سەرۆککۆمار
د. لەتیف رەشید سەرۆک کۆماری عیراق ئەمڕۆ لەکۆشکی بەغداد، پێشوازیکرد لە موحەمەد کازم ئال سادق باڵیۆزی کۆماری ئیسلامی ئێران.
لەمیانی دیدارەکەدا باسیان لەچۆنیەتی پەرەپێدانی پەیوەندییە دووقۆڵییەکانی نێوان هەردوو وڵات و ئاسۆی هاوکاری لەبوارە جیاجیاکاندا کرد بۆ خزمەتکردنی خواستەکانی دوو گەلی دۆست.
هەر لە دیدارەکەدا باس لەدوایین پێشهاتەکانی ناوچەکە و جیهان کرا، جەختیش لەگرنگی بەردەوامی هەماهەنگی نێوان هەردوو وڵاتی دراوسێ بۆ چەسپاندنی بنەماکانی ئاشتی و سەقامگیری لەناوچەکەدا کرایەوە.
سەرۆکایەتیی کۆمار بە توندی ئەو دەنگۆیانە رەتدەکاتەوە کە باس لەوە دەکەن د. لەتیف رەشید بە 90 ملیۆن دینار خانەنشین کرابێت و سوپاسنامەی ئاراستەی وەزارەتی دارایی کردبێت.
لە راگەیەندراوێکدا سەرۆکایەتیی کۆمار ئاشکرایکردووە، لە هەندێک پلاتفۆرمی سۆشیاڵ میدیا هەواڵێکی "نادروست" بڵاوکراوەتەوە گوایە سەرۆک کۆمار سوپاسنامەی بۆ وەزارەتی دارایی ناردووە لەبەرامبەر خانەنشینکردنی بە بڕی 90 ملیۆن دیناری مانگانە.
سەرۆکایەتیی کۆمار جەخت دەکاتەوە، ئەو هەواڵە دوورە لە راستییەوە و هیچ بنەمایەکی نییە، نە هیچ نووسراوێکی رەسمی دەرچووە و نە هیچ پەیوەندی و کۆبوونەوەیەکیش لەگەڵ وەزارەتی دارایی لەوبارەیەوە ئەنجام دراوە.
لە بەشێکی دیکەی راگەیەندراوەکەدا هاتووە: "ئەمە بەشێکە لە پیلانی بڵاوکردنەوەی زانیاریی هەڵە و ناوزڕاندن کە لەلایەن ترسنۆک و گەندەڵکارانەوە دەکرێت بە مەرامی زیانگەیاندن بە سەرۆک کۆمار و دامەزراوەکانی دەوڵەت".
سەرۆکایەتیی کۆمار هۆشداریش دەدات لە مەترسیی بڵاوکردنەوەی هەواڵی چەواشەکارانە و رایدەگەیەنێت، مافی یاسایی خۆیان بەکاردەهێنن بۆ سزادانی ئەو کەسانەی بەرپرسیارن لە هەڵبەستنی ئەو جۆرە هەواڵە بێ بنەمایانە.
بە بۆنەی ساڵیادی دامەزراندنی دەزگای میدیایی کوردساتەوە، د. لەتیف رەشید، سەرۆک کۆماری عیراق، پەیامیکی پیرۆزبایی ئاراستەی دەزگاکە کردوە و تێیدا هاتووە؛ بەو ئومێدەین ئەم کاروانە میدیاییە گەشاوەیە لە کایەی میدیای عیراقیدا بەردەوامی هەبێت
دەقی پەیامەکە
بەڕێزان بەڕێوەبەرو کارمەندانی کەناڵی کوردساتی ئەزیز
جوانترین پیرۆزبایی ئاڕاستەی بەڕێوەبەرایەتی و تەواوی ستافی کەناڵی ئاسمانیی کوردسات دەکەین بەبۆنەی بیست و شەشەمین ساڵیادی دامەزراندنی، بەو ئومێدەی ئەم کاروانە میدیاییە گەشاوەیە لە کایەی میدیای عێراقیدا بەردەوامی هەبێت.
لەکاتێکدا پیرۆزبایی ئەم سەرکەوتنە بەردەوامە و لێهاتووییە پیشەییەتان لە گەیاندنی پەیامە میدیاییەکەتان لێ دەکەین، ڕۆڵی دیارتان بەرز دەنرخێنین لە خزمەتکردنی پرسەکانی کۆمەڵگەی عێراقی و کوردستانی و چەسپاندنی بەهاکانی هۆشیاری و بەرپرسیارێتی، و گواستنەوەی ڕاستییەکان بە پیشەییبوون و پابەندبوونەوە.
هەموو ساڵێک بە خۆشی، بە هیوای درەوشانەوەی بەردەوام و داهێنان و بەخششی زیاتر بۆ ئێوەی بەڕێز
د.لەتیف جەمال رەشید
سەرۆک کۆماری عێراق
بەبۆنەی هاتنی ساڵی نوێوە، د. لەتیف رەشید، سەرۆک کۆماری عیراق پەیامێکی پیرۆزبایی ئاراستەی خەڵکی کوردستان و پێکهاتەجیاجیاکانی کردوە، جەختی کردوەتەوە لە پتەوکردنی پەیوەندیی و یەکڕیزی و پێکەوەژیانی ئاشتیانەی نێوان کۆمەڵانی خەڵک .
سەرۆک کۆمار ئاماژەی بەوەشکردوە؛ هەرێمی کوردستان هەمیشە پێشەنگی پێکەوەژیانی ئاشتیانە و نیشتمانی و رێزگرتن بووە لە هاووڵاتیان و پاراستنی ماف و ئازادییەکان.
ئومێدیشی خواستوە بە هاوبەشی و یەکڕیزی، بتوانین قۆناغێکی نوێ بۆ داهاتوویەکی باشتر بۆ نەوەکان بنیاد بنێین و لە زوترین کاتدا حکومەتی نوێ لە هەرێم و عیراق پێک بێت، کە خزمەت بە گەلی کوردستان و عیراق بکات.
د. لەتیف رەشید دەشڵێت؛ یەکڕیزی نیشتمانی هەنگاوێکی گرنگە بەرەو پێشخستنی وڵات و دەستەبەرکردنی ماف و دادپەروەری بۆ پێکهاتە نیشتمانییەکان
دەقی پەیامەکەی سەرۆک کۆمار
پەیامی پیرۆزبایی
…………….
بەبۆنەی هاتنی ساڵی نوێوە پیرۆزبایی خۆمان ئاراستەی کۆمەڵانی خەڵکی کوردستان و هەموو پێکهاتە جیاجیا نیشتمانییەکان دەکەین. هاتنی ساڵی نوێ وەک ئومێدێکی نوێیە بۆ پتەوکردنی پەیوەندیی و یەکڕیزی و پێکەوەژیانی ئاشتیانەی نێوان کۆمەڵانی خەڵک .
هەرێمی کوردستان هەمیشە پێشەنگی پێکەوەژیانی ئاشتیانە و نیشتمانی و ڕێزگرتنبوە لە هاوڵاتیان و پاراستنی ماف و ئازادییەکان. ئومێد دەکەم بە هاوبەشی و یەکڕیزی، بتوانین قۆناغێکی نوێ بۆ داهاتوویەکی باشتر بۆ نەوەکان بنیاد بنێین و لە زوترین کاتدا حکومەتی نوێ لە هەرێمی کوردستان و عێراق پێک بێت کە خزمەت بە گەلی کوردستان و عێراق بکات و لایەنەکان کۆک بن بۆ بەدیهێنان و پاراستنی مافی هەمووان کە لەدەستوردا جێگیرکراوە.
یەکڕیزی نیشتمانی هەنگاوێکی گرنگە بەرەو پێشخستنی وڵات و دەستەبەرکردنی ماف و دادپەروەری بۆ پێکهاتە نیشتمانییەکان
هیوامانە ئەم ساڵ کاری زیاتر بکرێت بۆ چەسپاندنی ئارامی و سەقامگیری و هەماهەنگی زیاتر، ساڵێک کە تیایدا ئاشتی بەرقەرار بێت و ڕێزگرتن و متمانە لە نێوان هەموواندا بەهێزتر بێت و هەرێمی کوردستان بە یەکدەنگی و هەماهەنگی بەرەو داهاتوویەکی باشتر هەنگاو بنێت.
ساڵی نوێتان پێروز بێت،
ساڵێک پڕ لە ئاشتی و پێکەویی و خزمەتکردنی زیاتری هاوڵاتیان
د. لەتیف جەمال ڕەشید
بەبۆنەی ساڵی نوێی زاینییەوە، د. لەتیف رەشید، سەرۆک کۆمار پەیامێکی پیرۆزبایی بڵاوکردەوە و هیوای خواستووە ساڵی نوێ پڕ بێت لە دەستکەوتی نیشتمانی، و بەردەوام بین لە رێگای بونیادنان و چاکسازیدا و ئاواتەکانی گەلی عیراق بەدیبهێندرێت و ئاشتی و خۆشگوزەرانی باڵ بەسەر هەموواندا بکێشێت.
لە پەیامەکەیدا، سەرۆک کۆمار وێرای پیرۆزبایی گەرم لە هاووڵاتییانی عیراق، هیواشی خواستوە هەموان لە ئارامی و سەقامگیریدا بن.
دەقی پەیامەکە
بە بۆنەی هاتنی ساڵی نوێی زایینی، گەرمترین پیرۆزبایی ئاڕاستەی گەلەکەمان دەکەین، هیوادارین هەمووان زیاتر لە ئارامی و سەقامگیری و پێشکەوتن بەهرەمەند بن.
ئومێدەوارین ئەم ساڵە پڕ بێت لە دەستکەوتی نیشتمانی، و بەردەوام بین لە ڕێگەی بونیادنان و چاکسازیدا، و سەروەریی یاسا بچەسپێنین، و ئاواتەکانی گەلەکەمان لە ژیانێکی بە کەرامەت و ئارام بەدی بهێنین، کە ئاشتی و خۆشگوزەرانی باڵی بەسەردا بکێشێت.
د. لەتیف رەشید
سەرۆک کۆماری عیراق
د. لەتیف رەشید، پەیامێکی پیرۆزبایی یاراستەی سەرۆکی ئەنجومەنی نوێنەرانو دوو جێگرەکەی دەکات و هیوای سەرکەوتنیان بۆ دەخوازێت لە جێبەجێکردنی ئەرکەکانیاندا و ئاماژەی بەوەکردوە، ئەمڕۆ ئەنجومەنی نوێنەران یەکەم ئەرکی دەستووری خۆی لە وادەی خۆیدا جێبەجێ کرد.
د. لەتیف رەشید، سەرۆک کۆمار پەیامێکی پیرۆزبای بڵاوکردەوە و تێیدا پیرۆزبایی لە هەڵبژاردنی سەرۆکی ئەنجومەنی نوێنەران و دوو جێگرەکەی دەکات و هیوای سەرکەوتنیشیان بۆ دەخوازێت لە ئەرکەکانیاندا.
لە پەیامەکەدا هاتووە؛ ئەمڕۆ ئەنجومەنی نوێنەران یەکەم ئەرکی دەستووری خۆی لە وادەی خۆیدا جێبەجێ کرد و ئەمەش جەخت لەسەر هەستی قووڵی بەرپرسیارێتی نیشتمانی دەکاتەوە، کە سەرکردەکانی لایەنە سیاسییەکان و ئەندامانی بەشەرەفی نوێنەران هەستی پێدەکەن.
د. لەتیف رەشید ئاماژەی بەوەشکردوە، رۆڵی چاودێری ئەنجومەنی نوێنەران لە رۆڵی یاساداناندا گرنگە و خەڵک چاوەڕێی ئەوە دەکەن، کە ئەم ئەرکە چاودێرییە بە شێوەیەکی گونجاو جێبەجێ بکەن، چونکە ئەزموونێکی دیموکراسی راستەقینە مەحاڵە بەبێ ئەنجومەنێکی نوێنەرانی راستەقینە، کە توانای چاودێریکردنی ئەدای دەسەڵاتی جێبەجێکردن و دەستنیشانکردنی کەموکوڕییەکان و لێپرسینەوە لە سەرپێچیکاران هەبێت.
لە کۆتایی پەیامەکەشیدا، سەرۆک کۆمار هیوای سەرکەوتن بۆ ئەنجومەنی نوێنەران دەخوازێت لە جێبەجێکردنی ئەرکەکانیامدا.
د. لەتیف رەشید سەرۆک کۆماری عیراق، ئەمڕۆ سێشەممە 30ی کانوونی یەکەم ٢٠٢٥، لەکۆشکی سەلام، پێشوازی لە هەیسەم عەزیز عادل پارێزگاری زیقار کرد.
لە سەرەتای دیدارەکەدا، سەرۆک کۆمار مەرسومی سەرۆکایەتیی تایبەت بە دامەزراندنی وەک پارێزگاری زیقار، پێشکەشی هەیسەم عادل کرد و هیوای سەرکەوتنی بۆ خواست لەئەرکەکانیدا، وجەختیشی لەپێویستی چڕکردنەوەی هەوڵەکان بۆ باشترکردنی خزمەتگوزاری و گەشەپێدان لە پارێزگاکە و دابینکردنی پێداویستییەکانی دانیشتوانەکەی و پتەوکردنی هەماهەنگی لەنێوان لایەنە جیاوازەکانیدا بۆ گەیشتن بە خواستەکانیان کردەوە.
لەلای خۆیەوە پارێزگاری زیقار سوپاس و پێزانینی خۆی بۆ سەرۆک کۆمار دەربڕی و پابەندبوونی خۆی بە خزمەتکردنی ڕؤڵەکانی پارێزگاکە و بەرزکردنەوەی ئاستی خزمەتگوزارییەکان و باشترکردنی ژێرخانی دووپاتکردەوە.
دکتۆر لەتیف رەشید، سەرۆک کۆماری عیراق پیرۆزبایی جەژنی لەدایکبوونی حەزرەتی مەسیح لە کریستیانەکان دەکات و رایدەگەیەنێت، شانازی بە رۆڵی رەسەنی ئەوان لە مێژوو و ئێستای نیشتماندا دەکەن.
لە پەیامێکدا بەبۆنەی جەژنی لەدایکبوونی مەسیح (د.خ)، سەرۆک کۆمار پیرۆزبایی لە کریستیانەکانی عیراق و جیهان کرد و رایگەیاند: "لە کاتێکدا هاوبەشی خۆشییەکانیانین لەم بۆنە پیرۆزەدا، جەخت لە شانازیی قوڵی خۆمان دەکەینەوە بە رۆڵی رەسەنی ئەوان لە مێژوو و ئێستای نیشتمانەکەماندا و بە بەشدارییە نیشتمانی، کولتووری و شارستانییەکانیان".
دکتۆر لەتیف رەشید داوای کردووە وەک تاک و هێزە سیاسییەکان، لەم یادەدا ئیلهام لە بەها و فێرکارییە ئیمانی و مرۆییەکان وەربگرن بۆ بونیادنانی وڵات و بەهێزکردنی پێشکەوتنەکان و پاراستنی ئاسایش و سەقامگیری.
لە کۆتایی پەیامەکەیدا هاتووە: "هیوادارین ئاشتی، ئارامی، خۆشەویستی و تەبایی، تەواوی عیراق و هەموو جیهان بگرێتەوە".
د. لەتیف رەشید سەرۆک کۆماری عیراق، لە کۆشکی بەغداد، گفتوگۆی دوولایەنەی لەگەڵ ئاسف عەلی زەرداری سەرۆک کۆماری پاکستان ئەنجامدا، کە بە سەردانێکی رەسمی و بە سەرۆکایەتی وەفدێکی باڵای حکومی گەیشتووەتە عیراق.
لە دیدارەکەدا باس لە پەیوەندییەکانی نێوان هەردوو وڵات و پێشهاتەکانی بارودۆخی ناوچەکە و لێکەوتەکانی کرا، هەروەها جەختکرایەوە لە سەر پێویستی هەماهەنگیکردنی هەڵوێستەکان بە جۆرێک کە یارمەتیدەر بێت بۆ پاڵپشتیکردن و چەسپاندنی ئاسایش و سەقامگیری لە ناوچەکە و کارکردن بۆ کۆنترۆڵکردنی گرژییەکان.
دواتر، گفتوگۆی فراوان لە نێوان وەفدی هەردوو وڵات بەڕێوەچوو؛ سەرۆک کۆمار سەرۆکایەتی لایەنی عیراقی کرد کە پێکهاتبوو لە د. ئەحمەد فەکاک بەدرانی وەزیری رۆشنبیری و گەشتوگوزار و شوێنەوار، قاسم ئەعرەجی راوێژکاری ئاسایشی نیشتمانی و ژمارەیەک لە لێپرسراوانی باڵای دەوڵەت.
لە بەرانبەردا، ئاسف عەلی زەرداری سەرۆکایەتی لایەنی پاکستانی کرد کە ژمارەیەک لە پەرلەمانتار و لێپرسراوان و باڵیۆزی پاکستانی لە عیراق لەخۆگرتبوو.
سەرۆک کۆمار جەختی لە پەرۆشی عیراق کردەوە بۆ پشتگیریکردنی هاریکاریە هاوبەشەکان لە بوارەکانی رۆشنبیری و زانستیدا، ئاماژەی بەو رۆڵەش کرد کە دەکرێت "دەستەخوشکی" نێوان زانکۆکان بیگێڕێت لە فراوانکردنی ئاڵوگۆڕی ئەکادیمی و بونیادنانی شەراکەت لە نێوان دامەزراوە پەروەردەیی و ئەکادیمییەکانی هەردوو وڵاتدا.
هەروەها سەرۆک کۆمار ئاماژەی بە گرنگی بەهێزکردنی پەیوەندییە ئابوری و بازرگانییەکان کرد، بەتایبەتی لە بواری پەیوەندی دەریایی، کە رەنگدانەوەی ئەرێنی لەسەر جوڵەی بازرگانی و دەرفەتە وەبەرهێنانە هاوبەشەکان دەبێت، جەختیشی لە گرنگی هەماهەنگی و هاوکاری کردەوە بۆ برەودان بە گەشتوگوزاری ئایینی و ئاسانکاری بۆ هاتنی زیارەتکارانی پاکستان بۆ عیراق.
هەردوولا تاوتوێی بەهێزکردنی هەماهەنگی ئەمنی و سەربازی و سوودوەرگرتن لە ئەزموونەکانی پاکستانیان کرد لە بوارەکانی پەرەپێدانی هێزی ئاسمانی و مەشقپێکردنی فڕۆکەوانان، لەگەڵ ئاڵوگۆڕی زانیاری هەواڵگری و ئەمنی لە بواری بەرەنگاربوونەوەی تیرۆردا.
هەروەها لە دیدارەکەدا باس لە یاداشتنامەکانی لێکتێگەیشتنی نێوان هەردوو وڵات کرا و جەخت لەسەر گرنگی تەواوکردنی رێکارەکانی ئیمزاکردن و چالاککردنیان کرایەوە، بەتایبەتی ئەوانەی پەیوەستن بە لایەنی وەبەرهێنان، جگە لە پشتگیریکردنی بەرنامەکانی مەشق و راهێنانی خوێندکارانی عیراقی لە کۆلێژ و پەیمانگا سەربازییەکانی پاکستان لە هەموو جۆرە جیاوازەکاندا، بەجۆرێک کە بەشداربێت لە بونیادنانی تواناکان و ئاڵوگۆڕی ئەزموونەکانی نێوان هەردوولا.
لە بەرانبەردا، ئاسف عەلی زەرداری سەرۆک کۆماری پاکستان، پەرۆشی وڵاتەکەی بۆ پەرەپێدانی پەیوەندییە دوولایەنەکان دووپاتکردەوە و ستایشی قووڵایی پەیوەندییە مێژووییەکانی نێوان هەردوو وڵاتی کرد، هەروەها ئامادەیی پاکستانی نیشان دا بۆ فراوانکردنی بوارەکانی هاوکاری دوولایەنە بە جۆرێک کە خزمەت بە بەرژەوەندییە هاوبەشەکانی هەردوو گەلی دۆست بکات.
د.لە تیف رەشید، سەرۆک کۆماری عیراق لە کۆشکی بەغداد، پێشوازیکرد لە ئاسف عەلی زەرداری سەرۆک کۆماری پاکستان کرد.
ئەمڕۆ یەکشەممە، سەرۆک کۆماری عیراق، پیێشوازی لە هاوتا پاکستانییەکەی کرد، بەسەرۆکایەتی وەفدی باڵای حکومەت، کە گوزارشت لە قووڵایی پەیوەندییە دووقۆڵییەکانی نێوان هەردوو وڵات کرد.
لە رێوڕەسمێکی رەسمیدا، بەئامادەبوونی بەرپرسانی باڵای عیراق و پاکستان، کە بە سرودی نیشتمانی هەردوو وڵات دەستیپێکرد و دواتر پشکنینی پاسەوانی شەرەف ئەنجامدرا
د.لەتیف رەشیدی سەرۆک کۆمار، پیرۆزبایی لە ئێزدییەکان کرد بەبۆنەی هاتنی جەژنی رۆژووەوە، هاوکات ئاماژەی بە قووڵیی رەگ و ریشەی مێژوویی و رەسەنایەتی پێکهاتەی ئێزیدی لە عیراقدا کردوە، جەختیکردوەتەوە لە پێویستیی گەڕاندنەوەی مافەکانیان و لێپرسینەوە لە ئەنجامدەرانی تاوانەکان بەرانبەریان و کارکردن بۆ ئاشکراکردنی چارەنووسی رفێنراوان و بێسەروشوێنبووان.
ئەمڕۆ پێنجشەممە، سەرۆک کۆمار لە پۆستێکدا لەسەر پلاتفۆرمی ئێکس پەیامێکی بڵاوکردوتەوە و تێیدا گەرمترین پیرۆزبایی ئاراستەی هاوڵاتییە ئێزدییەکانی عیراق و جیهان دەکات بەبۆنەی هاتنی جەژنی رۆژووەوە، هیواشی خواستوە جەژنێک بێت کە لە ماناکانیدا هیوا و ئاشتی هەڵگرتبێت، بەرجەستەی ئەو بەها رۆحییانە بکات کە ئەم رۆژووە پیرۆزە بانگەشەی بۆ دەکات.
سەرۆک کۆمار ئاماژەی بەوەشکردوە، ئەم بۆنە ئاینییە جەخت لە قووڵیی رەگ و ریشەی مێژوویی و کولتووریی پێکهاتەی رەسەنی ئێزیدی دەکاتەوە و ئەوان پێکهاتەیەکی چەسپاوی عیراقن، هەروەها داوای كرد هەوڵەكان بۆ چەسپاندنی دادپەروەری، قەرەبووكردنەوەی قوربانییان و سزادانی تاوانباران چڕتر بكرێنەوە.
د. لەتیف رەشید، جەختیکردوەتەوە لەسەر پێویستیی گەڕاندنەوەی مافەکانیان و بەدەستهێنانی دادپەروەری و لێپرسینەوە لە ئەنجامدەرانی تاوانەکان و کارکردن بۆ ئاشکراکردنی چارەنووسی رفێنراوان و بێسەروشوێنبووانی ئێزیدی..
د. لەتیف رەشید سەرۆک کۆماری عیراق پیرۆزبایی لە یانەی زاخۆ و هاندەرانی دەکات بەبۆنەی دەستنیشانکردنی هاندەرانی زاخۆ لەلایەن فیفاوە وەک باشترین هاندەر لەسەر ئاستی جیهان.
دەقی پەیامەکەی سەرۆک کۆمار...........
بەڕێزان سەرۆک و دەستەی کارگێڕی و هاندەرانی یانەی وەرزشیی زاخۆ
پیرۆزباییی گەرمتان لێدەکەین بە بۆنەی دەستنیشانکردنی هاندهرانی دڵسۆزی یانەی زاخۆ لهلایهن فیفاوه وەک باشترین و کاریگەرترین هاندهر لەسەر ئاستی جیهان.
ئەم دەسکەوتە، تەنها سەرکەوتنێک نییە بۆ یانەی زاخۆ، بەڵکوو شانازییە بۆ تەواوی بزووتنەوەی وەرزشی لە هەرێمی کوردستان و عیراق.
هیوای سەرکەوتن بۆ یانەی زاخۆ و سەرجەم یانەکانی کوردستان و عیراق و هاندەرانیان ئەخوازم لە پێناو پێشخستنی وەرزش و چەسپاندنی گیانی ئاشتی و برایەتی لە نێو کۆمەڵانی خەڵکدا.
شاد و سەرکەوتو بن
د. لەتیف رەشید، سەرۆک کۆماری عیراق لە کۆشکی سەلام پێشوازی لە ئیڤان فایق، وەزیری کوچ و کۆچبەران کرد، لە دیدارەکەدا پرسی ئاوارەکان وچۆنیەتی پەرەپێدانی هەوڵەکانی حکومەت بۆ چارەسەرکردنی ئاڵنگارییەکانی بەردەم وەزارەتەکە کرا.
ئەمڕۆ دووشەممە، لە بەغداد سەرۆک کۆمار پێشوازی کرد لە وەزیری کۆچ و کۆچبەران ، لە دیادرەکەدا باسیان لەگرنگترین پرسە هەڵپەسێردراوەکانی تایبەت بەئاوارەکان و چۆنیەتی پەرەپێدانی هەوڵەکانی حکومەت بۆ چارەسەرکردنی ئاڵنگارییەکانی ئێستا.
سەرۆک کۆمار جەختی لەگرنگی هاوکاری وەزارەت لەگەڵ دامەزراوە پەیوەندیدارەکانی دەوڵەت کردەوە بۆ پەرەپێدانی چارەسەری یەکجارەکی بۆ کێشەکانی کۆچ و دەستەبەرکردنی پاراستنی کەرامەتی هاووڵاتییان و دابینکردنی هەلومەرجی گونجاو بۆ گەڕانەوەیان بەسەلامەتی و شێوازێکی شکۆمەندانە.
د.لەتیف جەختیشی لەپێویستی گرتنەبەری سیاسەتێکی گشتگیر کردەوە، کە رەهەندە مرۆیی و کۆمەڵایەتی و ئابوورییەکان لەبەرچاو بگرێت.
لەلای خۆیەوە وەزیری کۆچ و کۆچبەران، پلان و بەرنامەکانی ئێستای وەزارەتەکەی خستەڕوو و تیشکی خستە سەر دەستکەوتەکان و بەرچاوترین ئاستەنگەکانی بەردەم کارەکان.
هەروەها پابەندبوونی وەزارەتەکەشی دووپاتکردەوە بۆ بەردەوامبوون لە کارەکانی و هەماهەنگی لەگەڵ لایەنە پەیوەندیدارەکان بۆ جێبەجێکردنی ستراتیژییە نیشتمانییە پەیوەندیدارەکان.
د.لەتیف رەشید، سەرۆک کۆمار لە بەغداد پێشوازی کرد لە میری ئێزیدایان و بارودۆخی گشتی وڵات و پرسی تایبەت بەکۆمەڵگەی ئێزیدییانیان تاوتوێکرد، سەرۆک کۆمار پابەندبونی تەواوەتی دەوڵەتی عیراقی بۆ پاراستنی مافی هەممو پێکهاتەکان بە ئێزیدییەکانیشەوە دوپات کردەوە.
ئەمڕۆ دووشەممە، سەرۆک کۆمار د.لەتیف رەشید، ، لە کۆشکی بەغداد پێشوازیکرد لە میر حازم تەحسین بەگ سەرۆکی ئەنجومەنی باڵای رۆحانی ئێزیدییان.
لەدیدارەکەدا باس لەبارودۆخی گشتی وڵات و پرسی تایبەت بەکۆمەڵگەی ئێزیدییان کرا وجەختیش لەپێویستی چارەسەرکردنی دەرئەنجامەکانی ئەو تاوانانەی بەرامبەریان ئەنجامدرا و رەخساندنی هەلومەرجی گونجاو بۆ گەڕانەوەی ئاوارەکان و پەرەپێدانی سەقامگیری کۆمەڵایەتی کردەوە.
سەرۆک کۆمار پابەندبوونی تەواوی دەوڵەتی عیراقی بەپاراستنی مافەکانی هەموو پێکهاتەکان بە ئێزیدییەکانەوە دووپاتکردەوە کەبەشێکی رەسەنی ناسنامەی نیشتمانین و جەختیشی لە پاراستنی فرەچەشنی ئایینی و کلتووری پایەیەکی بنەڕەتییە لە بنیاتنانی دەوڵەتدا کردەوە.
د. لەتیف رەشید جەختیکردەوە، کە سەرۆکایەتی کۆمار پرسی ئێزیدییەکان دەخاتە پێشینەی ئەرکە نیشتمانی و مرۆییەکانی خۆیەوە، ئاماژەشی بە گرنگی هەوڵی هاوئاهەنگ لەنێوان رێبەرانی ئایینی و کۆمەڵایەتی و دامودەزگاکانی دەوڵەت کرد ، کەدەبنە رێگە چارەی دەستەبەرکردنی دەرئەنجامەکانی ئەو کارەساتانەی کەبەسەریاندا هاتووە.
لەلای خۆیەوە میر حازم، گرنگیدانی سەرۆک کۆمار و هەڵوێست و پاڵپشتییەکانی لەمەڕ پرسی ئێزیدییەکان بەرز نرخاند و پێزانینی خۆی بۆ ئەو هەوڵانە دەربڕی کەبۆ دادپەروەری بەرانبەر بەقوربانییان و بەرەوپێشبردنی پێکەوە ژیانی نیشتمانی دراون.
د. لەتیف رەشید، سەرۆک کۆماری عیراق، ئەمڕۆ شەممە 13ی کانونی یەکەم، دوای بەشداریکردنی لە کۆڕبەندی "ئاشتی و متمانە" و ئەنجامدانی ژمارەیەک دیدار لەگەڵ سەرۆکی وڵاتان، لە تورکمانستانەوە گەڕایەوە بەغداد.
بەپێی راگەیەندراوی سەرۆکایەتی کۆمار، لەمیانی سەردانەکەیدا بۆ ئیشق ئاباد بە مەبەستی بەشداریکردن لە یادی 30 ساڵەی بێلایەنی تورکمانستان، د. لەتیف رەشید زنجیرەیەک دیداری رەسمی ئەنجامداوە، دیارترینیان کۆبوونەوە بووە لەگەڵ ڤلادیمێر پوتن سەرۆکی روسیا، مەسعود پزیشکیان سەرۆکی ئێران و رەجەب تەیب ئەردۆغان سەرۆک کۆماری تورکیا.
لە کۆبوونەوەکاندا، سەرۆک کۆمار جەختی لە گرنگی دەستپێکردنەوەی دیالۆگ و جێبەجێکردنی رێککەوتنەکان کردووەتەوە و ئاماژەی بەوەداوە کە هەماهەنگی بەردەوامی نێوان وڵاتان زۆر گرنگە بۆ روبەڕووبوونەوەی ئاستەنگەکان، هاوکات رەتکردنەوەی توندی عیراقی بۆ هەر جۆرە دەستدرێژییەک یان پێشێلکردنی سەروەری نیشتمانی دووپات کردووەتەوە.
سەرۆک کۆمار لە وتارێکدا لەبەردەم ئامادەبووانی کۆڕبەندەکە رایگەیاند: "عيراق دوای چەندین ساڵ لە گۆشەگیری، ئێستا ڕۆڵی سەرەکی خۆی لەسەر ئاستی ناوچەیی و نێودەوڵەتی دەگێڕێت و هەوڵدەدات پەیوەندییەکی هاوسەنگ و کاریگەر لەگەڵ دراوسێکانی دروست بکات، لەسەر بنەماکانی ئاشتی و رەتکردنەوەی جەنگ".
هەر لە پەراوێزی کۆڕبەندەکەدا، د. لەتیف رەشید لەگەڵ هەریەک لە سەردار بەردی موحەمەدۆڤ سەرۆکی تورکمانستان و سەرۆکانی ئەرمینیا، کازاخستان، قیرغیزستان و ئۆزبەکستان کۆبووەوە و پەرەسەندنەکانی دۆخی نێودەوڵەتی و ناوچەییان تاوتوێ کرد.