عیراق
تەقینەوەیەکی بەهێز لەناو کۆگایەکی چەک و تەقەمەنیی حەشدی شەعبی لە بەغداد رویدا و بەو هۆیەوە چەند چەکدارێکی ئەو گروپە برینداربوون و فەرماندەی هێزە چەکدارەکانی عیراقیش بڕیاریدا بەپەلە لێکۆڵینەوە لە روداوەکە بکرێت.
دەستەی حەشدی شەعبی رایگەیاند، تەقینەوەیەک لە کۆگایەکی چەک و تەقەمەنیی بەسەرچوودا لەناو یەکێک لە بارەگاکانیان لە ناوچەی رۆژهەڵاتی بەغداد رویدا، بەڵام هیچ کەسێک بەهۆی روداوەکەوە گیانی لەدەستنەدا.
هاوکات، دەستبەجێ دوای رووداوەکە، عەلی زەیدی سەرۆک وەزیران و فەرماندەی گشتیی هێزە چەکدارەکانی عیراق بڕیاریدا بەپەلە لیژنەیەکی لێکۆڵینەوە پێکبهێنرێت، بۆ ئاشکراکردنی هۆکاری دروستبوونی تەقینەوەکە و جەختیشی لە گرتنەبەری تەواوی رێوشوێنە پێویستەکان کردەوە بۆ رێگریکردن لە دووبارەبوونەوەی ئەم جۆرە رووداوانە.
ئەوەش لە کاتێکدایە، روودانی تەقینەوە و ئاگرکەوتنەوە لە بنکە و کۆگاکانی چەک لە عیراق بووەتە دیاردەیەکی باو و زۆرجار هۆکارەکانیان بەنادیاری دەمێننەوە، پێشتریش بەهۆی گرژییەکانی ناوچەکەوە چەندین بارەگای حەشدی شەعبی لەلایەن ئەمریکاوە کرابوونە ئامانج.
لە یەكەم فەرمانیدا دوای وەرگرتنی پۆستەكەی، وەزیری بەرگری عیراق فەرمانیكرد بە هەڵوەشاندنەوەی سەرجەم سزاكانی بەرزەفتی سەر سەربازان و ئەفسەران و موچەخۆران و پلەدارەكانی وەزارەتی بەرگریی عیراق.
نایف شەمەری وەزیری بەرگریی عیراق لە یەكەم فەرمانی وزاریدا بەمەبەستی بەرزنرخاندنی قوربانی و هەوڵەكانی سەربازان و فەرمانبەرانی سەر بە وەزارەتەكەی، فەرمانیكردووە بە هەڵوەشاندنەوەی سەرجەم سزا بەرزەفتەكان لە وەزارەتەكەی.
بەپێی فەرمانە وزارییەكە، هەڵوەشاندنەوەی سزا بەرزەفتەكان سەرباز، ئەفسەر، پلەدار و موچەخۆرانی سەر بە وەزارەتی بەرگریی عیراق دەگرێتەوە.
رۆژی 15ی ئەم مانگە لە ئەنجومەنی نوێنەرانی عیراق متمانەدرا بە نایف شەمەری بۆ وەرگرتنی پۆستی وەزیری بەرگریی عیراق.
روانگەی ئیكۆ عیراق ئاشکرایکرد، عیراق لە نۆ مانگی سەرەتای ئەمساڵدا زیاتر لە 834 ملیۆن بەرمیل نەوتی بەرهەمهێناوە و لەئێستاشدا ئاستی بەرهەمی رۆژانەی نەوتی نزیكەی چوار ملیۆن و 400 هەزار بەرمیلە.
روانگەی ئیكۆ عیراق بۆ كاروباری ئابووری رایگەیاند، لە نۆ مانگی سەرەتای ئەمساڵدا عیراق 834.7 ملیۆن بەرمیل نەوتی بەرهەمهێناوە و لە مانگی ئەیلولیشدا ئاستی بەرهەمی رۆژانەی گەیشتووەتە بەرزترینی ئەمساڵ و 4.399 ملیۆن بەرمیل بووە.
ئەوەشی خستووەتەڕوو، بەهۆی شەڕ و پێكدادانەكانی ناوچەكەوە لە مانگەكانی سەرەتای ئەمساڵدا ئاستی بەرهەمهێنانی نەوت لە عیراق لە مانگی ئایاردا گەیشتووەتە 1.406 ملیۆن بەرمیل، بەڵام دواتر بە چەند قۆناغێك ئاستی بەرهەمهێنان بەرزبووەتەوە.
ئەوەش لەكاتێكدایە، حكومەتی عیراق هەڵمەتێكی فراوانی دەستپێكردووە بۆ بەرەوپێشبردنی ژێرخان و كەرتی وزەی وڵاتەكە و كاریش دەكات بۆ دۆزینەوەی رێڕەوی تری هەناردەی نەوت جگە لە گەروی هورمز، كە ئێستا بەهۆی جەنگی ئێران و ئەمریكاوە جوڵەی كەشتیوانی تێیدا سەخت بووە.
وەزارەتی دەرەوەی عیراق، ئەمڕۆ، دەستپێکردنی خولی 52هەمینی ئەنجومەنی وەزیرانی دەرەوەی، رێکخراوی هاوکاریی ئیسلامی لە بەغداد راگەیاند.
وتەبێژی کارەکانی خولی 52هەمینی ئەنجومەنەکە، لە راگەیەنراوێکدا بڵاویکردەوە، "کارەکانی خولی پەنجا و دووەمی ئەنجومەنی وەزیرانی دەرەوەی رێکخراوی هاوکاریی ئیسلامی، دوای تەواوبوونی گەیشتنی سەرجەم وەفدە بەشداربووەکان بۆ بەغداد، دەستی پێکرد."
جێگەی ئاماژەیە، وەزارەتی دەرەوە رۆژی هەینی رایگەیاندبوو، ئامادەکارییەکان بۆ میوانداریکردنی خولی وزاری لەلایەن پایتەخت بەغدادەوە تەواو بوون، کە بڕیارە لە 17 و 18ـی ئەم مانگەدا بە بەشداریی 55 وڵاتی ئەندام و چاودێر بەڕێوەبچێت.
گەشەپێدانی چوار كێڵگەی نەوت لە سنوری پارێزگای كەركوك، بەرهەمهێنانی نەوت لەرۆژێكدا دەگەیەنێتە 450 هەزار بەرمیل لەگەڵ دابینكردنی 500 ملیۆن پێسێجا غاز.
باسم محەمەد خزەیر وەزیری نەوتی عیراق رایگەیاند، پلان و ئامانجەكانیان بۆ ساڵانی داهاتوو زیادكردنی ئاستی بەرهەمهێنانی نەوت و گەشەپێدانی كەرتی غاز و كۆتایی هێنانە بە دۆسێی سوتانی غازی هاوەڵ بە مەبەستی پڕكردنەوەی پێداویستی ناوخۆ و گەیشتن بە خودبژێوی لە كەرتی وزەدا.
وتیشی، گەشە پێدانی چوار كێڵگەی نەوت لە سنوری پارێزگای كەركوك لە رێگەوی كۆمپانیای بریتش پتۆلیۆمەوە ناسراو بە (بی پی)ی بەریتانی، ئاستی بەرمهێنانی نەوت لە سنوری پارێزگاكە رۆژانە دەگەیەنێتە 450 هەزار بەرمیل لەگەڵ دابینكردنی 500 ملیۆن پێسێجا غاز.
وەزیری نەوتی عیراق ئاماژەی بەوەشكرد، بە ئەنجامگەیشتنی ئەو پرۆژەیە، كاریگەری زۆری دەبێت لەسەر گەشەسەندنی ئابوری پارێزگای كەركوك و بەهێزكردنی پێگەی عیراق لە كەرتی پیشەسازیی نەوت لە نێوان وڵاتاندا.
وەزارەتی دەرەوەی ئەمریكا رایگەیاند، ئامانجی ئەمەریكا دەستەبەركردنی عیراقێكی سەربەخۆیەو خزمەت بە خەڵكی عیراق و ناوچەكە بكات و وەك هاوبەشێكی بەهێز بۆ ئەمەریكاش بێت.
وتەبێژی وەزارەتی دەرەوەی ئەمریكا لە لێدوانێكدا بە دەنگی ئەمریكای راگەیاندووە، واشنتۆن پشتگیری لە دیدگای عەلی زەیدی سەرۆك وەزیرانی عیراق دەكات بۆ دەستەبەركردنی داهاتوویەكی باشتر بۆ هەموو عیراقییەكان.
دەشڵێت، ئەمریكا دەیەوێت عیراق خاوەنی سەربەخۆی خۆی بێت و لە رووی ئابورییەوە بەرەوپێش بچێت و بتوانێت رێگری لە هێرشكردنەسەر وڵاتانی دەوروبەر بكات لە ناوخۆی عیراقەوە و حكومەت خزمەتی خەڵكی عیراق و ناوچەكە بكات و وەك هاوبەشێكی بەهێز بۆ ئەمەریكاش بێت.
رشیگەیاند، ئەمەریكا چەسپاندنی سەقامگیری لە ناوچەكە دەدات بۆ پاراستنی سەروەری وڵاتان و گەیشتنیان بە ئارامی لە رێگەی ئابووریی هاوبەشەوە.
بەرێوەبەرایەتی كاروباری مینی عیراق رایگەیاند، لە ساڵی 2003ـەوە نزیكەی 60%ی ئەو زەویانەی مینرێژكراون پاككراونەتەوە و تەنیا دوو هەزار و 600 كیلۆمەتر چوارگۆشە ماوە پاكبكرێتەوە.
ئیحسان جەعفەر بەڕێوەبەری بەڕێوەبەرایەتی كاروباری مینی عیراق رایگەیاند، بەهۆی جەنگەوە نزیكەی حەوت هەزار كیلۆمەتر چوارگۆشە زەوی عیراق مینرێژكرابوو و لە ساڵی 2003ەوە دەستیان كرد بە پاككردنەوەی خاكی عیراق لە مین.
دەشڵێت، توانراوە 60٪ی ئەو ناوچانەی مینڕێژكراون پاكبكرێنەوە و لە ئێستادا تەنیا دوو هەزار و 600 كیلۆمەتر چوارگۆشە ماوە پاكبكرێتەوە.
راشیگەیاند، نەبوونی بودجە گەورەترین بەربەستە لە بەردەم پاككردنەوەی زەویە مینرێژكراوەكان و كێشەی مین لە عیراق دەگەڕێتەوە بۆ شەستەكانی سەدەی رابردوو بەهۆی چالاكی سەربازی لە ناوچە سنورییەكان و لە كاتی جەنگی ئێران – عیراق و كەنداو، هەروەها گروپە تیرۆرستیەكانیش چەند پارێزگایەكیان مینرێژكرد.
دوای ئەوەی ئەمڕۆ هەینی شوێنکەوتووانی کەسایەتیی ئایینیی شیعە 'فەرقەد قەزوینی'، 16ـی 10یان وەک یەکەم رۆژی مانگی رەمەزان دیاریکرد، بابەتەکە لە تەواوی عیراق بڵاوبوویەوە و مشتومڕێکی زۆری لە تۆڕە کۆمەڵایەتییەکان ناوەتەوە.
گروپێکی شیعە کە سەر بە 'فەرقەد حسێن قەزوینی'ـین، بۆ دیاریکردنی مانگەکان پشت بە رۆژمێرێکی تایبەت بە ناوی 'رۆژمێری محەممەدی' دەبەستن، کە رۆژمێرێکی ئەستێرەیی - خۆرییە و بەپێی جووڵەی خۆر و بورجەکان دەستنیشان دەکرێت، نەک لەسەر بنەمای بینینی مانگ کە تەواوی جیهانی ئیسلامی پەیڕەوی دەکەن.
ئەم گروپە لە چەند رۆژی رابردوودا لەسەر تۆڕە کۆمەڵایەتییەکان چەند راگەیەنراوێکیان بڵاوکردەوە و لە کۆتا راگەیەنراویشدا، ئەمڕۆ هەینی، 16ـی 10ـی 2026یان کرد بە یەکەم رۆژی مانگی رەمەزانی پیرۆز.
شارەزایانیش دەڵێن، ئەم بڕیارە بە تەواویی پێچەوانەی رۆژمێری رەسمیی کۆچیی مانگییە؛ بۆ نموونە ناوەندە ئایینییە رەسمییەکانی وەک 'دارولئیفتای میسری' ئێستایان بە سەرەتای مانگی جومادەلئولا دیاریکردووە، بەڵام گروپەکەی 'فەرقەد قەزوینی' بە سەرەتای رەمەزانی دادەنێن.
ئەوەش لە کاتێکدایە، ئەمە یەکەمجار نییە ئەم بابەتە دەوروژێنرێت، بەڵکو لە مانگی 10ـی ساڵی رابردووشدا هەمان گروپ بە هەمان شێواز و بە رۆژمێرەکەی خۆیان، مانگەکەیان بە مانگی رەمەزان ناساندبوو.
وەزارەتی ناوخۆی عیراق رایگەیاند، لەسەر راسپاردەی عەلی زەیدی، سەرۆک وەزیرانی عیراق تێچوی دەرکردنی پاسپۆرتی عیراقی بە 91 هەزار دینار دەمێنێتەوە و زیاد ناکرێت.
ئەمڕۆ پێنجشەممە، وەزارەتی ناوخۆی عێراق لە راگەیەندراوێکدا رایگەیاند، تێچوی دەرهێنانی پاسپۆرت زیاد ناکرێت و وەک خۆی دەمێنێتەوە.
ئاماژەی بەوەشکردوە، ئەم بڕیارە لە چوارچێوەی جێبەجێکردنی رێنماییەکانی عەلی زەیدی، سەرۆک وەزیرانی عیراقدا دراوە.
ئەمەش لە کاتێکدایە، دەنگۆی ئەوە بڵاوکراوەیەوە، کە رسوماتی دەرهێنانی پاسپۆرت گۆڕانکاری بەسەردا دێت و لە 91 هەزار دینارەوە دەکرێت بە 101 هەزار دینار.
ئەنجومەنی نوێنەرانی عیراق لە كۆی 16 پۆستی بەتاڵ، دەنگی لەسەر 14 وەزارەت و پۆستی باڵای حكومەتەكەی عەلی زەیدی دا.
ئەمشەو ئەنجومەنی نوێنەرانی عیراق بە ئامادەبونی 261 ئەندام بۆ دەنگدان لەسەر كاندیدی پۆستە بەتاڵەكانی حكومەت كۆبوەوە و تێیدا دەنگی لەسەر موحسین مەندەلاوی، لەیس خەز عەلی و محەمەد تەمیمی وەك جێگرانی عەلی زەیدی دا، دەنگدان لەسەر كاندیدەكەی پارتیش بۆ جێگری سەرۆك وەزیران دواخرا.
هەر لە لە كۆبونەوەكەدا ئەنجومەنی نوێنەران یاسر مالكی وەك وەزیری ناوخۆ، نایف شەممەری وەك وەزیری بەرگری، قوتەیبە غازی وەك وەزیری پلاندانان، حەیدەر حسێنی وەك وەزیری خوێندنی باڵا، یاسین محەمەد وەك وەزیری رۆشنبیری، رێباز حەملان وەك وەزیری ئاوەدانكردنەوە و نیشتەجێكردن، محەمەد موسەوی وەك وەزیری كار و كاروباری كۆمەڵایەتی، سەفا كینانی وەك وەزیری وەرزش و لاوانی عیراق دەنگیان لەسەر درا.
جگە لەو وەزارەتانە هەرسێ وەزارەتە نوێیەكەی حكومەتەی عەلی زەیدی دەنگیان لەسەر درا كە بریتین لە محەمەد سەمعان وەزیری دەوڵەت، محەمەد ئەلدەراجی وەزیری ئابوری دیجیتاڵی و حوكمڕانی، عەلی ئەلدەخیلی وەزیری گەشتوگوزاری عیراق.
كاندیدی پۆستی وەزیری كۆچ و كۆچبەرانیش دەنگی لەسەر نەدراو و دواخرا بۆ كۆبونەوەیەكی تری ئەنجومەنی نوێنەران .
وەزارەتی گواستنەوەی عیراق، ئەمڕۆ پنجشەممە، لە راگەیەندراوێکدا دەستپێکردنەوە و کردنەوەی رێڕەوە ئاسمانییەکانی نێوان عیراق و کوەیتی راگەیاند.
لە راگەیەندراوەکەی وەزارەتدا هاتووە: ئەم هەنگاوە لەپێناو دڵنیابوونەوە لە رەوتی ئاسایی هاتوچۆی ئاسمانی و فراوانکردنەوەی هاوکارییە هەرێمییەکان دێت، کە بە رێنمایی راستەوخۆی وەزیری گواستنەوە، وهب الحەسنی، و بەدواداچوونی بەردەوامی کۆمپانیای گشتیی بەڕێوەبردنی فڕۆکەخانەکان و ناویگەیشنی ئاسمانی جێبەجێ کراوە؛ دوای ئەوەی رێڕەوە ئاسمانییەکانی نێوان هەردوو وڵات لە ماوەی رابردوودا بەهۆی پێشهاتە ئەمنییەکان و گرژییە هەرێمییەکانەوە رابوسترابوون.
وەزارەتەکە ئاماژەی بەوە داوە: هەوڵە فەننییەکان سەرکەوتوو بوون لە گەیشتن بە رێککەوتنی کارپێکردن، بە سەرپەرشتیی رێکخراوی نێودەوڵەتیی فڕۆکەوانیی مەدەنی (ICAO) و بە هاوکاریی دەوڵەتی کوەیت، قەتەر، سعودیە، بەحرەین و ئیمارات، و ئەم تێڕوانینانە لە ئەمڕۆوە، 15ی تشرینی یەکەمی 2026، سەعات 11:00 بە کاتی جیهانی (UTC) كەوتنە بواری جێبەجێکردنەوە.
بەپێی رێکارە نوێیەکان، جموجۆڵی ئاسمانی لەسەر بنەمای رێڕەو و بەرزیی دیاریکراو بەڕێوە دەچێت بۆ دڵنیابوون لە هەماهەنگیی کارپێکردن و پاراستنی سەلامەتیی نێوان فڕۆکەکان. هەروەها جەخت کراوەتەوە کە ئەم پرۆسەیە بە شێوازێکی قۆناغ بەقۆناغ جێبەجێ دەکرێت و بەردەوام چاودێری و هەڵسەنگاندنی بۆ دەکرێت.
وەزارەتی گواستنەوەی عیراق پلانێكی گشتگیر بۆ دەستپێكردنەوەی گەشتە بازرگانییە دەریاییەكان لە رێگەی كەنداوی عەرەبی لە بەندەری جەبەل عەلییەوە بەرەو بەسرە رادەگەیەنێت، پاش ئەوەی دەیان ساڵ بوو ئەو هێڵە پەكی كەوتبوو.
ئەحمەد جاسم ئەسەدی، بەڕێوەبەری كۆمپانیای گشتیی گواستنەوەی دەریایی سەر بە وەزارەتی گواستنەوەی عیراق لە لێدوانێكدا بۆ میدیا رەسمییەكان ئاشكرای كرد ئامادەكارییەكان تەواو كراون بۆ دەستپێكردنی یەكەمین گەشتی كەشتییە بازرگانییە نیشتمانییەكان لە بەندەری جەبەل عەلیی ئیماراتەوە بەرەو بەندەرەكانی پارێزگای بەسرە.
روونیشیكردەوە: ئەم هەنگاوە بووژانەوەی رێڕەوێكی ستراتیژیی كەشتیوانییە دەیان ساڵ بوو لە خزمەتگوزاری دەرچووبوو.
ئاماژەی بەوە كرد: كاراكردنەوەی ئەم هێڵە دەبێتە هۆی كەمكردنەوەی تێچووی گواستنەوەی كاڵاكان و فراوانكردنی ئاڵوگۆڕی بازرگانیی نێوان عیراق و بەندەرەكانی ناوچەكە، لە هەمان كاتدا دەسەڵاتی دەریایی عیراق سەرقاڵی دانانی دەروازەیەكی ئەلیكترۆنیی نوێیە بۆ تۆماركردن و پێدانی ناسنامەی رەسمی بە دەریاوانان بەپێی ستانداردە نێودەوڵەتییەكان.
لەگەڵ دابەزاندنی بەهای دیناری عیراقی بەرانبەر دۆلار و كاریگەریی لەسەر بەرزبوونەوەی نرخی خۆراك و شتومەك، عیراق دەیەوێت مریشك لە چینەوە هاوردە بكات.
لە راپۆرتێكی ئاژانسی هەواڵیی رۆیتەرزدا هاتووە، كۆمپانیای وێنتۆپی چینی لەم دواییانەدا چەند داواكارییەكی بۆ كڕینی مریشك لەلایەن بازرگانانی عیراقەوە پێگەیشتووە.
لێپرسراوانی كۆمپانیاكە ئەوەیان خستووەتە روو: بەرهەمەكانیان خاوەن كوالێتییەكی بەرزە و لە ریزبەندی ركابەرەكانی جیهاندان بۆ هەناردەی مریشك، هاوكات نرخیان گونجاوە و ئەوەش دەتوانێت مریشك بە نرخێكی هەرزانتر بۆ بازاڕەكانی عیراق دابین بكات.
ئەگەر گرێبەستی كۆمپانیاكانی عیراق سەر بگرێت، ئەوا لەپاڵ روسیا و ئوردون و گانا، عیراقیش دەبێتە یەكێك لە هاوردەكارانی مریشكی چین.
كۆمپانیای وێنتۆپی چینی ساڵانە نزیكەی 60 ملیۆن مریشك دەخاتە بازاڕەكانی جیهانەوە و بەرهەمەكانی بۆ 20 وڵاتی جیهان دەنێرێت.
ئەنجومەنی نوێنەرانی عیراق بۆ تەواوکردنی کابینەی حکومەت کۆدەبێتەوە و لە دانیشتنی ئەمڕۆدا دەنگ لەسەر ئەو نۆ وەزارەتە دەدرێت کە تا ئێستا پڕ نەکراونەتەوە.
بڕیارە ئەمڕۆ پێنجشەممە، ئەنجومەنی نوێنەرانی عیراق کۆبوونەوەی ژمارە 26ـی ئەنجام بدات، بە مەبەستی دەنگدان لەسەر تەواوکردنی کابینەی وەزاریی حکومەتی فیدراڵی.
بەپێی کارنامەی دانیشتنی ئەنجوومەنی نوێنەرانی عیراق، لە دانیشتنی ئەمڕۆدا دەنگ لەسەر ئەو نۆ وەزارەتە دەدرێت کە تا ئێستا پڕ نەکراونەتەوە و لە ماوەی رابردوودا بە وەکالەت بەڕێوەدەبران، کە وەزارەتەکان بریتین لە، پلاندانان، ئاوەدانکردنەوە و نیشتەجێکردن، کار، ناوخۆ، وەرزش و لاوان، خوێندنی باڵا، بەرگری، رۆشنبیری و گەشتوگوزار، کۆچ و کۆچبەران.
راوێژكاری ئەمنی سەرۆك وەزیرانی عیراق رایگەیاند، عیراق خۆی بۆ سەرجەم ئاڵنگاریە ئەمنی سیاسی و ئابوریەكان ئامادەكردووە.
قاسم ئەعرجی راوێژكاری ئەمنی سەرۆك وەزیرانی عیراق، دیدگای حكومەتی عیراقی بۆ مامەڵەكردن و رووبەڕووبوونەی ئاڵنگاریە سیاسی، ئەمنی و ئابوورییەكان و باشتركردنی رەوشی خزمەتگوزاری و گوزەرانی هاووڵاتیان لە سایەی ئاڵۆزییە بەردەوامەكانی ناوچەكەدا خستەڕوو.
قاسم ئەعرەجی رایگەیاند، لەسایەی ئالنگاریە ئەمنییەكان و فشارە ئابورییەكاندا حكومەتی عیراق پێداگرە سورە لەسەر پاراستنی سەروەریی وڵات و پابەندبوون بە سەروەری و پاراستنی ئابووری عیراق لە لێكەوتەی قەیرانەكان،لەگەڵ هەمەجۆركردنی سەرچاوەی داهات، هاندانی وەبەرهێنان و ڕەخساندنی دەرفەتی كار.
وتیشی: حكومەت سەرنجی خستوەتە سەر باشتركردنی رەوشی خزمەتگوزاری و وەڵامدانەوەی داواكاری و پێویستییەكانی هاووڵاتیانی عیراق لە رێگەی یەكخستنی هەوڵەكانەوە.
حکومەتی عیراق پلانێکی نوێی بۆ کارکردن لەسەر دابەزاندنی نرخی دۆلار لە بازاڕدا ئاشکرا کرد، هاوکات بڕیاری بەخۆڕاییکردنی گومرگی بۆ بەشێک لە کەلوپەلە بنەڕەتییەکان راگەیاند.
حەیدەر عەبوودی، وتەبێژی حکومەتی عیراق، لە لێدوانێکیدا بۆ ئاژانسی دەنگوباسی عیراقی رایگەیاند: حکومەت و بانکی ناوەندیی عیراق بەپێی پلانێکی داڕێژراو و تۆکمە کار دەکەن بۆ ئەوەی لە ماوەیەکی نزیکدا نرخی دۆلار لە بازاڕ بگەیەننە 1550 دینار بۆ هەر 100دۆلارێک.
عەبوودی ئاماژەی بەوەش کرد: ئەم هەنگاوە پشت بە یەدەگ و داراییەکی بەهێز و رەوانکراوی ناو بنکەی ناوەندی دەبەستێت، کە دەرفەت دەدات تەمویلی بازرگانیی دەرەکی بە ئاسانی بەڕێوەبچێت و پێداویستییەکانی هاوردەکردن دابین بکرێت.
سەبارەت بە حەواڵەکانی پێشتر و پێش پەسەندکردنی نرخی ئاڵوگۆڕی ئێستا، وتەبێژی حکومەت دووپاتی کردەوە: تەرخانکراوی دارایی تەواو دابین کراوە بۆ جێبەجێکردنیان بەپێی نرخی پێشوو و ئۆپەراسیۆنە پەیوەندیدارەکان.
لە لایەکی ترەوە، ئاماژەی بەوە دا: ئەنجوومەنی وەزیران لە دانیشتنی بیست و سێیەمی خۆیدا بڕیاری داوە لە رۆژی 7ی تشرینی یەکەمی 2026ەوە، تەواوی کەرەستە خۆراکییەکان و دەرمانە هاوردەکراوەکان لە رەسمی گومرگی ببەخشێت.