کوردستان
سەرجەم وەزارەتەكانی حكومەتی هەرێم لیستی موچەی مانگی چواریان تەواوكردووە و رەوانەی گەنجینەی وەزارەتی دارایی هەرێمیان كردووە، بڕیاریشە لە چەند رۆژی داهاتوودا وەزارەتی ناوبراو لیستەكە رادەستی وەزارەتی دارایی عیراق بكات.
پەیامنێری كوردسات نیوز لە هەولێر رایگەیاند، سەرجەم وەزارەتەكانی حكومەتی هەرێم، لیستی مووچەی مانگی چواری موچەخۆرانیان تەواوكردووە و رادەستی گەنجینەی وەزارەتی دارایی هەرێمیان كردووە و بۆ گرتنەبەری رێوشوێنە یاساییەكان بۆ لیستی موچەكە.
ئەوەشی خستەڕو، بڕیارە سبەینێ رێوشوێنە یاساییەكانی لیستی موچەی مانگی چوار لە گەنجینە تەواوببێت و رادەستی وەزارەتی دارایی هەرێم بكرێت بۆ پێداچوونەوەی كۆتایی، دواتریش لە چەند رۆژی داهاتوودا، تیمی تەكنیكی وەزارەتی ناوبراو، لیستی موچەكە ببنە بەغداد و رادەستی وەزارەتی دارایی عیراق بكەن.
كوردسات نیوز زانیویەتی، لیستی موچەی مانگی چوار گۆڕانكارییەكی ئەوتۆی تێدا نەكراوە بەراورد بە لیستی موچەی مانگی سێ، بەوپێیەش چاوەڕوان دەكرێت وەزارەتی دارایی عیراق لەماوەیەكی كەمدا وردبینییەكانی لە لیستەكە تەواوبكات و بڕیاری خەرجكردنی موچەكە بدات.
پەیامنێری کوردسات نیوز باسی لەوەکرد، بریندارێکی شەڕەکەی رۆژی 14ی ئەم مانگەی قەزای بەردەڕەش گیانی لەدەستدا.
پەیامنێری کوردسات نیوز لە زاری کەسوکاری قوربانییەکەوە ئاماژەی بەوەکرد، کوڕەکەیان بەهۆی سەختی برینەکەیەوە، دوای پێنج رۆژ مانەوە لە نەخۆشخانە گیانی لەدەستداوە.
ئەوەشی خستە روو، ئەو کەسە ناوی عومەر کاوە بووە و لەدایکبووی ساڵی 1998 بووە.
رۆژی دووشەممەی رابردوو، 14ی نیسان، بەهۆی دروستبوونی شەڕ لەنیوان دوو بنەماڵەدا لە ناحیەی رۆڤیای سەر بە قەزای بەردەڕەش، سێ کەس بریندار بوون، کە یەکێکیان عومەری 27 ساڵ بوو گوللـەیەک بەر سەری کەوتبوو.
ئەمڕۆش دوای پێنج رۆژ مانەوەی لەژێر چاودێری چڕدا، لە نەخۆشخانە گیانی لەدەستدا.
كارمەندێكی نەخۆشخانەی گشتی كەركوك بەهۆی توشبوون بە تای خوێنبەربوون گیانی لەدەستدا، بەوەش لە ماوەی سێ رۆژدا دوو كەس لە كەركوك بەتای خوێنبەربوون گیانیان لەدەستداوە.
پەیامنێری كوردسات نیوز رایگەیاند، بەیانی ئەمڕۆ كارمەندێكی نەخۆشخانەی گشتی كەركوك، دوای توشبوونی بە ڤایرۆسی تای خوێنبەربوون گیانی لەدەستدا.
وتیشی، رۆژی پێنجشەممەی رابردووش دوو حاڵەتی تری تای خوێنبەربوون تۆماركران.
ئەوەشی خستە روو، یەكێك لەتوشبووەكانی دوو رۆژی رابردوو گیانی لەدەستدا، كە كەسێكی تەمەن 30 ساڵ بوو، كەسی دووەمیش تاوەکو ئێستا لەژێر چاودێری پزیشكیدایە.
کەشناسیی هەرێم پێشبینی نوێی بۆ کەشوهەوای ئەمڕۆ و سبەینێ بڵاوکردەوە و ئاماژەی بەوەکردووە، پلەکانی گەرما روو لە بەرزبوونەوە دەکەن.
کەشناسیی هەرێم رایگەیاندووە، ئەمڕۆ شەممە، ئاسمان ساماڵ دەبێت لەگەڵ درووستبوونی هەندێک پەڵەهەور، پلەکانی گەرماش 2 بۆ 3 پلەی سیلیزی بەرز دەبنەوە.
ئاماژەی بەوەشکردووە، سبەینێ یەکشەممە، ئاسمان ساماڵ و پەڵەهەور دەبێت و هەندێکجار دەگۆڕێت بۆ هەوری تەواو، پلەکانی گەرماش 1 بۆ 2 پلەی دیکە بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەم جۆرە دەبن:
هەولێر : 29 پلەی سیلیزی
سلێمانی : 27 پلەی سیلیزی
دهۆک : 27 پلەی سیلیزی
کەرکوک : 31 پلەی سیلیزی
زاخۆ : 28 پلەی سیلیزی
هەڵەبجە : 27 پلەی سیلیزی
سۆران : 25 پلەی سیلیزی
حاجی ئۆمەران : 15 پلەی سیلیزی
گەرمیان :33 پلەی سیلیزی
رێكخراوی پوگواش- عیراق لە شاری سلێمانی یەكەمین كۆنفرانسی ناوچەیی رێك دەخات و تێیدا، تاوتوێی رێگریی لە بڵاوبوونەوە و بەكارهێنانی چەكە كۆكوژەكان لە رۆژهەڵاتی ناوەڕاست دەكرێت.
كۆنفرانسەكە سەعات 9ـی بەیانی رۆژی شەممە لە هۆتێل رۆتانای شاری سلێمانی دەستپێدەكات و بۆ ماوەی دوو رۆژ بەردەوام دەبێت، ژمارەیەكی زۆر لە پسپۆڕ و توێژەر و لێپرسراوانی باڵای ناوچەیی و نێودەوڵەتی لە كۆنفرانسەكەدا ئامادە دەبن، لە نێویاندا قوباد تاڵەبانی جێگری سەرۆك وەزیرانی هەرێم.
لە كۆنفرانسەكەدا ئاڵەنگاری و دەرفەتەكان بۆ رێگریكردن لە بڵاوبوونەوە و بەكارهێنانی چەكی كۆكوژ لە رۆژهەڵاتی ناوەڕاست گەڵاڵە دەكرێت و هاوكات ، تیشك دەخرێتەسەر هەنگاوە كردارییەكان بۆ داماڵینی چەك و چارەسەركردنی ناكۆكییەكان بە رێگەی دیپلۆماسی.
هەڵبژاردنی پارێزگای سلێمانی بۆ بەڕێوەچوونی كۆنفرانسەكە گرنگییەكی رەمزی هەیە، بەوپێیەی سلێمانی قوربانییەكی دیاری چەكی كۆكوژە بە تایبەتی هەڵەبجە كە یەكێك لە كوشندەترین چەكە كیمیاییەكانی تیادا بەكارهێنراوە، بڕیاریشە هەر لەپەراوێزی بەڕێوەچوونی كۆنفرانسەكەدا گەشتێكی مەیدانی بۆ هەڵەبجە رێك بخرێت.
بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم، لە رووبەروبونەوەیەکدا لەناوچەی پشدەر- کورتەک، دەستیان بەسەر شەش کیلۆگرام ماددەی هۆشبەردا گرت.
بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم بڵاویکردەوە، شەوی 17\4\2025 لە ئۆپراسیۆنێکدا لە ناوچەی (پشدەر/کورتەک) دوای ئەوەی هێزەکانمان لەهەوڵی دەستگیرکردنی دوو بازرگانی ماددەی هۆشبەردابوون، کە دانیشتوی قەزای کەڵەک-بەردەڕەشن بەڵام تۆمەتباران ئامادەنەبوون خۆیان بەدەستەوە بدەن، سەرئەنجام تۆمەتبارێکیان بە چەک رووبەروی هێزەکانی ئاسایش دەبێتەوە دواتر بە ئۆتۆمبێل هەوڵی هەڵهاتن دەدات لە ئەنجامی رووبەروبونەوەکە یەکێک لە بازرگانان بریندار دەبێت .
ئاماژەی بەوەشکرد، بریندارەکە بە زووترین کات دەگوازرێتەوە بۆ نەخۆشخانە پاش پشکنینە تەندروستیەکان و دەستگرتن بەسەر ئامرازێکی کێشانی ماددەی هۆشبەر لە ئۆتۆمبێلەکەیدا دەرکەوت ئەم بازرگانە لەژێر کاریگەری بەکارهێنانی ماددەی هۆشبەردابووە، لەپاش ئەنجام دانی نەشتەرگەری گیانلەدەست دەدات .
بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم راشیگەیاند، لە ماوەی رابردوودا هەردوو بازرگان و گوازەرەوەی ماددەی هۆشبەر بەناوەکانی(ق،ع،ع) تەمەن(40) ساڵ و (ئ،ح،ع)تەمەن(34)ساڵ، لە نێوان تۆڕەکانی بازرگانی مادەی هۆشبەر و شارەکانی دهۆک ، هەولێر ، سۆران ، زاخۆ کاری گواستنەوە و بازرگانیکردن بە مادەی هۆشبەریان کردووە چەند جارێکیش ترانزێتی ماددەی هۆشبەریان بۆ وڵاتی تورکیا کردووە.
ئەوەشی خستەڕوو، لە ئێستادا یەکێک لە تۆمەتباران بە بڕیاری دادوەر بە ماددەی (25) لە یاسای بەرەنگاربوونەوەی مادەهۆشبەرەکان و کارتێکارە ئەقڵیەکان ڕاگیراوە و لێکۆڵینەوە لە دۆسیەکەی بەردەوامە .
قوباد تاڵەبانی، جێگری سەرۆکوەزیران پێشوازی لە نوح یەلماز، جێگری وەزیری دەرەوەی تورکیا کرد و پێکەوە چەند پرسێکی جێی بایەخی هەردوولایان تاوتوێ کرد.
لە تەوەرێکی کۆبوونەوەکەدا کە ئەمڕۆ بە ئامادەبوونی دابان شەدەڵە، جێگری لێپرسراوی فەرمانگەی پەیوەندییەکانی دەرەوەی هەرێم بەڕێوەچوو، باس لە دوا پەرەسەندنەکانی پرۆسەی ئاشتی لە تورکیا کرا. لەوبارەیەوە قوباد تاڵەبانی جەختیکردەوە لە پشتگیریکردنی حکومەتی هەرێم و یەکێتیی نیشتمانیی کوردستان لە پرۆسەکە و رایگەیاند، ئامادەین بۆ هەر جۆرە هاوکارییەک لەپێناو سەرخستنی ئاشتی لە تورکیا.
لە تەوەرێکی تری کۆبوونەوەکەدا، باس لە دۆخی هەرێمی کوردستان و گفتوگۆکانی پێکهێنانی کابینەی دەیەمی حکومەتی هەرێم کرا. قوباد تاڵەبانی ئاماژەی بەوەدا کە گفتوگۆکان بە ئاراستەیەکی باشدا دەڕۆن و نیەتی باش هەیە بۆ رێککەوتن لەسەر پێکهێنانی حکومەتێکی کارا و بەهێز کە لە ئاستی چاوەڕوانییەکانی هاووڵاتیاندا بێت.
لەتەوەرێکی دیکەدا باس لە پەیوەندییەکانی یەکێتی و تورکیا کرا. هەردوولا هاوڕابوون لەسەر گرنگیی پتەوکردنی پەیوەندییەکان کە لە ئێستادا بەرەو ئاستێکی باشتر دەڕوات.
پۆلیسی گەرمیان ئاشکرایکرد، دوێنێ، لە قەزای کەلار شەر لەنێوان دوو تیپی تۆپی پێ دروست بووە و لەئەنجامدا راهێنەرێک بە چەقۆ سێ یاریزانی بەرانبەری بریندارکردووە.
علی جەمال قەدوری وتەبێژی پۆلیسی گەرمیان بڵاویکردەوە، دوێنێ پێنجشەمە دوو تیپی وەرزشی تۆپی پێی ناحییەی رزگاری بەمەبەستی یاری کردن هاتونەتە گەڕەکی سەرکەوت لەقەزای کەلار، لەکاتی یاریکردندا گرژی لەنێوان یاریزانان دروست بوەو راهێنەرەکەیان بەچەقۆ لە سێ یاریزانی بەرانبەری داوە و برینداری کردوون.
ئاماژەی بەوەشکرد، بەمەبەستی چارەسەر بریندارەکان رەوانەی نەخۆشخانەی شەهید هەژار کران و چارەسەری پێویستیان بۆکرا و رەوانەی ماڵەوە کراونەتەوە.
وتەبێژی پۆلیسی گەرمیان راشیگەیاند، تۆمەتبارەکە بەناوی ( س -ر - ح ) دەستگیر کراوەو بەبڕیاری دادوەر بەپێی مادەی 413 بەندکراوە و لێکۆڵینەوەش لەروداوەکە بەردەوامە.
لە دیدارێکی تایبەتدا لەگەڵ کوردسات نیوز، بافڵ جەلال تاڵەبانی سەرۆکی یەکێتیی نیشتمانیی کوردستان، بە راشکاوانە باس لە پرسە ناوخۆیی و دەرەکییەکان دەکات.
سبەینێ سەعات هەشتی شەو، لە دیدارێکی تایبەتدا، بافڵ جەلال تاڵەبانی سەرۆکی یەکێتیی نیشتمانیی کوردستان، بۆچونی سەبارەت بە سەرجەم پرسە گرنگەکان لە شاشەی کوردسات نیوزەوە دەخاتەڕوو.
لە دیدارەکەدا سەرۆکی یەکێتی باس لە رەوشی ناوخۆی یەکێتیی نیشتمانیی کوردستان ،ژیانی تایبەتی خۆی، رەوشی ناوخۆی کوردستان، پەیوەندی نیوان لایەنەکان، پێشهاتەکانی سوریا و هەسەدە، پڕۆسەی ئاشتی لە تورکیا، گۆڕانکارییەکانی رۆژهەڵاتی ناوەڕاست، هەڵوێستی ترەمپ و گۆڕانکارییەکانی جیهان دەکات.
رۆژی 5ـی 3ـی 2025، بافڵ جەلال تالەبانی سەردانی دەزگای میدیایی کوردساتی کرد و ئاماژەی بەوەدا کە لە کوردسات نیوزەوە 'بێ فلتەر' دیدارێک ئەنجام دەدات، سبەینێ ئەو دیدارە سەعات هەشت لە شاشەی کوردسات نیوزەوە پەخش دەکرێت.
داهاتی نانەوتی هەفتەی رابردووی سنوری پارێزگاكانی سلێمانی و هەڵەبجە زیاتر لە شەش ملیار دینار بووە و بەراورد بە هەفتەی رابردوو زیاتر لە پێنج ملیار دینار كەمی كردووە.
ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی راپەڕین و گەرمیان دەكات، بڵاویكردەوە، داهاتی نانەوتی هەفتەی رابردوو واتە لە 12ـی نیسانەوە تا ئەمڕۆ 18ی نیسان، شەش ملیار و 444 ملیۆن و 719 هەزار و 117 دینار بووە.
داهاتەكە بەراورد بە هەفتەی پێشووتر، بە بڕی پێنج ملیار و 318 ملیۆن و 539 هەزار و 533 دینار كەمی كردووە، كە لەو هەفتەیەدا داهاتەكە زیاتر لە 11 ملیار دینار بووە.
هاوكات بەپێی ماڵپەری شەفافیەت، داهاتی نانەوتی سنووری پارێزگاكانی سلێمانی و هەڵەبجە لەسەرەتای ئەمساڵەوە تا ئێستا، 211 ملیار و 833 ملیۆن و 589 هەزار و 947 دینار بووە.
شاناز ئیبراهیم ئەحمەد خانمی یەکەمی عیراق لە مۆزەخانەی ئەمنەسورەکە لە سلێمانی پێشوازی لە موهەند ئەلعەتابی پارێزگاری موسەنا کردوو جەختیان لە گرنگی بەردەوامی ئۆپەراسیۆنەکانی گەڕان و هەڵکەندن بۆ گۆڕە بەکۆمەڵەکانی دیکە کردەوە.
لەکۆبوونەوەیەکدا گفتوگۆ لەهەوڵە هاوبەشە نیشتمانیەکان کرا بۆ بەدیهێنانی داواکاری کەسوکاری شەهیدان و ئەنفالکراوەکان بۆ بەردەوامبوون لەگەڕان و کردنەوەی گۆڕە بەکۆمەڵەکان لەناوچەی تەلشێخەی سەر بە پارێزگای موسەننا کە تا ئێستاش تەرمی پیرۆزی ئەنفالکراویان تێدایە.
خانمی یەکەم جەختی لەسەر گرنگی بەردەوامی ئۆپەراسیۆنەکانی گەڕان و هەڵکەندن بۆ گۆڕە بەکۆمەڵەکانی تری ناوچەکە کردەوە و ستایشی بڕیاری پارێزگاکەی کرد بۆ ڕاگرتنی ڕێوشوێنەکانی گرێبەستی زەوی لەو ناوچەیەی ناوبراو کە گۆڕەکانی دیکەی شەهیدانی ئەنفالکراو لە لایەن ڕژێمی پێشووەوە دەگرێتەوە
شاناز ئیبراهیم ئەحمەد جەختی لەوە کردەوە کە پێویستە لایەنە پەیوەندیدارەکان گرنگی بەم شوێنانە بدەن و بپارێزن بەتایبەتی زیندانی ڕەشید کە بڕوا دەکرێت قۆناغەکانی زیندانی و ئەشکەنجەدانی شەهیدانی ئەنفالی بەخۆوە بینیوە پێش ئەوەی بنێردرێنەوە بۆ ناوچە بیابانییەکان لە قوڵایی بیابانی شاری سەماوە.
خانمی یەکەم ئاماژەی بە گرنگی سوودوەرگرتن لە ئەزموونی گۆڕینی بینای بەڕێوەبەرایەتی ئەمنەسورەکەی سلێمانی کرد لە سەردەمی ڕژێمی بەعسدا بۆ مۆزەخانەیەکی نیشتمانی کە دیوارەکانی تراژیدیا و خوێنڕشتنی ڕووداوەکان دەگێڕێتەوە و ببێتە شایەتحاڵی نەوەی نوێ لەسەر ستەم و دڕندەیی ڕژێمی دیکتاتۆری و وێستگەیەک بۆ یادکردنەوەی چیرۆکی قارەمانێتی و تێکۆشان بۆ ئازادی.
لەلایەکی دیکەوە خانمی یەکەم ئیمزاکردنی یاداشتنامەی لێکتێگەیشتنی نێوان زانکۆکانی چەرمۆ و موسەنا بە هەنگاوێکی گرنگ وەسف کرد بۆ ئامادەکاری بۆ کۆنفرانسی زانستی نێودەوڵەتی لەسەر گۆڕە بەکۆمەڵەکان.
لەبەرامبەردا پارێزگاری موسەننا ئاماژەی بەو هەوڵانە کرد کە بە هەماهەنگی لەگەڵ فەرمانگەکانی گەشتوگوزار بۆ پاراستنی زیندان و گرتووخانەکانی ڕژێمی پێشوو لە پارێزگای موسەنە بەتایبەتی (نوگرە سەلمان) کە چیرۆکی ترسناکی دەستگیرکردن و ئەشکەنجەدانی گەلی کوردمان بەژنان و منداڵان و بەساڵاچووانەوە بەخۆوە بینیوە.
سەرۆك كۆماری عیراق داوا لە موقتەدا سەدر دەكات بەشداری لە هەڵبژاردنەكانی داهاتوودا بكات.
د. لەتیف رەشید سەرۆک کۆماری عێراق داوا لە موقتەدا سەدر رێبەری رەوتی سەدر دەکات بەشداری لە هەڵبژاردنی مانگی تشرینی دووەمی ئەمساڵدا بکات.
راشیگەیاند، كاتی ئەوە هاتووە بزووتنەوەی نیشتمانی شیعە بگەڕێتەوە بۆ رۆڵی سیاسی خۆی.
ئەوەشی خستە روو، ئەنجوومەنی نوێنەران مەیدانی راستەقینەیە بۆ راستكردنەوەی هەڵەكان. دەشڵێت، كەس ناتوانێت نكۆڵی لە رۆڵی دوو شەهیدی سەدر بكات لە بەگژداچوونەوەی ستەمكاری.
روونیشێکردەوە، "پرۆسەی سیاسی بەبێ بەشداری بزووتنەوەی نەتەوەیی شیعە ناتەواوە، ئێوە دەستتان بە پرۆسەكە كردووە و هیچ بژاردەیەك نییە جگە لە تەواوكردنی، بەشداری بزوتنەوەی نەتەوەیی شیعە لە هەڵبژاردنەكانی داهاتوودا لە هەموو كاتێك زیاتر پێویستە".
ئاماژەی بەوەشکرد، دۆستەكانی رژێمی پێشوو چاوەڕێی دەرفەتن بۆ وەرگرتنەوەی ئەوەی لەدەستیان داوە.
بڕیارە مانگی تشرینی دووەمی ئەمساڵ هەڵبژاردنی خولی شەشەمی ئەنجومەنی نوێنەرانی عیراق بەڕێوەبچێت و پێشتریش موقتەدا سەدر رایگەیاندبوو، بەشداریكردنی لە هەڵبژاردنەكانی داهاتوودا ناکات.
دێرین لەتیف رەشید بەڕێوەبەری دەزگای میدیایی کوردسات رایگەیاند، لەگەڵ کونسوڵی گشتیی روسیا لە هەرێم کۆبوونەوە و باسیان لە پەیوەندی کلتوری و پەرەپێدانی چالاکی فەرهەنگی کرد.
ماکسیم روبین کونسوڵی گشتی روسیا لە هەرێمی کوردستان سەردانی دەزگای میدیایی کوردساتی کرد و لەگەڵ دێرین لەتیف رەشید بەڕێوەبەری دەزگای میدیایی کوردسات کۆبوونەوە.
لەوبارەیەوە دێرین لەتیف رایگەیاندووە، باسیان لە گرنگی پەیوەندییە کلتورییەکان و پەرەپێدانی چالاکییە فەرهەنگییەکانی نێوان روسیا و هەرێمی کوردستان بە گشتیی و بە دیاریکراوی لە شاری سلێمانی کردووە.
ئەوەشی خستووەتە روو، "لە گفتوگۆی نێوانماندا ئاماژەم بە ئەرشیفی کەناڵی کوردسات کرد وەک هەگبەیەکی فەرهەنگی دەوڵەمەند لە بەرەوپێشبردنی بواری فیلم و هونەردا و کلتوردا، هەروەها جەختم لە فراوانکردن و بەرەوپێش بردنی زیاتری چالاکییە هونەری و کلتورییەکان کرد لە شاری سلێمانی".
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکرد، پلەکانی گەرما بەرز دەبنەوە و کەش جێگیر دەبێت.
کەشناسیی هەرێم رایگەیاند، ئەمڕۆ هەینی، ئاسمان لە زۆربەى کاتەکاندا ساماڵ دەبێت و هەندێک کات دەگۆڕێت بۆ پەڵەهەور، پلەکانی گەرماش 3 بۆ 5 پلەی سیلیزی بەرز دەبنەوە.
ئاماژەی بەوەشکرد، سبەینێ شەممە، ئاسمان لە زۆربەى کاتەکاندا ساماڵ دەبێت و هەندێک کات دەگۆڕێت بۆ پەڵەهەور، پلەکانی گەرماش 2 بۆ 3 پلەی دیکە بەرز دەبنەوە.
سبەینێ بەرزترین پلەکانی گەرما بە پلەی سیلیزی بەم جۆرە دەبن:
هەولێر : 27 پلەی سیلیزی
سلێمانی : 24 پلەی سیلیزی
دهۆک : 27 پلەی سیلیزی
کەرکوک : 30 پلەی سیلیزی
زاخۆ : 28 پلەی سیلیزی
هەڵەبجە : 25 پلەی سیلیزی
سۆران : 26 پلەی سیلیزی
حاجی ئۆمەران : 12 پلەی سیلیزی
گەرمیان :33 پلەی سیلیزی
دکتۆر لەتیف رەشید سەرۆک کۆماری عیراق، لە پەیامێکی تایبەتدا پیرۆزبایی لە دانیشتوانی هەڵەبجە کرد بە بۆنەی پەسەندکردنی پڕۆژە یاسای بەپارێزگا بوونی شارەکەیان.
لە پەیامەکەیدا کە ئەمڕۆ پێنجشەممە بڵاوکرایەوە، سەرۆک کۆمار ستایشی هەوڵەکانی ئەنجوومەنی نوێنەرانی عیراقی کرد و داوای لە لایەنە پەیوەندیدارەکان کرد کاربکەن بۆ تەواوکردنی پڕۆژە خزمەتگوزارییەکان لە پارێزگاکەدا بەمەبەستی پەرەپێدان و گەشەپێدانی.
دەقی پەیامەکەی د. لەتیف رەشید:
بە بۆنەی بە پارێزگا بوونی هەڵەبجەوە پیرۆزبایی گەرم ئەکەین، لەرۆژی دەنگدانی پەرلەمان بەیاننامەیەکی فەرمی سەرۆکایەتی کۆمارمان دەرکرد، پێمان باشبوو بە تایبەتر پیرۆزبایی لەخەڵکی هەڵەبجە بکەین.
ئەمە هەنگاوێکی یاسایی و کارگێڕی دروستبوو بۆ گەشەپێدانی هەڵەبجە، دەستخۆشی لەئەنجومەنی نوێنەرانی عیراق دەکەین و ئاشکرایە هەر لە کۆنەوە هەڵەبجە مەڵبەندێکی رۆشنبیری و کلتوری پێشکەوتوو بوە و شاری هونەر و ئەدیب و شاعیران بوە، خەڵکەکەی لێوەشاوە و نیشتمان پەروەرن ، خاکەکەی بە پیت و ناوچەیەکی دڵڕفێن و گەشتیاریە.
بە هەموو توانامانەوە پشتگیری لەپارێزگای هەڵەبجە دەکەین و خزمەتی هەڵەبجە و زیاتر ئاوەدانکردنەوە و پێشخستنی دەکەین.
بێگومان کیمیابارانکردنی هەڵەبجە تاوانێکی جینۆسایدە، هەموو هەوڵێک لە کۆڕی نێودەوڵەتیدا ئەدەین، بۆ ئەوەی تاوانی کیمیابارانی هەڵەبجە بەشێوەیەکی یاسایی بە جینۆساید بناسرێت .
خەڵکی تێکۆشەرو بەوەفای هەڵەبجە، دڵنیاین ئێوەش لەگەڵ کۆمەڵانی خەڵکی و وەبەرهێنەری شارەکەتان و تەواوی وڵاتەکەمان کۆشش دەکەن بۆ ئاوەدانکردنەوەی زیاتری شارەکەتان، گیانی شەهیدانی هەڵەبجە و هەموو شەهیدانی وڵاتەکەمان شاد بێت و هەڵەبجەش هەمیشە شاری ئاشتی وهونەرو جوانی بێت.
د. لەتیف جەمال رەشید
سەرۆک کۆماری عیراق
