جیهان
بەریتانیا و فەڕەنسا رایانگەیاند ئامادەن هەماهەنگی بكەن لەسەر بەكارهێنانی چەكی ئەتۆمی.
ئیمانوێل ماكرۆن سەرۆكی فەڕەنسا و كیێر ستارمەر سەرۆك وەزیرانی بەریتانیا ڕاگەیەندراوێكیان ئیمزا كرد كە ئامادەیی هەردوو وڵاتەكە دەردەخەن بۆ هەماهەنگی كردن لە بەكارهێنانی چەكی ئەتۆمی لە كاتی پێویستدا بۆ بەرگریكردن لە وڵاتانی ئەوروپا.
لە راگەیەندراوێكی هاوبەشدا فەڕەنسا و بەریتانیا ڕایانگەیاند كە هەڕەشەی زۆر گەورە بۆ سەر وڵاتانی ئەوروپا ڕاستەوخۆ وەڵامدانەوەی دەبێت لە لایەن هەردوو وڵاتەكەوە، و دوپاتیشیان كردەوە كە بڕیاری بەكارهێنانی چەكی ئەتۆمی سەربەخۆ دەبێت و هەر وڵاتێك خۆی بڕیاری لێدەدات.
رێككەوتنەكەی نێوان فەڕەنسا و بەریتانیا هەماهەنگی بۆ پەرەپێدانی موشەكی دوور مەوداش لەخۆ دەگرێت و هەروەها پێكەوە كار دەكەن لە بوارەكانی ژیری دەستكرد و تەكنەلۆژیای بەرگری پێشكەوتوو.
ئەم ڕێككەوتنانە لە میانەی سەردانە سێ ڕۆژییەكەی سەرۆكی فەڕەنسا بوو بۆ بەریتانیا.
دەزگای هەواڵگری ئیسرائیل رەتیدەكاتەوە ئێران پێش هێرشەكەی ئەمریكا بۆسەر دامەزراوە ئەتۆمییەكانی توانیبێتی یۆرانیۆمی پیتێنراو بگوازێتەوە.
ئاژانسی هەواڵی رۆیتەرز لە زاری لێپرسراوێكی باڵای دەزگای هەواڵگری ئیسرائیل لە بارەی هێرشەكانی ئەمریكا بۆ سەر دامەزراوە ئەتۆمییەكانی ئێران بڵاویكردەوە، زانیارییە هەواڵگرییەكانی ئیسرائیل ئاماژە بەوە دەكەن كە یۆرانیۆمە پیتێنراوەكەی ئێران لە دامەزراوەكانی فۆردۆ و ناتانز و ئەسفەهان پێش هێرشەكانی ئەمریكا نەگوازراوەتەوە.
رۆیتەرز راشیگەیاندوە، پێشتریش نیكۆلاس لێرنەر، سەرۆكی دەزگای هەواڵگری دەرەكی فەرەنسا دووپاتیكردوەتەوە كە پاریسیش زانیاری دروستی دەستكەوتوە كە شوێنی هەڵگرتنی یۆرانیۆمە پیتێنراوەكەی ئێران بەهۆی هێرشەكانی ئەمریكاوە زیانی زۆری بەركەوتووە.
ئەمە لە كاتێكدایە كە دۆناڵد ترەمپ سەرۆكی ئەمریكا چەند جارێكی تەئكیدی لەسەر ئەوەكردووەتەوە كە زیانی زۆریان بە دامەزراوە ئەتۆمییەكانی ئێران گەیاندووە، دواتریش عەباس عراقچی وەزیری دەرەوەی ئێرانیش دانی بەوەدانا كە بەهۆی هێرشەكانی ئەمریكاوە زیان بە دامەزراوە ئەتۆمییەكانی وڵاتەكەی گەیشتووە.
لە چوارچێوەی بڕیاری كەمكردنەوەی ژمارەی كارمەندانی ئاژانسە فیدراڵییەكان لە ئەمریكا ، زیاتر لە دوو هەزار كارمەند لە ئاژانسی ناسا دووردەخرێنەوە .
رۆژنامەی پۆلەتیكۆی ئەمریكی ئاشكرایكردووە ، بەهۆی هەوڵەكانی ئیدارەی ئەمریكا بۆ كەمكردنەوەی ژمارەی كارمەندانی ئاژانسە فیدراڵییەكان ، دوو هەزار و 145 كارمەند لە ئاژانسی ناسا لە كارەكانیان دوردەخرێنەوە كە زۆرینەیان لە پلە و پۆستی باڵادان ، هەروەها ئاماژە بۆ ئەوە كراوە كە ئاژانسی ناسا پێشنیازی خانەنشینی پێشوەختە و كڕینی پشك و دەستلەكاركێشانەوەی دواخراوی خستوەتە بەردەم ئەو كارمەندانە .
لە سەرەتای دەستبەكاربوونی ئیدارەكەی ترەمپەوە ، پیشەسازی بۆشایی ئاسمانی ئەمریكا و هێزی كاری ناسا كە 18 هەزار كارمەند لە خۆ دەگرێت ، روبەروی ئاستەنگی زۆر بوەتەوە ئەوەش بەهۆی هەوڵی كەمكردنەوەی كارمەند و كەمكردنەوەی بودجەی ئاژانسەكە كە ڕەنگە ببێتە هۆی هەڵوەشاندنەوەی دەیان پرۆگرامی زانستی لە داهاتوودا .
وەزارەتی گەنجینەی ئەمریكا سزا نوێی بە سەر 21 كۆمپانیادا سەپاند، بە تۆمەتی دابینكردنی هاوكاری دارایی بۆ سوپای پاسدارانی ئێران.
وەزارەتی گەنجینەی ئەمریكا لە رێگەی نوسینگەی كۆنترۆڵكردنی سەروەت و سامانی دەرەكی ناسراو بە ئۆفاك ، سزای بەسەر 21 كۆمپانیا سەپاند كە بنكەكانیان لە هۆنگ كۆنگ، ئیمارات و توركیان بەتۆمەتی خۆدزینەوە لە سزاكان و دابینكردنی هاوكاری دارایی لە رێگەی فرۆشتنی نەوتەوە بۆ سوپای سوپای پاسدارانی ئێران.
ئۆفاك روونیشیكردەوە، ئەو كۆمپانیانەی لە لیستی سزادراوانی وەزارەتی گەنجینەی ئەمریكادان، دوو كۆمپانیایان بنكەكەیان لە توركیایە، یەكێكیان لە ئیماراتە و 18 ی دیكەشیان لە هۆنگ كۆنگە .
ئەمە لە كاتێدایە، وەزارەتی گەنجینەی ئەمریكا رۆژی پێنجشەممەی رابردووش سەپاندنی سزای بەسەر تۆڕێكی بازرگانیدا راگەیاند، كە نەوتی ئێرانیان بە قاچاخ گواستووەتەوە بەناوی نەوتی عیراقەوە.
كەسێك بە بەكارهێنانی ژیری دەستكرد دەنگی خۆی دەگۆرێت بۆ دەنگی ماركۆ روبیۆ وەزیری دەرەوەی ئەمریكا و پەیوەندی رەسمی كردووە بە كەسایەتی سیاسیەوە.
بەپێی زانیاریەكان، ئەنجامدەری ئەو كارە، بە ئامانجی گەیشتن بە هەژمار و زانیاری كەسەكان ئەو كارەی ئەنجامداوە و لە رێگەی ژیری دەستكردەوە دەنگی خۆی گۆڕیوە و پەیوەندی كردووە بە سێ وەزیری دەرەوەی پێشووی ئەمریكا و كەسایەتی سیاسی دیكەوە.
وەزارەتی دەرەوەی ئەمریكا بە ئاژانسی رۆیتەرزی رایگەیاندووە ، لە ناوەڕاستی مانگی حوزەیراندا كەسێك پەیوەندی كردووە بە چەند وەزیرێك و حاكمی ویلایەتێك و ئەندامێكی كۆنگرێس لە رێگەی بەرنامەی سیگناڵەوە.
هەروەها وەزارەتی دەرەوەی ئەمریكا هۆشداری ناردووە بۆ سەرجەم وەفدە دیپلۆماسیەكان و كونسوڵخانەكان و پێشنیاری كردووە كارمەندەكانیان زیاتر ئاگاداربن دەربارەی هەژماری ساختە.
دۆناڵد ترەمپ سەرۆكی ئەمریكا و بنیامین ناتانیاهۆ سەرۆك وەزیرانی ئیسرائیل لە كۆشكی سپی كۆبوونەوە و ترەمپ وتی، حەماس ئاگربەستی دەوێت و دەرفەتیش هەیە بۆ گەیشتن بە رێككەوتنی ئاشتی.
ترەمپ لەو كۆبوونەوەیەدا رایگەیاند، بزووتنەوەی حەماس ئاگربەستی لە غەززە دەوێت و دەرفەتیش لە بەردەمدایە بۆ گەیشتن بە رێككەوتنی ئاشتی.
لەبارەی گواستنەوەی فەلەستینییەكانیش لە كەرتی غەززە وتی، وڵاتانی دراوسێی ئیسرائیل هەماهەنگی باش لەو بارەیەوە دەكەن، لەسەر ئەگەری چارەسەری دوو دەوڵەتیش لە رۆژهەڵاتی ناوەڕاست، بە نازانم وەڵامی دایەوە.
ناتانیاهۆش وتی، ئەگەری بەدیهێنانی ئاشتی لە رۆژهەڵاتی ناوەڕاست هەیە، لەگەڵ ئەمریكاش كار دەكەن بۆ دۆزینەوەی ئەو وڵاتانەی داهاتوویەكی باشتر بۆ فەلەستینییەكان بنیات دەنێن، وتیشی، نزیكن لە گەیشتن بە رێككەوتن لە غەززە.
لە پێكدادانێكدا لە باكوری غەززە، پێنج سەربازی ئیسرائیلی كوژران و 14ی تریش برینداربوون.
میدیاكانی ئیسرائیل بڵاویانكردەوە، ژمارەیەك سەربازی ئیسرائیلی كەوتوونەتە بۆسەیەكەوە لە باكوری غەززە و پێكدادان رویداوە و بۆمبی چێندراو و هاوەنیش بەكارهاتووە و بەهۆیەوە پێنج سەربازی ئیسرائیلی كوژران و 14ی تریش برینداربوون، دواتر هەلیكۆپتەرێكی ئیسرائیلی لە ناوچەی "بەیت حانون" لە باكوری غەززە نیشتووەتەوە، بۆ رزگاركردنی سەربازەكانی ئیسرائیل.
بەپێی ئامارێكیش لە سەرەتای دەستپێكردنی جەنگی غەززەوە، 849 سەربازی ئیسرائیلی كوژراون و ژمارەی بریندارەكانیش گەیشتووەتە نزیكەی پێنج هەزار و 800 كەس، كە 862یان برینیان سەختە.
شەش رۆژە ئاگرەكەی دارستانەكانی پارێزگای لازقیە لە سوریا بەردەوامە و بەهۆیەوە سەدان خێزان ماڵەكانیان بەجێهێشتووە.
ئاژانسی رەسمی سوریا "سانا" بڵاویكردەوە، تیمەكانی ئاگركوژێنەوە بەردەوامن لە هەوڵەكانیان بۆ كۆنترۆڵكردنی ئاگرەكە و هەوڵ دەدەن نەگاتە دارستانە سروشتییە گەورەكان.
وەزیری فریاگوزاری و كارەساتە سروشتییەكانی سوریاش رەوشەكەی بە كارەساتبار و خەمناك وەسفكردووە.
ئادەم عەبدولمەولا رێكخەری نەتەوە یەكگرتووەكان بۆ كاروباری مرۆیی لە سوریا وتویەتی، تیمەكانی رێكخراوەكە لە كەناراوەكانی سوریا بڵاوكراونەتەوە و ئاگرەكەش سەدان خێزانی ناچار كردووە ماڵەكانیان بەجێبهێڵن و روبەرێكی فراوانی زەوی كشتوكاڵی و ژێرخانی زیندووش سوتاون.
تیمی ئاگركوژێنەوەی وڵاتانی توركیا و ئوردنیش چوونەتە پاڵ تیمی بەرگری شارستانی سوریا، بۆئەوەی بە زووترین كات ئاگرەكە كۆنترۆڵ بكرێت.
رێکخراوی جیهانی مافەکانی مرۆڤ "هیومان رایتس وۆچ" رایگەیاند، کە دوایین ئامارە جیهانیەکانی تایبەت بە پەروەردە ئەوە نیشاندەدەن، کە 272 ملیۆن منداڵ و گەنج لە ساڵی 2024دا لە قۆناخی سەرەتایی و ناوەندی بێبەشبوون لە خوێندن.
بەپێی راپۆرتەکە، نزیکەی 200 ملیۆن منداڵ لە دەرەوەی خوێندنی ئامادەیین، کە ئەم ژمارەیە بەراورد بە ساڵی 2023 بە نزیکەیی 21 ملیۆن زیادیکردووە.
رێکخراوەکە ئاماژەی بەوەداوە، کە ئەم ژمارە "شۆککەرە" تەواوی ئامارەکە نییە، چونکە پەیمانگەی یونسکۆ بۆ ئامار و راپۆرتەکانی چاودێریە جیهانیەکانی پەروەردە باس لەوە دەکەن کە لەو ناوچانەدا، کە شەڕی تێدان، 13 ملیۆن منداڵ لە دەرەوەی قوتابخانەن.
رێکخراوەکە ئاماژەی بەوەداوە کە ئەگەر ئامارەکە هەموو ئەو منداڵانە لە خۆ بگرێت کە لە جیهان و لەو ناوچانەی لە شەڕیان تێدایە لە سودان و غەززەوە ، "کۆی گشتی منداڵان دەگاتە نزیکەی 285 ملیۆن".
ژمارەی گیانلەدەستدان بەهۆی لافاوەكەی ویلایەتی تەكساسی ئەمریكاوە بۆ 82 كەس بەرزبووەوە و لانیکەم 52 کەسی دیکە بێسەروشوێنن.
بەهۆی ئەو لافاوەی لە رۆژی هەینییەوە لە ویلایەتی تەکساسی ئەمریکا دەستی پێ کردووە، تاوەکو ئێستا 82 کەس گیانیان لەدەستداوە کە 28یان منداڵن.
بەهۆی لافاوەکەوە 52 کەس بێسەروشوێنن، کە 11 خوێندکاری کچی کەمپێکی هاوینە و راوێژکارێکی کەمپەکە لەناو بێسەروشوێنبووەکاندان.
کەپمەکانی کامپ میستیک یەکێکە لەو خێوەتە هاوینەییانەی خوێندکاران، کە لە وەرزی هاویندا بە هەماهەنگی قوتابخانەکان رێکدەخرێت، بەپێی دوایین ئامارەکان تاوەکو ئێستا 68 گیانلەدەستدان لەو کەمپاندا تۆمارکراوە.
بەهۆی لافاوەکەوە ئاستی ئاوی روباری گوادالوپی ناوەندی تەکساس زیاتر لە هەشت مەتر بەرزبووەتەوە. لەلایەکی دیکەوە شارەزایانی کەشناسیی پێشبینی ئەوە دەکەن شەپۆلی بارانبارینی بەخوڕ و رەشەبای بەهێز زیاتر ببێت و هۆشداریان داوەتە سەرجەم ئەو کەسانەی نیشتەجێی نزیک رووبارەکانن ماڵيکانیان چۆڵ بکەن.
سەرۆكی ئەمریكا راگەیاندنی پارتێكی نوێی سیاسی لە لایەن ئێلۆن مەسكەوە بە گاڵتەجاڕی وەسف دەكات.
دۆناڵد ترەمپ، سەرۆكی ئەمریكا بەر لە گەڕانەوەی لە نیوجرسییەوە بۆ واشنتۆن رەخنەی لە راگەیاندنی پارتێكی سیاسی نوێ لەلایەن ئیلۆن ماسك، هاوپەیمانی پێشووی خۆیەوە گرت و بە گاڵتەجاڕانە وەسفی كرد.
وتیشی، پێیوایە پارتی سێیەم بێ ماناییە، ئاماژەی بەوەشكردووە، سیستمی ئەمریكا هەمیشە دوولایەنە بووە و پێشیوابوو لایەنی سێییەم تەنها سەرلێشواویەوە هیچی دیكە.
ترەمپ راشیگەیاند، مەسك دەتوانێت خۆشی لەوە ببینێت بەڵام لە كۆتاییدا ئەوە هەر گاڵتەجاریەكە.
ئەو پێشهاتانە دوای ئەوە دێت كە ئیلۆن مەسك دامەزراندنی پارتێكی سیاسی نوێی بەناوی پارتی ئەمریكا راگەیاند
سەرۆكی ئەمریكا رایگەیاند، چانسێكی باش هەیە بۆ ئاگربەستی غەززە لەم هەفتەیەدا.
بەپێی هەواڵێكی ئاژانسی رۆیتەرز دۆناڵد ترەمپ، سەرۆكی ئەمریكا رایگەیاندووە، ئەگەرێكی زۆر هەیە لەماوەی ئەم هەفتەیەدا لەگەڵ بزوتنەوەی حەماس بگەنە رێككەوتن.
سەرۆكی ئەمریكا ئاماژەی بەوەشكرد، رێككەوتنێكی لەو شێوەیە بە مانای ئازادكردنی ژمارەیەک بارمتە دێت.
ئەمە لە كاتێكدایە، بڕیارە ئەمڕۆ ترەمپ لە كۆشكی سپی میوانداری بنیامین ناتەنیاهۆ سەرۆك وەزیرانی ئیسرائیل بكات، كە تەوەری سەرەكی كۆبوونەوەكەیان باسكردن دەبێت لەبارەی ئاگربەستی غەززە.
هاوكات، ناتانیاهۆ پێش ئەوەی بەرەو واشنتۆن دی سی بەڕێبكەوێت رایگەیاند، پێیوایە گفتوگۆكردن لەگەڵ دۆناڵد ترەمپ ئەیانگەیەنێت بە ئەنجامێكی باش لەبارەی غەززە.
پێشتر میدیاكانی ئیسرائیل رایانگەیاندبوو، ئەمڕۆ یان سبەینێ ترەمپ ئاگربەستی غەززە رادەگەیەنێت، هەر لە ئەمریكاشەوە ناتانیاهۆ ئیمزای لەسەر دەكات.
سەرۆک وەزیرانی ئیسرائیل دەڵێت: رەنگە کۆبوونەوە لەگەڵ ترەمپ رێگە خۆشکەربێت بۆ گەیشتن بەرێککەوتن لە کەرتی غەززە.
بنیامین ناتانیاهۆ سەرۆک وەزیرانی ئیسرائیل رایگەیاند: ئێمە سورین لەسەر گەڕاندنەوەی بارمتەکان و لەناوبردنی حەماس.
ئاماژەی بەوەشکرد، کۆبوونەوە لەگەڵ ترەمپ لەوانەیە یارمتیدەر بێت بۆ گەیشتن بەرێککەوتن لە غەززە.
بڕیارە سبەینێ ناتانیاهۆ و ترەمپ لە کۆشکی سپی کۆببنەوە و گفتوگۆ لەبارەی رێککەوتنی ئاگربەست لە کەرتی غەززە بکرێت.
سەرۆکی روسیا دەڵێت: بەردەوامی سیاسەتەکانی وڵاتانی رۆژئاوا بەرانبەر بە مۆسکۆ دەرئەنجامی خراپی دەبێت.
ڤلادیمێر پوتن سەرۆکی روسیا لە چاوپێکەوتنێکی تەلەفیزۆنیدا رایگەیاند، ئەو حکومەتانەی رۆژئاوا بە چەک پاڵپشتی ئۆکراین دەکەن، دەرئەنجامی خراپی دەبێت و پێویستە بیر لەوە بکەنەوە پاری گەلەکەیان لە چیدا خەرج دەکەن.
وتیشی، ئامانجی سەرەکی ئۆپراسیۆنە سەربازییەکانمان دژی ئۆکراین داهاتوویەکی پارێزراو و ئاشیانەیە بۆ روسیا.
وڵاتانی رۆژئاوا و ناتۆ لە مانگی شوباتی ساڵی 2022ەوە پشتیوانی ئۆکراینیان کردووە لە شەڕی دژی روسیا، رۆژی شەممە ڤۆلۆدیمیر زیلینسکی سەرۆکی ئۆکراین رایگەیاند، وڵاتەکەی رێککەوتنی لەگەڵ هاوبەشە ئەوروپییەکان و کۆمپانیایەکی بەرگری ئەمریکی ئەنجامداوە بۆ فراوانکردنی بەرهەمهێنانی فڕۆکەی بێفڕۆکەوان.
كارگە تاریكەكان دیاردەیەكی نوێن كە لە وڵاتی چین، كە بە خێرایی پەرە دەسەنن و سەرنجی جیهانیان بۆ لای خۆیان ڕاكێشاوە. ئەم كارگانە بە تەواوی ئۆتۆماتیكین و هیچ مرۆڤێك كاری تێدا ناكات.
ناوی كارگەی تاریك لەوەوە سەرچاوەی گرتووە كە ئەم كارگانە پێویستیان بە ڕووناكی و كارەبا نییە، چونكە ڕۆبۆت و ئامێرە ئۆتۆماتیكەكان بە بێ ڕووناكیش دەتوانن كارەكانیان ئەنجام بدەن. لەم كارگانەدا، نەك گەرمكەرەوە و ساردكەرەوە، تەنانەت دەستشۆر و ژووری پشوودان پێویست نییە.
سیستەمێكی دیجیتاڵی پێشكەوتوو كۆنتڕۆڵی هەموو پرۆسەكان دەكات. هەر بەشێك رۆبۆتێكی جیاواز كاری تێدادەكات- هەندێكیان بەرهەمەكان دروست دەكەن، هەندێكی تر كەرەستەی قورس دەگوازنەوە، هەندێكیی تریش كوالێتی بەرهەمە تەواوبووەكان دەپشكنن. تەنها چەند ئەندازیارێك لە دەرەوەی كارگەكە چاودێری سیستمەكە دەكەن و لە كاتی پێویستیدا چاكسازی تێدا دەكەن.
كارگە تاریكەكان چەندین سوودی گرنگیان هەیە. ئەم كارگانە بە بێ وەستان بەردەوام لە كاردان، تەنانەت بە شەو و بەرۆژ، تەواوی رۆژەكانی هەفتە، ئەمەش رێژەی بەرهەمهێنان لە كارگەكاندا بەرز دەكاتەوە. خەرجییەكان بە شێوەیەكی بەرچاو كەم دەبنەوە، لەبەر نەبوونی پێویستی بە مووچەی كارمەندان و خەرجی ڕووناكی، گەرمكردنەوە و ساردكردنەوە. كوالێتی بەرهەمەكان زۆر بەرزە، چونكە ڕۆبۆتەكان هەڵەی مرۆیی ناكەن. هەروەها مەترسی برینداربوون و ڕووداوەكانی كار روونادات.
سەرەرای ئەم سودانەش، ئەم كارگانە چەند كێشەیەكی گرنگیشی هەیە. گەورەترین كێشە تێچووی دامەزراندنە ، تێچوی دامەزراندنی كارگەیەكی تاریك زۆر گرانە و تەنها كۆمپانیا گەورەكان دەتوانن ئەو وەبەرهێنانە بكەن. سەرەرای ئەمەش، سەرەرای ئەوەش كێشەی كۆمەڵایەتی و ئابووریی دروست دەكات، ملیۆنان كەس هەلی كار لەدەست دەدەن، كە دەتوانێت كاریگەری نەرێنی لەسەر خێزانەكان و كۆمەڵگاكان بەجێبهێڵێت.
چین پێشەنگە لە پەرەپێدانی ئەم تەكنەلۆجیایە و چەندین كۆمپانیای گەورەی چینی خەریكی دروستكردنی كارگەی تاریكن بۆ زیادكردنی بەرهەمهێنان و كەمكردنەوەی خەرجی. وڵاتانی پیشەسازی تریش بە وردی چاودێری ئەم پێشكەوتنە دەكەن و چاوەڕوان دەكرێت لە ساڵانی داهاتوودا كارگەی هاوشێوە دابمەزرێنن.
كارگە تاریكەكان نیشانەیەكی ڕوونن بۆ ئەوەی چۆن تەكنەلۆجیا بە خێرایی شێوازی كاركردن و بەرهەمهێنان جیهان دەگۆڕێت. ئەگەرچی كاریگەرن و قازانجی ئابووری زۆر دەكەن، بەڵام پرسیارە گرنگەكان سەبارەت بە داهاتووی كار و پێویستی دۆزینەوەی هاوسەنگی نێوان تەكنەلۆجیا و پێداویستییە مرۆییەكان بەردەوام لە ئارادان.
بەهۆی شەپۆلێکی بارانبارینی بەخوڕ و زریانەوە لە ویلایەتی تەکساسی ئەمریکا 43 کەس گیانیان لەدەستدا، کە 15یان منداڵن.
دەسەڵاتدارانی ویلایەتەکە رایانگەیاندووە، لافاوێکی بەهێز بەهۆی بارانبارینی بەخوڕ و رەشەباوە دروستبووە و ناوەندی ویلایەتی تەکساسیان گرتووەتەوە.
ئاماژەیان بەوەشکردووە، تیمەکانی فریاگوزاری لە سەرەتای سەرهەڵدانی لافاوەکەوە سەرقاڵی رزگارکردنی هاووڵاتیانن، تاوەکو ئێستا توانیویانە زیاتر لە 850 کەس رزگار بکەن و بیانگوازنەوە بۆ شوێنێکی پارێزراو.
بەپێی ئامارەکان، تاوەکو ئێستا 43 کەس گیانیان لەدەستداوە، کە 15یان منداڵن، جگە لەوەش 27 کچ لە یەکێک لە کەپمە هاوینەییەکاندا بێسەروشوێنن.
فيضانات مدمّرة في #تكساس.. عشرات القتلى والمفقودين#سوشال_سكاي pic.twitter.com/0fgRnWRLS7
— سكاي نيوز عربية (@skynewsarabia) July 5, 2025