هەسەدە لەبارەی روبەڕوبوونەوەی هێزەكانیان لەگەڵ چەكدارانی سوریا راگەیەندراوێكی بڵاوكردەوە و دەڵێت؛ چەندین هێرشی چەکدارانی سوریایان تێکشکاندووە.

هێزەکانی سوریای دیموکرات'هەسەدە' رایگەیاند، لە سەعات سێ تا شەشی بەیانی ئەمڕۆ هێزەكانمان بەرپەرچی هێرشەكانی سوریایان داوەتەوە.

ئاماژەی بەوەشکرد، لە پێكدادانەكانی بەرەی سرین ژمارەیەكی زۆر ئۆتۆمبێلی سەربازی و زرێپۆشی هێزەكانی سوریا تێكشكێندراون.

هەسەدە ئەوەشی خستەڕوو، سەرنشینی ئەو ئۆتۆمبێل و زرێپۆشانە كوژراون و لەبەرەی گوندی خان مامەد لە كۆبانێ هەوڵێكی تری پێشڕەوی سوپای سوریا تێكشكێندراوە.

 وتەبێژی هەسەدە رایگەیاند، كۆبونەوەكان لەگەڵ دەسەڵاتی دیمەشق سەركەوتوو نەبوون، مەزڵوم كۆبانێ‌ گەڕاوەتەوە رۆژئاوای كوردستان.

فەرهاد شامی وتەبێژی هێزەكانی سوریای دیموكرات"هەسەدە"رایگەیاند، مەزڵوم عەبدی ئێستا گەڕاوەتەوە رۆژائای كوردستان و سەركردایەتی هێزەكانیان دەكات.

راشیگەیاندوە، مەزڵوم كۆبانێ‌ بۆ یەكڕیزی سوریا و چارەسەری ئاشتیانە چووە دیمەشق، بەڵام رژێمی دیمەشق لەبری دیالۆگ، رادەستكردنی سەپاندوە، ئەوەش قبوڵكراو نەبووە.

سەبارەت بە هێرشەكانیش ئاماژەی بۆ ئەوەكردووە، گروپە چەكدارەكان لە چەند ئاراستەیەكی جیاوازەوە، پەلاماری ناوچەكانی ژێر دەسەڵاتی هەسەدە دەدەن، لەگەڵ ئەوەشدا هەموو هێرشەكان پووچەڵ كراوەتەوە.

لەلایەەكی ترەوە مەحمود بەرخوردان، فەرماندەی هەسەدە پەیامێكی ئاراستەی خەڵكی كۆبانێ و جەزیرە كردوە و جەختی لەوەكردوتەوە، قۆناغی ئێستا، سەرەتای قۆناغێكی نوێی بەرخۆدانە و بەرخۆدانی دووەمی كۆبانێیە.

هاوكات ئەحمەد مۆفەق زێدان راوێژكاری ئەحمەد شەرع رایگەیاندوە، كۆبونەوەكانیان لەگەڵ هەسەدە باش نەبووە، بەپێی پێشبینییەكان نەبووە.

 

عەباس عراقچی، وەزیری دەرەوەی ئێران رایدەگەیەنێت، کۆڕبەندی ئابووریی جیهانی (داڤۆس) بەهۆی فشارەکانی ئیسرائیلەوە بەشداریکردنی ئەوی هەڵوەشاندووەتەوە و ئەوەش بە "دووفاقی و ئیفلاسی ئەخلاقی" وەسف دەکات.

عراقچی لە پەیامێکدا ئاماژەی بەوەکردووە، بڕیاری رێگری لێکردنی بۆ بەشداریکردن لە داڤۆس، لەسەر بنەمای "درۆ و فشاری سیاسیی ئیسرائیل و بریکارەکانی لە ئەمریکا" بووە. سەبارەت بە رووداوەکانی ناوخۆی ئێرانیش، پاساوی ئەوەی هێناوەتەوە کە ئەوان بەرگرییان لە گەلەکەیان کردووە دژی "تیرۆریستانی چەکدار و کوشتنی هاوشێوەی داعش" کە بە ئاشکرا لەلایەن دەزگای مۆسادەوە پشتیوانی کراون.

وەزیری دەرەوەی ئێران رەخنەی توند لە رێکخەرانی داڤۆس دەگرێت و دەڵێت: "ئیسرائیل لە فەلەستین جینۆساید دەکات و71 هەزار کەسی بێتاوانی کوشتووە، کەچی داڤۆس بانگهێشتنامەی هیچ بەرپرسێکی ئیسرائیلی هەڵنەوەشاندووەتەوە".

باسی لەوەشکردووە، ئیسحاق هێرزۆگ، سەرۆکی ئیسرائیل ساڵی رابردوو وەک براوەیەک لە داڤۆس بوو، لەکاتێکدا لە سویسرا رووبەڕووی تۆمەتی تاوانکاری ببووەوە بەهۆی جینۆسایدکردنی غەززەوە.

لە کۆتاییدا عراقچی ئەو هەڵوێستەی داڤۆسی بە "ئیفلاسی ئەخلاقی و هزری" ناوبردووە و پێی وایە خەڵک مافی خۆیانە راستییەکان بزانن.

فەوزە یوسف، ئەندامی دەستەی سەرۆکایەتیی پەیەدە، بانگەوازێک ئاڕاستەی ئازادیخوازانی جیهان دەکات و دەڵێت، کورد لەبەردەم مەترسیی جینۆسایدایە و جیهانیش بێدەنگە.

لە پەیامەکەیدا فەوزە یوسف دەڵێت: "ئەو شەڕڤانە کوردانەی مرۆڤایەتییان لە دەستی داعش رزگار کرد، ئێستا بەتەنیا جێهێڵراون بۆ ئەوەی لەلایەن پاشماوەکانی داعش و هێزە جیهادییەکانەوە لەژێر ناوی سوپای سوریادا شەهید بکرێن".

ناوبراو هۆشداریداوە کە گەلی کورد لەبەردەم مەترسیی سڕینەوە و جینۆسایددایە و داوا لە هەموو ئازادیخوازانی جیهان دەکات هاوسۆز بن و پشتیوانییان بکەن.

 

فەرماندەیی گشتیی هێزەکانی سوریای دیموکرات (هەسەدە) لە پەیامێکدا بۆ رای گشتی رایدەگەیەنێت، شارەکانی رۆژئاوا دەکەنە گۆڕستانی داگیرکەران و داوا لە گەنجانی هەر چوار پارچەی کوردستان و ئەوروپا دەکات سنورەکان بشکێنن و بەشداریی بەرخودان بکەن.

لە راگەیەندراوەکەدا هەسەدە ئاماژەی بەوەکردووە، لە 6ـی ئەم مانگەوە ناوچەکە روبەڕووی هێرشی دڕندانە بووەتەوە و دەوڵەتی تورکیا و چەتەکانی بە عەقڵییەتی داعشەوە دەیانەوێت ئیرادەی گەل بشکێنن.

هەسەدە دەڵێت: "بە بڕیار و ئیرادەیەکی مەزنەوە دەڵێین، چۆن هەڤاڵانمان لە ساڵی 2014 لە کۆبانێ بەرخودانێکی مێژووییان کرد و ئەو شارەیان کردە گۆڕستانی داعش، ئەمڕۆش بە هەمان ئیرادەوە شارەکانمان لە دێرک-ەوە تا حەسەکە و کۆبانێ دەکەینە گۆڕستان بۆ خاوەن عەقڵییەتە نوێیەکەی داعش".

فەرماندەیی هەسەدە داوایەکی بەپەلەی ئاڕاستەی گەنجان کردووە و دەڵێت: "داوا لە هەموو گەنجانمان، کچان و کوڕانی رۆژئاوا، باکور، باشور و رۆژهەڵاتی کوردستان و ئەوروپا دەکەین، یەکبگرن و سنوری داگیرکەران هەڵبگرن و وەرن بەشداریی بەرخودانەکە ببن".

لە کۆتاییدا جەختیکردووەتەوە: "ئەمڕۆ ڕۆژی کەرامەت و بەرپرسیارێتیی مێژووییە بۆ سەلماندنی ئەوەی ئیرادەی گەلان لە هەموو هێرش و داگیرکارییەک بەهێزترە".

لیندسی گراهام، سیناتۆری ئەمریکا کەمێک پێش ئێستا جارێکیتیر لە ئێکس رەخنەی توندی لە هەوڵە سەربازییەکانی ئەحمەد شەرع گرت بۆ یەکخستنەوەی سوریا و دەڵێت "ئەمە رێگەیەکی پڕ مەترسییە".

گراهام لە پەیامێکدا دەڵێت: "هێرشکردنە سەر ئەندامانی هەسەدە لەلایەن حکومەتی سوریاوە مەترسیدارە و پێشبینی دەکەم کۆنگرێس بە زووترین کات دانیشتن و لێپرسینەوە لەمبارەیەوە ئەنجام بدات".

سەبارەت بە رۆڵی کورد، سیناتۆرە کۆمارییەکە ئاماژەی بەوەکردووە: "ئەوە هەسەدە بوون کە وەک هێزی وشکانی لە خولی یەکەمی سەرۆکایەتیی ترەمپدا داعشیان تێکشکاند، باوەڕم وایە قەرزاریانین و شایستەی مامەڵەی باشترن".

ئەمە لە ماوەی ئەمشەودا و سەروەختی بەرەو پێشچوونی شەڕی نێوان چەکدارانی سوپای عەرەبی سوریا و هەسەدە سێهەم پەیامە کە ئەو سیناتۆرە لە ئێکس بۆ پشتگیری کوردان بڵاویبکاتەوە.

لیندسی گراهام، سیناتۆری ئەمریکا بە توندترین شێوە هۆشداریدەدات لە مەترسیی زیندانەکانی داعش و رایدەگەیەنێت، باوەڕی وایە دەبێت ئەمریکا بە هەر نرخێک بێت بەرگری لەو زیندانانە بکات.

گراهام لە پەیامێکدا دەڵێت: "هەزاران لەم شێتانە لە زیندانەکاندان، ئەگەر دەربچن دۆزەخ دروست دەبێت... چەندین ساڵە ئەمە دەڵێمەوە".

سیناتۆرە ئەمریکییەکە پەیامێکی ئاڕاستەی حکومەتی سوریا کردووە و دەڵێت: "ئاگاداربن کە شکاندنی زیندانەکانی داعش کارەساتە بۆ ئەمریکا، سوریا و ناوچەکە".

جەختیشی کردووەتەوە کە نابێت ئەمریکا دوودڵ بێت لە بەرگریکردن لەو زیندانانە و دەبێت "بە هەر رێگەیەک بێت" بیانپارێزێت.

بنیامین ناتانیاهۆ، سەرۆک وەزیرانی ئیسرائیل بەڵێن دەدات رێگە نەدات هێزەکانی تورکیا و قەتەر لە کەرتی غەززە کار بکەن و دان بەوەشدا دەنێت کە لەگەڵ ئەمریکا ناکۆکییان هەیە لەسەر شێوازی ئیدارەدانی دوای جەنگ.

ناتانیاهۆ لە وتارێکدا لە پەرلەمانی ئیسرائیل (کنێست) رایگەیاند، قۆناغی دووەمی جەنگ بریتییە لە چەککردنی حەماس و پاککردنەوەی ناوچەکە لە چەک و وتی: "ئەم ئامانجانە بەدی دەهێنین، جا بە رێگەی ئاسان بێت یان بە زەبری هێز".

سەرۆک وەزیرانی ئیسرائیل ئاشکرای کرد، لە ئێستادا لەسەدا 53ـی خاکی غەززەیان بەدەستەوەیە و لە "پێگەی هێزەوە" قسە دەکەن.

ناتانیاهۆ ئاماژەی بەوەکرد، لەگەڵ ویلایەتە یەکگرتووەکانی ئەمریکا ناکۆکییان هەیە سەبارەت بە پێکهاتەی ئەو هێزەی بڕیارە دوای جەنگ ئیدارەی غەززە بدات، جەختیشی کردەوە کە رێگە بە بوونی سەربازیی تورکیا و قەتەر لە ناوچەکەدا نادەن.

لەلایەکی دیکەوە، ناتانیاهۆ رەتیکردەوە لیژنەی لێکۆڵینەوەی رەسمیی دەوڵەت بۆ روداوەکانی 7ـی ئۆکتۆبەر پێکبهێنرێت و پێی وایە تەنیا لێکۆڵینەوەی سیاسی متمانەی خەڵک بەدەستدەهێنێت، ئەوەش لە کاتێکدایە ئۆپۆزسیۆن بە شکستخواردوو و کەمتەرخەم تۆمەتباری دەکات.

ناوەندی راگەیاندنی هێزەکانی سوریای دیموکرات (هەسەدە) رایدەگەیەنێت، هێرشێکی چەکدارانی سەر بە دیمەشقیان لە میحوەری گوندی عالیە تێکشکاندووە و فڕۆکەی بێفڕۆکەوانی تورکیاش چیای کەزوان بۆردومان دەکات.

لە راگەیەندراوێکدا هەسەدە ئاشکرای کردووە، کەمێک پێش ئێستا فڕۆکەی بێفڕۆکەوانی تورکیا هێرشی کردووەتە سەر چیای کەزوان لە باشوری شاری حەسەکە و هاوکات شوێنەکە تۆپباران کراوە.

لە لایەکی دیکەوە، هێزەکانی هەسەدە هێرشێکی چەکدارانی سەر بە حکومەتی دیمەشقیان لە میحوەری گوندی "عالیە" تێکشکاندووە و زیانی زۆری گیانی و ماددییان بە هێرشبەران گەیاندووە.

لیندسی گراهام، سیناتۆری ئەمریکا هەڕەشەی توند لە حکومەتی سوریا دەکات و دەڵێت، ئەگەر پێشڕەوییەکانیان بەرەو باکور و شاری رەققە رانەگرن، سزای "ئێسک شکاندن"یان بەسەردا دەسەپێنن و پەیوەندییەکانیان لەگەڵ واشنتۆن تێکدەدەن.

گراهام لە پەیامێکدا دەڵێت: "ئەگەر هێزەکانی حکومەتی سوریا بەردەوام بن لە پێشڕەوی بەرەو رەققە، فشار دەکەم بۆ ئەوەی سزاکانی (یاسای قەیسەر) بە شێوەیەکی زۆر توندتر بسەپێنرێتەوە".

ئاماژەی بەوەشکردووە، دیارە هیچ کەسێک لە سوریا گوێ لە ئەو و بەرپرسانی دیکەی ئەمریکا ناگرێت، بۆیە هۆشداری دەدات کە بەردەوامبوون لەم سیاسەتە تەنیا سزای توندی لێناکەوێتەوە، بەڵکو زیانی هەمیشەیی بە پەیوەندییەکانی نێوان ئەمریکا و حکومەتی نوێی سوریا دەگەیەنێت.

سیناتۆرە کۆمارییەکە بە زمانی هەڕەشەوە دەڵێت: "ئەگەر واتێدەگەن قسەکانمان فشە، بەردەوام بن... هەوڵمداوە دادپەروەر بم لەگەڵ حکومەتە نوێیەکە، بەڵام دیارە گوێتان لێ نییە. ئەگەر دەتانەوێت پەیوەندییەکان رزگار بکەن، بوەستن و بکشێنەوە، هیوادارم ژیرانە بڕیار بدەن".

فەوزا یوسف، ئەندامی دەستەی سەرۆکایەتیی پەیەدە، بانگەوازێکی بەپەلە ئاڕاستەی گەلی کورد لە باکوری کوردستان دەکات و دەڵێت، رۆژئاوا رووبەڕووی جینۆساید بووەتەوە.

لە پەیامێکدا فەوزا یوسف رایگەیاندووە: "چەتەکانی داعش لەژێر ناوی سوپای سوریادا هێرشێکی بێباکانە ئەنجام دەدەن، ئەمڕۆ رۆژی پاراستنی کەرامەت و بوونمانە".

ناوبراو داوا لە خەڵکی باکوری کوردستان دەکات بەرەو شارۆچکەکانی نوسەیبین (بەرامبەر قامیشلۆ) و پرسوس (بەرامبەر کۆبانێ) بڕۆن و لەسەر سنورەکان کۆببنەوە بۆ پشتیوانیکردنی بەرخودانی رۆژئاوا.

ناوەندی راگەیاندنی هێزەکانی سوریای دیموکرات (هەسەدە) رایدەگەیەنێت، هێزەکانی سەر بە حکومەتی دیمەشق تاوانێکی قێزەونیان ئەنجامداوە و بە شێوازی داعش ژمارەیەک شەڕڤانیان سەربڕیوە.

لە راگەیەندراوێکدا هەسەدە ئاشکرای کردووە، هێزەکانی حکومەتی دیمەشق دوای دەستگیرکردنی ژمارەیەک شەڕڤان، سەریان بڕیون و ڤیدیۆی تاوانەکەشیان تۆمار کردووە، کە ئەمەش "تەواو لە شێوازی رێکخراوی تیرۆریستیی داعش دەچێت".

هەسەدە داوا لە کۆمەڵگەی نێودەوڵەتی دەکات هەڵوێستی یەکلاکەرەوەی هەبێت بۆ راگرتنی ئەم پێشێلکارییانە و لێپرسینەوە لە ئەنجامدەرانی ئەم تاوانە.

لە ئۆپەراسیۆنێکی بەرفراواندا هێزە ئەمنییەکانی تورکیا "بارۆنی مادە هۆشبەرەکان"ی وڵاتەکەیان دەستگیرکرد، کە تۆمەتباری سەرەکییە لە دۆسیەی ئەو کەشتییەی بە 10 تۆن کۆکایینەوە لە ئیسپانیا دەستی بەسەردا گیرا.

بەرەبەیانی ئەمڕۆ دووشەممە، هێزە ئەمنییەکان لە ئۆپەراسیۆنێکی هاوبەشدا لە شەش پارێزگای تورکیا، هەڵیانکوتایە سەر 19 شوێن و توانییان "شەتین گۆرین" ناسراو بە بارۆنی کۆکایین و شەش گەورە تۆمەتباری دیکە دەستگیر بکەن. دەسەڵاتداران دەستیان بەسەر تەواوی سامانی گواستراوە و نەگواستراوە، هەژماری بانکی و دراوی ئەلکترۆنیی دەستگیرکراوەکاندا گرت.

دەستگیرکردنی گۆرین دوای ئەوە هات کە لێکۆڵینەوەکان دەریانخست پەیوەندیی بە کەشتیی "United S"ـەوە هەیە، کە رۆژی ٧ی ئەم مانگە لە ئیسپانیا دەستی بەسەردا گیرا و 10 تۆن کۆکایینی تێدابوو.

لێکۆڵینەوەکان ئاشکرایان کردووە، کەشتییە 295پاکەت کۆکایینی تێدابوو کە کێشی هەر یەکێکیان 35 کیلۆگرام بووە. کەشتییەکە مانگی تشرینی یەکەمی ساڵی 2025 لە بەندەری مێرسین-ی تورکیاوە دەرچووە و بە مەغریب و بەرازیلدا تێپەڕیوە و لە ناوەراستی دەریاوە لە نزیک سورینام بارەکەی وەرگرتووە.

مەزڵوم کۆبانێ دەڵێت: شەڕێكی نابەرامبەرمان بەسەردا سەپێنرا و شكستمان نەهێناوە و نەڕووخاوین.

مەزڵوم کۆبانێ فەرماندەی گشتی هێزەکانی سوریای دیموکرات 'هەسەدە' پەیامێکی لەبارەی رێککەوتنی هەسەدە و حکومەتی سوریا بڵاوکردەوە و رایگەیاند، لە 6ی ئەم مانگەوە شەڕێكی سەخت و دژوار دەستیپێكردووە و لەو شەڕەدا ژمارەیەكی زۆر شەهید و بریندارمان داوە.

وتیشی، سبەینێ‌ سەردانی دیمەشق دەكەین بۆ گفتوگۆكۆدن لەسەر رێككەوتن و دەمانەوێت رێگە لە شەڕ بگرین و ئەوەی هەیە نەبێتە شەڕێكی ناوخۆیی.

مەزڵوم کۆبانێ ئەوەشی خستەروو، لەناوچەكانی دێرەزوور و رەققە كشاینەوە بۆ حەسەكە بۆ رێگرتن لە شەڕ، دەشڵێت؛ شكستمان نەهێناوە و نەڕووخاوین.

ئاماژەی بەوەشکرد، شەڕێكی نابەرامبەرمان بەسەردا سەپێنرا و جەخت لە پاراستنی دەستكەوتەكان و هەرێمەكەمان دەكەینەوە.