کوردستان
ئەمشەو لەبازاڕێکی شاری هەولێر شەڕەتەقە رویدا و بەهۆیەوە کەسێک کوژرا.
قارەمان جەوهەر پەیامنێری کوردسات نیوز رایگەیاند، کەمێک پێش ئێستا لە بازاری کۆتری سەلام لە هەولێر شەڕەتەقە رویدا.
وتیشی، تا ئێستا هۆکاری شەڕەکە دیار نییە، بەڵام بەپێی زانیارییە سەرەتاییەکان بەهۆی دەمەقاڵێوە لەنێوان دوو کەس شەڕەکە دروستبووە و کەسێکیان تەقەی لە بەرانبەرەکەی کردووە و برینداریکردووە، دوای رەوانەکردنی بۆ نەخۆشخانە گیانی لەدەستدا.
پەیامنێری کوردسات نیوز ئەوەشی خستەڕوو، ئەو تۆمەتبارەی تەقەی کردووە خۆی رادەستی هێزە ئەمنییەکان کردووە.
جێگەی ئاماژەیە تا ئێستا هیچ روونکردنەوەیەک لەلایەن هێزە ئەمنییەکانی هەولێر سەبارەت بە روداوەکە بڵاونەکراوەتەوە.
قوباد تاڵەبانی دەلێت: یەکێتی بە دەنگی خەڵک باشتر دەتوانێت کێشەکانی خەڵکی کوردستان لە بەغدا چارەسەر بکات.
قوباد تاڵەبانی، لە تۆڕی کۆمەڵایەتی فەیسبوک ئەم وێنانەی بڵاوکردوەتەوە و نوسیوویەتی: لە هەموو شار و شارۆچکە و گوندەکانی کوردستان، کەسایەتییە کۆمەڵایەتییەکان هەمیشە رۆڵی خێریان بینیوە لە ئاشتیی کۆمەڵایەتی و هەروەها هاندان و رێنیشاندانی کۆمەڵگا بۆ گرتنەبەری هەڵوێستی دروست، هەڵوێستێک کە لە بەرژەوەندی و خێری گشتیدا بێت، کەسایەتییە کۆمەڵایەتییەکان لە کۆڵەکەکانی پاراستنی کۆمەڵگەی کوردستانن.
ئاماژەی بەوەشکردووە، خۆشحاڵ و شەرەفمەند بووم بە دیداری ژمارەیەک لە کەسایەتییە کۆمەڵایەتییەکانی شاری هەولێری خۆشەویست، بۆم روونکردنەوە کە بۆچی لەم هەڵبژاردنەدا لە بەرژەوەندیی خەڵکی کوردستانە کە پێگەی یەکێتی لە بەغدا بەهێزتر بکرێت، داواشم لێکردن پێگە و قسەڕۆیشتوویی خۆیان بەکاربهێنن بۆ هاندانی خەڵک بۆ بەشداریکردن لە هەڵبژاردن و دەنگدان بە یەکێتی، چونکە یەکێتییەکی بەهێز و پشبەستوو بە دەنگی خەڵک باشتر دەتوانێت کێشەکانی خەڵکی کوردستان لە بەغدا چارەسەر بکات و داکۆکی لە مافە رەوا و دەستورییەکانمان بکات.
دەزگای لوتكە هۆشداری توند دەدات لە كۆچی نایاسایی لەرێگەی لیبیاوە و دەڵێت، كۆچەرانی كورد لە لیبیا لەژێر مەترسی بێسەروشوێنكردنی زۆرەملێ و ئەشكەنجە و دەستدرێژی و مامەڵەی خراپدان.
دەزگای لوتكە بۆ كاروباری ئاوارە و پەنابەران رایگەیاند، بەهۆی نەبوونی چاودێری یاساییەوە هەزاران كۆچەر لە لیبیا لەژێر مەترسی بێسەروشوێنكردنی زۆرەملێ و ئەشكەنجەدان و دەستدرێژی و مامەڵەی خراپدان، لەنێویاندا كۆچەری كورد.
ئەوەشی خستووەتەڕو، بە سەدان كۆچەر لە لیبیا لەلایەن میلیشا چەكدارەكان و گروپەكانی بازرگانیكردن بە مرۆڤەوە دەستبەسەركراون.
دەزگای لوتكە ئاماژەی بەوەشداوە، لەمساڵدا زیاتر لە 24 هەزار كۆچبەر لە دەریای ناوەڕاست گیراون و گواستراونەتەوە بۆ لیبیا، لەو وڵاتەش رەوشی زیندانەكانی كۆچبەران لەڕادەبەدەر مەترسیدارە، بە جۆرێك كۆچەران بۆ ماوەیەكی درێژخایەن دەستگیردەكرێت بەبێ ئەوەی بخرێنە بەردەم داواكاری گشتی بۆ دیپۆرتكردنەوە، ئەوەش پێشێلكردنی یاسا و مافەكانی مرۆڤە.
شاناز ئیبراهیم ئەحمەد خانمی یەکەمی عیراق لەکۆشکی سەلام لەشاری بەغداد چاویکەوت بەژمارەیەک لەهونەرمەند و ئەکتەرە دیارەکانی بواری نواندن لە عیراقدا.
لەو دیدارەدا کەچەند کەسایەتیەکی کۆمەڵایەتیش ئامادەیبوون، خانمی یەکەم باسی لەو رۆڵە دیار و بەرچاوە کرد کەهونەرمەندان دەیبینن لەناساندنی رۆشنبیری و کلتوری وڵات و گەیاندنی پەیامی هونەری گەلان و نەتەوە جیاکان لەڕێی دراما و زنجیرەی تەلەفزیۆنی و شانۆییەکانەوە ، کەڕەنگدانەوەی واقعی کۆمەڵایەتی و مێژوویی و رۆشنبیری کۆمەڵگەیە و ناسنامەی عیراق و کەلەپورە دەوڵەمەندەکەی دەردەخات، هەروەک دیداری هونەرمەندان و ئەکتەرەکانیشی بەدەرفەتێک زانی بۆ سوپاسگوزاری و رێزلێنان لەکاروانی هونەرمەندان و بەخشینەکانیان، لەپشتیوانی و بەرەوپێشبردنی هونەر لەم وڵاتەدا.
هاوکات شاناز ئیبراهیم ئەحمەد باسی لەگرنگی دۆبلاژکردن و وەرگێڕانی زنجیرەی تەلەفزیۆنی و دراماکانی کرد لەعەرەبیەوە بۆ کوردی و بەپێچەوانەشەوە لەجیاتی پەنابردنە بەر فیلم و درامای بیانی کەهەندێکیان لەگەڵ پێودانگەکانی خێزان و داب و نەریتی کۆمەڵگەدا ناگونجێت، هەروەها بەگرنگیشی زانی کە کەناڵە ئاسمانییەکان گرنگی بدەنە پەخشکردنی بەرهەمی هونەری و دراما خۆماڵییەکان لەپێناو پشتیوانیکردنی هونەرمەندان و پیشاندانی وێنایەکی راستەقینە دەربارەی ژیانی هاوڵاتیانی عیراق.
هەروەک لەدیدارەکەدا تاوتوێی پێشنیازێک کرا دەربارەی گرنگیدان بە رێکخستنی دیدار و سەردانی مەیدانی بۆ پارێزگا جیاکان لەپێناو لێکنزیککردنەوەی بۆچوونەکان و ئاڵوگۆڕی کلتوری و کاری هاوبەش لەو درامایانەی کە روناکی دەخەنە سەر داب و نەریت، شێوە زارەکان، هونەری میللی، کەناسنامەی کلتوری بەهێزدەکات و وابەستەیی نیشتمانیی لەنێوانی نەتەوە جیاکان دروست دەکات و برایەتی و پێکەوەژیان لەنێوانی تاکەکانیدا پەرە پێدەدات و کۆی ئەمانەش دەکاتە بەشێک لەیادەوەری نەوەکانی ئایندە.
لای خۆیانەوە هونەرمەند و ئەکتەرە ئامادەبووەکان، سوپاسی خانمی یەکەمی عیراقیان کرد بۆ بەدواداچون و گرنگیدانی بەهونەرمەندان و چالاکیەکانیان و پەرۆشیی بۆ بەردەوامی کارە هونەرییەکان لەوڵاتدا.
لەنێو هونەرمەندە ئامادەبووەکاندا، فاتمە روبەیعی و زهرە روبەیعی خوشکی، و محەمەد حسێن عەبدولرەحیم و ئیناس تاڵب و ئیحسان دعدوش و مەحمود ئەبو عەباس و لەیلا محەمەد و هیند کامل و فەوزیە حەسەن و محەمەد هاشم، هەبوون.
لە هەڵەبجە ماتۆڕسکیلێک لە منداڵێک دەدات و بەهۆیەوە گیانلەدەستدەدات و پۆلیسی پارێزگاکەش دەڵێت: بە بڕیاری دادوەر شۆفێری ماتۆڕسکیلەکە راگیراوە.
بەڕێوەبەرایەتی پۆلیسی پارێزگای هەڵەبجە بڵاویکردەوە، دوا نیوەڕۆی ئەمڕۆ لە گەڕەکی ئازادی لە ناحیەی سیروان ماتۆڕسکیلێک لە منداڵێکی تەمەن سێ ساڵ دەدات و بەهۆیەوە گیانلەدەستدەدات.
ئاماژەی بەوەشکرد، شۆفێری ماتۆڕسکیلەکە بە بڕیاری دادوەر و بەپێی یاسایی 24ـی هاتوچۆ راگیراوە و پەراوی لێکۆڵینەوە لە روداوەکە کراوەتەوە.
قوباد تاڵەبانی رایگەیاند؛ یەکێتی بە ١٨ کورسییەوە بەتەنها لە هەمو لایەنەکانیتر پێگەی بەهێزتر بووە و دەبێت کاربکرێت بۆ زیاتر کردنی کورسییەکانی یەکێتی بۆ ئەوەی پێگەی یەکێتی بەهێزتر بێت، تا باشتر کێشەکان چارەسەر بکات وداواشیکردوە تەواوی هەوڵەکان بخرێنەگەڕ بۆ ئەوەی هانی خەڵکی بدەن دەنگ بە یەکێتی بدەن.
ئەمڕۆ یەکشەممە، قوباد تاڵيبانی رایگەیاندوە؛ دوێنێ سەرۆک بافڵ لە کۆیە راستییەکی روونکردەوە کە وتی یەکێتی لە چەند ساڵی رابردوودا بە ١٨ کورسییەوە، بە تەنها قورسایی و پێگەی لە هەموو لایەنەکانی دیکە زیاتر بوو و کاری زیاتری کرد.
دەشپرسێت؛ ئەی ئەگەر ئەمجارەیان ژمارەی کورسییەکان زۆر زیاتر بکات، دەبێت یەکێتی چەندە بەهێزتر و کاریگەرتر کار بۆ چارەسەری کێشەکان بکات؟
ئەوەشی خستوەتەڕوو؛ لە کۆبوونەوەی لەگەڵ هەڤاڵانی بازنەی ١٢ی عەنکاوە و کوران رایگەیاندوە پێویستە خەڵکی ناڕازیی هەولێر و یەکێتییەکان لەم هەڵبژاردنەدا پێگەی یەکێتی لە بەغدا بەهێزتر بکەن.
داوای لە هەڤاڵانی یەکێتیش کردوە؛ لەم دوو هەفتەیەدا هەوڵ بدەن زۆرترین خەڵک هان بدەن بۆ دەنگدان بە یەکێتی، چونکە بە راستی ئەوەی لە بەغدا دەتوانێت و دەیەوێت کێشەکان چارەسەر بکات، یەکێتییە و بەس.
دوای ئەوەی باڵندەیەک لە جۆری قوش لەلایەن چەند راوچییەکەوە لە سنوری گەرمیان راوکراو و ڤیدیۆکەی کاردانەوەی بەدوای خۆیدا هێنا، لایەنی پەیوەندیدار هاتنە سەرخەت و توانیان راوچییەکان دەستگیر بکەن و باڵندەکەش بەگەڕێننەوە.
ئەمڕۆ یەکشەممە، بەڕێوەبەرایەتی پۆلیس و دارستانی گەرمیان رایگەیاند، ئەو باڵندە قوشەی راوکراو بوو لەلایەن ژمارەیەک راوچییەوە توانیویانە بەدەستی بهێننەوە و راوچییەکانیش دەستگیرکراون.
لە دوای راوکردنی باڵندەکە، بەڕێوەبەرایەتیی پۆلیسی دارستان و ژینگەی گەرمیان راگەیەندراوێکی بڵاوکردەوە هۆشداری دەداتە راوچیان و رایگەیاند،راوکردنی باڵندەی "قوش" بە هەموو جۆرەکانییەوە
لە راگەیەندراوێکدا جەخت لەوەکرایەوە هەر کەسێک سەرپێچی لەو بڕیارە بکات، ڕێکاری یاسایی توندی بەرامبەر دەگیرێتەبەر و ڕەوانەی دادگا دەکرێت.
باڵندەی قوش یاخود "شاهینە" جۆرێکی دەگمەنە لە جیهاندا و چەندن جۆری هەیە، هەرێمی کوردستان یەکێکە لەو شوێنانەی ئەو جۆرە باڵندەیەی لێدەژی.
پەکەکە رایگەیاند بەگوێرەی بڕیارەکانی کۆنگرەی دوازدەهەمی پەکەکە، لە هەنگاوێکی مێژووییدا هێزەکانیان لە تورکیا دەکشێنینەوە بەرەو قۆناغی دووەمی بانگەوازی ئاشتی و کۆمەڵگەیەکی دیموکراسی هەنگاو دەنێن.
ئاماژەیان بەوەشکردوە، لە ماوەی هەشت مانگی رابردوودا هەنگاوی بەرچاو و مێژوویییان ناوە بۆ ئەوەی کەشێکی ئارام و گونجاو بۆ گفتوگۆ دروست بکەن دەشڵێن؛ ڕاستەوخۆ دوای بانگەوازەکەی رێبەر ئۆجالان، لە ١ی ئازار ئاگربەستیان راگەیاند.
لە بەشێکی دیکەی راگیەندراوەکەدا هاتووە؛ گەیشتنی بەشێک لە هێزەکانیان بۆ سنورەکانی هەرێمی کوردستان و پشتیوانیان بۆ بانگەوازی ئاشتی و کۆمەڵگەیەکی دیموکراسی رادەگەیەنین و هەروەها ڕێوشوێنی پێویست لە ناوچە سنوورییە زۆر هەستیارەکاندا دەگیرێتەبەر.
دەقی راگەیەنەدراوەکە
“بۆ ڕای گشتیی
دوای گهیشتنی شهڕ و پێكدادانهكانی ڕۆژههڵاتی ناوهڕاست به ئاستی مهترسی زۆر جدی لهسهر ئایندهی كورد و توركیا، ساڵی ڕابردوو لهسهر بانگهوازییهكانی سهرۆككۆماری توركیا و سهرۆكی گشتی مەهەپە دهوڵهت باخچهلی و پاشان ڕێبهر عهبدوڵا ئۆجالان پرۆسهیهك دهستی پێكرد و ئهم پرۆسهیهش كه به بانگهوازی “ئاشتی و كۆمهڵگهی دیموكراتیک”ـی ڕێبهر عهبدوڵا ئۆجالان له ٢٧ـی شووباتی ٢٠٢٥ـدا به ناسنامهی خۆی گهیشت، به قۆناخێكی تا دواڕاده گرنگ و ههستیاردا دهگوزهرێت.
ئێمهی لایهنی كورد لهلایهن خۆمانهوه له ماوهی ههشت مانگی ڕابردوودا لهسهر بنچینهی بانگهوازی ئاشتی و كۆمهڵگهی دیموكراتیک ههنگاوی گهورهی مێژووییمان نا. دوابهدوای بانگهوازییهكه و له ڕۆژی ١ـی ئاداردا به ئامانجی بهرقهراركردنی زهمینهیهكی ئارام و ئاسووده بۆ گفتوگۆكردن ئاگربهستمان ڕاگهیاند. ڕێبهر عهبدوڵا ئۆجالان به ڕێبازی گونجاو ئاراستهی نیشاندا و لهسهر ئهو بنهمایهش پەکەکە له ڕۆژانی ٥-٧ـی ئایاردا، ١٢ـیەمین كۆنگرهی خۆی سازدا و بڕیارماندا به كۆتاییهێنان به ههبوونی ڕێكخراوهیی پەکەکە و ستراتیژییهتی تێكۆشانی چهكداری و ئهو بڕیارهشمان لهسهر زیاد كرد كه تهنیا به سهرپهرشتی ڕاستهوخۆیانهی ڕێبهر عهبدوڵا ئۆجالان دهتوانرێت پراكتیزه بكرێن. دوای دوو مانگ و له ١١ـی تهمووزدا، دوای بانگهوازی بهدیمهنی ڕێبهر عهبدوڵا ئۆجالان گرووپی ئاشتی و كۆمهڵگهی دیموكراتیک کە له ٣٠ كهس پێكهاتبوو و به پێشهنگایهتی هاوسهرۆكی كۆنسهی بهڕێوهبهری کەجەکە بهسێ هۆزات، له مهراسیمێكدا چهكهكانیان سووتاند و به ڕوونی و كرداریی ههڵوێست و به بڕیارداریمانەوە له كۆتاییهێنان به تێكۆشانی چهكداری سهلماند.
ئهم ههنگاوه مێژووییانهی لایهنی كورد كه به پێشهنگایهتی ڕێبهر عهبدوڵا ئۆجالان و پەکەکە ئهنجامی دان، كاریگهرییهكی قوڵی له كهشوههوای سیاسی و كۆمهڵایهتی توركیا كرد و گیان و ئیرادهیهكی نوێی له بواری ئاشتی و دیموكراتیزهبووندا خستهڕوو. ئهم ههڵوێسته بوێرانه و فیداكارانهیهی كورد كه ههمیشه لایهنگری ئاشتی و دیموكراسی و ئازادیی بووه، بهشێوهیهكی گشتی له ناوخۆ و دهرهوهی توركیاش پێشوازییهكی گهرمی لێكرا.
سهرهڕای ههڵوێسته ناتهواوهكانی لایهنی بهرامبهر، ڕێبهر عهبدوڵا ئۆجالان و بزووتنهوهی ئازادیخوازی كوردستان به ئامانجی وهلاوهنانی ههموو ئهو مهترسییه سهختانهی بهرۆكی كورد و توركیای گرتووه، بۆ ئهوهی بتوانرێت بناخهی ژیانی ئازادی، دیموكراتیک و برایهتی سهدهی داهاتوو دابنرێت و پرۆسهی ئاشتی و كۆمهڵگهی دیموكراتی به قۆناخی دووهم بگهیهندرێت، له ههوڵی ههنگاوی نوێی كردارییدایه. لهم چوارچێوهیهدا و لهسهر بنچینهی بهرنامه و بڕیارهكانی كۆنگرهی ١٢ و به دهستووری ڕێبهر عهبدوڵا ئۆجالان دهستمانكرد به ههنگاوی كشانهوهی ئهو هێزانهمان له توركیا لهبهردهم ئهگهری مهترسی پێكداداندان و زهمینه لهبارن بۆ ڕوودانی ئهگهری نهخوازراو. كشانهوهكه له ناوچه سنوورییهكانی توركیاوه بهرهو ههرێمهكانی پاراستنی مەدیا دهكرێت و بهشێك لهو گرووپانهی گهیشتوون به ههرێمهكانی پاراستنی مەدیا ئێستاكه لێره ئامادهن و بهشدارن لهم کۆنگرە ڕۆژنامەنووسییەدا. هاوكات لهو سهنگهرانهی ناوچه سنوورییهكانیشدا كه ئهگهری پێكدانان و ههر ئهگهرێكی نهخوازراویان لهسهره، ڕێوشوێنی هاوشێوه و سازهندانه گیراونهتهبهر.
بێگومان پراكتیك دهبێته نیشاندهری ئاستی كاریگهری ئهم ههنگاوانهمان. بهڵام ئهم ههنگاوه كردارییانهشمان جارێكی تر بهبڕیاربوون و ههڵوێستی ڕوونمان سهبارهت به جێبهجێكردنی بڕیارهكانی كۆنگرهی ١٢ دهسهلمێنێت.
زۆر ڕوون و ئاشكرایه كه ئێمه پابهندین به بڕیارهكانی كۆنگرهی ١٢ـوە و بهبڕیاریشین له جێبهجێكردنی دا. بهڵام بۆ جێبهجێكردنییان پێویسته دهستبهجێ ئهو ههنگاوه یاسایی و سیاسییانهی پرۆسهكه بنرێن كه مهرجی بڕیارهكانی كۆنگرهی ١٢ـی پەکەکە بوون. بۆ ئهم مهبهسته پێویسته یاسای ڕاگوزەری تایبهت به پەکەکە به بنچینه وهربگیردرێت و بۆ بهشداریكردن له سیاسهتی دیموكراتییانهش دهستبهجێ یاساكانی پهیوهست به ئازادی پێویست و ئهنتیگراسیۆنی دیموكراتی دهربكرێن.
بانگهوازییهكهمان بۆ تێكڕای گهلهكهمانه بهتایبهتیش ژنان و گهنجان. ڕۆژ؛ ڕۆژی چاوهڕوانیكردن نییه، ڕۆژی تێكۆشانی ڕێكخراوهییه بۆ بهدیهێنانی ژیانی ئازادی و دیموكراسی. ههر بۆیه ههر كهسێك خۆی لهم ژیانهدا دهبینێتهوه پێویسته له ئاستی ههڵمهتی سهرتاسهریدا بۆ سهركهوتنی “پرۆسهی ئاشتی و كۆمهڵگهی دیموكراتی” تێبكۆشێت.
مانیفێستی ئاشتی و كۆمهڵگهی دیموكراتیک مسۆگهر سهردهكهوێت.
٢٦/١٠/٢٠٢٥
بهڕێوهبهرایهتی تهڤگهری ئازادیی”
هەسەدە رایگەیاند لە رێگەی گروپە چەکدارەکانەوە بە چەکی (ئار پی جی) لە رۆژهەڵاتی دێرەزور هێرشیانکراوەتە سەر، ئاماژە بەوەشدەکەن هێرشەکە بێ زیانی گیانیی بووە و وەڵامی گونجاویان داوەتەوە.
هێزەکانی سوریای دیموکرات، درەنگانێکی شەوی رابردوو، راگەیەندراوێکی بڵاوکردوەتەوە و تێیدا هاتووە؛ لە پێگەکانی کەناری رۆژئاوای رووباری فوراتەوە، بە ئار پی جی هێرشکراوەتە سەر هێزەکانیان، لە گوندی ئەبو حەمام لە لادێی رۆژهەڵاتی دێرەزۆر.
ئاماژەیان بەوەشکردوە؛ هێرشەکە هیچ زیانێکی گیانی لێ نەکەوتەوە و هێزەکانیان بە تەواوەتی وەڵامیان داونەتەوە و هێرشبەرەکانیان کردوەتە ئامانج.
وەک لە راگەیەندراوەکەدا هاتووە؛ ناوچەکە ئێستا ئارامە و هێزەکانیان دەستیانکردوە بە لێکۆڵینەوە و بەدواداچوون بۆ ئاشکراکردنی ناسنامەی تاوانباران و بەردەوام لە ئامادە باشیدان بۆ پاراستنی دانیشتوان و سەقامگیری ناوچەکە.
بافڵ جەلال تاڵەبانی دەڵێت: یەكێتی بۆ هەموو كوردستان خەبات دەكات و بە یەک چاو سەیری هەموو لایەنەکان دەکەین.
بافڵ جەلال تاڵەبانی سەرۆکی یەکێتیی نیشتمانیی کوردستان لە وتارێکدا لە کەرنەڤاڵی جەماوەری لیستی ٢٢٢ـی یەکێتی لە کۆیە رایگەیاند، ناچینە ناو حكومەتێك وەك یەك خزمەتی هەموو ناوچەكانی هەرێم نەكات
وتیشی، بەڵێن دەدەین بە کوردستان، بە یەک چاو سەیری هەموو لایەنەکان و پێکهاتەکان دەکەین، هەروەها ئێمە حزبی سەرۆک مام جەلالین و بۆ هەموو کوردستان خەبات دەکەین.
بافڵ جەلال تاڵەبانی ئاماژەی بەوەشکرد، بە هەڕەشەکردن کێشەکان لە بەغداد چارەسەر ناکرێت، هاوکات یەکێتی لە بەغداد پێگەیەکی بەهێزی هەیە و هەموو لایەنەکان رێز لەهەڵوێست و بڕیارەکانمان دەگرێت.
ئەوەشی خستەڕوو، نوێنەرەكانی یەكێتی لەهەمووان زیاتر خزمەتی هاووڵاتیانیان كردووە و داواتان لێدەكەین بە دەنگ و كورسی زیاتر بماننێرن بۆ بەغداد.
سەرۆکی یەکێتی سەبارەت خزمەتکردنی کریستیانەکانی کۆیە رایگەیاند، زیاتر خزمەتی خوشك و برا كریستیانەكانمان دەكەین و هەڵەیەكی زۆرگەرەیە دەنگ بە لایەنێك بدەن كە كرداری نییە.
ئاشکراشیکرد، یەکێتی حزبی هەر چوارپارچەی کوردستان کوردستانە و لەهەموو وڵاتێک یەکێتی پێگەی خۆی هەیە.
جوتیاران ئاگاداردەکرێنەوە رۆژی دووشەممە، قۆناغی دووەمی شایستەی دارایی گەنمی جووتیارانی سنوری پارێزگای سلێمانی خەرج دەکرێت، بریاریشە سبەینێ بۆ ئەو مەبەستە شەش ملیار دینار بخرێتە سەر هەژماری بانکی بابان لە سلێمانی.
نەوزاد کامیل، بەرێوەبەری گشتی بازرگانی هەرێم بە کوردسات نیوزی راگەیاند؛ سبەینێ شەش ملیار دینار لە شایستەی دارایی گەنمی جوتیارانی سلێمانی دەخرێتە سەر هەژماری بانکی بابان و لە رۆژی دووشەممەوە دەستبەدابەشکردنی دەکەن بەسەر جوتیاراندا.
ئاماژەی بەوەشکرد، ئەو بەڕە پارەیە، وەک قۆناغی دووەمی شایستەداراییەکانی جوتیارانە لە سنورەکە دەنێردرێت، کە جوتیارانی سلێمانی، هەڵەبجە، چەمچەماڵ، ئیدارەكانی گەرمیان و راپەڕین دەگرێتەوە.
ئەمە لە کاتێكدایە، وەزارەتی بازرگانی هەرێم رۆژی 15ـی10ـی ئەمساڵ رایگەیاند، بڕی پانزە ملیار و پێنج سەد ملیۆن دینار وەک شایستەی گەنمی جوتیاران بۆساڵی 2025 خراوەتە سەر هەژماری وەزارەتەکەیان و بەپێی پارێزگاکانیش، شەش ملیار دینار بۆ سلێمانی و پێنج ملیار دینار بۆ هەولێر چوار ملیار و پێنج سەد ملیۆن دینار بۆ دهۆک دەبێت.
قائیمقامیەتی رانییە، رایگەیاندوە، سبەینێ دەستبەدابەشکردنی نەوت دەکرێت و هاووڵاتییانیش ئاگاداردەکاتەوە پێویستە کارتی نەوتیان پێبێت و ئاگادریشبن بەسەر نەچوو بێت.
قائیمقامیەتی رانییە لە راگەیەندراوێکدا، هاوڵاتییانی سنورەکە ئاگاداردەکاتەوە، سەبەینێ دەستبەدابەشکردنی نەوت دەکەن و پڕۆسەکە بەردەوام دەبێت، پێویستیشە هاووڵاتیان سەردانی بریکارەکانی خۆیان بکەن بەمەبەستی دڵنیابوونەوە لە کارتی وەرگرتنی نەوت.
هۆشداریشیانداوە لەوەی بۆ وەرگرتنی نەوتەکە دەبێت کارتی نەوتیان پێبێت و لە ئەگەری بەسەرچونی کارتەکەشدا، سەردانی دارایی رانیە بکەن بۆ ئەوەی بەزووترین کات کارتەکانیان بۆ کارا بکرێتەوە.
لە راگەیەندراوەکەدا ئەوەش هاتوە؛ پرۆسەی دابەشکردنەکە لە گەرەکی( رۆژستی، بیتوێن ستی، ڕانیەی نوێ ، دابان ، تیتۆکە ،ماردین، کۆدۆ، ئازادی، داستان، کارۆخ و شارەوانی ) دەست پێدەکات و 40 تەنەکەر نەوت ئامادەیە بۆ دابەشکردن.
ئاسۆ مامەند، سەرپەرشتیاری کەرکوک-سەڵاحەدینی یەکێتیی نیشتمانیی کوردستان پەیامێكی بڵاوكردووەتەوە و تێیداھاتووە، "بە لای یەکێتییەوە کەرکوک چەپکە گوڵەکەی سەرۆک مام جەلالە، هەموو لایەک لە ماف و ئەرکدا وەک یەکن، رێگە نادەین برایەتی نێوان پێکهاتەکانی کەرکوک بشێوێنرێت".
دەقی پەیامەكە
هاووڵاتییان خۆشەویستی کەرکوک..! پێکهاتەکان بە گشتی و کوردانی دڵسۆزی پردێ و دەوروبەری..!
ماوەی دوو سێ رۆژە، چەند کەسێکی سەر بە چەند لایەنێکی ناسراو لە شارۆچکەی پردێ لە هەوڵی نانەوەی پیلان و ئاژەوگێڕیدان، و دەیانەوێ بە بیانوی جۆراوجۆر دۆخی سەقامگیری سنوورەکە تێکبدەن.!
لەو سۆنگەیەوە هاووڵاتییانی خۆشەویستی کەرکوک بە تایبەتی خوشک و براکانمان لە پردێ دڵنیا دەکەینەوە؛ کە رێگە بە هیچ کەس و لایەنێک نادرێ لە ژێر هیچ ناوو ناونیشانێکدا دۆخی ئارامی کەرکوک تێکبدات، بە پێچەوانەوە رێوشوێنی یاسایی لە دژی هەموو ئەو کەس و لایەنانە دەگیرێتەبەر کە بیەوێ هەوڵی پیلانگێڕی یاخود ئاژاوگێڕی بدات لە سنوورەکەدا.
بە لای یەکێتییەوە کەرکوک چەپکە گوڵەکەی سەرۆک مام جەلالە، و هەموو لایەک لە ماف و ئەرکدا وەک یەکن، رێگە نادەین برایەتی نێوان پێکهاتەکانی کەرکوک بشێوێنرێ و بۆیە داواکارم هەموان دان بە خۆتانا بگرن و ئارامی بپاریزن
بەرەو کەرکوکێکی سەقامگیر و ئاوەدان
ئاسۆ مامەند
سەرپەرشتیاری کەرکوک-سەڵاحەدینی یەکێتیی نیشتمانیی کوردستان
دەرباز کۆسرەت رەسوڵ، ئەندامی سەرکردایەتیی یەکێتیی نیشتمانیی کوردستان، ئەمڕۆ لە شاری هەولێر پێشوازیی لە فەرامەرز ئەسەدی، کونسوڵی گشتیی کۆماری ئیسلامی ئێران لە هەرێمی کوردستان کرد.
لە دیدارێکدا کە دواین پێشهاتەکانی دۆخی عیراق و هەرێمی کوردستانی تێدا تاوتوێ کرا، دەرباز کۆسرەت رەسوڵ جەختی لە گرنگیی هەڵبژاردنی ئەنجومەنی نوێنەرانی عیراق کردەوە بۆ راگرتنی هاوسەنگیی پەیوەندییەکان لەسەر ئاستی عیراق.
دەرباز کۆسرەت رەسوڵ دووپاتیکردەوە کە "یەکێتی کۆڵەکەی سەرەکیی راگرتنی سەرجەم هاوسەنگییەکانە، چ لەسەر ئاستی عیراق و چ لەسەر ئاستی هەرێمی کوردستان."
ناوبراو وتیشی: "بۆیە کاتێک دەڵێین 'هێزی تۆین لە بەغداد'، ئەمە تەنها دروشم نییە، بەڵکو ئەمە بەرنامەی کاری یەکێتی بووە و لە قۆناغی داهاتوشدا هەر بەم سیاسەتەوە کار دەکەین."
کەمێک پێش ئێستا لە سلێمانی و لە روداوێکی هاتوچۆدا، گەنجێک گیانی لەدەستدا و شەش کەسی دیکەش برینداربوون.
سامان نادر، بەڕێوەبەری سەنتەری فریاکەوتنی خێرای سلێمانی، بە کوردسات نیوزی راگەیاند: "لە فولکەی مامەریشە لە نزیک گەڕەکی چوارباخ، روداوێکی هاتوچۆ لەنێوان ئۆتۆمبێلێکی تایبەت و ماتۆڕێکی سێ تایەدا رویدا."
ناوبراو وتیشی: "بەهۆی روداوەکەوە، گەنجێکی تەمەن 25 ساڵ کە سەرنشینی ماتۆڕسکیلەکە بووە، گیانی لەدەستداوە و شەش سەرنشینی دیکەی هەمان ماتۆڕسکیل برینداربوون."
لای خۆیەوە، بڕوا بەهادین، پەیامنێری کوردسات نیوز رایگەیاند کە بریندارەکان، دایکێک و چوار منداڵ بوون، گەیەندراونەتە نەخۆشخانە و لە ئێستادا دۆخی تەندروستییان جێگیرە و لەژێر چارەسەردان.
لەتیف نێروەیی، لێپرسراوی بۆردی راگەیاندنی یەکێتیی نیشتمانیی کوردستان، لە وەڵامی کاردانەوەی هەندێک لە بەرپرسانی هەولێر بەرانبەر بە چالاکییەکانی قوباد تاڵەبانی رایگەیاند، هۆکاری سەرەکیی "شپرزەبوون و تەنگەتاوی"ـی ئەو بەرپرسانە، شێوازی بانگەشە سەرکەوتووەکەی قوباد تاڵەبانییە، نەک کردنەوەی پرۆژەیەکی خزمەتگوزاری.
لە لێدوانێکدا، لەتیف نێروەیی وتی: "شپرزەبوون و تەنگەتاوی چەند بەرپرسێکی حزبی و حکومی لە ئیدارەی پارێزگای هەولێر بەرامبەر بە هەڤاڵ قوباد تاڵەبانی پەیوەست نییە بە کردنەوەی پڕۆژەی رێگای فیدراڵی لە شاری کۆیە، بەڵکو پەیوەستە بەو شێوازە بانگەشە خاکی و مەیدانی و سەرنجڕاکێشەی کە بەشێوازێکی سەردەمیانە هەڤاڵ قوباد تاڵەبانی لە سنوری هەولێر بەڕێوەی دەبات."
هاوکات جەختیشی کردەوە کە ئەم جۆرە لە بانگەشەی راستەوخۆ و تێکەڵاوبوون لەگەڵ خەڵکدا "لەلایەن جەماوەری دەڤەرەکەوە پێشوازیی گەرمی لێدەکرێت".