شەڕڤانانی هەسەدە لە گرتووخانەی ئەقتان كشانەوە و سوپای سوریاش دەڵێت؛ ئەو كارەی هەسەدە هەنگاوی یەكەمە بۆ جێبەجێكردنی رێككەوتنەكەی 18ی ئەم مانگە.

بەرەبەیانی ئەمڕۆ شەڕڤانانی هەسەدە كە پاراستنی گرتووخانەی ئەقتانیان لە ئەستۆ گرتبوو، لە دەوروبەری گرتووخانەكە بەرەو كۆبانێ‌ كشانەوە، بەمەبەستی رادەستكردنی بە حكومەتی دیمەشق، ئەوەش لە كاتێكدایە ژمارەیەكی زۆر لە تیرۆریستانی داعش لە گرتووخانەی ئەقتان زیندانیكراون، چەند رۆژێكیشە لەلایەن تیرۆرستان و گرپە چەكدارەكانەوە، گەمارۆ دراوە و بەردەوام پەلاماری گرتووخانەكەیان دەدا.

سوپای سوریاش لە راگەیەندراوێكدا ئاماژەی بەوەكردووە، كشانەوەی هەسەدە لە گرتووخانەی ئەقتان، هەنگاوی یەكەمە بۆ جێبەجێكردنی رێككەوتنەكەی 18ی ئەم مانگە و وەزارەتی ناوخۆی سوریاش سەرپەرشتی گرتووخانەكە دەكات.

سیناتۆرێکی ئەمریکا دەڵێت: لەناو ئەنجومەنی پیرانی ئەمریکا کۆدەنگییەکی بەهێز هەیە بۆ ئەوەی کوردەکان بپارێزن.

لیندسی گراهام، سیناتۆری ئەمریکا لە تۆڕی کۆمەڵایەتی ئێسک بڵاویکردەوە، لە ئەنجومەنی پیرانی ئەمریکا نیگەرانییەکان لەبارەی رەوشی خراپی سوریا زیادیکردووە.

ئاماژەی بەوەشکرد، کۆدەنگی بەهێز هەیە بۆ پاراستنی ئەو کوردانەی کە لە شەڕی داعش هاوکارمان بوون و لەگەڵمان مانەوە.

گراهام ئەوەشی خستەڕوو، دەسەڵاتەکانی ئەنجومەنی پیران راستەقینەن، چاوەڕوان بن.

مەزڵوم عەبدی، فەرماندەی گشتیی هێزەکانی سوریای دیموکرات (هەسەدە)، ئاشکرای کرد کە پەیوەندییەکی تەلەفۆنیی لەگەڵ ئیمانوێل ماکرۆن، سەرۆکی فەرەنسا، ئەنجام داوە.

عەبدی رایگەیاند، سەرۆکی فەرەنسا پشتگیری و هاوکاریی خۆی بۆ هەوڵەکانی هەسەدە و لایەنەکان دەربڕی کە کار بۆ راگرتنی تەقە و گەڕانەوە بۆ رێڕەوی دایەلۆگ و دانوستان لە سوریا دەکەن، بە ئامانجی گەیشتن بە چارەسەرێکی هەمیشەیی کە خزمەتی بەرژەوەندیی گشتیی تەواوی ناوچەکە بکات.

هەروەها لە پەیوەندییەکەدا باس لە جێبەجێکردنی رێککەوتنەکانی پێشووی نێوان هەسەدە و حکومەتی سوریا کرا، لەگەڵ جەختکردنەوە لەسەر پێویستیی پاراستنی مافەکانی پێکهاتەکان.

مەزڵوم عەبدی، فەرماندەی گشتیی هێزەکانی سوریای دیموکرات (هەسەدە)، رایگەیاند کە کۆبوونەوەیەکی "بونیاتنەر و بەرهەمداریان" لەگەڵ تۆم باراک و ئەدمیراڵ براد کۆپەر، فەرماندەی فەرماندەیی ناوەندیی ئەمریکا (سێنتکۆم)، لە هەرێمی کوردستان ئەنجام داوە.

عەبدی لە پۆستێکدا لە تۆڕی کۆمەڵایەتیی X، ئاماژەی بەوە دا کە پشتگیریی ویلایەتە یەکگرتووەکانی ئەمریکا و سیاسەتی دۆناڵد ترەمپ بۆ پرۆسەی راگرتنی تەقە "جیددییە، گرنگیی خۆی هەیە و جێگەی پێشوازییە."

مەزڵوم عەبدی هەروەها جەختی لەسەر هەوڵەکانی تۆم باراک کردەوە بۆ گەڕانەوە بۆ دایەلۆگ و دانوستان لەنێوان هەسەدە و حکومەتی سوریا.

فەرماندەی گشتیی هەسەدە دووپاتی کردەوە کە بە "هەموو تواناوە، بە شێوەیەکی جیددی" کار دەکەن بۆ وەدیهێنانی یەکگرتنێکی راستەقینە و پاراستنی ئاگربەستی ئێستا.

ئاگربەست لەسەر کاغەز و شەڕ لەسەر زەوی، بەردەوامی پێشێکردنی رێککەوتنەکان لەلایەن سوریا و هێرش و پەلامارەکانی چەکدارانی دیمەشق بۆ سەر رۆژئاوای کوردستان.

ناوچەکانی باکور و رۆژهەڵاتی سوریا لە سەرەتای کانوونی دووەمی 2026ەوە، رووبەڕووی یەکێک لە مەترسیدارترین پەلاماری چەکدارانی سوریا بوەتەوە، لە کاتێکدا حکومەتی کاتی دیمەشق بەردەوامە لە بانگەشەکردنی زنجیرەیەک ئاگربەست و رێککەوتنی راگرتنی شەڕ لە رێگەی راگەیاندنەکانەوە، لەکاتێکدا لەسەر عەرزی واقع رێڕەوێکی پێچەوانە دەردەخەن کە بریتییە لە هێرشی بەردەوام، فراوانبوونی جوگرافیایی شەڕەکان، و پێشێلکردنی سیستەماتیکی هەموو ڕێککەوتنێک یان ئاگربەستێک یان لێکتێگەیشتنێک کە راگەیەندرا بوو.

روداوەکان چۆن دەستیپێکرد، کۆمەڵکوژی دژی گەلی کورد و خەڵکی ناوچەکە

4 ـی کانوونی دووەمی 2026، کۆبوونەوەیەک لە دوا ساتەکاندا شکستی هێنا

لە 4 کانوونی دووەمی 2026، وەفدێکی باکور و رۆژهەڵاتی سوریا کۆبوونەوەیەکی رەسمیان لەگەڵ لێپرسراوانی حکومەتی کاتی ئەنجامدا بۆ تاوتوێکردنی دۆسیەی تێکەڵکردنی هێزە سەربازییەکان لە چوارچێوەی رێککەوتنی 10ـی ئازاری 2025، بەپێی سەرچاوەکانی بەڕێوەبەرایەتی خۆسەر، هەردوولا نزیکبوون لە ئیمزاکردنی رێککەوتنێکی سەرەتایی، بەڵام ئەسعەد شەیبانی وەزیری دەرەوەی حکومەتی کاتی، دەستوەردانی کرد، کۆبوونەوەکەی کۆتایی پێهێنا، هەروەها داوای لە وەفدی هاوپەیمانی نێودەوڵەتی کرد کۆبوونەوەکە بەجێبهێڵن، پاشان بە وەفدی باکوور و رۆژهەڵاتی سوریای راگەیاند، کە کۆبوونەوەکە بەبێ هیچ رونکردنەوەیەک کۆتایی هاتووە.

ئەم پێشهاتە نیشانەیەکی روون بوو کە رێڕەوی سیاسی بە مەبەست لەلایەن سوریا پشت لە رێککەوتنەکان دەکرێت.

5-6 ـی کانوونی دووەم، کۆبوونەوەیەک لە پاریس لە نێوان دیمەشق و تەلئەبیب

ئاژانسی رۆیتەرز بڵاویکردەوە، لە 5 و 6 کانوونی دووەم، کۆبوونەوەیەک لە نێوان حکومەتی کاتی دیمەشق و ئیسرائیل لە پاریس ئەنجامدرا، هاوکات لەگەڵ جموجۆڵی سەربازی گوماناوی لە چەندین بەرە، کە شاری دێر حافر بۆردومان کرا، هاوکات چەکی قورس گواسترانەوە بۆ دەوروبەری گەڕەکەکانی شێخ مەقسود و ئەشرەفییە و بەنی زەید لە شاری حەلەب، و دامەزراوە مەدەنییەکان کرانە سەربازگە لە دەوروبەری ئەو گەڕەکانە.

6 کانوونی دووەم؛ هێرشەکان بۆ سەر شێخ مەقسود و ئەشڕەفیە

لە 6ـی کانوونی دووەمی 2026، چەکدارانی حکومەتی کاتی سوریا، بۆردومانێکی فراوانیان بۆ سەر گەڕەکەکانی شێخ مەقسود و ئەشرەفییە لە شاری حەلەب ئەنجامدا، بە بەکارهێنانی تانک و تۆپخانەی قورس و بە فڕۆکە بێفڕۆکەوانی تورکی.

بۆردومانەکە گەڕەکی نیشتەجێبوونی هاووڵاتیانی مەدەنی کردە ئامانج، کەبووە هۆی شەهیدبوون و برینداربوونی سەدان هاووڵاتی و ئاسایشی ناوخۆی حەلەب، هەروەها نەخۆشخانەکانی ئەو دوو گەڕەکە بۆردومان کران، ئەمەش پێشێلکارییەکی روونە بۆ یاسا نێودەوڵەتییە مرۆییەکان کە قەدەغەی کردووە دامەزراوە گرنگەکان بکرێنە ئامانج.

7 کانوونی دووەم؛ راگەیەنراوێکی رەسمی و هۆشداری لە تەقینەوەیەکی گشتگیر

لە 7ـی کانوونی دووەم، فەرماندەیی گشتی هێزەکانی سوریای دیموکرات راگەیەندراوێکی بڵاوکردەوە و تیایدا جەختیکردەوە کە شێخ مەقسود و ئەشرەفییە زیاتر لە 6 مانگە گەمارۆدراون، راشیگەیاند، هەسەدە لە حەلەب نییە، هەروەها جەختیکردەوە کە بانگەشەکانی حکومەتی کاتی دەربارەی "هەڕەشەی ئەمنی" بیانووە بۆ پاساودانەوە بۆ کۆمەڵکوژییەکان.

9 کانوونی دووەم؛ بەردەوامی هێرشەکان بۆ سەر گەڕەکەکانی حەلەب

لە 9ـی کانوونی دووەم، چەکدارانی حکومەتی کاتی بەردەوام بوون لە هێرشە دڕندەکانیان بۆ سەر گەڕەکەکانی شێخ مەقسود و ئەشرەفییە و بەنی زەید، بە بەکارهێنانی تانک و تۆپخانە و فڕۆکەی بێفڕۆکەوان، و کۆمەڵکوژییان لەو گەڕەکانەدا ئەنجامدا.

10 کانوونی دووەم؛ هاتنە ناوەوەی فڕۆکەی تورکی بۆ هێرشکردنە سەر ناوچەکانی ژێر دەسەڵاتی کورد.

لە 10 کانوونی دووەم، فڕۆکەیەکی بێفڕۆکەوانی تورکی لە جۆری ئاکنجی، خاڵێکی سەربازی لە کێڵگەی سەورە لە باشووری تەبقە کردە ئامانج. هاوکات، ڕفاندنی دەیان هاوڵاتی مەدەنی لە شێخ مەقسود و ئەشڕەفیە و دەستپێکردنی هەڵمەتێکی تۆمەتی درۆ دەربارەی بڕینی ئاو لە وێستگەی بابیری لە ڕۆژهەڵاتی حەلەب تۆمارکرا.

11-12 کانوونی دووەم: فراوانکردنی بازنەی هێرشەکان بەرەو دێر حافر و مەسکەنە

لە 11 و 12ـی کانوونی دووەم، چەکدارانی حکومەتی سوریا هێرشی چڕیان بۆ سەر دێر حافر، و مەسکەنە، و بەنداوی تشرین دەستپێکرد، کە تێیدا تۆپخانە، و فڕۆکەی خۆکوژی و فڕۆکەی بێفڕۆکەوانی تورکی لە جۆری بەیرەکدار و ئاکنجیان بەکارهێنا، هاوکات ناوچەکانی هاووڵاتیان و دامەزراوە مەدەنییەکان و باڵەخانەی پۆستەی دێر حافر، و گوندەکانی: قشڵە، و شێخ حەسەن، و مەحشیە بۆردومان کران، هێرشەکان بە چەکی قورس بۆ سەر ئەو ناوچەیە بە درێژایی رۆژی 13ـی کانوونی دووەم بەردەوام بوو.

14 کانوونی دووەم؛ بە ئامانجکردنی ژێرخانی ئابووری بە شێوەیەکی پیلان بۆ داڕێژراو

لە 14ـی کانوونی دووەم، چەکدارانی دیمەشق کارگەی شەکر لە دێر حافریان بۆردومان کرد، بە شێوەیەکی بەردەوام بەنداوی تشرین و هەروەها شاری مەسکەنەیان چوار جار بە فڕۆکەی بێفڕۆکەوان کردە ئامانج،هەروەها پەلامار و هێرشەکانیان بۆ گوندی بوعاسی لە باشووری تەبقە چڕکردەوە.

15-16 کانوونی دووەم؛ بۆردومانی هەڕەمەکی و راگواستنی زۆرەملێ

لە 15 و 16ـی کانوونی دووەم، هێرشەکان بۆ سەر شاری دێر حافر بەردەوام بوون، و بە فڕۆکەیەکی بێفڕۆکەوانی بۆمبڕێژکراو گەڕەکە نیشتەجێبووەکان کرانە ئامانج، بە مەبەستی راگواستنی دانیشتووانەکەی.

17 کانوونی دووەم؛ پێشێلکردنی رێککەوتنی کشانەوە و دەستپێکردنی پێکدادانی فراوان

سەرەڕای رێککەوتنێک بە سەرپەرشتی نێودەوڵەتی هەسەدە  بڕیاریدا لە دێر حافر و مەسکەنە بکشێتەوە، چەکدارانی سوریا پێش تەواوبوونی کشانەوە چوونە ناو شارەکان، و هێرشیان کردە هێزەکانی سوریای دیموکرات، ئەمەش بووە هۆی سەرهەڵدانی پێکدادان لە مەسکەنە و دبسی عەفنان و کێڵگەی سەورە و دەوروبەری رەسافە، لەگەڵ فراوانکردنی هێرشەکان بۆ سەر تەبقە.

18 کانوونی دووەم؛ فراوانکردنی هێرشەکان بۆ دێرەزور

لە 18ـی کانوونی دووەم، چەکدارانی سوریا هێرشیان کردە سەر غەرانیج، و ئەبو حەمام، و کشکیە، و زەیبان، و تەیانە لە گوندەکانی رۆژهەڵاتی دێرەزور، لەگەڵ بەردەوامیدان بە هێرشەکان لە شاری رەققە و گوندەکانی و کۆبانێ.

19 کانوونی دووەم؛ راگەیاندنی ئاگربەست لەسەر کاغەز و بەردەوامیدان بە هێرشەکان لەسەر زەوی

سەرەڕای راگەیاندنی راگرتنی ئاگربەست لەلایەن ئەحمەد شەرع سەرۆکی سوریاوە لە 19 کانوونی دووەم، چەکدارەکانی سوریا هێرشی توندیان کردە سەر عەین عیسا، و شەدادی، رەققە بەتایبەتی لە دەوروبەری هەردوو زیندانی ئەلقەتان و شەدادی، کە هەزاران چەکداری دەستگیرکراوی داعشی تیادا بوو.

هەروەها چیای کازوان لە باشوری حەسەکە لەلایەن فڕۆکە بێفڕۆکەوانەکانی تورکیاوە بۆردومان کرا، هەروەها هێرشکرایە سەر دەوروبەری تەل تەمر و زەرگان لە گوندەکانی حەسەکە و هێرشەکان بۆ سەر شاری کۆبانێ بەردەوام بوون.

20 کانوونی دووەم؛ ئاگربەستی سەعات 8ـی ئێوارە و پێشێلکارییەکان بەردەوامن

لە 20 کانوونی دووەم، شەرع ئاگربەستێکی نوێی راگەیاند کە بۆ ماوەی 4 ڕۆژ بەردەوام دەبێت بۆ جێبەجێکردنی رێککەوتنی تێکەڵکردنی هەسەدە لەنێو سوپای سوریا، بەڵام بۆردومانەکان بۆ سەر شارۆچکەی زەرگان و تەل تەمر لە گوندەکانی حەسەکە بەردەوام بوو، هەروەها هێرشەکان بۆ سەر شاری کۆبانێ بەردەوام بوون و تا ئێستاش گەمارۆکان بەردەوامن بۆ سەر ئەو شارە.

ئاگربەست وەک رووپۆشێک بۆ هێرشکردنەسەر کورد و هەسەدە

 ئەمڕۆ ئیدارەی خۆسەر راگەیەنراوێكی لەبارەی رەوشی رۆژئاوای كوردستان بڵاوكردەوە و دەڵێت: پابەندین بەو ئاگربەستەی كە راگەیەنراوە بەڵام چەکدارانی سوریا رێککەوتن پێشێل دەکەن.

ئاماژەی بەوەشکرد، کۆبانێ ئەو شارەی شەڕی جیهانی کرد، لە ئێستادا لەلایەن چەکدارانی سوریاوە گەمارۆ دراوە و ئاو و كارەبا و خزمەتگوزاری لێبڕدراوە.

هاوکات، هەسەدە راگەیەنراوێکی بڵاوکردەوە و رایگەیاند، لە ئێستادا گروپە چەکدارەکانی سەر بە حکومەتی دیمەشق بە چەکی قورس زیندانی ئەقتان لە باکوری رەققە بۆردومان دەکەن و بە تانک گەمارۆیان داوە.

زیندانی ئەقتان ژمارەیەک لە زیندانیکراوی داعشی تێدایە و لەلایەن هەسەدەوە و یەپەژەوە پارێزگاری لێدەکرێت، لە ئێستادا بەهۆی هێرشەکانی سوریاوە مەترسی لەسەر هەڵاتنی داعشەکان دروستکردووە.

لە حەلەبەوە بۆ دێرەزور، و لە رەققەوە بۆ حەسەکە و کۆبانێ و تەبقە، ئەو هێرشانەی چەکدارانی سوریا لەکاتی ئاگربەستدا، پیشانی جیهانی دەدات، تەنها بۆ هێرشکردنە سەر گەلی کوردە و هیچ ئاشتی و رێککەوتنێکی ئاگربەستی بە دواوە نییە، ئەمەش لە کاتێکدایە کۆمەڵگەی نێودەوڵەتی بێدەنگن لەو زوڵمە گەورەیەی لە رۆژئاوای کوردستان بەرانبەر بە کورد دەکرێت.

ئیدارەی خۆسەر راگەیەنراوێكی لەبارەی رەوشی رۆژئاوای كوردستان بڵاوكردەوە و دەڵێت: پابەندین بەو ئاگربەستەی كە راگەیەنراوە بەڵام چەکدارانی سوریا رێککەوتن پێشێل دەکەن.

ئیدارەی خۆبەڕێوەبەری باکور و رۆژهەڵاتی سوریا رایگەیاند، كۆبانێ كە بەرگری لە هەموو جیهان كرد ئێستا ئاو و كارەبا و خزمەتگوزاری لێبڕدراوە.

ئاماژەی بەوەشکرد، هێرشی چەكدارانی سوریا و گەمارۆدانی بۆ شكاندنی ئیرادەی خەڵكی كۆبانێیە .

ئیدارەی خۆسەر ئەوەشی خستەڕوو، داوای پشتیوانیی لە كوردانی هەر چوار پارچەی كوردستان و جیهان دەكەین بەردەوام بن لە پشتیوانیكردنمان.

سوپای ئیسرائیل بە ئامانجگرتنی 4 دەروازەی سنوری لە نێوان سوریا و لوبنان راگەیاند كە لەلایەن حزبوڵاوە بۆ گواستنەوەی چەك بەكاردەهێنرێت .

سوپای ئیسرائیل رایگەیاندووە ، لە ناوچەی هەرمل بۆردومانی 4 دەروازەی سنوریی نێوان سوریا و لوبنانیان كردوە كە حزبوڵا بەكاریهێناون بۆ گواستنەوەی چەك و كەرەستەی جەنگیی، هاوكات لە بۆردومانێكیشدا لە ناوچەی سەیدا لە باشوری لوبنان گەورە بازرگانێكی چەك كوژراوە كە چەكی بۆ حزبوڵا دابینكردووە .

سەرباری راگەیاندنی ئاگربەست لە لوبنان كە لە مانگی 11 ی ساڵی 2024 ەوە راگەیەندراوە ، بەڵام بۆردومانەكانی ئیسرائیل بۆ سەر پێگەكانی حزبوڵا لە لوبنان بەردەوامە ، تا ئێستاش هێزەكانی ئیسرائیل لە 5 ناوچەی لوبنان نەكشاونەتەوە كە تەلئەبیب بە ناوچەی ستراتیژیی ناویان دەبات .

پزیشكانی بێ سنور هۆشداری دەدان لە بەردەوامی هێرشەكانی گروپە چەكدارەكانی نزیك لە حكومەتی سوریا بۆ باكور و رۆژهەڵاتی ئەو وڵاتە.

رێكخراوی پزیشكانی بێسنور لە راگەیەنراوێكدا هۆشداریدا لە دەرئەنجامەكانی هێرشەكانی گروپە چەكدارەكانی نزیك لە حكومەتی سوریا بۆ سەر باكوری رۆژهەڵاتی ئەو وڵاتە و دووپاتی كردەوە كە هەزاران هاووڵاتی مەدەنی ناچاربوون لە وەرزی زستاندا هەڵبێن و ئاوارە ببین و رووبەڕووی كەمیی شوێنی مانەوە و گەرماو و خزمەتگوزارییە سەرەتاییەكان بوونەتەوە.

رێكخراوەكە ئاماژەی بەوەشكردووە، پەناگە كاتییەكانی قامیشلۆ و دێریك كە زۆرجار لە قوتابخانە و مزگەوتەكانن، خۆیان بەدەست ژێرخانی ناتەواوەوە دەناڵێنن و پێداویستی پێویستیان نییە بۆ جێگیركردنی ژمارەیەكی زیاتری ئاوارە، ئەمەش قەیرانە مرۆییەكانیان گەورەتر دەكات.

پزیشكی بێ سنور دووپاتی كردەوە، كە بەپەلە هاوكاریە مرۆییەكانیان گەیاندوەتەوە ئەو ناوچانە، هەروەها كلینیكێكی پزیشكی گەڕۆكیشیان لە شاری دێریك دامەزراندووە بۆ دابینكردنی چاودێری تەندروستی پێویست بۆ ئاوارەكان.

فەرماندەی ناوەندیی سوپای ئەمریکا (سێنتکۆم) لە پەیوەندییەکی تەلەفۆنیدا لەگەڵ سەرۆکی سوریا، داوایکرد هێزەکانی حکومەت پابەندی ئاگربەست بن لەگەڵ هێزەکانی سوریای دیموکرات (هەسەدە) و رێگری لە گواستنەوەی زیندانییانی داعش نەکەن.

تیم هۆکینز، وتەبێژی سێنتکۆم رایگەیاند، ئەدمیراڵ براد کوپەر، فەرماندەی سێنتکۆم ئەمڕۆ 21ـی کانونی دووەم پەیوەندی بە ئەحمەد شەرع، سەرۆکی سوریاوە کردووە.

بەپێی راگەیەندراوەکە، کوپەر داوای لە شەرع کردووە پابەندبن بە ئاگربەست لەگەڵ هەسەدە و پشتیوانی لە گواستنەوەی زیندانییانی داعش بکەن لە سوریاوە بۆ عیراق.

فەرماندەکەی ئەمریکا پلانی سێنتکۆمی بۆ سەرۆکی سوریا روونکردووەتەوە سەبارەت بە گواستنەوەی نزیکەی 7000 زیندانیی داعش بە شێوەیەکی رێکخراو و پارێزراو، داواشی کردووە هێزەکانی سوریا و هێزەکانی دیکە خۆیان لە هەر کارێک بەدوور بگرن کە ببێتە هۆی تێکدانی ئەو پرۆسەیە.

 

وەزارەتی گەنجینەی ئەمریکا سزای بەسەر شەش رێکخراوی ناو غەززەدا سەپاند و تۆمەتباری کردن بەوەی لەژێر پەردەی کاری خێرخوازی و تەندروستیدا، پارە بۆ باڵی سەربازیی حەماس کۆدەکەنەوە.

لە راگەیەندراوێکدا وەزارەتەکە ئاشکرای کردووە، بزوتنەوەی حەماس نهێنیی کاری ئەم رێکخراوانەی بەکارهێناوە بۆ کۆکردنەوەی هاوکاری لە بەخشەرانی نێودەوڵەتی، بەڵام پارەکە بۆ "چالاکییە تیرۆریستییەکان" بەکارهاتووە نەک بۆ هاووڵاتیانی مەدەنی.

جۆن کەی هێرلی، بریکاری وەزارەتی گەنجینەی ئەمریکا رایگەیاند: "حەماس ژیانی گەلی فەلەستینی پشتگوێ خستووە، ئیدارەی ترەمپ رێگە نادات سیستمە داراییەکان بۆ پارەدارکردنی تیرۆر بەکاربهێنرێن".

بەپێی راگەیەندراوەکە، ئەو شەش رێکخراوە بانگەشەی پێشکەشکردنی خزمەتگوزاریی پزیشکییان کردووە، بەڵام لە واقیعدا سەر بە کەتیبەکانی عیزەدین قەسام بوون و بەڵگەنامەکانی دوای 7ـی ئۆکتۆبەری 2023 ئەوەیان سەلماندووە.

ئەمریکا جەختیکردووەتەوە، ئەم سزایانە رێگر نابن لە گەیشتنی هاوکاریی مرۆیی بۆ هاووڵاتیانی غەززە بەپێی مۆڵەتە رەسمییەکان.

تونجەر باکرهان، هاوسەرۆکی دەم پارتی رایدەگەیەنێت، بێدەنگی بەرانبەر ئەو هێرشانەی دەکرێنە سەر گەلان و باوەڕەکان لە سوریا مەحاڵە و دەبێت هەمووان پێکەوە دەنگ بەرز بکەنەوە.

لە پەیامێکدا باکرهان نووسیویەتی: "ئەرکێکی مێژووییە کە هەموو ئەوانەی باوەڕیان بە پێکەوەژیان هەیە، لە عەلەوی و کوردەوە تا مەسیحی و دروزەکان، شانبەشانی یەکتر بوەستن".

هاوکات کۆمەڵێک رێکخراوی عەلەوی لە راگەیەندراوێکی هاوبەشدا ئیدانەی توندی هێرشەکانیان بۆ سەر باکوری سوریا کرد و رایانگەیاند: "ئەوەی لە سوریا دەگوزەرێت سیاسەتێکی سیستماتیکی پاکتاوکردنە دژی کورد، عەلەوی، مەسیحی و هێزە دیموکراتەکان".

لە راگەیەندراوەکەدا هاتووە: "تورکیا ساڵانێکە پشتیوانیی گروپە جیهادییەکان دەکات و رێگەی بۆ خۆشکردوون. ئەمڕۆش بەهێزبوونی بەرەی نوسرە و پاشماوەکانی داعش ئەنجامی ئەو سیاسەتەیە".

رێکخراوەکان جەختیان کردووەتەوە کە "بێدەنگی بەرامبەر ئەم تاوانانە تەنیا بوون بە شەیتانی لاڵ نییە، بەڵکو بەشداریکردنە لە تاوانەکەدا"، بۆیە داوا لە کۆمەڵگەی نێودەوڵەتی دەکەن ئەو گروپانە وەک تاوانکاری جەنگ بناسێنن.

فەرماندەیی ناوەندیی سوپای ئەمریکا (سێنتکۆم) رایدەگەیەنێت، دەستیان بە ئۆپەراسیۆنێکی نوێ کردووە بۆ گواستنەوەی زیندانییانی داعش لە باکوری رۆژهەڵاتی سوریاوە بۆ عیراق، بۆ ئەوەی دڵنیابن لەوەی تیرۆریستان لە شوێنی پارێزراودا دەمێننەوە.

سێنتکۆم لە راگەیەندراوێکدا ئاشکرای کردووە، ئەمڕۆ 21ی کانونی دووەم، پرۆسەکە دەستیپێکردووە و هێزەکانیان بە سەرکەوتوویی 150 چەکداری داعشیان لە زیندانێکی حەسەکە گواستووەتەوە بۆ شوێنێکی پارێزراو لە عیراق.

بەپێی راگەیەندراوەکە، پلانیان هەیە نزیکەی 7000 زیندانیی داعش لە سوریاوە بگوازنەوە بۆ زیندانەکانی ژێر کۆنترۆڵی عیراق.

ئەدمیراڵ براد کوپەر، فەرماندەی سێنتکۆم دەڵێت: "هەماهەنگیی نزیکمان لەگەڵ حکومەتی عیراق هەیە و رۆڵیان بەرز دەنرخێنین. گواستنەوەی رێکخراو و پارێزراوی زیندانییانی داعش گرنگە بۆ رێگریکردن لە شکاندنی زیندانەکان و هەڵاتنیان، کە هەڕەشەی راستەوخۆ دەبێت بۆ سەر ئاسایشی ئەمریکا و ناوچەکە".

ناوەندی راگەیاندنی هێزەکانی سوریای دیموکرات (هەسەدە) رایدەگەیەنێت، سەرەڕای راگەیاندنی ئاگربەست، گروپە چەکدارەکانی سەر بە حکومەتی دیمەشق هێرشەکانیان بۆ سەر ناوچەکانی جەزیرە و کۆبانێ نەوەستاندووە و بەهۆیەوە ژنێک شەهید بووە.

هەسەدە لە راگەیەندراوێکدا ئاماژەی بەوەکردووە، ئاگربەست لە سەعات 8:00ـی شەوی رابردووەوە چووەتە بواری جێبەجێکردنەوە، بەڵام چەکدارەکان چەندین جار پێشێلکارییان کردووە و بە چەکی قورس شارۆچکەی "زرگان" و گوندی "تەل بارود"یان لە باشوری حەسەکە بۆردومان کردووە.

بەپێی راگەیەندراوەکە، پێشنیوەڕۆ و پاشنیوەڕۆی ئەمڕۆش چەکدارانی دیمەشق لە دەوروبەری شارۆچکەی "سەرین" و گوندی "باسل" هێرشیان کردووەتە سەر هێزەکانی هەسەدە و بەرپەرچ دراونەتەوە.

هەسەدە ئاشکرای کردووە، سەعات 2:45ـی پاشنیوەڕۆی ئەمڕۆ، چەکدارەکان بە چەکی قورس گوندی "حەمدون"یان لە باشوری کۆبانێ بۆردومان کردووە و بەهۆیەوە ژنێک شەهید بووە.

لە کۆتاییدا هەسەدە پابەندبوونی خۆی بە ئاگربەست دووپات کردووەتەوە و داوا لە لایەنە گەرەنتیکارەکان دەکات بەرپرسیارێتیی خۆیان جێبەجێ بکەن و سنورێک بۆ ئەو پێشێلکارییانە دابنێن.

شێخێكی درووزەكان داوای پشتیوانیكردن لە بەرگریی كورد دەكات لە رۆژئاوای كوردستان.

شێخ مەروان كەیوان، یەكێك لە پیاوە ئایینییە دیارەكانی تائیفەی درووز لە سوەیدا، هاوسۆزیی قووڵی خۆی بۆ كوردانی رۆژئاوای كوردستان دەربڕی.

شێخ مەروان لە پەیامێكدا روو لە ئازادیخوازانی جیهان دەكات و دەڵێت، گەلی كورد لە باكوور و رۆژهەڵاتی سووریا رووبەڕووی جینۆساید و قڕكردن دەبنەوە.

ئەم كەسایەتییە درووزە داوای لە هەمووان كرد بچنە ناو ریزەكانی بەرگریی كوردەوە بۆ پاراستنی ئەو گەلە لەو هێرشانەی دەكرێنە سەریان.

ئەم هەڵوێستەی شێخ مەروان لەكاتێكدایە كە ئیدارەی خۆسەر لەكاتی هێرش و رووداوەكانی سوەیدا پاڵپشتی خۆی بۆ دروزەكان و نیشاندا.

 

تۆم باراك، نێردەی تایبەتی ئەمریكا لە سوریا رایگەیاند، رەوشی سوریا گۆڕانکارییەکی گەورەی بەسەردا هاتووە و هێزەکانی سوریای دیموکرات بە سەرۆکایەتی کورد، کاریگەرترین هاوبەشی زەمینییان سەلماند لە شکستپێهێنانی خەلافەتی خاکی داعش تا ساڵی 2019 و لە ئێستادا هیچ پاساوێك نەماوە بۆ هاوبەشی ئەمریكا لەگەڵ هەسەدە.

تۆم باراك، نێردەی تایبەتی ئەمریكا لە سوریا پەیامێکی لە ئێکس بڵاوکردوەتەوە  و تێیدا هاتووە؛ لە ئێستادا گەورەترین دەرفەت بۆ کورد لە ئارادایە  لە ژێر دەسەڵاتی حکومەتی نوێ سوریا بە سەرۆکایەتی ئەحمەد شەرع، ئەم ساتەوەختە رێگایەکە بۆ یەکگرتنی تەواوەتی  هەسەدە لەگەڵ دەوڵەتی سوریا، کە مافی هاووڵاتیبوون و پاراستنی کولتووری و بەشداری سیاسیان  هەیە.

نێردەی ترەمپ دەشڵێت؛ لە  ئێستادا سوریا حکومەتێکی ناوەندی دانپێدانراوی هەیە، کە پەیوەندی بە هاوپەیمانی نێودەوڵەتییەوە کردووە بۆ شکستپێهێنانی داعش و تۆم باراک راشیگەیاندوە، ئامانجی بنەڕەتی لە دروستکردنی هێزەكانی سوریای دیموكرات وەک هێزی سەرەکی شەڕی داعش لەسەر زەوی کۆتایی هاتووە، چونکە ئێستا دیمەشق ئامادەیە و توانای ئەوەی هەیە بەرپرسیارێتییە ئەمنییەکان لە ئەستۆ بگرێت.

تۆم باراک دەڵێت؛ ئەمریکا هیچ بەرژەوەندییەکی لە ئامادەبوونی سەربازی درێژخایەندا نییە؛ شکستپێهێنانی پاشماوەکانی داعش و پشتگیریکردن لە ئاشتەوایی و پێشخستنی یەکێتی نیشتمانی بەبێ پشتگیریکردن لە جیابوونەوە یان فیدراڵیزم لە پێشینەی کارەکانیدایە.

لە راگەیەندراوێکدا، هەسەدە رایگەیاند،  بەهۆی بێباکی کۆمەڵگەی نێودەوڵەتی بەرانبەر بە پرسی داعـ.ـ،ـ،ش و هەڵنەگرتنی بەرپرسیارێتیان  لە چارەسەرکردنی ئەو پرسە هێزەکانیان ناچاربوون لە کەمپەکە بکشێنەوە.

لە راگەیەندراوەکەدا ئاماژەیان بەوەشکردوە، هێزەکانیان دووبارە بۆ ناوچەکانی دەوروبەری شارەکانی باکوری سوریا کە، لە ئێستادا رووبەڕوی مەترسی و هەڕەشەی زیاتر بوونەتەوە گواستراونەتەوە.

ئەمە لە کاتێکدایە هێزەکانی سوریای دیموکرات چەند جاریک رایانگەیاند شەڕێکی سەخت لەنێوان هێزەکانیان و چەکدارانی دیمەشق لە دەوروبەری کەمپی هۆل هەیە، کە ھەزاران خێزانی رێکخراوی تیرۆریستی داعـ.ـشـ.ـی تێدایە و هیج هێزیکی نێودەوڵەتی نەچون بە هانایانەوە.

لای خۆشیەوە ئاژانسی هەواڵی سانا لە زاری دەستەی ئۆپراسیۆنەكانی سوریاوە بڵاویكردووەتەوە، ئەو هێزەی سوریای دیموكراتو کە ئەرکی پاسەوانیکردنی کەمپی ئەلهۆڵیان لە رۆژهەڵاتی حەسەکە پێسپێردراوە، لە کەمپەکە دەکشێنەوەو سوپا بە هاوکاری هێزەکانی ئاسایشی ناوخۆ دەچێتە ناو ناوچەکە و ئەمنیەتی دەپارێزێت.

پێشتر سەرچاوە ئاگادارەكان بڵاویانكردەوە، ئەمریكا لە گفتوگۆدایە لە هێزەكانی سوریای دیموكرات بۆ رادەستكردنی كەمپەكە بە گروپە چەكدارەكانی دیمەشق.