لە سلێمانی نرخی غازی ماڵان دابەزی و 75 دیناری تر لە نرخەکەی بووەوە.

عومەر عەبدوڵا، لێپرسراوی لیژنەی غاز لە قائیمقامییەتی سلێمانی بە کوردسات نیوزی راگەیاند، نرخی غازی LPG (ماڵان) دابەزی و لە 525 دینارەوە بۆ 450 دینار بۆ هەر لیترێک کەمکرایەوە.

وتیشی، نرخی غاز لە بەنزینخانەکان بۆ 490 دینار دابەزیوە و ئەو ئۆتۆمبێلانەی بە غاز کار دەکەن، هەر لیترێک بە 490 دینار وەردەگرن.

ئەمەش لە کاتێکدایە، لەچەند رۆژی رابردوودا نرخی غازی ماڵان لە 575 دینارەوە بۆ 525 دینار دابەزی.

بەپێی پێشبینییەکانی کەشناسیی هەرێم، شەپۆلێکی بارانبارین زۆربەی ناوچەکانی هەرێم دەگرێتەوە و پلەکانی گەرما بەڕێژەیەکی بەرچاو دادەبەزن.

بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ ئاسمان بە گشتی هەوری باراناوی دەبێت، هاوکات نمەباران و بارانی مامناوەند لە زۆربەی ناوچەکان دەبارێت،لە دوای نیوەرۆوە لە هەندێک شوێنی جیا جیا باران بەشێوەی لێزمە باران و هەورە بروسکە دەبێت.

کەشناسی هەرێم ئاماژەی بەوەشکردووە، پێشبینی بەرزبوونەوەی ئاستی ئاو دەکرێت بە تایبەت لە سنوری پارێزگای سلێمانی و سەنتەری پارێزگای هەولێر ودەوربەر 'بەحرکە و خەبات و هیران و شەقڵاوە و کۆیە' و ئیدارەی سەربەخۆی سۆران و بەشێک لە باشوری رۆژهەڵاتی پارێزگای دهۆک 'ئاکرێ ، بەردەرەش ، بجیل ، دینارتە' ، ئیدارەی سەربەخۆی گەرمیان .

هاوکات پلەکانی گەرما نزمتر دەبێتەوە بە چوار بۆ پێنج پلەی سیلیزی بە راوورد بە تۆمارەکانی دوێنێ.

کەشناسی هەرێم ئەوەشی خستەڕوو، سبەینێ ئاسمان هەوری تەواو و نمەباران و بارانی مامناوەند بە شێوەی پچر پچر بەردەوام دەبێت لە زۆربەی ناوچەکاندا تا کاتەکانی ئێوارە پاشان کەشی ناوچەکەمان جێگیر دەبێت و ئاسمان بۆ نیمچە هەور دەگۆرێت.

بەرزترین پلەکانی گەرمای پێشبینیکراو بە پلەی سیلیزی

هەولێر: 18 پلەی سیلیزی

پیرمام: 15 پلەی سیلیزی

سلێمانی: 16 پلەی سیلیزی

هەڵەبجە: 18 پلەی سیلیزی

چەمچەماڵ: 18 پلەی سیلیزی

دهۆک: 16 پلەی سیلیزی

زاخۆ: 16 پلەی سیلیزی

گەرمیان: 20 پلەی سیلیزی

حاجی ئۆمەران: 7 پلەی سیلیزی

پێشبینی هاتنی شەپۆلێكی بەهێزی بارانبارین و مەترسیی دروستبوونی لافاو لە هەرێمی كوردستان دەكرێت، لایەنە پەیوەندیدارەكانیش راسپێردران بۆ ئامادەكاری روبەڕوبونەوەی لافاو.

ژووری ئۆپەراسیۆن بۆ بەڕێوەبردنی قەیران و كارەساتی هەرێمی كوردستان بڵاویكردەوە، شەپۆلێكی بارانبارینی بەلێزمە و هەورە بروسكە لە رۆژی شەممەوە تا دووشەممە هەرێمی كوردستان دەگرێتەوە.

پێشبینی كردووە لەو ماوەیەدا لە هەولێر 25 ملیم، سلێمانی 35 ملیم، دهۆك 25 ملیم، كەركوك 15 ملیم و هەڵەبجەش 37 ملیم باران ببارێت.

لەلایەكی ترەوە، دەستەی كەشناسی عیراق بڵاویكردووەتەوە، بەهۆی ئەو شەپۆلەوە ئەگەری هەیە بەیانی هەتا ئێوارە باران ببارێت و تەنانەت ئەگەری بارینی تەرزەش هەیە.

لای خۆیەوە رێبوار تەها جێگری یەكەمی پارێزگاری كەركوك لیژنەی كارەسات و روداوە سروشتییەكانی راسپارد، لەپێناو خزمەتكردنی هاوڵاتییانی كەركوك، پەیوەندیی بە شوێنی كارەكانیانەوە بكەن، فەرمانیشی كردووە تیمەكان بگەنە ئەو شوێنانەی ئاو تیایاندا پەنگی خواردووەتەوە.

وەزارەتی ناوخۆی عیراق رایگەیاند، لە نێوخانویەکدا لە بەغداد هێزەکانیان دەستیانگرتوە بەسەر 97 ئامێری قومارکردندا و ژمارەیەک کەسیش دەستگرکراون کە لەو خانوەدا کاریانکردوە.

ئەمڕۆ شەممە، وەزارەتی ناوخۆی عیراق لە راگەیەندراوێكدا رایگەیاند، دوای بەدەستگەیشتنی زانیاری لەسەر ماڵێک لە رەسافەی بەغداد، کە تێیدا قوماردەکرێت و لەلایەن کەسانی نەناسراوە بەڕێوەدەبردرێت، هێزەکانیان چونتە شوێنەکە و دەستیان بەسەر ژمارەیەکی زۆری ئامێری قوماردا گرتوە.

لە راگەیەندراوەکەدا هاتوە؛  دوای وەرگرتنی رەزامەندی دادوەری بۆ هەڵکوتانە سەر ئەو ماڵەی کە ئامێرەکانی تێدابووە، لە ئەنجامدا دەست بەسەر (97) ئامێری قومارکردندا گیرا و چەند کەسێکیش دەستگیرکران کە لە هۆڵەکەدا کاردەکەن".

وەزارەتی ناوخۆی عیراق ئاماژەی بەوەشکردوە، لەکاتی لێپرسینەوەدا تۆمەتبارەکان دانیان بەوەدا ناوە کە خانوەکەیان بۆ قومارکردنی نایاسایی بەکارهێناوە و پەراوی لێکۆلێنەوەیان بۆکراوەتەوە و رەوانەی دەسەڵاتی دادوەری کراون بەمەبەستی سزادانیان.

رۆژی سێشەممە دانیشتنی تایبەت بۆ تاوتوێکردنی پڕۆژەیاسای بودجەی 2027 بەڕێوەدەچێت، بەمەبەستی پەسەندکردنی و رەوانەکردنی بۆ پەرلەمان.

حەیدەر عەبودی، وتەبێژی حکومەتی عیراق رایگەیاند، عەلی زەیدی، سەرۆک وەزیرانی عیراق رێنماییداوە رۆژی سێشەممەی داهاتوو دانیشتنی ئەنجومەنی وەزیران تەرخان بکرێت بۆ تاوتوێکردنی پڕۆژەیاسای بودجەی گشتیی 2027، بە مەبەستی پەسەندکردنی و رەوانەکردنی بۆ پەرلەمان.

وتیشی، بودجەی 2027 رەچاوی دارایی بۆ ئەنجامە ئامانجدارەکان پەیڕەو دەکات، هەروەها ئامرازی دارایی لەخۆدەگرێت کە پاڵپشتی لە گەشەپێدانی ئابوری و بەرزکردنەوەی توانای بەرەنگاربوونەوەی مەترسی و ئاڵەنگارییەکان دەکەن.

وتەبێژی حکومەتی عیراق ئەوەشی خستەڕوو، لە سەرەکیترین کارە لەپێشینە ستراتیژییەکانی پڕۆژەیاسای بودجەدا، هەردوو پڕۆژەی "رێگەی گەشەپێدان" و "سندوقی سیادیی نەوەکان" دیارترین ئامانجەکان دەبن.

وەزیری نەوتی عیراق رایدەگەیەنێت، تێكڕای بەرهەمی رۆژانەی نەوت گەیشتووەتە زیاتر لە پێنج ملیۆن بەرمیل.

باسم محەمەد, وەزیری نەوتی عیراق رایگەیاند، لەسەر بنەمای پشكی عیراق لە رێكخراوی ئۆپێك، ئێستا رۆژانە مافی هەناردەكردنی چوار ملیۆن و 330 هەزار بەرمیل نەوتیان هەیە و ئەوەش جیاوازییەكی زۆری لەنێوان ئاستی بەرهەمهاتوو و هەناردەكراودا دروستكردووە.

وتیشی، پابەندن بە پشكی دیاریكراوی هەناردەی نەوت لە رێكخراوی ئۆپێك و لە هەمانكاتیشدا لەگەڵ ئەو رێكخراوە لە گفتوگۆدان بۆ زیادكردنی پشكی عیراق لە هەناردەكردنی نەوتدا.

وەزیری نەوتی عیراق راشیگەیاند، لە ئێستادا تێكڕای بەرهەمهێنانی رۆژانەی كێڵگە نەوتییەكانی عیراق، گەیشتووەتە زیاتر لە پێنج ملیۆن بەرمیل نەوت.

فەرماندەیی ناوەندیی ئەمریکا رایدەگەیەنێت، لە رێگەی تێمێکەوە رێگریی لە ئێران دەکەن رێگا وشکانییەکان و دەریای قەزوین بەکاربهێنێت بۆ گواستنەوەی چەکە پێشکەوتوو و قەدەغەکراوەکان.

فەرماندەیی ناوەندیی ئەمریکا 'سێنتکۆم' لە راگەیەنراوێکدا رایگەیاند، لە رێگای تیمێکیانەوە بە ناوی "هێزی تایبەتی دەروازەی ئاسنین" رێگریی لە ئێران دەکەن، کە رێگا وشکانییەکان و دەریای قەزوین بەکاربهێنێت بۆ گواستنەوەی چەکە پێشکەوتوو و قەدەغەکراوەکان.

ئاماژەی بەوەشکردووە، دروستکردنی ئەو تیمە درێژەپێدەری گەمارۆ دەریاییەکانیانی سەر ئێرانە، کە بەهۆیەوە زیاتر لە 25 ملیار دۆلار زیانی دارایی لە هەناردەکردنی نەوتی خاوی ئەو وڵاتە دراوە، ئەو رێکارانەش تواناکانی تاران بۆ پاڵپشتیکردنی گروپە چەکدارەکان و نوێکردنەوەی کەلوپەلی سەربازیی لاوازتر دەکات.

پێشتریش ئاژانسی رۆیتەرز بڵاویکردبووەوە، ئێران تۆڕێکی نهێنی لە کۆمپانیا سەربازییەکان لەسەر ئاستی جیهان دروستکردووە و لەو رێگەیەوە لە سەرەتای ساڵی 2025ـەوە، لایکەم بە بەهای دوو ملیار دۆلار کەرەستەی سەربازیی هاوردەکردووە.

رشیگەیاندبوو، ئەو هەنگاوەی تاران بۆ تێپەڕاندنی گەمارۆی دەریایی ئەمریکا و سزاکانی رۆژئاوا بووە.

بەرگریی شارستانیی غەززە رایگەیاند، بەهۆی وەرزی سەرما و بارانبارینی زۆرەوە، زیاتر لە 2000 باڵەخانە مەترسی روخانیان لەسەرە و کەرتی غەززە روبەڕوی کارەساتێکی مرۆیی بوەتەوە.

ئەمڕۆ شەممە، لە راگەیەندراوێکدا، بەرگریی شارستانیی غەززە رایگەیاند، ئەگەر رێگە بە چونەژورەوەی کەرەستەی پێویست نەدرێت، بەهۆی بارانبارینی زۆرەوە زیاتر لە 2000 باڵەخانە مەترسی روخانیان لەسەرە.

شارستانیی غەززە، ئاماژەی بەوەکردوە ،بەهۆی بارانبارینەوە ژمارەیەک خانو و باڵەخانە روخاون و مەترسیی لەسەر ژیانی هاووڵاتیانی مەدەنی دروستکردوە.

لە بەشێکی تری راگەیەندراوەکەدا هاتووە؛ کەرتی غەززە  روبەڕوی کارەساتێکی مرۆیی بووەتەوە، چونکە دەیان کەمپ و ناوەندی پەناگە بەهۆی لافاوەوە بەکەڵکی ژیان نەماون.

شارستانیی غەززە داوا لە دەوڵەتانی گەرەنتیکاری ئاگربەست و لیژنەی نیشتمانی بۆ بەڕێوەبردنی کەرتی غەززە دەکات،  دەستوەردان بکەن بۆ رزگارکردنی دانیشتوانی غەززە.

لە وەڵامی هێرش و گرژییە سەربازییەکانی ناوچەکەدا، وتەبێژی سوپای پاسدارانی ئێران جەختدەکاتەوە، پڕۆسەی بەرهەمهێنانی موشەک و درۆن بەردەوامە.

حسێن موحیبی، وتەبێژی سوپای پاسداران، ئەمڕۆ لە کۆنفرانسێکی رۆژنامەنووسیدا رایگەیاند: "موشەکەکانمان توانیویانە بە تەواوی بەربەستی سیستمە بەرگرییە ئاسمانییەکانی ئەو شوێنانە تێپەرێنن کە کردوومانەتە ئامانج."

ئاماژەی بەوەشکرد، بەرهەمهێنانی موشەک و درۆن لە ئێران لە گەشەکردندایە و دەبێت جیهان دان بەو هێز و توانایەدا بنێت.

وتەبێژی سوپای پاسداران جەختی لەوەش کردەوە، ئێران لە بەرانبەر سەرجەم هێرش و دەستدرێژییەکاندا خۆڕاگر بووە، ئاشکرایکرد، لە دوو هەفتەی رابردوودا توانیویانە کۆنتڕۆڵی حەوت فڕۆکەی بێفڕۆکەوان بکەن.

حسێن موحیبی هۆشدارییەکی توندیدا و رایگەیاند: "لە ئەگەری هەر دەستدرێژییەکی نوێدا، زەوی لەژێر پێی دوژمناندا دەلەرزێنین." هەروەها ئەوەشی خستەڕوو، ئەوەی ئەمریکا چاوی لە شێوازی درۆنە ئێرانییەکان کردووە، بەڵگەیە لەسەر پێشکەوتن و باڵادەستیی ناوخۆیی پیشەسازییە بەرگرییەکانیان.

لە کۆتایی لێدوانەکەیدا، راشیگەیاند، موشەکە ئێرانییەکان بێتوانایی سیستمەکانی پاتریۆت و تادی ئەمریکیان پیشانداوە، هەروەها هێزی ئاسمانیی سوپای پاسداران توانیویەتی سیستمێکی بەرگری و بەربەستکاریی کاریگەر دژی هێرشکردنە سەر ژێرخانی وڵاتەکە دابمەزرێنێت.