەی راگەیاندن و پەیوەندییەکانی عیراق دەکات بۆ راگرتنی کارکردنی کۆمپانیاکە.

دەستەی راگەیاندن و پەیوەندییەکانی عیراق لە راگەیەنراوێکدا ئاشکرایکرد، دادگای رەسافە لە بەغداد بڕیارێکی دادوەریی دەرکردووە بۆ هەڵوەشاندنەوەی فەرمانی سالاریی کۆمپانیای کۆڕەک و هێشتنەوەی بڕیاری راگرتنی کارکردن لەگەڵ ئەو کۆمپانیایەدا.

دەستەی راگەیاندن و پەیوەندییەکان رایگەیاند، دادگای رەسافە لە 24ی ئابی 2026 بڕیاریدا بە هەڵوەشاندنەوەی ئەو فەرمانە سالارییەی لەلایەن بەڕێوەبەری رێگەپێدراوی کۆمپانیای کۆڕەک تیلیکۆم پێشکەش کرابوو.

بەپێی بڕیارەکەی دادگا، بڕیارەکەی دەستەی راگەیاندن و پەیوەندییەکان تایبەت بە راگرتنی کارکردن لەگەڵ کۆمپانیای کۆڕەک بە بەهێزی و چالاکی دەمێنێتەوە.

دەستەی راگەیاندن و پەیوەندییەکان ئەوەشی خستەڕوو، بڕیارەکە دوای ئەوە هات، سەرۆکی دەزگای جێبەجێکار لە دەستەی راگەیاندن و پەیوەندییەکان بە فەرمی تانەی لە داواکارییەکەی بەڕێوەبەری کۆڕەک دابوو.

ئاماژەی بەوەشکرد، دەستەی ڕاگەیاندن و پەیوەندییەکان رێزی خۆی بۆ دەسەڵاتی دادوەری دوپاتکردەوە و جەختی کردەوە لە بەردەوامبوونی رێکارە یاساییەکان لە دۆسیەی کۆڕەک تیلیکۆمدا، بە ئامانجی پاراستنی مافی دەوڵەت، بەرژەوەندیی گشتی و مافی بەکارهێنەران.

بانکی ناوەندیی عیراق بە رەسمی ئەو دەنگۆیانەی رەتکردەوە کە باس لە چاپکردنی بڕێک دراوی نوێی عیراقی بە سڕینەوەی سفرەکانەوە دەکەن و ئاشکرایکرد، هەموو ئەو هەواڵانەی لەو بارەیەوە بڵاوکراونەتەوە دوورن لە راستییەوە.

بانکی ناوەندیی عیراق لە رایەگەیەنراوێکدا بڵاویکردەوە، ئەو هەواڵانەی لە هەندێک لە دەزگاکانی راگەیاندن لەبارەی چاپکردنی دراوی نوێ و لادانی سفرەکان بڵاوبوونەتەوە، پشتیان بە هیچ سەرچاوەیەکی رەسمی نەبەستووە و رەتیدەکەنەوە.

جەختی کردووەتەوە، هەر پڕۆژەیەکی داهاتوو بۆ دووبارە رێکخستنەوەی دراو یان سڕینەوەی سفرەکان، لە کاتی دەرکردنی بڕیاری رەسمیدا، پێویستی بە تێپەڕبوون بە چەندین قۆناغی یاسایی، رێکخستن و هونەریدا هەیە.

هەر لە راگەیەنراوەکەی بانکی ناوەندیدا ئاماژە بەوەکراوە، پڕۆژەیەکی لەو شێوەیە پەسەند بکرێت، لە رێگەی کەناڵە رەسمییەکانەوە رادەگەیەنرێت و ماوەیەکی گونجاو بۆ گواستنەوە دیاری دەکرێت تا هاووڵاتییان، بانکەکان و دامەزراوەکان بە شێوازێکی ئارام و رێکخراو دراوەکان بگۆڕنەوە، بە شێوەیەک کە مافی دارایی هەمووان پارێزراو بێت.

بانکی ناوەندیی عیراق داوا لە هاووڵاتییان و دەزگاکانی راگەیاندن دەکات بۆ وەرگرتنی هەر زانیارییەکی تایبەت بە سیاسەتی دراو تەنها پشت بە کەناڵ و راگەیەنراوە رەسمییەکان بانکەکە ببەستن، چونکە رەنگە بڵاوبوونەوەیان ببێتە هۆی سەرلێشێواوی یان زیان بە بەرژەوەندییە داراییەکانی هاووڵاتیان.