جیهان
سوپای نیشتیمانی سوریا بڵاویكردەوە، لە بەرانبەر كشانەوەی هەسەدە لە مەنبج، ئاگربەستیان راگەیاندووە.
سوپای نیشتیمانی سوریا نزیك لە توركیا دەقی رێككەوتنێكی ئاگربەستی لەگەڵ هەسەدە سەبارەت مەنبج بڵاوكردەوە كە تیایدا بۆ ماوەی چوار رۆژ شەڕ و ئاڵۆزییەكان رادەگیرێن بە ئامانجی ڕەخساندنی دەرفەت بۆ جێبەجێكردنی لێكتێگەیشتنە مرۆیی و ئەمنییەكان.
دەشڵێت، ئاگربەستەكە لە رۆژی پێنجشەممە كاتژمێر پێنجی ئێوارەوە دەستپێكردووەو و تا ڕۆژی دووشەممە ١٦ی مانگ بەردەوام دەبێت.
ئاماژەی بەوەشكردووە، مەرجەكانی ڕێككەوتنەكە بریتین لە كشانەوەی هێزەكانی سوریای دیموكرات لە مەنبج و لادێكانی، لەگەڵ خێزانەكانیان، لەوانەش ناوچەی گۆڕی سوڵتان سلێمان شا و گردەكانی دەوروبەری و بەنداوی تشرین ڕادەست دەكەنەوە لەگەڵ كشانەوەی سەرجەم هێزەكانی هەردوولا لە بەنداوەكە.
ماوەی زیاتر لە مانگێكە گروپی چەكداری سوپای نیشتیمانی سوریا هێرشەكانیان بۆسەر مەنبج و دەوروبەری دەستپێكردووە، ماوەی چەند رۆژێكیشە بەنداوی تشرین و ٢٠ گوند بە درۆن و چەكی قورس هێرشی دەكرێتەسەر و لەلایەن شەرڤانانی هەسەدەشەوە بەرپەرچ دراونەتەوە.
پەرلەمانتارێكی كورد ناوەڕۆكی كۆبونەوەی لەگەڵ ئۆجەلان ئاشكرا دەكات و دەڵێت، پێویستە كورد دۆخە مێژوییەكەی بۆ ئاشتی بگۆڕێت.
عومەر ئۆجالان، پارلەمانتاری دەم پارتی لە پەرلەمانی توركیا كە هاوكات برازای ئۆجەلانە، رایگەیاندووە، لە ٢٣ی مانگی ١٠ دوای زیاتر لە چوار ساڵ و نیو دیداری لەگەڵ عەبدوڵا ئۆجالان ئەنجامداوە و تێیدا ئۆجەلان جەختی لە پڕۆسەی ئاشتیی لە توركیا و رۆژهەڵاتی ناوەڕاست كردوەتەوە.
پەرلەمانتارەكە لە زای ئۆجەلانەوە بڵاویكردوەتەوە پێویستە كورد و تورك لە توركیا بە گفتوگۆ ناكۆكییەكانیان چارەسەر بكەن بۆ ئەوەی وڵاتەكە بەهێز بێت ئەوەش بە ئاشتیی دێتەئاراوە.
ئۆجالان وتوشیەتی، پێویست بوو لە ساڵی ٢٠٠٠-ەوە ناكۆكی و كێشەكان چارەسەر بكرێن ئەو پێكدادان و شەڕانەشی كە رودەدەن هەندێكیان لە روی ناچارییەوە بوون.
عومەر ئۆجالان ئاماژەی بەوەشكردوە كە ئۆجەلان بە بەردەوامی لە رێگەی چەند كەناڵێكی تەلەفیزیۆنیەوە جگە لە ئاگاداربونی لە پرسی كورد لە باكوری كوردستان هاوكات چاودێریی دۆخی كورد لە بەشەكانی دیكەی كوردستانیش دەكات.
سەرۆكی هەڵبژێردراوی ئەمریكا، ئەگەری هەڵگیرسانی شەڕ لەگەڵ ئێران بە نزیك دەزانێت.
دۆناڵد ترەمپ لە لێدوانێكدا بە رۆژنامەنوسانی راگەیاند، هەموو ئەگەرەكان بۆ سەرهەڵدانی شەڕ لەگەڵ ئێران نزیكن.
پشتڕاستیشی كردەوە گەیشتن بە چارەسەرێك بۆ دۆخی ڕۆژهەڵاتی ناوەڕاست ڕەنگە ئاسانتر بێت لە چارەسەری قەیرانی ڕووسیا و ئۆكراین و دڵنیاییدا كە دۆخەكە لە ڕۆژهەڵاتی ناوەڕاست چارەسەر دەبێت.
ترەمپ جەختی لە پاڵپشتی خۆی بۆ هەر دەستپێشخەرییەك كردەوە كە ئاشتی هەمیشەیی لە رۆژهەڵاتی ناوەڕاست بەدەستبهێنێت و وتی: بیرۆكەی دیكە هەیە جگە لە چارەسەری دوو دەوڵەتی.
سەبارەت بە ئەگەری ڕێگەدان بە ئیسرائیل بۆ لكاندنی كەناری خۆرئاوای فەلەستین بەخۆیەوە، رایگەیاند، هەرچی بێت، گرنگ ئەوەیە ئاشتییەكی سەقامگیر و بەردەوام بەدوای خۆیدا بهێنێت.
وەزیری دەرەوە و سەرۆكی دەزگای هەوڵگری توركیا گەیشتنە دیمەشق.
هاكان فیدان وەزیری دەرەوەی توركیا و ئیبراهیم كاڵن سەرۆكی دەزگای میت گەیشتنە دیمەشقی پایتەختی سوریا ئەوەش یەكەم سەردانی لێپرسراوانی ئەو وڵاتەیە دوای روخانی بەشار ئەسەد.
تائێستا ئامانج و ئەجێنداكەی فیدان بۆ دیمەشق ئاشكرا نەكراوە، بەڵام پێدەچێت ئەو سەردانە خاڵێكی وەرچەرخانی پەیوەندی نێوان هەردوو وڵات بێت.
دوای كۆنتڕۆڵكردنی سوریا لەلایەن چەكدارانی تەحریر شام، هاكان فیدان رایگەیاند، وڵاتەكەی دەیەوێت سوریای نوێ پەیوەندییەكانی لەگەڵ وڵاتانی دراوسێیدا باش بێت و ئەوانیش هاوكاری دەكەن.
حكومەتی راگوزەری سوریا بڕیاریدا دەستور و پەرلەمانی ئەو وڵاتە بۆ ماوەی سێ مانگ هەڵپەسێردرێن.
ئاژانسی فرانس پرێس لە زاری عوبەیدە ئارناوت وتەبێژی ئیدارەی كاروباری سیاسی حكومەتی راگوزەری سوریا رایگەیاند، دەستور و پەرلەمان لەماوەی ڕاگوزەردا هەڵدەپەسێردرێن بۆ ماوەی سێ مانگ.
وتیشی، ئەو بڕیارە لە میانی كۆبوونەوەی وەزیرانی شۆڕش بەناوی حكومەتی ڕزگاری سوریا لەگەڵ وەزیرەكانی پێشووی حكومەتی سوریا دراوە، بەمەبەستی گواستنەوەی دەسەڵاتەكان كە ئەو قۆناغەش سێ مانگ دەخایەنێت، تاوەکو ئەوكاتەی حكومەتی نوێ پێكدەهێنرێت.
دەشڵێت، بێگومان لەو ماوەیەدا سەرلەنوێ دەستور دەنووسرێتەوە و پەرلەمانی نوێش دەستبەكار دەبێت.
ئەمەش دوای ئەوە دێت، لە ٢٧ی مانگی رابردووەوە، گرووپە چەکدارەکانی سەر بە ئۆپۆزسیۆن لەلایەک و هێزەکانی سوریای دیموکرات لەلایەکی دیکە دەستیان بە بەرەوپێشچوون کرد لە حەلەبەوە تاوەکو لەماوەی ١١ رۆژدا گەیشتنە دیمەشقی پایتەختی سوریا و دوای ١٢ رۆژ لە رووبەڕووبوونەوە، لە ٨ی ئەم مانگەدا بە تەواوی رووخانی رژێمەکەی بەشار ئەسەدیان راگەیاند.
دوای رووخانی رژێمەکەی ئەسەدیش، محەمەد بەشیریان وەک سەرۆکی حکومەتی راگوزەری سوریا راسپارد.
ئیدارەی خۆبەڕێوەبەری بڕیاریدا ئاڵای نوێی سوریا لەسەرجەم دامەزراوەكانی رۆژئاوای كوردستان هەڵبكات و دەڵێت، بەشێكی دانەبڕاون لە جوگرافیای سوریا.
ئەنجومەنی گەلی دیموكراتی لە ئیدارەی خۆبەڕێوەبەری باكور و رۆژهەڵاتی سوریا لە راگەیەنراوێكدا ئاماژەی بەوەكردووە، بەبۆنەی كۆتایهاتنی سەركوتكاری و خۆسەپێنی رژێمی بەشار ئەسەد كە لە ٥٠ ساڵی رابردوودا بەسەر خەڵكدا سەپێندرابوو، كە بەو هۆیەوە سورییەكان لە تاریكی و پەراوێزخستن دەژیان، بۆیە ئێستا مافی سوریەكانە خۆشی و شادی بگێڕن بەبۆنەی سەركەوتنی ئیرادەیان لە رووخانی ئەو رژێمە سەركوتكارە.
راشیگەیاندووە، لەژێر رۆشنایی ئەو گۆڕانكارییە مێژووییە كە روویداوە، ئاڵای نوێی سەربەخۆیی سوریا بە هەر سێ رەنگی سەوز و سپی و رەش، لەگەڵ سێ ئەستێرەی رەش، وەك قۆناغی نوێ كە ئاماژەیە بۆ ئاواتەكانی گەلی سوریا بەرەو ئازادی و یەكگرتووی.
ئاماژەی بەوەشكردووە، بەپشتبەستن بەو راستییەی كە ناوچەكانی ئیدارەی خۆبەڕێوەبەری بەشێكی دانەبڕاوە لە جوگرافیای سوریا و دانیشتوانی ئەو ناوچانە لە پێكهاتە رەسەنەكانی سوریا، بۆیە ئاڵای نوێی سوریا لەسەر هەموو ئەنجومەن و دامەزراوە و بەڕێوەبەرایەتییەكانی سەر بە ئیدارەی خۆبەڕێوەبەری هەڵدەكرێت. راشیگەیاند، ئەنجومەنی گەلی دیموكراتی جەخت لەسەر پابەندبوونی خۆی بە نوێنەرایەتیكردنی خواستەكانی گەلی سوریا و هەموو پێكهاتەكانی دیكە دەكاتەوە.
وەزیری دەرەوەی ئەمریكا لەبارەی دۆخی سوریا گەیشتە ئوردن و بڕیارە سبەینێش لەسەر هەمان پرس سەردانی توركیا بكات.
ئاژانسی فرانس پرێس رایگەیاند، ئەنتۆنی بلینكن وەزیری دەرەوەی ئەمریكا پاش نیوەڕۆی ئەمڕۆ گەیشتووەتە ئوردن و لەگەڵ شا عەبدوڵا شای ئوردن و وەزیری دەرەوەی ئەو وڵاتە كۆدەبێتەوە و تەوەری سەرەكی كۆبوونەوەكەش پێكهێنان و رادەستكردنی دەسەڵاتە بە حكومەتی راگوزەری سوریا.
دەشڵێت، ئەمریكا گرنگی بە حكومەتی نوێی سوریا دەدات كە رەچاوی مافەكانی مرۆڤ و مافی پێكهاتەكان بكات و دەیانەوێت رێگایەك بدۆزنەوە بۆ لەناوبردنی چەكی كیمیایی و چەكە كۆكوژەكانی بەشار ئەسەد.
بڕیارە، بلینكن سبەینێ سەردانی توركیاش بكات و باسی قۆناغی داهاتوی سوریا بكات لەگەڵ لێپرسراوانی باڵای ئەو وڵاتە.
فەرماندەی دەستەی تەحریر شام رایگەیاند، هێز و دەزگا ئەمنییەكانی سەر بە رژێمی ئەسەد هەڵدەوەشێننەوە
"ئەحمەد شەرع فەرماندەی دەستەی تەحریر شام كە بە "ئەبو محەمەد جولانی"ناسراوە رایگەیاند، كار دەكات بۆ هەڵوەشاندنەوەی هێزە ئەمنیەكانی رژێمی بەشار ئەسەد و دەزگا ئەمنییەكانی سەر بەو رژێمە و داخستنی ئەو گرتوخانانەی ناوبانگێكی خراپیان هەیە، هەروەها رایگەیاندووە ،بە وردی چاودێری بابەتی كۆگاكانی چەكی كیمیایی رژێمەكەی ئەسەد دەكات و لەگەڵ رێكخراوە نێودەوڵەتییەكاندا هەماهەنگی دەكات بۆ چاودێریكردن و گرەنتی كردنیان .
لایخۆشیەوە وەزارەتی بەرگری ئەمریكا رایگەیاندوە، پێشوازی لە دوایین لێدوانەكانی فەرماندەی دەستەی تەحریر الشام دەكەن سەبارەت بە پاراستنی ئەو پێگانەی كە پێدەچێت چەكی كیمیاییان تێدابێت، بەڵام لەگەڵ ئەوەشدا چاوەروانی كردارەكانی دەكەن.
مەزڵوم كۆبانێ رایگەیاند، ئامادەن ئاسانكاری بكەن بۆ گەڕاندنەوەی رووفاتی سلێمان شا بۆ مەزارە رەسەنەكەی خۆی كە لەساڵی 2015 بەهۆی مەترسی داعشەوە بۆ ناوچەی ئاشمە گواسترایەوە.
مەزڵوم كۆبانێ فەرماندەی گشتی هێزەكانی سوریای دیموكرات، لە پلاتفۆڕمی ئێكس رایگەیاند، لە ماوەی شەڕی داعش لە ساڵی 2015، یارمەتیاندا لە پاراستنی رووفاتی سلێمان شا بە ئاسانكردنی گواستنەوەی بۆ ناوچەی ئاشمه، دەشڵێت، هەڵوێستی خۆیان لەبارەی پاراستنی شوێنە مێژووییەكان و گەڕاندنەوەی رووفاتی سلێمان شا بۆ مەزارە ڕەسەنەكەی دەربڕی.
مەزڵوم كۆبانێ دەشڵێت، بەڵێنی چەسپاوی خۆیان دووپاتدەكەنەوە بۆ پاراستنی شوێنە مێژووییەكان و ئامادەیی خۆیان دەردەبڕن بۆ هەماهەنگی لەگەڵ هەموو لایەنە پەیوەندیدارەكان، بۆ ئاسانكردنی گەڕاندنەوەی رووفاتەكە بۆ مەزارە رەسەنەكەی، بەپێی ڕێككەوتننامە نێودەوڵەتییەكانی پێشوو و بە ڕێزگرتنی تەواوی میراتی كەلتووری.
سلێمان شا سەرۆكی هۆزی قایی توركەكانی ئۆغوز، كوڕی كایا ئالپ باوكی غازی ئەرتوغرول و باپیری عوسمانی یەكەمی دامەزرێنەری ئیمپراتۆریەتی عوسمانیە.
سەرۆك كۆماری توركیا دەڵێت، سەردەمی دەسەڵاتی بەعس لە ناوچەكە كۆتایی هات و ئاسایش و سەقامگیریش بۆ سوریا دەگەڕێتەوە.
رەجەب تەیب ئەردۆغان سەرۆك كۆماری توركیا وتارێكدا لە بارەگای سەرەكی پارتی داد و گەشەپێدان لە ئەنكەرە رایگەیاند، لە سەرەتای سەرهەڵدانی شەڕ و ئاڵۆزییەكانی سوریاوە تائێستا هەڵوێستی توركیا لە بەرانبەر ئەو وڵاتە رون و ئاشكرا بووە و چەندین ساڵە داڵدەی هەزاران ئاوارەی سوریایان داوە و هەموو پێداویستییەكیشیان بۆ دابینكردوون.
باسی لەوەشكرد، بەردەوام هەوڵیانداوە پەیوەندییەكانی ئەنكەرە و دیمەشق لەباشترین رەوشدا بێت، بەڵام دیمەشق وەك پێویست نەبووە لە بەرانبەر دەستپێشخەرییەكانی ئەنكەرە بۆ باشكردنی پەیوەندییەكانیان.
وتیشی، بە رووخانی دەسەڵاتەكەی بەشار ئەسەد، بۆ هەتاهەتایە سەردەمی دەسەڵاتی بەعس و بەعسییەكان لە ناوچەكە كۆتاییهات و ئاسایش و سەقامگیریش بۆ سوریا دەگەڕێتەوە.
سەرۆكی حكومەتی راگوزەری سوریا رایگەیاند، مافی هەموو پێكهاتەكان دەپارێزن و داواش لە پەنابەرەكانی وڵاتەكەی دەكات بگەڕێنەوە سوریا.
محەمەد بەشیر سەرۆكی حكومەتی راگوزەری سوریا رایگەیاند، لە سوریای نوێدا مافی هەموو سورییەكان بە هەموو پێكهاتەكانەوە دەپارێزرێت و گرەنتی دەكرێت، كاتی ئەوەشهاتووە كە سورییەكان لە كەشێكی ئارام و سەقامگیردا بژین، هەربۆیە داوایكردوە هەموو ئەو سوریانەی لەماوەی 13 ساڵی رابردوودا وڵاتەكەیان بەجهێشتووە بگەڕێنەوە وڵاتەكەیان.
پێشتریش محەمەد بەشیر رایگەیاندبوو، حكومەتەكەی دەستیكردوە بە گواستنەوەی دەسەڵاتەكان لە حكومەتی پێشوەوە بۆ حكومەتی راگوزەر.
لە ساڵی ٢٠١١ لەدوای سەرهەڵدانی شەڕی ناوخۆی سوریا تائێستا شەش ملیۆن و ٢٠٠ هەزار هاووڵاتی سوری ئاوارەبوون كە ٧٦%یان چونەتە وڵاتانی دراوسێ و ئەوانی دیكەش روویان كردووەتە وڵاتانی ئەوروپا.
تەقیینەوەیەك لە نوسینگەی وەزیری پەنابەرانی ئەفغانستان لە کابولی پایتەختی وڵاتەکە رویدا و بەهۆیەوە وەزیری پەنابەرانی ئەفغانستان کە ناوی (خەلیل رەحمان حەقانی)ـە كوژرا.
ئەمڕۆ چوارشەممە ١١ـی ١٢ـی ٢٠٢٤ لە کابولی پایتەختی ئەفغانستان تەقینەوەکە رویداوە و تائێستا حکومەتی ئەفغانستان هەڵوێستی خۆی رانەگەیاندووە، هەروەها هیچ لایەنێکیش بەرپرسیارێتی تەقینەوەکەی نەگرتوەتە ئەستۆ.
ئەمریکا لە ساڵی ٢٠١١، خەلیل رەحمان حەقانی خستە لیستی تیرۆرەوە و هەروەها پێنج ملیۆن دۆلاریشی دانا بۆ هەر کەسێک کە وابکات حەقانی دەستگیربکرێت.
ئەمریکا چەند مەرجێک بۆ حکومەتی نوێ سوریا دادەنێت بە مەبەستی دوورخستنەوەی هەژموونی روسیا و ئێران لەو وڵاتە .
ئاژانسی بی بی سی بەریتانی رایگەیاند، ئەمریکا مەرجی هەیە بۆ حکومەتی نوێ سوریا و هەر حکومەتێک جێگەی رژێمەکەی بەشار ئەسەد بگرێتەوە، مەرجەکان بریتین لەوەی کە دەبێت رێز لە مافی کەمینەکان بگیرێت، رێگری بکرێت لەوەی سوریا ببێتە مۆڵگەی تیرۆر و هەموو جبەخانەی کیمیایی و چەکی بایۆلۆجی سوپای ئەسەد لەناو ببرێت.
هاوکات وەزیری دەرەوەی ئەمریکا جەخت لەوەدەکاتەوە کە دەبێت وڵاتانی دیکە خۆیان لە هەر دەستوەردانێک لە چارەنووسی سوریا بەدوور بگرن.
ئەسما ئەسەد، هاوسەری بەشار ئەسەد، تەمەنی ٤٩ ساڵە و لە بەریتانیا لەدایکبووە، نزیکەی ٢٥ ساڵ لە سەرۆکایەتی کۆماری سوریا، هاوسەر و هاوکاری بەشار ئەسەد بوو.
ئەسما لە خانەوادەیەکی سوری لە لەندەن لەدایکبووە و دوای خوێندنی زانستی کۆمپیتەر دەستی بە کاری وەبەرهێنان و بانکداری کردووە.
کاتێک بەشار ئەسەد لە لەندەن خەریکی خوێندنی پزیشکی چاو بوو، ئەسمای ناسی و ساڵی ٢٠٠٠ـیش ئەسما رۆشتە سوریا و لە رۆژی ١٨ـی ١٢ هاوسەرگیری لەگەڵ بەشار کرد.
چاوەڕوان دەکرا ئەزمونی ئەسما بتوانێت هاوکاری چاکساسی و بەرەوپێشبردنی سوریا بێت، ئەم چاوەڕوانییە وەک خۆی جێبەجێ بوو، بەڵام بە دەستپێکردنی ئاڵۆزییەکانی ساڵی ٢٠١١ هەموو شتەکان پێچەوانەبوونەوە.
دوای دەستپێکردنی ئاڵۆزی و جەنگ لە سوریا، ئەسما کەمتر لە شانۆی سیاسیدا دەردەکەوت، لە ساڵی ٢٠١٢ یەکەم سەرنجی لەسەر بارودۆخی سوریا خستەڕوو، هەروەها تەئکیدی لە پشتیوانی هاوسەرەکەی کردەوە، لە هەمان ساڵدا بڵاوبوونەوەی ئەو ئیمەیڵانەی کە هۆگربوونی ئەسمای بە بەرهەمە گرانبەهاکانی نیشاندەدا، سیمای سیاسی ئەسمای جارێکی دیکە شێواند.
لەگەڵ بەردەوامبوونی شەڕدا، ئەسما لە کارە خێرخوازییەکانی بەردەوامبوو، هەروەها بەرپرسی ئەمینداریەتی گەشەپێدانی سوریای گرتە ئەستۆ، دواتر لە ساڵی ٢٠١٨ تووشی نەخۆشی شێرپەنجەبوو و دواتر چاکبوونەوەی راگەیاند، هەروەها لە ساڵی ٢٠٢٤ ئاشكرای کرد کە تووشی شێرپەنجەی خوێن بووە.
دەورانی ئەسما ئەسەد وەک خانمی یەکەمی سوریا کۆتاییهات، ئەسما و هاوسەرەکەی لەئێستادا لە روسیا دەژین، ئەمەش دوای ئەوەدێت کە رژێمەکەیان رووخا و خۆری ئەسەد لە سوریا ئاوابوو.
روسیا رادەستكردنی بەشار ئەسەد رەتدەكاتەوە و دەڵێت، "میوانی روسیایە و لە شوێنێكی سەلامەتە".
سێرگی ریابكۆڤ جێگری وەزیری دەرەوەی روسیا ئاماژەی بەوەكرد، روسیا بەشێوەیەكی سەلامت بەشار ئەسەدی سەرۆكی پێشووی سوریا گواستوەتەوە ناو وڵاتەكەی لە كاتی رووخانی دەسەڵاتەكەیدا.
وتیشی، ئەسەد سەلامەتە و نازانێت چی لێ بەسەردێت لە داهاتوودا، لەلایەن چەند وڵاتێكەوە تۆمەتبار كراوە و هەوڵدراوە وڵاتەكەی هاوشێوەی عیراق و لیبیای لێ بێت.
جێگری وەزیری دەرەوەی روسیا راشیگەیاند، روسیا هیچ رێككەوتنێكی نییە بۆ ئەوەی ئەسەد رادەست بكات، چونكە مۆسكۆ ئەندامی دادگای باڵای تاوانەكان نییە.
بەهۆی بۆردومانی توركیاوە بەنداوی تشرین لە سنووری مەنبەج لەكاركردن وەستا، هەسەدەش كوژرانی زیاتر لە ١٠٠ ئەندامی گروپە چەكدارەكانی راگەیاند، ئیدارەی خۆبەڕێوەبەری رۆژئاوای كوردستانیش داوا لە كۆمەڵگەی نێودەوڵەتی دەكات دژی هێرش و بۆردومانی توركیا بوەستێتەوە.
میدیاكانی رۆژئاوای كوردستان بڵاویانكردەوە، بەهۆی بۆردومانی سوپای توركیاوە بەنداوی تشرین لە مەنبج لەكاركردن وەستا، لەگەڵ ئەوەشدا لەسەر بەنداوەكە پێكدادانی قورس لەنێوان هەسەدە و گروپەكانی سەر بە توركیا بەردەوامە.
ئاماژە بەوەشكراوە، شەڕڤانانی هەسەدە لە پردی قەرەقۆزاخی سەر بە كانتۆنی فورات فڕۆكەیەكی بێ فڕۆكەوانی توركیایان خستۆتەخوارە، زیاتر لە ١٠٠ ئەندامی گروپە چەكدارەكان كوژراون.
"سوپای توركیا و گروپە چەكدارەكانی لایەنگری خۆی، لە دوێنێوە هێرشەكانیان بۆ سەر دەوروبەری پردی قەرەقۆزاخی كانتۆنی فورات و كۆبانێ و مەنبج چڕكردووەتەوە و بە پشتیوانی فڕۆكەی بێفڕۆكەوان هەوڵیانداوە لە پردەكە بپەڕنەوە، بەڵام شەڕڤانان گورزی قورسیان لێوەشاندوون".
هاوكات ئیدارەی رۆژئاوای كوردستان لە راگەیەنراوێكدا داوا لە كۆمەڵگەی نێودەوڵەتی و هێزە كاریگەرەكانی توركیا دەكات، هەڵوێستێكی توند بەرانبەر هێرشەكانی توركیا رابگەیەنن و كاربكەن بۆ پاراستنی هاووڵاتیان دژی هێرشەكانی توركیا كە هەرەشە لە ئاسایشی ناوچەكە دەكات.
ئیدارەی رۆژئاوای كوردستان جەختیشدەكاتەوە لەسەر بەرگریكردن لە خاك و هاووڵاتیان و رووبەڕووبوونەوەی هێرشەكانی توركیا.