رۆژهەڵاتی ناوەڕاست
سەرۆک وەزیرانی ئیسرائیل رایدەگەیەنێت؛ لە هێرشەکانیان بۆسەر ئێران بەردەوام دەبن تا هەموو ئامانجەکانیان بەدەستدەهێنن.
بنیامین ناتانیاهۆ، سەرۆک وەزیرانی ئیسرائیل، رایگەیاند، وڵاتەکەی شەو و رۆژ خەریکی کارکردنە لە دژی ئێران و جەختی کردەوە کە ئەم شەڕەی ئێستا زۆر لەوە گەورەترە کە بیری لێ دەکرێتەوە.
وتیشی، "ئێمە خەریکی گۆڕینی نەخشەی رۆژهەڵاتی ناوەڕاستین" و ئەم ئۆپەراسیۆنە سەربازییانە بە خاڵی وەرچەرخان لە مێژووی ناوچەکەدا دەبینێت.
سەرۆک وەزیرانی ئیسرائیل ئاشکرایکرد، لە هێرشەکانیاندا توانیویانە دەیان سەرکردەی باڵای سوپای پاسداران بکوژن و گورزی کوشندە لە فەرماندەیی ئەو هێزە بوەشێنن.
ناتانیاهۆ هۆشداری دا کە پلانێکی رێکخراو و تۆکمەیان بۆ رووبەڕووبوونەوەی ئێران هەیە و چەندین "سوپڕایز"ی گەورەیان بۆ تاران ئامادە کردووە کە لە کاتی خۆیدا دەردەکەون.
ئەوەشی خستەڕوو، ئەم ئۆپەراسیۆنە دەبێتە دەرفەتێک بۆ گەلی ئێران تاوە بتوانن چارەنووسی خۆیان بەدەستەوە بگرن و لە ژێر دەستی دەسەڵاتی ئێستا رزگاریان بێت.
ناتانیاهۆ جەنگی ئێستای بە "جەنگێکی مێژوویی" وەسف کرد و وتی: "قەبارەی ئەم شەڕە دوو هێندەی جەنگی 12 رۆژەیە و تا بەدەستهێنانی ئامانجەکانمان بەردەوام دەبن."
وەزیری دەرەوەی ئێران دەڵێت، دەستپێشخەرییەكەی پزیشكیان بۆ كەمكردنەوەی گرژییەكانی نێوان ئێران و وڵاتانی دراوسێی، لەلایەن ترەمپەوە رەتكراوەتەوە.
عەباس عراقچی، وەزیری دەرەوەی ئێران لە تۆڕی كۆمەڵایەتی ئێكس بڵاویكردەوە، دەستپێشخەرییەكەی مەسعود پزیشكیان سەرۆك كۆماری ئێران بۆ كەمكردنەوەی گرژییەكانی نێوان ئێران و وڵاتانی دراوسێی، دەستبەجێ لەلایەن دۆناڵد ترەمپ سەرۆكی ئەمریكاوە رەتكرایەوە.
ئەوەشی خستووەتەڕوو، ئەگەر ترەمپ بەدوای گرژییەوە ئەوە هێزە چەكدارەكانی ئێران زۆر لەمێژە ئامادەن، بەرپرسیارێتی توندبوونەوەی رێككارە خۆپارێزییەكانی ئێرانیش لە ئەستۆی ئەمریكایە.
وەزیری دەرەوەی ئێران ئاماژەی بەوەشداوە، تێچووی هەفتەی سەرەتای شەڕی دژی ئێران لەسەر ئەمریكا 100 ملیار دۆلار و گیانی چەند سەربازی گەنجی ئەمریكی بووە، دەشڵێت، ئەنجومەنی نەتەوەیی هەواڵگری ئەمریكا بۆ ترەمپیان روونكردووەتەوە لە شەڕی دژی ئێران، ئەمریكا شكست دەهێنێت.
ئەوەش لەدوای ئەوەدێت، مەسعود پزیشكیان سەرۆك كۆماری ئێران دەستپێشخەرییەكی كرد بۆ راگرتنی هێرشی سەر وڵاتانی دراوسێی ئێران، بەومەرجەی لە خاكی ئەو وڵاتانەوە هێرش نەكرێتەسەر ئێران.
مەسعود پزیشکیان، سەرۆک کۆماری ئێران، لە پەیامێکی ڤیدیۆییدا جەختی لەسەر گۆڕینی ستراتیژی وڵاتەکەی بەرامبەر وڵاتانی دراوسێ کردەوە و رایگەیاند کە پێویستە لەگەڵ وڵاتانی ناوچەکەدا کار بۆ چەسپاندنی ئاشتی و ئارامی بکرێت.
پزیشکیان رایگەیاند، ئەوان سوپاسگوزاری گەلەکەیانن و پێویستە ناکۆکیەکانیان وەلانێین و بە توندی بەرگری لە وڵاتەکەیان بکەن.
سەرۆک کۆماری ئێران جەختیشیکردەوە، دوژمن دەبێ بزانێ کە خەونەکانی بۆ تەسلیم بوونی ئێمە نایەتە دی.
ناوبارو ئاماژەی بەوەکرد، کە دوابەدوای کۆبوونەوەی "ئەنجومەنی کاتیی رێبەری"، بڕیارێکی نوێ دراوە و بە هێزە چەکدارەکانی ئێران راگەیەندراوە، کە لەمەودوا نابێت هیچ هێرشێک یان موشەکبارانێک دژی وڵاتانی دراوسێ ئەنجام بدەن، مەگەر لە حاڵەتی بەرگری لە خود و لە کاتی هێرشکردنە سەر ئێراندا بێت.
سەرۆک کۆماری ئێران دووپاتی کردەوە، کە ئارەزوو دەکەن کێشەکان لە ڕرێگەی دیپلۆماسییەوە چارەسەر بکەن و کۆتایی بە گرژی و ململانێکان لەگەڵ وڵاتانی دەوروبەریان بهێنن.
سوپای ئیسرائیل لەبارەی هێرشەکانی ئەمڕۆی بۆسەر ئێران راگەیەنراوێکی بڵاوکردەوە و تێیدا ئاماژە بە ژمارەی هێرشەکان و کۆتاییهێنان بە شەڕەکە دەکات.
سوپای ئیسرائیل لە راگەیەنراوەکەدا ئاماژەی بەوەدا، تەنها ئەمڕۆ 400 هێرشی ئاسمانییان بۆسەر ناوچە جیاجیاکانی ئێران ئەنجامداوە و کۆمەڵێک پێگە و سەکۆی موشەکییان بە ئامانج گرتووە.
لە راگەیەنراوەکەدا ئەوەش هاتووە، وادەی کۆتاییهێنان بە شەڕەکەیان لەگەڵ ئێراندا، نە ساڵانێکی زۆر دەخایەنێت و نە لە هەفتەیەکیشدا کۆتایی پێدەهێنرێت، بەڵکو پلانێکی چەند هەفتەییان بۆ کۆتایی هێنان بە شەڕەکە داناوە.
ئەوەش لە کاتێکدایە، حەوت رۆژ بەسەر شەڕ و ململانێکانی ئەمریکا و ئیسرائیل لەگەڵ ئێراندا تێدەپەڕێت و عەلی خامنەیی رابەری باڵای ئێران بەهۆی هێرشێکی ئاسمانیی بۆسەر ئۆفیس و ماڵەکەی، گیانی لەدەستدا. هاوکات، دۆناڵد ترەمپ سەرۆکی ئەمریکاش لەبارەی کۆتاییهێنان بە شەڕەکەوە رایگەیاند، تەنها کاتێک کۆتایی بە شەڕەکە دەهێنن ئەگەر ئێران بەبێ مەرج خۆی رادەست بکات.
بەهۆی زیادبوونی هێرشە درۆنییەکان بۆ سەر ناوچە مەدەنییەکانی بەحرەین، رەوشی ناوچەکە رووبەڕووی مەترسییەکی گەورە بووەتەوە و سێنتکۆمیش هۆشداری دەدات.
سێنتکۆم رایدەگەیەنێت: ئێران 12 وڵاتی جیاوازی بۆردومان کردووە و بەردەوامیشە لە بە ئامانجگرتنی هاووڵاتیانی مەدەنی لە رۆژهەڵاتی ناوەڕاست.
فەرماندەیی ناوەندیی ئەمریکا 'سێنتکۆم' رایگەیاند، شەوی رابردوو هێزەکانی ئێران بە حەوت درۆن ناوچە مەدەنییەکانی بەحرەینیان بە ئامانج گرتووە.
ئاماژەی بەوەشکرد، ئەم هێرشانەی ئێران قبوڵکراو نییە و بەبێ وەڵام نامێننەوە و لەگەڵ هاوپەیمانەکانمان لە ناوچەکەدا لە کارکردنی بەردەوامداین بۆ نەهێشتنی ئەم مەترسییە لەسەر هاووڵاتیانی مەدەنی تەواوی ناوچەکە.
لەگەڵ دەسپێکردنی هەوڵە نێودەوڵەتییەکان بۆ هێورکردنەوەی رەوشەکە، ئێران جەخت لە پاراستنی سەروەریی خاکەکەی و بەدیهێنانی ئاشتییەکی سەقامگیر لە ناوچەکەدا دەکاتەوە.
مەسعود پزیشكیان سەرۆک کۆماری ئێران لە تۆڕی کۆمەڵایەتی ئێکس نوسیویەتی، چەند وڵاتێك هەوڵەكانیان بۆ نێوەندگیری دەستپێپكردووە و پابەندین بە ئاشتییەكی بەردەوام لە ناوچەكەدا.
ئاماژەی بەوەشکرد، درێغی ناكەین لە بەرگریكردن لە كەرامەت و سەروەری ئێران.
ئەمەش لە کاتێکدایە، بەیانی ئەمڕۆ ئیسرائیل چەندین هێرشی ئاسمانی بۆسەر ئێران ئەنجامدا، لەبەرانبەریشدا سوپاسی پاسداران 21 و 22ـیەمین شەپۆلی موشەكی لە ئۆپراسیۆنی " وەعد سادق 4" بۆ سەر ئیسرائیل دەستیپێكرد، هەروەها موشەکەکانی خەیبەر و فەتاح و خوڕەمشەهر 4ـی ئاڕاستەی ئیسرائیل کرد.
لەیەکەم رۆژی جەنگی ئیسرائیل-ئەمریکا و ئێران تا ئێستا زیاتر لە هەزار هاووڵاتی مەدەنی لە ئێران کوژراون.
رێکخراوی مانگی سوری ئێرانی ئاشکرایکرد، لە سەرەتای دەستپێکردنی هێرشەکانی ئیسرائیل و ئەمریکاوە، هەزار و 332 هاووڵاتی مەدەنی لە ئێران گیانیان لەدەستداوە و زیانی زۆریش بە سێ هەزار و 643 شوێنی مەدەنی گەیشتووە.
ئاماژەی بەوەشکرد، زیانەکان سێ هەزار و 90 شوێنی نیشتەجێبوون و 528 سەنتەری بازرگانی و 14 بنکەی تەندروستی دەگرێتەوە، هەروەها تاران زۆرترین هێرشی کراوەتەسەر و نۆ بنکەی تری مانگی سووریش خاپوور بوون.
وتەبێژی سوپای ئێران رایدەگەیەنێت؛ گەرووی هورمز لەژێر هەڕەشەدایە و ئەمریکا بەرپرسیارە.
وتەبێژی سوپای ئێران رایگەیاند: "ئێمە گەرووی هورمزمان دانەخستووە، بەڵام بەهۆی هێرشەکانی ئەمریکاوە، ئەو گەرووە ئێستا بۆ هاتوچۆی کەشتیوانی ناجێگیر و مەترسیدارە." ئاماژەی بەوەش کرد کە تاران پەلکێشی جەنگێک کراوە کە ئارەزووی نەدەکرد، بەڵام ئامادەن بۆ وەڵامدانەوەی هەر هێرشێک.
هاوکات ئاسایشی نێودەوڵەتی دەڵێت؛ ئەم لێدوانە وەک گوشارێکی راستەوخۆ دەبینرێت بۆ سەر بازاڕی وزەی جیهانی، چونکە گەرووی هورمز رێڕەوی سەرەکیی گواستنەوەی نەوتی جیهانە.
ئەم لێدوانانەی سوپای ئێران، ئاماژەیە بۆ ئەوەی تاران دەیەوێت لە رێگەی کارتی "ئاسایشی وزە و گەرووی هورمز" گوشار بخاتە سەر کۆمەڵگەی نێودەوڵەتی بۆ راگرتنی هێرشەکانی ئیسرائیل، لە کاتێکدا جەنگەکە گەیشتووەتە ناو جەرگەی پایتەختی هەردوو وڵات.
سوپای ئیسرائیل دەستپێكردنی قۆناغی دووەمی هێرشەكانی بۆسەر ئێران راگەیاند و ئاماژەی بەوەكردووە، ژێرخانی رژێمی ئێرانیان كردووەتە ئامانج.
سوپای ئیسرائیل راگەیەنراوێكی لەبارەی هێرشەكانی ئەم بەیانییەی سەر تاران بڵاوكردەوە و ئاماژەی بەوەكردووە، چوونەتە قۆناغی دووەمی هێرشەكان بۆسەر ئێران.
لە راگەیەنراوەكەدا سوپای ئیسرائیل دەڵێت، لە هێرشەكانی بەیانی ئەمڕۆ هەینیدا بۆسەر تاران، ژێرخانی ئێرانمان كردووەتە ئامانج.
ئاماژەی بەوەشكردووە، شەپۆلی بەرفراوانی هێرشمان دەستپێكردووە و بەردەوام دەبین.
بەپێی ڕاپۆرتێکی رۆژنامەی نیویۆرک تایمز، هێرشەکەی 28ی شوبات بۆ سەر قوتابخانەیەکی سەرەتایی لە شارۆچکەی میناب لە باشووری ئێران، بە خوێناویترین رووداوی کوژرانی مەدەنییەکان دادەنرێت لە سەرەتای دەستپێکی شەڕەکەوە.
هەرچەندە تا ئێستا هیچ لایەنێک تا ئێستا بەرپرسیارێتی خۆی رانەگەیاندوە لە روداوەکە، کە بەهۆیەوە زیاتر لە 100 کچە خوێندکار گیانیان لەدەستدا، بەڵام رۆژنامەکە ئاماژەی بەوە کردووە، کە کۆمەڵێک بەڵگە، لەوانە وێنەی نوێی مانگە دەستکردەکان و ڤیدیۆ پشتڕاستکراوەکان دەریدەخەن، کە قوتابخانەکە بە هێرشێکی ورد پێکراوە.
رۆژنامەکە ئاماژەی بەوەکردوە، کردنە ئامانجی قوتابخانەکە لە کاتێكدا بووە، کە بنکەیەکی دەریایی سوپای پاسداران لە تەنیشت قوتابخانەکە لە هەمان کاتدا کراوەتە ئامانج.
رۆژنامەکە جەخت لەوە دەکاتەوە، کە لێدوانە رەسمیییەکانی ئەمریکا سەبارەت بە هێرشکردنە سەر ئامانجە دەریاییەکان لە نزیک تەنگەی هورمز (کە بنکەکەی سوپای پاسدارانی لێیە)، گومانەکان بەهێزتر دەکەن، کە هێزەکانی ئەمریکا ئەنجامدەری هێرشەکە بووبن.
لە بەرانبەردا، کۆشکی سپی ئاماژەی بە لێدوانەکانی کارۆلین لیڤیت، وتەبێژی رۆژنامەوانی کردووە، کە لە وەڵامی پرسیارێکدا سەبارەت بەو هێرشە رایگەیاندوە "ئاگاداری کارێکی وەها نین" و ئاماژەی بەوەش کردبوو، کە وەزارەتی جەنگ سەرقاڵی لێکۆڵینەوەیە لەو بابەتە.
محەمەد باقر قالیباف، سەرۆکی پەرلەمانی ئێران رایگەیاند، کە واشنتۆن بەهۆی کورتهێنان لە کۆگاکانی سیستەمی بەرگریدا، ناچار بووە لە ستراتیژیی بەرگری ناوچەکەدا گۆڕانکاری بکات و "بەرگری لە ئیسرائیل" بخاتە پێش هەموو کارە لە پێشینەکانی تری.
قالیباف لە هەژماری خۆی لە تۆڕی کۆمەڵایەتی "ئێکس" بڵاویکردوەتەوە، کە ئەمریکییەکان بەهۆی کەمیی یەدەگی بەرگرییەوە ئەم بڕیارەیان داوە و پێی وایە باجدەرانی ئەمریکی سەرسام دەبن کاتێک بزانن ستراتیژی "سەرەتا ئیسرائیل" لە ئەجێندای بەرگری وڵاتەکەدایە.
سەرۆکی پەرلەمانی ئێران، هۆشدارییەکی توندی داوەتە واشنتۆن و دەڵێت؛ بەجێهێشتنی بەرژەوەندییەکان و سەربازانی ئەمریکا بەبێ بەرگری لە ناوچەکە، دەرئەنجامی خراپی دەبێت.
ناوبراو ئاماژەی بەوەش کردوە، کە لێکەوتەکانی ئەم سیاسەتە تەنها لە رۆژهەڵاتی ناوەڕاستدا قەتیس نامێنن، بەڵکو کاریگەرییەکی فراوانتری هەرێمی و نێودەوڵەتییان دەبێت.
ئەمڕۆ پێنجشەممە، دوای فراوانبونی گرژییەکانی ناوچەکە، وەزارەتی دەرەوەی ئەمریکا رایگەیاند، لە کۆتایی مانگی شوباتەوە تاوەکو ئێستا زیاتر لە 20 هەزار هاووڵاتیی ئەمریکی لە رۆژهەڵاتی ناوەڕاستەوە گەڕاونەتەوە بۆ ئەمریکا
وەزارەتەکە ئاماژەی بەوە کردووە، کە ئەم ئامارە تەنها ئەو کەسانە دەگرێتەوە،کە گەیشتوونەتەوە ناوخۆی ئەمریکا و ئەو هاووڵاتییانە ناگرێتەوە کە چوونەتە وڵاتانی دیکە یان هێشتا لە رێگەی گەڕانەوەدان.
لە بەشێکی تری راگەیەندراوەکەدا هاتووە، کە لەسەر راسپاردەی مارکۆ ڕۆبیۆ، وەزیری دەرەوەی ئەمریکا، پڕۆسەی گواستنەوەکە لە رێگەی گەشتی ئاسمانی تایبەت و گواستنەوەی وشکانییەوە چڕتر کراوەتەوە.
وەزارەتی دەرەوەی ئەمریکا بۆ کارئاسانیکردن بۆ هاووڵاتییەکانی فۆرمێکی تایبەت بە رەوشی نائاسایی بۆ هاووڵاتییانی لە پێنج وڵاتی ناوچەکە (کوێت، بەحرەین، ئیمارات، قەتەر و عەرەبستانی )کارا کردووە، تاوەکو راستەوخۆ زانیارییان پێبگات سەبارەت بە گەشتەکان و رێکارە ئەمنییەکان.
لە کۆتاییدا وەزارەتەکە جەختی کردوەتەوە، کە تیمەکانیان بە شێوەی 24 سەعاتی کاردەکەن و تا ئێستا هاوکارییان پێشکەش بە زیاتر لە 10 هەزار ئەمریکی لە دەرەوەی وڵات کردووە، کە پێدانی ڕرێنمایی ئەمنی و ئاسانکاری سەفەر لەخۆ دەگرێت.
مەسعود پزیشکیان لە پەیامێکدا بۆ سەرکردەی وڵاتانی دراوسێ رایدەگەیەنێت کە تاران هەوڵی دیپلۆماسیی داوە بۆ رێگریکردن لە جەنگ، بەڵام هێرشەکانی ئەمریکا و ئیسرائیل ناچاریان دەکات بەرگری لە خۆیان بکەن.
لە بڵاوکراوەیەکدا لە پلاتفۆرمی ئێکس، مەسعود پزیشکیان، پەیامێکی ئاراستەی پاشا و سەرۆکی وڵاتانی دۆست و دراوسێی ئێران کردووە و رایگەیاندووە کە پێشتر لەگەڵ ئەواندا و لەرێگەی دیپلۆماسییەوە هەوڵی تەواویان داوە بۆ ئەوەی جەنگ هەڵنەگیرسێت. هەروەها ئاماژەی بەوە کردووە کە دەستدرێژییە سەربازییەکانی ئەمریکا و ئیسرائیل هیچ بژاردەیەکی دیکەی لەبەردەم وڵاتەکەیدا نەهێشتووەتەوە جگە لە بەرگریکردن لە خۆیان.
لە کۆتایی پەیامەکەیدا، سەرۆک کۆماری ئێران دڵنیایی دەداتە وڵاتانی ناوچەکە کە رێز لە سەروەرییان دەگرن، و جەختیش دەکاتەوە کە ئاسایش و سەقامگیریی ناوچەکە دەبێت بە هەوڵی هاوبەشی هەموو وڵاتەکان پێکەوە بەدی بێت. ئەم لێدوانە نەرمەی پزیشکیان وەک هەوڵێک دەبینرێت بۆ هێورکردنەوەی وڵاتانی کەنداو و ناوچەکە، تاوەکو دڵنیایان بکاتەوە کە ئێران نیازی هێرشکردنە سەریانی نییە و دەیەوێت بە هاوبەشی ئاسایشی ناوچەکە بپارێزن.
وتەبێژی هێزە چەکدارەکانی ئێران هۆشداری دەدات کە ئەگەر ئیسرائیل هێرش بکاتە سەر باڵیۆزخانەکەیان لە لوبنان، ئەوا تەواوی باڵیۆزخانەکانی ئیسرائیل لە سەرتاسەری جیهاندا دەکەنە ئامانج و لەناویانی دەبەن.
بەپێی هەواڵێکی ئاژانسی تەسنیم، سەردار ئەبولفەزل شکارچی، وتەبێژی باڵای هێزە چەکدارەکانی ئێران، ئاماژەی بە هەڕەشەکانی ئەم دواییەی ئیسرائیل کردووە بۆ سەر باڵیۆزخانەی ئێران لە وڵاتی لوبنان و رایگەیاندووە کە ئیسرائیل دەریخستووە هیچ سنوورێک بۆ کارەکانی ناناسێت، بەڵام تاران تا ئێستا بەهۆی رەچاوکردنی پەیوەندییە نێودەوڵەتییەکانەوە دانیبەخۆیدا گرتووە. ناوبراو ئاماژەی بەوەش کردووە کە کۆماری ئیسلامیی ئێران جگە لە ئەمریکا و ئیسرائیل، هیچ کێشە و دوژمنایەتییەکی لەگەڵ وڵاتانی دیکەی جیهاندا نییە و پەیوەندییەکانی لەسەر بنەمای لێکتێگەیشتن بەڕێوەدەبات.
لە بەشێکی تری قسەکانیدا، شکارچی جەختی لەوە کردووەتەوە کە ئەگەر ئیسرائیل دەست بۆ تاوانێکی لەو شێوەیە ببات و باڵیۆزخانەکەیان لە لوبنان بکاتە ئامانج، ئەوا ئێرانیش ناچار دەبێت سەرجەم باڵیۆزخانەکانی ئیسرائیل لە سەرتاسەری جیهاندا وەک ئامانجی رەوا سەیر بکات و بە دڵنیاییەوە کاری هاوشێوە دەکەن.
لە کۆتاییشدا وتەبێژەکەی هێزە چەکدارەکانی ئێران دووپاتیکردووەتەوە کە وڵاتەکەی سوورە لەسەر ئەوەی ئیسرائیل و ئەمریکای پاڵپشتیکاری بە چۆکدا بهێنێت و لەم رێگەیەشدا بە هیچ شێوەیەک پاشەکشێ ناکەن.
ئەمریکا رایدەگەیەنێت کە ئۆپەراسیۆنە سەربازییەکانی دژی ئێران بە خێرایی بەردەوامن و لە چەند رۆژی داهاتوودا هێرشەکانی ناوخۆی ئەو وڵاتە فراوانتر دەکات، لە بەرامبەریشدا تاران جەخت دەکاتەوە کە تەنیا ئامانجە سەربازییەکانی ئەمریکا لە ناوچەکەدا دەپێکێت.
پیت هێگسێس، وەزیری جەنگی ئەمریکا ئاشکرای کرد کە وڵاتەکەی پێشکەوتنی گەورەی لە جەنگی دژی ئێراندا بەدەستهێناوە و ئەنجامی رۆژەکانی سەرەتا سەرسوڕهێنەر بوون. هێگسێس ئاماژەی بەوە کرد کە سەرەڕای ئەوەی جەنگەکە لە قۆناغەکانی سەرەتایدایە، بەڵام پێدەچێت ئەمریکا و ئیسرائیل لە ماوەی یەک هەفتەدا کۆنترۆڵی ئاسمانی ئێران بەتەواوی بگرنە دەست، کە تێیدا فڕۆکە ستراتیژییەکانی وەک (B-2) و (B-52) رۆڵی سەرەکی دەگێڕن.
هەروەها جەختی کردەوە کە ئەم ئۆپەراسیۆنە دوو هێندەی پرۆسەی ئازادیی عێراق بەهێزترە، و هێزەکانیان بۆمبی زیرەکی لێزەریی کێش 500 و 1000پاوەندی بۆ پێکانی ئامانجەکان بە وردی بەکاردەهێنن.
وەزیری بەرگریی ئەمریکا روونیکردەوە کە ئەم هێرشانە وەڵامێکن بۆ کوژرانی شەش سەربازی ئەمریکی و واشنتۆن تۆڵەیان دەکاتەوە. لەبارەی زیانەکانی ئێرانیشەوە، ئاشکرای کرد کە هێزی دەریایی ئێران زیانی گەورەی بەرکەوتووە و چەندین کەشتییان لە بنی کەنداودا نوقم بوون، هاوکات هێزەکانی ئەمریکا هەزاران فڕۆکەی بێفڕۆکەوانی ئێرانییان تێکشکاندووە کە ئەمەش گیانی هەزاران کەسی لە ریزی هاوپەیمانان پاراستووە.
لە لایەکی دیکەوە، جەنەڕاڵ دان کین، سەرۆکی دەستەی ئەرکانی هاوبەشی ئەمریکا رایگەیاند کە هێزەکانیان تەرکیز دەخەنە سەر لەناوبردنی توانای موشەکە بالیستیکییەکانی ئێران و پەکخستنی توانای تاران بۆ دووبارە بونیادنانەوەی هێزە سەربازییەکەی. بە وتەی ناوبراو، ئەمریکا تا ئێستا نزیکەی 2000 ئامانجی ناوخۆی ئێرانی پێکاوە و 20 کەشتیی سەربازیی ئەو وڵاتەشی نوقم کردووە، لە کاتێکدا ئێران نزیکەی500 موشەک و2000 درۆنی ئاراستە کردووە. کین ئاماژەی بەوەش کرد کە لە 247 بۆ48 کاتژمێری داهاتوودا هێرشەکان فراوانتر دەکرێن، و وڵاتانی ناوچەکەش لەوانە وڵاتانی کەنداو و ئوردن بە سیستەمی بەرگریی خۆیان بەرگری لە خاکەکەیان دەکەن.
بافڵ جەلال تاڵەبانی، سەرۆکی یەکێتیی نیشتمانیی کوردستان پەیوەندییەکی تەلەفۆنی لە عەباس عراقچی، وەزیری دەرەوەی کۆماری ئیسلامیی ئێرانەوە پێگەیشت.
لە پەیوەندییەکەدا گفتوگۆ لەبارەی جەنگ و پێشهاتە سەربازییەکانی ئەم دواییانەی ناوچەکە کرا.
سەرۆک بافڵ بۆ پاراستنی سەقامگیریی رۆژهەڵاتی ناوەڕاست جەختی لە دۆزینەوەی چارەسەری ئاشتییانە بۆ کێشەکان و گەڕانەوە بۆ مێزی گفتوگۆ کردەوە.
هەروەها، سەرۆکی یەکێتی دوپاتیکردەوە هەموو هەوڵەکانیان لەو چوارچێوەیەدایە.
لای خۆیەوە، وەزیری دەرەوەی کۆماری ئیسلامیی ئێران سوپاسی سەرۆک بافڵی کرد لە بەرانبەر رۆڵ و کاریگەری لە پاراستنی سەقامگیریی عیراق و هەرێمی کوردستان و بە رێزەوە لە پێگەی ئاشتییانەی یەکێتی لە ناوچەکە رووانی و رایگەیاند، کە لە پەیوەندی بەردەوامدا دەبین.