ئاسۆ حەوێزی، وتەبێژی وەزارەتی تەندروستیی ھەرێمی کوردستان رایگەیاند، بەبۆنەی مانگی رەمەزانەوە، دەوامی رەسمی یەک سەعات کەمدەکەنەوە، بەجۆرێک ئەو شوێنانەی رۆژانی شەممە دەوامیان ھەیە، وەکو نەخۆشخانە و سەنتەر و بنکە تەندروستییەکان دەوامیان تاکو سەعات یەکی دوای نیوەڕۆ دەبێت، بەڵام دیوانی وەزارەت و بەڕێوەبەرایەتییە گشتییەکان و ئەو شوێنانەی رۆژانی شەممە دەوامیان نییە، تاکو سەعات دووی دوای نیوەڕۆ دەبێت و تەواوکەری دەوامەکانی ئێواران و شەوان بە شێوازی ئێشکگری بەردەوام دەبێت.

لەبارەی دەستپێکردنەوەی دەوامیش، ئاسۆ حەوێزی راشیگەیاند، رۆژی شەممە دەوامی رەسمیی لە سەرجەم نەخۆشخانە و سەنتەر و بنکە تەندروستییەکان و نۆڕینگە میللی و راوێژکارییەکان و خزمەتگوزارییە نیمچەتایبەتەکان دەستپێدەکاتەوە.

نەوزاد کامیل بەڕێوەبەری گشتی بازرگانی ھەرێم، لە وەزارەتی بازرگانی بە کوردسات نیوز راگەیاند، لەئێستادا دابەشکردنی بەشەخۆراکی ئاسایی مانگی سێ لەلایەن بریکارەکانی خۆراکەوە دەستیپێکردووە.

سەبارەت بەو ماددە خۆراکیانەی بۆ مانگی رەمەزان زیاد کراوە، نەوزاد کامیل ئاماژەی بۆ ئەوەکرد، لەئێستادا ئارد و مەعکەرۆنی گەیشتووە، بەڵام بۆ ئەوەی ھاووڵاتیان مافیان نەفەوتێت و چەند جارێک سەردانی بریکارەکان نەکەن، چاوەڕوان دەکەن ماددەکانی تریش لە بەغدادەوە بگاتە کۆگاکانی بازرگانی ھەرێم و دواتر بەسەر ھاووڵاتیادا دابەشبکرێت.

وەزارەتی بازرگانی عێراق بڕیاریداوە بۆ مانگی رەمەزان، چوار ماددەی خۆراکی زیاد بکات کە پێکھاتوون لە یەک تەبەق ھێلکە و پێنج کیلۆ ئاردی سفر و نیوکیلۆ نیشاستە و یەک کیلۆ مەعکەرۆنی.

نەقیب ئامانج، بەرپرسی تیمی غەواسی خەبات بە کوردسات نیوزی راگەیاند، سەعات ٣ی دوای نیوەرۆ، دوای ئاگادارکردنەوەمان لە بونی روداوێکی خنکان، تیمەکانمان گەیشتنە شوێنەکە.

قوربانییەکە کچێکی تەمەن ٨ ساڵانە بەناوی سۆنیا ئەمجەد عارەب، لەکاتی کارکردنی لەگەڵ باوکی لە کێڵگەکەیان لە گوندی وەردەکی سنوری دەشتی نەینەوا، لەگەڵ خوشکێکی بچوکتری دەکەونە ناو ئاوی زێی گەورە و خوشکە بچوکەکەی رزگار دەکرێت و خۆشی دەخنکێت.

بە وتەی نەقیب ئامانج، بەرپرسی تیمی غەواسی خەبات، تائیستا تەرمی کچە هەشت ساڵانەکە نەدۆزراوەتەوە و گەران بەردەوامە بەشوێنیدا.

دەقی روونکردنەوەکە:

لەسەر ئەو چەواشەکاریانەی تایبەت بە پرسی ٤٠٠ ملیار دینارەکە لە چەند سایت و پەیج و دەزگایەکی ڕاگەیاندن بڵاوبۆتەوە بەپێویستمان زانی ئەم ڕونکردنەوەیە بۆ ڕای گشتی بخەینەڕوو. 

١- بڕی ئەو ٤٠٠ ملیار دینارە لەلایەن ئەنجومەنی وەزیرانی عێراقەوە بۆ مانگی تشرینی دووەم و کانونی یەکەمی ساڵی ٢٠٢٢ بڕیاری لەسەر درابوو، بەڵام بەچەند ھۆکارێک دواخراو لە سەرەتای ئەم مانگە خرایە سەر ھەژماری بانکی وەزارەتی دارایی و ئابوری ھەرێمی کوردستان.   

 ٢- بەڕێز وەزیری دارایی و ئابووری حکومەتی ھەرێم ڕۆژی ١٤ ئازار لە لێدوانێکی ڕۆژنامەوانیدا ڕایگەیاندبوو ٤٠٠ ملیار دینارەکە تەنھا بۆ مووچە ھاتووەو بۆ ھیچ بابەتێکی تر خەرج ناکرێت و موچەی مانگی ئازاریش بەبێ کێشە دابەش دەکرێت.    

٣- جەخت دەکەینەوە ئەو ڕێژەیەی مانگانە لەوەزارەتی دارایی و ئابووری ھەرێم بۆ سلێمانی خەرج کراوەو خەرج دەکرێت ھیچ گۆڕانکاریەکی بەسەردا نەھاتووە.   

٤- بەھۆی دابەزینی داھاتی نەوتەوە کە بۆ مووچەی مانگی شوبات تەنھا ٣٤٠ ملیار دینار لە وەزارەتی سامانە سروشتیەکانەوە خراوەتە سەر حسابی وەزارەتی دارایی و ئابوری لە گەڵ ٤٠٠ ملیار دینارەکەی بەغداد بۆ مووچەی مانگی شوبات تەرخان کراوەو ئەو کورتھێنانەشی دروست بووە لە داھاتی ناوخۆ پڕ دەکرێتەوە، ھەروەکوو چۆن پێشتر کراوە.

رۆژی ٢١ی ئاداری ٢٠٢٣ وەزارەتی دەرەوەی ئەمریکا ڕاپۆرتی ساڵانەی سەبارەت بە ڕەوشی مافی مرۆڤ لە ساڵی ٢٠٢٢ بڵاوکردەوە و ڕاپۆرتەکە لەچەند بەشێکیدا باس لە بارودۆخی مافی مرۆڤ لە ھەرێمی کوردستان دەکات و تیایدا رەخنە لە حکومەت و دەسەڵاتدارانی ھەرێم دەگرێت.

نووسینگەی ڕێکخەری ڕاسپاردە نێودەوڵەتییەکان لە راگەیەندراوێکدا ئاماژە بۆ ئەوەدەکات، لە ھەرێم ئەوپەڕی ئازادی بیروڕا و ئازادی راگەیاندن ھەیە، بەڵام راپۆرتی ئەمریکا پشت بەچەند سەرچاوەیەکی نافەرمی و دەزگای میدیایی دەبەستێت کە ھەڵوێستەکانیان سیاسین. 

سەبارەت بە کەیسی زیندانیکردنی رۆژنامەنووسان و چالاکوانانی بادینانیش دەڵێت، ئەو کەیسانە پەیوەندییان بە تێکدانی سەقامگیری و ئاسایشی ھەرێمی کوردستان ھەبووە.

راشیگەیاندووە، زانیارییان پێشکەش بە کونسوڵگەری ئەمریکا لە ھەولێر کردووە، بەڵام دیارە بەمەبەست ئاماژەیان پێنەکراوە و وەکو پێویست پشتیان بە زانیارییەکانی حکومەتی ھەرێم نەبەستووە. 

میدیاکانی رۆژھەڵاتی کوردستان بڵاویانکردەوە، لە شاری بانەی سەربە پارێزگای سنە، ھاووڵاتییەک بەناوی بێھزاد عەزیزی تەمەن ١٩ ساڵ و خەڵکی گوندی دەرگا شێخان لەکاتی گەڕانەوەی لە سنوری کێلێ، لە خاڵی پشکنینی کەریماوا لەلایەن ھێزەکانی سوپای پاسدارانە تەقەی لێکراوە و بە سەختی برینداربووە، دوای گەیاندنی بۆ نەخۆشخانەی سەڵاحەدینی بانە، بەھۆی سەختی برینەکەی گیانی لەدەستداوە.

رووداوەکەش ناڕەزایی خەڵکی شارەکەی لێکەوتووەتەوە و چەند کەسێک ھێرشیان کردووەتەسەر بازگای کەریماوا و بازگەکەیان سوتاندووە.

دەستەی کەشناسی ھەرێم پێشبینیکردووە، کەشوھەوا بۆ رۆژی ھەینی ھەوربێت و پلەکانی گەرما کەمێک روو لە بەرزبوونەوە دەکەن، بۆ رۆژی شەممەش کەشوھەوا ھەور و نمەباران دەبێت و لە ھەندێک کات ھەورە بروسکە روودەدات. 

بۆ رۆژی یەکشەممەش، شەپۆلی بارانبارین دەستپێدەکاتەوە و لەچەند کاتێکدا بەخوڕ باران دەبارێت و پلەکانی گەرماش دادەبەزن، باران بارینەکە رۆژانی دووشەممە و سێشەممەش بەردەوامیان دەبێت و پلەکانی گەرما زیاتر دابەزین تۆمار دەکەن.

پەیامنێری کوردسات نیوز لە ئامەد رایگەیاند، لە ناوچەی لجێ مێردمنداڵێکی تەمەن ١٤ ساڵ لەکاتی گەڕانەوەی بۆ ماڵەوە کە لەگەڵ ھاوڕێیەکی بووە، لەلایەن پۆلیسی تورکیاوە وەستێندراوە و دواتر رفێندراوە و ئەشکەنجە دراوە.

رەمەزان قەرەئاپ پارێزەری خانەوادەی منداڵەکە و ئەندامی سەندیکای پارێزەرانی ئامەدیش رایگەیاند، بە چوار پۆلیس ھێرشیانکردووەتەسەر مێردمنداڵەکە و پێیانوتووە دەبێت رقت لە کورد بێت و بڵێی ئەوان خۆشبەختن کە تورکن، بەڵام ئەو مێردمنداڵە ترساوە و ھیچی نەوتووە، ئەوەش پۆلیسەکانی توڕەکردووە و لێیانداوە و بێھۆش بووە، دواتر گوندنشێک مێردمنداڵەکەی بەفڕێدراوی و دەستوپێی بەستراوەوە دۆزیتەوە و بردوویەتی بۆ نەخۆشخانە.

ئاشکراشیکرد، مێردمنداڵەکە بەھۆی ئەشکەنجەدان و لێدانی توند، چاوی ڕاستی کوێر بووە و نیشانەیەکی زۆری لێدانیش لەسەر جەستەی ھەیە، سەندیکای پارێزەرانی ئامەدیش سکاڵای لە دژی پۆلیس تۆمارکردووە و داوایان لە داواکاری گشتی کردووە کە دۆسیەکەیان لەسەر پۆلیس بکەنەوە.

ڕاگەیاندنی بەڕێوەبەرایەتی ھاتوچۆی سلێمانی ئاماری ڕووداوەکانی ھاتووچۆی لە ماوەی سێ ڕۆژی نەورۆزدا لە سنووری بەڕێوەبەرایەتی ھاتوچۆی سلێمانی بڵاوکردەوە، بەپێی ئامارەکە لە ناو و دەرەوەی شار پێنج رووداوی ھاتووچۆ تۆمار کراوە، ٢٤ ھاووڵاتیش برینداربوون، ھیچ حاڵەتێکی گیانلەدەستدان تۆمارنەکراوە.

ئاماژەی بۆ ئەوەشکردووە، ھۆکاری ڕووداوەکان بە پێی کەشف و ھێڵکاری دەگەرێتەو بۆ رەوشی کەش و ھەوای باراناوی خلیسکان و خزینی سەر شەقام، ھەروەھا ھۆکار خێرایی زۆر و پابەند نەبوونی شۆفێران بە یاسا و رێنماییەکانی ھاتوچۆ.

دەقی پەیامەکەی جێگری سەرۆکی هەرێمی کوردستان:

بەبۆنەی هاتنەوەی مانگی ڕەمەزانی پیرۆز، گەرمترین پیرۆزبایی ئاراستەی موسڵمانانی کوردستان و عێراق و جیهان بە گشتیی دەکەم.

مانگی ڕەمەزانی پیرۆز، مانگی ئاشتبوونەوە و پاککردنەوەی ڕۆح و دڵ و دەروونی مرۆڤەکانە، هیوادارم ئەو گیانی تەبایی و لێبوردەییەی کە لە نێوان گشت پێکهاتە ئاینی و نەتەوە جیاجیاکانی هەرێمی کوردستان هەیە، ببێتە مایەی خێر و خۆشی و ئاشتیی و ئاوەدانی زیاتر لە پێناو بەرەو پێشچوونی سەقامگیری و ئارامی بۆ ناوچەکەمان.

لە یەزدان داواکارم نوێژ و ڕۆژوو و تاعەتی هەموو لایەکمان قبوڵ بکات و ئەم مانگە پیرۆزەمان بۆ بکات بە مایەی خێر و خۆشی.

شێخ جەعفەر شێخ مستەفا، جێگری سەرۆکی هەرێمی کوردستان

وەزارەتی تەندروستی ھەرێم نوسراوێکی بە ناوی"پەلەکردن یان دواخستنی پرۆسەی منداڵبوون"ئاڕاستەی بەڕێوەبەرایەتییە گشتییەکانی تەندروستی لە پارێزگا و ئیدارە سەربەخۆکان کردووە، لە نوسراوەکەدا ھاتووە، دوای تێبینیکردنی دیاردەی پەلەکردن یان دواخستن لە وادەی دیارکراوی زانستی و کلینیکی بۆ منداڵبوون تەنیا بۆ تۆمارکردنی ئەو ژمارە و رێکەوتانە وەکو ساڵیادی لەدایکبوون بۆ منداڵەکانیان بڕیارماندا ھەر نەخۆشخانە و پزیشکێک ئەو کارە بکان و ھەر گرفتێکی لێبکەوێتەوە نەخۆشخانەکە یاخود پزیشکەکە رووبەڕووی یاسا دەکەنەوە.

لە بەشێکی تری نوسراوەکەدا وەزارەتی تەندروستی دەڵێت، لە پێناو بەرژەوەندی و سەلامەتی دایکان و منداڵانی تازە لەدایکبوو، ئاگاداری ھەموو نەخۆشخانەکانی کەرتی گشتی و تایبەت و پزیشکان دەکەینەوە، پێویستە منداڵبوون تەنیا بەبوونی بەڵگەی پزیشکی و کلینیکی ئەنجام بدرێت بە پێچەوانەوە پزیشکی بەرپرس و نەخۆشخانە رووبەڕووی رێکاری یاسایی دەبنەوە.

بەپێی زانیارییەکان منداڵان بۆ زیندانی نەوجەوانانی ئامەد و ھاووڵاتیانیش بۆ بەڕێوەبەرایەتی پۆلیسی فارقین گواستراونەتەوە.

ئەوەش لە کاتێکدا بووە، دوای ئاھەنگەکە گرژی و ئاڵۆزی لەنێوان پۆلیس و ھاووڵاتیاندا دروستبووە، ھاوکات لە دەروازەکانی چوونە ژوورەوە بۆ گۆڕەپانی نەورۆز و بەشداریکردن لە ئاھەنگەکە رێگە بە ھاووڵاتیان نەدەدرا، بە سەرپۆشی سور و سەوز و زەردەوە بچنە ژوورەوە.

دەقی راگەیەندراوەکەی مەكتەبی سیاسیی یەكێتی:

بەبۆنەی هاتنەوەی مانگی پیرۆزی رەمەزان، گەرمترین پیرۆزبایی ئاراستەی هەموو موسلمانانی كوردستان و عیراق و جیهان دەكەین ، ئومێدەوارین مانگی رەمەزانی پیرۆز، مانگی خێرو خۆشی و قووڵبوونەوەی گیانی لێبوردەیی و ئاشتی كۆمەڵایەتی بێت بۆ گەلەكەمان.

لەیەزدانی مەزن داواكارین، لەم مانگە پیرۆزەدا، گەلەكەمان  بەدوور بێت لە هەموو كێشە و نەهامەتیەك و بە تەندروستی باش رۆژوو و ئەركە ئاینیەكانیان جێبەجێبكەن.، هەروەك هێز و لایەنە سیاسیەكان ئەم مانگە پیرۆزە بكەنە دەرفەت بۆ ئاشتەوایی گشتی و بەرژەوەندییە باڵاكانی میللەتەكەمان بخەنە پێش بەرژەوەندییە تایبەتیەكانیان.

مەكتەبی سیاسی 
یەكێتیی نیشتمانیی كوردستان

سەچاوەیەک لە پۆلیسی ناحیەی پردێ بە کوردسات نیوزی راگەیاند، ھێزێکی حەشدی شەعبی لەنێو بازاڕی قەزای پردێ پێنج پێشمەرگە دەستگیر کرد، کە بە جلوبەرگی سەربازییەوە بەنێو ناحیەکەدا سوڕاونەتەوە دوای وەرگرتنی وتە لێیان لە بنکەی پۆلیسی پردێ پێشمەرگەکان ئازادکراون.

ئەو سەرچاوەیە ئاشکراشیکرد، دواتر ھێزی بەرەنگاربوونەوەی تیرۆر جارێکی تر دەستگیریان کردووەتەوە، بەبیانوەی ئەوەی ساڵانەی ئۆتۆمبێلەکەیان بەناوی خۆیانەوە نییە.

ئاماژەی بەوەشکردووە، دواترلەلایەن فەوجێکی سوپای عێراقییەوە دەستبەرکراون و بۆ بارەگای فەوجی سێی سوپای عێراق لە پردێ بردراون.

سامان سیوەیلی وتەبێژی وەزارەتی پەروەردەی حکومەتی ھەرێمی کوردستان رایگەیاند، دەوامی مامۆستایان لە ناوەندەکانی خوێندنی پەروەردە، لە مانگی رەمەزانی پیرۆزدا، ھەر وانەیەک پێنج خولەک کەمدەکرێتەوە و ھەروەھا مامۆستایان بۆیان ھەیە تەنھا ئەو کاتانە لە قوتابخانە بن وانەیان ھەیە، ئەوکاتانەی وانەیان نییە بوونیان لە قوتابخانە ناچاری نابێت.

ئاماژەی بەوەشکردووە، خشتەی وانەکانی ھەفتەی خوێندن نابێت ھیچ گۆرانکارییەکی تێدا بکرێت لەلایەن دەستەی کارگێڕی ناوەندەکانی خوێندنەوە.

پۆلیسی بنکەی ڕەحیم ئاوا لە کەرکوک بە کوردسات نیوزی راگەیاند، دوای نیوەڕۆی ئەمڕۆ لە گەڕەکی شۆراوی شاری کەرکوک روداوێکی تەقەکردن لەنێوان دوو ھاوڕێی یەکتر روویدا و بەھۆیەوە یەکێکیان برندار بووە.

بەوتەی پۆلیس، ئەو دوو ھاوڕێیە پێشتر کێشەیان لەگەڵ یەکتر، ھەبووە چەند رۆژێکە ئاشتەوایی نیوانیان کراوە، بەڵام یەکێک لەوانە دەستڕێژی گولـلەی لە گەنجەکەی تر کردووە وبریندار بووە.