جیهان
ئەحمەد شەرع سەرۆكی قۆناغی راگوزەری سوریا گەیشتە سعودیە و لەگەڵ محەمەد بن سەلمان شازادەی جێنشینی ئەو وڵاتە كۆبووەوە.
ئەحمەد شەرع سەرۆكی قۆناغی راگوزەری سوریا یەكەم سەردانی رەسمی بۆ سعودیە بوو كە كاریگەریی گەورەی لەسەر پەیوەندییەكانی سوریا و سعودیە هەیە.
محەمەد بن سەلمان شازادەی جێنشینی سعودیە و ئەحمەد شەرع كۆبوونەوە و پێشهاتەكانی سوریا و پلانەكانی چەسپاندنی ئاسایش و سەقامگیری لەو وڵاتە و پەیوەندی نێوان دیمەشق و ریاز و و هەوڵەكانی لابردنی سزاكانی سەر سوریا تاوتوێكران.
ئەوەش لە كاتێكدایە ، لە چەند رۆژی رابردوودا ئەمیر فەیسەڵ بن فەرحان وەزیری دەرەوەی سعودیە سەردانی سوریای كرد و لەگەڵ ئەحمەد شەرع كۆبووەوە، رۆژی پێنج شەمەش شا سەلمان بن عەبدولعەزیز پاشای سعودیە و محەمەد بن سەلمان جێنشینی ئەو وڵاتە پیرۆزباییان لە ئەحمەد شەرع كرد بە بۆنەی هەڵبژاردنی وەك سەرۆكی قۆناغی راگوزەری سوریا.
بۆ یەكەمجار ترەمپ فەرمانی هێرشكردنە سەر حەشارگەكانی داعشی لە سۆماڵ دا و رایگەیاند، بە كەمترین زیان ژمارەیەكی زۆر چەكدار كوژراون.
دۆناڵد ترەمپ سەرۆكی ئەمریكا، لە پەیامێكدا لە تۆڕی كۆمەڵایەتی ئێكس بڵاویكردەوە، بەهۆی هەڕەشەكانی چەكدارانی داعش بۆسەر ئەمریكا و هاپەیمانەكانی، فەرمانی بە هێرشكردنە سەر ئەو چەكدارانە لە حەشارگەكانی سۆماڵ داوە و ژمارەیەكی زۆریشیان لێكوژراوە.
ترەمپ لە پەیامەكەیدا نووسیویەتی: ماوەیەكی زۆر بوو پلانی هێرشكردنە سەر داعش لە سۆماڵ ئامادە كرابوو، بەڵام جۆ بایدن سەرۆكی پێشووی ئەمریكا و ئیدارەكەی ئەو ئۆپەراسیۆنەیان پشتگوێ خستووە بۆیە لەسەر فەرمانی خۆی هێرشەكان ئەنجام دراون.
سەرۆكی ئەمریكا نووسیویەتی پەیامی ئەوان بۆ داعش و هەموو ئەوانەی هێرش دەكەنە سەر ئەمریكییەكان ئەوەیە كە لە هەرشوێنێك بن دەیان دۆزنەوە و دەیانكوژن.
لە یەكەم سەردانی رەسمیدا بۆ دەرەوەی وڵات، ئەمرۆ ئەحمەد شەرع سەرۆكی قۆناغی راگوزەری سوریا سەردانی سعودیە دەكات .
سەردانەكەی شەرع بۆ ریاز ، یەكەم سەردانە كە لە دوای وەرگرتنی پۆستەكەی وەك سەرۆكی قۆناغی راگوزەر ئەنجامی دەدات و بە وتەی سەرچاوە ئاگادارەكانیش، لەگەڵ لیپرسراوانی سعودیە باس لەم قۆناغەی ئێستا و پشتگیری سعودیە بۆ ئاوەدانكردنەوەی سوریا و هەوڵەكان بۆ هەڵگرتنی سزاكان لەسەر سوریا دەكرێت .
ئەوە لە كاتێكدایە ، لە چەند رۆژی رابردوودا ئەمیر فەیسەڵ بن فەرحان وەزیری دەرەوەی سعودیە سەردانی سوریای كرد و لەگەڵ ئەحمەد شەرع كۆبووەوە ، رۆژی پێنج شەمەش هەریەك لە شا سەلمان بن عەبدولعەزیز و ئەمیر محەمەد بن سەلمان جێنشینی سعودیە پیرۆزباییان لە شەرع كرد بە بۆنەی هەڵبژاردنی وەك سەرۆكی قۆناغی راگوزەری سوریا .
دوای كۆبونەوەی وەزیرانی دەرەوەی شەش وڵاتی عەرەبی لە قاهیرە، لە راگەیەنراوێكدا گواستنەوەی فەلەستینییەكان رەتدەكەنەوە، جەختیش لەسەر ئەوەدەكەنەوە كە لە زووترین كاتدا غەززە ئاوەدانبكرێتەوە.
وەزیرانی دەرەوەی میسر، ئوردن، سعودیە و قەتەر و ئیمارات و فەلەستین و كۆمكاری عەرەبی دوای كۆبونەوەیەك كە لە قاهیرە سەبارەت بە رەوشی فەلەستین و كەرتی غەززە، لە راگەیەندراوێكدا جەختیان لەسەر پێویستی جێبەجێكردنی رێككەوتنی ئاگربەست لە غەززە كردەوە بە هەموو قۆناغ و بڕگەكانی.
ئەوەش هاتووە، بەردەوامبوونی ئاگربەست بە شێوەیەك بێت كە دەستڕاگەیشتن بە هاوكاری مرۆیی بۆ هەموو بەشەكانی كەرتی غەززە و لابردنی هەموو ئاستەنگەكانی بەردەم هاتنە ناوەوەی هەمووان مسۆگەر بكات.
هاوكات شەش وڵاتە عەرەبییەكە، داوای كشانەوەی تەواوەتی هێزەكانی ئیسرائیل دەكەن لەگەڵ رەتكردنەوەی هەر هەوڵێك بۆ دابەشكردنی غەززە، داواش دەكەن پرۆسەی ئاوەدانكردنەوەی كەرتی غەززە، لە زووترین كاتدا بچێتە بواری جێبەجێكردنەوە.
دوێنێ هەینی دەزگای جێبەجێکردنی یاسا لە ئەمریکا FBI شاهێدی یەکێک لە گەورەترین گۆڕانکارییەکان بوو لە مێژووی خۆیدا، کە ئەویش دوور خستنەوەی زیاتر لە چەندین بەرپرسو پلەداری ناو دەزگاکەبوو.
وەزارەتی دادی ئەمریکا ژمارەیەک لە سەرکردە باڵاکانی FBI لە کارەکانیان دوورخستەوە و لێکۆڵینەوەیەکی بەرفراوانی بۆ ئەو کارمەندانە دەستپێکرد کە هاوکاربوون لە لێکۆڵینەوە لە ئاژاوەگێڕییەکانی کاپیتۆڵ لە ساڵی 2021، ئەمەش لە چوارچێوەی هەوڵەکان بۆ دووبارە داڕشتنەوەی دەزگاکانی جێبەجێکردنی یاسا.
بەپێی هەواڵێکی بلومبێرگ، بەرپرسانی باڵای FBI کە بنکەکانیان لە واشنتۆنە و سەرپەرشتی لقەجیاوازەکانی ئاژانسەکە دەکەن و بریکارە باڵاکان کارەکانیان بەجێهێشتووە.
بەپێی هەواڵی ئەو ئاژانسە، هەندێک لە سەرکردەکان فشاریان لێکراوە بۆ ئەوەی ئەو دەزگایە بەجێبهێڵن، هەندێکیان خانەنشین بوونیان هەڵبژارد، هەندێکی دیکەشیان کاتێک بەرەنگاری بڕیارەکە بوونەتەوە دەرکراون.
:دیارترین ئەوکەسانەی کە دەردەکرێن
لەنێو ئەوانەی کە دەزگاکە بەجێدەهێڵن دوو لە سەرکردە باڵاکان هەیە: جێفری ڤێلتری، بریکاری تایبەتی بەرپرس لە میامی و دەیڤید سۆنبێرگ، یاریدەدەری بەڕێوەبەری ئۆفیسی مەیدانی واشنتۆن.
سەرچاوەیەک ئاشکرای کردووە، کە سەرکردەکانی FBIرۆژی هەینی بە کارمەندەکانیان راگەیاندووە، کە هەندێک لە بریکارەکان دووبارە دادەنرێنەوە بۆ هاوکاریکردن لە ئۆپەراسیۆنەکانی ناردنەوەی کۆچەران و جێبەجێکردنی ناردنەوەیان بۆ ئەو شوێنەی لێوەی هاتوون.
رۆژنامەکانی ئەمریکا ئاماژە بەوەدەدەن، ئیدارەی ترەمپ لەم گۆڕانکارییەدا کە لەو دەزگایە ئەنجامی دەدات زیاتر سەرنجیان لەسەر ئەو کەسانەیە کە کارییان لەسەر ئەو هاووڵاتیی و کەسانە کردووە کە لایەنگری ترەمپ بوون بەتایبەت لە هێرشەکەی 6-1-2021 لە واشنتۆن.
بەپێی دوو یاداشت کە ڕۆیتەرز و سێ سەرچاوە بینیویانە، گۆڕانکارییەکان لەو دەزگایە، دوایین هەنگاوی ئیدارەی ترەمپە بۆ دووبارە داڕشتنەوەی سیستەمی دەزگا هەستیارەکان دوای گەڕانەوەی بۆ کۆشکی سپی.
بەرگری شارستانی ئەمریکا رایگەیاند: لە پاش 3 هەفتە لە هەوڵدان، توانرا ئاگرەکەی لۆس ئەنجلۆس بەتەواوی کۆنتڕۆڵبکرێت.
بەرگری شارستانی لە ویلایەتی کالیفۆرنیا لە رۆژئاوای ئەمریکا رایگەیاندووە، ئاگری ناوچەی پالیسایدس کە تیایدا 23 هەزار و 448 دۆنم سوتاوە، لەلایەن تیمەکانمانەوە کۆنتڕۆڵکراو هیچ مەترسییەک نەماوە.
بەرپرسانی بەرگری شارستانی ئاماژەیان بەوەشداوە، ئاگر کەوتنەوەکەی لۆس ئەنجلۆس خراپترین کارەساتی سروشتیە لە مێژووی لۆس ئەنجلۆسدا رویداوە و بەهۆیەوە 180هەزار کەس ئاوارەبوون و ماڵەکانیان جێهێشتووە.
سەبارەت بە ئاماری گیان لە دەستدانی هاووڵاتیان لە راگەیەنراوەکەدا هاتووە: 28 کەس گیانیان لە دەست داوە و 16 هەزار باڵەخانە و خانو سوتاون.
کۆمپانیای AccuWeatherیش کە کۆمپانیایەکی پێشبینی کەش وهەوایە، رایگەیاند؛ پێشبینی دەکات زیانە ئابوورییەکان زیاتر لە 250 ملیار دۆلار بێت.
ئاگرەکە لە 7-1-2025ەوە لە پێنج ناوچەوە دەستی پێکرد و 31مانگ راگەیەندرا کە تەنیا دوو ناوچە ماون کۆنتڕۆڵ بکرێن و ئێستاش تیمەکانی بەرگری شارستانی ئەمریکا سەرکەوتنی تەواویان بەسەر ئاگرەکەدا راگەیاند.
لە ساڵی 2030دا مانگی رەمەزان 36رۆژ دەبێت و ئەمەش بەو واتایە دێت، موسڵمانان بۆ ماوەی 36 ڕۆژ بەڕۆژوو دەبن و هۆکارەکەی دیاردەیەکە کە تەنها 33 ساڵ جارێک ڕودەدات.
ئەم دیاردەیە بۆ رودەدات؟
بەپێی ئاماژەکانی ئەستێرەناسی و ڕۆژمێرەکان، لە ساڵی 2030دا مانگی رەمەزان 36رۆژ دەبێت و ئەمەش بەو واتایە دێت، موسڵمانان بۆ ماوەی 36 ڕۆژ بەڕۆژوو دەبن و هۆکارەکەی دیاردەیەکە کە تەنها 33 ساڵ جارێک ڕوودەدات.
مانگی ڕەمەزان لە 5ی کانوونی دووەمی 2030 دەست پێدەکات و دواتر بۆجاری دووەم ڕەمەزان لە 26ی مانگی 12ـی 2030 دووبارەو دەبێتەوە کە دەکاتە 1452 ساڵی هیجری.
.واتە بەڕۆژوو بوون لە ساڵی 2030 دەبێتە 36 ڕۆژ، 30 ڕۆژ لە سەرەتای ساڵ، 6 ڕۆژیش لە کۆتایی ساڵ.
ئەمرۆ چوارەمین ئاڵوگۆڕی بارمتە و زیندانییانی نێوان حەماس و ئیسرائیل بەڕێوە دەچێت، بزووتنەوەی حەماس سێ بارمتە ئازاد دەکات، لە بەرانبەر ئازادکردنی 183 فەڵەستینی لە زیندانەکانی ئیسرائیلدا
دوێنێ هەینی، ئەبو عوبەیدە، وتەبێژی سەربازی لیواکانی قەسام لە راگەیەندراوێکدا وتی: لە چوارچێوەی رێککەوتنی تۆفانی ئەقسا بۆ ئاڵوگۆڕی زیندانییەکان، بڕیاریان داوە ئەمڕۆ شەممە، یەکی شوباتی 2025، سێ بارمتەی ئیسرائیلی بەناوەکانی "یاردن بیباس، کیس سیگل کە هاوکات خاوەنی ڕەگەزنامەی ئەمەریکی و ئیسرائیلییە و ئۆفەر کالدیرۆن کە خاوەنی ڕەگەزنامەی فەرەنسی و ئیسرائیلییە ئازاد بکات."
لای خۆیەوە نووسینگەی بنیامین ناتانیاهۆ، سەرۆک وەزیرانی ئیسرائیل ڕایگەیاند، لیستی ئەو بارمتانەیان بە دەست گەیشتووە کە لەلایەن حەماسەوە ئازاد دەکرێن.
ئاماژەی بەوەش داوە، وردەکاریی سەبارەت بە ڕێکارەکانی ئاڵوگۆڕکردن دواتر بڵاو دەکرێتەوە.
ڕۆژی پێنجشەممە، لیواکانی قەسام گرتەی ڤیدیۆیی پرۆسەی ڕادەستکردنی قۆناغی سێیەمی بارمتەکانی ئیسرائیلی بڵاو کردەوە، کە سێ بارمتەی ئیسرائیلی لە بەرانبەر ئازادکردنی 110 زیندانی فەڵەستینی ئازاد کران.
وەزیری دەرەوەی ئێران دەڵێت، وڵاتەكەی خوازیارە لاپەڕەیەكی نوێ لەگەڵ ئەمریكا هەڵبداتەوە و ئەوەش پێویستی بە دروستبوونی متمانەیە كە لەسەر دەستی ترەمپ چاوەڕوان نەكراوە.
عەباس عراقچی وەزیری دەرەوەی ئێران رایگەیاند، واشنتۆن و تاران مێژوویەكی دورودرێژیان لە ناكۆكی و ململانێ هەیە تا ئاستێك گەیشتووەتە دوژمنایەتی و ئەوەش بە كوژرانی قاسم سولەیمانی و كشانەوەی ئەمریكا لە رێككەوتنی ئەتۆمیی و هێرشكردنە سەر پێگەكانی ئێران زیاتر دەركەوتووە.
وتیشی، سەرەڕای هەموو ناكۆكییەكان، ئێران خوازیارە لاپەڕەیەكی نوێی لەگەڵ ئەمریكا بكاتەوە، بۆ ئەو مەبەستەش پێویستە واشنتۆن متمانەی تاران بەدەستبهێنێت و لە ئێستاشدا هەنگاوی لەو شێوەیە لە ئیدارەی نوێی ئەمریكا بە سەرۆكایەتی دۆناڵد ترەمپ بەدی نەكراوە و چاوەڕوانی ئەوەش ناكرێت.
وەزیری دەرەوەی ئێران ئاماژەی بەوەشكردووە، "ئەمریكا بڕێكی زۆر لە پارە و داهاتەكانی ئێرانی بلۆك كردووە و بڕیابوو بە پێی رێككەوتنەكان ئەو پارانە رادەست بكاتەوە، بەڵام بە پێچەوانەی پابەندبوونی ئێران و رێككەوتنەكان، هیچ بڕە پارەیەكی بلۆككراو ئازاد نەكراوە، بۆیە تەنها بە قسە متمانە لە نێوان تاران و واشنتۆن دروست نابێت".
وەتس ئەپ بڵاویکردەوە کۆمپانیایەکی ئیسرائیلی بەمەستی سیخوڕیکردن بەسەر بەکارهێنەرانییەوە هەوڵی هاککردنی داوە.
ئاژانسی رۆیتەرز لە زاری سەرچاوەیەکی باڵای وەتس ئەپەوە بڵاویکردەوە کۆمپانیای " پاراگۆن سۆڵۆوشن" بەمەبەستی سیخوڕی کردن بەسەر ژمارەیەک لە بەکارهێنەرانییەوە هەوڵی هاککردنی داوە و لە لایەن تیمەکانیانەوە رێگری لێکراوە.
ئەو سەرچاوەیە بە رۆیتەرزی وتووە: ئەوان دەزگای جێبەجێکردنی یاسا و هاوبەشەکانیان ئاگادارکردووەتەوە سەبارەت بەو هاککردنەی کە کۆمپانیا ئیسرائیلییەکە ئەنجامیداوە و وەستاندویانە.
سەرچاوەکە سەبارەت بە ناسنامەی ئەو کەسانەی ئەو دەزگا ئیسرائیلییە هەوڵی هاککردنی داون، وتی: رۆژنامەنووسان و ئەندامانی کۆمەڵگەی مەدەنی کردووەتە ئامانج و ژمارەیان 90 بەکار هێنەر دەبێت، وتیشی؛ ئێمە بەکار هێنەرانمان دەپارێزین و وەتس ئەپ جێگەی متمانەی بەکار هێنەرانییەتی.
لێپرسراوێكی ئەمریكا دەڵێت هەڕەشەكانی ترەمپ بۆ سەر گروپە چەكدارەكانی عێراق جددین و ئەگەری دەستوەردانی سەربازییش هەیە.
گابرێل سۆما ئەندامی ئەنجومەنی راوێژكارانی دۆناڵد ترەمپ سەرۆكی ئەمریكا لە چاوپێكەوتنێكی تەلەفزیونیدا رایگەیاند، ترەمپ لە هەوڵی كۆتاییهێنانە بە پێگە و دەسەڵاتی ئێران لە رۆژهەڵاتی ناوەڕاست و دەیەوێت كاریگەری ئێران بە تەواوی لە ناوچەكە نەهێڵێت.
وتیشی، هەڕەشەكانی ترەمپ لە گروپە چەكدارەكانی عیراق جدین و ئەگەر محەمەد شیاع سودانی سەرۆك وەزیرانی عیراق نەتوانێت ئەو گروپە چەكدارانە رابگرێت، دوور نیە ترەمپ بڕیاربدات بۆ دەستوەردانی سەربازیی بە مەبەستی چارەسەركردنی ئەو كێشەیە بەشێوەیەكی ریشەیی.
سەبارەت بە رەوشی سوریاش راوێژكارەكەی ترەمپ رایگەیاند، رەوشی سوریا سەختتر و ئاڵۆزترە و ئەو وڵاتە دابەش بووە، یەكخستنیشی ئەستەمە و حكومەتی نوێ توانای ئەو كارەی نییە، وتیشی، هیچ زانیارییەكیان لەسەر داهاتووی سوریا نییە.
دوای كۆتاییهاتنی قۆناغی یەكەمی ئاگربەست، ناتانیاهۆ ئامادەكاری بۆ قۆناغی دووەمی ئاگربەست دەستپێكردووە.
میدیاكانی ئەمریكا بڵاویانكردەوە، بنیامین ناتانیاهۆ سەرۆك وەزیرانی ئیسرائیل سیناریۆیەك بۆ قۆناغی دووەمی ئاگربەست تاوتوێ دەكات و ئامادەكاریشی كردوە بۆئەوەی لە هەر ساتێكدا بێت سوپای وڵاتەكەی بگەڕێتەوە بۆ غەززە و شەڕ دەستپێدەكاتەوە.
ئەوەش لە كاتێكدایە، كە ستیڤ ویتكۆف نێردەی تایبەتی ترەمپ لە رۆژهەڵاتی ناوەڕاست سەردانی ئیسرائیل دەكات وەك ئامادەكارییەك بە مەبەستی سەردانی رەسمی ناتانیاهۆ بۆ واشنتۆن لە هەفتەی داهاتوودا.
ئاماژە بەوەشكراوە، ئاگربەست لە كەرتی غەززە لە قۆناغەكانی داهاتوودا روبەڕوی ئاستەنگی جددی دەبێتەوە، كە بڕیارە لە دوو قۆناغەكەی تردا 30 ئیسرائیلی دیكە بەرامبەر بە هەزار و 600 فەلەستینی ئازاد بكرێن.
رۆژی پێنج شەممە، قۆناغی سێیەمی كاروانی یەكەمی ئاڵوگۆڕی بارمتە و زیندانییەكان لە نێوان حەماس و ئیسرائیل كۆتاییهات كە 8 بارمتە بەرامبەر بە 110 زیندانی فەلەستینی ئازادكران.
سەرۆكی ئەمریكا رایدەگەیەنێت، لە داهاتوویەكی نزیكدا بڕیار لەبارەی چارەنووسی هێزەكانی وڵاتەكەی دەدات لە سوریا.
دۆناڵد ترەمپ سەرۆكی ئەمریكا رایگەیاند، بەهیچ شێوەیەك دەست لە كاروباری سوریا وەرنادەن و ئەو سەرلێشێواویەی لەوێ هەیە پەیوەندی بە ئەوانەوە نییە و پێویستیان بەوە نییە ئەمریكا ببێتە بەشێك لە سوریا.
ترەمپ پرسیاری كشانەوەی لە سوریا لێكرا و وتی، نازانێت كێ ئەو قسەیەی كردووە، بەڵام لە داهاتوویەكی زۆر نزیكدا بڕیار لەسەر ئەو بابەتە دەدەن.
ئەوەش لەكاتێكدایە، ئەمریكا لە چەند مانگی رابردوودا 900 سەربازی تری بۆ سوریا نارد و لە ئێستاشدا دوو هەزار سەربازی ئەمریكا لە سوریا جێگیركراون بە مەبەستی بەرەنگاربوونەوەی پاشماوەكانی داعش.
فەرماندەیی ناوەندی هێزەكانی ئەمریكا كوژرانی سەركردەیەكی داعشی لە سوریا راگەیاند.
فەرماندەیی ناوەندی هێزەكانی ئەمریكا ناسراو بە سێنتكۆم لە راگەیەنراوێكدا ئاماژەی بەوەكرد، لە ئۆپراسیۆنێكی ئاسمانیدا محەمەد سەڵاح زوبەیر لێپرسراوی ئۆپراسیۆنی گروپی تیرۆریستی حوراسەت ئەلدینی سەر بە داعشیان لە باكوری رۆژئاوای سوریا كوشتووە.
دەشڵێت، ئەو ئۆپراسیۆنە لە چوارچێوەی پابەندییەكانی ئەمریكا و هێزە هاوبەشەكانە بۆ لاوازكردنی توانای گروپە تیرۆریستییەكان و نەهێشتنی مەترسی لەسەر ئەمریكا و هاوبەشەكانی لە ناوچەكە.
مایكڵ كوریلا فەرماندەی فەرماندەیی سێنتكۆم رایگەیاند، ئەمریكا بەردەوام دەبێت لە كوشتن و دەستگیركردنی تیرۆریستان و بەرگری لە وڵاتەكەی دەكات و رێگە نادات ئەو تیرۆریستانە ئەمریكا و هاوپەیمانەكانی بكەنە ئامانج.
فڕۆکەخانەی نێودەوڵەتیی رۆناڵد رەیگن؛ کە بەرەبەیانی ئەمڕۆ پێنج شەممە، تیایدا فڕۆکەیەکی نەفەر هەڵگر و هێلیکۆپتەرێکی سەربازی خۆیان بەیەکدا کێشا، دەکەوێتە نزیک پایتەختی ئەمریکا و بەیەکێک لە کاراترین فڕۆکەخانەکان دادەنرێت، ئەمە چەند خاڵێکی گرنگە لەسەر ئەو فڕۆکەخانەیە کە ڕەنگە نەتبیستبێت:
1-ساڵی دروستکردنی: فڕۆکەخانەکە لە ساڵی 1941 بە ناوی فڕۆکەخانەی نیشتمانی واشنتۆن کرایەوە. دواتر لە ساڵی 1998ناوەکەیان گۆڕی بۆ "فڕۆکەخانەی نێودەوڵەتیی رۆناڵد رەیگن"وەک رێزێک بۆ چلەمین سەرۆکی ئەمریکا.
2-ریزبەندی: لە رووی هاتوچۆی سەرنشینەکانەوە، یەکێکە لە قەرەباڵغترین فڕۆکەخانەکانی ئەمریکا، بە بەردەوامی لە ریزبەندی 30-40 قەرەباڵغترین فڕۆکەخانەکاندایە.
3-نزیکی لە پایتەخت: ئەم فڕۆکەخانەیە تەنها 8 کم لە واشنتۆنەوە دوورە، بە نزیکترین و گەورەترین فڕۆکەخانە دادەنرێت لە ناوەندی پایتەختەوە، ئەمەش وایکردووە بۆ بەرپرسانی حکومی و بازرگانان فڕۆکەخانەیەکی پەسەند بێت.
4- روداوی نەخوازراو: لە پێش ئەم ڕوداوەی ئەمڕۆ پێنج شەممە، رۆژی 13ـی کانوونی دووەمی 1982 فڕۆکەیەکی جۆری بوئینگ 737-222 بەهۆی سەختی کەشوهەواوە کەوتە خوارەوە و لەو روداوەشدا 78کەس بونە گیانیان لەدەستدا.
تا ئێستاش هۆکاری سەرەکی روداوەکە دیار نییە و دەزگا ئەمنییەکان لە لێکۆڵینەوە بەردەوامن و دۆناڵد ترەمپ، سەرۆکی ئەمریکاش بە گومانەوە لە روداوەکەی روانیوە.
دۆناڵد تڕەمپ رایگەیاند، "بە روداوی پێکدادانی نێوان فڕۆکە نەفەرھەڵگرەکە و ھیلیکۆپتەرە سەربازییەکە لە واشنتۆن تووشی شۆک بووین".
دۆناڵد تڕەمپی سەرۆکی ئەمریکا رایگەیاند، روداوەکە توشی شۆکی کردووە و لە نزیکەوە چاودێری پیشھاتەکانی دەکات، ھەروەھا نزا دەکات لە پێناو رزگارکردنی سەرجەم سەرنشین و ستافەکە.
دۆناڵد ترەمپ لە ھەژماری خۆی لە تۆڕی کۆمەڵایەتی "Truth Social" پرسیاری ئەوەی کردووە: "بۆچی تاوەری چاودێری بە ھیلیکۆپتەرەکە نەگوتووە چی بکات لەبری ئەوەی بپرسێت کە ئایا فڕۆکەکەی بینیوە یان نا؟".
جەختی لەوەش کردووەتەوە، دەتوانرا ڕێگریی لەو ڕووداوە بکرێت. دەشڵێت: دۆخەکە باش نییە.
پێشتر ئیدارەی فڕۆکەوانی فیدراڵیی ئەمریکا ڕایگەیاندبوو کە فڕۆکەیەکی نەفەرھەڵگر لە جۆری " Bombardier CRJ - 700" سەربە کۆمپانیای "American Airlines " بە 60 سەرنشین و چوار کەس لە سفاتی فڕۆکەکە، لە کاتی نزیکبوونەوەی لە ڕێرەوەی ژمارە ٣٣ لە فڕۆکەخانەی رۆناڵد ریگان لە نزیک واشنتۆن خۆی بە ھێلیکۆپتەرێکی سەربازییدا کێشاوە.