کوردستان
دوای بانگەوازەكەی ئۆجەلان بۆ ئاشتی، وەفدی ئیمراڵی سەردانی لایەنەكانی توركیا دەكاتەوە و ئەمڕۆش لەگەڵ جەهەپە و حزبی زەحمەتكێشان و دەڤا كۆدەبێتەوە.
پارتی یەكسانی و دیموكراسی گەلان "دەم پارتی" رایگەیاندوە، دوای بانگەوازەكەی عەبدوڵا ئۆجەلان رێبەری زیندانیكراوی "پەكەكە" بۆ پرۆسەی ئاشتی، ئەمڕۆ وەفدی ئیمراڵی جارێكی تر سەردانی لایەنە سیاسییەكانی توركیا دەكاتەوە، تولای حاتیمئۆغلاری و تونجەر باقرخان هاوسەرۆكانی دەم پارتی لەگەڵ حزبی زەحمەتكێشان و پارتی گەلی كۆماری "جەهەپە"و پارتی دەڤا كۆدەبنەوە.
بەپێی كارنامەی كۆبوونەوەكان، رۆژی چوارشەممەش وەفدی ئیمراڵی لەگەڵ پارتی كرێكارانی توركیا و سەعادەت و پارتی ئایندە كۆدەبێتەوە، رۆژی 17ی مانگیش لەگەڵ ئاكەپە و مەهەپە كۆدەبێتەوە.
پێشتریش وەفدی ئیمراڵی لە 28ی 12ی 2024، كە پێكهاتبوون لە سری سورەیا ئۆندەر و پەروین بوڵدان، لە ئیمراڵی لەگەڵ ئۆجەلان كۆبوونەوە، دواتر وەفدەكە لە 2ی 1ی 2025، كۆبوونەوەكانیان لەگەڵ لایەنە سیاسییەكانی پەرلەمانی توركیا دەستپێكرد.
هاتوچۆی کۆیە رایگەیاند، لە روداوێکی هاتوچۆدا لەسەر رێگای نێوان کۆیە- تەق تەق کەسێک گیانی لەدەستدا.
بەڕێوەبەرایەتی گشتیی هاتوچۆی کۆیە رایگەیاند، روداوەکە لەسەر رێگای نێوان کۆیە بۆ تەق تەق و لە نزیک گوندی شیلە رویداوە، کە ئۆتۆمبێلێکی تایبەت لە رێرەوی خۆی دەرچووە و بەهۆیەوە وەرگەڕاوە.
ئاماژەی بەوەشکردووە، لە روداوەکەدا شۆفێری ئۆتۆمبێلەکە گیانی لەدەستداوە و ئەو سەرنشینەشی لەگەڵیدا بووە بریندار بووە.
هاتوچۆی کۆیە داوا لە شۆفێران دەکات، پابەندی رێنماییەکانی هاتوچۆ و خێرایی دیاریکراوی شەقامەکان بن.
روداوەکانی هاتوچۆ بە یەکێک لە هۆکارەکانی گیانلەدەستدان و برینداربوونی سەخت یان کەمئەندامبوون دادەنرێت، کە بەدەر لە کوالێتی رێگاوبان بەشێکی بۆ تیژڕۆیی و پابەند نەبوونی شۆفێران بە رێنماییەکانی هاتوچۆ دەگەڕێتەوە.
پۆلیسی پارێزگای هەولێر، چوار تۆمەتباری بە تۆمەتی تەقەکردن و هەڕەشەکردن و جنێودان و هەڵکوتانەسەر ماڵێک دەستگیر کرد.
بەڕێوەبەرایەتی پۆلیسی پارێزگای هەولێر بڵاویکردەوە، ئەو تۆمەتبارانە، کە دووانیان کوڕ و باوکن و خەڵکی سنووری قەزای خەباتن، لەسەر کێشەیەکی کۆمەڵایەتی هەڵیانکوتابووە سەر ماڵێک لە شاری هەولێر، بۆیە دوای تۆمارکردنی سکاڵا، لە ئۆپەراسیۆنێکی تایبەتدا بە بڕیاری دادوەری لێکۆڵینەوە دەستگیر کران و رادەستی دادگا کران.
پۆلیسی هەولێر ئاماژەی بەوەشکردووە، لەکاتی بوونی هەر گرفت و کێشەیەکدا هاووڵاتیان هەرگیز پەنا نەبەنە بەر توندوتیژی و پۆلیس ئاگادار بکەنەوە.
پۆلیسی هەولێر راشیگەیاندووە، هەرکەسێک سەرپێچیی یاسا بکات، رووبەڕووی دادگا دەکرێتەوە.
بەهۆى پشوەکانى نەورۆز و جەژنی رەمەزانی پیرۆز، وەزیری خوێندنى باڵا بڕیارێک بۆ خوێندکارانی دەرەوەى وڵات دەردەکات.
وازرەتی خوێندنی باڵا و توێژینەوە زانستی هەرێم بڵاویکردەوە، بەهۆى نزیکبونەوەى پشوەکانى ئادار و نەورۆز و جەژنی رەمەزانی پیرۆز، بەلەبەرچاوگرتنى بارودۆخى ئەو خوێندکارانەى لە دەرەوەى وڵات دەخوێنن، د. ئارام محمد وەزیرى خوێندنى باڵا بڕیاریدا بەرێگەپێدان بە خوێندکارانى دەرەوەی وڵات بەمەبەستى گەڕانەوە بۆ هەرێمی کوردستان لە رۆژی 12-3-2025 تاوەکو 5-4-2025
ئاماژەی بەوەشکردووە، بۆ ماوەی بیست و چوار رۆژ، ئەو ماوەیەى لە شارەکانى هەرێمى کوردستان بەسەرى دەبەن بە ماوەی مانەوە بۆیان هەژمار دەکرێت.
بۆ چارەسەركردنی كێشەكانی ناو لیستی موچەی مانگی دووی فەرمانبەرانی هەرێم و وەڵامدانەوەی پرسیارەكانی بەغداد، وەفدێكی وەزارەتی دارایی هەرێم لە بەغدادە .
پەیامنێری كوردسات نیوز رایگەیاند، وەفدەكە پێكهاتوون لە بەرێوەبەری ژمێریاری وەزارەتی دارایی و بەرێوەبەری خانەنشینی و سكرتێری وەزیری دارایی و ژمارەیەك راوێژكار و فەرمانبەرانی وەزارەتەكە.
وتیشی، وەفدەكە لە بەیانییەوە گەیشتووەتە بەغداد بۆ وەڵامدانەوەی پرسیارەكانی وەزارەتی دارایی عیراقە سەبارەت بە كێشەكانی ناو لیستی موچە و داواكارییەكان، لەبارەی داهاتی نەوت و ناوخۆ و پێدانی زانیاری و ژمارەی بانكیی موچەخۆران.
هەرچەندە نزیكەی 10 رۆژ لە مانگی سێ تێپەڕیوە، بەڵام تاكو ئێستا وەزیری دارایی عیراق رەزامەندی لەسەر ناردنی موچەی مانگی دوو دەرنەبڕیوە، ئەوەش بەهۆی كەم و كوڕی لە لیستەكەدا، ئەوە جگە لەوەی كە لە تازەترین نوسراویشدا جەختی لەسەر ناردنی زانیاری موچەخۆران كردووەتەوە بۆ ئەوەی موچەكانیان "تەوتین" بكرێت.
پێشتریش سروە محەمەد، پەرلەمانتاری فراكسیۆنی یەكێتی لە ئەنجومەنی نوێنەرانی عیراق بە كوردسات نیوزی راگەیاندبوو، لە پەراوێزی كۆبوونەوەیەكیاندا لەگەڵ محەمەد شیاع سودانی سەرۆك وەزیرانی عیراق، لەسەر چارەنووسی موچەی مانگی دووی هەرێم پرسیاری لە سودانی كردووە و ناوبراویش وەڵامی داوەتەوە، كە لەم هەفتەیەدا دەنێردرێت.
پەروەردەی سلێمانی چەند رێنماییەکی نوێی تایبەت بە تاقیکردنەوەکانی وەرزی دووەم راگەیاند و ئاماژەی بەوەکرد، تاقیکردنەوەی کۆتایی وەرز لەکاتی خۆیدا ئەنجام دەدرێت، بەڵام وادەی تاقیکردنەوەی 20ی دووەم گۆڕانکاری بەسەردا هاتووە.
بەڕێوەبەرایەتی گشتی پەروەردەی سلێمانی رایگەیاند، ئەو ناوەندی خوێندنانەی بەپێی ساڵنامەی خوێندن دەوامیان کردووە سەرجەم تاقیکردنەوەکان لەکاتی خۆیدا ئەنجام دەدەن، بەڵام ئەو ناوەندانەی دابڕاون لە خوێندن گۆڕانکاری بەسەر وادەی تاقیکردنەوەکانیاندا دێت بەم شێوەیە:
-پۆلە ناکۆتاکان (4ی سەرەتایی بۆ 8ی بنەڕەتی و 10 و 11ی ئامادەیی)، تاقیکردنەوەی 20 نمرەی دووەم لە 13 تاوەکو 22ی نیسان ئەنجام دەدەن.
-تاقیکردنەوەی وەرزی دووەمی پۆلی 9 و 12، وەک ئەوەی لە ساڵنامەی خوێندندا هاتووە، لە 8ی نیسان تاوەکو 21ی نیسان ئەنجام دەدرێت.
-تاقیکردنەوەکانی کۆتایی وەرزی خولی یەکەم و دووەم وەک خۆی و بەپێی ساڵنامەی خوێندن ئەنجام دەدرێت.
-رۆژانی شەممە تاقیکردنەوە بەردەوام دەبێت.
-ئەگەر رۆژی تاقیکردنەوە بەر پشووی رەسمی کەوت، تاقیکردنەوەکە دەکەوێتە رۆژی دواتر و بە هەمان زنجیرەی خشتەی تاقیکردنەوەکان بەردەوام دەبێت.
قائیمقامییەتی سلێمانی رایگەیاند، مانگی رابردوو لیژنەکان شەش هەزار و 353 سەردانیان ئەنجامداوە و لە کۆی سەردانەکان بەهۆی سەرپێچییەوە 21 شوێن داخراون، کە بەراورد بە مانگی یەک ئامارەکە زیادی کردووە.
قائیمقامییەتی سلێمانی رایگەیاند، مانگی رابردوو لیژنەکانی قائیمقامییەت شەش هەزار و 353 سەردانیان ئەنجامداوە، کە لە کۆی سەردانەکاندا 482 سەرپێچی تۆمارکراون و 166 شوێنیش ئاگادار کراونەتەوە. هاوکات، 21 شوێن داخراون و 3 شوێنیش دراون بە دادگا.
بەپێی ئامارەکەی قائیمقامییەت، ژمارەی سەردان و سەرپێچی و سزادانەکان بەراورد بە مانگی یەک زیادیان کردووە، لە مانگی یەکی ئەمساڵدا شەش هەزار و 276 سەردان ئەنجامدراون، کە تیایدا 376 سەرپێچی تۆمارکراون و 154 شوێن ئاگادار کراونەتەوە، هەروەها 16 شوێن داخراون.
لە ئامارەکەی قائیمقامییەتدا هاتووە، بڕی سزای مانگی یەک 53 ملیۆن و 250 هەزار دینار بووە و لە مانگی دوودا بۆ 56 ملیۆن و 100 هەزار دینار زیادیکردووە.
ئەوەش خراوەتە روو، لەماوەی مانگی دووی ئەمساڵدا 36 تۆن و 686 کیلۆگرام خواردن و شتومەک لەناوبراون.
پەیامنێری کوردستات نیوز لە هەولێر رایگەیاند: بەهۆی تەواونەکردنی رێکارە کارگێڕییەوە، ئازادکردنی شێروان شێروانی دواخرا.
"چاوەڕوان دەکرێت سبەینێ رێکارە یاساییەکان تەواوبکرێت و دادوەر بریار لە ئازادکردنی بدات"، پەیامنێری کوردسات نیوز وای وت.
نوێدەکرێتەوە...
دوای تێپەڕبوونی زیاتر لە چوار ساڵ و پێنج مانگ بەسەر زیندانیکردنیدا، ئەمڕۆ رۆژنامەنووس شێروان شێروانی، یەکێک لە گیراوەکانی کەیسی بادینان ئازاد بکرێت.
پێشتر بارزان شێروانی برای شێروان شێروانی لە لێدوانێکی تایبەتدا بە کوردسات نیوزی راگەیاند، "بڕیارە رۆژی یەکشەممە 9ی ئازار، سزای براکەم تەواو ببێت و دوای تێپەڕبوونی هەزار و 612 رۆژ لە زیندانی، ئازاد بکرێت".
بارزان شێروانی ئەوەشی خستەڕوو، "تاوەکو ئێستا نازانرێت هیچ کەیسێکی تر لەسەر شێروان شێروانی دەکرێتەوە یان نا، ئێمەش چاوەڕێی چاکسازی هەولێر و دادگا دەکەین".
شێروان شێروانی رۆژنامەنووس و یەکێک لە گیراوەکانی کەیسی بادینانە کە لە ساڵی 2020ـەوە دەستگیر کراوە و لە زینداندایە.
کەشناسیی هەرێم پێشبینی نوێی بۆ کەشوهەوا راگەیاند و ئاماژەی بەوەکردووە، ئەمڕۆ و سبەینێ هەورەتریشقە و بارانبارین بەردەوام دەبێت و لە سبەی ئێوارەوە کەش سەقامگیر دەبێتەوە.
کەشناسیی هەرێم رایگەیاند، ئەمڕۆ یەکشەممە، ئەو ناسەقامگیریەى هەیە لەسەر کەشى بەشێک لە ناوچەکە بەردەوام دەبێت و ئاسمانى هەرێم بە گشتى نیمچەهەور دەبێت، لەسەر بەشێک لە ناوچە شاخاوییەکان ئەگەرى نمەباران هەیە، هەروەها لە سنوورى پارێزگاى سلێمانى و ئیدارەى راپەڕین و گەرمیان لە کاتەکانى دواى نیوەڕۆ ناو بە ناو بارانبارینى کورت خایەن و هەندێک کات هەورە تریشقە دەبێت .
ئاماژەی بەوەشکردووە، سبەینێ دووشەممە، ئاسمان نیمچەهەور دەبێت، بە گشتى لە دواى نیوەڕۆوە ئەگەرى بارانبارین لە زۆربەى ناوچە جیاجیاکانى هەرێم هەیە، کاریگەرى ئەم بارانە بە بوونى هەورە تریشقە و لە هەندێک ناوچەى شاخاوی لێزمەبارانى کورتخایەن دەبێت، دواتر لە شەودا کۆتاىی بە کاریگەرى ئەم شەپۆلە دێت.
کەشناسی راشیگەیاندووە، ئەمڕۆ پلەکانی گەرما هاوشێوەی دوێنێ دەبن، بەڵام سبەینێ کەمێک بەرزدەبنەوە، بەڵام لە سنووری پارێزگای دهۆک 1 بۆ 3 پلەی سیلیزی نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی:
هەولێر: 19 پلەى سیلیزى
سلێمانى: 20 پلەى سیلیزى
دهۆک: 17 پلەى سیلیزى
زاخۆ: 18 پلەى سیلیزى
هەڵەبجە: 20 پلەى سیلیزى
کەرکوک: 22 پلەى سیلیزى
سۆران: 15 پلەى سیلیزى
حاجی ئۆمەران: 2 پلەى سیلیزى
گەرمیان: 23 پلەى سیلیزى
وەزارەتی دارایی عیراق جەخت لەسەر خێرا ناردنی زانیاری موچەخۆرانی هەرێم دەكاتەوە بۆ بەبانكیكردن بەپێی رێكارەكانی دادگای فیدراڵی.
سۆران عومەر ئەندامی ئەنجومەنی نوێنەرانی عیراق رایگەیاند، تەیف سامی وەزیری دارایی عیراق بۆ لیستی موچەی مانگی شوبات و مانگەكانی دواتر، جەختی لەسەر خێرا ناردنی زانیاری موچەخۆرانی هەرێم كردووەتەوە بە مەبەستی بەبانكیكردنی موچە بەپێی ئەو رێكارانەی كە لە بڕیاری دادگای باڵای فیدراڵی عیراقدا هاتووە.
ئەو پەرلەمانتارە وتیشی، تەیف سامی لە وەڵامی داواكاری مامۆستایانی مانگرتوو لە سلێمانی كە مانگی رابردوو ئاراستەی كراوە، رایگەیاندووە، موچەی مانگی 12ی ساڵی رابردوویان رادەستی حكومەتی هەرێمی كوردستان كردووە.
هاووڵاتییەكی كوردی تەمەن 85 ساڵ لە باكوری كوردستان سزای زیاتر لە شەش ساڵ زیندانیكردنی بەسەردا سەپێنرا.
بەپێی میدیاكانی باكوری كوردستان، پۆلیسی توركیا لە شاری چەولیگ، هاووڵاتییەكی تەمەن 85 ساڵی بەناوی محەمەد زەكی دەستگیركردووە و رەوانەی زیندانی خارپێت كراوە، دادگاش بەتۆمەتی ئەندامێتی لە پەكەكە، سزای شەش ساڵ و سێ مانگ زیندانیكردنی بەسەردا سەپاندووە.
پێشتریش ئەو هاووڵاتییەی باكوری كوردستان لە 16ی ئەیلولی 2012 بە تۆمەتی تێكدانی یەكپارچەیی دەوڵەت دەستبەسەركرا، بەڵام دوای ساڵێك لە 19ی ئەیلولی 2013 ئازادكراوە.
سەرۆکایەتی کۆماری عیراق بەبۆنەی یادکردنەوەی راپەڕینی سلێمانی بروسکەیەکی پیرۆزبایی بڵاوکردەوە و رایگەیاندووە، ئەمڕۆ گەلەکەمان بەهۆی سیستمی دیموکراسیەوە، ژیانێکی ئازاد دەباتە سەر
دەقی بروسکەکەی سەرۆکایەتی کۆمار....
بە بۆنەی یادکردنەوەی راپەڕینی خەڵکی سلێمانی لە 7/3/1991 ئازادکردنی شاری سلێمانی لەژێر دەستی رژێمی دیکتاتۆری بەعس ، دروود لە رووحی پاکی شەهیدانی راپەرینی سلێمانی و هەموو شەهیدانی وڵاتەکەمان.سلێمانی هەموو کاتێک ،شاری سەربەستی و ئازایەتی بووە . ئازادبونی سلێمانی پاش رانیەی دەروازەی راپەرین ،وەرچەرخانێک بوو بۆ ئازادبوونی تەواوی شارەکانی تری کوردستان.
وەکو ئاشکرایە ئەمڕۆ گەلەکەمان بەهۆی سیستمی دیموکراسیەوە، ژیانێکی ئازاد دەباتە سەر، گەلی کوردستان تێکۆشانی کردوە بۆ دروستکردنی وڵاتێکی دیموکراسی و دادپەروەر ، داواکارین لە رۆڵەکانی گەلەکەمان یەکگرتوو بن و پارێزگاری لەسیستمی دیموکراسی و فیدراڵی و ژیانی ئازادی وڵاتەکەمان بکەین.
بافڵ جەلال تاڵەبانی سەرۆکی یەکێتیی نیشتیمانیی کوردستان بەبۆنەی رۆژی جیهانی ژنان پەیامێکی پیرۆزبایی بڵاوکردەوە و رایگەیاند: هەمیشە لەگەڵتان بووم و پشتیوان و پارێزەری بەدیهێنانی هەموو خواستەکانتان دەبم.
دەقی پەیامەکەی سەرۆک بافڵ.....
لە رۆژی ٨ی مارس رۆژی جیهانی ژنان، لە دڵەوە پیرۆزبایی گەرم لە ژنانی کوردستان، عیراق و جیهان دەکەم.
هیوادارم ئەمڕۆ سەرەتایەکی جددی و کارکردنی پێکەوەیی هەموومان بێت بۆ پارێزگاریکردن لە مافەکانی ژنان و پشتیوانیکردن لە خەباتیان و نەهێشتنی جیاکاری و هێنانەدی داواکاری و خواستەکانیان.
ئێمە باوەڕی پتەو و نەگۆڕمان بە یەکسانی و فراوانکردنی بەشدارییان لە ناوەندەکانی دەسەڵات و بڕیاردا هەیە، لەسەر بنەمای ئەم پرەنسیپە چەسپاوە زەمینەی زیاتر دەڕەخسێنین بۆ ژنان تاوەکو لەناو ریزەکانی یەکێتیدا خەبات بکەن و شانبەشانی کاری رێکخراوەییان، پێکەوە خەباتی ژنان جۆشبدەینەوە و نەهێڵین لەژێر هیچ پاساوێکدا ئازادییەکانتان لێبسەندرێتەوە.
لەم یادەدا سڵاوی وەفاداری دەنێرین بۆ هەموو ئەو ژنە تەوارانەی لە قۆناغەکانی خەباتی کوردایەتی بەشێک بوون لەکۆڕی تێکۆشان و قوربانییان بەخشیوە لەپێناو گەل و خاکەکەماندا، چ وەک ژنە پێشمەرگە و شۆڕشگێر، وەک دایک، مامۆستا، چالاکوان کە لە پێشەوەی کۆڕی تێکۆشاندا بوون، هەمیشە خۆمان بەقەرزارتان دەزانین و وەفاداری ماندوبوون و خەباتتان دەبین.
هەمیشە لەگەڵتان بووم و دەبم، پشتیوان و پارێزەری بەدیهێنانی هەموو خواستەکانتانم و لە ریزی پێشەوەی نەهێشتنی بەربەستەکانی بەردەمتان دەبم، تا ئێوەی ژنان رۆڵی گرنگتر بگێڕن لە هەرێمى کوردستان و وەک هەمیشە بەشێکبن لە سەرکەوتن و گۆڕانکارییەکان لە هەموو کایەکانی ژیاندا.
بافڵ جەلال تاڵەبانی
سەرۆکی یەکێتیی نیشتمانیی کوردستان
بەڕێوەبەرایەتی گشتی کەشناسی هەرێم بڵاویکردەوە، پێشبینی دەکرێت ئەمڕۆ ئاسمان هەورى باراناوى دەبێت لە زۆربەى کاتەکاندا ، رێژەى دابارین لە پارێزگاكانی سلێمانی و هەڵەبجە و ئیدارەی گەرمیان زیاترە بەراورد بە ناوچەکانى ترى هەرێم .
ئاماژەی بەوەشکردووە، خێراى با / لەسەرخۆ – مامناوەند لەنێوان (10-20) کم/س دەبێت ، هاوکات پلەکانی گەرما / بە نزیکەی ( 2 – 4 ) پلەى سیلیزى نزمتر دەبێت لە تۆمارکراوەکانی دوێنێ.
کەشناسی هەرێم راشیگەیاندووە، سبەی یەکشەممە ئاسمان هەوری تەواو دەبێت لەگەل بارینی باران لە هەندێ كات و شوێن ، لە كاتەكانی ئێوارەدا هەندێ جار باران بارین بەشێوەی لێزمە باران دەبێت .
بەرزترین پلەکانی گەرمای پێشبینیکراو بە پلەی سیلیزی
هەولێر : 19 پلەی سیلیزی
سلێمانی : 16 پلەی سیلیزی
دهۆک : 18 پلەی سیلیزی
کەرکوک : 20 پلەی سیلیزی
زاخۆ : 18 پلەی سیلیزی
هەڵەبجە : 16 پلەی سیلیزی
فەرماندەی گشتی هەسەدە لە رەقە لەگەڵ فەرماندەی هێزەكانی هاوپەیمانان و شێخەكانی تەبقە و رەقە كۆبووەوە, بۆ تاوتوێكردنی دوایین پێشهاتە سیاسی و ئەمنییەكانی باكوور و رۆژهەڵاتی سوریا.
بەگوێرەی راگەیەنراوی كۆبوونەوەی مەزڵوم كۆبانێ فەرماندەی گشتی هەسەدە لەگەڵ و فەرماندەیی هێزەكانی هاوپەیمانان و شێخەكانی تەبقە و رەقە، كۆبوونەوەكە هاوڕابووە لەسەر ئەوەی قەیرانی سوریا تەنها بە گفتوگۆی سوریا-سوریا چارەسەردەكرێت، هەروەها بڕیاریداوە بە پێكهێنانی لیژنەیەك لە تەواوی پێكهاتەكانی ناوچەكە بۆ گفتوگۆكردن لەگەڵ ئیدارەی نوێی سوریا سەبارەی بە ئایندەی ناوچەكە و دەوڵەتی سوریا.
هاوكات، كۆبوونەوەكە ئامادەیی نیشانداوە بۆ تێكەڵكردنی دامودەزگاكانی ئیدارەی خۆبەڕێوەبەری لەگەڵ دەوڵەتی سوریا بە رێككەوتن، راشیگەیاندووە، لە ئایندەیەكی نزیكدا پاكێجێكی چاكسازی ئیداری و ئابووری لە بەرژەوەندی خەڵكی ناوچەكە دەخرێتەبواری جێبەجێكردنەوە.
كۆبوونەكەوە جەختیلەوەشكردووەتەوە، هیچ ئەندامێكی رژێمی پێشووی سوریا یاخود گروپە هاوپەیمانەكانی ئێران لەناوچەكانی ژێر دەسەڵاتی هەسەدەدا نین، ئاماژەی بەوەشداوە، بەبۆنەی مانگی رەمەزانی پیرۆزەوە كاردەكەن بۆ دەركردنی لێبوردن بۆ زیندانیانی یاسای گشتی.