کەشناسیی هەرێم پێشبینییەکانی کەشوهەوای ئەمڕۆ و سبەی بڵاوکردەوە و دەڵێت، پلەکانی گەرما بەجۆرێک بەرزدەبنەوە، نزیک دەبنەوە لە 30 پلەی سیلیزی و لە هەندێک شوێنیش دەگەنە زیاتر لەو پلەیە.

کەشناسیی هەرێم رایگەیاند، ئەمڕۆ هەینی، ئاسمان ساماڵ دەبێت و پلەکانی گەرما نزیکەی 1 بۆ 2 پلەی سیلیزی بەرزدەبنەوە، کەمێکیش خێرایی با زیاد دەکات و لەنێوان 10 بۆ 20 کیلۆمەتر لە سەعاتێکدا دەبێت.

ئەوەشی خستووەتە روو، سبەینێ شەممە، بەهەمان شێوە ئاسمان ساماڵ دەبێت، پلەکانی گەرما 1 بۆ 2 پلەی دیکە بەرزتر دەبنەوە و خێرایی با وەک خۆی دەمێنێتەوە.

بەرزترین پلەکانی گەرمای پێشبینیکراو بە پلەی سیلیزی:

هەولێر: 29  پلەی سیلیزی

سلێمانی: 27 پلەی سیلیزی

دهۆک: 28  پلەی سیلیزی

کەرکوک: 31 پلەی سیلیزی 

زاخۆ: 29 پلەی سیلیزی

هەڵەبجە: 23 پلەی سیلیزی

سۆران: 27 پلەی سیلیزی

حاجی ئۆمەران: 16 پلەی سیلیزی

گەرمیان: 31 پلەی سیلیزی

دوای ئەوەی شەوی رابردوو لە روداوێکی تەقەکردندا پزیشکێک هاوسەر و سێ ئەندامی بنەماڵەی هاوسەرەکەی کوشت، ئاسایشی هەولێر دەستگیرکردنی پزیشکەکەی راگەیاند و دەڵێت، رووداوەکە بەهۆی کێشەی کۆمەڵایەتییەوە بووە.

ئاسایشی هەولێر رایگەیاند، تۆمەتبار 'س. م. ع' کە پیشەی پزیشکە، بەهۆی کێشەی کۆمەڵایەتییەوە بە چەکی جۆری دەمانچە هاوسەرەکەی و خەسوو و خەزور و خوشکێکی هاوسەری کوشتووە.

روداوەکە لە گەڕەکی کەرتی 5ی فەرمانبەران رویدا، دوای روداوەکە و گەیاندنی تەرمەکان بە پزیشکی داد و ئەنجامدانی توێکاری، بەیانی ئەمڕۆ تەرمی ئەو چوار کەسە لە گۆڕستانی کەسنەزان لە هەولێر بەخاک سپێردران.

بەپێی زانیارییەکان، ئەو پزیشکەی تاوانەکەی ئەنجامداوە یەکێک بووە لە پزیشکە بەناوبانگەکان و خاوەنی نەخۆشخانەیەکی تایبەتە لە هەولێر، هاوسەرەکەشی بە ناوی سانا کەمال بەهەمان شێوە پیشەی پزیشک بووە و پسپۆڕی نەخۆشییەکانی ژنان و منداڵبوون بووە.

جگە لەوە خوشکی هاوسەرەکەشی بەناوی سەناریا کەمال، بەهەمان شێوە پیشەی پزیشک بووە و پسپۆڕییەکەی تیشک و سۆنار بووە.

پەیامنێری کوردسات نیوز ئەوەی خستە روو، بەپێی وتەی کەسوکاریان ئەو دوو هاوسەرە ماوەی زیاتر لە ساڵێکە ئەو کێشەیەیان هەیە و خاوەنی چوار منداڵ بوون.

ئەوەشی خستە روو، بەپێی زانیارییەکان، دەوترێت یەکێک لە منداڵەکانیان لە روداوەکەدا بریندار بووە و لەئێستادا چارەسەری پزیشکی بۆ دەکرێت.

كەسێك لە هەولێر تەقە لە ماڵی باوكی هاوسەرەكەی دەكات و جگە لە هاوسەرەكەی سێ كەسی دیكەی ئەو بنەماڵەیە دەكوژێت.

پەیامنێری كوردسات نیوز لە هەولێر رایگەیاند: شەوی پێنجشەممە پیاوێك تەقەی لە ماڵی باوكی هاوسەرەكەی كردوە و هاوسەر و دایك و باوك و خوشكی هاوسەرەكەی كوشتوە.

بە پێی زانیارییەكان ئەو كەسەكەی هێرشەكەی ئەنجام داوە پیشەی پزیشك بوە و بەهۆی كێشەی كۆمەڵایەتییەوە  بە چەك هێرشی كردوەتە سەر ماڵی خەزوری و جگە لە هاوسەرەكەی ، خەسو و خەزور و خوشكی هاوسەرەكەی كوشتوە.

پەیامنێری كوردسات نیوز ئاماژەی بەوە كردوە كە هاوسەری بكوژەكە پیشەی پزیشك بوە و بە تاپڕ تەقەی لەو بنەماڵەیە کردووە و سەرجەم تەرمەكان رەوانەی پزیشكی داد كراون.

وەزارەتی دارایی و ئابووری هەرێمی کوردستان لە رێگەی بەڕێوەبەرایەتی گشتی ژمێرکارییەوە راگەیەندراوێکی بڵاوکردەوە سەبارەت بە مووچەی مانگی شوباتی کەس و کاری شەهیدان و ئەنفالکراوان.

هەرچەندە بەپێی خشتەی پێشتر راگەیەنراو، وابڕیاربوو رۆژی یەکشەممە (16)ی ئازار مووچەی مانگی شوباتی کەس و کاری شەهیدان و ئەنفالکراوان دابەش بکرێت، بەڵام بەهۆی ئەوەوە کە ئەو رۆژە دەکەوێتە ساڵیادی کیمیابارانکردنی هەڵەبجەوە، وەزارەتی دارایی دەڵێت: "بۆ ئەو بەڕێزانەی لەو ڕۆژەدا بەهۆی بەشداریان لە یادی کیمیابارانی هەڵەبجە ناتوانن مووچەکانیان وەربگرن، ڕۆژانی دواتر دەتوانن سەردانی بانکەکان بکەن و مووچەکانیان وەربگرن".

شایەنی ئاژە پێدانە بەپێی خشتەی نوێی موچە کە وەزارەتی دارایی رایگەیاندووە، موچەی مانگی دووی کەس و کاری شەهیدان و ئەنفالکراوان دەکەوێتە ڕۆژی 16/3ەوە کە یادی کیمیا بارانی هەڵەبجەیەو ئەمەش ناڕەزایی کەسوکاری کیمیاباران و شەهیدانی لێکەوتەوە بەهۆی ئەوەی موچەی مانگی 2 لەمانگی سێداو لەو رۆژەشدا دابەشدەکرێت.

دابینکردنی کارەبای 24 سەعاتی ئەو پرۆژە و خەونەیە هاووڵاتیانی هەرێم دەمێکە چاوەڕوانی دەکەن، بەڵام ئێستا کە چووەتە بواری جێبەجێکردنەوە هاووڵاتیانی کردووە بە دوو بەشەوە و لەبری دڵخۆشی و پێشوازی، رەتی دەکەنەوە.

لە ساڵی 2024دا حکومەتی هەرێم بەردی بناغەی پرۆژەی رووناکی دانا، بەپێی دوایین ئاماری حکومەت زیاتر لە 100 هەزار هاوبەشی کارەبا لێی سودمەندن، بڕیاریشە تاوەکو کۆتایی ساڵی 2026 تەواوی هەرێم بگرێتەوە.

ئەوەی هاووڵاتیانی نیگەران کردووە لەم پرۆژەیەدا ئەوەیە، نرخی کارەبایە، کە هەر کیلۆواتێک بە 156 دینار دیاری کراوە.

ئەگەر ئەو نرخەی حکومەتی هەرێم دایناوە تەنها بۆ بۆیلەری ماڵان هەژمار بکرێت و گریمان ئەگەر ماڵێک رۆژانە بۆماوەی 5 سەعات بۆیلەرەکەیان دابگیرسێنن و بۆیلەرێکی 3000 واتی بێت، ئەوا دەکاتە 3 کیلۆوات، 3 کیلۆواتەکەش جاران بکرێتەوە لەگەڵ 5 سەعاتی رۆژەکەدا دەکاتە 15 کیلۆوات، ئەوەش جارانی نرخی هەر کیلۆواتێک بکرێتەوە کە 156 دینارە، ئەوا بۆ رۆژانە دەکاتە دوو هەزار و 340 دینار بۆ هەر رۆژێک، ئەوەش بکرێتەوە بە مانگانە، دەکاتە 70 هەزار و 200 دینار.

بەوجۆرەش تەنها بە بەکارهێنانی رۆژانە 5 سەعاتی بۆیلەر، مانگانە زیاتر لە 70 هەزار دینار بۆ هەر ماڵێک دێتەوە.

هەر بۆیە هاووڵاتیان باس لەوەدەکەن، دڵخۆشن بەوەی کارەبای 24 سەعاتیان هەبێت، بەڵام پێویستە حکومەت ئاستی داهات و بژێوی هاووڵاتیان لەبەرچاو بگرێت و نرخێکی گونجاوی بۆ دابنێت.

پۆلیسی ئەکرێ رایگەیاند، تەرمی ژنێک لەناو زێی گەورەدا دۆزراوەتەوە، کە مل و قاچەکانی بەستراونەتەوە.

پۆلیسی ئاکرێ رایگەیاند، کاتژمێر 11ی پێشنیوەڕۆی ئەمڕۆ تەرمی ژنێکیان لەناو رووباری زێی گەورە، لە نزیک گوندی زەنگلی سنووری ناحیەی کەلەک سەر بە قەزای بەردەڕەش دۆزیوەتەوە.

ئاماژەی بەوەشکردووە، تیمی مەلەوانی قەزای خەبات تەرمەکەیان دەرهێناوە، کە تەرمەکە مل و قاچەکانی بە تەلی ئاسن بەستراونەتەوە و پێشتر خنکێنراوە.

دەشڵێت، بەهۆی ئەوەی کاتی زۆر بەسەر رووداوەکەدا تێپەڕێوە، تەرمەکەی ناناسرێتەوە.

لەوبارەیەوە بەرپرسی راگەیاندنی پۆلیسی ئاکرێ بۆ کوردسات نیوز باسی لەوەکرد، بەهۆی نزیکی شوێنەکە لە هەولێر تەرمەکە بۆ پزیشکی دادی هەولێر نێردراوە و بە بڕیاری دادوەر پەڕاوی لێکۆڵینەوەی بۆ کراوەتەوە.

دادگای تێهەڵچونەوەی سلێمانی دوو بڕیاری لە بەرژوەندی رۆژنامەنووسان دەركرد .

بەپێی نووسراوێكی سەرۆكایەتی دادگای تێهەڵچوونەوەی سلێمانی، لەبەر بەرژەوەندی گشتی و باشتر راپەڕاندنی كارەكان، دادگاكە دوو بڕیاری لەبارەی رۆژنامەنووسانەوە دەركردووە.

بەپێی بڕیاری یەكەم، دادگای لێكۆڵینەوەی (سلێمانی/1 ) تایبەتمەند دەبێت بە بینینی ئەو سكاڵایانەی كە پەیوەندیدارن بە رۆژنامەنووسان لەناو شاری سلێمانی و یاسای ژمارە 35ی ساڵی 2007؛ یاسای رۆژنامەگەری لە كوردستان جێبەجێ دەكرێت.

بەپێی بریاری دوەمیش، سەرجەم داواكان لە دوای كۆتایی هاتنی قۆناغەكانی لێكۆڵینەوە، ئاراستەی دادگای كەتنی سلێمانی/6 دەكرێن بۆ یەكلا كردنەوەیان.

 قائیمقامییەتی سلێمانی بۆ رێگریکردن لە بەرزبوونەوەی نرخی گۆشتی سوور، بردنە دەرەوەی ئاژەڵی زیندووی بۆ ناوەڕاست و خوارووی عیراق قەدەغە کرد.

قائیمقامییەتی سلێمانی رایگەیاند، بەهۆی ئەوەی بەرهەمی پرۆژەکانی ناوخۆی مریشک و هێلکە لە وەرزی بەهاردا بە رێژەیەکی بەرز بەرهەم دەهێنرێت، بڕیاریان داوە لە پڕکردنەوەی پێداویستی بازاڕدا پشت بە مریشک و هێلکەی پرۆژەکانی ناوخۆ ببەسترێت.

ئاماژەی بەوەشکردووە، لە چوارچێوەی بریاڕ و رێنماییەکانی حکومەتی هەرێمی کوردستان، رێگە بە هاوردەکردنی گۆشت و ئاژەڵی زیندوو، ماسی دەدرێت و هاوردەکردنیان لە مانگی ئازاردا کراوە دەبێت.

قائیمقامییەتی سلێمانی ئاماژەی بەوەشکردووە، لە ئێستادا خواستی هاووڵاتیان لەسەر گۆشتی سوور زۆرە و بۆ رێگریکردن لە بەرزبوونەوەی نرخەکەشی، ئاوات محەمەد قائیمقامی سلێمانی لایەنەکانی راسپاردووە رێگری لە بردنە دەرەوەی ئاژەڵی زیندوو بکەن بۆ ناوەڕاست و خوارووی عیراق.

ئەوەش هاتووە، لەم وەرزەدا بەرهەمەکانی ناوخۆ بەتەواوەتی پێ نەگەیشتوون بۆیە رێگە دەدرێت بە هاوردەکردنی چەند جۆرێک لە سەوزە و میوە بەپێی پێویست، بە مەرجێک بەشێوەیەکی تەندروست و لەژێر چاودێریدا هاوردە بکرێت.

قائیمقامیەتی سلێمانی جەختی لە بەردەوامی قەدەغەی هاوردەکردنی فاسۆلیای تەڕ کردووەتەوە، چونکە لە ماوەی رابردوودا بەهۆی بڵاوبوونەوەی جۆرێکی نەخۆشی تیایدا قەدەغەی کردبوو و باسی لەوەکردووە، لە هەرشوێنێکی سەوزە و میوەفرۆشیدا دەستی بەسەردا بگیرێت دەبێت لەناو ببرێت.

بەهۆی لێچوونی غاز لە ماڵێکدا لە رانیە، تەقینەوە روویدا و بەهۆیەوە کەسێک بریندار بوو.

تەقینەوەکە بەجۆرێک بووە غازی بۆیلەری ماڵەکە لێچوونی هەبووە و بە ماڵەکەدا بڵاوبووەتەوە، ئەوەش بووەتە هۆکاری تەقینەوەکە لە ماڵەکەدا.

بەهۆی تەقینەوەکەوە کەسێک بریندار بووە کە لە ئێستادا بەمەبەستی وەرگرتنی چارەسەر گواستراوەتەوە بۆ نەخۆشخانە، هەروەها زیانی ماددی بە تەواوی ماڵەکە گەیشتووە.

لە ئێستادا تیمەکانی بەرگری شارستانی سەرقاڵی لێکۆڵینەوەی زیاترن لە رووداوەکە.

کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و بەپێی پێشبینییەکان، کەش جێگیر دەبێت و پلەکانی گەرما زیاتر بەرز دەبنەوە.

کەشناسیی هەرێم رایگەیاند، ئەمڕۆ پێنجشەممە، ئاسمان ساماڵ و پەڵەهەور دەبێت و پلەکانی گەرما یەک پلە بەرزتر دەبنەوە لە دوێنێ.

ئاماژەی بەوەشکرد، سبەینێ هەینی، بەهەمان شێوە ئاسمان بە گشتى ساماڵ دەبێت و پلەکانی گەرما یەک بۆ دوو پلەی دیکە بەرز دەبنەوە.

بەرزترین پلەکانی گەرمای پێشبینیکراو بە پلەی سیلیزی:

هەولێر: 25 پلەى سیلیزى

سلێمانى: 24 پلەى سیلیزى

دهۆک: 24 پلەى سیلیزى

زاخۆ: 26 پلەى سیلیزى

هەڵەبجە: 21 پلەى سیلیزى

کەرکوک: 26 پلەى سیلیزى

سۆران: 24  پلەى سیلیزى

حاجی ئۆمەران: 14 پلەى سیلیزى

گەرمیان: 27 پلەى سیلیزى

بەرپرسی دەزگای گشتیی کاروباری مین بە کوردسات نیوزی راگەیاند، بەهۆی تەقینەوەی مین هاووڵاتییەکی سنووری سۆران لە رەواندز گیانی لەدەستدا.

رابەر ئەنوەر بەرپرسی راگەیاندنی دەزگای گشتیی کاروباری مین بە کوردسات نیوزی راگەیاند، ئەو هاووڵاتییە خەڵکی گوندی جۆلەمێرگەی سنووری سۆران بووە و کاسبکار بووە، بەمەبەستی کۆکردنەوەی گیای بەهارە رووی لە چیای رۆڵە کردووە لە سنووری رەواندز.

باسی لەوەشکرد، ئەو هاووڵاتییە تەمەنی 58 ساڵ بووە و خێزادارە، لەوکاتەی مینەکەی پێدا تەقیوەتەوە گیانی لەدەستداوە.

ئەوەشی خستە روو، ئەوە دووەم رووداوی لەو جۆرەیە کە لەمساڵدا لەو سنوورە رووبدات.

لە رێورەسمێکدا لە شاری سلێمانی، ئەمڕۆ چوارشەممە، باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی، یاداشتنامەی لێکتێگەیشتنی لەگەڵ رەفیق ساڵح، سەرۆکی بنکەی ژین ئیمزاکرد.

بەپێی راگەیەندراوێکی هاوبەشی هەردوولا، ئەم رێککەوتننامەیە چەندین بواری گرنگی هاوکاری نێوان هەردوو لا لەخۆ دەگرێت، بەتایبەت لە بواری ئەرشیفکردن، کۆکردنەوەی بەڵگەنامە، و پڕۆژەی هاوبەشی کەلتووری.

باڵیۆز د. محەمەد سابیر، لە دیدارەکەدا رایگەیاند: "دامەزراندنی ئەم دامەزراوەیە بەناوی سەرۆک مام جەلال یەکێکە لەو کەلەپوورە پاک و جوانانەی بۆمان دەمێنێتەوە و خزمەتێکی باش بە ئەرشیفی کوردی دەکات."

سەرۆکی دامەزراوەکە جەختی کردەوە کە کارکردنیان لە دیدگەی سەرۆک مام جەلالەوە سەرچاوەی گرتووە و دەیانەوێت رۆڵێکی بوونیادنەرانە لە ئاستی کۆمەڵگە بگێڕن بەتایبەت لە بوارەکانی ئەرشیفکردن، کۆکردنەوەی بەڵگە، رۆشنبیری، کولتووری، زانستی و گەشەی مرۆیی.

لێکتێگەیشتنەکە ئەم خاڵانەی خوارەوە لەخۆ دەگرێت:

- هاوبەشی و هاوکاری نێوان هەردوو لا لە کاری ئەرشیفیدا و بەدەستهێنانی بابەتی ئەرشیفی لەڕێگەی پێوەندییە ناوخۆیی و دەرەکییەکانەوە.

- هاوئاهەنگی بۆ بەشداریکردن لە چالاکی و کۆنفرانسی نێودەوڵەتی تایبەت بە کاری ئەرشیفی لە ناوەوە و دەرەوەی هەرێمی کوردستان.

- سوود وەرگرتنی بەشی ئەرشیفی دامەزراوەی سەرۆک جەلال تاڵەبانی لە شارەزایی و ئەزموونی تیۆری و کرداریی کاری ئەرشیفیی بنکەی ژین و بە پێچەوانەوە.

- هاوئاهەنگی بۆ دابینکردنی سەرچاوەی ئەرشیفی بۆ توێژەرانی زانکۆکان و ناوەندە ئەکادیمییەکان بەبێ جیاوازی.

- ئەنجامدانی پڕۆژەی هاوبەشی کەلتووری و بەڵگەنامەیی بۆ خزمەتکردنی بواری ئەرشیف و بەڵگەنامەی کوردستان.

شایانی باسە، بنكەى بەڵگاندن و لێکۆڵینەوەی ژین، ناوەندێكى ئەرشیفیى ناحكوومییە كە ساڵى2004 لە شارى سلێمانى دامەزراوە. ئەم ناوەندە تەرخانی كۆكردنەوە، پاراستن، ڕێكخستن و زیندووكردنەوەى سامانى بەڵگەنامە، دەستنووس، رۆژنامەگەری و كتێبی تایبەت بە كورد و كوردستان و تۆماركردنى مێژووى زارەكیى كوردەوارییە.

ئەندامێکی ئەنجومەنی پارێزگای کەرکوک رایدەگەیەنێت: هەرکاتێک دەمانەوێت راژەی مامۆستایانی ناوچە دابرێدراوەکان بگوازینەوە سەر حکومەتی بەغداد، هەرێمی کوردستان کێشەمان بۆ دروست دەکات.

پەروین فاتیح ئەندامی ئەنجومەنی پارێزگای کەرکوک، لەمیانی بەشداریکردنی لە بەرنامەی پرسی رۆژ لە کوردسات نیوز رایگەیاند، هەر کاتێک نزیک دەبینەوە لە گواستنەوەی راژەی مامۆستایانی کوردی بۆ سەر حکومەتی فیدراڵ، هەرێم گرفتمان بۆ درووست دەکات و رێگر دەبێت لە گواستنەوەی راژەکانیان.

وتیشی؛ حکومەتی عیراق دەیەوێت ئەم مامۆستا و فەرمانبەرانە، وەکو تازە دامەزراو مامەڵەیان لەگەڵ بکات، لەکاتێکدا هەندێک لە مامۆستاکان زیاتر لە 30 ساڵ خزمەتی هەیە.

پەروین فاتیح راشیگەیاند، حکومەتی هەرێم دەیەوێت ئەو مامۆستایانە بەبێ شایستەی دارایی بگوازێتەوە بۆ سەر حکومەتی بەغداد، حکومەتی عیراقیش دووبارە دایابمەزێنێتەوە، بۆ ئەوەی پارەی راژەکانیان بمێنێتەوە و حکومەتی هەرێم کەسانی نوێ لەسەر راژەکانیان دابمەزرێنێت، ئەمەش لە هیچ یاسایەکدا شتی وا بوونی نییە.

جێگەی ئاماژەیە، زیاتر لە 13 هەزار مامۆستا و فەرمانبەری خوێندنی کوردی لە ناوچە دابڕێندراوەکان هەن و داواشدەکەن راژەکانیان بۆ سەر حکومەتی فیدراڵ بگوازرێتەوە.

قوباد تاڵەبانی، جێگری سەرۆکوەزیران پێشوازیکرد لە لیۆ جیون، کونسوڵی گشتیی چین لە هەرێمی کوردستان و لە کۆبوونەوەی نێوانیاندا چۆنییەتی پەرەپێدانی پەیوەندییەکان و چەند پرسێکی جێی بایەخی هەردوولا گفتوگۆیان لەبارەوە کرا.

لە سەرەتای کۆبوونەوەکەدا کە ئەمڕۆ لە هەولێر بەڕێوەچوو، باسی دۆخی سوریا و رێککەوتنی ئەم دوایەی نێوان هێزەکانی سوریای دیموکراتیک و حکومەتی کاتیی سوریا کرا. لەمبارەیەوە قوباد تاڵەبانی، رێککەوتنەکەی بە هەنگاوێکی گرنگ دانا بە ئاراستەی سەقامگیری و دابینکردنی مافەکانی کورد و پێکهاتەکانی دیکەی سوریا و هیوای خواست ئەم رێککەوتنە ببێتە دەستپێکێک، بۆ ئەوەی لایەنەکانی سوریا بتوانن لە رێگەی گفتوگۆ و لێکتێگەیشتنەوە کێشەکانی نێوانیان چارەسەر بکەن.

لە بەشێكی دیکەی کۆبوونەوەکەدا قسە لەسەر پرۆسەی گەشەپێدان و بە تایبەتیش گەشەپێدانی ناوچەیی لە هەرێمی کوردستان کرا. جێگری سەرۆکوەزیران روونیکردەوە کە ئامانجیانە بە شێوەیەکی هاوسەنگ هەموو شار و ناوچەکانی کوردستان لە بوارەجیاوازەکاندا گەشە بکات و داواشیکرد وڵاتی چین کە خاوەنی ئەزمونێکی دەوڵەمەند و سەرکەوتووە لەمبارەیەوە هاوکاری هەرێم بکات.

هەر لە کۆبوونەوەکەدا کونسوڵی گشتیی چین ئاماژەیدا بە پەرەپێدانی تواناکان لە هەرێمی کوردستان و رایگەیاند زیاتر لە 500 هاووڵاتی هەرێم سودمەند بوون لە بەرنامەی پەرەپێدانی تواناکان و  لە داهاتووشدا خولەکانی راهێنان بۆ پەرەپێدانی تواناکان بەردەوام دەبێت.

لەمبارەیەوە قوباد تاڵەبانی سوپاسی حکومەتی چین و کونسوڵی گشتیی ئەو وڵاتەی کرد و رایگەیاند، بەردەوامبوون لەسەر بەرنامەی پەرەپێدانی تواناکان کاریگەری باشی دەبێت لەسەر بەهێزتربوونی پەیوەندییەکانی نێوان هەرێم و وڵاتی چین.

لە تەوەرێکی دیکە گفتوگۆکرا لەبارەی چۆنییەتی بەڕێوەبردنی باشتری سەرچاوە ئاوییەکانی هەرێمی کوردستان و لەم چوارچێوەیەدا کاری هاوبەش و گواستنەوەی ئەزمونی چین بۆ کوردستان بە پێویست زانرا.

وەزارەتی دارایی حکومەتی هەرێمی کوردستان لیستی موچەی مانگی دووی 2025ـی بڵاوکردەوە.

بەپێی ئەو لیستەی وەزارەتی دارایی هەرێم بڵاویکردوەتەوە، سبەینێ پێنجشەممە دابەشکردنی موچەی مانگی شوبات فەرمانبەرانی هەرێم دەست پێدەکات و رۆژی سێشەممەی هەفتەی داهاتوو کۆتایی بە دابەشکردنی موچە دێت.

جێگەی ئاماژەیە، لە کۆبوونەوەی ئەنجومەنی وەزیران کە ئەمڕۆ بەڕێوەچوو، جەخت لەوەکراوەتەوە لیستی موچەی مانگی سێ بە زووترین کات ئامادە بکرێت و رەوانەی بەغداد بکرێت، بۆ ئەوەی پێش جەنگی رەمەزان فەرمانبەران موچەیەکی دیکە وەربگرن.