جیهان
پسپۆڕان و پزیشکان ئامۆژگاریمان دەکەن بە پەیڕەوکردنی نۆ خوی سادەی رۆژانە، کە یارمەتیدەرن بۆ بەهێزکردنی یادەوەری و هاندانی زیرەکی. ئەوان جەخت لەوە دەکەنەوە کە گۆڕانکاریی بچووک لە شێوازی ژیاندا دەتوانێت پارێزگاری لە نەرمی مێشک بکات و توانای هزری بۆ ماوەی چەندین ساڵ بەهێز بکات.
بەپێی راپۆرتێکی ماڵپەڕی "ڕیڵ سمپڵ"، خووە سادەکانی وەک خەوی باش، وەرزشکردن، تێڕامان (تەئەمول)، پەیوەندی کۆمەڵایەتی، و گوێگرتن لە میوزیک، دەتوانن گۆڕانکارییەکی گەورە لە ژیانی رۆژانەدا دروست بکەن بەهۆی کاریگەرییە ئەرێنییەکانیان لەسەر نەرمی مێشک و بەهێزکردنی بیرکردنەوە و توانا هزرییەکان.
لێرەدا ئەو نۆ خوە سادەیە دەخەینەڕوو:
1. خەوی رێک و پێک:
دکتۆر شارۆن برنگمان، پسپۆڕ لە بواری پزیشکیی پیریدا، جەخت لەوە دەکاتەوە کە خەوی رێک و پێک زۆر پێویستە و دەڵێت: "لەکاتی خەودا، مێشک بەردەوامە لە کارکردن لە رێگەی چەسپاندنی یادەوەرییەکان و باشترکردنی توانای تەرکیز و شیکارکردنی کێشەکان." ئامۆژگاری دەکات کە کاتژمێرێک پێش نووستن لە مۆبایل دووربکەوینەوە بۆ باشترکردنی کوالێتی خەو.
2. وەرزشکردنی رۆژانە:
وەرزشی رێک و پێک یارمەتی بەهێزکردنی پەیوەندییە دەمارییەکانی مێشک دەدات و رێڕەوی نوێ دروست دەکات کە بۆ تەندروستیی هزری پێویستن. دکتۆرە برنگمان پێشنیاری وەرزشکردن دەکات بۆ ماوەی لانیکەم 30 خولەک لە رۆژێکدا.
3. تاقیکردنەوەی خولیای نوێ:
مێشک حەزی لە بەرەنگاری و نوێبوونەوەیە. پسپۆڕان ئامۆژگاری دەکەن بە فێربوونی بەهرەی نوێ وەک خوێندنەوە، چنین، چاندن، یان وێنەکێشان بۆ دروستکردنی رێڕەوی دەماریی نوێ و هاندانی توانای فرەئەرکی و کۆنترۆڵکردنی سترێس.
4. پاراستنی پەیوەندی کۆمەڵایەتی:
دکتۆر جۆیل سالیناس جەخت لەوە دەکاتەوە کە پەیوەندیی بەردەوام لەگەڵ کەسانی تردا بیرکردنەوە بەهێز دەکات و پشتگیری لە تەندروستیی سۆزداری دەکات. پەیوەندی تەلەفۆنی، سەردان، چالاکی بەکۆمەڵ، یان تەنانەت کاری خۆبەخشی، دەتوانن مێشک بە چالاکی و هاوسەنگی سۆزداری بهێڵنەوە.
5. تێڕامان و خەیاڵکردن:
توێژینەوەکان دەریانخستووە کە خەیاڵکردن (شیرود) دەتوانێت یارمەتیدەر بێت لە فێربوون و شیکارکردنی قووڵتر. پسپۆڕان ئامۆژگاری دەکەن بە ئەنجامدانی چالاکیی هزری و تێڕامانی رۆژانە.
6. قسەکردن لەگەڵ خۆتدا:
دکتۆر رایان سوڵتان روونیدەکاتەوە کە قسەکردن لەگەڵ خۆتدا بە دەنگی بەرز، کۆنترۆڵی هزری بەهێز دەکات و خێرایی ئەنجامدانی ئەرکەکان دوو هێندە دەکات. بۆ نموونە، توێژینەوەیەک دەریخستووە ئەو کەسانەی لەکاتی گەڕان بەدوای کلیلدا وتوویانە "کلیل، کلیل،" خێراتر کلیلیان دۆزیوەتەوە.
7. هەستکردن بە بێزاری و وەڕسبوون:
دکتۆر سوڵتان روونیدەکاتەوە کە هەستی بێزاری تۆڕی "دۆخی بنەڕەتی" (Default Mode) لە مێشکدا چالاک دەکات، کە بەرپرسە لە داهێنان و بەیەکەوەبەستنی بیرۆکەکان.
8. بەسەربردنی کاتی زیاتر لە سروشتدا:
توێژینەوەیەکی بەلجیکی سەلماندوویەتی کە زیادکردنی رووبەری سەوزایی بە ڕێژەی %3 لە گەڕەکێکدا، دەتوانێت رێژەی زیرەکی بە تێکڕا 2.6 پلە بەرز بکاتەوە. سروشت سترێس کەمدەکاتەوە، چالاکی جەستەیی زیاد دەکات، و تەندروستی مێشک باشتر دەکات.
9. گوێگرتن لە میوزیک:
توێژینەوەکان ئاماژە بەوە دەکەن کە میوزیک تەرکیز بەهێز دەکات و خێرایی وەڵامدانەوە زیاد دەکات. دکتۆر کێڤن وودز روونیکردەوە کە میوزیک بە وردی دیزاین کراوە بۆ هاندانی شەپۆلەکانی مێشک و زیادکردنی تەرکیز تەنها لە ماوەی چەند خولەکێکدا.
دوای سەردانەکەی ستیڤ ویتکۆف، نێردەی تایبەتی ئەمریکا بۆ مۆسکۆ، وەزارەتی دەرەوەی ئەمریکا رایگەیاند کە واشنتۆن بەردەوامە لە گفتوگۆکردن لەگەڵ هاوبەشەکانی لە ئەوروپا و کیێڤ سەبارەت بە پرسی چارەسەرکردنی قەیرانی ئۆکراین.
تۆمی بیگووت، جێگری وتەبێژی وەزارەتی دەرەوەی ئەمریکا، رایگەیاند: "ئێمە لە پەیوەندی بەردەوامداین لەگەڵ هاوبەشەکانمان لە ئەوروپا و ئۆکراین. ئامانجی کۆتاییمان کۆتاییهێنانە بەم ململانێیە و کۆکردنەوەی هەموو لایەنەکانە لەسەر مێزی گفتوگۆ، بۆ گەیشتن بە ئاگربەست و ئاشتییەکی هەمیشەیی."
پێشتر، دۆناڵد ترەمپ، سەرۆکی ئەمریکا، پێشوازی لە ئەنجامی گفتوگۆکانی نێوان پوتین و ویتکۆف کردبوو لە کرملن و بە "پێشکەوتنێکی گەورە" وەسفی کردبوو.
تۆڕی "سی ئێن ئێن" لە زاری بەرپرسانی کۆشکی سپیەوە بڵاویکردەوە، ترەمپ رێنمایی تیمەکەی کردووە کە پلان بۆ ئەنجامدانی کۆبوونەوەیەک لەگەڵ سەرۆکی ڕووسیا دابنێن لە زووترین کاتدا. هەروەها، هەندێک ڕاپۆرتی میدیایی ئاماژەیان بەوە کردووە کە ترەمپ بەنیازە هەفتەی داهاتوو لەگەڵ پوتین کۆببێتەوە و دواتریش کۆبوونەوەیەکی سێقۆڵی لەگەڵ پوتین و زیلینسکی بەبێ ئامادەبوونی سەرکردە ئەوروپییەکان ئەنجام بدات.
شایەنی باسە، ڕۆژی چوارشەممەی رابردوو، سەرۆکی روسیا پێشوازی لە ستیڤ ویتکۆف کرد لە مۆسکۆ و لایەنی ڕووسی کۆبوونەوەکەی بە "بونیادنەر" وەسف کرد و دووپاتیکردەوە کە هەردوولا باسیان لە چارەسەری قەیرانی ئۆکرانیا کردووە.
لەنێوان ئەرێنی بوونی ئاشکرای ئەمریکا و خۆپارێزیی روسیادا، نیشانەکانی هەوڵێکی نوێ بۆ کۆتاییهێنان بە جەنگی بەردەوامی ئۆکراین دەردەکەون، کە ناونیشانەکەی "رێککەوتنی گەورە"یە و کلیلەکەشی ئەو دیدارەیە کە ستیڤ ویتکۆف، نێردەی سەرۆکی ئەمریکا، لەگەڵ ڤلادیمیر پوتین، سەرۆکی روسیا لە مۆسکۆ کۆکردەوە.
کۆبوونەوەکە، کە لەلایەن دۆناڵد ترەمپ، سەرۆکی ئەمریکاوە بە "زۆر بەرهەمدار" وەسفکراو بەپێی بەیاننامەی کرملین "بونیادنەر و بەسوود" بوو، جارێکی دیکە گرەوی دانوستانی سیاسی زیندوو کردەوە لە ساتەوەختێکی چارەنووسسازدا کە پێش کۆتاییهاتنی ئەو مۆڵەتە دێت کە ئەمریکا بۆ روسیای دیاریکردووە بۆ قبوڵکردنی رێککەوتنی ئاگربەست.
مۆسکۆ – واشنتۆن: دیدارێکی دەگمەن و مۆڵەتێکی کورت
لە کاتێکی زۆر هەستیاردا، ستیڤ ویتکۆف، نێردەی تایبەتی ترەمپ، پەیوەندی بە سەرکردایەتی روسیاوە کرد لە مۆسکۆ، لە هەنگاوێکدا کە ئاماژەی سیاسیی بەرچاوی هەڵگرتووە. بەپێی لێدوانە رەسمیەکان، گفتوگۆکان لەگەڵ سەرۆک پوتین، جەنگی ئۆکراین و ئاسۆی باشترکردنی پەیوەندییەکانی روسیا-ئەمریکای گرتووەتەوە.
سەرۆک ترەمپ، گەشبینی خۆی لە ئەنجامەکانی دیدارەکە نەشاردەوە و رایگەیاند کە هەندێک لە هاوپەیمانە ئەوروپییەکانی لە "پێشهاتە ئەرێنییەکان" ئاگادار کردووەتەوە. بەڵام ئەم ئەرێنی بوونە رووبەڕووی مۆڵەتێکی کاتیی روون دەبێتەوە: تەنها دوو رۆژ مۆسکۆ لەو سزایانەی ئەمریکا جیادەکاتەوە کە ترەمپ هەڕەشەی کردبوو لە ئەگەری نەگەیشتن بە ڕێککەوتن.
زمانی دوولایەنەی مۆسکۆ: کراوەیی وریایانە و ئاگادارکردنەوە لە کات
سەرەڕای جەختکردنەوەی کرملین لەسەر لایەنی بونیادنەری گفتوگۆکان، لێدوانەکانی دیمیتری پێسکۆڤ، وتەبێژی سەرۆکایەتی روسیا، رەنگدانەوەی روویەکی دیکەی هەڵوێستی رووسیا بوو. ناوبراو ئاماژەی بەوەدا کە باشترکردنی پەیوەندییەکان لەگەڵ واشنتۆن "کاتی دەوێت" و روونیکردەوە کە "سستبوونی پەیوەندییەکان" لە نێوان پوتین و ترەمپ، ئەگەری گەڕانەوەی خێرا بۆ رێڕەوی ئاسایی ئاڵۆز دەکات.
پێسکۆڤ هەروەها ئاماژەی بەوەشکرد کە ماوەیەکی زۆرە هەردوو سەرۆک کۆنەبوونەتەوە، کە ئەمەش ئاماژەیەکی ناڕاستەوخۆیە بۆ قووڵایی ئەو بۆشاییە سیاسییەی کە هێشتا بوونی هەیە، سەرەڕای هەوڵی پڕکردنەوەی لە رێگەی ویتکۆف – پوتینەوە.
زیلینسکی: فشارە بەردەوامەکان و جووڵەی دیپلۆماسی هاوتەریب:
لە بەرامبەردا، زیلینسکی، سەرۆکی ئۆکرین، لە رۆژانی رابردوودا پەیوەندییەکانی لەگەڵ واشنتۆن چڕکردووەتەوە. لە پەیوەندییەکی تەلەفۆنی ئەم دواییەیدا لەگەڵ ترەمپ، هەردوولا "بژاردەکانی پەرەسەندن"یان تاوتوێ کردووە و زیلینسکی ئاشکرای کرد کە داوای سەپاندنی "سزای زیاتر"ی بەسەر روسیادا کردووە.
زیلینسکی جەختی لە گرنگی "فشاری راستەوخۆ" لەسەر مۆسکۆ کردەوە، لە کاتێکدا کە وڵاتانی ناتۆ بەرەو بەهێزکردنی هاوکارییە سەربازییەکانیان بۆ ئۆکراین هەنگاو دەنێن. هۆڵەندا هاوکاری سەربازی بە بەهای 580 ملیۆن دۆلاری راگەیاندووە کە بەرگری ئاسمانی و تەقەمەنی لەخۆدەگرێت، هەروەها سویدیش بە بڕی 275 ملیۆن دۆلار بەشداری کردووە لە چوارچێوەی هاوپەیمانییەکی سێقۆڵی لەگەڵ دانیمارک و نەرویجدا.
مارک کیمیت: هیچ شتێک لەم دانوستانەدا بەخۆڕایی نییە
مارک کیمیت، یاریدەدەری پێشووی وەزیری دەرەوەی ئەمریکا بۆ کاروباری سیاسی و سەربازی، لە لێدوانێکیدا رایگەیاند: "ویلایەتە یەکگرتووەکان ئامادەیە لەگەڵ سەرۆک پوتن کاربکات بۆ ئاگربەست،" بەڵام وتیشی: "ئەمە بەخۆڕایی نابێت."
کیمیت روونیکردەوە کە سەرۆک ترەمپ ئەرێنی بوونێکی روون نیشان دەدات، بەڵام بەردەوامی ئەم ئەرێنی بوونەی بەستەوە بە ئاستی وەڵامدانەوەی پوتنەوە. "ئەگەر پوتن ئامادە نەبێت سازش بکات، ترەمپ بە ئەرێنی نامێنێتەوە،" و زیادی کرد کە لەوانەیە ترەمپ ناچار بێت پەنا بۆ "هانەدەری نەرێنی" ببات ئەگەر روسیا لەسەر هەڵوێستی خۆی سوور بێت، کە ئاماژەیەکی ناڕاستەوخۆیە بۆ سزا ئابوورییەکان.
سەرۆکی روسیا: ئامانجەکانی جەنگ نەگۆڕاون؟
کیمیت پێیوابوو کە پوتین "دەیەوێت ئامانجەکانی جەنگی خۆی بپارێزێت،" و ئەمەش هۆکاری خۆپارێزییەکەیەتی تا ئێستا بەرامبەر بە پێشنیازەکانی ئەمریکا. ناوبراو هۆشداریدا کە لەوانەیە سەرۆکی روسیا بە جددی وەڵامی دەستپێشخەرییەکەی ترەمپ نەداتەوە، بەڵکو هەوڵبدات "جەنگەکە درێژ بکاتەوە" بۆ بەدەستهێنانی دەستکەوتی مەیدانی.
وتیشی: "پوتن لەوانەیە وابزانێت کە رۆژئاوا لە جەنگەکە ماندوو بووە" و زیلینسکی ناتوانێت پایتەختە رۆژئاواییەکان قایل بکات کە بەردەوام بن لە پێشکەشکردنی هاوکاری، بەڵام زیادی کرد: "پوتن بۆی دەرکەوت کە ئەم بۆچوونەی هەڵە بووە... رۆژئاوا ئارامگرییەکی زۆری نیشانداوە و ئامادەیە بەردەوام بێت لە پشتیوانیکردنی ئۆکراین تا جەنگ بەردەوام بێت."
مۆڵەتی 8ی ئاب: هەڕەشەیەکی ڕاستەقینە یان کارتێکی فشار لە پێناو دانوستان؟
سەرەڕای باسکردن لە مۆڵەتێکی یەکلاکەرەوە کە لە 8ی ئاب کۆتایی دێت، کیمیت هۆشداریدا لە زیادەڕۆیی کردن لە مامەڵەکردن لەگەڵ ئەم بەروارەدا وەک "هێڵی سوور." بە بڕوای ئەو، "هیچ بەروارێکی دیاریکراو لە مێشکی سەرۆک ترەمپدا نییە... هەموو شتێک جێگەی دانوستانە، جا چ ژمارەکان بێت یان بەروارەکان یان تەنانەت خودی دانوستانەکانیش."
ئاماژەی بەوەشکرد کە لەوانەیە ترەمپ مۆڵەتەکە درێژ بکاتەوە ئەگەر ئاماژەی ئەرێنی لە مۆسکۆوە ببینێت، و وتیشی: "سەرۆکی ئەمریکا پێشتر نەرمی نواندووە و ناتوانرێت پێشبینی هەڵسوکەوتەکانی بکرێت." بۆیە، لەوانەیە 8ی ئاب کۆتایی چیرۆکەکە نەبێت.
تۆپەکە لە گۆڕەپانی پوتین دایە:
لە کۆتایی شیکارییەکەیدا، کیمیت وتی: "تۆپەکە لە گۆڕەپانی پوتین دایە" و داهاتووی ئەم دەستپێشخەرییە بەندە بە وەڵامی کرملینەوە لە کاتژمێرە کەمەکانی داهاتوودا. ناوبراو نیگەرانی خۆی دەربڕی لەوەی کە وەڵامی روسیا "کەم و لەوانەیە پابەندکەر نەبێت،" کە لەوانەیە دۆخەکە وەک خۆی بهێڵێتەوە و بەرەو پەرەسەندنی زیاتری ببات.
وەزیرێکی حکومەتی سربیا لەمیانەی بەشداریکردنی لە بەرنامەیەکی راستەوخۆدا توشی حاڵەتێکی لەناکاوهات و بەپەلە گوازرایەوە نەخۆشخانە.
دارکۆ گلیچیچ وەزیری وەبەرهێنانی حکومەتی سربیا، ئەمرۆ لە کاتی بەشداریکردنی لە بەرنامەیەکی تەلەفزیۆنی و لە پەخشی راستەوخۆدا توشی جەڵتەی مێشکبوە و پاشانیش بەخێرای لە رێگەی ئۆتۆمبێلی فریاگوزاریەوە گواستراوەتەوە بۆ نەخۆشخانەی فریاکەوتنی شاری بەلگرادی سربیا.
زیلابیرتۆر لۆنچار وەزیری تەندروستی سربیا رایگەیاند، وەزیری وەبەرهێنان لە کاتی گەشتنی بە نەخۆشخانەی فریاکەوتن رەوشی تەندروستی زۆرخراپبووە، بەهۆی جەڵتەکەوە توشی خوێنبەربونی میشکبووە و بەپەلە نەشتەرگەریەکی سەرکەوتوی بۆ ئەنجامدراوە.
فەرمانی سەرۆكی ئەمریكا بۆ سەپاندنی پێناسی گومرگی بەسەر 70 وڵاتدا خرایە بواری جێبەجێكردن، كۆشكی سپیش دەڵێت، ئەمریكا بەهۆی فەرمانەكەی ترەمپەوە نزیكەی 130 ملیار دۆلار قازانجی كردوە.
دۆناڵد ترەمپ، سەرۆكی ئەمریكا لە پەیامێكیدا لە تۆڕی كۆمەڵایەتی تروس بڵاویكردەوە، لەئەمڕۆوە بە ملیار دۆلاری باج و پێناسی گومرگی دەڕژێتە خەزێنەی ئەمریكا.
پەیامەكەی ترەمپ لە كاتێكدایە بڕیاربوو فەرمانەكەی بۆ سەپاندنی پێناسی گومرگی بەسەر ئەو 70 وڵاتەدا لە هەینی رابردووەوە جێبەجێ بكرێت، بەڵام كۆشكی سپی جێبەجێكردنی فەرمانی سەرۆكی ئەمریكای بۆ حەوتی مانگ دواخست.
بە پێی فەرمانەكەی ترەمپ باجی گومرگی بە رێژەی 15٪ بەسەر وڵاتانی ئەوروپا تا كۆریای باشور و ژاپۆن دەسەپێنرێت و رێژەی باجی سەپەینراو بەسەر بەریتانیا و فیلیپین و پاكستان و ڤێتنام بە رێژەی 10 بۆ 20٪ دەبێت و باجی هیندستانیش لە 10٪ەوە بۆ 50٪ بەرز كراوەتەوە.
ئەمریكا پێناسی گومرگی بە رێژەی 10 تا 50٪ی بەسەر ئاسن و دەرمان و ئۆتۆمبێلی هەناردەی 70 وڵاتدا سەپاندوە و بە وتەی كۆشكی سپی ترەمپ ئامانجییەتی باج لەسەر هەندێك كاڵا كە هاوردەی ئەمریكا دەكرێت بە رێژەی 100٪ بەرز بكاتەوە.
كۆشكی سپی رایگەیاندوە زیادكردنی باجی گومرگی لە لایەن ترەمپەوە بوەتە هۆی ئەوەی ئەمریكا لە قۆناغە سەرەتاییەكانی ئەو فەرمانەدا 127 ملیار دۆلار قازانج بكات.
مانگی رابردوو سێهەم گەرمترین مانگی تەموز بوو لە مێژوودا، لەدوای تۆمارکردنی پلەکانی گەرما لە جیهان.
زانایانی بواری کەشناسی، رایانگەیاندووە، مانگی رابردوو سێهەم گەرمترین مانگی تەمموز بووە لەسەر زەوی لەو کاتەوەی پلەکانی گەرما لە جیهان تۆماردەکرێت، ئەمەش لە کاتێکدایە ساڵی 2023 مانگی تەموز یەکەم گەرمترین و ساڵی 2024یش مانگی حەوت دووهەم گەرمترین مانگی مێژوو بووە.
ئاشکراشیانکرد، گۆڕانی کەشوهەوا هۆکاری سەرەکی گەرمبوونی جیهانە و یەکێکی دیکەش لە هۆکارەکان دەدانی گازە سوتەمنییەکانە لە بەرگە هەوا، کە بەهۆی سوتانی ئەو مادە بەبەردبووانە دروست دەبێت کە هایدرۆکاربۆنیان تێدایە.
بەپێی راپۆرتی خزمەتگوزاری گۆڕانی کەشوهەوای کۆپەرنیکۆسی یەکێتی ئەوروپا، تێکڕای پلەی گەرمی هەوای سەرزەوی جیهانی لە مانگی تەمموزدا گەیشتووەتە 16.68 پلەی سیلیزی، کە 0.45 پلەی سیلیزی زیاترە لە تێکڕای مانگی تەمموز لە ساڵانی 1991-2020.
هەر بەپێی راپۆرتەکانی بواری کەشناسی، رۆژی 21ـی مانگی حەوتی رابردوو گەرمتریین رۆژ بووە لە جیهاندا تا ئێستا تۆماکرابێت.
سەرۆكی ئەمریكا رایگەیاند، ئەگەری هەیە بەمزوانە لەگەڵ پوتن و زێلێنسكی كۆببینەوە، كۆشكی سپیش دەڵێت هەفتەی داهاتوو ترەمپ و پوتن كۆبوونەوەی لوتكە ئەنجامدەدەن.
دۆناڵد ترەمپ، سەرۆكی ئەمریكا رایگەیاند، ئەگەرێكی بەهێز هەیە زۆر بە زووی كۆبوونەوەیەك لەگەڵ ڤلادیمێر پوتن هاوتا روسیەكەی و ڤلۆدیمێر زیلینسكی هاوتا ئۆكراینیەكەی ئەنجامبدات، بەبێ ئەوەی وادە و شوێنێك بۆ ئەم لوتكەیە دیاری بكات، كە ئامانج لێی كۆتاییهێنان بە شەڕی سێ ساڵەی نێوان مۆسكۆ و كێڤە.
ئەوە قسانەی ترەمپ لە كاتێكدایە، كۆشكی سپی رایگەیاند، ترەمپ بەنیازە لە هەفتەی داهاتوودا چاوپێكەوتنێك لەگەڵ پوتن، ئەنجام بدات، دواتر دیدارێكی سێ قۆڵی لەگەڵ زێلێنسكی، ئەنجام بدات.
لای خۆشیەوە ماركۆ روبیۆ وەزیری دەرەوەی ئەمریكاش دووپاتیكردەوە ئێستا ئیدارەی ئەمریكا باشتر لەو مەرجانە تێگەیشتووە كە روسیا دەوێت تا كۆتایی بە شەڕی ئۆكراین بهێنێت، وتیشی، پێیوایە ئێستا زیاتر نزیكبونەتەوە لە كۆتایههێنان بە شەڕی ئۆكراین.
سەرۆکی ئەمریکا رایگەیاند کۆبونەوەی نێوان نێردەی تایبەتی ئەمریکا لەگەڵ سەرۆکی روسیا پیشکەوتنی گرنگی بەدەستهێناوە، یاریدەدەری سەرۆکی روسیاش دەڵێت، گفتوگۆکە بەسود و بنیاتنەربووە.
دۆناڵد ترەمپ سەرۆکی ئەمریکا لە تۆڕی کۆمەڵایەتی تروس بڵاویکردەوە، کۆبونەوەی نێوان ستیڤ ویتکۆف نێردەی ئەمریکا بۆ کاروباری رۆژهەڵاتی ناوەڕاست لە گەڵ ڤلادیمێر پوتن سەرۆکی ئەمریکا بەرهەمداربوە، هەروەها لەو بارەیەشەوە ژمارەیەک لە هاوپەیمانە ئەوروپیەکانی ئاگادارکردوەتەوە.
بڵاویشیکردەوە، هەمووان هاوڕان کە دەبێت جەنگی ئۆکراین کۆتای پێبهێنرێت و لە رۆژەکان و هەفتەکانی داهاتوو کار بۆ ئەوە دەکەن.
هاوکات کۆشکی سپی لەو بارەیەوە رایگەیاند، دیدارەكەی پوتن و ویتكۆف لە مۆسكۆ بە باشی بەڕێوەچووە، بەڵام هێشتا واشنتۆن سوورە لەسەر سەپاندنی سزا بەسەر روسیا لە رۆژی هەینیدا كە دوایین وادەیە لەبەردەم مۆسكۆدا.
لەلایەکی دیکەوە یوری ئوشاكۆڤ یاریدەدەری سەرۆكی روسیا لەبارەی دیدارەكەوە رایگەیاندووە، گفتوگۆی پوتین و ویتكۆف بەسوود و بنیاتنەر بووە، هەروەها تەوەری گفتوگۆكانیشیان قەیرانی ئۆكراین و ئاسۆی پەرەپێدانی هاوكاری ستراتیژی نێوان ئەمریكا و روسیا بووە.
تەقە لەبنکەیەکی سەربازی لە ولایەتی جۆرجیای ئەمریکا کراو لە ئەنجامدا ژمارەیەک سەرباز برینداربوون.
میدیاکانی ئەمریکا رایانگەیاند، بەهۆی روداوێکی تەقەکردنەوە لە بنکەی سەربازی فۆرت ستیوارد لە ویلایەتی جۆرجیا، 5 سەباز برینداربوون، بەهۆی روداوەکەشەوە بنکە سەربازیەکە بەشێوەیەکی کاتی داخراوە کە نزیکەی 20 هەزار سەربازی تێدایە.
راشیانگەیاندووە، سەربازە بریندارەکان گواستراونەتەوە بۆ نەخۆشخانەیەکی سەربازی لەنزیک بنکەکە. هەروەها دامەزراوەکانی نزیک لەو بنکە سەربازیە داخران بەهۆی مەترسی تەقەکەرەکە و پاش دەستگیرکردنی تەقەکەرەکە کراونەتەوە.
لە ماوەی شەش مانگی یەكەمی ئەمساڵدا، كارەساتە سروشتییەكان زیانی 135 ملیار دۆلاریان بە وڵاتان گەیاندووە.
كۆمپانیای بیمەی "سویس رەی" سویسری لە خەمڵاندنە سەرەتاییەكانیدا ئاشكرایكردووە، كارەساتە سروشتییەكان لە ماوەی نیوەی یەكەمی ئەمساڵدا زیانی 135 ملیاریان بە ئابووری جیهان گەیاندووە، لەكاتێكدا لە هەمان ماوەی ساڵی رابردووا، 123 ملیار دۆلار زیان تۆماركراوە.
كۆمپانیاكە ئاماژەی بەوەشكردووە، ئاگركەوتنەوەكەی لۆس ئەنجلۆس و زریانە بەهێزەكانی ناوچە جیاوازەكانی سەرتاسەری ئەمریكا و بوومەلەرزەكەی بۆرما و زریانەكانی باكووری ئەتڵەسی وەك سەرەكیترین كارەساتە سروشتییەكانی ئەمساڵ تۆماركراون.
كۆمپانیاكە دووپاتیدەكاتەوە، خۆپاراستن و گونجان لەگەڵ رەوشە جیاجیاكان، كاریگەرترین رێگایە بۆ كەمكردنەوەی زیانەكان، وەك دروستكردنی بەنداو بۆ خۆپاراستن لە لافاو.
بەهۆی کەوتنەخوارەوەی هێلیکۆپتەرێکەوە لە وڵاتی غانا لە رۆژئاوای ئەفریقا نیزکەی 10 کەس گیانیان لەدەستداوە لەو ژمارەیەش دوانیان وەزیرن.
حکومەتی غانا رایگەیاند، ئەمڕۆ بەهۆی کەوتنە خوارەوەی هێلیکۆپتەرێکەوە لە ناوچەی ئاشنتی لە باشوری وڵاتی غانا هەشت کەس گیانیان لە دەستداوە، لەو ژمارەیەش هەردوو وەزیری بەرگری و ژینگەی گیانیان لەدەستداوە، هەروەها 3 ئەندامی هێزی ئاسمانیش گیانیان لەدەستداوە.
سوپای غاناش ئاماژەی بەوەکردبوو، پەیوەندیان لەگەڵ هەلیکۆپتەرێکی جۆری زێد-9 لەدەستداوە لە کاتێکدا لە ئاکرای پایتەختی غاناوە بەرەو شاری ئەوابواسی لە باشوری ئەو وڵاتە فڕیبوو.
سەرۆكی روسیا و نێردەی ئەمریكا بۆ رۆژهەڵاتی ناوەڕاست لە كۆشكی كرملن كۆبوونەوە و سێ کاتژمیر گفتوگۆیان لەسەر شەڕی ئۆكراین كرد.
یوری ئوشاكۆڤ یاریدەدەری سەرۆكی روسیا رایگەیاند، گفتوگۆی نێوان ڤلادیمیر پوتین سەرۆكی روسیا و ستیڤ ویتكۆف نێردەی تایبەتی دۆناڵد ترەمپ سەرۆكی ئەمریكا بۆ رۆژهەڵاتی ناوەڕاست، بەسوود و بنیاتنەر بوو.
وتیشی، تەوەری گفتوگۆكانی ویتكۆف و پوتن قەیرانی ئۆكراین و ئاسۆی پەرەپێدانی هاوكاری ستراتیژی نێوان ئەمریكا و روسیا بووە.
ئوشاكۆڤ ئاماژەی بەوەشكرد، ناتوانێت هیچ زانیارییەكی زیاتر لەبارەی ناوەڕۆكی كۆبوونەوەكە ئاشكرا بكات تا ئەو كاتەی دۆناڵد ترەمپ لەلایەن ویتكۆفەوە لە ناوەڕۆكی ئەو كۆبوونەوەیە ئاگادار دەكرێتەوە.
سەردانەكەی ویتكۆف بۆ روسیا پێنجەم جارە لەماوەی ئەمساڵدا بە ئامانجی گەیشتن بە رێككەوتنی ئاگربەست لەگەڵ ئۆكراین پێش تەواوبوونی ئەو وادەیەی كە ترەمپ بۆ مۆسكۆی دیاریكردووە بە مەبەستی گەیشتن بە ئاگربەست لەگەڵ ئۆكراین.
ئەمڕۆ میدیاکانی چین نوێترین جۆری رۆبۆتی جەنگی ئاشکراکرد، کە ناوی "گورگی بکوژ"ە و دەتوانرێت چەکی جۆراوجۆری لێببەسترێت و بۆ مەبەستی سەربازی جیاواز بەکاربهێنرێت.
کەناڵی سی سی تی ڤی رەسمی چین رایگەیاند، ئەم جۆرە رۆبۆتە نوێیە کە لەشێوەی گورگە مۆدێلێکی پیشکەوتووتری رۆبۆتەکانی پێشووترە کە لەشێوەی سەگ دروستکراون و توانایەکی بەرزی پێکانی ئامانجەکانی هەیە، هەمان ئەرکی سەربازەکان دەبینێت لە مەیدانی جەنگدا، هەروەها زیانە گیانییەکانی سەربازەکانی سوپاش کەمدەکاتەوە.
ئاشکراشیکرد، چین بەشێوەیەکی بەرفراوان وەبەرهێنان دەکات لە کەرتی تەکنەلۆژیای سەربازی بەتایبەت رۆبۆتە جەنگیەکان، بەشێک لە شارەزایانی سەربازیش پێیانوایە تواناکانی چین لە روی بەرەو پێشبردن و داهێنانەوە تواناکانی ئەمریکای تێپەڕاندووە.
ئاماژەی بەوەشکردوە، رۆبۆتی نوێی "گورگ" توانای هەیە لە چەندین ژینگەی سەخت لە مەیدانی جەنگدا جموجوڵ بکات و توانای پێکانی ئامانجەکەی هەیە لە دووری 100 مەترەوە بەوردی، هەروەها توانای سیخوڕیکردن و کۆکردنەوەی زانیاریەکانی هێزەکانی دوژمنی هەیە.
ئەوەشی خستووەتە ڕوو، رۆبۆتەکان لە مەیدانی جەنگدا دەتوانن هەماهەنگی لەگەڵ یەکتردا بکەن، لەشێوەی گەلەگورگی راستی کە یەکێک لە رۆبۆتەکان لە پێشێوە سیخوڕی بەسەرناوچەی دوژمندا دەکات و ئەوانی دیکەش هێرشدەکەن.
لەگەڵ گەیشتنی ویتكۆف بۆ مۆسكۆ، ڤۆلۆدیمیر زێلینسكی، سەرۆكی ئۆكراین داوای لە واشنتۆن كرد فشارەكان بۆ سەر روسیا چڕتر بكاتەوە بۆ كۆتاییهێنان بە شەڕ.
زێلینسكی لە لێدوانێكدا رایگەیاندووە، گرنگە هەمووان لە ئەمریكاوە تا ئەوروپا و گروپی حەوت یەك بگرن لە دژی روسیا و پێیوایە كرێملین هەوڵی وەستاندنی شەڕەكە نادات تاوەكو هەست بە فشارێكی تەواو نەكات.
ئەمڕۆ ستیڤ ویتكۆڤ نوێنەری سەرۆكی ئەمریكا گەیشتە مۆسكۆ و لەگەڵ ڤلادیمیر پوتن سەرۆكی روسیا كۆبووەوە، ئەمەش تەنها چەند رۆژێك پێش ئەو وادەیە بوو كە دۆناڵد ترەمپ بۆ هاوتا روسییەكەی دیاریكردبوو بۆ گەیشتن بە ئاگربەست لەگەڵ ئۆكراین.
ترەمپ یەكشەممەی رابردوو پشتڕاستیكردەوە كە بەنیازە سزا بەسەر مۆسكۆدا بسەپێنێت ئەگەر وادەی دیاریكراو تەواو ببێت بەبێ ئەوەی بگاتە ئەنجام.
جموجۆڵەكانی روسیا لە رۆژئاوای كوردستان زیاد دەكات و پەیامنێری كوردسات نیوز رایگەیاند هەمو جموجۆڵەكانی روسیا لە قامیشلۆ بە ئاگاداریی هەسەدە دەكرێت.
پەیامنێری كوردسات نیوز لە قامیشلۆ رایگەیاند: لە دوای روخانی رژێمی بەشار ئەسەد هێزەكانی روسیا چەند جارێك لە قامیشلۆ جموجۆڵیان كردوە و ئەوەش بوەتە مایەی سەرنجی دانیشتوانی رۆژئاوای كوردستان بە تایبەت كە لە دوای روخانی رژێمی پێشو ئەو هێزانە دەركەوتن و چالاكییان نەماوە.
وتیشی، هێزەكانی سوریای دیموكراتی "هەسەدە" یاوەری زۆرینەی كاروانە سەربازییەكانی روسیا دەكەن و سەرجەم جوڵەی ئەو هێزانەی روسیا كە لە فڕۆكەخانەی قامیشلۆ جێگیرن بە ئاگاداریی ئەوان دەكرێت.
لێپرسراوێكی رۆژئاوای كوردستان كە نەیویستوە ناوی ئاشكرا بكرێت بە پەیامنێری كوردسات نیوزی راگەیاندوە، روسیا دەیەوێت رۆڵی لە گۆڕانكارییەكانی سوریای نوێدا هەبێت و ئەوەش هۆكارە بۆ زیادبونی جموجۆڵی هێزە سەربازییەكانی.
نوێنەری سەرۆكی ئەمریكا گەیشتە روسیا بۆ باشتكردنی پەیوەندیەكانی نێوان ئەو دوو وڵاتە، وتەبێژی كرملنیش دەڵێت، چاكبونەوەی پەیوەندییەكانی نێوان واشنتۆن و مۆسكۆ كاتی پێویستە.
ستیڤ ویتكۆف نوێنەری سەرۆكی ئەمریكا گەیشتە مۆسكۆی پایتەختی روسیا و بڕیارە لەگەڵ لێپرسراوانی ئەو وڵاتە كۆببێتەوە و گفتوگۆ بكات لەبارەی باشتركردنی پەیوەندییەكانی واشنتۆن و مۆسكۆ.
هاوكات، سەرۆكی ئەمریكا رایگەیاند، سەپاندنی پاكێجێكی نوێی سزاكانی ئەمریكا بەسەر روسیا دوادەخات تا دوای سەردانەكەی ویتكۆف.
لە بەرامبەردا، دیمیتری پیسكۆف وتەبێژی كۆشكی كرملن رایگەیاند، ئاساییكردنەوەی پەیوەندیەكانی نێوان مۆسكۆ و واشنتۆن كاتی پێویستە، سەبارەت بە كۆبوونەوەی لوتكەی نێوان پوتن و ترەمپیش، وتەبێژی كرملن رایگەیاند، هیچ پێشكەوتنێك لەو بابەتەدا نیە.