سەرۆککۆمار
د. لەتیف رەشید، سەرۆک کۆماری عیراق، لە چاوپێکەوتنێکدا لەگەڵ کەناڵی ئەلئولا، تیشکی خستە سەر چەندین بابەتی گرنگی پەیوەندیدار بە رەوشی سیاسی، ئابووری، کۆمەڵایەتی و دەرەوەی عیراق، لەوانە پەیوەندییەکانی نێوان حکومەتی فیدراڵی و هەرێمی کوردستان، کێشەی نەوت و غاز، دابینکردنی موچە، پرۆسەی هەڵبژاردن، رەوشی زیندانییەکان، قەیرانی ئاو، پێشنیازە یاساییەکان و پرسی پەکەکە و غەززە.
پەیوەندییەکانی بەغداد و هەولێر و کێشەی نەوت و غاز:
سەرۆک کۆمار جەختی کردەوە کە "پەیوەندی نێوان حکومەتی فیدراڵی و حکومەتی هەرێمی کوردستان لە هەموو بوارەکاندا باشە، ناکۆکییەکان لە بنەڕەتدا لە نێوان پارێزگاکان و حکومەتی فیدراڵدایە و هاوبەشییەکان لە ناکۆکییەکان زیاترن."
سەبارەت بە یاسای نەوت و غاز، ئاماژەی بە "پێویستییەکی بەپەلە بۆ پەسەندکردنی یاسای نەوت و گاز و وردەکارییە یاساییەکان لەبارەی دابەشکردنی داهاتەکان و چارەسەرکردنی کێشەکانی ئێستا" کرد. بەداخەوە پەرلەمان سەرکەوتوو نەبووە لە دەرکردنی ئەم یاسایە گرنگە.
کێشەی موچە و گۆڕانکارییەکانی بودجە:
د. لەتیف رەشید رایگەیاند، "ئەرکی حکومەتە موچەی سەرجەم فەرمانبەران دابین بکات". لە هەمان کاتدا روونی کردەوە؛ کێشەیەکی گەورەمان هەیە لەڕوی خەرجیەکانی حکومەت بۆ دابینکردنی موچە، کە دەکاتە 80%ی داهاتی دەوڵەت، لە کاتێکدا لە وڵاتانی پێشکەوتووی دیکەدا، لە 6% تێناپەڕێت، پێویستە ئەم کێشەیە چارەسەر بکەین."
هەڵبژاردنەکان و پاراستنی متمانە:
سەرۆک کۆمار داوای کرد، "لە هەڵبژاردنی پەرلەمانی داهاتوودا هەڵبژاردنێکی ئازاد و دادپەروەرانە مسۆگەر بکەین و رێگری بکەین لە بەکارهێنانی دەسەڵات بۆ مەبەستی هەڵبژاردن". هەروەها رەتی کردەوە "بانگەشەی دواخستنی هەڵبژاردن یان پێکهێنانی حکومەتی فریاگوزاری بە هیچ جۆرێک راست نییە."
رەوشی زیندانییەکان و یاسای لێبوردن:
د. لەتیف رەشید روونیکردەوە، "سەرۆکایەتی کۆمار، لە رێگەی لیژنە هاوبەشە وەزارییەکانەوە، چارەنووسی 23 هەزار دەستبەسەرکراو کە سزا نەدراون و حوکمەکانیان تەواو کردبوو و بە هۆکاری جۆراوجۆر هێشتا لە زیندان بوون، یەکلایی کردەوە." بەپێی یاسای لێبوردن 55 هەزار زیندانی ئازاد کراون.
قەیرانی ئاو و پێشنیازە یاساییەکان:
سەبارەت بە قەیرانی ئاو، سەرۆک کۆمار وتی "جیهان لە ئەنجامی گۆڕانی کەشوهەوادا رووبەڕووی قەیرانێکی گەورەی ئاو بووەتەوە، بە عیراقیشەوە." داوای کرد "پشکێکی دادپەروەرانەی ئاو لە وڵاتانی دراوسێ وەربگرین و بە فیڕۆدانی ئاو بوەستێنین."
ئاشکراشی کرد کە سەرۆکایەتی کۆمار "چەندین رەشنووسی یاسای پێشکەش بە ئەنجومەنی نوێنەران کردووە، لەوانە پێکهێنانی ئەنجومەنی باڵای ئاو و چارەسەرکردنی کێشەکانی ژنان."
پرسی پەکەکە و غەززە:
لەکۆتایی لێدوانەکەیدا، سەرۆک کۆمار تیشکی خستە سەر پرسی لەناوبردنی چەکی پەکەکە و وتی "لەناوبردنی چەکی پارتی کرێکارانی کوردستان (پەکەکە) بەپێی رێککەوتنێک لەگەڵ حکومەتی تورکیا هەنگاوێکی گرنگە بۆ بەرەوپێشبردنی ئاشتی و سەقامگیری."
سەبارەت بە غەززەش، جەختی کردەوە "دەستدرێژییە بەردەوامەکان بۆ سەر غەززە کاریگەری نەرێنی لەسەر تەواوی ناوچەکە هەیە. هەڵوێستی ئێمە لە عیراق روونە و نوێ نییە، ئێمە پشتیوانی لە گەلی فەلەستینی بۆ گەیشتن بە مافە رەواکانی تەواوی خۆی دەکەین و ئێستا دەبێت دەستدرێژییەکان رابگیرێت و هاوکاری مرۆیی بگەیەنرێت."
کۆنفرانسی هاوپەیمانی سۆسیال دیموکراتەکانی وڵاتانی عەرەبی لە سلێمانی بەڕێوەدەچێت و سەرۆک کۆماری عیراق تێیدا وتارێکی پێشکەشکرد و ئاماژەی بەوەکرد، دەبێت هاوسەنگی لە نێوان وڵاتاندا بمێنێتەوەو كێشەكان چارەسەربكرێن.
د.لەتیف رەشید سەرۆک کۆماری عیراق لە وتارەکەیدا رایگەیاند، وڵاتە گەورەکان مافی مرۆڤ پێشێل دەکەن و دەبێت کۆمەڵکوژییەکان بوەستێنرێن.
وتیشی، دەبێت ئەو دڕەندەیەی لە غەززە هەیە رابگیرێت، هاوکات گەلی عیراق هاوسۆزی فەلەستینەکانە.
سەرۆک کۆمار ئاماژەی بەوەشکرد، کێشەکانی ئەم سەردەمە کەمی ئاو و نەبوونی وزەیە، دەبێت هەموان پێکەوە کاربکەین بۆ بۆ چارەسەرکردنی ئەو کێشانە.
د. لەتیف رەشید داواشی لە میوانەکانی بەشداربووی کۆنفڕانسەکە کرد سەردانی پارێزگای هەڵەبجە بکەن، تا بۆیان دەرکەوێت رژێمی بەعس چ تاوانێکی بەرانبەر بە گەلی کورد و ئەو شارە ئەنجامداوە.
د. لەتیف رەشید سەرۆک کۆماری عیراق، ئەمڕۆ یەکشەممە 24ـی 8ـی 2025، لە کۆشکی بەغداد، پێشوازی لە ئەحمەد زاهد حەمیدی جێگری سەرۆک وەزیران و وەزیری گەشەپێدانی هەرێمی و ناوچەیی مالیزیا و وەفدی هاوڕێی کرد.
لەسەرەتای دیدارەکەدا، سەرۆک کۆمار بەخێرهاتنی وەفدەکەی کرد و سڵاوی خۆی بە سەرۆکی مالیزیا گەیاند، هاوکات ئاماژەی بە گرنگیی پەرەپێدانی پەیوەندییە دووقۆڵییەکان کرد بۆ بەدەستهێنانی بەرژەوەندییە هاوبەشەکانی هەردوو وڵات.
سەرۆک کۆمار جەختی لە پەرۆشیی عیراق کردەوە بۆ دروستکردنی هاوبەشیی هاوسەنگ کە لەسەر بنەمای رێزی یەکتری و هاوکاریی هاوبەش لە بوارە جیاجیاکاندا، هەروەها ئاماژەی بە پێویستیی هەماهەنگی کرد لە پرسە هەرێمی و نێودەوڵەتییەکانی جێی بایەخی هاوبەش.
سەرۆک کۆمار هەڵوێستەکانی مالیزیای لە پشتیوانیکردنی دۆزی فەڵەستین و وەستانەوە لەگەڵ گەلی فەڵەستین لە رووبەڕووبوونەوەی دەستدرێژی و بەدەستهێنانی تەواوی مافە رەواکانی بەرز نرخاند. هەروەها سەرۆک کۆمار داوای لە وڵاتانی عەرەبی و ئیسلامی و کۆمەڵگەی نێودەوڵەتی کرد کە هەوڵەکانیان چڕ بکەنەوە بۆ راگرتنی دەستدرێژی بۆ سەر کەرتی غەززە و کۆتاییهێنان بە ئازار و مەینەتییەکانی خەڵکەکەی و کارکردن بۆ گەیاندنی هاوکارییە مرۆییەکان و باشترکردنی ناوەندە تەندروستییەکان لە کەرتەکەدا.
لای خۆیەوە، ئەحمەد زاهد حەمیدی سڵاو و رێزی سەرکردایەتیی مالیزیا و پێزانینیانی بۆ سەرۆک کۆمار گەیاند، و شانازیی مالیزیاشی بەو پەیوەندییانەی کە لەگەڵ عیراقدا هەیەتی دەربڕی، لەگەڵ خواستی راستگۆیانە بۆ پەرەپێدانی رێڕەوەکانی هاریکاریی دوولایەنە بەشێوەیەک کە خزمەت بە بەرژەوەندیی هەردوو گەلی دۆست بکات
سەرۆکایەتیی کۆمار بەنیگەرانییەوە چاودێریی ئەو ڕووداوە نەخوازراوانەی کرد کە شاری سلێمانی بەخۆیەوە بینی، کە بووە هۆی شەهیدبوونی ژمارەیەک لە کارمەندانی دەزگا ئەمنییەکان لە شارەکەدا و برینداربوونی ژمارەیەکی تر.
جەخت دەکەینەوە لەسەر پێویستیی دانبەخۆداگرتن و پەنابردنە بەر رێکارە یاسایی و دادوەرییەکان بەپێی دەستور و دوور لە توندوتیژی، بە شێوەیەک کە بنەماکانی دادپەروەری بچەسپێنێت و ئاسایش و سەقامگیریی هاووڵاتیان بپارێزێت.
هەروەها سەرۆکایەتیی کۆمار سەرەخۆشی و هاوخەمیی خۆی ئاراستەی خانەوادەی قوربانیان دەکات، و هیوای چاکبوونەوەی خێرا بۆ برینداران دەخوازین.
خوای گەورە سلێمانی و دانیشتووانەکەی و هەموو عیراقییەکان لە هەموو ناخۆشی و خراپەیەک بپارێزێت.
د. لەتیف رەشید سەرۆک کۆماری عیراق، دووپاتی کردەوە کە هۆزەکانی عیراق نوێنەرایەتی رەسەنایەتی و رەگ و ریشەی قووڵی ئەم میللەتە دەکەن، هەروەها لەکاتی ناخۆشی و هەروەها لەکاتی ئاشتیدا پایەیەکی پتەون.
ئەمەش لە میانەی دیداری سەرۆک کۆمار، ئەمڕۆ چوارشەممە 20-8-2025 لە بینای پارێزگای سەڵاحەدین، لەگەڵ شێخ و سەرکردە عەشیرەتەکانی پارێزگاکە هات. سەرۆک کۆمار ئاماژەی بەوەدا کە پارێزگای سەڵاحەدین پێگەی مەردایەتیە و بەردەوامیش بە بوێری و سوارچاکی و بەخشندەیی و ویست بۆ یەکگرتوویی عیراق و گەلەکەی دەناسرێتەوە، جەختیشیکردەوە کە شێخ و کەسایەتییەکانی باشترین نوێنەری ئەو کەلتورە بەرزەن.
سەرۆک کۆمار روونیکردەوە کە عەشیرەت هەرگیز جێگرەوەی دەوڵەت نەبووە، بەڵکو هەمیشە پشتیوانی و سەرچاوەی سەقامگیری بووە و ئاماژەیکرد بە رۆڵی مێژوویی هۆزەکان لە چارەسەرکردنی کێشە کۆمەڵایەتییەکان و لێکنزیککردنەوەی دیدگاکان ناوەستێت، بەڵکو دەبێت مایەی بەشداریکردن لە چەسپاندنی کەلتوورێکی یاسا و بەهێزکردنی سەربەخۆیی نەتەوەیی و بڵاوکردنەوەی پەیامی عەقڵ و میانڕەوی.
سەرۆ کۆمار ئاماژەی بەو ئاڵەنگاریان کرد کە رووبەڕووی عیراق دەبێتەوە لە ئاستی ناوخۆ و ئیقلیمی لە ئاستی سیاسی و ئابووری و ئەمنیدا، کە تەنیا لە رێگەی پشتیوانی بەکۆمەڵەوە دەتوانرێت چارەسەر بکرێن. جەختیشی لەوە کردەوە کە بەبێ رۆڵی عەشیرەتەکان دەوڵەتسازی تەواو نابێت.
سەرۆک کۆمار ستایشی قوربانییە گەورەکانی خەڵکی سەلاحەدین کرد کە لە شەڕی دژ بە تیرۆر داویانە، ئاماژەی بە دەستبەرکردنی پێداویستیەکانی پارێزگاکە کرد بۆ باشترکردنی خزمەتگوزاری و بارودۆخی ئابووری و سودمەند بون لە ئاسایش و سەقامگیری بەردەوام.
سەرۆک کۆمار ستایشی پشتیوانی هۆزەکانی پارێزگاکەی بۆ دەوڵەت و دامەزراوەکانی کرد و جەختی لەوە کردەوە کە دەرگاکانی سەرۆکایەتی کۆمار هەمیشە کراوەن بۆ داواکاری و دەنگەکانیان.
ئامادەبووان ستایشی گرنگیدانی سەرۆک کۆماریان کرد بۆ چارەسەرکردنی نیگەرانییەکانی خەڵکی سەلاحەدین و هەموو عیراقییەکان کرد و خۆشحاڵی خۆیان بەم سەردانە و پەیامە ئەرێنییەکانی بۆ پارێزگاکە و هاووڵاتیانی دەربڕی.
ئەمڕۆ، د.لەتیف رەشید سەرۆک کۆماری عیراق، سەردانی باڵەخانەی پارێزگای سەڵاحەدینی کرد و لەگەڵ بەدر مەحمود ، پارێزگاری سەڵاحەدین و عادل سومەیدەعی، سەرۆکی ئەنجومەنی پارێزگا و ئەندامانی ئەنجومەنی پارێزگا و فەرماندە ئەمنییەکان کۆبووەوە.
لە دیدارەکەدا سەرۆک کۆمار خۆشحاڵی خۆی بە سەردانیکردنی پارێزگاکە دەربڕی و بە پارێزگایەکی ئازیزی دڵی عیراقییەکانی وەسف کرد، بەهۆی ئەو مێژووە دێرینەی هەیەتی و ئەو قوربانییە گەورانەی کە لە روبەڕووبوونەوەی تیرۆر و بەرگریکردن لە یەکپارچەیی خاکی عیراقدا پێشکەشی کردووە.
سەرۆک کۆمار جەختی لە گرنگیی کارکردن لەناو پارێزگاکەدا کردەوە لەسەر بنەمای هاوبەشیی کۆمەڵایەتی و بنەمای دادپەروەری و دوورکەوتنەوە لە ململانێی سیاسی، چونکە هیچ گەشەپێدانێکی راستەقینە بەبێ سەقامگیری نایەتەدی و هیچ سەقامگیرییەکیش بەبێ دادپەروەری و شەفافیەت و متمانە لە نێوان هاووڵاتی و بەرپرسدا بوونی نییە.
هەروەها روونیکردەوە کە پێویستە هەماهەنگی و پلاندانان لە نێوان هەردوو حکومەتی فیدراڵی و خۆجێییدا هەبێت بۆ دانانی پارێزگاکە لەسەر رێگەی بوژانەوە و پێشکەوتن.
سەرۆک کۆمار جەختی کردەوە لە پێویستیی دانانی بەرژەوەندیی خەڵکی پارێزگاکە لە سەرووی هەموو شتێکەوە و یەکخستنی هەوڵەکان و وتارەکان و کردنەپێشینەی پرسەکانی پارێزگاکە کە هیچ جێگەیەکی سازشی تێدا نەبێت، هاوکات داوای کرد بودجەی تایبەت بە پارێزگاکە خەرج بکرێت و پڕۆژە خزمەتگوزارییەکان جێبەجێ بکرێن.
هەروەها د.لەتیف رەشید، جەختی لە بەردەوامیی پشتیوانیی سەرۆکایەتیی کۆمار کردەوە بۆ هەر کارێکی دڵسۆزانە کە لە بەرژەوەندیی پارێزگاکاندا بێت، و هەوڵەکانی بۆ ئاسانکردنی بەربەستەکانی بەردەم پڕۆژە خزمەتگوزارییەکانی هاووڵاتییان، ئاماژەی بە هەوڵەکانیشی کرد لە ئازادکردنی زیاتر لە 15 هەزار راگیراو.
سەبارەت بە هەڵبژاردنەکانی داهاتووی ئەنجومەنی نوێنەران، سەرۆک کۆمار جەختی لە پێویستیی گرتنەبەری رێکاری توند کردەوە بۆ رێگریکردن لە بەکارهێنانی پۆست و سامانی گشتی لە بانگەشەی هەڵبژاردندا، بەشێوەیەک کە جێبەجێکردنی پێوەرەکانی دەستپاکی و شەفافیەت بە باشترین شێوە مسۆگەر بکات.
هەروەها لە کۆبوونەوەکەدا رەوشی گشتیی ناوچەکە تاوتوێ کرا و جەخت کرایەوە لەسەر رەتکردنەوەی ئەو دەستدرێژییەی دەکرێتە سەر فەلەستین، هەروەها پێویستیی پشتیوانیکردن لە دۆزی گەلەکەی و مافی چارەی خۆنووسین و دامەزراندنی دەوڵەتی سەربەخۆی خۆی لەسەر خاکی نیشتمانیی خۆی.
لای خۆیەوە، پارێزگار باسی لە رەوشی سەڵاحەدین و دەستکەوتە بەدەستهاتووەکان و ئەو ئاستەنگانەی کرد کە روبەڕووی پرۆسەی ئاوەدانکردنەوە و خزمەتگوزارییەکان دەبنەوە، و خۆشحاڵی خۆی بە سەردانەکەی سەرۆک کۆمار بۆ سەڵاحەدین دەربڕی، و پارێزگاری سەڵاحەدین دووپاتی کردەوە کە سورن لەسەر خزمەتکردنی پارێزگاکە و خەڵکەکەی بەوپەڕی ئەمەک و دڵسۆزییەوە.
هەروەها پارێزگار قەڵغانی پارێزگای سەڵاحەدینی پێشکەش بە سەرۆک کۆمار کرد وەک رێز و پێزانینێک بۆ سەردانەکەی بۆ پارێزگاکە.
سەرۆك كۆماری عیراق لە بەغداد لەگەڵ سەرۆكی رەوتی حیكمەی نیشتمانی كۆبووەوە و چەند پرسێكی جێی بایەخی هەردوولایان تاوتوێكرد.
بەپێی راگەیەندراوی سەرۆكایەتی كۆماری عیراق، لە كۆبوونەوەی د.لەتیف رەشید سەرۆك كۆماری عیراق و عەممار حەكیم سەرۆكی رەوتی حیكمەی نیشتمانی، دۆسیەی هەڵبژاردنی داهاتووی ئەنجومەنی نوێنەران و ئامادەكارییەكان بۆ هەڵبژاردنەكە تاوتوێكرا، ئاماژەش كرا بە گرنگی بەشداریكردنی هاوڵاتییان لە هەڵبژاردنەكەدا.
هەر لە كۆبوونەوەكەدا، تاوتوێی دوایین پێشهاتە سیاسی و ئەمنی و ئابوورییەكان لەسەر هەردوو ئاستی ناوخۆیی و دەرەكی، جەخشتیكرایەوە لە بەرقەراركردنی ئاسایش و سەقامگیری لەناوخۆی وڵات و ناوچەكەدا.
پێشتریش، سەرۆك كۆمار پێشوازی لە عادل عەبدولمەهدی سەرۆك وەزیرانی پێشووتری عیراق كرد و لە كۆبوونەوەكەدا، تاوتوێی دۆسییەی هەڵبژاردنی داهاتووی ئەنجومەنی نوێنەرانیان كرد.
سەرۆک کۆمار د.لەتیف رەشید ئەمڕۆ سێشەممە لە بەغداد پێشوازی لە عادل عەبدولمەهدی سەرۆک وەزیرانی پێشووتر کرد.
لە کۆبوونەوەکەدا دوایین پێشهاتەکانی سیاسی و ئابووری وڵاتیان تاوتوێکرد و جەختیان لەسەر گرنگی یەکخستنی هەوڵەکانی سەرجەم لایەنەکان کردەوە بۆ پاراستنی دەستکەوتەکان لە بوارە جیاجیاکاندا.
هەروەها گفتوگۆیان له سەر ئامادەکارییه بەردەوامەکان بۆ سەرکەوتنی هەڵبژاردنەکانی داهاتووی پەرلەمان کرد بەشێوەیەک خزمەت به خواستەکانی سەرجەم عیراقییەکان بکات لە سەقامگیری ئەمنی و سیاسی و ئابووریدا.
سەرۆک کۆمار بەشداری لە رێوڕەسمی یادکردنەوەی قوربانیانی تەقینەوەی بارەگای نێردەی نەتەوە یەکگرتووەکان لە عیراق کرد
د.لەتیف رەشید سەرۆک کۆماری عیراق ئەمڕۆ، بەشداری کرد لەو رێورەسمەی یادکردنەوەیەی کە نێردەی نەتەوە یەکگرتووەکان لە عیراق لە بارەگای خۆی لە بەغداد بە بۆنەی رۆژی جیهانیی کاری مرۆیی و بیست و دووهەمین ساڵیادی ئەو تەقینەوە تیرۆرستییەی کە کرایە سەر بارەگاکەی رێکیخستبوو.
لەو تەقینەوەیەدا نوێنەری تایبەتی سکرتێری گشتیی نەتەوە یەکگرتووەکان لە عیراق، سێرجیۆ ڤیێرا دی مێلۆ و ژمارەیەک لە هاوکارەکانی گیانیان لەدەستدا.
لە میانی رێوڕەسمەکەدا، نوێنەری تایبەتی سکرتێری گشتیی نەتەوە یەکگرتووەکان، محەمەد حەسان، باسی لە رۆڵی نەتەوە یەکگرتووەکان و ئەو قوربانیدانانەی کرد کە تیمەکانی کارکردنیان لە عیراقدا پێشکەشیان کردووە.
سەرۆک کۆماری عیراق تاجەگوڵینەی لەسەر مۆنۆمێنتی یادەوەریی قوربانیانی روداوە دڵتەزێنەکە دانا و بە محەمەد حەسان سەرۆکی نێردەی نەتەوە یەکگرتووەکانی راگەیاند، کە پێزانینی هەیە بۆ ئەو قوربانیەی کە لە تەقینەوە تیرۆریستییەکە داویانە و جەختی لەوە کردەوە، کە قوربانیدانیان بەها مرۆییەکان بەهێز دەکات، هەروەها وەستانی ئەمڕۆمان رێزلێنانە لە قوربانیدانیان و هاندانێکە بۆ ئەو کەسانەی کە سەرەڕای مەترسییەکان بەردەوامن لەم کارە گرنگە.
هەروەها پابەندبوونی نەگۆڕی عیراقی بۆ پشتیوانیکردنی هەوڵە نێودەوڵەتییەکان بۆ روبەڕووبوونەوەی تیرۆر دووپاتکردەوە و بە ناوی گەلی عیراقەوە سەرەخۆشی خۆی ئاراستەی خانەوادەی قوربانیان کرد.
سەرۆک کۆمار میوانداری کۆبوونەوەی چوار سەرۆکایەتییەکە کرد بۆ تاوتوێکردنی پێشهاتەکانی وڵات و دۆسیەی ئامادەکارییەکان بۆ هەڵبژاردنەکانی داهاتوو.
د.لەتیف رەشید سەرۆک کۆماری عیراق، ئەمڕۆ لە کۆشکی بەغدا، میوانداری کۆبوونەوەیەکی چوار سەرۆکایەتییەکەی کرد کە محەمەد شیاع سودانی سەرۆکی ئەنجومەنی وەزیران و د .مەحمود مەشهەدانی سەرۆکی ئەنجومەنی نوێنەران، و د.فائق زێدان سەرۆکی ئەنجومەنی باڵای دادوەری، ئامادەیبوون، بۆ تاوتوێکردنی پێشهاتەکانی وڵات و دۆسیەی ئامادەکارییەکان بۆ هەڵبژاردنەکانی داهاتوو.
لە میانی کۆبوونەوەکەدا، ئەو پێشنیازانە خرانەڕوو کە لەلایەن سەرۆک کۆمارەوە نێردرابوون و ئامانج لێیان رەخساندنی ژینگەیەکی هەڵبژاردنی ئارام و سەقامگیرە کە ناونیشانەکەی شەفافیەت و دەستپاکییە، و هەروەها هەوڵدانە بۆ رەخساندنی دەرفەتی یەکسان لەنێوان هەموو کێبڕکێکارانی هەڵبژاردن.
ئامادەبووان ئەو کێشانەیان تاوتوێ کرد کە لە بەستنی دانیشتنەکانی ئەم دواییەی ئەنجومەنی نوێنەران سەریان هەڵدا، و جەختکرایەوە لەسەر پێویستی چارەسەرکردنیان بەپێی شێوازی یاسایی کارپێکراو و گرنگیدان بە بەدواداچوون و گفتوگۆکردنی پڕۆژەیاسا جیاوازەکان کە پێشکەش بە ئەنجومەن کراون بەمەبەستی پەسەندکردنیان بەشێوەیەک کە مافی هەموو هاوڵاتیان مسۆگەر بکات.
کۆبوونەوەکە تیشکی خستە سەر ئەرکەکانی ئەنجومەنی باڵای دادوەری لە جێبەجێکردنی یاساکانی هەڵبژاردن بەشێوەیەک کە سەروەری یاسا بەهێز بکات و پارێزگاری لە رەوتی دیموکراسی لە وڵاتدا بکات و بنەماکانی دەستپاکی و شەفافیەت بچەسپێنێت و متمانەی هاووڵاتیان بە دامەزراوە دەستوورییەکان و رۆڵیان لە خزمەتکردنی بەرژەوەندی گشتیدا پتەوتر بکات.
هەروەها گفتوگۆی چڕوپڕ ئەنجامدرا سەبارەت بە واقیعی جێبەجێکردنی یاسای لێبوردنی گشتی و ژمارەی ئەو زیندانیانەی کە بڕگەکانی یاساکە دەیانگرێتەوە و بەڕێوەبردنی کاروباریان و سروشتی ئەو لیژنانەی کە کاردەکەن لە دووبارە لێکۆڵینەوە یان دادگاییکردنەوەیان و ئازادکردنیان، و جەختکرایەوە لەسەر پێویستی ئاسانکاری کردن لە جێبەجێکردنی بڕگەکانی یاساکە و چارەسەرکردنی ئەو ئاستەنگانەی کە رێگرن لەبەردەم جێبەجێکردنیدا.
د. لەتیف رەشید سەرۆک کۆماری عیراق، پێشوازی لە موئەیەد ئەللامی سەرۆکی سەندیکای رۆژنامەنووسانی عیراق و سەرۆکی فیدراسیۆنی گشتی رۆژنامەنووسانی عەرەب کرد.
لە میانەی دیدارەکەدا کە ئەمڕۆ دووشەممە 18-8-2025 لە کۆشکی بەغداد بەڕێوەچوو، سەرۆک کۆمار پێزانینی خۆی بۆ رۆڵی رۆژنامەگەری نیشتمانی لە پێشخستنی بەهاکانی دیموکراسی و پاراستنی ئازادی رادەربڕین دوپاتکردەوە و جەختیکردەوە لە گرنگی پابەندبوون بە یاسای شکۆی میدیا وەک چوارچێوەیەک کە ئازادی بڵاوکردنەوە لەگەڵ بەرپرسیارێتی پیشەیی هاوسەنگ بکات و ئاشتی کۆمەڵایەتی بپارێزێت.
هەروەها سەرۆک کۆمار تیشکی خستە سەر گرنگی رۆڵی هەڵسەنگاندنی میدیا لە چاودێریکردنی ئەدای کارکردن و دەستنیشانکردنی کەموکوڕییەکان، بەمەش بەشداری لە چاکسازی سیاسەتدا دەکات، داواشی کرد ئەو ئەرکانە بە گیانی هاریکاری و رێزگرتن لە یاسا و دەستوور ئەنجام بدرێت.
سەرۆک کۆمار جەختیکردەوە لە سەر پێویستیی سەرنجی میدیاکان بە دەرخستنی دەستکەوتەکانی دەزگاکانی دەوڵەتی عیراق و هەروەها چاودێریکردنی لایەنە نەرێنییەکان بۆ دڵنیابوون لە هەڵسەنگاندنی ئەدای حکومەت.
سەرۆک کۆمار باسی لە رۆڵی سەرۆکایەتی کۆمار و هەوڵەکانی لە چەندین بابەتی گرنگدا کرد، لەوانە مەسەلەی دەستبەسەرکراوان و هەروەها سەرۆکایەتی کۆمار بەشداری کردووە لە ئازادکردنی زیاتر لە 15 هەزار دەستبەسەرکراو، ئەمە جگە لەوەی چەندین رەشنووسی یاسای گرنگی پێشکەش بە ئەنجوومەنی نوێنەران کردووە.
لای خۆیەوە موئەیەد ئەللامی پێزانینی خۆی بۆ پاڵپشتی سەرۆکایەتی کۆماری عیراق بۆ رۆژنامەنووسان دەربڕی و باسی لە هەوڵەکانی سەندیکا کرد بۆ پەرەپێدانی ژینگەی کار و پێشخستنی گەلتووری پابەندبوون بە بەهاکانی میدیا.
د.لەتیف رەشید، سەرۆک کۆماری عیراق ئەمڕۆ لە کۆشکی بەغداد پێشوازی لە محەمەد حەسان، نوێنەری سکرتێری گشتیی نەتەوە یەکگرتووەکان لە عیراق کرد.
لە میانی دیدارێکدا گفتوگۆ لەبارەی رەوشی گۆڕەپانی ناوخۆیی و رۆڵی نێردەی نەتەوە یەکگرتووەکان کرا لە پشتیوانیکردنی سەقامگیریی عیراق و پەرەپێدانی رێڕەوەکانی گەشەپێدان، سەرەڕای تاوتوێکردنی رێگەکانی فراوانکردنی ئاسۆی هاوکاری و هەماهەنگیی هاوبەش لەگەڵ ئەو رێکخراوە نێودەوڵەتییە.
هەروەها، لە دیدارەکەدا باس لە پێشهاتەکانی رەوشی ناوچەیی کرا، کە تێیدا سەرۆک کۆمار جەختی لە هەوڵە بەردەوامەکانی عیراق کردەوە بۆ پتەوکردنی دیالۆگ و لێکتێگەیشتن لە نێوان وڵاتانی ناوچەکەدا و گرنگیی رۆڵی نەتەوە یەکگرتووەکانی لە پشتیوانیکردنی ئاسایش و ئاشتی و سەقامگیریی ناوچەکەدا کردەوە.
لای خۆیەوە، حەسان پابەندبوونی نەتەوە یەکگرتووەکانی بۆ پشتیوانیکردن و پاڵپشتیکردنی عیراق لە بوارە جیاجیاکاندا نوێ کردەوە، هەروەها پەرۆشیی رێکخراوەکەیانی بۆ بەردەوامبوونی هاوکاری لەگەڵ عیراق دەربڕی بۆ ئاسانکاری لە بەدیهێنانی ئامانجەکانی گەشەپێدان و پشتیوانیکردنی ئەو هەوڵانەی کە ئامانجیان پتەوکردنی سەقامگیری و گەشەکردنە .
سەرۆک کۆماری عیراق و سەرۆکی ئەنجومنەری وەزیران کۆبوونەوە و جەختیان لەسەر چەسپاندنی بنەماکانی ئاسایش و سەقامگیری لە ناوچەکە کردەوە.
ئەمڕۆ سەرۆک کۆمار د.لەتیف رەشید سەرۆک کۆماری عیراق، چاوی کەوت بە محەمەد شیاع سودانی، سەرۆکی ئەنجومەنی وەزیران و لە کۆبوونەوەی نێوانیاندا چەند پرسێکی تایبەت گفتوگۆی لەبارەوەکرا .
لە دیدارەکەدا، گفتوگۆ لەبارەی دوایین پێشهاتەکانی رەوشی گشتی وڵات کرا و جەخت لەسەر یەکخستنی هەڵوێستی هێزە نیشتمانییەکان کرایەوە بۆ پاڵپشتیکردنی بەرنامەی کاری حکومەت و پلانەکانی کە ئامانجیان بەدیهێنانی گەشە و خۆشگوزەرانییە.
هەروەها، باس لە پرس و دۆسیەکانی ناوچەکە و رۆڵی عیراق و هەوڵەکانی بۆ چەسپاندنی بنەماکانی ئاسایش و سەقامگیری لە ناوچەکە کرا.
لە بەشێکی تری دیدارەکەدا، ئامادەکارییەکان بۆ هەڵبژاردنەکانی داهاتووی ئەنجومەنی نوێنەران تاوتوێ کرا، و پێویستی دابینکردنی هەموو رێکارێک بۆ سەرخستنی پرۆسەکە خرایەڕوو، بەتایبەتی لە رێگەی بەشداریی بەرفراوانی دەنگدەران و هەڵبژاردنی نوێنەرانیان بۆ ئەنجومەنی نوێنەران بە شێوەیەک کە خواستی هاووڵاتیان بەدی بهێنێت و داواکارییەکانیان بۆ گەیشتن بە گەشەپێدانی گشتگیر جێبەجێ بکات.
د. لەتیف رەشید سەرۆک کۆماری عیراق، ئەمڕۆ دووشەممە، 11ـی 8ـی 2025، لە کۆشکی بەغداد، پێشوازی لە د. عەلی لاریجانی ئەمینداری ئەنجومەنی باڵای ئاسایشی نەتەوەیی کۆماری ئیسلامیی ئێران و وەفدی هاوڕێی کرد.
لە دیدارێکدا، کە قاسم ئەعرەجی راوێژکاری ئاسایشی نیشتیمانیی عیراق و بریکاری وەزارەتی دەرەوە محەمەد حوسێن بەحرلعلوم ئامادەی بوون. لاریجانی سڵاوی سەرۆکی ئێرانی بە سەرۆک کۆمار گەیاند. هەروەها سەرۆک کۆماری عیراق سڵاوی خۆی بۆ سەرۆک پزیشکیان و گەلی ئێران نارد و هیوای پێشکەوتن و گەشەسەندنی بەردەوامی بۆ خواستن ،جەختیشی لە قووڵایی پەیوەندییە مێژووییەکان و بەرژەوەندییە هاوبەشەکانی نێوان عیراق و کۆماری ئیسلامیی ئێران کردەوە، هەروەها پەرۆشیی عیراقی بۆ پەرەپێدانی چوارچێوەی هاریکاریی دووقۆڵی دووپاتکردەوە، بەشێوەیەک کە خزمەت بە هەردوو گەلی دراوسێ بکات و ئاسایش و سەقامگیریی ناوچەکە بچەسپێنێت.
سەرۆک کۆمار ئەوەشی خستەڕوو کە عیراق بەردەوامە لەسەر پتەوکردنی سیاسەتی کرانەوەی ئەرێنی لەگەڵ هەموو وڵاتانی دراوسێ و بنیاتنانی هاوبەشیی لەسەر بنەمای بەرژەوەندیی هاوبەش و ڕێزی یەکتری، بەجۆرێک کە هاریکاریی ئابووری و ئەمنی بەهێز بکات و بەشداری بکات لە بەرقەرارکردنی ئاشتی و خۆشگوزەرانی بۆ گەلانی ناوچەکە.
لەکۆبوونەوەکەدا، گفتوگۆ لەبارەی دوایین پێشهاتە هەرێمی و نێودەوڵەتییەکانەوە کرا و جەخت لەسەر گرنگیی بەردەوامیی دیالۆگی بنیاتنەرانە لەنێوان وڵاتانی ناوچەکە بۆ چارەسەرکردنی قەیرانەکان و کارکردن بۆ چەسپاندنی بنەماکانی رێزگرتنی یەکتری و دەستوەرنەدان لە کاروباری ناوخۆیی یەکتر کرایەوە.
لای خۆیەوە، لاریجانی سڵاوی سەرکردایەتیی ئێرانی بە سەرۆک کۆمار گەیاند و پێزانینی وڵاتەکەی بۆ هەڵوێستەکانی عیراق دەربڕی کە پشتگیری لە بەهێزکردنی ئاسایشی هەرێمی دەکەن، هەروەها ستایشی رۆڵی گرنگی عیراقی کرد لە لێک نزیککردنەوەی بۆچوونی لایەنە جیاوازەکاندا.
هەروەها سوپاس و پێزانینی خۆی ئاراستەی گەلی عیراق کرد بۆ پێشوازی و میوانداریکردنی زیارەتکارانی ئێرانی لەکاتی بەجێهێنانی رێوڕەسمی زیارەتی چلەی شەهیداندا.
د.لەتیف رەشید سەرۆک کۆماری عیراق پێشوازی لە عەبدولعەزیز کوڕی خالید شەمەری باڵیۆزی شانشینی عەرەبستانی سعودییە لە عیراق کرد و جەختی لە گرنگی فراوانکردنی ئاسۆی هاریکاری هاوبەشی نێوان هەردوو وڵات کردەوە.
لەمیانی دیدارەکەدا کە ئەمڕۆ دووشەممە لە کۆشکی بەغداد بەڕێوەچوو، باس لە پەیوەندیی برایەتی و هاریکاریی نێوان هەردوو وڵات و چۆنیەتی پەرەپێدانیان کرا.
سەرۆک کۆمار جەختیکردەوە لە گرنگی فراوانکردنی ئاسۆی هاریکاری هاوبەشی نێوان عیراق و شانشینی عەرەبستانی سعودییە و چالاککردنی پەیوەندی و هەماهەنگی لەسەر پرسە جۆراوجۆرەکانی جێی بایەخی هەردولا بە مەبەستی هێنانەدی ویستی هەردوو گەلی برا بۆ گەشەپێدان و خۆشگوزەرانی و دامەزراندنی بناغەکانی ئاشتی و سەقامگیری لە ناوچەکەدا.
لای خۆیەوە باڵیۆزی عەرەبستانی سعوودییە پەرۆشی شانشینی عەرەبستانی سعودی دووپاتکردەوە بۆ پاراستنی هاریکاری لەگەڵ عیراق لە ئاستە جیاجیاکاندا، بە شێوەیەک کە خزمەت بە پێشکەوتن و خۆشگوزەرانی و سەقامگیری بکات، ئاماژەشیکرد بە قووڵی و مێژووی پەیوەندییەکانی نێوان هەردوو وڵات.