جیهان
ئەمڕۆ خولی دووەمی دانوستانەکانی نێوان ئەمریکا و ئێران لەبارەی بەرنامەی ئەتۆمی ئێران، لە رۆمای پایتەختی ئیتاڵیا بە نێوەندگیری عوممان بەڕێوە دەچێت.
ئەمڕۆ خولی دووەمی دانوستانەکانی ئەمریکا و ئێران لە ئیتاڵیا بەڕێوەدەچێت و ستیڤ ویتكۆف نوێنەری ئەمریكا بۆ رۆژهەڵاتی ناوەڕاست و عەباس عراقچی وەزیری دەرەوەی ئێران لە شاری رۆما لە ئیتاڵیا کۆدەبنەوە.
وتیكۆف پێش كۆبوونەوەكە رایگەیاند، هیچ رێككەوتنێك ناكرێت تا ئەوكاتەی تاران پیتاندنی یۆرانیۆم و سیستمی پەرەپێدانی چەك بە تەواوی رانەگرێت.
عراقچیش رایگەیاندووە، ئێران سازش لەسەر بەرنامە ئەتۆمییەكە و دابەزاندنی ئاستی پیتاندنی یۆرانیۆم دەكات و نایەوێت چەكی ئەتۆمی بەرهەمبهێنێت، بەڵام داوای هەڵگرتنی سزاكان دەكەن و گفتوگۆ لەسەر دەستبەرداربوونی تەواوەتی لە بەرنامەی ئەتۆمی ناكەن.
خولی یەکەمی دانوستانی نێوان ئەمریکا و ئێران لە رۆژی 12ی ئەم مانگەدا لە شاری مەسقەتی پایتەختی عوممان بەڕێوەچوو کە خودی عوممان نێوەندگیر بوو.
بۆ خولی دووەمی کۆبوونەوەکان، رافائیل گروسی بەڕێوەبەری گشتیی ئاژانسی نێودەوڵەتیی وزەی ئەتۆم بەشدار دەبێت.
لێدوان و راگەیەنراوەکانی هەریەک لە ئەمریکا و ئێران لەدوای خولی یەکەمی دانوستانەکان ئەرێنی بوون. کۆشکی سپی رایگەیاند، گفتوگۆکان ئەرێنی و بونیادنەر بوون. لەلایەکی دیکەشەوە، عەباس عراقچی وەزیری دەرەوەی ئێران بەهەمان شێوە گفتوگۆکانی بە بونیادنەر ناو هێنا.
وەزیری دەرەوەی ئێران رایدەگەیەنێت؛ تاران و واشنتۆن ئەگەری هەیە لەسەر پرسی بەرنامەی ئەتۆمیی رێککبکەون، داواش دەکات روسیا رۆڵی هەبێت لەو رێککەوتنەدا.
ئەمرۆ عەباس عراقچی وەزیری دەرەوەی ئێران لە مۆسکۆ لەگەڵ سێرگی لاڤرۆڤ هاوتا روسیەکەی کۆبوەوە و رایگەیاند، لە خوولی یەکەمی دانوستانەکان لەگەڵ ئەمریکا کە لە عوممان بەڕێوەچوو، بەرەوپێشچوونی باش هەبووە لەنێوان هەردوولادا، چاوەڕوانیش دەکەین سبەینێ خوولی دووەمی دانوستانەکان زیاتر بەرەوپێش بچێت و نزیک ببینەوە لە رێککەوتن سەبارەت بە پرسی ئەتۆمی.
لە بەرانبەریشدا وەزیری دەرەوەی روسیا ئامادەیی وڵاتەکەی نیشاندا بۆ ئەوەی رۆڵی هەبێت لە گەیشتن بە رێککەوتن لە چوارچێوەی پەیمانی قەدەغەکردنی چەکی ئەتۆمی.
جێگەی ئاماژەیە بڕیارە سبەینێ خولی دووەمی دانوستانەکانی نێوان ئەمریکا و ئێران لەبارەی بەرنامەی ئەتۆمی ئێران، لە رۆمای پایتەختی ئیتاڵیا بەڕێوەبچێت.
بڕیارە سبەینێ خولی دووەمی دانوستانەکانی نێوان ئەمریکا و ئێران لەبارەی بەرنامەی ئەتۆمی ئێران، لە رۆمای پایتەختی ئیتاڵیا بەڕێوەبچێت.
خولی یەکەمی دانوستانی نێوان ئەمریکا و ئێران لە رۆژی 12ی ئەم مانگەدا لە شاری مەسقەتی پایتەختی عوممان بەڕێوەچوو کە خودی عوممان نێوەندگیر بوو، بڕیاریشە سبەینێ خولی دووەمی دانوستانەکان بەهەمان شێوە بە نێوەندگیری عوممان بەڕێوەبچێت، بەڵام دەبرێتە ئیتاڵیا.
بۆ خولی دووەمی کۆبوونەوەکان، رافائیل گروسی بەڕێوەبەری گشتیی ئاژانسی نێودەوڵەتیی وزەی ئەتۆم بەشدار دەبێت.
لێدوان و راگەیەنراوەکانی هەریەک لە ئەمریکا و ئێران لەدوای خولی یەکەمی دانوستانەکان ئەرێنی بوون. کۆشکی سپی رایگەیاند، گفتوگۆکان ئەرێنی و بونیادنەر بوون. لەلایەکی دیکەشەوە، عەباس عراقچی وەزیری دەرەوەی ئێران بەهەمان شێوە گفتوگۆکانی بە بونیادنەر ناو هێنا.
لەبارەی دانوستانەکانەوە، هەفتەی رابردوو ئیسماعیل باقایی وتەبێژی وەزارەتی دەرەوەی ئێران رایگەیاند، خولی دووەمی دانوستانەکان لەسەر پرسی ئەتۆمی و هەڵگرتنی سزاکان دەبێت. لەکاتێکدا ئەمریکا پێشتر جەختی کردبووەوە، کە دۆسیەی گروپە چەکدارەکانی سەر بە ئێران و بەرنامە موشەکییەکانیش دەبێت باس بکرێن.
ئەمریكا دەڵێت، دەستبەرداری هەوڵەكانی ئاشتی نێوان روسیا و ئۆكراین دەبێت، ئەگەر ئاماژەیەكی روون بۆ رێككەوتنەكە نەبێت، سەرۆكی فەڕەنساش رایگەیاند، هەفتەی داهاتوو قۆناغێكی نوێی گفتوگۆ لە لەندەن بەڕێوەدەچێت.
ماركۆ رۆبیۆ وەزیری دەرەوەی ئەمریكا دوای كۆبوونەوەی لەگەڵ لێپرسراوانی ئەوروپا و ئۆكراین بۆ ئاشتی رایگەیاند، دەستبەرداری هێنانەدی ئاشتی نێوان روسیا و ئۆكراین دەبێت، ئەگەر ئاماژەیەكی روون بۆ رێككەوتنكە نەبێت.
وتیشی، ئەمریكا دەیەوێت هاوكاری بكات ئەگەر لایەنەكان جددی بن لە ئاشتی، بەڵام بەردەوام نابێت لە ئەنجامدانی كۆبوونەوەكان تا پێشكەوتن بەدەست نەهێنرێت.
لەلایەكی ترەوە ئیمانوێل ماكرۆن سەرۆكی فەڕەنسا لە تۆڕی ئێكس رایگەیاند، هەفتەی داهاتوو قۆناغێكی نوێی گفتوگۆ سەبارەت بە چارەسەركردنی كێشەی ئۆكراین لە لەندەن بەڕێوەدەچێت.
راشیگەیاند، هەر لەسەرەتاوە پشتیوانی پێشنیارەكەی سەرۆكی ئەمریكای كردووە بۆ كۆتاییهێنان بە ململانێی ئۆكراین.
رەوشی تەندروستی سری سورەیا ئۆندەر خراپە، بەپێَی راگەیەنراوێكی نەخۆشخانەكە مەترسی لەسەر ژیانی بەردەوامە.
نەخۆشخانەی فلۆرانس نایتنگەیل لە ئیستەنبوڵ، راگەیەنراوێكی سەبارەت بە رەوشی تەندروستی سڕی سورەیا ئۆندەر ئەندامی وەفدی دەم پارتی بڵاوكردەوە و رایگەیاند، چارەسەری ئۆندەر لە بەشی چاودێری چڕ بەردەوامە.
لە بەشێكی تری راگەیەنراوەكەدا هاتووە، رەوشی تەندروستی وەكو خۆیەتی و مەترسی لەسەر ژیانی بەردەوامە.
ئەوەش لە كاتێكدایە رۆژی سێشەممە 15ی ئەم مانگە سڕی سورەیا ئۆندەر تووشی جەڵدەی دڵ بوو، گواسترایەوە بۆ نەخۆشخانە بۆ وەرگرتنی چارەسەری، لە ئێستاشدا لە ژێر چاودێری ورد دایە.
توێژینەوەیەکی یابانی نهێنییەکی زانستیی نوێ لەبارەی زوو هەستان لە خەو و مانەوە بە چالاکی و تەندروستیی ئاشکرا دەکات و ئاماژەی بەوەکردووە، بۆ مانەوەی جەستەتان بە تەنسروستیی رێگە بدەن تیشکی خۆر لەخەو هەڵتان بستێنێ.
توێژەران لە زانکۆی ئەوساکا مترۆبۆلیتان توێژینەوەیەکیان لەسەر 19 بەشداربوو ئەنجام داوە لەبارەی کاریگەریی بەرکەوتنی رووناکی سروشتی لەسەر کوالێتی خەو و لەخەو هەستان.
توێژەران نموونەی توێژینەوەکەیان کردووە بە سێ بەشەوە، بەشیکیان 20 خولەک بەر لە هەستان لە خەو رووناکی سروشتی "تیشکی خۆر" لێیداون، بەشێکیان زیاتر لە 20 خولەک و بەشێکیشیان هیچ رووناکییەک نەچووەتە ژوورەکانیانەوە.
لە ئەنجامی توێژینەوەکەدا، ئەو زانا یابانیانە گەیشتوونەتە ئەو ئەنجامەی، ئەو کەسانەی 20 خولەک بەر لە هەستان لە خەو رووناکی سروشتی لە ژوورەکانیانی داوە، خەوێکی باشتریان هەبووە و لەکاتی هەستان لە خەویشدا جەستەیەکی چالاکیان هەبووە، هەروەها هیچ هەستێکی خەواڵوویی و شەکەتی جەستەیان نەبووە.
لە بەرامبەردا گروپی دووەم کە زیاتر لە 20 خولەک رووناکی سروشتی چووەتە ژوورەکانیانەوە، کەمتر چالاک بوون بەراورد بە گروپی یەکەم، ئەمەش هاوشانی ئەوە دەبێتەوە کە زانست دەڵێت، بەرکەوتنی زۆر بە تیشکی خۆر کاریگەریی لاوەکی و زیانی دەبێت.
گروپی سێیەمی توێژینەوەکەش کە لە ژوورێکی تەواو تاریکدا خەوتوون و هیچ رووناکییەکی سروشتی نەچووەتە ژوورەکانیانەوە، ئەگەرچی کاتی تەواویش خەوتبن، بەڵام هێشتا هەستیان بە تێکشکاوی جەستەیان کردووە و خەواڵوو بوون، نەیانتوانیوە بە چالاکییەوە رۆژەکانیان دەست پێ بکەن و بچنە سەر کار.
توێژەرانی توێژینەوەکە ئەوەشیان خستووەتە روو، لە دەرئەنجامی ئەو توێژینەوەیەوە دەیانەوێت بگەن بە داهێنانی سیستمێکی زیرەک، کە بەپێی کات و وەرزەکان کۆنتڕۆڵی چوونە ناوەوەی رووناکی سروشتی و تیشکی خۆر بکات بۆ ژوورەکان.
بۆیە ئەو توێژینەوەیە ئاڕاستەیان دەکات بەوەی، دیزاینێکی زیرەکانە بۆ ژووری نوستن بکەن، کە رووناکی سروشتی و تیشکی خۆر وەک بەشێکی سەرەکی ژوورەکە لەبەرچاوبگیرێت.
سوپای ئەمریكا سێ بنكەی سەربازی لە دێرەزوور چۆڵكرد و بەرەو ناوچەی شەدادی حەسەكە كشایەوە.
روانگەی سوریا بۆ مافەكانی مرۆڤ بڵاویكردەوە، هاوپەیمانی نێودەوڵەتی بە سەرۆكایەتی ئەمریكا، دەستی كردووە بە گواستنەوەی كەرەستەی سەربازی و لۆجستی لە كێڵگە نەوتییەكانی عومەر و كۆنیكۆوە بەرەو قەزای شەدادی لە باشوری حەسەكە.
هەروەها دەڵێت، بەشێك لە هێزەكان لەو دوو بنكەیە دەمێننەوە تا دواتر فەرمانی كشانەوەی تەواوەتییان بۆ دێت بە ئامانجی دووبارە داڕشتنەوەی هێزەكان و دابەشكردنی بەسەر بنكە سەربازییەكاندا لە سوریا.
بەپێی زانیارییەكانی روانگەی سوری، ژمارەیەكی زۆر لە هێزەكانی سوریای دیموكرات لە كێڵگەی نەوتی عومەر جێگیر كراون.
هەر لەو چوارچێوەیەدا رۆژنامەی نیویۆرك تایمز بە پشتبەستن بە سەرچاوە ئاگادارەكان بڵاویكردوەتەوە، سوپای ئەمریكا سێ بنكەی ئۆپەراسیۆنی بچووكی خۆی لە باكوری رۆژهەڵاتی سوریا داخستووە بەئامانجی كەمكردنەوەی هێزەكانی لە دوو هەزارەوە بۆ 1400 سەرباز.
دۆناڵد ترەمپ، سەرۆکی ئەمەریکا رایگەیاندووە کە لە ئەنجامدانی کردەی سەربازی بۆ سەر دامەزراوە ئەتۆمییەکانی ئێران پەلەی نییە و جەختی کردووەتەوە کە بژاردەی یەکەمی دانوستانە.
بەپێی راپۆرتێکی رۆژنامەی نیویۆرک تایمز، ترەمپ بەرپرسانی ئیسرائیلی ئاگەدار کردووەتەوە کە پشتیوانی هیچ کردەیەکی سەربازی و هێرشێک بۆ سەر ئێران یان دامەرزاوە ئەتۆمییەکانی ئەو وڵاتە ناکات و راشیگەیاندووە لەم قۆناغەدا وازی لەم بژاردەیە هێناوە.
رۆژنامەکە ئەوەشی خستووەتەروو کە ترەمپ بڕوای وایە ئێران دەرفەتێکی باشی لە بەردەمە بۆ ئەوەی ببێتە وڵاتێکی گرنگ و کاریگەر، هەر بۆیە لەم قۆناغەدا دانوستان بژاردەی یەکەمی سەرۆکی ئەمەریکایە.
لە لێدوانەکانیدا بۆ بەرپرسانی ئیسرائیلی، ترەمپ وتوویەتی: "دانوستان بژاردەی یەکەمی منە، چونکە بژاردەی دووەم بۆ ئێران زۆر خراپە، بۆیە پێم وایە ئێران مەبەستی دانوستانە و بەهیوام دانوستان بکەن".
راپۆرتەکەی رۆژنامەی نیویۆرک تایمز لە کاتێکدایە کە بڕیارە شەممەی داهاتوو گەڕی دووەمی دانوستانەکانی ئێران و ئەمەریکا بە ئامادەبوونی رافائیل گروسی، بەڕێوەبەری گشتیی ئاژانسی نێودەوڵەتیی وزەی ئەتۆم لە رۆمای پایتەختی ئیتاڵیا بەڕێوە بچێت، دوای ئەوەی گەڕی یەکەم شەممەی رابردوو لە مەسقەت بەڕێوە چوو.
میدیاكانی ئەمریكا بڵاویانكردەوە، لە زانكۆی فلۆریدا و لەنزیك شوێنی مانەوەی خوێندكاران كەسێك تەقەی لە چەند خوێندكارێك كردووە و بەو هۆیەوە دوو كەس کوژراون و شەش کەس بریندار بوون، تەقەکەرەکەش بە برینداری لەلایەن هێزەکانی پۆلیسەوە دەستگیرکراوە.
تا ئێستا پۆلیس هیچ رونکردنەوەیەکی سەبارەت بەناسنامەی کەسەکە نەداوە و لەکاتی روداوەکەشدا، پۆلیس داوای لە خوێندكاران كردووە خۆیان حەشار بدەن.
بەپێی زانیاری میدیاکانی ئەمریکا، ئەو دوو کەسەی کوژراون خوێندکار نەبوون.
بەپێی راگەیاندراوێکی ئاسایشی کینیا، دوو گەنجی هەڵگری رەگەزنامەی بەلجیکی تەمەن 19 ساڵ دەستگیرکراون، دوای ئەوەی هەوڵیان داوە زیاتر لە پێنج هەزار مێرولە بە قاچاخ بگوازنەوە بۆ ئەوروپا.
لە راگەیاندراوەکەدا ئاماژە بەوە کراوە، تۆمەتبارەکان مێرولەکانیان لە ناو زیاتر لە دوو هەزار و 200 شوشەی بچوکدا هەڵگرتبو و مەبەستیان بو بیانگوازنەوە بۆ بازاڕەکانی ئەوروپا و ئاسیا.
لە لێکۆڵینەوەی سەرەتاییدا، هەردوو تۆمەتبارەکە لە بەردەم دادگای نایرۆبی رایانگەیاندووە تەنها بۆ چێژ و خۆشی مێرولەکانیان کۆکردۆتەوە و ئاگاداری ئەوە نەبوون کە گواستنەوەی ئەم زیندەوەرانە لە کینیا قەدەغەیە.
بەرپرسانی فەرمانگە پەیوەندیدارەکانی ئەو وڵاتە رایانگەیاندوە ئێستا لەگەڵ جۆرێکی نوێی بازرگانی نایاسایی ڕووبەڕوون کە بازرگانیکردنە بە مێرولە و زیندەوەرە بچکۆلەکان، لە کاتێکدا پێشتر زیاتر بازرگانی بە فیل و گیانلەبەرە گەورەکانەوە دەکرا.
هێزەکانی ئاسایشی کینیا ئاماژەیان بەوەشکردووە لە کەیسێکی هاوشێوەدا، دو گەنجی دیکە لەو وڵاتە بە 400 مێرولەوە دەستگیرکراون و ڕووبەڕووی دادگا کراونەتەوە.
شایەنی باسە کە ئەم دیاردەیە نیگەرانی بەرپرسانی پاراستنی ژینگەی کینیای لێکەوتۆتەوە و داوایان لە هاووڵاتیان و گەشتیاران کردووە پابەندی یاسا و رێنماییەکانی پاراستنی ژینگە و زیندەوەرەکان بن.
ئەمە هاوکاتە لەگەڵ ئەو وشکە ساڵیە هەمیشەییەی کە لە کینیا بەرەو ڕووی ئاژەڵان دەبێتەوە، بە شێوەیەک زیاتر لە 200 فیل، سەدان کەرەکێوی و گامێش بەهۆی ئەو وشکەساڵییەی کینیای گرتووەتەوە، لە نێوچوون. وشکەساڵییەکە بە جۆرێکە لە 40 ساڵی رابردوودا وێنەی نەبووە.
رۆژنامەیەكی ئەمریكی بڵاویكردەوە، ترەمپ پێشنیازێكی ناتانیاهۆی بۆ هێرشكردنە سەر ئێران رەتكردووەتەوە.
رۆژنامەی نیۆیۆرك تایمزی ئەمریكی لە زاری چەند لێپسراوێكی ئەمریكییەوە بڵاویكردووەتەوە، دۆناڵد ترەمپ سەرۆكی ئەمریكا راشكاوانە بە ئیسرائیلی راگەیاندووە كە پاڵپشتی هیچ جۆرە هێرشێك بۆ سەر ئێران ناكات.
ئەو لێپرسراوە ئەمریكیانە كە رۆژنامەكە ئاماژەی بە ناویان نەكردووە راشیانگەیاندووە، ترەمپ ئەو پێشنیازەی لە چوارچێوەی هەوڵەكان بۆ دانوستان لەگەڵ تاران رەتكردووەتەوە.
هەروەها بە خودی بنیامین ناتانیاهۆ سەرۆك وەزیرانی ئیسرائیلی راگەیاندووە، ئەو بە رێگای دیپلۆماسی و دانوستان ئەو بابەتە چارەسەر دەكات.
سەرۆك و سەركردەكانی توركیا سەردانی ئەو نەخۆشخانەیە دەكەن كە سری سورەیا ئۆندەری ئەندامی وەفدی ئیمراڵی تێیدا لە ژێر چاودێریی چڕی پزیشكیدایە.
فیگەن یوكسەكداغ هاوسەرۆكی پێشووتری پارتی دیموكراتی گەلان هەدەپە كە نزیكەی نۆ ساڵە لە زیندان بەند كراوە، لە پەیامێكدا بۆ سری سورەیا ئوندەر رایگەیاند، بە خەمێكی قوڵەوە هەواڵی نەخۆشییەكەی ئۆندەرم بیست و بە دڵ و گیان هیوای بۆ دەخوازم بە تەندروستییەوە بگەڕێتەوە سەر ئەركی جێبەجێكردنی پڕۆسەی ئاشتیی.
هاوكات شەوی رابردو ژمارەیەكی بەرچاو لە سەرۆك و سەركردەكانی لایەنەكانی توركیا سەردانی نەخۆشخانەی شیشلی ئیستەنبوڵیان كرد و نوعمان كورتوڵموش، سەرۆكی پەرلەمانی توركیا لە بەردەم نەخۆشخانەكە رایگەیاند دۆخی تەندروستیی سری سورەیا ئۆندەر، هێشتا هەستیارە و هیوای باشبونەوەی بۆ دەخوازن.
عومەر چەلیك، وتەبێژی پارتی داد و گەشەپێدانی توركیا ئاكەپە هەر لە چوارچێوەی سەردانی ئۆندە رایگەیاند نزای چاكبوونەوە بۆ و سری سورەیا ئۆندەر دەكەین.
دوای ئەوەی لە چەند رۆژی رابردوودا، سری سورەیا ئۆندەر جەڵتەی دڵ لێیدا، نەشتەرگەریی دڵی بۆ كراوە و بە وتەی پزیشكەكان رەنگە پێویست بێت نەشتەرگەریی دیكەشی بۆ بكرێت.
واشنتۆن ژمارەیەك سزای نوێی دژی تاران سەپاند و وەزارەتی دەرەوەی ئەمریكاش رایگەیاند سزاكان كەرتی نەوتی ئێرانی كردوەتە ئامانج.
وەزارەتی دەرەوەی ئەمریكا بڵاوی كردەوە، حەوت كۆمپانیا و پێنج كەشتی گواستنەوەی نەوتی ئێرانی خستوەتە لیستی سزاكانی وڵاتەكەیەوە.
بە پێی راگەیەندراوی وەزارەتی دەرەوەی ئەمریكا زۆربەی كۆمپانیا سزادراوەكان لقە سەرەكییەكانیان لە مالیزیا و پەنەما و دورگەكانی مارشال بوە و كەشتییەكانیش بە ئاڵای وڵاتانی دیكەوە نەوتی ئێرانیان لە بازاڕەكانی جیهاندا ساخ كردوەتەوە.
سزاكانی ئەمریكا لە كاتێكدایە كە بە پێی نوێترین ئاماری گومرگی چین، تەنها لە مانگی رابردودا ئێران رۆژانە یەك ملیۆن و 900 هەزار بەرمیل نەوتی رەوانەی چین كردوە.
ئەوروپا ناوی هەشت وڵات وەك شوێنی سەقامگیر لەقەڵەم دەدات و رایدەگەیەنێت مافی پەنابەرێتی بە هاوڵاتییانی ئەو وڵاتانە قورس دەكرێت.
ماگنوس بروننەر، لێپرسراوی كۆچبەران لە یەكێتی ئەوروپا رایگەیاند: كۆمیسیۆنی ئەوروپا هەشت وڵاتی خستوەتە لیستی ئەو وڵاتانەی كە پێویستە وەك وڵاتێكی سەقامگیر و پارێزراوبونی ئاسایشی دانیشتون مامەڵە لەگەڵ هاوڵاتییەكانیان لە وڵاتانی ئەوروپا بكرێت.
وتیشی لە ماوەی رابردودا كۆچبەرانی وڵاتانی میسر و هندستان و بەنگلادیش ، مەغریب و تونس، كۆزۆڤۆ و كۆڵۆمبیا- زۆرترین داواكاریان بۆ مافی پەنابەرێتی لە ئەوروپا پێشكەش كردوە لە كاتێكدا ئەو وڵاتانە لەروی ئاسایش و سەقامگیرییەوە پارێزراون.
لە ماوەی رابردودا هەڵمەتێكی رەتكردنەوەی مافی پەنابەرێتی و یان گەڕانەوەی زۆرەملێی كۆچبەران و پەنابەران لە ئەوروپا دەستی پێكردوە و هەڵمەتەكەش ژمارەیەك لە پەنابەرانی هەرێمی كوردستان و عیراقی گرتوەتەوە.
جۆ بایدن، سەرۆکی پێشوی ئەمەریکا، لە یەکەمین وتاری دوای وازهێنانی لە پۆستی سەرۆکایەتی، بە توندی رەخنەی لە ئیدارەی نوێی دۆناڵد ترەمپ گرت و هۆشداری لە زیادبونی دوبەرەکی لەناو وڵاتەکەدا دەربڕی و وتی؛ "ئەمەی رودەدات نوێیە لە ئەمریکا".
بایدن لە وتارەکەیدا رایگەیاند: "پێشتر هیچ کاتێک دابەشبونێکی لەم شێوەیەمان نەبینیوە، پەرەسەندنی بۆشایی نێوان لایەنگرانی ترەمپ و دیموکراتەکان کاریگەری زۆری لەسەر ئەمەریکا دەبێت."
سەرۆکی پێشوی ئەمریکا ئاماژەی بەوەشکرد کە ئیدارەی نوێی وڵاتەکە لە ماوەی کەمتر لە 100 رۆژدا "ماڵوێرانی و کارەساتی گەورەی لە تەواوی جیهان خوڵقاندوە."
هەروەها بایدن جەختی لەوەکردەوە کە "بەهۆی دەرکردنی نزیکەی حەوت هەزار فەرمانبەری حکومەت لە کارەکانیان بەشێکی زۆری ماڵپەڕە رەسمیەکان لە کارکەوتون".
جۆ بایدن لە مانگی تەمموزی ساڵی رابردوودا لە کێبڕکێی سەرۆکایەتی کشایەوە، دوای ئەوەی لە دیبەیتێکی تەلەفزیۆنیدا ئاستێکی خراپی پێشکەش کرد، ئەمەش نیگەرانییەکانی ناو پارتەکەی لەبارەی تەمەن و توانای دەرونییەوە زیاتر کرد و پاشتر بە خێرایی "کامالا هاریس" لەلایەن حزبەکەوە کاندید کرا و لەسەر دەستی ترەمپ شکستی پێهێنرا.
یانەی ریاڵ مەدریدی ئیسپانی لە خولی یانە پاڵەوانەکانی ئەوروپا بە خەیاڵی ریمۆنتادا میوانداری یانەی ئەرسیناڵی ئینگلیزی دەکات کە لە یاری چوندا لە یاریگای ئەرسیناڵ ئەنجامەکە سێ گۆڵی بێ بەرانبەر بوو بۆ یانە ئینگلیزیەکە.
ریمۆنتادا چییە؟
'ریمۆنتادا' لە بنەرەتدا وشەیەکی ئیسپانییە و بە مانای گەڕانەوە دێت، واتە تیمێک کە بەرەو شکست دەڕوات و کەمترین هیوای ماوە بۆ بردنەوە، بەڵام لەناکاو ئەنجامەکە پێچەوانەکە دەکاتەوە و بە سەرکەوتن کۆتایی پێ دەهێنێت، ئەم دەستەواژەیە لە دوو دەیەی رابردوودا زیاتر بەکاردێت، لە ساڵانی رابردوشدا بە تایبەت لە خولی یانە پاڵەوانەکانی ئەوروپادا چەندین ریمۆنتادا ئەنجام دراوە.
ریاڵ مەدرید دەیەوێت ریمۆنتادا بکات
ئەمشەو سەعات 10، لە یاری دووەمی قۆناغی چارەکی کۆتایی خولی یانە پاڵەوانەکانی ئەوروپادا، یانەی ریاڵ مەدریدی ئیسپانی میوانداری یانەی ئەرسیناڵی ئینگلیزی دەکات، یانەکەی پایتەختی ئیسپانیا دوای ئەوەی لە یاری یەکەمدا بە سێ گۆڵی بێ بەرانبەر شکستی هێنا، هەموو ئامادەکارییەکی بۆ تۆڵەکردنەوە کردوە.
یاری یەکەم لە رۆژی 8ـی 4ـی 2025 لە یاریگەی ئیماراتی تایبەت بە یانەی ئەرسیناڵ بەڕێوەچوو، تێیدا ریاڵ مەرید شۆک کرا و بە سێ گۆڵی بێ بەرانبەر گەڕایەوە مەدرید، بەڵام رۆژنامەکانی مەدرید دەڵێن ''جاری کۆتایی نەهاتووە''.
ریاڵ مەدرید چۆن سەردەکەوێت؟
یانەی ریاڵ مەدرید بۆ گەشتن بە قۆناغی پێش کۆتایی خولی یانە پاڵەوانەکانی ئەوروپا پێویستە بە جیاوازی چوار گۆڵ لە ئەرسیناڵ بباتەوە، گەر جیاوازیشیان سێ گۆڵ یاریەکە بە لیدانی یەکلاکەرەوە کۆتایی پێدێت و یانەی سەرکەوتوو ئاشکرا دەبێت.
ریاڵ مەدرید و سانتیاگۆ
یانەی ریاڵ مەدرید لە ساڵانی رابدوی خولی یانە پاڵەوانەکانی ئەوروپادا چەندین جار سودی لە یاریگەی خۆی بینیوە و ریمۆنتادای بەرانبەر یانە بەهێزەکان ئەنجامداوە وەک 'مان سیتی و بایرن میونشن'، یانەکەی پایتەختی ئیسپانیا دەیەوێت ئەمجارە تۆڵەی خۆی لە ئەرسیناڵ بکاتەوە، بەڵام بە سەیرکردنی ئەنجامەکان، ئەرکی لە هەموو ساڵەکانی پێشتر قورسترە.
ئەرسیناڵ چی دەکات؟
یانەی ئەرسیناڵ دوای ئەوەی لە یاریگەی خۆیدا بە ئەنجامی سێ گۆڵی بێ بەرانبەر براوەبوو، بە دەرونێکی ئارام دەگاتە سانتیاگۆ بێرنابیۆ، یانەکەی پایتەختی ئینگلتەرا چاوەڕێی یاریەکی ئاسان ناکات، ئەمەش بە سەیرکردنی مێژوو و ئەزمونی ریاڵ مەدرید لە خولی یانە پاڵەوانەکانی ئەوروپادا.
ریاڵ 15 و ئەرسیناڵ سفر
یانەی ریاڵ مەدریدی ئیسپانی خاوەنی 15 نازناوی یانە پاڵەوانەکانی ئەوروپایە کە زۆرترینە، هەروەها یانەی ئەرسیناڵ خاوەنی هیچ نازناوی خولەکە نییە، چاوەڕوان دەکرێت یاری ئەمشەو زۆر بەهێز بێت، یانەی ریاڵ مەدریدیش لە هەژماری خۆی دەڵێت، "90 خولەک لە سانتیاگۆ زۆر قورس تێدەپەڕێت".