کۆمیتەی بەڕێوەبەری پەکەکە پەیوەست بە نەورۆزی 2025 ڕاگەیەنراوێکی بڵاو کردەوە و رایگەیاند، نەورۆزی ئەمساڵ بکرێتە نەورۆزی ئازادیی جەستەیی ئۆجالان و ئاماژەی بەوەد، لە پاش ئاگر بەست تورکیا 4175جار هێرشی کردووەتە سەر.

کۆمیتەی بەڕێوەبەری پارتی كرێكارانی كوردستان (پەکەکە) لە راگەیاندراوێکی تایبەت بە نەورۆزی ساڵی 2025 رایگەیاند کە ئاگربەستی تاکلایەنەیان راگەیاندووە بە مەبەستی دەستپێکردنی پڕۆسەی ئاشتی بەپێی مەرجەکانی بانگەوازەکەی عەبدوڵڵا ئۆجەلان، بەڵام تاکو ئێستا هیچ هەنگاوێکی کردەیی لە پەرلەمانی تورکیا نەبینراوە.

لە راگەیاندراوەکەیاندا، پەکەکە ئاماژەی بەوە کردووە کە لە ماوەی دوو هەفتەی ئاگربەستی تاکلایەنەدا، سوپای تورکیا بەراورد بە ماوەکانی پێشوو هێرشەکانی کەم کردووەتەوە، بەڵام بەگشتی 73 هێرشی ئاسمانی و 4175 هێرشی موشەکی ئەنجام داوە. هەروەها هەشت جار چەکی قەدەغەکراوی بەکارهێناوە، جگە لەوەی فڕۆکەی سیخوڕی بۆمبڕێژکراو هەموو رۆژێک بەسەر ناوچەکەدا دەفڕن.

راگەیاندراوەکە جەختی کردووەتەوە کە "ناتوانرێت هەنگاوی کردەیی لەو جۆرە بگیرێتەبەر بۆ وەستاندنی شەڕ بەشێوەیەکی تاکلایەنە، بۆیە دەبێت هەنگاوی کردەیی بنرێت و هەموو چەکەکان بێدەنگ بکرێن."

لە بەشێکی دیکەی راگەیاندراوەکەدا، کۆمیتەی بەڕێوەبەری پەکەکە راشیگەیاندووە کە خۆشحاڵن لەوەی بانگەوازەکەی عەبدوڵڵا ئۆجەلان و بەیاننامەکەیان لەسەر ئاستی ناوخۆ و نێودەوڵەتیدا بە شێوەیەکی ئەرێنی پێشوازی لێکراوە، بەڵام جەختیان کردووەتەوە کە "کات زۆر گرنگە و بۆ سەرکەوتن دەبێت کات بە باشی بەکاربهێنرێت و پێکەوە هەنگاو بنێن."

هەروەها پەکەکە ئاشکرای کردووە کە لەدوای 27ـی شوباتەوە دیدار لەگەڵ عەبدوڵڵا ئۆجەلان نەکراوە و نازانن ئایا گۆڕانکاری لە مەرجەکانی ئیمراڵی کراوە یان هەمان مەرجەکانی پێشوویە. هەرچەندە رۆژنامەنووسان باس لە کۆبوونەوە و گفتوگۆ دەکەن، بەڵام هیچ هەنگاوێکی کردەیی لەلایەن پەرلەمانەوە نەبینراوە.

لە کۆتاییدا، کۆمیتەی بەڕێوەبەری پارتی كرێكارانی كوردستان بانگەوازی بۆ گەلی وڵاتپارێز و دۆستانی دیموکراسی، بەتایبەتی ژنان و گەنجان کردووە کە "لە هەموو شوێنێک مەیدانەکانی نەورۆز پڕ بکەنەوە و لە هەموو کاتێک زیاتر هاوار بۆ ئازادکردنی ئۆجەلان بکەن."

ئەوەشیان ئاماژە پێداوە، کە ئەم نەورۆزە بکرێتە نەورۆزی "ئازادی جەستەیی ئۆجەلان". 

نوێدەکرێتەوە

بەردی بناغەی پردی تەنگی سەید محەمەد لە پارێزگای هەڵەبجە دانرا و بڕیارە لە ماوەی 900 رۆژدا جێبەجێ بکرێت.

لە میانەی سەردانێکیدا بۆ پارێزگای هەڵەبجە، قوباد تاڵەبانی، جێگری سەرۆکوەزیران بە یاوەری دانا عەبدولکەریم، وەزیری ئاوەدانکردنەوە و نیشتەجێکردن بەردی بناغەی پردی تەنگی سەید محەمەدی دانا.

پردی تەنگی سەید محەمەد پڕۆژەیەکی ستراتیژییە لە ناوچەکەدا و پارێزگای هەڵەبجە و ئیدارەی گەرمیان پێکەوە دەبەستێتەوە. درێژی پردەکە 600 مەتر دەبێت و بە گوژمەی نزیکەی 27 ملیارد دینار لەماوەی 900 رۆژدا جێبەجێ دەکرێت.

هەر لە سەردانەکەیدا بۆ پارێزگای هەڵەبجە، قوباد تاڵەبانی پڕۆژەی سایلۆی هەڵەبجەی بەسەر کردەوە و بە دواداچوونی کرد بۆ چۆنییەتی بەرەوپێشچوونی کارەکانی پڕۆژەکە. سایلۆی هەڵەبجەش لە پرۆژە ستراتیژییەکانی پارێزگاکەیە و لە ساڵی 2024دا بەردی بناغەکەی دانراوە و لە ماوەی دوو ساڵدا تەواو دەکرێت.

سبەینێ ساڵیادی کیمیابارانکردنی هەڵەبجەیە، حکومەتی عیراق پێشتر لە پەرلەمان ئەو رۆژەی کردە پشوو، بەڵام فەرمانگەی میدیا و زانیاری حکومەتی هەرێم رایگەیاندووە کە سبەینێ پشوو نییە و گۆڕانکاری لە بۆنە و یاد و پشووەكاندا ناکرێت و هەر وەك خۆی دەمێنێتەوە.

روونكردنەوەیەك لە فەرمانگەی میدیا و زانیارییەوە

حكومەتی هەرێمی كوردستان بۆنە و یاد و ڕۆژانی پشووە فەرمییەكانی لە ساڵنامەی فەرمیی حكومەتدا دیاری كردووە، لە ئێستادا بۆنە و یاد و پشووەكان هەر وەك خۆی دەمێنێتەوە، هیچ گۆڕانكارییەكیش لەو ساڵنامەیەدا ناكرێت تا پەرلەمانی كوردستان بەپێی دەسەڵاتەکانی خۆی پێداچوونەوەی بۆ دەكات و بڕیاری نوێی بۆ دەر دەكات.

لە سەعات یەکی دوانیوەڕۆی ئەمڕۆوە بۆ ماوەی سێ رۆژ کارەبای نیشتیمانی 24 سەعاتی بە بەشێک لە گەڕەکەکانی سلێمانی دەدرێت.

غالب محەمەد بەڕێوەبەری کۆنتڕۆڵ و گەیاندنی کارەبای سلێمانی بە کوردسات نیوزی راگەیاند: ئەم پرۆسەیە گرنگە بۆ دیاریکردنی خاڵە لاوازەکانی  تۆڕی کارەبای نیشتیمانی و لە ئەمڕۆوە بە سێ قۆناغ دەچێتە بواری جێبەجێکردنەوە.

وتیشی: ئەمڕۆ لە سەعات یەکی دوانیوەڕۆوە وەک قۆناغی یەکەم لەچەند گەڕەکێکی شاری سلێمانی و بۆ ماوەی 72 سەعات دەستپێدەکات، قۆناغەکانی دووەم و سێیەم لەماوەکانی داهاتوودا دەچێتە بواری جێبەجێکردنەوە، کە دەرەوەی شاریش دەگرێتەوە.

غالب محەمەد ئاماژەی بەوەشکرد، ئەم پرۆسەیە تەنها بۆ دیاریکردنی خاڵە لاوازەکانی سەر تۆڕی کارەبای نیشتیمانییە.

سەبارەت بە پێدانی سەعاتەکانی کارەبای نیشتیمانی بە هاووڵاتیان بەڕێوەبەری کۆنتڕۆڵ و کارەبای سلێمانی راشیگەیاند، 10 رۆژ پێش ئێستا پێدانی کارەبا بەهاووڵاتیان لەئاستی پێویستدا نەبوو، بەڵام ماوەی سێ رۆژە نزیکەی 16 سەعات کارەبای نیشتیمانی بۆ هاووڵاتیان دابیندەکرێت.

وەزارەتی کارەبای حکومەتی هەرێمی کوردستان رایدەگەیەنێت کە لە سنووری پارێزگای سلێمانی و بە دیاریکراوی لە سەنتەری شاری سلێمانی هەڵدەستێت بەئەنجامدانی تاقیکردنەوەی فشاری سەر تۆڕی کارەبای نیشتمانی. 

لە راگەیەندراوەکەی وەزارەتی کارەبادا ئاماژە بە کات و ماوەی تاقیکردنەوەکە کراوە بەمجۆرە:

- ڕۆژی دەستپێکردن: شەممە 15/3/2025
- کاتژمێری دەستپێکردن: 10ـی بەیانی
- ڕۆژی کۆتایی: سێشەممە 18/3/2025
- تێبینی: لەم نێوەدا کارەبای نیشتیمانی بەردەوام کارا دەبێت

ئامانجی تاقیکردنەوەکە:

ئەم تاقیکردنەوەیە ڕێکارێکی ڕۆتینیە کە لەلایەن وەزارەتی کارەباوە ئەنجام دەدرێت بە مەبەستی:
- دۆزینەوە و دیاریکردنی کێشەکانی تۆڕی کارەبا
- دیاریکردنی خاڵە لاوازەکانی سەر تۆڕەکانی گواستنەوە
- چاککردنی سیستەمی دابەشکردنی کارەبا

لە راگەیەندراوەکەشدا هاتووە، جێگەی ئاماژەیە ئەم تاقیکردنەوەیە هەموو گەڕەکەکانی ناوشار ناگرێتەوە و سنوردارە لە چەند شوێنێکی دەست نیشانکراو. هاوکات وەزارەتی کارەبا هاوڵاتیان پێشوەختە ئاگادار دەکاتەوە لە ئەگەری پچڕانی نەخوازراوی کارەبا لەکاتی ئەنجامدانی تاقیکردنەوەکە.

ئەمڕۆ هەینی، سەعدی ئەحمەد پیرە، ئەندامی مەکتەبی سیاسی و وتەبێژی یەکێتی نیشتیمانی کوردستان، سەردانی پرسەی خوالێخۆشبوو دکتۆر عبدالعزیز سلیمان سفو کرد، کە برای قەواڵ بەهزاد، ئەندامی ئەنجومەنی روحانی ئێزیدییە.

لە میانەی سەردانەکەدا، کە بە هاوڕێیەتی ئاراس محەمەد ئاغا، ئەندامی سەرکردایەتی و لێپرسراوی مەڵبەندی نەینەوای یەکێتی نیشتیمانی کوردستان، هەروەها ئەندامانی ئەنجومەنی پارێزگای نەینەوا لە فراکسیۆنی یەکێتی نیشتیمانی کوردستان ئەنجام درا، سەعدی ئەحمەد پیرە پرسە و سەرەخۆشی خۆی ئاراستەی کەس و کاری خوالێخۆشبوو کرد و هیوای ئارامی و سەبوری بۆ خواستن.

هاوسەرۆكی كۆنسەی بەڕێوەبەریی كەجەكە دەڵێت، پێویستە هەلومەرجی كۆنگرە بڕەخسێت و تا بەستنی كۆنگرەش پەكەكە چەك دانانێت.

بەگوێرەی هەواڵێكی ئاژانسی مێزۆپۆتامیا، جەمیل بایك هاوسەرۆكی كۆنسەی بەڕێوەبەریی كۆما جڤاكێن كوردستان (كەجەكە) رایگەیاند، لە پرۆسەیەكی هەستیاردان و ئەگەر هێرشەكانی توركیا بەو شێوەیەی ئێستا بەردەوام بێت، چۆن دەكرێت باس لە بەستنی كۆنگرەی پەكەكە بۆ چەك دانان بكرێت، بۆیە پێویستە دەستبەجێ توركیاش هاوشێوەی پەكەكە ئاگربەست رابگەیەنێت.

وتیشی، توركیا بەهۆی گۆڕانكارییەكانی رۆژهەڵاتی ناوەڕاستەوە ناچار بووە دەست بە پڕۆسەیەكی نوێ لەگەڵ كورد بكات.

وتیشی، ئۆجەلان لە ساڵی 1993ەوە كار بۆ چارەسەری پرسی كورد بە رێگەی ئاشتی و بونیادنانی كۆمەڵگەیەكی دیموكراتی دەكات و پەكەكە گرنگی بە پەیامەكەی ئۆجەلان داوە و پابەندی ئاگربەستە و رۆڵی خۆیان بینیوە.

خوێندنی باڵای هەرێم زەماڵەی خوێندنی ماستەر و دکتۆرای لە کۆریای باشوور راگەیاند و ئاماژەی بەوەکردووە، 25ی ئەم مانگە کۆتا وادەی پێشکەشکردنە و تاوەکو 19ی ئەم مانگەش دەبێت پێشکەشکار سەرجەم مامەڵەکانی تەواو کردبێت.

خوێندنی باڵای هەرێم رایگەیاند، چەند دەرفەتێکی خوێندن لە کۆریای باشوور بۆ فەرمانبەران و مامۆستایانی سەر بە وەزارەتی خوێندنی باڵا بەردەستە، کە ماستەر لە بوارەکانی (سیاسەتى گشتى، سیاسەتى پەرپێدان، بەرێوەبردنى گشتى، خاوەندارێتی فکری، زانستی داتا بۆ سیاسەتی گشتی و بەرێوەبردن، سیاسەتی گشتی و بەرێوەبردن) و دکتۆرا لە بوارەکانی (سیاسەتی گشتی، سیاسەتی پەرەپێدان، سیاسەتی گشتی و پەرەپێدان).

مەرج و رێنماییەکان:

ماستەر:

- پێشکەشکار دەبێت فەرمانبەر یا مامۆستا بێت لە دامودەزگاکانی حکومەتی هەرێمی کوردستان.

- پێشکەشکار دەبێت بە لایەنی کەم دوو ساڵ خزمەتی هەبێت لە پاش بەدەستهێنانی دوایین بڕوانامە.

- پێشکەشکار دەبێت کۆنمرەی بەکالۆریۆسی لە (٦٥) کەمتر نەبێت.

- داواکار دەبێت لە هەمان بواری خۆی داواکاری بۆ بەرنامەی ماستەر پێشکەش بکات. (واتا بەکالۆریۆس و ماستەرەکەی لە هەمان بوار بێت).

- کاندیدی سەرکەوتو لەلایەن وەزارەتەکەمان تەنها مۆڵەتی خوێندنی پێدەدرێت واتا بە موچەی بنەڕەتی و دەرماڵە جێگیرەکان.

- کاندیدی سەرکەوتوو لەلایەن وڵاتی کۆریاى باشور پشتگیری دارایی دەکرێت، بۆ وردەکاری زیاتر تکایە سەردانی مالپەری زەمالەکە بکەن.

دکتۆرا:

-پێشکەشکار دەبێت هاوڵاتی هەرێمی کوردستان بێت.

-پێشکەشکار ئەگەر فەرمانبەر یان مامۆستا بێت لە دامودەزگاکانی هەرێمی کوردستان، ئەوا دەبێت بە لایەنی کەم دوو ساڵ خزمەتی هەبێت لە پاش بە دەستهێنانی دوایین بڕوانامە.

-دەبێت کۆ نمرەی ماستەری لە (٧٠) کەمتر نەبێت.

-داواکار دەبێت لە هەمان بواری خۆی داواکاری بۆ بەرنامەی دکتۆرا پێشکەش بکات. (واتا ماستەر و دکتۆراکەی لە هەمان بوار بێت).

-کاندیدی سەرکەوتوو ئەگەر دامەزراو بێت، ئەوا لە لایەن وەزارەتەکەمان تەنها مۆڵەتی خوێندنی پێدەدرێت واتا بە موچەی بنەڕەتی و دەرماڵە جێگیرەکان.

-کاندیدی سەرکەوتوو لە لایەن وڵاتی کۆریا پشتگیری دارایی دەکرێت، بۆ وردەکاری زیاتر تکایە سەردانی ماڵپەڕی زەمالەکە بکەن.

ئەوەش هاتووە، هەرکەسێک مەرج و رێنماییەکانى تیایدا بەرجەستە نەبێت، مۆڵەتی خوێندنی پێنادرێت. هەروەها پێشکەشکردن و مەرجی زمان لە زانکۆیەک بۆ زانکۆیەکی دیکە یان لە بەرنامەیەک بۆ بەرنامەکەی تر جیاوازە، پێویستە پێشکەشكار بەر لە پێشکەشکردن بە وردی سەرنجی مەرج و رێنماییەکان بدات.

داواش دەکات، پێشکەشکاران دوای وەرگرتن، بە مەبەستی کردنەوەی فایل سەردانی ئەم لینکە بکەن:

 https://scholarship.digital.gov.krd/#/login

خوێندنی باڵا راشیگەیاندووە، بۆ ئەو کەسانەی داواکاری پێشکەش دەکەن، دوای پێشکەشکردنی داواکارییەکەیان لە رێگەی ئۆنلاینەوە، دەبێت تاوەکو کۆتایی دەوامى رۆژی 19ی ئەم مانگە، ئەم زانیاریانەى خوارەوە بنێرن بۆ ئەم ئی مەیڵە ([email protected]) و لێی بنووسن لە بابەتی ئیمێلەکە بنووسن زەمالەی کۆریای باشوور یان (South Korea Scholarship).

زانیارییەکان ئەمانەن:

نووسراوی لاری نەبوونی فەرمانگەکەی.

- ناوی تەواو وەک ئەوەی کە لە پاسپۆرت نووسراوە.

- شوێنی کار.

- پێگەی لە شوێنی کار.

- بەرنامەی پێشکەش کراو، واتا ماستەر لە بواری....

- ئیمێل

- تەلەفۆن

کلیک لێرە بکە بۆ پێشکەشکردنی داواکاری زەمالەی خوێندن لە کۆریای باشوور

کەشناسیی هەرێم پێشبینییەکانی کەشوهەوای ئەمڕۆ و سبەی بڵاوکردەوە و دەڵێت، پلەکانی گەرما بەجۆرێک بەرزدەبنەوە، نزیک دەبنەوە لە 30 پلەی سیلیزی و لە هەندێک شوێنیش دەگەنە زیاتر لەو پلەیە.

کەشناسیی هەرێم رایگەیاند، ئەمڕۆ هەینی، ئاسمان ساماڵ دەبێت و پلەکانی گەرما نزیکەی 1 بۆ 2 پلەی سیلیزی بەرزدەبنەوە، کەمێکیش خێرایی با زیاد دەکات و لەنێوان 10 بۆ 20 کیلۆمەتر لە سەعاتێکدا دەبێت.

ئەوەشی خستووەتە روو، سبەینێ شەممە، بەهەمان شێوە ئاسمان ساماڵ دەبێت، پلەکانی گەرما 1 بۆ 2 پلەی دیکە بەرزتر دەبنەوە و خێرایی با وەک خۆی دەمێنێتەوە.

بەرزترین پلەکانی گەرمای پێشبینیکراو بە پلەی سیلیزی:

هەولێر: 29  پلەی سیلیزی

سلێمانی: 27 پلەی سیلیزی

دهۆک: 28  پلەی سیلیزی

کەرکوک: 31 پلەی سیلیزی 

زاخۆ: 29 پلەی سیلیزی

هەڵەبجە: 23 پلەی سیلیزی

سۆران: 27 پلەی سیلیزی

حاجی ئۆمەران: 16 پلەی سیلیزی

گەرمیان: 31 پلەی سیلیزی

دوای ئەوەی شەوی رابردوو لە روداوێکی تەقەکردندا پزیشکێک هاوسەر و سێ ئەندامی بنەماڵەی هاوسەرەکەی کوشت، ئاسایشی هەولێر دەستگیرکردنی پزیشکەکەی راگەیاند و دەڵێت، رووداوەکە بەهۆی کێشەی کۆمەڵایەتییەوە بووە.

ئاسایشی هەولێر رایگەیاند، تۆمەتبار 'س. م. ع' کە پیشەی پزیشکە، بەهۆی کێشەی کۆمەڵایەتییەوە بە چەکی جۆری دەمانچە هاوسەرەکەی و خەسوو و خەزور و خوشکێکی هاوسەری کوشتووە.

روداوەکە لە گەڕەکی کەرتی 5ی فەرمانبەران رویدا، دوای روداوەکە و گەیاندنی تەرمەکان بە پزیشکی داد و ئەنجامدانی توێکاری، بەیانی ئەمڕۆ تەرمی ئەو چوار کەسە لە گۆڕستانی کەسنەزان لە هەولێر بەخاک سپێردران.

بەپێی زانیارییەکان، ئەو پزیشکەی تاوانەکەی ئەنجامداوە یەکێک بووە لە پزیشکە بەناوبانگەکان و خاوەنی نەخۆشخانەیەکی تایبەتە لە هەولێر، هاوسەرەکەشی بە ناوی سانا کەمال بەهەمان شێوە پیشەی پزیشک بووە و پسپۆڕی نەخۆشییەکانی ژنان و منداڵبوون بووە.

جگە لەوە خوشکی هاوسەرەکەشی بەناوی سەناریا کەمال، بەهەمان شێوە پیشەی پزیشک بووە و پسپۆڕییەکەی تیشک و سۆنار بووە.

پەیامنێری کوردسات نیوز ئەوەی خستە روو، بەپێی وتەی کەسوکاریان ئەو دوو هاوسەرە ماوەی زیاتر لە ساڵێکە ئەو کێشەیەیان هەیە و خاوەنی چوار منداڵ بوون.

ئەوەشی خستە روو، بەپێی زانیارییەکان، دەوترێت یەکێک لە منداڵەکانیان لە روداوەکەدا بریندار بووە و لەئێستادا چارەسەری پزیشکی بۆ دەکرێت.

كەسێك لە هەولێر تەقە لە ماڵی باوكی هاوسەرەكەی دەكات و جگە لە هاوسەرەكەی سێ كەسی دیكەی ئەو بنەماڵەیە دەكوژێت.

پەیامنێری كوردسات نیوز لە هەولێر رایگەیاند: شەوی پێنجشەممە پیاوێك تەقەی لە ماڵی باوكی هاوسەرەكەی كردوە و هاوسەر و دایك و باوك و خوشكی هاوسەرەكەی كوشتوە.

بە پێی زانیارییەكان ئەو كەسەكەی هێرشەكەی ئەنجام داوە پیشەی پزیشك بوە و بەهۆی كێشەی كۆمەڵایەتییەوە  بە چەك هێرشی كردوەتە سەر ماڵی خەزوری و جگە لە هاوسەرەكەی ، خەسو و خەزور و خوشكی هاوسەرەكەی كوشتوە.

پەیامنێری كوردسات نیوز ئاماژەی بەوە كردوە كە هاوسەری بكوژەكە پیشەی پزیشك بوە و بە تاپڕ تەقەی لەو بنەماڵەیە کردووە و سەرجەم تەرمەكان رەوانەی پزیشكی داد كراون.

وەزارەتی دارایی و ئابووری هەرێمی کوردستان لە رێگەی بەڕێوەبەرایەتی گشتی ژمێرکارییەوە راگەیەندراوێکی بڵاوکردەوە سەبارەت بە مووچەی مانگی شوباتی کەس و کاری شەهیدان و ئەنفالکراوان.

هەرچەندە بەپێی خشتەی پێشتر راگەیەنراو، وابڕیاربوو رۆژی یەکشەممە (16)ی ئازار مووچەی مانگی شوباتی کەس و کاری شەهیدان و ئەنفالکراوان دابەش بکرێت، بەڵام بەهۆی ئەوەوە کە ئەو رۆژە دەکەوێتە ساڵیادی کیمیابارانکردنی هەڵەبجەوە، وەزارەتی دارایی دەڵێت: "بۆ ئەو بەڕێزانەی لەو ڕۆژەدا بەهۆی بەشداریان لە یادی کیمیابارانی هەڵەبجە ناتوانن مووچەکانیان وەربگرن، ڕۆژانی دواتر دەتوانن سەردانی بانکەکان بکەن و مووچەکانیان وەربگرن".

شایەنی ئاژە پێدانە بەپێی خشتەی نوێی موچە کە وەزارەتی دارایی رایگەیاندووە، موچەی مانگی دووی کەس و کاری شەهیدان و ئەنفالکراوان دەکەوێتە ڕۆژی 16/3ەوە کە یادی کیمیا بارانی هەڵەبجەیەو ئەمەش ناڕەزایی کەسوکاری کیمیاباران و شەهیدانی لێکەوتەوە بەهۆی ئەوەی موچەی مانگی 2 لەمانگی سێداو لەو رۆژەشدا دابەشدەکرێت.

دابینکردنی کارەبای 24 سەعاتی ئەو پرۆژە و خەونەیە هاووڵاتیانی هەرێم دەمێکە چاوەڕوانی دەکەن، بەڵام ئێستا کە چووەتە بواری جێبەجێکردنەوە هاووڵاتیانی کردووە بە دوو بەشەوە و لەبری دڵخۆشی و پێشوازی، رەتی دەکەنەوە.

لە ساڵی 2024دا حکومەتی هەرێم بەردی بناغەی پرۆژەی رووناکی دانا، بەپێی دوایین ئاماری حکومەت زیاتر لە 100 هەزار هاوبەشی کارەبا لێی سودمەندن، بڕیاریشە تاوەکو کۆتایی ساڵی 2026 تەواوی هەرێم بگرێتەوە.

ئەوەی هاووڵاتیانی نیگەران کردووە لەم پرۆژەیەدا ئەوەیە، نرخی کارەبایە، کە هەر کیلۆواتێک بە 156 دینار دیاری کراوە.

ئەگەر ئەو نرخەی حکومەتی هەرێم دایناوە تەنها بۆ بۆیلەری ماڵان هەژمار بکرێت و گریمان ئەگەر ماڵێک رۆژانە بۆماوەی 5 سەعات بۆیلەرەکەیان دابگیرسێنن و بۆیلەرێکی 3000 واتی بێت، ئەوا دەکاتە 3 کیلۆوات، 3 کیلۆواتەکەش جاران بکرێتەوە لەگەڵ 5 سەعاتی رۆژەکەدا دەکاتە 15 کیلۆوات، ئەوەش جارانی نرخی هەر کیلۆواتێک بکرێتەوە کە 156 دینارە، ئەوا بۆ رۆژانە دەکاتە دوو هەزار و 340 دینار بۆ هەر رۆژێک، ئەوەش بکرێتەوە بە مانگانە، دەکاتە 70 هەزار و 200 دینار.

بەوجۆرەش تەنها بە بەکارهێنانی رۆژانە 5 سەعاتی بۆیلەر، مانگانە زیاتر لە 70 هەزار دینار بۆ هەر ماڵێک دێتەوە.

هەر بۆیە هاووڵاتیان باس لەوەدەکەن، دڵخۆشن بەوەی کارەبای 24 سەعاتیان هەبێت، بەڵام پێویستە حکومەت ئاستی داهات و بژێوی هاووڵاتیان لەبەرچاو بگرێت و نرخێکی گونجاوی بۆ دابنێت.

پۆلیسی ئەکرێ رایگەیاند، تەرمی ژنێک لەناو زێی گەورەدا دۆزراوەتەوە، کە مل و قاچەکانی بەستراونەتەوە.

پۆلیسی ئاکرێ رایگەیاند، کاتژمێر 11ی پێشنیوەڕۆی ئەمڕۆ تەرمی ژنێکیان لەناو رووباری زێی گەورە، لە نزیک گوندی زەنگلی سنووری ناحیەی کەلەک سەر بە قەزای بەردەڕەش دۆزیوەتەوە.

ئاماژەی بەوەشکردووە، تیمی مەلەوانی قەزای خەبات تەرمەکەیان دەرهێناوە، کە تەرمەکە مل و قاچەکانی بە تەلی ئاسن بەستراونەتەوە و پێشتر خنکێنراوە.

دەشڵێت، بەهۆی ئەوەی کاتی زۆر بەسەر رووداوەکەدا تێپەڕێوە، تەرمەکەی ناناسرێتەوە.

لەوبارەیەوە بەرپرسی راگەیاندنی پۆلیسی ئاکرێ بۆ کوردسات نیوز باسی لەوەکرد، بەهۆی نزیکی شوێنەکە لە هەولێر تەرمەکە بۆ پزیشکی دادی هەولێر نێردراوە و بە بڕیاری دادوەر پەڕاوی لێکۆڵینەوەی بۆ کراوەتەوە.

دادگای تێهەڵچونەوەی سلێمانی دوو بڕیاری لە بەرژوەندی رۆژنامەنووسان دەركرد .

بەپێی نووسراوێكی سەرۆكایەتی دادگای تێهەڵچوونەوەی سلێمانی، لەبەر بەرژەوەندی گشتی و باشتر راپەڕاندنی كارەكان، دادگاكە دوو بڕیاری لەبارەی رۆژنامەنووسانەوە دەركردووە.

بەپێی بڕیاری یەكەم، دادگای لێكۆڵینەوەی (سلێمانی/1 ) تایبەتمەند دەبێت بە بینینی ئەو سكاڵایانەی كە پەیوەندیدارن بە رۆژنامەنووسان لەناو شاری سلێمانی و یاسای ژمارە 35ی ساڵی 2007؛ یاسای رۆژنامەگەری لە كوردستان جێبەجێ دەكرێت.

بەپێی بریاری دوەمیش، سەرجەم داواكان لە دوای كۆتایی هاتنی قۆناغەكانی لێكۆڵینەوە، ئاراستەی دادگای كەتنی سلێمانی/6 دەكرێن بۆ یەكلا كردنەوەیان.

 قائیمقامییەتی سلێمانی بۆ رێگریکردن لە بەرزبوونەوەی نرخی گۆشتی سوور، بردنە دەرەوەی ئاژەڵی زیندووی بۆ ناوەڕاست و خوارووی عیراق قەدەغە کرد.

قائیمقامییەتی سلێمانی رایگەیاند، بەهۆی ئەوەی بەرهەمی پرۆژەکانی ناوخۆی مریشک و هێلکە لە وەرزی بەهاردا بە رێژەیەکی بەرز بەرهەم دەهێنرێت، بڕیاریان داوە لە پڕکردنەوەی پێداویستی بازاڕدا پشت بە مریشک و هێلکەی پرۆژەکانی ناوخۆ ببەسترێت.

ئاماژەی بەوەشکردووە، لە چوارچێوەی بریاڕ و رێنماییەکانی حکومەتی هەرێمی کوردستان، رێگە بە هاوردەکردنی گۆشت و ئاژەڵی زیندوو، ماسی دەدرێت و هاوردەکردنیان لە مانگی ئازاردا کراوە دەبێت.

قائیمقامییەتی سلێمانی ئاماژەی بەوەشکردووە، لە ئێستادا خواستی هاووڵاتیان لەسەر گۆشتی سوور زۆرە و بۆ رێگریکردن لە بەرزبوونەوەی نرخەکەشی، ئاوات محەمەد قائیمقامی سلێمانی لایەنەکانی راسپاردووە رێگری لە بردنە دەرەوەی ئاژەڵی زیندوو بکەن بۆ ناوەڕاست و خوارووی عیراق.

ئەوەش هاتووە، لەم وەرزەدا بەرهەمەکانی ناوخۆ بەتەواوەتی پێ نەگەیشتوون بۆیە رێگە دەدرێت بە هاوردەکردنی چەند جۆرێک لە سەوزە و میوە بەپێی پێویست، بە مەرجێک بەشێوەیەکی تەندروست و لەژێر چاودێریدا هاوردە بکرێت.

قائیمقامیەتی سلێمانی جەختی لە بەردەوامی قەدەغەی هاوردەکردنی فاسۆلیای تەڕ کردووەتەوە، چونکە لە ماوەی رابردوودا بەهۆی بڵاوبوونەوەی جۆرێکی نەخۆشی تیایدا قەدەغەی کردبوو و باسی لەوەکردووە، لە هەرشوێنێکی سەوزە و میوەفرۆشیدا دەستی بەسەردا بگیرێت دەبێت لەناو ببرێت.