هەواڵەکان
بافڵ جەلال تاڵەبانی هۆشداری لە رەوشی ناوچەکە دەدات و داوای گۆڕینی سیاسەتی کورد لە بەغداد دەکات
بافڵ جەلال تاڵەبانی، سەرۆکی یەکێتیی نیشتمانیی کوردستان لە پانێڵی 'بنیاتنانی کوردستانێکی بەهێزتر: یەکگرتوویی، ئاسایش و هاوبەشی هەرێمی' لە دیداری مێری هۆشداری لە ئاڵۆزییەکانی رۆژهەڵاتی ناوەڕاست دا و رایگەیاند: ناوچەکە لەژێر مەترسییەکی گەورەدایە و پێویستیشە سیاسەتی کورد لە بەغداد بگۆڕێت.
لەبارەی پرۆسە ئاشتیش لە باکوری کوردستان و تورکیا وتی: دەبێت هەمووان پشتیوانی پرۆسەی ئاشتی بن لە توركیا.
سەبارەت بە چارەسەری ئاشتییانەی پرسی کورد، بافڵ جەلال تاڵەبانی ئەوەشی ئاشکراکرد: یەکێتیی نیشتمانیی کوردستان بەردەوامە لە هەوڵەکانی بۆ زیندووکردنەوە و پەرەپێدانی پەیوەندییە نێودەوڵەتییەکانی لەپێناو بەهێزکردنی پێگەی هەرێم و نەبوون و ناشبنە پیاوی هیچ وڵات و لایەنێک.
لە بەشێکی دیکەی وتەکانیدا پەیوەست بە رەوشی ناوخۆی عیراق، سەرۆکی یەکێتی باسی لە پەیوەندییەکانی حزبەکەی لەگەڵ هێز و لایەنە سیاسییەکان کرد و وتی: پەیوەندییەکی زۆرباشمان لەگەڵ سەرجەم لایەنەکانی عیراقدا هەیە، بەڵام پێویستە سیاسەتی خۆمان لە بەغداد بگۆڕین بۆ ئەوەی لە ئاست پێشهاتەکاندا بێت.
هەر لەو چوارچێوەیەدا و لەبارەی هەوڵەکان بۆ چاکسازی و گۆڕانکاری لە عیراقدا، بافڵ جەلال تاڵەبانی ئاماژەی بەوە کرد کە "عەلی زەیدی دەیەوێت گۆڕانکاریی جدی و قورس لە عیراقدا ئەنجامبدات".
وەزارەتی دەرەوەی ئێران كردنەوەی گەروی هورمز بە جێبەجێكردنی بەڵێنەكانی واشنتۆنەوە دەبەستێتەوە و رایدەگەیەنێت، لێكتێگەیشتنی تاران و مەسقەت لەسەر رێڕەوە ئاوییەكان، بە واتای كردنەوەی دەستبەجێی گەروەكە نایەت.
كازم غەریب ئابادی، جێگری وەزیری دەرەوەی ئێران رایگەیاند، رێككەوتنی دووقۆڵیی تاران لەگەڵ عوممان لەبارەی دیاریكردنی رێڕەوەكانی هاتوچۆ لە گەروی هورمز، هەنگاوێكی یاسایی و تەكنیكیی نوێیە لە جیاتی رێكارە كۆنەكان، هەردوو وڵاتیش كار بۆ تۆماركردنی رێككەوتنەكە لە رێكخراوی نێودەوڵەتیی كەشتیوانیی سەر بە نەتەوە یەكگرتووەكان دەكەن، بەڵام ئەم هەنگاوە مانای دەستپێكردنەوەی خێرای هاتوچۆ نییە.
روونیشی كردەوە، تاران ناچار نییە لەم قۆناغەدا گەروی هورمز بكاتەوە، كۆنتڕۆڵی ئێران بەسەر گەروەكەدا بەردەوام دەبێت تا ئەو كاتەی واشنتۆن تێدەگات بژاردەی سەربازیی چارەسەری كێشەكان ناكات.
جێگری وەزیری دەرەوەی ئێران جەختیشی كردەوە، كردنەوەی هورمز بە تەواوی پەیوەستە بە جێبەجێكردنی بەڵێنەكانی ئەمریكاوە.
سەرۆکی ئۆکراین دەڵێت، روسیا بنکەکانی کەرتی وزە و کارەبای لە ئۆکراین کردووەتە ئامانج، ئەمەش دوای راگەیاندنی ئاگربەست لەلایەن دۆناڵد ترەمپ، سەرۆکی ئەمریکاوە.
ڤۆلۆدیمێر زیلینسکی، سەرۆکی ئۆکراین رایگەیاند، روسەکان وێستگەیەکی بەرهەمهێنانی کارەبایان لە کیێڤ کردووەتە ئامانج، و دواتر هێرشەکان بنکەکانی کەرتی وزەی لە ناوچەی خارکیڤ گرتووەتەوە، هەموو ئەمانە دوای ئەوە رووی دا کە سەرۆکی ئەمریکا لێدوانەکەی خۆی سەبارەت بە راگرتنی شەڕ لە کەرتی وزە دا".
پێشتر دۆناڵد ترەمپ، جەختی کردبووەوە کە روسیا و ئۆکراین رازی بوون بە ئاگربەست و هێرشنەکردنەسەر کەرتی وزە، ئەمەش دوای ئەوە هات کە پێشتر رەخنەی لەو هێرشانە گرت بوو کە کیێڤ دەیكردە سەر بنکە نەوتییەکانی روسیا.
هێزەکانی بەڕێوەبەرایەتیی گشتیی دژەتیرۆر، پاڵپشت بە زانیاری هەواڵگری ورد و بەدواداچوونی بەردەوام، توانییان تیرۆرستێک دەستگیربکەن لە ناوچەی باینجان.
هێزەکانی بەڕێوەبەرایەتیی گشتیی دژەتیرۆر ئاشکرایکرد، تیرۆرستی دەستگیرکراو بەناوی 'حکم ردام محمد الرفیعي' ناسراو بە 'ابو الحکم' خەڵکی پارێزگای سەڵاحەدینە و چەکداری رێکخراوی تیرۆرستیی دەوڵەتی ئیسلامیی بووە لە فرقەی 'ذات الصوار'ـی لیوای 'عەبدوڵای کوڕی عومەر' بەشداری چەندین کار و چالاکی تیرۆرستی و شەڕی دژ بە هێزە ئەمنییەکان کردووە، دوای ڕووخانی دەوڵەتی ئیسلامی هاتووەتە سنوری پارێزگای سلێمانی و لە ناوچەی باینجان نیشتەجێ بووە.
ئەوەشی خستەڕوو، ناوبراو فەرمانی دەستگیرکردنی هەیە لەلایەن دادگای لێکۆڵینەوەی نەینەوا بە مادەی 4ـی تیرۆر، دەستبەجێ پاش دەستگیرکردنی رادەستی یاساکرا بە مەبەستی سزادانی.
لیژنە هاوبەشەکانی قائیمقامیەتی سلێمانی هۆشداری دەدەنە خاوەن مارکێت و فرۆشیاران لە بەرزکردنەوەی هەڕەمەکیی نرخەکان، و سەرۆکی لیژنەکەش جەخت دەکاتەوە کە سەرجەم ئەو کاڵایانەی لە کاتی گۆڕانکارییەکانی نرخدا لە بازاڕدا هەبوون پێشتر هێنراون و پەیوەندییان بە بەهای دۆلارەوە نەبووە.
بابان ئەحمەد، سەرۆکی لیژنە هاوبەشەکانی قائیمقامیەتی سلێمانی، لەمیانی بەشداریکردنی لە گەشتی هەواڵە ئابورییەکانی کوردسات نیوز رایگەیاند، کە ئەو کاڵا و شتومەکانەی لە کاتی گۆڕانکارییەکانی نرخدا لە بازاردا هەبوون، هی پێشتر بوون و هیچ پەیوەندییەکیان بە بەرزبوونەوەی بەهای دۆلارەوە نەبووە لە بانکی ناوەندیدا، بەڵام هەندێک لە خاوەن مارکێتەکان لەسەر خۆیان و بەشێوەیەکی هەڕەمەکی نرخەکانیان بەرزکردەوە.
سەرۆکی لیژنە هاوبەشەکان ئاماژەی بەوەشکرد، گلەیی هاووڵاتییان لەوەبووە کە بۆچی بەو خێراییە زۆرە نرخەکان گران کراون، لە کاتێکدا کاڵاکان هیپێشترن و کڕینیان بە نرخی پێشتر بووە. جەختیشی کردەوە، کە ئەم جۆرە هەڵسوکەوتانە پەیوەندی بە ویژدانەوە هەیە، چونکە کڕیارەکان هەموویان کەس و کاری یەکترن.
بابان ئەحمەد ئەوەشی خستەڕوو، سەرەڕای ئەوەی بەشێک لە خاوەنکارەکان هەستیان بە بەرپرسیارێتی کردووە، بەڵام کەمینەیەک هەبوون کە نرخیان بەرزکردبووەوە، و لیژنە هاوبەشەکان رێکاری پێویستیان گرتووەتەبەر و بەردەوام دەبن لە رێگریکردن لە گرانکردنی نرخەکان.
بابان ئەحمەد، سەرۆکی لیژنە هاوبەشەکانی قائیمقامیەتی سلێمانی، باسی لەوەشکرد، پەڕەی رەسمی قائیمقامیەت و هێڵە گەرمەکان ئامادەن بۆ وەرگرتنی سکاڵای هاووڵاتییان، و هەرکەسێک تێبینیی گرانبوونی نرخ یان هەر سەرپێچییەک لەسەر کۆی سێکتەرەکان هەبێت، دەتوانێت لە رێگەی ژمارە تەلەفۆنی (07708677777)ـەوە پەیوەندی بکات و تیمەکان بەدواداچوونی وردی بۆ دەکەن.
سەرۆکی لیژنە هاوبەشەکان دەشڵێت؛ سکاڵاکانی هاووڵاتییان جۆراوجۆر بوون؛ لەوانە بەرزکردنەوەی نرخی هەندێک لە بەرهەمە ناوخۆییەکان و میوەهات (وەک فرۆشتنی کیلۆیەک هەنار بە شەش هەزار دینار)، و جەختیشی کردەوە کە لیژنەکان بە بەردەوامی سەردانی کۆگا، مارکێت و کۆمپانیا دابەشکارەکان دەکەن و رێکاری توند بەرانبەر هەر سەرپێچییەک دەگرنەبەر.
سکرتێری ئەنجومەنی باڵای ئاسایشی نیشتمانیی ئێران دەڵێت، ئەمەریکا هەندێک لەو حەوت مەرجەی تارانی قبوڵ کردووە، بەڵام وەڵامەکە هێشتا وەک پێویست نییە.
موحسین رەزایی، سکرتێری ئەنجومەنی باڵای ئاسایشی نیشتمانیی ئێران ئەمڕۆ بە میدیای وڵاتەکەی رایگەیاند، هەڵوێستی ئەمەریکا سەبارەت بە مەرجەکانی تری هێشتا ناڕوونە و ئەنجومەنەکە پێیوایە وەڵامەکەی واشنتۆن بۆ پێشنیازەکانی تاران تەواو نییە.
هەروەها جەختی کردەوە، ئێران خۆی کاتی کۆتایی هاتنی ئەم تێهەڵکێشانە دیاری دەکات و تا گەیشتن بە داواکارییە رەواکانی بەردەوام دەبێت لە خۆڕاگرتن.
موحسین رەزایی ئەوەشی خستەروو، ئێران چاوەڕێی روونکردنەوەی زیاتری ئەمەریکایە لەسەر پرسە هەڵپەسێردراوەکان، و لە ئێستادا لە بری وەڵامدانەوە، چاوەڕێی تەواوبوونی وەڵام و هەڵوێستی ئەمەریکایە.
ترەمپ رەزامەندیی روسیا و ئۆکراین بۆ "ئاگربەستی وزە" رادەگەیەنێت و زیلینسکی توشی سەرسوڕمان دەبێت.
دۆناڵد ترەمپ، سەرۆکی ئەمەریکا، ئەمڕۆ رایگەیاند، روسیا و ئۆکراین رێککەوتوون لەسەر راگرتنی هێرشەکانیان بۆ سەر کەرتی وزەی یەکتر، ئەمەش رۆژێک دوای رەخنەکانی لە هێرشەکانی کیێڤ بۆ سەر دامەزراوە نەوتییەکانی مۆسکۆ دێت.
ترەمپ لە تۆڕی کۆمەڵایەتیی تروس سۆشیال بڵاویکردەوە: "ئۆکراین رازی بوو هێرش نەکاتە سەر ئامانجە نەوتییەکانی روسیا، روسیاش ڕازی بوو هەمان کار بکات!"، بەبێ ئەوەی وردەکاری زیاتر بخاتە ڕوو.
لە بەرانبەردا، ڤۆلۆدیمێر زیلینسکی، سەرۆکی ئۆکراین ئاماژەی بەوەکرد، ئاگاداری راگەیەنراوەکەی ترەمپ نەبووە، بەڵام ئامادەیە قبوڵی بکات ئەگەر روسیاییش ڕازی بێت، ماڵپەڕی ئەکسیۆس لە سەرچاوەی خۆیەوە رایگەیاند، کیێڤ چاوەڕێی دەستنیشانکردنی کاتی دەستپێکردنی ئاگربەستەکەیە لەلایەن سەرۆکی ئەمەریکاوە.
ئەم پێشهاتانە لە کاتێکدا دێن کە پێشتر لە هەمان رۆژدا زیلینسکی بە مەرجی وەستاندنی هێرشەکانی مۆسکۆ بۆ سەر ژێرخانی وزەی وڵاتەکەی، ئامادەیی کیێڤی دەربڕیبوو بۆ راگرتنی هێرشەکان بۆ سەر پاڵاوگە نەوتییەکانی روسیا، و جەختی کردبووەوە کە هەر هەنگاوێک دەبێت لەسەر بنەمای مامەڵەی دوولایەنە و بە گەرەنتی راستەقینەوە بێت.
سەرۆکی یەکێتی لە کۆبوونەوەی لەگەڵ کونسوڵی نوێی فەرەنسا جەختی لە دابینکردنی شایستە داراییەکانی هەرێم کردەوە و رایگەیاند، نابێت بە هیچ شێوەیەک قووتی هاونیشتمانییان تێکەڵ بە کێشە سیاسییەکان بکرێت.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە ئیمانوێل مینیۆ، کونسوڵی گشتیی نوێی فەرەنسا لە هەرێمی کوردستان کرد.
لە دیدارەکەدا بافڵ جەلال تاڵەبانی پیرۆزبایی لە کونسوڵی نوێی فەرەنسا کرد بەبۆنەی دەستبەکاربوونییەوە و هیوای خواست قۆناغی کارکردنی لە هەرێمی کوردستان ببێتە مایەی برەودانی زیاتر بە پەیوەندییەکانی نێوان هەردوولا.
پرسی پەیوەندییەکانی هەولێر و بەغداد تاوتوێ کرا و بافڵ جەلال تاڵەبانی جەختی لە دابینکردنی ماف و شایستە داراییەکانی هەرێمی کوردستان لە چوارچێوەی دەستووردا کردەوە و رایگەیاند، نابێت بە هیچ شێوەیەک قووتی هاونیشتمانییان تێکەڵ بە کێشە سیاسییەکان بکرێت.
شارەوانیی سلێمانی شۆفێران ئاگادار دەکاتەوە؛ سبەینێ سایدێکی شەقامی سەرەکیی گەڕەکی بەختیاری بەربەست دەکرێت و داواش دەکات شەقامی خوار تەلاری هونەر وەک رێگای جێگرەوە بەکاربهێنن.
شارەوانیی سلێمانی ئاشکرایکرد،، سبەینێ سەعات 9:00ـی بەیانی، بە مەبەستی خێرا کارکردن لە یەکتربڕی "شەوکەت حاجی موشیر" و قیرتاوکردنەوەی، سایدی رۆیشتن لە تەلاری هونەرەوە بۆ شەقامی سەرەکیی گەڕەکی بەختیاری بەربەست دەکرێت.
شارەوانی داوا لە شۆفێران دەکات بۆ کارئاسانی لە هاتوچۆ، شەقامی خوار تەلاری هونەر وەک رێگای جێگرەوە بەکاربهێنن و پابەندی هێماکانی هاتوچۆ بن.
زیلینسکی مەرجی راگرتنی هێرشەکانی سەر پاڵاوگەکانی نەوتی روسیا دەبەستێتەوە بەوەی مۆسکۆ هێرشەکانی بۆ سەر ژێرخانی وزەی ئۆکراین رابگرێت.
ڤۆلۆدیمێر زیلینسکی، سەرۆکی ئۆکراین، ئەمڕۆ رایگەیاند، وڵاتەکەی ئامادەیە هێرشەکانی سەر پاڵاوگەکانی نەوتی روسیا ڕابگرێت، بە مەرجێک مۆسکۆ دەستبەرداری هێرشکردنە سەر ژێرخانی وزەی ئۆکراین بێت، جەختیشی کردەوە کە هەر هەنگاوێک بۆ کەمکردنەوەی گرژییەکانی نێوان هەردوو وڵات دەبێت لەسەر بنەمای مامەڵەی دوولایەنە و بە مسۆگەرکردنی گەرەنتی راستەقینە بۆ پابەندبوون پێوەی بێت.
زیلینسکی لە پەیامێکدا ئاشکرایکرد، وڵاتەکەی ئامادەیە هەنگاوی پێویست بۆ کەمکردنەوەی پەرەسەندنەکان بنێت، ئەگەر روسیاش ئارەزوویەکی هاوشێوە نیشان بدات بۆ راگرتنی ئامانجدانە سەر بنکەکانی وزەی ئۆکراین، ئەمەش لە کاتێکدایە کە پێکدادانە سەربازییەکانی نێوان هەردوولا و کاریگەرییەکانیان لەسەر ژێرخانە سەرەکییەکان بەردەوامن.
سەرۆکی ئۆکراین ئەوەشی خستەڕوو، بەردەوام دەبێت لە ئەنجامدانی کۆبوونەوە و گفتوگۆ لەگەڵ سەرکردە ئەوروپییەکان سەبارەت بە پێشهاتەکانی مەیدانی و پێداویستییە بەرگرییەکانی وڵاتەکەی، ئاماژەی بەوەشکرد کە پەیوەندییەکان رۆژانە بەردەوامن بۆ تاوتوێکردنی دابینکردنی پاکێجی نوێی سیستمەکانی بەرگریی ئاسمانی و پێدانی تەقەمەنی پێویست بۆ فڕۆکە جەنگییەکان، بە ئامانجی بەهێزکردنی تواناکانی ئۆکراین لە رووبەڕووبوونەوەی روسیا.
ئەم لێدوانانەی زیلینسکی لە کاتێکدا دێن کە دۆناڵد ترەمپ، سەرۆکی ئەمەریکا، رۆژی شەممە داوای لە ئۆکراین کردبوو سەرۆکەکەی خۆی بگۆڕێت و رایگەیاندبوو، باشترە زیلینسکی واز لە هێرشکردنە سەر پاڵاوگەکانی نەوتی روسیا بهێنێت.
لە سەردانەکەیدا بۆ کۆیە، قوباد تاڵەبانی، لێپرسراوی مەکتەبی سکرتارییەتی سەرۆک مام جەلال لەگەڵ کوردە عومەر، لێپرسراوی مەڵبەند و ئەندامانی ئەنجوومەنی مەڵبەندی 14ـی رێکخستنی کۆیەی یەکێتیی نیشتمانیی کوردستان کۆبووەوە.
لە کۆبوونەوەکەدا کە رۆژی یەکشەممە 11ـی 10ـی 2026 بەڕێوەچوو، قوباد تاڵەبانی ئاماژەی بە گرنگیی کۆیەی کرد بۆ یەکێتیی نیشتمانیی کوردستان و داوایکرد ئەندامانی ئەنجوومەنی مەڵبەند زۆر زیاتر لە جاران خۆیان ماندوو بکەن و خۆیان بە داکۆکیکاری مافی هەموو چین و توێژەکانی خەڵکی کۆیە بزانن.
لێپرسراوی مەکتەبی سکرتارییەتی سەرۆک مام جەلال، سیاسەت و هەڵوێستی یەکێتی بۆ ئامادەبووانی کۆبوونەوەکە روونکردەوە و جەختیکردەوە کە یەکێتی بە سەرۆکایەتیی بافڵ جەلال تاڵەبانی پابەندە بە تەواوی ئەو بەڵێنانەی بە خەڵکی کوردستان و دەنگدەرانی خۆی داوە.
لە بەشێکی دیکەی کۆبوونەوەکەدا ئاماژەی بە پێگەی یەکێتی کرد لە کوردستان و عیراق و ناوچەکەدا و روونیکردەوە کە لە دوای سەرۆک مام جەلالەوە، هەرگیز یەکێتی وەک ئێستا پێگەی بەهێز نەبووە، بە جۆرێک لە هەموو پرسە گرنگەکاندا حیساب بۆ بۆچوون و هەڵوێستی یەکێتی دەکرێت. وتیشی بەهۆی روونبوونی سیاسەت و هەڵوێستەکانییەوە، یەکێتیی ئێستا متمانەپێکراوترین هێزی سیاسییە.
بافڵ جەلال تاڵەبانی، سەرۆکی یەکێتیی نیشتمانیی کوردستان، لە دەباشان پێشوازی لە کریستیان ئۆلفکێ، کونسوڵی گشتیی نوێی ئەڵمانیا لە هەرێمی کوردستان کرد.
لە دیدارەکەدا، سەرۆکی یەکێتی پیرۆزبایی دەستبەکاربوونی لە کونسوڵی نوێی ئەڵمانیا کرد و هیوای سەرکەوتنی لە ئەرکە نوێیەکەیدا بۆ خواست. هاوکات ئامادەیی یەکێتیی نیشتمانیی کوردستانی بۆ هەر هاوکاری و هەماهەنگییەک لەپێناو سەرخستنی کارەکانیدا دووپاتکردەوە.
هەروەها تاوتوێی دۆخی گشتیی هەرێمی کوردستان، عێراق و ناوچەکە کرا. لای خۆیەوە بافڵ جەلال تاڵەبانی جەختی لە گرنگیی بەردەوامیی هاریکاری و پەیوەندییەکانی نێوان لایەنەکان کردەوە، لەپێناو زاڵبوون بەسەر ئاڵنگارییەکان و کەمکردنەوەی گرژییەکاندا.
بڕیارە لە رۆژانی 14و 15ی ئەم مانگەدا، بیستەمین كۆنفرانسی نێودەوڵەتی یەكێتیی ئەوروپا، توركیا، رۆژهەڵاتی ناوەڕاست و كورد لە پەرلەمانی ئەوروپا لە برۆكسلی پایتەختی بەلژیكا بەڕێوەبچێت.
لەم چالاكییە دوو رۆژییەدا ژمارەیەكی بەرچاو لە سیاسەتمەداران، یاساناسان، رۆژنامەنووسان و پارێزەرانی مافی مرۆڤ بەشدار دەبن لەوانەش پەروین بوڵدان پەرلەمنتاری دەم پارتی و لەیلا زانا سیاسەتمەداری كورد، چەندین كەسایەتی تر.
لە دوو رۆژی كۆنفراسەكا چەندین دیدارو پانێڵی بەرێوەچێت كە سەرجەمیان تایبەتن بە پرسی كورد و داهاتووی پرۆسەی ئاشتی لە توركیا.
ئەمڕۆ یەکشەممە، 11ـی 10ـی 2026 لەسەر رێگای پێنجوێن سەیدسادق بارهەڵگرێک وەرگەڕا و سێ کەس بەو هۆیەوە بریندار بوون.
پەیامنێری کوردسات نیوز رایگەیاند، سێ کەسەکە لە دایک و باوکێک و منداڵەکەیان پێکهاتوون و باوکەکە تەمەنی 55 ساڵە و دایکەکەش تەمەنی 35 ساڵە.
وتیشی، بارهەڵگرەکە باری 'تەماتە'ـی پێبووە و جگە لە زیانە گیانییەکانی روداوەکە، زیانی مادیشی لێکەوتووەتەوە و بارەکەی بەهەدەر چووە.
هاوکات، سەرچاوەیەک لە نەخۆشخانەی 'شەهید شەوکەت' بەهۆی سەختی برینەکەیەوە پیاوەکە رەوانەی فریاکەوتنی نەخۆشخانەی شار کراوە و دایک و منداڵەکە بۆ چاودێری پزیشکی لەنەخۆشحانەی 'شەهید شەوکەت' هێڵراونەتەوە.
وەزارەتی دادی عیراق 200 فەرمانی گرتن و دەستبەسەرداگرتنی پارە و موڵك و ماڵی جیاوازی راگەیاند و دوپاتیشیكردەوە، هەوڵەكان بۆ گەڕاندنەوەی سەروەت و سامانی عیراق بەردەوامن.
ئەحمەد لعێبی وتەبێژی وەزارەتی دادی عیراق رایگەیاندووە: بە ئامانجی گەڕانەوەی سامانی دزراوی عیراق، مانگی رابردوودا 200 فەرمانی گرتن و دەستبەسەرداگرتن بۆ موڵك لەلایەن دامەزراوە جیاوازەكانی دەوڵەتەوە تۆماركراون و رێكاریی یاساییان بەرامبەر گیراوەتە بەر.
ئاماژەی بەوەشكردووە، وەزارەتەكە كار لەسەر فراوانكردنی هاوكارییە دەستوری و یاساییەكان دەكات لەگەڵ چەندین وڵاتدا، لەوانەش ئیمزاكردنی یاداشتنامەی لێكتێگەیشتن تایبەت بە گواستنەوەی سزادراوان، هاوكاری دادوەری و گۆڕینەوەی زانیاری، ئەم هەوڵانە هاوتەریبن لەگەڵ هەنگاوەكانی وەزارەت بۆ بەدواداچوونی داواكراوان و گەڕاندنەوەی سامانی دزراوی عیراق.
قوباد تاڵەبانی، جێگری سەرۆک وەزیران سەردانی قەزای کۆیەی کرد و لە یەکەم وێستگەی سەردانەکەیدا زانکۆی کۆیەی بەسەرکردەوە و لەگەڵ سەرۆک و ئەنجومەنی زانکۆ کۆبووەوە.
لە دەستپێکی سەردانەکەیدا قوباد تاڵەبانی، بەردی بناغەی پارکی "بەردی بناغە"ـی لە هەواری زانکۆی کۆیە دانا کە بەبۆنەی یادی 23 ساڵەی دامەزراندنی زانکۆکە بە هاوکاری دامەزراوەی سەرۆک مام جەلال دروست دەکرێت.
دواتر جێگری سەرۆک وەزیران لەگەڵ سەرۆک و ئەنجومەنی زانکۆکە کۆبووەوە. سەرۆکایەتی زانکۆی کۆیە سوپاسی پشتیوانییە بەردەوامەکانی قوباد تاڵەبانیان کرد بۆ پێشخستنی زانکۆکە و بە تایبەتیش کە لەم دوایانەدا پاسی کارەبایی بۆ زانکۆ دابین کردوە.
قوباد تاڵەبانیش لە کۆبوونەوەکەدا دڵخۆشی خۆی دەربڕی بەوەی هەر کاتێک سەردانی زانکۆی کۆیە دەکات گۆڕانکاری و پێشکەوتنی نوێ دەبینێت. دەستخۆشیشی لە سەرۆکایەتی زانکۆ و مامۆستایان و خوێندکارانی زانکۆکە کرد بۆ داهێنان و هەوڵە بەردەوامەکانیان بۆ خزمەتکردنی ژینگە. داواشیکرد ئەو پڕۆژانەی هەیانە لە بوارەکانی ریسایکلین و بەکارهێنانی وزەی پاک و دابینکردنی کارەبا لە وزەی خۆر، زیاتر پەرەی پێ بدەن بۆ ئەوەی لە شارەکانی دیکەی کوردستان و عێراق سوودی لێ وەربگیرێت.
بەڵێنیشی پێدان بۆ لەمەودواش پشتیوانی هەموو هەوڵێک دەکات بۆ پێشخستنی زیاتری زانکۆی کۆیە، بە تایبەتیش پشتگیری لە پڕۆژە داهێنەرانەکانیان دەکات.