پۆلیسی گەرمیان رایگەیاند، بەیانی ئەمڕۆ لە ناوچەی پیشەسازی  قەزای کەلار، تەرمی دوو کەس دۆزراونەتەوە، کە وەستا و شاگردێکن و شوێنەواری گولـلە بە جەستەیانەوە دیارە.

ئەمڕۆ یەکشەممە، سۆران حەمەغەریب، وتەبێژی پۆلیسی گەرمیان، بە کوردسات نیوزی راگەیاند، تەرمی دوو کەس لە ناوچەی پیشەسازی کەلار دۆزراونەتەوە و بە گوێرەی زانیارییە سەرەتاییەکان تەرمەکان لە نهۆمی دووەمی دوکانێکی ناوچەی پیشەسازییدا بوون.

ئەو دوو کەسەی کوژراون، لە دایکبووی ساڵانی (1991 و 1997)ـن و  لەئێستادا بەمەبەستی توێکاری تەرمەکان رەوانەی پزیشکی دادی قەزای کەلار کراون.

ئاماژەی بەوەشکرد، شوێنەواری گولـلە بە جەستەیانەوە دیارە و گومان دەکرێت هەردوو کوژراوەکە شەوی رابردوو کوژرابن و دەستیانکردوە بە لێکۆڵینەوە لە روداوەکە.

لە ناو سەنتەری شاری سلێمانی، جگە لەپڕۆژەکانی تری ئاوەدانکردنەوە و نۆژەنکردنەوە،  کارکردن لە چوار پڕۆژەی گەورەی رێگاوبان بە گوژمەی زیاتر لە 45 ملیار دینار بەردەوامە و بە تەواوبونیان بەشێکی زۆری قەرەباڵغی سەر شەقامەکان کۆتایی دێت.

پرۆژەی یەکتربڕەکانی سلێمانی ژمارەیەک پرۆژەی ئەندازیاری و خزمەتگوزاریین، کە بە مەبەستی کەمکردنەوەی جەنجاڵی و قەرەباڵغی هاتوچۆ لە سەر شەقامی بازنەیی مەلیک مەحمود و دەروازەکانی شارەکە، بە سەرپەرشتی راستەوخۆی قوباد تاڵەبانی، جێگری سەرۆکی ئەنجومەنی وەزیران و لەلایەن سەرۆکایەتیی شارەوانیی سلێمانییەوە  جێبەجێ دەکرێن.

یەکتربڕی شەهید شەوکەتی حاجی موشیرە

پرۆژەی یەکەم، کە پڕۆژەی یەکتربڕی شەهید شەوکەتی حاجی موشیرە،  گوژمەکەی پێنج ملیار و 238 ملیۆن دینارە.

پڕۆژەکە دەکەوێتە سەر شەقامی بازنەی مەلیک مەحمود، ئەمساڵ دەست کراوە بەکارکردنتێدا و لە ئێستادا زۆرینەی کارەکانی تەواو بووە، پێشبینیش دەکرێت پێش کۆتایی هاتنی ئەمساڵ پرۆژەکە بەتەواوەتی بەڕووی شۆفێراندا بکرێتەوە.

ئەندەرپاسی سەر شەقامی سالم

پرۆژەی دووەم، کە ئێستا کارکردن تێیدا بەردەوام و ناوی (ئەندەرپاسی شەقامی سالم)ـە ،  گوژمەکەی حەوت ملیار و 800 ملیۆن دینارە.

ئامانج لەم پڕۆژە ستراتیژیەش،  کەمکردنەوەی قەرەباڵغی و ئاسانکاریکردنە بۆ هاتوچۆ،  پرۆژەکە یەکێکە لە پرۆژە گرنگەکانی سەرۆکایەتیی شارەوانیی سلێمانی و شەقامی بازنەی مەلیک مەحمود و و سەهۆڵەکە و سالم بەیەکەوە دەبەستێتەوە، و بڕیاڕ وایە تا مانگی 12ی ساڵی 2027 پڕۆژەکە تەواو بکرێت و  بە ڕوی شۆفێراندا بکرێتەوە.

یەکتربڕی گۆیژە

هاوکات،  پڕۆژەی سێیەمیش، کە دەکەوێتە سەر شەقامی بازنەی مەلیک مەحمود و چەند رۆژێکە دەستکراوە بە کارکردن تێیدا،  بریتییە لە (یەکتربڕی گۆیژە)، گوژمەی پرۆژەکەش 17ملیارو 423 ملیۆن دینارە و ماوەی پڕۆژەکە 660 رۆژە و بڕیار وایە 7ـی6ـی2028 پرۆژەکە تەواو بکرێت و لەلایەن سەرۆکایەتی شارەوانییەوە سەرپەشتی دەکرێت.

یەکتربڕی قەرەتۆغان

یەکتربڕی قەرەتۆغان، کە چوارەم پڕۆژەی ستراتیژی رێگاوبانی ناو سلێمانییە،  دەكەوێتە نزیك پردی وڵوبە، لە نێوان ئەوین سیتی و گرین سیتی،  سەنتەری شار و رۆژهەڵاتی سلێمانی بە شەقامی 100مەتری دەگەیەنێت و درێژییەکەی حەوت کیلۆمەترە.

لەیلا عومەر، سەرۆكی شارەوانیی سلێمانی، رایگەیاندوە،  یەكتربڕەكە 15 ملیار دیناری پێویستە، بودجە و دیزاینەكەی ئامادەكراوە و لەماوەیەكی نزیكدا كۆمپانیای جێبەجێكار دەست بە کارکردن دەکات تێیدا و ماوەی پرۆژەکەش 550 رۆژە.

جێی باسە، لە ماوەکانی رابردودا، چەندین یەکتربڕی تر، دروستکراون و بە روی شۆفێراندا کراونەتەوە؛  لەوانە یەکتربڕی تۆفیق وەهبی، یەکتربڕی باخی بەختیاری، یەکتربڕی والی، یەکتربڕی ئارام  و ئەندەرپاسی فاروق،  یەکتربڕی حەبسەخانی نەقیب،  کە ئەم پرۆژانە جگە لە پێدانی سیمایەکی جوان و مۆدێرن بە شارەکە، هۆکارێکی باشبوون بۆ کەمکردنەوەی قەرەباڵغی و ئاسانکاری بۆ هاتوچۆکردنی شۆفێران.

12یەمین فێستیڤاڵی هەنار لە هەڵەبجە کۆتاییهات و لە ماوەی چوار رۆژی فێستیڤاڵەکەدا، پێشوازییەکی بێوێنە لە گەشتیار و سەردانیکاران کرا، بە جۆرێک زیاتر لە 502 هەزار کەس سەردانی فێستیڤاڵەکەیان کرد و کۆی گشتیی فرۆشی بەرهەمەکانیش گەیشتە ملیارێک و 820 ملیۆن دینار. 

لە کۆنفرانسێکی رۆژنامەوانیدا، لیژنەی فێستیڤاڵی هەنار لە هەڵەبجە، رایگەیاند سەرکەوتوبون لە بەڕێوەچونی 12هەمین فێستیڤاڵی هەنار لە هەڵەبجە، و توانیویانە  پلانێکی تۆکمەی هاتوچۆ و ئەمنی جێبەجێ بکەن و فرۆشیی فێستیڤاڵەکەش ملیارێک و 820 ملیۆن دیناری تێپەڕاندوە.

ئاماژە بەوەشکرا، لە چوار رۆژی فێستیڤاڵەکەدا زیاتر لە 500 هەزار سەردانیکار  سەردانی فێستیڤاڵەکەیان کردوە و تێیدا پێشوازی لە 96 هەزار ئۆتۆمبێلی بچووک، زیاتر لە سێ هەزار  مینی‌پاس، 2500 پاسی گەورە، 444 مەنشەئە و پێنج گەزار ماتۆڕسکیل کرا، بە بێ ئەوەی هیچ ڕووداوێکی نەخوازراو تۆمار بکرێت.

هەروەها، فێستیڤاڵەکە دەرفەتی کاری بۆ 1800 خاوەنكار و بەهرەمەند رەخساند و بە کۆی گشتی زیاتر لە 3500 کەس راستەوخۆ لە دەستکەوتەکانی ئەم ساڵی ناو فێستیڤاڵەکە سوودمەند بوون.

داهاتی حكومەتی عیراق تا كۆتایی مانگی ئابی رابردوو گەیشتووەتە زیاتر لە 45 تریلیۆن دینار و 77%ی داهاتەكەش فرۆشتنی نەوت بووە.

سۆزان عەبدوڵا سەرۆكی دەستەی گشتیی چاودێریی داهاتە فیدراڵییەكان رایگەیاند، پرۆژەیاسای بودجەی ساڵی 2027 هێشتا لە قۆناغی ئامادەكردندایە و بەشداریی دەستەكەشیان لە پێداچوونەوە بە پرۆژەكە تەنها روكەش نییە و ئامانجیان بەدیهێنانی دادپەروەری و شەفافیەتە.

وتیشی، بەپێی داتاكانی وەزارەتی دارایی عیراق، تا 31ی ئابی ئەمساڵ كۆی داهاتەكان گەیشتوونەتە 45 ترلیۆن و 355 ملیار دینار و لەو بڕەش زیاتر لە 34 تریلیۆن دیناری داهاتی نەوتییە بە رێژەی 77% و زیاتر لە 10 تریلیۆنیشی داهاتی نانەوتییە بە رێژەی 23%.

سەرۆكی دەستەی گشتیی چاودێریی داهاتە فیدراڵییەكان راشیگەیاند، كۆی خەرجییەكان گەیشتووەتە نزیكەی 78 تریلیۆن دینار، كە لەو بڕە نزیكەی 75.8 تریلیۆن و 900 ملیار دینار و زیاتر لە سێ ترلیۆنیش خەرجی وەبەرهێنان بووە و كورتهێنانیش لە نێوان داهات و خەرجی زیاتر لە 33 ترلیۆن دینار بووە.

وەزیری گەیاندنی عیراق رایدەگەیەنێت، مانگی داهاتوو لەگەڵ سێ وڵات گرێبەست ئەنجامدەدەن بۆ تێپەڕبوونی هێڵی ئینتەرنێتی ئەو سێ وڵاتە بە خاكی عیراقدا بۆ وڵاتانی ئەوروپا.

مستەفا سەنەد، وەزیری گواستنەوە و گەیاندنی عیراق رایگەیاند، رۆژی 9ـی مانگی داهاتوو و لە پەراوێزی هەڵبژاردنی یەكێتی نێودەوڵەتی گەیاندن وەزارەتی گواستنەوە و گەیاندنی عیراق، لەگەڵ سێ وڵات گرێبەست ئەنجامدەدات بۆ تێپەڕبوونی هێڵی ئینتەرنێتی ئەو وڵاتە بە خاكی عیراقدا بۆ ئەوروپا.

ئەوەشی خستەڕوو، گرێبەستەكان پێگەی عیراق وەك ناوەندێكی هەرێمی و ئامرازێك بۆ گواستنەوەی نێودەوڵەتی داتا پتەوتر دەكات.

لیژنەی دارایی ئەنجومەنی نوێنەرانی عیراق بە ئامادەبوونی بەڕێوەبەری گشتیی فەرمانگەی قەرزی گشتی، كۆبوونەوەیەكی بۆ تاوتوێكردنی قەرزە ناوخۆیی و دەرەكییەكان لە رەشنووسی پڕۆژەیاسای بودجەی گشتیی ساڵی 2027 ئەنجامدا.

ئەنجومەنی نوێنەرانی عیراق بڵاویكردەوە، لیژنەی دارایی ئەنجومەنەكە بە سەرۆكایەتیی عودەی عەواد میوانداریی بەڕێوەبەری گشتیی فەرمانگەی قەرزی گشتیی لە وەزارەتی دارایی كرد بۆ تاوتوێكردنی چەند دۆسێیەک كە پەیوەندیدارن بە قەرزی گشتی و ئەو قەرزانەی لە رەشنوسی پرۆژەیاسای بودجەی گشتی ساڵی دارایی 2027دا هاتوون.

ئاماژەی بەوەشكردووە، لیژنەكە كۆی گشتیی قەرزی ناوخۆیی و دەرەكی و كۆی گشتیی گەرەنتی دراوەكان و هەروەها ئەو قەرزە ناوخۆیی و دەرەكیانەی لە بودجەدا پۆلێن كراون تاوتوێ كرد.

راشیگەیاند، لە میانی كۆبونەوەكە باس لەو بابەتانەی پەیوەندییان بە قەبارەی پابەندبوونی دارایی ناوخۆیی و دەرەكییەكانەوە هەیە كرا لەگەڵ پێداچوونەوە بە قەرزی گشتی عیراق

کەناڵ12ـی ئیسرائیل بڵاویکردوەتەوە، نیشانەکانی دەستپێکردنەوەی جەنگ رۆژ لە دوای رۆژ لە زیادبوندایە و هۆشداری دەدرێت زیاتر لە نێوەی کۆگاکانی موشەکی ئێران لەناو نەبراون.

ئەمڕۆ یەکشەممە، لە راپۆرتێدا، کەناڵە ئیسرائیلییەکە بڵاویکردوەتەوە،شارەزایان پێیانوایە، تەنیا چەند رۆژێک یان زۆرترینی چەند هەفتەیەک ماوە تا ترەمپ بەو ئەنجامە بگات کە بەردەوامبوون لە چاوەڕوانی وەڵامدانەوەی ئێران بێمانایە.،

کەناڵ 12ـی ئیسرائیل پێشبینی کردوە، دوای هەڵبژاردنەکانی ئیسرائیل،  دۆناڵد ترەمپ هەوڵدەدات پێش دەستپێکردنی هەڵبژاردنەکانی ئەمریکا ئەو کارەبکات و هێرشەکان بۆسەر ئێران دەستپێبکاتەوە.

لە راپۆرتەکەدا هاتووە؛ ئێران لە ئێستادا نزیکەی هەزار و 500 موشەکی بالیستی هەیە و لە ئەگەری روبەڕوبونەوەیەکی دیکەدا شارەکانی ئیسرائیل جارێکی دیکە دەبنە ئامانجی ئەو موشەکانە.

حوسێن موحیبی، وتەبێژی سوپای پاسدارانی ئێران، رایگەیاند کە دەستنیشانکردنی ئامانجی نوێ و داڕشتنی ئۆپراسیۆن لە جوگرافیای تازەدا لە کارنامەی هێزەکانیاندایە لە ئەگەری دەستپێکردنەوەی جەنگدا.

وتەبێژی سوپای پاسدارانی ئێران بە میدیای وڵاتەکەی راگەیاند، ئێستا لە جەنگدان لەگەڵ دەسەڵاتێکی دوژمندا و قۆناغگەلێکیان لەو جەنگە بڕیوە و سەرکەوتنیان بەدەستهێناوە.

موحیبی ئاستی یەکەمی سەرکەوتنەکانی بۆ رێگریکردن لە گەیشتنی دوژمن بە ئامانجەکانی بۆ روخاندنی  دەسەڵاتی ئێران و  پارچەکردنی ئێران گەڕاندەوە.

هەروەها و جەختکردوەتەوە، کە دوژمن دوای شکستهێنان لەو ئامانجانانەی ئێستا روی لە دانوستان و ناوبژیوانی کردووە.

وتەبێژی سوپای پاسداران بانگەشەکانی سێنتکۆم رەتدەکاتەوە  و دەڵێت؛ سوپای ئەمریکا نەیتوانیوە بۆ چەند سەعاتێکیش ئاسایش بۆ گەروی هورمز دابینبکات.

هەروەها باسی لەوە کرد کە پێگە سەربازییەکانی ئەمریکا لە ناوچەکەدا کەوتوونەتە بەر ئامانج و بوونەتە هۆی تێکدانی ئاسایش بۆ وڵاتانی ناوچەکە .

دوای زیاتر لە سێ مانگ و گەمارۆ توندەکانی ئەمریکا،  کەشتییەکی نەوتهەڵگری ئێران کە دوو ملیۆن بەرمیل نەوتی هەڵگرتووە، گەیشتە چین

کۆمپانیای تانکەر تراکەرز کە چاودێری جوڵەی کەستییەکان دەکات رایگەیاند، بارێکی نەوتی خامی ئێران کە بڕەکەی دەگاتە دوو ملیۆن بەرمیل، پاش سێ مانگ و نیو مانەوە لە ئاوەکاندا، بەم دواییانە گەیشتووەتە چین.

کۆمپانیاکە لە ڕێگەی پەیامێکەوە لە تۆڕی کۆمەڵایەتیی ئێکس ئاشکرای کرد، وێنە مانگە دەستکردەکان پەیوەستبوونی کەشتییەکی نەوتهەڵگری پەیوەندیدار بە ئێرانیان لە بەندەرەکانی چین پشتڕاستکردووەتەوە، بەڵام هیچ زانیارییەکی وردتری لەو بارەیەوە نەداوە.

ئەمەش لە کاتێکدایە کە بەپێی ڕاگەیەندراوە رەسمییەکانی ئێران، تەنیا لە شەش مانگی یەکەمی ئەمساڵدا زیاتر لە 16 ملیار دۆلار نەوت رەوانەی دەرەوە کراوە.

لە بەرانبەردا، سێنتکۆم رایگەیاندوە، لە دەستپێکی گەمارۆکانەوە ئێران نەیتوانیوە هیچ بڕە نەوتێک هەناردەی دەرەوە بکات و ئابورییەکەیان نزیکبوەتەوە لە سفر.