لە چوارچێوەی هەوڵەکان بۆ دابینکردنی سوتەمەنی و وەرگرتنی بەشەنەوتی ماڵان لە بەغداد، پارێزگاری سلێمانی سبەینێ بە نوسراوێکی رەسمی داوای 20 ملیۆن لیتر نەوتی سپی بۆ پارێزگاکانی سلێمانی و هەڵەبجە دەکات، هاوکات هەولێریش چاوەڕێی رەزامەندیی بەغدادە بۆ گواستنەوەی نەوت لە بێجییەوە.

محەمەد حەسیب، بەڕێوەبەری نەوت و کانزاکانی سلێمانی لە لێدوانێکی تایبەتدا بۆ کوردسات نیوز رایگەیاند، سبەینێ پارێزگاری سلێمانی بە مەبەستی وەرگرتنی بەشەپشکی نەوتی هەردوو پارێزگای سلێمانی و هەڵەبجە، نوسراوێکی رەسمی ئاڕاستەی وەزارەتی نەوتی عیراق دەکات.

بەڕێوەبەری نەوت و کانزاکان ئاماژەی بەوەش کرد، لە نوسراوەکەدا داوای بڕی 20 ملیۆن لیتر نەوت کراوە.

سەبارەت بە کاتی گەیشتنیشی وتی، پێشبینی دەکرێت هەر لەم هەفتەیەدا نەوتەکە بگاتە سلێمانی لە نزیکترین کاتدا دەست بە دابەشکردنی بکرێت بەسەر هاووڵاتیاندا.

سەبارەت بە پشکی هەولێر، هێمن قادر جێگری پارێزگاری هەولێر بە کوردسات نیوزی راگەیاند، بەڕێوەبەرایەتیی نەوت و کانزاکانی هەولێر گرێبەستی لەگەڵ کۆمپانیایەک ئەنجامداوە بە مەبەستی گواستنەوەی نەوتی سپی لە پاڵاوگەی بێجییەوە بۆ هەولێر.

ناوبراو جەختی کردەوە کە لە ئێستادا چاوەڕوانی بڕیار و رەزامەندیی کۆتایی حکومەتی عیراقن، هەر کاتێک رەزامەندییەکە درا، راستەوخۆ نەوتەکە دەگات و دەست بە دابەشکردنی دەکرێت.

ئەم هەوڵانە لە کاتێکدایە کە بەهۆی هاتنی وەرزی سەرما و کەمیی کارەبای نیشتمانییەوە، خواست لەسەر سوتەمەنی زیادیکردوە، بەڵام لە بازاڕەکاندا نرخی یەک بەرمیل نەوتی سپی 350 هەزار دیناری تێپەڕاندوە، ئەمەش بارگرانییەکی دارایی زۆری لەسەر شانی هاووڵاتیان دروستکردووە.

کۆمپانیای دانەغاز رایگەیاند، وێستگەکانی کێڵگەی کۆرمۆر زیانی زۆریان بەرکەوتوە و لە ئێستادا ناتوانن هیچ بڕە غازێک بەرهەمبهێنن.

ئەمڕۆ شەممە لە راگەیەندراوێكدا، کۆمپانیای دانەغاز ئاماژەی بەوەکردوە، وەک پێشتر لە سەرچاوە رەسمییەکانەوە بڵاوکراوەتەوە دەستیان بە بەرهەمهێنانی غاز نەکردوە.

لە راگەیەندراوەکەدا ئەوەش خراوەتەڕوو، ژمارەیەک لە میدیا ناوخۆییەکان بەبێ بوونی زانیاریی دروست، لێدوانی ناتەواو و ناڕاست سەبارەت بە رەوشی وێستگەی غازی کۆرمۆر بڵاودەکەنەوە.

دانەغاز داوا لە سەرجەم کەناڵەکانی راگەیاندن دەکات کە خۆیان لە روماڵکردنی نابەرپرسانە و پێشبینی و لێکدانەوەی بێبنەما بەدوور بگرن.

شەوی 8ـی11ـی2026 کێڵگەی غازی کۆرمۆر لە چەمچەماڵ کرایە ئامانج؛ هێرشەکە زیانی گەورەی ماددی بە بەشی بەرهەمهێنانی غازی ماڵان گەیاندووە و بوەتە هۆی کەمبونەوەی کارەبای نیشتمانی لەسەرانسەری هەرێمی کوردستان.

دوای چەند رۆژێک لە دواخستنی، بە زۆرینەی دەنگ، ئەنجومەنی پارێزگای كەركوك  کاندیدی بەرەی تورکمانی وەک پارێزگاری نوێ هەڵبژارد.

ئەمڕۆ شەممە، لە ئەنجومەنی پارێزگای کەرکوک، بە دەنگدان و بە زۆرینەی دەنگ، لە کۆبونەوەیەکی نائاسایی ئەنجومەنی پارێزگای كەركوك  قەحتان وەهبی وەنداوی بە پارێزگاری نوێێ کەرکوک هەڵبژردرا.

 پەیامنێری کوردسات نیوز رایگەیاند، قەحتان  وەنداوی بە 14 دەنگ لە کۆی 15 دەنگ بووەتە پارێزگاری نوێی کەرکوک.

پەیامنێری کوردسات نیوز ئاماژەی بەوەشکرد، پێش هەڵبژاردنی قەحتان  وەنداوی، دەستیلەكاركێشانەوەی محەمەد سەمعان پارێزگاری پێشوی كەركوك پەسەندكراوە.

لە یەکەم لێدوانیشیدا بۆ رۆژنامەنوسان، پارێزگارە نوێیەکەی کەرکوک رایگەیاند،  پشتیوانی لە دیدگا و پلانی سەرۆکی حکومەت دەکەن بۆ گەیشتن بە خواستەکانی پارێزگاکە.

جێی باسە، ئەنجومەنی پارێزگای کەرکووک لە 16 کورسی پێک دێت، لە هەڵبژاردنی 18ی کانونی یەکەمی 2023دا، لایەنە کوردییەکان حەوت کورسی؛ پێنجی یەکێتی و دووی پارتی، هەروەها پێکهاتەی عەرەب شەش کورسی، بەرەی تورکمانی دوو کورسی و پێکهاتەی کریستیان یەک کورسییان بەدەستهێنا.

عەلی زەیدی، سەرۆک وەزیرانی عیراق، لە کۆبونەوەیەکی بەپەلەی ئەمنیدا، بڕیاری دا سەرجەم تێوەگلاوانی دۆسیەی بەقاچاخبردنی نەوت لە ناوچەی  لە پارێزگای بابل رەوانەی دادگا بکرێن.

ئەمڕۆ شەممە سەرۆک وەزیرانی عیراق دوای کۆبونەوەی لەگەڵ ئەو لیژنەیەی لێکۆڵینەیان لە بونی پاڵاوگەی نائاسایی و یاریکردن بە نەوت کردبوو لە ناوچەی "جورف نەسر"،  نۆ لێپرسراوی باڵای ئەمنی و کارگێڕیی پارێزگای بابلی لە پۆستەکانیان دورخستەوە.

بڕیارەکە دوای پێشکەشکردنی راپۆرتی لیژنەی لێکۆڵینەوە هات، کە راستیی زانیارییەکانی دەزگای هەواڵگریی فیدراڵیی لەبارەی بونی پاڵاوگەی نایاسایی و یاریکردن بە نەوت لەو ناوچەیە پشتڕاست کردەوە.

 لەسەر ئەو بنەمایە، فەرماندەی گشتیی هێزە چەکدارەکان بڕیاری دا بە لەکارلادانی هەریەک لە؛ فەرماندەی پۆلیسی بابل، بەڕێوەبەری پۆلیسی باکوری بابل، بەڕێوەبەرانی هەواڵگری و دژەتیرۆر، ئاسایشی نیشتمانی، هەواڵگری و ئاسایشی بەرگری، موخابەراتی بابل، فەرماندەی حەشدی شەعبی لە بابل، ئامر لیوای شەشەمی پۆلیسی وزە و بەڕێوەبەری کۆمپانیای هێڵی بۆرییە نەوتییەکان.

هاوکات زەیدی فەرماندە سەربازی و ئەمنییەکانی سەرجەم پارێزگاکانی بە بەرپرسیاری یەکەم دانا لە هەر حاڵەتێکی بەقاچاخبردنی نەوت لە سنورەکانیاندا و جەختی کردەوە، کە حکومەت بە توندی روبەڕووی بەهەدەردانی سامانی گشتی دەبێتەوە و "لە زاخۆوە تا بەسرە" هیچ بستە خاکێک نامێنێت قاچاخچێتیی تێدا بکرێت.

لە 242ـەمین ساڵیادی بونیادنانی شاری سلێمانیدا، نزار ئامێدی، سەرۆک کۆماری عیراق، پەیامێکی پیرۆزبایی بڵاوکردووەتەوە و تێیداهاتووە، "شاری سلێمانی بە درێژایی مێژووی خۆی بووەتە هێمای خەبات و تێکۆشان و لانکەی ئازادیخوازان".

دەقی پەیامەکە

بە بۆنەی ٢٤٢هەمین ساڵیادی دامەزراندنی شاری خۆشەویستی سلێمانی، پایتەختی ڕۆشنبیری کوردستان، گەرمترین پیرۆزبایی و دروود ئاراستەی ڕۆڵەکانی ئەم شارە ئازیزە و گەلی خۆشەویستمان دەکەین.

شاری ئازیزی سلێمانی لە سەردەمی میرنشینی بابان و لە سەر دەستی ئیبراهیم پاشای بابان، لە ساڵی ١٧٨٤ دامەزرا. ئەم شارە لە سەرەتای دامەزراندنییەوە تاکوو ئەمڕۆ، لە کاروانی پێشکەوتن و پەرەسەندنی شارە گەورە و گرنگەکانی عێراق و ناوچەکەدا پێشەنگ بووە و بووەتە نموونەیەکی دیاری جوانی و شارستانیەتیی کوردستان و عێراق.

شاری سلێمانی بە درێژایی مێژووی خۆی بووەتە هێمای خەبات و تێکۆشان و لانکەی ئازادیخوازان، کەسایەتییە سیاسییەکان، خەباتکاران، ڕۆشنبیران، نووسەران، شاعیران و دڵسۆزانی نیشتمان؛ ئەوانەی بە درێژایی ژیانیان خزمەتی مرۆڤایەتییان کردووە و لە پێناو بەدەستهێنانی مافە ڕەواکانى گەلی کورد و بەهێزکردنی پەیوەندییەکانی دۆستایەتی و هاوڕێیەتی لەگەڵ گەلی عەرەب و سەرجەم پێکهاتەکانی تردا تێکۆشاون.

هیوادارین شاری سلێمانی و سەرجەم شارەکانی عێراق بەردەوام لە پێشکەوتن و گەشەسەندندا بن، بە جۆرێک کە خزمەت بە هاوڵاتیان بکەن و داخوازییە ڕەواکانى ئەوان بۆ گەیشتن بە ژیانێکی شایستە و بەختەوەر جێبەجێ بکەن.

هەمیشە شاری سلێمانی و سەرجەم شارەکانی نیشتمانمان لە ئاسایش، ئارامی و خۆشبژیوی بەردەوامدا بن.

نزار ئامێدی

سەرۆک کۆمار

٢٠٢٦/١١/١٤

سەرچاوەیەکی ئەمنی بە کوردسات نیوزی راگەیاند، لە نزیک گوندی درماناو شێخییە لەسنوری پردێ هێزە ئەمنییەکانی عیراق توانیویانە سێ چەکداری داعـ،ـش بکوژن و چەکدارێکی تریش بریندار بکەن.

ئەمڕۆ هەینی، دوای بڵاوبونەوەی دەنگۆی بینینی سێ چەکداری داعش لە پردێ و داخستنی رێگای نێوان هەولێر -  کەرکوک، بەپێی راگەیەندراوێکی رەسمی، هێزە ئەمنییەکانی عیراق بە فەرمانی فەرماندەی گشتیی هێزە چەکدارەکان و لە رێگەی ئۆپەراسیۆنێکی پێشوەختە و هەواڵگرییەوە، توانیویانە سێ چەکداری داعش بکوژن و چەکدارێکی تریش دەستگیربکەن.

سەرچاوەیەکی ئەمنیش بە کوردسات نیوزی راگەیاند، ئەو سێ چەکدارەی داعش، کە کوژراون، هەمان ئەو سێ چەکدارەبووە، کە لە بازگەکاندا بینراون بە چەکەوە.

بە گوێرەی راگەیەندراوێکی نوسینگەی فەرماندەی گشتی هێزە چەکدارەکانی عیراقیش، ئۆپراسیۆنەکە بە پشتبەست بە زانیارییەکانی بەڕێوەبەرایەتیی هەواڵگریی سەربازیی و لە رێگەی بۆردومانی فڕۆکەی جەنگییەوە لە سەعات (08:00)ـی ئێوارەی ئەمڕۆ هەینی ئەنجامدرا.

ئاماژە بەوەشکراوە، لە ئێستادا گەڕان و پشکنینی ورد لە ناوچەکەدا بەردەوامە و دواتر وردەکاریی زیاتر بڵاو دەکرێتەوە.

ناتانیاهۆ داوای پێکهێنانی حکومەتی یەکگرتویی نیشتمانی دەکات بۆ کۆتاییهێنان بە هەڕەشەی ئێران و دەڵێت پێویستە بە یەک جار و بۆ هەمیشە کۆتایی بەو مەترسییەی تاران بهێنن.

بنیامین ناتانیاهۆ، سەرۆک وەزیرانی ئیسرئیل لە پەیامێکی ڤیدیۆیدا رایگەیاند، پێویستە ئەو هەڕەشە راستەقینەی ئێران  لەسەر ئیسرائیل بەیەکجار و بۆ هەمیشە کۆتایی پێبهێنن.

ناتانیاهۆ ئاماژەی بەوەکردوە، جارێکتر تاران هەوڵ بۆ زیندوکردنەوەی بەرنامە ئەتۆمییەکەی دەدات و ئەگەر ئەم دەسەڵاتە دەستی بە چەکی ئەتۆمی بگات، لە بەکارهێنانیشی دژی ئیسرائیل درێغی ناکات.

لە پەیامەکەیدا، ناتانیاهۆ باس لەوەشدەکات دەبێت ئیسرائیل هاوشێوەی ئۆپەراسیۆنەکانی رابردوو، بەردەوام بێت لە رێگریکردن لە دەستڕاگەیشتنی ئێران بە چەکی ئەتۆمی.

ناوبارو دوپاتیدەکاتەوە، حکومەتێک بە زۆرینەیەکی لاوازەوە یان پشتبەستوو بەوانەی کە ئەو بە "پاڵپشتیکارانی تیرۆر" ناوی بردن، ناتوانێت بەسەر ئەم ئاڵنگارییەدا زاڵ ببێت.

لە کۆتایی پەیامەکەیدا، ناتانیاهۆ داوای لە گادی ئایزنکۆتی راسپردراو بۆ پێکهێنانی حکومەت کردوە،  بەبێ هیچ مەرجێکی پێشوەختە بچێتە ناو گفتوگۆکانەوە و ناکۆکییەکان وەلابنێت، تا پێکەوە حکومەت پێکبهێنن لەپێناو گەیشتن بە رێککەوتنێک کە ئاسایش و داهاتووی ئیسرائیل بپارێزێت.

دۆناڵد ترەمپ نیازی هێرشی نوێی نییە بۆ سەر ئێران و وڵاتانی ناوچەکەش داوا دەکەن کۆتایی بە هێرشەکانی سەر ئێران بهێندرێت.

ئاژانسی رۆیتەرز لە راپۆرێکیدا بڵاویکردوەتەوە، دۆناڵد ترەمپی سەرۆکی ئەمریکا لە کۆبوونەوەکانی ئەم دواییەیدا لەگەڵ راوێژکارە باڵاکانی ئاسایشی نەتەوەیی رایگەیاندووە  ئەگەر ئێران و حوسییەکانی یەمەن هیچ هەنگاوێکی نوێ دژی ئەمریکا نەنێن، ئەگەری هەیە خۆی لە ئەنجامدانی هێرشی سەربازیی نوێ بۆ سەر ئێران بەدوور بگرێت.

رۆیتەرز ئاماژەی بەوەکردوە، دۆناڵد ترەمپ نیازی دوبارە هێرشی بۆسەر ئێران نییە و سەرچاوەیەکی نزیک لە سەرۆکی ئەمریکا بە رۆیتەرزی راگەیاندوە، هێشتا بڕیاری کۆتایی سەبارەت بە چۆنیەتی کۆتاییهێنان بە جەنگەکە نەداوە.

لەلایەکی دیکەوە، هەر بەپێی زانیارییەکانی رۆیتەرز، سەرۆکی ئەمریکا پێشوازییەکی ئەرێنی لە داواکاریی هاوپەیمانە ناوچەییەکانی وڵاتەکەی کردووە بۆ ڕێگریکردن لە سەرهەڵدانی جەنگێکی بەرفراوانتر لە ناوچەکەدا

لەو چوارچێوەیەدا، شازادە محەمەد بن سەلمان، شازادەی جێنشینی سعوودیە و رەجەب تەیب ئەردۆغان، سەرۆک کۆماری تورکیا، لە پەیوەندییە تەلەفۆنییەکانی دوو هەفتەی رابردوودا داوایان لە ترەمپ کردووە هێرشە سەربازییەکان بۆ سەر ئێران دەست پێنەکاتەوە.

وەک ئەوەی لە راپۆرەکەدا هاتووە؛ لێپرسراوێکی باڵای ئەمریکا و سەرچاوەیەکی دیکە ئاشکرایان کردووە کە ترەمپ لەو پەیوەندییانەدا بۆچوونی هەردوو سەرکردەکەی سەبارەت بە بەردەوامبوونی جەنگ وەرگرتووە، بەڵام هیچ بەڵێنێکی رەسمی سەبارەت بە ئەنجامنەدانی هێرشی نوێ نەداوە.

ئێران رەتی دەکاتەوە گفتوگۆکان لەگەڵ ئاژانسی ئاژانسی نێودەوڵەتیی وزەی ئەتۆمی دەستپێبکاتەوەو مەرجی بۆ گفتوگۆکانیش راگرتنی هێرش و هەڕەشەکانە.

ئاژانسی ئەسۆشێتید پرێس بڵاویکردوەتەوە، ئێران بە بە ئاژانسی نێودەوڵەتیی ئەتۆمی راگەیاندوە تا مەترسی هێرشی سەربازی هەبێت رێگە بە پشکنینی دامەزراوەکان نادات و ئامادە نییە بۆ گفتوگۆکردن.

ئاژانسەکە ئەماژەی بەوەکردوە، ، تاران جەختی لەوە کردووەتەوە کە بەهۆی هەڕەشە بەردەوام و ئاشکراکانی دۆناڵد ترەمپ، سەبارەت بە ئەنجامدانی کردەوەی توندوتیژتر دژی ئێران، بەتایبەت بە ئامانجگرتنی بنکە ئەتۆمییەکانی،

ئەمە لە کاتێکدایە، ئاژانسی نێودەوڵەتیی وزەی ئەتۆم رایگەیاند نیگەرانن لە پیتاندنی یۆرانیۆم لە ژێر زەوی و  داوای لە ئێران كرد هەنگاوی كردەیی و قۆناغ بە قۆناغ بنێت بۆ ئەوەی پشكنین بۆ بنكە و دامەزراوە ئەتۆمییەكان ئەنجام بدەن.

لە دوای هێرشەکانی ئیسرائیل و ئەمریکا لە هاوینی 2025ـوە، پشکێنەرانی ئاژانسەکە نەیانتوانیوە دەستیان بە دامەزراوە زیانلێکەوتوەکان بگات و رەوشی کۆگاکانی یۆرانیۆمی پیتێنراوی ئێران بە نادیاری ماوەتەوە؛ لەگەڵ ئەوەشدا، ئێران پابەندبوونی خۆی دووپات کردووەتەوە کە هەر کاتێک مەرجە یاسایی و راستەقینەکان بڕەخسێن، دەستبەجێ دەست بە تەواوی ئەرکە چاودێرییەکانی دەکاتەوە.