عیراق
وەزارەتی دارایی عیراق داوای هەموو داهاتی نانەوتی ئەمساڵ و ئەو قەرزانە دەكات كە ساڵی رابردوو بە حكومەتی هەرێمی داوە بۆ مووچەی موچەخۆران.
سەرچاوەیەك لە وەزارەتی دارایی فیدراڵ بە كوردسات نیوزی راگەیاند، لیستی موچەی فەرمانبەرانی هەرێم بۆ مانگی دە لە قۆناغی وردبینیدایە، لەگەڵ ئەوەشدا نوسراوێكیان رەوانەی هەرێم كردووە، بەبێ ئەوەی ناوەڕۆكەكەی ئاشكرابكات. سەرچاوەكە وتیشی، چاوەڕێی هەرێم دەكەن وەڵامی نوسراوەكەیان بداتەوە.
هاوكات سەرچاوەیەك لە وەزارەتی دارایی هەرێم بە كوردسات نیوزی وت، داواكارییەكەی عیراق بریتییە لە رەوانەكردنی داهاتی نانەوتی چوار مانگی رابردووی ئەمساڵ و هەروەها ئەو قەرز و پێشینانەی كە ساڵی رابردوو بە هەرێمی دراوە بۆ مووچە كە زیاتر لە چوار ترلیۆن دینارە.
سەرچاوەكەی وەزارەتی دارایی وتیشی، داوا لە سەرۆك وەزیرانی هەرێم كراوە راستەوخۆ پەیوەندی بە سودانییەوە بكات بۆ چارەسەر كردنی ئەو كێشەیە و لە زووترین كاتدا موچەی مانگی دە رەوانەی هەرێم بكرێت.
سەرۆكی ئەنجومەنی نوێنەرانی عیراق رایگەیاند، كار لەسەر ئەوە دەكەن پرۆژە یاساكان پێش ئەوەی بخرێنە دەنگدانەوە گفتوگۆیان لە بارەوە بكرێت.
مەحمود مەشهەدانی سەرۆكی ئەنجومەنی نوێنەرانی عیراق رایگەیاند، ساڵی 2008 سەرەرای ئەوەی فشاری زۆری لەسەر بووە، بەڵام ئامادەنەبووە چەند پرۆژە یاسایەك پێكەوە تێپەرنرێت.
وتیشی، رێگەی راست ئەوەیە پرۆژە یاساكان دوای ئەوەی گفتوگۆی تەواوەتیان لەسەر دەكرێت پاشان تێپەڕینرێن.
ئاماژەی بەوەشكردووە، سەرەڕای زۆرینەی لایەنە شیعەكان، بەڵام گەشبینن بەوەی هەمواری یاسای لێبوردنی گشتی كە سونەكان پێشكەشیان كردووە دەنگی لەسەر بدرێت.
پارێزگاری کەرکوک رایدەگەیەنێت، کاری لە پێشینەیان بۆ بنیاتنانی پێکەوەژیان و خزمەتكردن بە هاووڵاتیانی کەرکوک دەبێت.
رێبوار تەها پارێزگاری کەرکوک پێشوازی لە وەفدێکی یەکێتیی نیشتمانی کوردستان کرد کە پێکهاتوو لە رزگار حاجی حەمە ئەندامی مەکتەبی سیاسی و لێپرسراوی دەزگای هەڵبژاردنی یەکێتی و هەر یەک لە د. میران محەمەد، حاکم سابیر و لەتیف نیروەیی ئەندامانی سەرکردایەتی یەکێتی.
لە سەرەتای دیدارەکەدا وەفدی میوان پیرۆزباییان لە رێبوار تەها کرد، بەبۆنەی دەستبەکاربوونی وەک پارێزگاری نوێی شاری کەرکوک و جەختیان لە پاڵپشتیکردنیان بۆ ئیدارەی کەرکوک و ئەنجومەنەکەی کردەوە.
هاوکات لە دیدارەکەدا کە هەر یەک لە نەشئەت شاهوێس سەرۆکی فراکسیۆنی "کەرکوک هێز و ئیرادەمانە" و د. ئەحمەد فاتیح و پەروین فاتیح ئەندامانی ئەنجومەنی پارێزگای کەرکوک ئامادەیبوون، پارێزگاری کەرکوک جەختیکردەوە کاری لە پێشینەیان بۆ بنیاتنانی پێکەوەژیان و خزمەتكردن بە هاووڵاتیانی کەرکوک دەبێت، هەروەها جێبەجێکردنی سیاسەتی سەرۆک مام جەلال لە دانانی بناغەکانی ئاشتی و پێکەوەژیان و خزمەتکردنی سەرجەم پێکهاتەکان لە کەرکوک.
لەسەر داوای هاوپەیمانی بەڕێوەبردنی دەوڵەت، ئەنجومەنی نوێنەرانی عیراق بۆ ماوەی مانگێك وەرزی یاسادانانی درێژكردەوە.
سەرۆكایەتی ئەنجومەنی نوێنەرانی عیراق لە راگەیەنراوێكدا ئاماژەی بەوەكردووە، بڕیاردراوە وەرزی یاسادانان بۆ ماوەی مانگێك درێژبكرێتەوە و لە ٩ـی ئەم مانگەوە درێژكردنەوەكە دەستپێدەكات.
دەشڵێت، لەسەر داواكاری هاوپەیمانی بەڕێوەبردنی دەوڵەت ئەنجومەنی نوێنەران ئەو بڕیارە دراوە.
رۆژی شەشی ئەم مانگە كۆبونەوەی بە ئامادەبوونی محەمەد شیاع سودانی سەرۆك وەزیرانی عیراق و مەحمود مەشهەدانی سەرۆكی ئەنجومەنی نوێنەران، كۆبوونەوەی هاوپەیمانی بەڕێوەبردنی دەوڵەت بەڕێوەچوو، لە كۆبوونەوەكەدا جەخت لەسەر گرنگی درێژكردنەوەی خولی دووەمی یاسادانانی ئەنجومەنی نوێنەران و پاڵپشتیكردنی هەنگاوی هەمواركردنەوەی یەكێك لە ماددەكانی بودجەی گشتی فیدراڵی تایبەت بە نەوت كرایەوە.
محەمەد شیاع سودانی رایدەگەیەنێت، عیراق كۆڵەكەیەكی سەرەكی ئابووری جیهانە و بەشێكی مێژوویی و رێڕەوێكی گرنگە بۆ ئاڵوگۆڕی بازرگانی.
محەمەد شیاع سودانی سەرۆك وەزیرانی عیراق سەرپەرشتی رێوڕەسمی كردنەوەی پرۆژەی بەندەری فاوی لە پارێزگای بەسرە كرد كە یەكەمین كەشتی جیهانی لەو بەندەرە لەنگەری گرت.
سودانی رایگەیاند، ئەو پڕۆژەیە چووەتە ناو رێڕەوەكانی بازرگانی جیهانی و رێگاكانی گواستنەوەوە كە بە رۆژهەڵاتی ناوەڕاستدا تێدەپەڕێت و گرنگییەكی ستراتیژی گەورەی هەیە بۆ بازرگانی جیهانی و نێودەوڵەتی.
وتیشی، پڕۆژەكە چالاكییەكانی وزە و بازرگانی و پەیوەندییەكان و ئاڵوگۆڕی تێدا چڕبووەتەوە، هەروەها بەشدار دەبێت بۆ گۆڕینی عیراق و دەیكاتە وڵاتێكی كراوە بە رووی وڵاتانی جیهان و كەنداودا.
دەشڵێت، عیراق كۆڵەكەیەكی سەرەكی ئابووری جیهانە و رێگای گەشەپێدان كە لە بەندەری گەورەی فاوەوە دەستپێدەكات، ئابووری زۆربەی وڵاتانی ناوچەكە بەیەكەوە دەبەستێتەوە.
هاوپەیمانی ئیدارەی دەوڵەت بەكارهێنانی خاكی عیراق لەلایەن وڵاتانەوە بۆ هێرشكردنە سەر یەكتر رەتدەكاتەوە و داوای كاری هاوبەشدەكات بۆ دوورخستنەوەی عیراق لەو جەنگەی لە ناوچەكە دروستبووە.
بە ئامادەبوونی محەمەد شیاع سودانی سەرۆك وەزیرانی عیراق و مەحمود مەشهەدانی سەرۆكی ئەنجومەنی نوێنەران، كۆبوونەوەی هاوپەیمانی ئیدارەی دەوڵەت بەڕێوەچوو، لە كۆبوونەوەكەدا پێشوازی لە یەكلاكردنەوەی پۆستی سەرۆكی ئەنجومەنی نوێنەران كرا و وەك شایستەیەكی دەستوری ناوبرا كە كاری نیشتمانی هاوبەش پتەوتر دەكات.
هەروەها جەخت لەسەر گرنگی درێژكردنەوەی خولی دووەمی یاسادانانی ئەنجومەنی نوێنەران و پاڵپشتیكردنی هەنگاوی هەمواركردنەوەی یەكێك لە ماددەكانی بودجەی گشتی فیدراڵی تایبەت بە نەوت كرایەوە، هاوپەیمانیەكە پابەندبوونیشی بەو پرەنسیپانە دووپاتكردەوە كە مەرجەعی باڵای شیعەكان لە دوایین راگەیەندراودا جەختی لەسەر كردووەتەوە، چونكە ئەو پرەنسیپانە رۆڵی دەبێت لە بنیادنانی دەوڵەتێك كە دەوڵەتی دامەزراوەكان بێت و زەمینەش خۆشدەكات بۆ گەیشتن بە داهاتوویەكی باشتر بۆ عیراق.
هەر لە كۆبوونەوەكەدا ئیدارەی دەوڵەت هەڵوێستی عیراقی لە پشتگیریكردنی گەلانی فەلەستین و لوبنان دووپاتكردەوە و بەكارهێنانی خاكی عیراقیشی بۆ ئەنجامدانی هێرشەكان بە هەموو شێوەیەك رەتكردەوە، جەختیشی كردەوە لەسەر كاری هاوبەش بۆ بەرژەوەندی باڵای وڵات و دوورخستنەوەی عیراق لەو جەنگەی ناوچەكەی گرتووەتەوە.
ئەمڕۆ دادگای باڵای فیدراڵی عیراق ئەو پێنج سكاڵایەی كە لەدژی هەڵبژاردنی پارێزگار و سەرۆكی ئەنجومەنی پارێزگای كەركوك تۆماركرابوون رەتكردەوە.
كاروان عوسمان، سەرۆكی بەشی سكاڵاكان لە ئەنجومەنی پاریزگای كەركوك به كوردسات نیوزی راگەیاند، ئەمڕۆ دادگای باڵای فیدراڵی لە دانیشتنەكەیدا ئەو پێنج سكاڵایەی كە دژ بە ئەنجومەنی پارێزگای كەركوك تۆماركرابوون رەتكردووەتەوە كە لەلایەن راكان جبوری پارێزگاری پێشووی كەركوك و حەسەن تۆران سەرۆكی بەرەی توركمانی و سەوسەن جەدوعی ئەندامی ئەنجومەنی پارێزگای كەركوك لەسەر پارێزگار و سەرۆكی ئەنجومەنی پارێزگای كەركوك و سەرۆكایەتی كۆمار تۆماركرابوون.
وتیشی، پێش بڕیارەكەی دادگا ، بەرەی توركمانی سكاڵاكەی خۆی كشاندووەتەوە.
ئامانجی تۆماركردنی سكاڵاكانیش بۆ هەڵوەشاندنەوەی كۆبوونەوەی ئەنجومەنی پارێزگای كەركوك بوو كە لە رۆژی 10 ی ئابی ئەمساڵ لە بەغداد بەڕێوەچوو و تێیدا پارێزگار و سەرۆكی ئەنجومەنەكە هەڵبژێردران، بەڵام رەتكرانەوە.
بەهۆی نەبوونی بەڵگەی پێویست و ساغنەبوونەوەی ئەو تۆمەتانەی ئاڕاستەیان كرابوو، دادگای تێهەڵچوونەوەی رەسافە ئەو سێ كەسەی ئازادكرد، كە بە تۆمەتی سووتاندنی بازاڕی قەیسەری كەركوك دەستگیركرابوون.
بەگوێرەی بڕیارێكی دادگای تێهەڵچوونەوەی رەسافە، بەهۆی نەبوونی بەڵگەی پێویست و ساغنەبوونەوەی ئەو تۆمەتانەی ئاڕاستەیان كراوە، دادگای ناوبراو بڕیارداوە بە ئازادكردنی ئەو سێ كەسەی بە تۆمەتی سوتاندنی بازاڕی قەیسەری كەركوك دەستگیركرابوون.
هەر بە گوێرەی بڕیارەكە، ئەو ئۆتۆمبێل و مۆبایلانەی لەكاتی دەستگیركردنی ئەو كەسانەی دەستیبەسەرداگیراوە، رۆژی 23ـی ئەم مانگە رادەستی ناوبراون دەكرێنەوە.
ئەوەش لەدوای ئەوەدێت، رۆژی 19ـی مانگی ئادار ئاگرێكی گەورە لە بازاڕی قەیسەری كەركوك كەوتەوە و بەهۆیەوە زیاتر لە 100 دوكان سووتان، دواتریش هێزە ئەمنییەكانی كەركوك لێكۆڵینەوەیان لە روداوەكە دەستپێكرد و ژمارەیەك كەسیان دەستگیركرد.
لەپێناو پەلكێشنەكردنی عیراق لە جەنگی ئیسرائیل لەگەڵ غەززە و لوبنان، وەفدێكی ئەمنی عیراق سەردانی ئێرانی كرد.
وەزارەتی ناوخۆی عیراق لە راگەیەندراوێكدا بڵاویكردەوە، بە سەرۆكایەتی عەبدولئەمیر شمەری وەزیری ناوخۆ وەفدێكی ئەمنی سەردانی ئێرانیان كردووە و پاراستنی سنورە هاوبەشەكان و كاراكردنی یاداشتەكان و مەشق و راهێنان و ئاڵوگۆڕی زانیاری و بواری ئەمنی و خوێندن و زیارەتكارانی چلە و چەندین بابەتی دیكە تاوتوێ كراون.
بەڵام سەرچاوەیەكی ئاگادار لەو سەردانە بە میدیا عیراقییەكانی راگەیاندووە، وەزیری ناوخۆ لەو سەردانەدا لەلایەن سەرۆك وەزیرانی عیراقەوە راسپێردرابوو كە هانی ئێران بدات عیراق لە تێوەگلان لە جەنگی ئیسرائیل لەگەڵ غەززە و لوبنان دوور بخاتەوە، بە تایبەت كە باس لەوە دەكرێت ئێران بە نیازە خاكی عیراق بۆ هێرشكردنە سەر ئیسرائیل بەكاربهێنێت.
سەرچاوەیەكیش لە رۆژنامەی "شەرقلئەوسەت"ەوە رایگەیاندووە، كەسایەتییە دیارەكانی چوارچێوەی هەماهەنگی رۆژانە كۆبوونەوە دەكەن بۆ دوورخستنەوەی مەترسی لە عیراق، هەروەها هەوڵەكانی محەمەد شیاع سودانیش لەوبارەیەوە بەردەوامە.
حكومەتی بەریتانیا بەمنزیكانە ئەفسەر رەوانەی عیراق و هەرێمی كوردستان دەكات، بۆ رێگریكردن لە كۆچی نایاسایی و روبەڕوبوونەوەی قاچاخچییەكان.
رۆژنامەی زە ناشناڵ بڵاویكردووەتەوە لە هەوڵێكدا بۆ چارەسەركردنی تۆڕەكانی قاچاخچی كە لە كەناڵی ئینگلیز كاردەكەن، بەمنزیكانە بەریتانیا ئەفسەر رەوانەی عیراق و هەرێمی كوردستان دەكات، چونكە عیراقییەكان ژمارەیەكی زۆری ئەو كۆچبەرانە پێكدەهێنن كە پارە دەدەن بۆ تێپەڕاندنی كەناڵی ئینگلیز بە بەلەمی بچوك بۆ گەیشتن بە بەریتانیا، ئەوەش لەچوارچێوەی رێكارەكانی كەیر ستارمەر سەرۆك وەزیرانی بەریتانیا بۆ رێگریكردن لە كۆچی نایاسایی.
بەپێی رۆژنامەكە، ئەو ئەفسەرانە بە سیفەتی نێودەوڵەتی كاردەكەن بۆ چارەسەركردنی ئەو كێشەیە لە بنەڕەتەوە.
رۆژنامەكە راشیگەیاندووە، قاچاخچییەكانی هەرێمی كوردستان و عیراق لەم چەند ساڵەی كۆتاییدا زۆرترین كۆچبەریان گواستووەتەوە، یەكێك لە كەسە سەرەكییەكانیش لەمساڵدا دەستگیركرا كە ناوی بەرزان مەجید بووە و بە دووپشك ناسرابوو، لەلایەن دادگای بەلژیكاوە سزای زیندانی ١٠ ساڵی بەسەردا سەپێندرا.
بەپێی ئامارەكانی وەزارەتی ناوخۆی بەریتانیا، ئەمساڵ ٣١ هەزار و ٩٤ كۆچبەری نایاسایی بە بەلەمی بچووك كەناڵی ئینگلیزیان تێپەڕاندووە، كە ئەو ژمارەیە ١٦% زیاترە لە ساڵی رابردوو، كە لەو ساڵەدا ٢٦ هەزار و ٦٩٩ كۆچبەر ئەو رێگەیەیان تێپەڕاندبوو.
ئەمڕۆ ئەنجومەنی وەزیرانی عیراق كۆدەبێتەوە و داواكارییەكانی حكومەتی هەرێم لەبارەی پرسی ئەنجامدانی سەرژمێری گشتی دانیشتووان تاوتوێدەكات.
بڕیارە ئەمڕۆ ئەنجومەنی وەزیرانی عیراق كۆببێتەوە و یەكێك لە تەوەری كۆبوونەوەكەش تاوتوێكردنی داواكارییەكانی حكومەتی هەرێمی كوردستانە سەبارەت بە ئەنجامدانی سەرژمێری گشتی دانیشتووان كە بڕیارە لە ٢٠ و ٢١ی ئەم مانگە لە عیراق و هەرێمی كوردستان بەڕێوەبچێت.
پەیامنێری كوردسات نیوز رایگەیاند، داواكارییەكانی كورد پێكهاتوون لەوەی كە لە سەرژمێری دانیشتواندا هاووڵاتیان لەسەر شارەكانی خۆیان تۆماربكرێن، لەبەر روونەدانی گۆڕانی دیموگرافی بەتایبەت لە ناوچە كوردستانییەكانی دەرەوەی ئیدارەی هەرێم، هەروەها نوێنەری حكومەتی هەرێم لە سەنتەری داغڵكردنی داتاكان لە بەغداد ئامادەیی هەبێت.
ئەو كۆبوونەوەیەش دوای ئەوەدێت كە رۆژی پێنجشەممەی رابردوو وەفدی هەرێم لەگەڵ د. لەتیف رەشید سەرۆككۆمار و محەمەد شیاع سودانی سەرۆك وەزیرانی عیراق كۆبوونەوە و ئەو دوو داواكارییەیان خستەڕوو، لەبەرانبەر سودانیش وەفدەكەی هەرێمی دڵنیاكردەوە كە لە كۆبوونەوەی ئەنجومەنی وەزیران داواكارییەكان دەكەنە بڕیار.
چوارچێوەی هەماهەنگی شیعەكان بۆ تاوتوێكردنی دوایین پێشهاتەكانی ناوخۆی عیراق و ناوچەكە كۆبووەوە و داواش لە ئەنجومەنی نوێنەران دەكات، تەمەنی ئەم وەرزەی یاسادانان درێژبكاتەوە.
نوسینگەی راگەیاندنی چوارچێوەی هەماهەنگی بڵاویكردەوە، شەوی دووشەممە، سەركردەكانی چوارچێوەی هەماهەنگی لە نوسینگەی د.حەیدەر عەبادی سەرۆكی هاوپەیمانی فەتح كۆبوونەوەتەوە، بۆ تاوتوێكردنی دوایین پێشهاتەكانی ناوخۆی وڵات و ناوچەكە.
لە كۆبوونەوەكەدا، چوارچێوە پاڵپشتی خۆی بۆ بەیاننامەكەی سیستانی لەبارەی دۆخی عیراق دووپاتكردەوە و بە نەخشەرێگایەك بۆ گەشەپێدان و ئاسایشی عیراقی ناویبردووە.
هەر لە كۆبوونەوەكەدا، چوارچێوە داوای لە ئەنجومەنی نوێنەران كردووە ئەم وەرزەی یاسادانان درێژبكاتەوە، بەجۆرێك لەگەڵ پێشهاتەكانی ناوخۆی وڵات بگونجێت. جەختیشیكردەوە، لە پێویستی راگرتنی دەستدرێژییەكانی ئیسرائیل بۆ سەر لوبنان و گەلی فەڵەستین لە غەززە.
لیژنەی یاسایی رایگەیاند، لە ئەنجومەنی نوێنەران هەوڵێك هەیە بۆ درێژكردنەوەی تەمەنی ئەم وەرزەی یاسادانان لە رۆژی ٩ـی ئەم مانگەوە بۆ رۆژی ٩ـی مانگی داهاتوو.
محەمەد خەفاجی ئەندامی لیژنەی یاسایی ئەنجومەنی نوێنەرانی عیراق لە لێدوانێكی رۆژنامەوانیدا ئاماژەی بەوەدا، رۆژی ٩ـی ئەم مانگە، ئەم وەرزەی یاسادانان كۆتاییدێت، هەوڵێكیش هەیە بۆ درێژكردنەوەی تەمەنی ئەم وەرزەی یاسادانان بۆ ماوەی یەك مانگ.
ئەوەشی خستەڕوو، بەگوێرەی ماددەی ٥٨ـی دەستوور، درێژكردنەوەی تەمەنی وەرزی یاسادانان دەكرێت لەسەر داواكاری هەریەك لە سەرۆك كۆمار، سەرۆك وەزیران، سەرۆكی ئەنجومەنی نوێنەران بێت، یاخود بەكۆی دەنگی ئەندامانی ئەنجومەن بێت.
ئەو پەرلەمانتارە وتیشی، درێژكردنەوەی ئەم وەرزەی یاسادانان، دەرفەتە بۆ پەسەندكردنی ئەو پڕۆژەیاسایانەی ناكۆكییان لەسەرە، هاوكات دەرفەتێكە بۆ ئەنجومەنی وەزیران بەر لە كۆتایی ئەمساڵ، خشتەی بودجەی ٢٠٢٥ رەوانەی ئەنجومەنی نوێنەران بكات.
سودانی رێنمایی دەركرد بۆ بە بانكیكردنی موچەی فەرمانبەرانی كەرتی تایبەت و سەرجەم وەزارەت و فەرمانگە حكومییەكانیشی راسپارد، دەستبەرداری مامەڵەكردن بە پارەی نەختینە بن و رووبكەنە بەكارهێنانی سیستمی پارەدانی ئەلیكترۆنی.
نوسینگەی سەرۆك وەزیرانی عیراق بڵاویكردەوە، لەچوارچێوەی چاكسازییە دارایی و ئابورییەكانی كارنامەی حكومەت، محەمەد شیاع سودانی، رێنمایی دەركردووە بۆ بەبانكیكردنی موچەی فەرمانبەرانی كەرتی تایبەت و بۆ ئەو مەبەستەش، وەزارەتی كار و كاروباری كۆمەڵایەتی و بانكی ناوەندی و چەند دامەزراوەیەكی كەرتی تایبەتی راسپاردووە، میكانیزمێك بۆ بەبانكیكردنی موچەی فەرمانبەرانی كەرتی تایبەت ئامادەبكەن.
ئەوەشی خستووەتەڕوو، سودانی سەرجەم وەزارەت و فەرمانگە حكومییەكانی راسپاردووە، لەڕێی پلانێكی تۆكمەوە دەستبەرداری مامەڵەكردن بە پارەی نەختینە بن و رووبكەنە بەكارهێنانی سیستمی پارەدانی ئەلیكترۆنی، دوایین وادەش بۆ جێبەجێكردنی ئەو راسپاردەیە، رۆژی ١ـی تەمموزی ٢٠٢٥ـە.
بەمەبەستی بەشداربوون لە پڕۆسەی سەرژمێری گشتی وەك بژمێر، دەستەی ئاماری هەرێم ماڵپەڕی پێشكەشكردنی فۆڕمی ئەلیكترۆنی رادەگەیەنێت.
وەزارەتی پلاندانانی هەرێم رایگەیاند، ماڵپەڕەكە لە ڕۆژانی 6،7،8ی ئەم مانگە كارا دەكرێت و تیایدا ڕێنمایی و مەرجی پێشكەشكردن خراوەتەڕوو بۆ هەموو دەرچوویەكی زانكۆ و پەیمانگا كە بە ویستی خۆیان فۆڕم پێشكەش بكەن.
وتیشی ئەو هەنگاوە ئەوەش لە چوارچێوەی ئامادەكارییەكانە بۆ ئەنجامدانی كاری مەیدانی پڕۆسەی سەرژمێری گشتی دانیشتوان كە لە ڕۆژانی 16-17-18-19 ئەم مانگە دەسپێدەكات.
بەپێی رێنماییەكان، پێشكەشكار دەبێت لە سنوری نیشتەجێبوونی خۆی و تەنها یەك جار فۆڕم پێشكەش بكات لەگەڵ ئەوەشدا مەرج نییە هەموو پێشكەشكارێك ناوی بگەرێتەوە وەك بژمێر، چونكە بەپێی پێداویستی و ژمارەی دیاریكراو لەسەر ئاستی گەڕەك و گوند دەستنیشانی پێشكەشكاران دەكرێت.
شیكەرەوەیەكی ئەمریكی دەڵێت، ئەگەر كامالا هاریس ببێتە سەرۆكی ئەمریكا ئەستەمە هێزەكانی وڵاتەكەی لە عیراق بكشێنێتەوە كە ژمارەیان دوو هەزار و 500 سەربازە.
ریچارد چازدی مامۆستای زانستە سیاسییەكان لە زانكۆی جۆرج واشنتۆن لە ئەمریكا رایگەیاند، كامالا هاریس كاندیدی دیموكراتەكان بۆ هەڵبژاردنی سەرۆكایەتی ئەمریكا بەردەوام پشتیوانی لە بەخشینی عیراق كردووە لەو سزایانەی ئەمریكا كە بەسەر ئێراندا سەپاندویەتی بە مەبەستی سودمەندبوونی لە كەرتی وزەی ئەو وڵاتە.
وتیشی، هاریس هەوڵەكانی بۆ رێگریكردن لە سپیكردنەوەی پارە و نەهێشتنی سەرچاوە دارییەكانی تیرۆر چڕدەكاتەوە و دەیەوێت پارێزگاری لە پێگەی ئەمریكاش بكات لە عیراق و سوریا بە مەبەستی بەردەوامی لەسەر ئۆپراسیۆنەكانی دژی گرووپی تیرۆریستی داعش، بۆیە ئەگەر كامالا هاریس ببێتە سەرۆكی ئەمریكا ئەستەمە هێزەكانی وڵاتەكەی لە عیراق بكشێنێتەوە كە ژمارەیان دوو هەزار و 500 سەربازە.