عیراق
راوێژكاری دارایی سودانی رایگەیاند، لە هەمواری یاسای بودجە گۆڕانكاری لە داهات و خەرجی هەرێمی كوردستاندا دەكرێت و ئەو پرسە ئاڕاستەی ئەنجومەنی نوێنەران كراوە.
مەزهەر محەمەد ساڵح-راوێژكاری دارایی سەرۆك وەزیرانی عیراق رایگەیاند، لە ئێستادا عیراق كار بە یاسای بودجەی گشتی فیدراڵی سێ ساڵە دەكات كە لە ساڵی ٢٠٢٣ پەسەند كراوە.
دەشڵێت، بودجەی ٢٠٢٥ بووەتە یاسایەك لە چوارچێوەی بودجەی سێ ساڵەدا، ئەو یاسایەش بە رەسمی بڵاوكراوەتەوە لە رۆژنامەی "وەقائیعدا".
راوێژكاری دارایی سودانی وتیشی، گۆڕانكای لە بڕگەكانی داهات و خەرجی هەرێمی كوردستان پێشكەشی ئەنجومەنی نوێنەران كراوە بۆ ئەوەی گۆڕانكاری تێدا بكرێت بەشێوەیەك بێت كە لەگەڵ هەمواری یاسای بودجەدا بگونجێت.
قاسم ئەعرەجی راوێژكاری ئاسایشی نەتەوەیی عیراق رایگەیاند، وڵاتەكەی دۆخی ئێستای سوریا رەتدەكاتەوە، جەختیشی لەسەر پێویستی رێزگرتن لە رێككەوتنی ئاگربەست لە لوبنان كردەوە.
قاسم ئەعرەجی لەگەڵ باڵیۆزی ئەمەریكا گفتوگۆی لەسەر دوایین پێشهاتەكانی دۆخی ناوچەكە كرد و رایگەیاند، ئەو هێرشە تیرۆریستیانەی لە سوریا رودەدەن، ئەو رێكخراوانە ئەنجامیدەدەن كە لەلایەن ئەمریكاوە وەك گروپی تیرۆریستی پۆڵێن كراون.
وتیشی، پێویستە رێز لە رێككەوتنی ئاگربەست لە لوبنان بگیرێت، تێكدانی رێككەوتنەكە كاردانەوەی جددی لەسەر لوبنان و ناوچەكە دەبێت.
لای خۆیەوە ئەلینا رۆمانۆسكی باڵیۆزی ئەمەریكا لە عیراق دووپاتیكردەوە، واشنتۆن پاڵپشتی گرژی و ئەو ئاژاوەیە ناكات، كە لە سوریا لەلایەن گروپە تیرۆریستییەكانەوە سەریهەڵداوە و ئەو كردەوە تیرۆریستییانە هەڕەشە لە ئاسایش و سەقامگیری ناوچەكە و جیهان دەكەن.
سەرۆك وەزیرانی عیراق رایدەگەیەنێت، بێدەنگ نابن لە بەرانبەر پێشهاتەكانی سوریا و عیراق، کە پێشتر بەدەست تیرۆرەوە زیانی زۆری بەركەوتووە دەشڵێت، رێگا نادەن رەوشی لەو شێوەیە لە سوریا دووبارە بێـەوە.
نوسینگەی محەمەد شیاع سودانی سەرۆك وەزیرانی عیراق رایگەیاند، سودانی پەیوەندیەكی تەلەفۆنی لەگەڵ رەجەب تەیب ئەردۆغان سەرۆكی توركیا ئەنجامداوە و تاوتوێی دۆخی سوریایان كردووە.
سودانی لە پەیوەندیە تەلەفۆنیەكە رایگەیاندووە، عیراق بێدەنگ نابێت لە بەرانبەر ئەو دۆخەی لە سوریادا روودەدات و عیراق بەهۆی هێرشی تیرۆرستیەوە زیانی زۆری بەركەوتووە و رێگەنادەن هەمان شت بەسەر سوریادا دووبارە ببێتەوە و هەوڵی خۆیان بۆ پاراستنی ئاسایشی سوریا دەدەن.
وتوشیەتی، ئیسرائیل بۆردومانی سوپای سوریا دەكات، ئەمەش رێگەخۆشكەرە كە گروپە چەكدارەكان پێشڕەوەی بكەن و ئاسایشی سوریا كاریگەری لەسەر عیراق و ناوچەكە دەبێت.
لە پەیوەندیە تەلەفۆنیەكەدا ئەردۆغان رایگەیاندووە، گرنگی بە یەكێتی و یەكپارچەیی خاكی سووریا دەدات و پێویستە سوریا بەشداری لە پرۆسەیەكی سیاسی راستەقینەدا بكات بۆ رێگریكردن لەوەی دۆخەكە خراپتر بێت.
سبەینێ ئەنجومەنی نوێنەران بە ئامادەبوونی سودانی كۆدەبێتەوە و خوێندنەوەی دووەم بۆ هەمواری یاسای بودجە دەكات.
فەرمانگەی راگەیاندنی ئەنجومەنی نوێنەران، بەرنامەی كاری دانیشتنەكەی سبەی چوارشەممە بڵاوكردەوە كە تەوەری یەكەمی بریتییە لە میوانداریكردنی محەمەد شیاع سودانی سەرۆكی ئەنجومەنی وەزیران.
بەپێی كارنامەی ئەنجومەنی نوێنەران، جیا لە بانگهێشتكردنی سودانی، سبەی خوێندنەوە بۆچەند پڕۆژە یاسایەك دەكرێت، لەوانەش خوێندنەوەی دووەم بۆ هەمواری یاسی بودجەی سێ ساڵت.
هاوكات ئەنجومەنەكە دەنگ لەسەر پڕۆژە یاسای دەزگای هەواڵگری نیشتیمانی دەدات و هەروەها هەمواری یەكەمی پێشنیارە یاسای رەگەزنامەش دەنگی لەسەردەدرێت.
لە كۆبونەوەكەی ئەنجومەنی نوێنەران خوێندنەوە و گفتوگۆ لەسەر پڕۆژەیاسای فڕۆكەوانی مەدەنی دەكرێت و وابڕیارە كۆبوونەوەكە سەعات یەكی پاش نیوەڕۆ بەڕێوەدەچێت.
ئەمڕۆ ئەنجومەنی نوێنەران بۆ دەنگدان بە سێ پڕۆژەیاساكەی تایبەت بە كورد و سوننە و شیعە كۆدەبێتەوە و هەر سێ پڕۆژەیاساكە بە یەك پاكێج دەخاتە دەنگدانەوە.
كاروان یاروەیس بڕیاردەری فراكسیۆنی یەكێتی لە ئەنجومەنی نوێنەران بە كوردسات نیوز راگەیاند، لە كۆبوونەوەی رۆژی دووشەممەدا ئەنجومەنی نوێنەران دەنگی بە ناوەڕۆكی پڕۆژەیاسای گێڕانەوەی موڵك و لێبوردنی گشتی و هەمواری یاسای باری كەسێتی داوە، بەڵام بەهۆی گرژییەكان و بێ متمانەی نێوان كورد و سوننە و شیعەوە، دەنگدان بەكۆی پڕۆژەیاساكان خراوەتە دانیشتنی ئەمڕۆوە.
وتیشی، سوننەكان رێگرن لە تێپەڕاندنی پڕۆژەیاسای گێڕانەوەی موڵك بۆ خاوەنەكانیان لە ناوچەكانی سنوری مادەی ١٤٠ كە بەپێی ئەم پڕۆژەیاسایە نزیكەی ٤٠٠ هەزار دۆنم زەوی لەسنوری كەركوك بۆ خاوەنە رەسەنەكانی دەگەڕێتەوە.
بە فەرمانی محەمەد شیاع سودانی، گەشتی ئاسمانی بێبەرامبەری بەیروت بۆ ئاوارەكانی لوبنان لە عیراق دابینكرا.
نوسینگەی راگەیاندنی سەرۆك وەزیرانی عیراق بڵاویكردەوە، محەمەد شیاع سودانی فەرمانی دەركردووە، بۆ دابینكردنی گەشتی ئاسمانی بێبەرامبەری بەیروت بۆ ئەو ئاوارانەی لوبنان لە عیراق، كە خوازیاری گەڕانەوەن بۆ زێدی خۆیان.
ئەوەش لەكاتێكدایە، بەهۆی راگەیاندنی ئاگربەستەوە لە لوبنان، گەڕانەوەی ئاوارەكانی لوبنان لە وڵاتانی دراوسێی و لەنێویاندا عیراق دەستیپێكردووە و سوپای لوبنانیش داوا لە ئاوارەكانی وڵاتەكەی دەكات، پەلە نەكەن لە گەڕانەوە بۆ لوبنان.
بەگوێرەی دوایین ئاماری نەتەوە یەكگرتووەكانیش، نزیكەی ٤٠ هەزار ئاوارەی لوبنانی لە عیراق تۆماركراون و لەو ژمارەیەش لەچەند رۆژی رابردوودا، بە هەزاران ئاوارە لەڕێی دەروازەی قائیمەوە گەڕاونەتەوە بۆ زێدی خۆیان.
دانیشتنی ئەنجومەنی نوێنەرانی عیراق دەستیپێکرد و تێیدا خوێندنەوە بۆ پڕۆژەیاسای گەڕانەوەی خاوەندارێتی زەوی بۆ خاوەنەكانیان لە ناوچە جێناكۆكەكان دەكرێت.
دانیشتنەکە بە بەشداری ١٧١ ئەندام دەستیپێكرد و خوێندنەوە بۆ پڕۆژەیاسای گەڕانەوەی خاوەندارێتی زەوی بۆ خاوەنەكانیان لە ناوچە جێناكۆكەكان دەكرێت، هەروەها ئەنجومەنەکە دوو ماددەی لە پرۆژەیاساکە پەسەند كرد.
نوێدەکرێتەوە....
كۆبوونەوەی ئەنجومەنی نوێنەرانی عیراق بۆ دەنگدان لەسەر سێ پڕۆژە یاسا بەهۆی تەواوبوونەبوونی رێژەی یاسایی ئەندامانەوە دواخرا.
پەیامنێری كوردسات نیوز رایگەیاند، نیوەڕۆی ئەمڕۆ زەنگی چونە ژورەوەی پەر لەمانتاران لێدراوە بۆ دەستپێكردنی كۆبوونەوەی پەرلەمان بۆ دەنگدان لەسەر ئەو سێ پڕۆژە یاسایەی كە مشتومڕی لەنێوان كورد و شیعە و سوننە دروستكردووە، لەنێویشیاندا هەڵوەشاندنەوەی بڕیارەكانی بەعس و گەڕاندنەوەی خاوەندارێتی زەوی لە ناوچە جێناكۆكەكان بۆ خاوەنەكانیان، بەڵام بەهۆی تەواونەبوونی رێژەی یاسایی پەرلەمانتارانەوە دواخرا.
لایەنە سونییەكان رێگرن لەوەی پرۆژە یاساكەی كورد بڕگەی دیكەی بۆ زیادبكرێت و دەڵێن پرۆژە یاساكە چۆن لە حكومەتەوە رەوانەی پەرلەمان كراوە دەبێت بە شێوەیە جێبەجێ بكرێت كە هەڵوەشاندنەوەی هەشت بڕیاری ئەنجومەنی سەركردایەتی پێشووی بەعس دەگرێتەوە.
بەپێی ئەو پرۆژە یاسایەی گەیشتۆتە پەرلەمان، نزیكەی ٤٠٠ هەزار دۆنم زەوی لە سنوری پارێزگای كەركوك بۆ خاوەنە رەسەنەكانی دەگەڕێنێتەوە، بەڵام هەوڵی لایەنە كوردییەكان بۆ ئەوەیە لە رێگەی زیادكردنی ماددەی دیكەوە زەوی و زارە داگیركراوەكان لە تەواوی ناوچە كێشەلەسەرەكان بگەڕێندرێنەوە بۆ خاوەنەكانیان، كە بە نزیكەی یەك ملیۆن و ٢٢٨ هەزار دۆنم دەخەمڵێندرێت.
د. لەتیف رەشید سەرۆك كۆماری عیراق لە دوو کۆبوونەوەدا لەگەڵ هەردوو باڵیۆزی سوریا و توركیا كۆبووەوە و جەخت لە گرنگی پاراستنی سەقامگیریی سوریا و ئاسایشی ناوچەكە دەكاتەوە .
بەپێی راگەیەندراوێكی فەرمانگەی راگەیاندنی سەرۆكایەتی عیراق، سەرۆك كۆمار لە كۆشكی بەغداد پێشوازی لە "سەتام جەدعان" باڵیۆزی سوریا لە عیراق كردوە و لە كۆبونەوەیەكدا دوایین پێشهاتە ئەمنییەكانی سوریا تاوتوێكراوە.
سەرۆك كۆمار پشتگیری عیراقی بۆ بەدیهێنانی سەقامگیری لە سوریا و كاركردن بۆ رێگریكردن لە فراوانبونی بازنەی ململانێكان دوپاتكردەوە و ئاماژەی بۆ ئەوەكرد كە پێشهاتەكانی سوریا و كاریگەرییەكانی لەسەر ناوچەكە جێی گرنگی پێدانە و هەڵوێستی جێگیری عیراقیشی بۆ پتەوكردنی ئاشتی و ئاسایشی نێودەوڵەتی دوپاتكردۆتەوە
لایخۆشیەوە باڵیۆزی سوریا لە عیراق، سەرۆك كۆماری لە دوایین گۆرانكارییەكانی وڵاتەكەی ئاگاداركردەوە و رۆڵی عیراقیشی لە پشتگیریكردنی بەردەوامی دیمەشق بەرز نرخاندووە .
سەرۆك كۆماری عیراق هەروەها لەگەڵ باڵیۆزی توركیا لە بەغداد كۆبووەوە و دوایین پێشهاتەكانی ناوچەكە و سوریایان تاوتوێكرد.
سەرۆك كۆمار جەختیكردەوە لەسەر پێویستی كاركردن بۆ پاراستنی ئارامی و ئاسایش، باڵیۆزی توركیاش هەڵوێستی وڵاتەكەی لەبارەی پێشهاتەكانی ئێستای ناوچەكە رونكردەوە.
ئەمرۆ ئەنجومەنی نوێنەران بۆ دەنگدان لەسەر ئەو سێ پڕۆژە یاسایە كۆدەبێتەوە كە مشتومڕی لەنێوان كورد و شیعە و سوننە دروستكردووە، لەنێویشیاندا هەڵوەشاندنەوەی بڕیارەكانی بەعس و گەڕاندنەوەی خاوەندارێتی زەوی لە ناوچە جێناكۆكەكان بۆ خاوەنەكانیان.
د.نەرمین مەعروف ئەندامی ئەنجومەنی نوێنەران بە كوردسات نیوزی راگەیاند، پێشتر چەندینجار رێككەوتن كراوە بۆ تێپەڕاندنی پڕۆژەیاساكان، بەڵام دواتر جێبەجێنەكراون.
لایەنە سونییەكان رێگرن لەوەی پرۆژە یاساكەی كورد بڕگەی دیكەی بۆ زیادبكرێت و دەڵێن پرۆژە یاساكە چۆن لە حكومەتەوە رەوانەی پەرلەمان كراوە دەبێت بە شێوەیە جێبەجێ بكرێت كە بریتییە لە هەشت بڕیاری ئەنجومەنی سەركردایەتی پێشووی بەعس.
هۆكاری سزادانی ٣٢ بانكی عیراق لەلایەن ئەمریكاوە دەخرێتە ئەستۆی فەرمانبەرێكی پێشوو
لیژنەی دەسپاكی ئەنجومەنی نوێنەرانی ئەمریكا هۆكاری سەرەكی سزادانی ٣٢ بانكی عیراق لەلایەن ئەمریكاوە دەخاتە ئەستۆی فەرمانبەرێكی پێشووی بانكی ناوەندی عیراق.
ڤیان دەخیل ئەندامی لیژنەی دەستپاكی لە ئەنجومەنی نوێنەرانی عیراق رایگەیاند، لە ئەنجامی بەدواداچوون و لێكۆڵینەوەكانیان بۆیان دەركەوتووە فەرمانبەرێكی پێشووی بانكی ناوەندی عیراق هەموو ئەو نامە ئەلیكترۆنییانە شاردووەتەوە كە لەلایەن بانكی فیدراڵی و جەی پی مۆرگان و ستی بانكی ئەمریكاوە تایبەت بە كاری بانكیی بۆ عیراق نێردراون.
وتیشی، وەڵام نەدانەوەی ئەو نامانە و جێبەجێ نەكردنی رێنماییەكان بووەتە هۆی ئەوەی لە كۆی ٧٢ بانك لە عیراق، ٣٢یان لەلایەن ئەمریكاوە سزا بدرێن، بۆیە زۆربەی بانكە سزادراوەكان تائێستا هۆكاری سزادانیان لەلایەن ئەمریكاوە نازانن.
وەزیری دەرەوەی عیراق رەوشی سوریا و شەڕ و ئاڵۆزییەكانی حەلەب لەگەڵ وەزیرانی دەرەوەی سوریا و توركیا تاوتوێ دەكات.
بەپێی راگەیەندراوێكی وەزارەتی دەرەوەی عیراق، فوئاد حسێن وەزیری دەرەوەی عیراق لە پەیوەندییەكی تەلەفونید لەگەڵ بەسام سەباغ وەزیری دەرەوەی سوریا گفتوگۆیان لەبارەی دواین پێشهات و رووداوەكانی حەلەب و شەڕ و پێكدادانەكانی نێوان سوپای سوریا و گرووپە چەكدارەكان كردووە و جەختیكردووەتەوە حكومەتی عیراق پشتیوانی سوریا دەكات لە بەرەنگاربوونەوەی گرووپە تیرۆریستییەكان، چونكە ناسەقامگیری ئاسایش و ئارامی سوریا دەبێتە هەڕەشە و مەترسی لەسەر ناوچەكە بەگشتی.
ئاماژە بەوەشكراوە، وەزیری دەرەوەی عیراق لە پەیوەندییەكی تری تەلەفونیدا لەگەڵ هاكان فیدان وەزیری دەرەوەی توركیا جەختیانكردەوە شەڕ و ئاڵۆزییەكان و نائارامییەكانی سوریا كاریگەری لەسەر ئاسایش و ئارامی ناوچەكە دەبێت و بە پێویستیشیان زانیووە هەماهەنگییەكان زیاتر بكرێن لە پێناو هەڵسەنگانی رەوشی ئێستای سوریا و رێگریكردن لەو ناسەقامگیریە بۆئەوەی نەگوازرێتەوە بۆ ناوچەكە بە گشتی و وڵاتانی دراوسێی سوریا بەتایبەتی
سەرۆك وەزیرانی عیراق و شای ئوردن پێشهاتەكانی ناوچەكەو رووداوەكانی سوریایان تاوتوێكردو جەختیان لە سەقامگیری وڵاتەكە كردەوە.
لە پەیوەندییەكی تەلەفۆنیدا، محەمەد شیاع سودانی و شا عەبدوڵای دووەم گفتوگۆیان لەبارەی دوایین پێشهاتەكانی دۆخی ناوچەكە كرد بەتایبەت روداوەكانی سوریا لەگەڵ بەردەوامی هێرشەكانی ئیسرائیل بۆسەر غەززە.
سودانی جەختی لە پێویستی هەماهەنگی هەوڵەكان كردەوە و پاڵپشتی عیراقی بۆ هەنگاوی هاوبەشی عەرەبی و نێودەوڵەتی بۆ ڕووبەڕووبوونەوەی ئاڵنگارییەكان كردەوە، جەختی لەوەشكردەوە ئاسایش و سەقامگیری سوریا بۆ تەواوی ناوچەكە گرنگەو ناتوانرێت چاوپۆشی لێ بكرێت، نەك تەنیا بۆ عیراق، بەڵكو بۆ هەموو وڵاتان.
هەروەها ئاماژەی بە پێویستی كاركردن بۆ وەستاندنی دەستدرێژی و هێرشەكانی ئسیرائیل كردەوە لە شەڕی دژ بە گەلی فەلەستین لەتایبەت لە كەرتی غەززە.
د. لەتیف رەشید سەرۆك كۆماری عیراق لەگەڵ قاسم ئەعرەجی راوێژكاری ئاسایشی نەتەوەیی عیراق كۆبوەوە و رەوشی ئەمنی لە گۆرەپانی ناوخۆ و هەرێمیی تاوتوێكرا.
بەپێی راگەیەندراوێكی فەرمانگەی راگەیاندنی سەرۆكایەتی كۆمار، لە كۆبونەوەكەدا رەوشی ئەمنی لە گۆرەپانی ناوخۆ و هەرێمیی تاوتوێكراوە و د. لەتیف رەشید سەرۆك كۆماری عیراق پشتگیری تەواوی بۆ هەوڵی دەزگا ئەمنی و هەواڵگرییەكان دوپاتكردوەتەوە و رایگەیاندوە، دوایین پێشهاتەكانی سوریا و كاریگەرییەكانی لەسەر ناوچەكە بەگشتی، جێی گرنگی پێدانێكی زۆرە و متمانەشی بە ئاستی ئامادەكارییەكان دوپاتكردەوە.
هەروەها رایگەیاندوە، گرنگە كۆمەڵی نێودەوڵەتی بەرپرسیارێتی هەڵبگرێت لە پشتگیریكردنی سەقامگیری و رێگریكردن لە جەنگ و كوشتار و وێرانكاری زیاتر لە ناوچەكەدا.
لایخۆشیەوە قاسم ئەعرەجی رایگەیاندووە، راوێژكاری ئاسایشی نەتەوەیی ئامادەیی تەواوی تێدایە بۆ ئەنجامدانی ئەركەكانی بۆ پاراستنی ئاسایشی عیراق و گیانی هاووڵاتیەكانی.
سودانی و ئەسەد پەیوەندییەكی تەلەفۆنیان لەبارەی شەڕ و پێكدادانەكانی باكووری رۆژئاوای سوریا ئەنجامدا و سەرۆک وەزیرانی دەڵێت، ئاسایشی عیراق و سوریا گرێدراوی یەكترن.
سەرۆكایەتی كۆماری سوریا لە راگەیەندراوێكدا بڵاویكردەوە، بەشار ئەسەد سەرۆك كۆماری سوریا پەیوەندییەكی تەلەفۆنی لەگەڵ محەمەد شیاع سودانی سەرۆك وەزیرانی عیراق ئەنجامدا و تێیدا، دوایین پێشهاتەكانی سوریا و هەماهەنگییەكانی نێوان هەردوو وڵات لە بەرەنگاربوونەوەی تیرۆردا تاوتوێكران.
بەگوێرەی راگەیەندراوەكە، سودانی ئاماژەی بەوەداوە، ئاسایشی عیراق و سوریا گرێدراوی یەكترن و ئامادەیی عیراقیشی دەربڕیووە، بۆ پشتیوانیكردنی سوریا لە بەرەنگاربوونەوەی رێكخراوە تیرۆریستییەكان و تەواوی ئاستەنگییەكان.
لە بارەی پەیوەندیەكەشەوە نوسینگەی سودانیش رایگەیاندووە، هەردوولا گفتوگۆیان لەسەر پەیوەندییە دووقۆڵییەكان و هاوكاری هاوبەشی نێوان هەردوو وڵات كردووە.
جەختیلەوەشكردووەتەوە، عیراق پابەندە بە سەقامگیری و سەروەری و یەكپارچەیی خاكی سوریا.
ئەوەش لەكاتێكدایە، بەهۆی گرژییەكانی باكووری رۆژئاوای سوریاوە، بە فەرمانی سودانی تەواوی سنووری نێوان عیراق و سوریا داخراوە و فەرماندەیی ئۆپراسیۆنە هاوبەشەكانی عیراقیش دەڵێت، هێزە ئەمنییەكانیان توانای پاراستنی وڵاتیان هەیە و ئامادەن بۆ بەرەنگاربوونەوەی هەر جۆرە ئاستەنگییەك.
گەڕانەوەی ئاوارەكانی لوبنان لە عیراقەوە بۆ شوێنی خۆیان بەردەوامە و تائێستاش زیاتر لە سێ هەزار ئاوارە گەڕاونەتەوە وڵاتی خۆیان.
عەلی عەباس، وتەبێژی وەزارەتی كۆچ و كۆچبەرانی عیراق لە لێدوانێكی رۆژنامەوانیدا ئاماژەی بەوەدا، دوای راگەیاندنی ئاگربەست لە لوبنان، لە رۆژی چوارشەممەی رابردوەوە تائێستا زیاتر لە سێ هەزار ئاوارەی لوبنانی لەرێگەی دەروازەی سنووری قائیمەوە عیراقیان بەجێهێشتووە و گەڕاونەتەوە شوێنی خۆیان.
ئەوەشی خستەڕوو، لەسەر فەرمانی سەرۆك وەزیرانی عیراق، لە دوو رۆژی داهاتوودا پلانێكی حكومی رادەگەیەنرێت بۆ گەڕانەوەی ئەو ئاوارە لوبنانیانەوەی خوازیاری گەڕانەوەن.
دەشڵێت، هەر خێزانێكی ئاوارەی لوبنانی خوازیاری گەڕانەوە بێت، لە رێگەی پڕكردنەوەی فۆڕمێكی تایبەتەوە، ناوی تۆماردەكرێت، بەدەر لەوەش چەندین خێزانی ئاوارەی دیكە خۆیان گەڕاونەتەوە زێدی خۆیان.