هەواڵەکان
دێرین لەتیف، بەڕێوەبەری دەزگای میدیای کوردسات بە بۆنەی رۆژی زمانی کوردییەوە پەیامێکی بڵاوکردەوە وتێدا هاتووە، زمانی کوردی تەنها زمانێکی قسەکردن نییە؛ مێژووی خەبات، ناسنامەی نەتەوە و روحی گەلێکە.
ئاماژەی بەوەشکردوە ئەوان لە دەزگای میدیای کوردسات خۆیان بە بەرپرسیار و خزمەتکار دەزانن لە پاراستنی زمانی کوردی و پەرەپێدانی و بڕوایان وایە میدیا دەبێت قەڵغانێک بێت بۆ پاراستنی زمان و کەلتوور، نەک هۆکارێک بۆ لاوازبوونیان
دەقی پەیامەکەی دێرین لەتیف، بەڕێوەبەری دەزگای میدیای کوردسات
زمانی کوردی تەنها زمانێکی قسەکردن نییە؛ مێژووی خەبات، ناسنامەی نەتەوە و ڕووحی گەلێکە کە لە ماوەی سەدان ساڵدا بەرانبەر بە هەموو هەوڵەکانی سڕینەوە خۆی پاراستووە. لە ڕۆژی زمانی کوردیدا، جەخت لەوە دەکەینەوە کە پاراستنی زمان، پاراستنی بوون و ئایندەی نەتەوەیە.
ئێمە لە دەزگای میدیای کوردسات خۆمان بە بەرپرسیار و خزمەتکار دەزانین لە پاراستنی زمانی کوردی و پەرەپێدانی لە بوارەکانی میدیا، ڕۆشنبیری و گەیاندنی پەیامی دروست کە لەگەڵ زمان و کلتورو ژیانی کوردیمان بگونجێت.
باوەڕمان وایە میدیا دەبێت قەڵغانێک بێت بۆ پاراستنی زمان و کەلتوور، نەک هۆکارێک بۆ لاوازبوونیان.
زمانی کوردی میراتێکی نیشتیمانییە و پاراستنی ئەو میراتە ئەرکی هەموومانە. ئەگەر زمان بەهێز بێت، ناسنامە و یەکگرتنی نەتەوەش بەهێز دەبێت. بۆیە پێویستە هەموو دامەزراوە ڕاگەیاندن، پەروەردە و کەلتوورییەکان هاوکاربن لە پاراستنی ئەم بنەمایە نەتەوەییە.
لە رێکارێکی ئەمنیی تونددا، بۆ خۆپاراستن لە ئەگەری سیخوری، دەزگا ئەمنییەکانی ئەمریکا رێگەیان نەدا ئەو رۆژنامەنوس و کەسانەی یاوەری دۆناڵد ترەمپ بوون، هیچ جۆرە دیاری و ئامێرێکی ئەلیکترۆنی لە چینەوە ببەنە ناو فڕۆکەی سەرۆکایەتییەوە.
ئێمیلی گودین، پەیامنێری رۆژنامەی نیویۆرک پۆست، کە لەو گەشتەدا یاوەری دۆناڵد ترەمپی کردبوو رایگەیاند، چەند خولەکێک پێش ئەوەی سەر فرۆکەکەی دۆناڵد ترەمپ بکەون و پەکین جێبهێڵن، فەرمانیان پێکراوە تەواوی ئەو دیارییانەی پێیان بەخشراوە، مۆبایل و لاپتۆپەکانیان و تەنانەت دەرزییەکانی سەر یەخەیان رادەستی تیمە ئەمنییەکان بکەن.
شارەزایانیش ئاماژە بەوە دەکەن، کە ئەم هەنگاوە لە ترسی چاندنی ئامێری سیخوڕی و پرۆگرامی هاککردن بووە لەلایەن حکومەتی چینەوە، بۆیە بڕیاردراوە ئەو کەلوپەلانە بە فڕۆکەیەکی جیاواز بگەڕێندرێنەوە بۆ ئەمریکا بە مەبەستی پشکنین و دواتر رادەستی خاوەنەکانیان دەکرێتەوە.
بەبۆنەی کۆچی دوایی عەقید مەهدی ئەحمەد، شاناز ئیبراهیم ئەحمەد، ئەندامی مەکتەبی سیاسی یەکێتی پەیامێکی هاوخەمی بڵاوکردەوە.
شاناز ئیبراهیم ئەحەمەد لە پەیامەکەیدا دەڵێت؛ بەبیستنی هەواڵی ماڵئاوایی یەکجارەکی عەقید مەهدی ئەحمەد زۆر غەمباربووم.
هەروەها پرسەو سەرەخۆشی لەخێزان و کەسوکارەکەی و هەموو هاوڕێیانی لەدەستەی یەکی پاسەوانانی سەرۆک مام جەلال و دەزگای میدیایی کوردسات دەکات و خۆی بە هاوبەشی خەم و پەژارەیان دەزانێت.
ئاماژەی بەوەشکردوە، بۆ هەتایە یادی ئەم ئەفسەرە بەئەمەکەی کوردستان و رێبازی مام جەلال، کەهەمیشە بە رەوشتە بەرزەکەی و دڵسۆزییە بێ وێنەکەی دەناسرایەوە، بەزیندوویی دەمێنێتەوە.
دەقی پەیامەکەی شاناز ئیبراهیم ئەحمەد
بەبیستنی هەواڵی ماڵئاوایی یەکجارەکی عەقید (مەهدی ئەحمەد)، زۆر غەمباربووم.
پرسەو سەرەخۆشی لەخێزان و کەسوکارەکەی و هەموو هاوڕێیانی لەدەستەی یەکی پاسەوانانی سەرۆک مام جەلال و دەزگای میدیایی کوردسات ئەکەم و هاوبەشی خەم و پەژارەیانم.
خواى گەورە لەکۆچکردوو خۆش بێت و جێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.
بۆ هەتایە یادی ئەم ئەفسەرە بەئەمەکەی کوردستان و رێبازی مام جەلال، کەهەمیشە بە ڕەوشتە بەرزەکەی و دڵسۆزییە بێ وێنەکەی دەناسرایەوە، بەزیندوویی دەمێنێتەوە.
شاناز ئیبراهیم ئەحمەد
ئەندامی مەکتەبی سیاسی (ی.ن.ک)
بەڕێوەبەرایەتی حەج و عومرەی کوردستان بڵاویکردوەتەوە، پرۆسەی چوونی هاووڵاتیانی هەرێم بە مەبەستی بەجێهێنانی فەریزەی حەج، بەردەوامە و تا ئێستا نزیکەی چوار هەزار هاووڵاتی گەیشتونەتە سعودیە.
کاروان ستونی، وتەبێژی فەرمی حەج و عومرەی کوردستان رایگەیاند، تاوەکو ئەمڕۆ هەینی، 15ی ئایاری 2026 نزیکەی چوار هەزار هاووڵاتیی هەرێم بە سەلامەتی گەیشتوونەتە وڵاتی سعودیە و لە شاری مەککە نیشتەجێ کراون.
کاروان ستونی ئاماژەی بەوەشکردوە، باری تەندروستی هەموو حاجیان جێگیرە و گەشتە ئاسمانییەکانیش بەپێی ئەو خشتەیەی بۆیان دانراوە بەبێ گرفت بەڕێوەدەچن.
ناوبراو راشیگەیاند، بڕیارە تاوەکو رۆژی 17-5-2026 دوا کاروانی هاووڵاتیانی هەرێم بگەنە سعودییە بە مەبەستی بەجێهێنانی فەریزەی حەج.
لە رووی خزمەتگوزاریی و پێداویستییەکانەوە، وتەبێژی حەج و عومرە جەختی کردوەتەوە، باشترین ئاسانکاری و خزمەتگوزاری لە هەموو روەکانەوە بە خواردنیشەوە پێشکەش بەو هاووڵاتیانە دەکرێت.
لە سنوری رانییە و لە بەری مەرگە، هەروە بروسکە لە باوک و دوو منداڵی داوە، تەندروستی رانییە بە کوردسات نیوزی راگەیاند، بەهۆیەوە باوک و منداڵێکیان گیانیان لەدەستدا، هەر ئەمڕۆو لە روداوێکی تردا لە سلێمانی هاووڵاتیەک بە هەورەبروسکە گیانی لەدەستدا.
ئەمڕۆ هەینی، لە سنوری گوندی سەرسیانی ناحیەی بنگرد، هەورەبروسکە لە سێ کەسی داوە، کە هەموویان یەک خێزانن.
خالید ئەحمەد پەیامنێری کوردسات نیوز رایگەیاند، ئەو سێ کەسە باوکێک و دوو کوڕی بوون و بە مەبەستی سەیران چونەتەوە بۆ گوندەکەیان، خۆیان دانیشوتی ناحیەی چوارقوڕنەن.
جێگری بەڕێوەبەری نەخۆشخانەی رانییە بە کوردسات نیوزی راگەیاند، باوکەکە تەمەنی 40 ساڵێک دەبێت و ئەو کوڕەشی کە گینای لەدەستداوە تەمەنی 13 ساڵێک دەبێت، ئەو منداڵەشی کە تەندروستی جێگیرە تەمەنی پێنج ساڵە و چارەسەری پێویستی بۆکراوە و تا ئێستا لە نەخۆشخانە ماوەتەوە.
سبەینێ شەممە، هێڵی ئاسمانی عیراقی گەشتەکانی لە فڕۆکەخانەی نێودەوڵەتی جەلال تاڵەبانییەوە بۆ ئیستەنبوڵ دەستپێدەکاتەوە
فڕۆکەخانەی نێودەوڵەتیی جەلال تاڵەبانی لە رێگەی بەشی پەیوەندییە گشتییەکان و راگەیاندنی خۆیەوە رایگەیاند، هێڵی ئاسمانى عیراقى گەشتە ئاسمانییەکانی بۆ وڵاتی تورکیا دەستپێدەکاتەوە.
بەپێی ئەو خشتەیەی کە لەلایەن کۆمپانیاکەوە ئاڕاستەی فڕۆکەخانە کراوە، بڕیارە لە سبەینێ شەممە، ڕێکەوتی 16ی ئایاری 2026 گەشتە ئاسمانییەکان لە نێوان هێڵی (سلێمانی-ئەستەنبوڵ-سلێمانی) بە رەسمی دەستپێبکەن.
ئەمە لە کاتێکدایە، بەهۆی جەنگی ئەمریکا و ئیسرائیل بەرانبەر بە ئێران گەشتە ئاسمانییەکانی عیراق و هەرێمی کوردستان بۆ تورکیا راگیرا بوو، رۆژی پێنجشەممە لە فڕۆکەخانەی بەغدادەوە گەشتەکان دەستیان پێکردەوە و بڕیارە سبەینێش لە سلێمانی بە هەمانشێوە دەستپێبکاتەوە.
دۆناڵد ترەمپی سەرۆکی ئەمریکا رایگەیاند، لاری نییە لەوەی ئێران بەرنامە ئەتۆمییەکانی بۆ ماوەی 20 سآڵ رابگرێت، بەڵام دەبێت بەڵین بدەن راستگۆ بن و پابەندی بەڵێنەکەیان بن.
سەرۆکی ئەمریکا دەڵێت؛ سوپای ئێرانیان لەناوبردووە، رەنگە پێویست بێت ئۆپراسیۆنی بچوک دژی ئێران ئەنجام بدەن و جەختیکردەوە ئێران هەرگیز چەکی ئەتۆمی بەدەست ناهێنێت و لە هیچ رەوشێکدا دەرفەتی ئەوەی نابێت.
لەبارەی سەردانەکەی بۆ وڵاتی چین ئەوەی خستەڕوو، سەرۆکی چین دڵنیای کردوەتەوە، پاڵپشتی رێگریکردن لە ئێران دەکات بۆ بەدەستهێنانی چەکی ئەتۆمی و دەیەوێت گەروی هورمز بکاتەوە.
دۆناڵد ترەمپ وتویەتی؛ سەبارەت بە تایوان هیچ بەڵێنێکی بە سەرۆکی چین نەداوە و داوای هیچ شتێکیشی لە سەرۆکی چین نەکردووە کە پەیوەندی بە ئێرانەوە هەبێت.
ئاماژەی بەوەشکردوە، لە ماوەی چەند رۆژێکدا بڕیارێک دەدات سەبارەت بە هەڵگرتنی سزاکانی سەر کۆمپانیا نەوتییەکانی چین کە نەوتی ئێران دەکڕن.
ترەمپ: سەرۆکی چین پاڵپشتی ڕێگری لە ئێران دەکات بۆ بەدەستهێنانی چەکی ئەتۆمی و دەیەوێت گەرووی هورمز بکاتەوە.
ئەنجومەنی نوێنەرانی عیراق رایگەیاند، لە قۆناغی داهاتوودا چاودێری كارەكانی حكومەت دەكەین.
دەستەی سەرۆكایەتی ئەنجومەنی نوێنەرانی عیراق لە راگەیەنراوێكدا ئاماژەی بۆ ئەوەكردووە، لە قۆناغی داهاتوودا بە وردی چاودێری كارەكانی حكومەتی نوێی عیراق دەكەن، بە مەبەستی دڵنیابوون لە جێبەجێكردنی بەڵێنەكان.
سەرۆكایەتی ئەنجومەنی نوێنەران، پشتیوانی خۆی بۆ حكومەت دەربڕی بە مەبەستی جێبەجێكردنی كارنامە وەزارییەكەی و بەدیهێنانی خواستەكانی گەلی عیراق.
داواشی لە عەلی زەیدی كردووە، تەواوكردنی پێكهێنانی تەواوی كابینەكەی و پركردنەوەی پۆستە وەزارییەكان خێراتر بكات.
عەباس عراقچی، وەزیری دەرەوەی ئێران، رایگەیاند، وڵاتەکەی سەرەڕای ناسکی و لەرزۆکیی قۆناغی ئاگربەستەکە، پابەندە بە پاراستنی، ئەوەش لەپێناو رەخساندنی دەرفەت بۆ هەوڵە دیپلۆماسییەکان.
ناوبراو ئاماژەی بەوە کرد، کە تاران تەنها لە کاتێکدا گرنگی بە پرۆسەی دانوستان دەدات کە لایەنی بەرانبەر جددی بێت و جەختیشی کردەوە، ئەوان هیچ جۆرە متمانەیەکیان بە ئەمریکییەکان نییە و ئەم بێمتمانەییەش بە کۆسپی سەرەکیی بەردەم سەرجەم هەوڵە دیپلۆماسییەکان دادەنێت.
عراقچی لە درێژەی لێدوانەکانیدا هۆشداری دا، کە لایەنێک هەیە دەیەوێت جارێکی تر واشنتن پەلکێشی ناو شەڕ بکات و هیوای خواست کە لە کۆتاییدا حیکمەت و عەقڵانییەت سەرکەوێت و رێگەی دیپلۆماسی بۆ گەیشتن بە چارەسەر بگیرێتەبەر.
وەزیری دەرەوەی ئێران ئاماژەی بەوەشکرد، هیچ چارەسەرێکی سەربازی بۆ پرسی ئێران بوونی نییە و وڵاتەکەی لەژێر هیچ جۆرە گوشار یان هەڕەشەیەکدا خۆی بەدەستەوە نادات.
عراقچی، ئەوەشیخستوەتەڕوو، کە دانوستانەکانی ئێستا بەهۆی نەبوونی متمانە و گەیشتنی نامەی دژ بەیەک لەلایەن ئەمریکییەکانەوە تووشی چەقبەستوویی بووە، بۆیە پێش گەیشتن بە هەر رێککەوتنێک لەگەڵ ئەمریکا، پێویستە هەموو شتەکان بە رونی و وردی دیاری بکرێن.
بڕیارە هەفتەی داهاتوو ڤلادیمیر پۆتین، سەرۆکی روسیا، سەردانێکی رەسمی بۆ چین ئەنجام بدات، ئەمەش لە کاتێکدایە ئەمڕۆ دۆناڵد ترەمپ کۆتایی بە سەردانە دوو رۆژەکەی ۆ ئەو وڵاتە هێنا.
بە گوێرەی میدیاکانی چین، سەردانی سەرۆکی روسیا، بۆ چین تەنها یەک رۆژ دەخایەنێت و بڕیارە 20ـی ئەم مانگە بگاتە پەکین.
سەردانەکەی پوتن، دوای کۆبوونەوە مێژووییەکەی نێوان شی جین پینگ، سەرۆکی چین و دۆناڵد ترەمپی سەرۆکی ئەمریکا لە پەکین دێت، کە تێیدا تاوتوێی چەندین دۆسیەی گرنگی وەک شەڕی ئێران، بازرگانی و پرسە جیۆپۆلەتیکییەکان کرابوو.
پێشتر کۆشکی کرملین رایگەیاندبوو، کە ئامادەکارییەکان بۆ سەردانی سەرۆکی روسیا بۆ چین کۆتاییان هاتووە و ئەم گەشتە لە "داهاتوویەکی زۆر نزیکدا" ئەنجام دەدرێت.
میدیاکان بە گرنگییەوە دەڕواننە ئەم سەردانەی پوتن، چونکە نیشاندەری هەوڵەکانی پەکینە بۆ بەڕێوەبردن و راگرتنی هاوسەنگی لە پەیوەندییە هاوتهریبەکانیدا لەگەڵ واشنتن و مۆسکۆدا.
چاودێرانیش پێ پێیانوایە، ئەم جووڵە دیپلۆماسییە خێرایەی پوتن، ئاماژەیەکی رونە بۆ بەردەوامیی هەماهەنگییە نزیک و ستراتیژییەکانی نێوان مۆسکۆ و پەکین لە بەرانبەر گۆڕانکارییەکانی ناوچەکە و جیهاندا
رۆژنامەی نیویۆرک پۆست بڵاویکردەوە کە دۆناڵد ترەمپ، سەرۆکی ئەمریکا لە کاتی سەردانەکەیدا بۆ چین مۆبایلە تایبەتەکەی بەکارنەهێناوە، وبە ئەگەرێکی زۆرەوە پۆستەکانی لە تۆڕە کۆمەڵایەتییەکان لە واشنتنەوە بڵاودەکرانەوە.
ترەمپ و تەواوی ئەندامانی شاندی ئەمریکا رێنمایییان پێدرابوو کە مۆبایلە تایبەتەکانیان بەکارنەهێنن، ئەوەش بەهۆی مەترسیی هاککردن.
کۆشکی سپی بۆ ڕۆژنامەکە پشتڕاستی کردەوە کە ترەمپ لەناو خاکی چیندا دەست بۆ مۆبایلە تایبەتەکەی نەبردوە.
نیویۆرک پۆست ئاماژەی بەوە کردووە کە چالاکییەکانی ترەمپ لە تۆڕە کۆمەڵایەتییەکان لە کاتی سەردانەکەیدا بە شێوەیەکی بەرچاو کەمی کردبوو.
جەختیشیکردەوە: کارمەندانی ئیدارەی ئەمریکا کە یاوەری سەرۆک بون، مۆبایل و ئەژماری ئیمێڵی کاتیان بەکاهێناوە.
رۆژنامەکە وتیشی: هەموو ئامێرە ئەلیکترۆنییە تایبەتەکانی بەرپرسانی ئەمریکا لەناو "قەفەسی فارادای"دا (Faraday cages) هەڵگیراون، کە دەیانپارێزێت لە شەپۆلە کارۆموگناتیسییە دەرەکییەکان. ئەم ئامێرانە لەناو فڕۆکەی سەرۆکایەتی "ئێر فۆرس وەن"دا پارێزراوبون و تەنها دوای گەڕانەوەیان دەستیان پێیان دەگاتەوە.
جێی ئاماژەیە سەرۆکی ئەمریکا لە ماوەی نێوان 13بۆ 15ی ئایار سەردانی چینی کرد، و ئەمڕۆ هەینی دوایین کۆبوونەوەی لەگەڵ "شی جین بینگ" ئەنجامدا و دواتر خاکی چینی جێهێشت.
فیدراسیۆنی نێودەوڵەتی تۆپی پێ (فیفا) رووبەڕووی هۆشدارییەکی توندی کۆمەڵێک زانا و پسپۆڕی نێودەوڵەتی بووەوە؛ پسپۆڕان جەخت دەکەنەوە کە رێکارە خۆپارێزییەکانی ئێستای فیفا بەس نین بۆ پاراستنی یاریزانان و هاندەران لەو شەپۆلە گەرمایە توندەی کە چاوەڕوان دەکرێت لە کاتی بەڕێوەچوونی مۆندیالی 2026 لە ویلایەتە یەکگرتووەکانی ئەمریکا، کەنەدا و مەکسیک روبدات.
لە نامەیەکی کراوەدا کە 20 پسپۆڕ لە ناوەندە توێژینەوەکانی ئەوروپا، ئەمریکای باکوور و ئوسترالیا واژۆیان کردووە، ئاماژە بەوە کراوە کە پڕۆتۆکۆڵەکانی ئێستای فیفا، کە پشت بە پشووی کورت (3 خولەک) و پێوەری (WBGT) بۆ پێوانەکردنی فشاری گەرمی دەبەستێت، چیتر لەگەڵ گۆڕانکارییە خێراکانی کەشوهەوادا ناگونجێن.
پسپۆڕان داوای گرتنەبەری ڕێکاری توندتر دەکەن، لەوانە راگرتن یان دواخستنی یارییەکان کاتێک پێوەری فشاری گەرمی 28 پلەی سەدی تێدەپەڕێنێت، لە جیاتی ئەو پێوەرەی ئێستا کە 32 پلەیە. و زیادکردنی کاتی فێنکبوونەوە بۆ لانی کەم 6 خولەک، بۆ دڵنیابوونەوە لە گەڕانەوەی چالاکی بۆ یاریزانان، وباشترکردنی سیستەمی فێنککەرەوە لەناو یاریگاکان و دابینکردنی شوێنی سێبەری فراوان بۆ هاندەران.
توێژینەوە نوێیەکان داتای مەترسیداریان خستووەتە روو، بەو پێیەی 14یاریگا لە کۆی 16 یاریگا روبەڕووی پلەی گەرمی بەرز دەبنەوە.
شاری میامی لە سەرووی لیستی ئەو شارانەدایە کە زۆرترین مەترسییان لەسەرە، چونکە مۆدێلە کەشوهەواییەکان پێشبینی دەکەن هەموو ئەو یارییانەی لەوێ ئەنجام دەدرێن، ئاستی رێپێدراوی فشاری گەرمی تێپەڕێنن.
هەروەها راپۆرتەکە هۆشداری داوە لە مەترسیی هاوشێوە کە هەڕەشە لە یاری کۆتایی دەکات لە یاریگای "میتلایف" لە نیوجێرسی.
هۆشدارییەکان تەنها لایەنی وەرزشییان نەگرتووەتەوە، بەڵکو سەدان هەزار هاندەریش دەگرێتەوە. زانایان جەختیان کردەوە کە بەساڵاچووان و ئەو کەسانەی نەخۆشی درێژخایەنیان هەیە، لەناو یاریگاکان و شوێنە کراوەکاندا رووبەڕووی کێشەی تەندروستی مەترسیدار دەبنەوە، ئەمەش پێویستی بە زیادکردنی وێستگەکانی ئاو و سەنتەرەکانی چاودێری پزیشکی بەپەلە هەیە.
لای خۆیەوە، فیفا دووپاتی کردەوە کە سەلامەتی بەشداربووان "لە پێشینەی کارەکانە"، ئاماژەی بەوەش کرد کە بەردەوامە لە لێکۆڵینەوە لە مەترسییە کەشوهەواییەکان لە چوارچێوەی پلانە کارگێڕییەکانیدا، لەگەڵ هێشتنەوەی دەرگای گۆڕانکاری لە رێکارەکاندا کراوە بەپێی گۆڕانکارییەکانی کەشوهەوا پێش دەستپێکردنی پاڵەوانێتییەکە لە 11ی حوزەیرانی 2026.
لە رۆژی زمانی کوردیدا، ئەم زمانە شیرینە بەرز و پیرۆز رادەگرین کە قەڵای پارێزەری ناسنامەمانە. زمانی کوردی بۆ ئێمە تەنیا ئامرازی ئاخاوتن نییە، بەڵکو مێژووی خۆڕاگری و ناسنامەی بوونمانە.
هەرێمی کوردستان هەمیشە بە فرەزمانی و فرەکولتووریی پێکهاتەکانی دەوڵەمەند بووە، پاراستنی زمانی کوردی و رێزگرتن لە زمانی هەموو ئەو پێکهاتە رەسەنانەی لەم نیشتمانەدا پێکەوە دەژین، نیشانەی باڵای شارستانییەت و بنەمایەکی سەرەکیی دەوڵەتدارییە.
ئێمە لە یەکێتیی نیشتمانیی کوردستان لەسەر رێبازەکەی سەرۆک مام جەلال، جەخت لە پاراستنی رەسەنایەتیی زمانی کوردی و پەرەپێدانی لە ناوەندەکانی خوێندن و دامەزراوە فەرمییەکاندا دەکەینەوە.
بافڵ جەلال تاڵەبانی
سەرۆکی یەکێتیی نیشتمانیی کوردستان
فەرماندەیی ناوەندیی ئەمریكا جەخت لەسەر كەمبوونەوەی رێژەی 90٪ی توانا سەربازییەكانی ئێران دەكاتەوە و دەشڵێت: مەترسی ئێران بۆسەر ناوچەكە كەمبووەتەوە.
براد كوپەر فەرماندەی فەرماندەیی ناوەندیی ئەمریكا 'سێنتكۆم' رایگەیاند: بەهۆی هێرشەكانی ماوەی رابردوو بۆسەر ئێران، توانا سەربازیی و بەرگرییەكانی ئەو وڵاتە بە رێژەی 90٪ كەمی كردووە و ئێستا مەترسی و هەڕەشەكانی ئێران بۆسەر وڵاتانی دراوسێی و رۆژهەڵاتی ناوەڕاست و بەرژەوەندییەكانی ئەمریكا لە ناوچەكە بە تەواوی كەمبووەتەوە.
براد كوپەر جەختی لەوەشكردەوە، ئێستا ئێران ناتوانێت چەك و هاوكاری بگەیەنێتە گروپە چەكدارەكانی نزیك لە وڵاتەكەی لە ناوچەكەدا و سەرجەم رێگەكانی گواستنەوەی ئەو هاوكاریی و چەكانە لەنێوانیاندا پچڕێنراون.
کەشناسی هەرێم، بڵاویکردوەتەوە بە گشتی ئاسمان نیمچە هەوردەبێت و لە کاتەکانی بەیانی لە ناوچە شاخاوییەکانی نمەباران دەبێت و لە دوانیوەڕۆوە کاریگەری باران بارینەکە زیاتر دەبێت و هەورە بروسکەی لەگەڵ دەبێت.
ئەمڕۆ هەینی بەڕێوەبەرایەتی گشتی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، پلەکانی گەرما نزمدەبنەوە و لە ناوچە شاخاوییەکانیش ئەگەری بارینی نمەباران هەیە.
کەشناسی ئاماژەی بەوەشکردوە، لەگەڵ باران باریندا ئەگەری هەورە بروسکە و خۆڵبارینیش هەیە.
لەبارەی کەشی سبەینێ شەممەشيوە، کەشناسی دەڵێت؛ پلەکانی گەرما بەراورد بە ئەمڕۆ دوو بۆ سێ پلە نزمتر دەبنەوە. و کەمێک نزمتر دەبنەوە و لە زۆربەی ناوچەکان ئەگەری باران بارین هەیە، کە هەندێک کات بە شێوەی تاوە باران و هەورە بروسکە دەبێت هۆشداریشیداوە لە ئەگەری خۆڵ بارین.
بەرزترین پلەکانی گەرمای پێشبینیکراویش بەمشێوەیە دەبێت
هەولێر : 28 پلەی سیلیزی
پیرمام : 25 پلەی سیلیزی
سۆران : 25 پلەی سیلیزی
حاجی ئۆمەران : 14 پلەی سیلیزی
سلێمانی : 26 پلەی سیلیزی
چەمچەماڵ : 29 پلەی سیلیزی
دهۆک : 25 پلەی سیلیزی
زاخۆ : 37 پلەی سیلیزی
هەڵەبجە : 28 پلەی سیلیزی
گەرمیان : 35 پلەی سیلیزی
عەباس عراقچی، وەزیری دەرەوەی ئێران، ئەمڕۆ هەینی، جەختی کردەوە کە ئێران توانیویەتی وەک هێزێکی کارا و یاریزانێکی کاریگەر لە ناوچەکەدا خۆی بسەلمێنێت.
ئاماژەی بەوەش کرد کە جەنگی دوایی خاڵێکی وەرچەرخان بوو کە پێگەی وڵاتەکەی لەسەر ئاستی هەرێمی و نێودەوڵەتی بەرزکردەوە.
عراقچی جەختیکردوە کە: ئێران توانای خۆی بۆ روبەڕووبوونەوەی گەورەترین هێزەکان سەلماند، ووڵاتانی گرووپی "بریکس" (BRICS) دوای شکستی دەستدرێژییەکانی ئەمریکا، ئێستا بە چاوێکی جیاوازەوە سەیری ئێران دەکەن.
ئاماژەی بەوەکرد کە: هەموو وڵاتان دان بەوەدا دەنێن کە ئێران لە جەنگەکەدا سەرکەوتوو بوو و توانی ئیرادەی خۆی بسەپێنێت و ئامانجەکانی دوژمنانی پووچەڵ بکاتەوە.
لەمیانی قسەکانیدا عراقچی بە توندی باسی لە هەڵوێستی ئیمارات کرد و وتی: ئیمارات لە جەنگەکەدا لەپاڵ ئەمریکا و ئیسرائیل وەستاوە، زانیاری ورد و بەڵگەی روونمان لەبەردەستە کە ئەوە دەسەلمێنن، وئێران تەنها ئەو ئامانجە ئەمریکییانەی پێکاوە کە لە خاکی ئیماراتدا بوون.
عراقچی ئاشکرایکرد: نەماندەویست ئەم بابەتانە بخەینە روو لەپێناو پاراستنی یەکڕیزی گرووپی "بریکس"، بەڵام بەهۆی ئەوەی نوێنەری ئیمارات باسی کرد، ئێمەش ناچار بووین راستییەکان ئاشکرا بکەین. وئامۆژگاری ئیماراتمان کردووە کە ئەمریکا و ئیسرائیل ناتوانن ئاسایشی بۆ دابین بکەن؛ باشترە ئیمارات سیاسەتی خۆی بەرامبەر ئێران بگۆڕێت، چونکە ئێمە دوو دراوسێین و مێژوو و داهاتوویەکمان پێکەوە بەستراوەتەوە.
لە کۆتایی قسەکانیدا عراقچی وتی: ئاسایش دەبێت لە رێگەی هاوکاری نێوان وڵاتانی ناوچەکە بەدەست بهێنرێت، نەک بە پشت بەستن بە هێزە بیانییەکان.