بافڵ جەلال تاڵەبانی، سەرۆکی یەکێتیی نیشتمانیی کوردستان، لەگەڵ مەکتەبی راگەیاندن و هۆشیاریی یەکێتیی نیشتمانیی کوردستان کۆبووەوە.

لە کۆبوونەوەکەدا هەڤاڵان رەفعەت عەبدوڵا، جێگیری سەرۆکی یەکێتی و عیماد ئەحمەد، لێپرسراوی مەکتەبی راگەیاندن و هۆشیاری، لەتیف نێروەیی، لێپرسراوی بۆردی راگەیاندن، نەجمەدین فەقێ عەبدوڵا لێپرسراوی بۆردی هۆشیاری ئامادەبوون.

تەندروستیی سلێمانی رایگەیاند، بەپێی ئاماری بەڕێوەبەرایەتی گشتیی تەندروستی سلێمانی لە مانگی رابردوو و  لە رێكەوتی 1 بۆ 31ی تشرینی یەكەمی 2026 لە سەنتەری قوڕگ و لوت و گوێ 144 نەشتەرگەری جۆراوجۆر ئەنجام دراوە.

ئەمڕۆ یەکشەممە، تەندروستیی سلێمانی ئاماری چالاکییەکانی مانگی رابردووی سەنتەری قوڕگ و لوت و گوێ سلێمانی بڵاوکردەوە.

بە گوێرەی ئامارەکان لە مانگی رابردودا،  144 نەشتەرگەری لە سەنتەری قوڕگ و لووت و گوێ ئەنجامدراوە، کە 44  نەشتەرگەرییان گەورە بوون و 99 نەشتەرگەریتریان مامناوەند بوون.

هاوكات لە مانگی رابردوودا 150 نەخۆش لە سەنتەرەکە داخڵ كراون و چارەسەری پێویستیان بۆ كراوە.

وەزارەتی کارەبای هەرێم رایگەیاند، قەرزی پێش روناکی  زیاتر لە 500 هەزار هاوبەشە و لە 24 مانگدا بە ذشێوەی قیست پارەکانیان لێوەردەگیرێتەوە، کە 90 هەزاریان کەمتر لە پێنج هەزاردینار قەرزدارن.

وەزارەتی کارەبا ئاماژەی بەوەکردوە، ئەو هاوبەشانەی قەرزی پێش روناکیان لایە، لە گەڵ هاتنەوەی یەکەم پسوڵە، دەبێت قیستی یەکەمی ئەو پارەیەی بدەن کە لەلایانە.

وەزارەتی کارەبای هەرێم دەڵێت؛ ئەم بڕیارە لە پاش داشکاندنە ناوازەکەی پێشوو دێت، کە تێیدا ملیۆنێک هاوبەش لە 400 ملیار دینار لێخۆشبوون سوودمەند بوون

بەپێی رێکارە نوێیەکان، پسوولەی مانگانەی هاوبەشانی قیستکراو هەردوو پسوولەی روناکی و قیست لەخۆدەگرێت و دەبێت لە ماوەی 50 رۆژدا بدرێن، هەروەها بۆ کارئاسانی هاوبەشان سنورێکی مانگانە بۆ قیستەکان دیاریکراوە لە ( 20,000 تا 100,000 دینار) بۆ ماڵان و کشتوکاڵی.

لە ئەگەر تەواو نەبونی قەرزەکە لەو ماوەیەی وەزارەتی کارەبا دایناوە،  کارەبای هەرێم دەڵێت؛  ماوەی قیستەکە بۆ مانگەکانی دواتر درێژتر دەکرێتەوە

وەزارەتی کارەبای هەرێم ئەوەشی خستوەتەڕوو، زیاتر لە 90 هەزار هاوبەش تەنها پێنج هەزار دینار قەرزدارن و لەگەڵ یەکەم قیستدا قەرزیان لانامێنێت.

بانكی ناوەندیی عیراق تێچووی بەكارهێنانی كارتەكانی پارەدانی ئەلیكترۆنی لە دەرەوەی وڵاتەكەی كەمدەكاتەوە.

بانكی ناوەندیی عیراق لە راگەیەنراوێكدا ئاماژەی بەوەكردووە، سەرجەم بانكەكان و كۆمپانیاكانی خزمەتگوزاریی پارەدانی ئەلیكترۆنیی راسپاردووە بۆ مامەڵەكانی دەرەوەی وڵات لە رێگەی دەروازەكانی پارەدانی ئەلیكترۆنی و ئەی تی ئێمەكانەوە، نرخی ئاڵوگۆڕی دۆلار بە هەزار و 520 دینار بۆ هەر دۆلارێك هەژمار بكەن.

بانكی ناوەندی جەختیشی لەوە كردووەتەوە، دەبێت عمولەی ئەو مامەڵانە بەشێوەیەكی روون و شەفاف بۆ بەكارهێنەران دیاری بكرێت و كەمترین بڕی عمولە وەربگیرێت بۆ پاڵپشتیكردنی پرۆسەی پارەدانی ئەلیكترۆنی.

بانكی ناوەندیی عیراق جەختیشیكردووەتەوە، ئەو بڕیارە بە مەبەستی پەرەپێدانی سیستمی بانكیی و هاندانی هاووڵاتیانە بۆ بەكارهێنانی ئامرازە دیجیتاڵییەكان.

بریكاری وەزارەتی نەوتی عیراق ئاشكرایدەكات، رێكارەكانی ناردنی نەوتی سپی بۆ هاووڵاتیانی هەرێمی كوردستان كۆتایییانهاتووە و لە نزیكترین كاتدا رەوانە دەكرێت.

عیزەت سابیر، بریكاری وەزارەتی نەوتی عیراق بە پامنێری كوردسات نیوزی راگەیاند، وەزارەتەكەیان تەواوی ئامادەكارییەكانی تەواو كردووە بۆ ناردنی ئەو 50ملیۆن لیتر نەوتەی كە بڕیاری لێدرابوو بۆ هەرێمی كوردستان.

ئاماژەی بەوەشدا، لە ئێستادا تەنها چەند رێكارێكی كەم لە پرۆسەی گواستنەوەی نەوتەكەدا ماوەو جەختیكردەوە، بە ئەگەرێكی زۆرەوە لەم هەفتەیەدا ئەو بەشە نەوتەی عیراق دەگاتە هەرێمی كوردستان.

ئەمە لەكاتێكدایە، لە دوای هەوڵەكانی فراكسیۆنی یەكێتی لە ئەنجومەنی نوێنەرانی عیراق، عەلی زەیدی سەرۆك وەزیرانی عیراق رەزامەندیدا لەسەر ناردنی 50 ملیۆن لیتر نەوتی سپی بۆ ماڵان.

لای خۆیەوە هەرێم كەمال ئاغا سەرۆكی فراكسیۆنی یەكێتی رایگەیاند، وەزیری نەوتی عیراق بڕیاریدا لە داهاتوودا بڕە نەوتی دیكە رەوانەی هەرێم بكات.

سەرۆكی وەزیرانی عیراق وەڵامی ئەو گروپە چەكدارانە دەداتەوە كە دژی كۆكردنەوەی چەكن لە دەست دەوڵەتدا و دەڵێت؛ رێگە نادات بەردەوام بن لە دەستبەسەرداگرتنی خاكی هاووڵاتیانی عیراق و مافەكانیان

عەلی زەیدی، سەرۆك وەزیرانی عیراق، هۆشداریدا بەرانبەر بەو گروپانەی كە دژی ئەوەن چەك تەنها لە دەست دەوڵەتدا بێت و جەختیكردەوە، رێگە نادات بەردەوام بن لە دەستبەسەرداگرتنی خاكی هاووڵاتیانی عیراق و مافەكانیان، هەروەها ئەو لایەنانەی تۆمەتبار كرد بە دەستبەسەرداگرتنی مافەكانی گەلی عیراق لە ژێر ناوگەلێكدا كە خۆیان بە راستیەكان ناویان دەبەن.

لێدوانەكانی زەیدی وەك جەختكردنەوەیەكە لەسەر سووربوونی حكومەت لەسەر سەپاندنی دەسەڵاتی دەوڵەت بەسەر هەموو خاكی عیراقدا و كۆتاییهێنان بە هەر دیاردەیەكی بوونی چەك لە دەرەوەی دامەزراوە رەسمیەكان.

لێدوانەكانی سەرۆك وەزیرانی عیراق لە وەڵامی راگەیەنراوێكدا هات، كە لەلایەن كەتیبەكانی سەید الشوهداـی عیراقییەوە دەركرا، تێیدا ڕەتیانكردەوە هیچ ڕێككەوتن یان بەڵگەنامەیەكیان ئیمزاكردبێت كە پەیوەندی بە ڕادەستكردن یان كۆنترۆڵكردنی چەكەكانیانەوە هەبێت.

وەزیری بەرگریی ئیسرائیل هۆشدارییەکی نوێ ئاڕاستەی تاران دەکات و رایدەگەیەنێت، ئەرکەکانی وڵاتەکەی بەرانبەر بە ئێران هێشتا کۆتاییان نەهاتووە.

یسرائیل کاتز، وەزیری بەرگریی ئیسرائیل رایگەیاند، تاران هەوڵەکانی دەستپێکردووەتەوە بۆ بەدەستهێنانی چەکی ئەتۆمی، لە کاتێکدا ئێران بەردەوام سەرجەم ئەو تۆمەتانە رەتدەکاتەوە.

وەزیری بەرگریی ئیسرائیل ئاماژەی بەوەشکرد، ئێران سەرقاڵی هەوڵی "مەترسیداری دیکەیە" کە مەترسیی راستەقینە لەسەر ئاسایشی ئیسرائیل دروست دەکات، بەبێ ئەوەی ئاماژە بە جۆری ئەو هەوڵانە یان هەنگاوەکانی داهاتووی وڵاتەکەی بکات.

کاتز راشیگەیاند، ئەرکەکانی وڵاتەکەی بەرانبەر بە ئێران کۆتایی نەهاتووە و بە توندی رووبەڕووی هەر مەترسییەک دەبنەوە، کە هەڕەشە بێت بۆسەر ئیسرائیل.

سەرۆكی ئیسرائیل، سەرۆكی بەرەی ئۆپۆزسیۆنی وڵاتەكەی راسپارد لە ماوەی 28 رۆژدا كابینەی داهاتووی حكومەتی ئیسرائیل پێكبهێنێت، تا ئێستاش 67 ئەندامی پەرلەمانی وڵاتەكە پشتیوانی لێ دەكەن.

رۆژنامەی هائارێتزی ئیسرائیلی ئاشكرایكردووە، ئیسحاق هێرزۆگ سەرۆكی ئیسرائیل بە رەسمی گادی ئایزنكۆت، رابەری ئۆپۆزسیۆن و سەرۆكی پارتی یاشاری راسپاردووە بۆ پێكهێنانی حكومەتی نوێی وڵاتەكەی.

بەپێی زانیارییەكانی رۆژنامەكە، ئایزنكۆت لە كاتی راوێژكردندا پشتیوانیی 67 ئەندامی پەرلەمانی ئیسرائیل-كنێستی لە كۆی 120 ئەندام دەستەبەر كردووە، 46 پەرلەمانتارەكەی تر پشتگیرییان خۆیان بۆ بنیامین ناتانیاهۆ دووپاتكردووتەوە.

هێرزۆگ لەو بارەیەوە ئاماژەی بەوە كرد، ئایزنكۆت 28 رۆژی لەبەردەستدایە بۆ دانوستان لەگەڵ لایەنە سیاسییەكان و پێكهێنانی هاوپەیمانیی حكومەت، دەشكرێت ئەو وادەیە بۆ 14 رۆژی تریش درێژ بكرێتەوە.

هاوكات، ئەگەر ئایزنكۆت نەتوانێت لە ماوەی دیاریككراودا حكومەت پێكبهێنێت، دەكرێت دانوستانی سیاسیی زیاتر یان هەڵبژاردنێكی دیكە بەدوای خۆیدا بهێنێت، تا ئەو كاتەش بنیامین ناتانیاهۆ وەك سەرۆك وەزیرانی كاربەڕێكەر دەمێنێتەوە.

ئێران واشنتۆن بە شكستخواردوو دەزانێت لە جەنگ و هەڵبژاردندا و دەڵێت تاران نازانێت پەیامەكانی ئاڕاستەی كێ بكات لە ئەمریكا.

موحسین رەزایی سكرتێری ئەنجومەنی باڵای ئاسایشی نیشتمانیی ئێران لە پەیامێكدا لەسەر تۆڕی كۆمەڵایەتی ئێكس رایگەیاند، واشنتۆن هەم لە جەنگ و هەم لە هەڵبژاردنیشدا شكستی هێناوە و دەیەوێت بە هەواڵ و لێدوانی ناڕاست و چەواشەكارەكانە وا نیشانی جیهانی بدات كە سەركەوتوو بوون.
وتیشی، جەی دی ڤانس جێگری دۆناڵد ترەمپ سەرۆكی ئەمریكا شكستەكەی قبووڵ كردووە، ماركۆ روبیۆ وەزیری دەرەوەش، دەیەوێت خۆی لە رەوشەكە بدزێتەوە و بەرەو دەرچوون هەنگاو دەنێت، هەروەها پیت هێگسێت، وەزیری جەنگی وڵاتەكە، نزیكە لەوەی لە كارەكەی دەربكرێت، فەرماندەی سێنتكۆمیش پێگەی خۆی لەدەستداوە و كاری بووەتە پێشكەشكردنی پۆدكاست.
جەختیشیكردەوە، ئەمریكا لە رەوشێكی باشدا نییە و ئێران نازانێت ئەگەر پەیامێكی هەبێت ئاڕاستەی كێی بكات.
سكرتێری ئەنجومەنی باڵای ئاسایشی نیشتمانیی ئێران هۆشداریشیدا، ئەگەر ئەمریكا جەنگ دەست پێ بكاتەوە، رووبەڕووی وەڵامێكی وێرانكەر دەبێتەوە.