جیهان
شەپۆلێكی بەهێزی بەفربارین رۆژئاوای ژاپۆنی گرتوەتەوە و دوورگەیەكی لە رۆژئاوای وڵاتەكە داپۆشیوە.
بەپێی گرتە ڤیدیۆكان كە بڵاوكراونەتەوە، تەواوی خانوو و ئۆتۆمبێل و كۆڵانەكان لە شاری هۆكایدۆی ژاپۆن داپۆشراون، تیمەكانیش بەردەوامن لە پاككردنەوەی شەقامەكان و كردنەوەی رێگا سەرەكییەكان.
ڕاپۆرتەكان ئاماژە بەوە دەكەن كەمترین ئاستی بەفر لە شارەكەدا 120 سانتیمەترە، بەڵام بە گشتی زیاتر لە چوار مەتر بەفر لە شەقام و كۆڵانەكاندا كەڵەكە بووە. پێشبینی ئەوەش كراوە ژمارەیەكی زۆر لە هاوڵاتیان لەناو ئۆتۆمبێل و شوێنە داخراوەكاندا گیریان خواردبێت.
دەزگای كەشناسی ژاپۆن پێشبینی كردووە، لە ماوەی 20 سەعاتی داهاتوودا بەفرێكی زیاتر لە دوورگەی هۆكایدۆ و باكووری ڕۆژئاوای ژاپۆن ببارێت.
وەزیری دەرەوەی فەڕەنسا رایگەیاند، كورد تاكە گەرەنتییە لە سوریا بۆ سنوورداركردنی زیندوونەبوونەوەی داعش.
ژان نۆئێل بارۆ وەزیری دەرەوەی فەڕەنسا لە پەرلەمانی وڵاتەكەی وتارێكی پێشكەش كردو رایگەیاند، سوپاسیان بۆ كوردەكانی عیراق و سوریا هەیە،وتیشی، كورد هاوپەیمانی دڵسۆزیانە، دەستبەردارییان نابن.
راشیگەیاند، تەنها كوردەكان هاوپەیمانیان بووە لە رووبەربوونەوەی تیرۆستانی داعش، كورد تاكە گەرەنتییە لە سوریا بۆ سنوورداركردنی زیندوونەبوونەوەی داعش.
ئاماژەی بەوەشكرد، لەگەڵ روخانی ئەسەد كوردەكان وتویانەیە بەشداری تەواوەتی حكومەتی داهاتوی سوریا بكەن. وتیشی، پەیوەندیان بە توركیا و دەسەڵاتە نوێیەكانی دیمەشقەوە كرد بۆ وەستاندنی شەڕ و دەستوەردان لە كاروباری كۆبانی.
راشیگەیاند، كوردەكان بەشداری لە كۆنفرانسی نێودەوڵەتیی سوریا دەكەن كە لە 13ی شوباتی هەفتەی داهاتوو لە پاریس بەڕێوەدەچێت.
دۆناڵد ترەمپ سەرۆكی ئەمریكا پێشنیاری ئەوە دەكات، ئەمریكا دەست بەسەر كەرتی غەززەدا بگرێت و بیكات بە ریڤێرای رۆژهەڵاتی ناوەڕاست.
ترەمپ لە میانی كۆنفرانسێكی رۆژنامەوانیدا لەگەڵ بنیامین ناتانیاهۆ لە كۆشكی سپی وتی، ئەمریكا كۆنترۆڵی كەرتی غەززە دەكات و دەبێتە خاوەنی.
دووپاتیشیكردەوە، گەورەترین پشتیوانی لە رۆژهەڵاتی ناوەڕاستدا هەیە بۆ جێبەجێكردنی پلانەكە، ئەوەش فشارەكانی سەر میسر و ئوردن زیاد دەكات بۆ وەرگرتنی ئاوارەكانی غەززە.
پلانەكەی ترەمپ خۆی دەبینێتەوە لە نیشتەجێكردنی دانیشتوانی كەرتی غەززە لە وڵاتانی دیكە و پاككردنەوەی شارەكە بە تەواوی و دووبارە بنیاتنانەوەی.
لای خۆیەوە بنیامین ناتانیاهۆ ستایشی پلانەكەی ترەمپی كرد و دووپاتیكردەوە، ئەو هەنگاوە دەتوانێت مێژوو بگۆڕێت و رووخساری رۆژهەڵاتی ناوەڕاست نوێ بكاتەوە.
دوورگەی ریڤێرا دەكەوێتە كەنارەكانی دەریای ناوەڕاست لە باشووری ڕۆژهەڵاتی فەرەنسا، هەریەك لە كرواتیا، سلۆڤینیا و ئیتاڵیاش خاوەنی دوورگەی تایبەت بەخۆیانن بەناوی ریڤێرا.
دۆناڵد ترەمپ ئیمزای لەسەر بڕیاری رێگریی لە ئێران كرد بۆ ئەوەی ببێت بە خاوەن چەكی ئەتۆمی.
دۆناڵد ترەمپ سەرۆكی ئەمریكا دوای ئیمزاكردنی بڕیارەكە رایگەیاند، تاران نزیكە لەوەی ببێت بە خاوەن چەكی ئەتۆمی، بۆیە لە رێگەی ئیمزاكردنی ئەو بڕیارەوە رێگریی لێدەكەن.
هاوكات ترەمپ سزای بەسەر كەرتی نەوتی ئێراندا سەپاند و رایگەیاند، بە مافی خۆیانی دەزانن رێگری لە فرۆشتنی نەوتی تاران بكەن.
ساڵی 2018 ئەمریكا لەسەر فەرمانی ترەمپ لە رێككەوتنی ئەتۆمیی كشایەوە و توندترین سزای دژی كەرتی نەوت و سەرچاوەكانی داهاتی ئێران سەپاند و هەناردەی نەوتی وڵاتەكەی لە دوو ملیۆن و 400 هەزار بەرمیلی رۆژانەوە بۆ 400 هەزار بەرمیلی رۆژانە كەمكردەوە و داهاتی ساڵانەی نەوتەكەشی لە 113 ملیارد دۆلارە بۆ 13 ملیار دۆلار دابەزاند.
رەجەب تەیب ئەردۆغان سەرۆك كۆماری توركیا و ئەحمەد شەرع سەرۆكی قۆناغی راگوزەری سوریا لە ئەنقەرە كۆبوونەوە و گفتوگۆیان لەبارەی پەیوەندییەكانی نێوان هەردوو وڵات و دوایین پێشهاتەكانی سوریا و ناوچەكە كرد.
لەدوای كۆبوونەوەكەش، لە كۆنفرانسێكی رۆژنامەوانی هاوبەشدا، ئەردۆغان رایگەیاند، وڵاتەكەی پشتیوانی سوریا دەكات و هاوكار دەبێت بۆ بنیادنانەوەی.
وتیشی، هەڵوێستی توركیا نەگۆڕە بەرامبەر یەكپارچەیی خاكی سوریا، داواشیكرد، وڵاتانی رۆژئاوا گەمارۆكانیان لەسەر سوریا هەڵگرن.
لەبەرانبەردا، ئەحمەد شەرع هەوڵەكانی توركیای بۆ سەرخستنی قۆناغی راگوزەر لە سوریا بەرز نرخاند و رایگەیاند، پەیوەندییەكان لەگەڵ توركیا لەسەرجەم بوارەكاندا بەرەوپێش دەبەن، بانگهێشتی ئەردۆغانیشی كرد، بۆ دیمەشق.
پۆلیسی سوید رایگەیاند، كەسێك لە نزیك ستۆكهۆڵمی پایتەخت لە ناوەندێكی پەروەدەیی تەقەی كردووە و 10 كەس كوژراون و پێنج كەسیش برینداربوون.
پۆلیسی سوید رایگەیاند، سەعات پێنجی ئێوارە لە شاری ئۆریبرۆ نزیك ستۆكهۆڵمی پایتەختی سوید كەسێك لە ناوەندێكی پەروەردەیی تەقەی لە خوێندكارەكانی ئەو ناوەندە كردووە و لە ئەنجامدا 10 كەس كوژراون و پێنجی تریش برینداربوون.
دەشڵێت، تەقەكەرەكەش كوژراوە و ئەو رووداوە بە كردوەیەكی تیرۆرستی مامەڵەی لەگەڵدا ناكەن و لە هۆكارەكانی ئەو رووداوە دەكۆڵنەوە.
پۆلیس وتیشی، ژمارەی بریندارەكان لە زیادبوندایە و یەكێك لە بریندارەكان تەندروستی ناجێگیرە و چوار لە بریندارەكان نەشتەرگەرییان بۆ دەكرێت.
سەید ئەحمەد غەزالی، سەرۆکوەزیرانی پێشووتری جەزائیر، لە نەخۆشخانەی عەین نادجەی سەربازیی لە پایتەخت، لە تەمەنی 88 ساڵیدا کۆچی دوایی کرد.
غەزالی لەماوەکانی رابردودا، پێش ئەوەی لە حوزەیرانی 1991 تا 8ی تەمموزی 1992، وەک سەرۆک وەزیران دەستنیشان بکرێت چەندین پۆستی وەزاری هەبووە، گرنگترینیان وەزیری وزە و وەزیری دەرەوە بوون.
رۆژنامەی هەواڵی جەزائیری نووسیویەتی، غەزالی کۆچکردوو، لە ژیانی سیاسی جەزائیردا وەک ناوێکی دیار و دەنگێکی وردی شیکاری، بەتایبەتی لەبواری کەرتی نەوتدا دەمێنێتەوە.
بڕیارە ئەمڕۆ دۆناڵد ترەمپ و بنیامین ناتانیاهۆ، لە واشنتۆن کۆببنەوە و باس لە پرسی بەردەوامی ئاگربەستی غەززە و ئاسایی کردنەوەی پەیوەندی نێوان ئیسرائیل و سعودییە بکەن.
میدیا جیهانییەکان بڵاوییانکردەوە: وا بڕیارە ئەمڕۆ سێشەممە، ناتانیاهۆ سەردانی ئەمریکا بکات و وەک یەکەم سەرۆکی ئەوروپی، چاوی بە دۆناڵد ترەمپ بکەوێت.
ئامانجی دانوستانەکانی نێوان هەردوولا، ڕێکخستنی خولێکی نوێی دانوستان نێوان ئیسرائیل و حەماسە، سەبارەت بە درێژەدان بە ئاگربەست لە کەرتی غەززە.
هەروەها ڕاپۆرتە میدیاییەکان ئاماژەیانبەوەکردووە، ترەمپ و ناتانیاهۆ هەوڵی ڕێککەوتنێک دەدەن بە ئامانجی ئاساییکردنەوەی پەیوەندییەکانی نێوان ئیسرائیل و سعوودیە.
ژمارەیەك لە وڵاتانی عەرەبی لە رێی نامەیەكی هاوبەشەوە كە ئاراستەی ئەمریكایان كردووە، پلانی گواستنەوەی فەلەستینییەكان لە كەرتی غەززە رەتدەكەنەوە .
پێگەی ئەكسیۆس لە زاری دوو سەرچاوەی ئاگادارەوە بڵاویكردووەتەوە، وەزیرانی دەرەوەی پێنج وڵاتی عەرەبی كە هەریەك لە سعودیە و ئیمارات و قەتەر و میسر و ئوردنن لەگەڵ راوێژكاری سەرۆكی فەلەستین، نامەیەكی هاوبەشیان ئاراستەی ماركۆ رۆبیرۆ وەزیری دەرەوەی ئەمریكا كردووە و تێیدا پلانەكەی دۆناڵد ترەمپ سەرۆكی ئەمریكایان بۆ گواستنەوەی فەلەستینیەكان لە كەرتی غەززە رەتكردووەتەوە و داوایان كردوە فەلەستینییەكان بەشدارییان پێ بكرێت لە ئاوەدانكردنەوەی غەززەدا نەك ئاوارە بكرێن .
هەروەها رایانگەیاندووە، رۆژهەڵاتی ناوەڕاست زۆرترین ژمارەی ئاوارە و پەنابەری تێدایە و بۆیە نابێت هێندەی تر سەقامگیری هەرێمیی لە رێی ئاوارەبوونی زیاترەوە تێك بدرێت.
دوپاتیشیان كردووەتەوە كە فەلەستینیەكان نایانەوێت خاكەكەیان جێبهێڵن .
بەهۆی زیادبوونی ئەم نەخۆشیە لە جیهاندا و مەترسیەکانی، رۆژی چواری شوباتی هەموو ساڵێک تایبەت کراوە بە رۆژی جیهانی شێرپەنجە و لەم رۆژەدا ناوەندە پزیشکییەکان لە سەرجەم وڵاتان، چەندین چالاکی جۆراوجۆر دەربارەی ئەم نەخۆشیە ئەنجامدەدەن.
شێرپەنجە چییە؟
شێرپەنجە لەرووی پزیشیکەوە بە (cancer) ناسراوە، بەهۆی گەشەی خانەکانەوە بەشێوەیەکی خێرا و نائاسایی بڵاودەبێتەوە، کە پێی دەڵێن (malignant cancer) و خانەکانی چواردەوری تێکدەشکێنێت و لە لەشدا تەشەنەدەکات.
لە جیهاندا زیاتر لە 100 جۆری شێرپەنجە دیاریکراون، کە دەتوانن هەموو بەشێکی جەستە بگرنەوە و بەپێی ئەو شوێن و خانەیەی سەرەتا لێی دەردەکەون ناودەبرێن.
خانە شێرپەنجەییەکان بەوە ناسراون بەبێ کۆنتڕۆڵ دابەشدەبن و زۆردەبن، هەندێکیان ماددەگەلی شێوەی هۆڕمۆنی دەردەدەن و پێکهاتە و فرمانی جەستە تێکدەدەن، هەندێکیشیان کاتێک لە شوێنێکی جەستە دروستدەبن، خانەکانی نزیکی خۆیان داگیردەکەن و بڵاودەبنەوە.
جۆرەکانی شێرپەنجە
شێرپەنجە بەپێی ئەو شوێنەی کە تێیدا دروستدەبێت، ناودەنرێت و چەند جۆرێکی جیاوازی هەیە و لە خانمان و پیاواندا جۆرە باوەکانی شێرپەنجە جیاوازن.
باوترین جۆرەکانی شێڕپەنجە لە خانماندا:
باوترین ئەو جۆرانەی شێرپەنجەی کە لە خانماندا هەن یەک لەدوای یەک بریتین لە شێرپەنجەی مەمک، سییەکان، گەدە، کۆڵۆن و ملی منداڵدان.
باوترین جۆرەکانی شێڕپەنجە لە پیاوان:
باوترین ئەو جۆرانەی شێرپەنجەی کە لە پیاواندا هەن یەک لەدوای یەک بریتین لە شێرپەنجەی سییەکان، گەدە، جگەر، کۆڵۆن، رێکە و سورێنچک.
هۆکارەکانی تووشبوون بە شێرپەنجە:
1- جگەرە
جگەرەکێشان گەورەترین هۆکاری تووشبوون بە شێرپەنجەیە، بەوەی حه‌وت هه‌زار مادده‌ی كیمیایی له جگه‌ره‌داهه‌ن، كه 70 یان رێگە بۆ تووشبوون به شێرپه‌نجه خۆشدەکەن.
2- نەخۆشییە ڤایرۆسییەکان
ڤایرۆسەکانی وەک HPV کە دەبێتە هۆی تووشبوون بە شێرپەنجەی ملی منداڵدان، هەروەها ڤایرۆسی جگەر HBV وHCV کە تووشی جگەر دەبن، دەبنە هۆی بەشەمێبوون و شێرپەنجەی جگەر.
3- قەڵەوی و شێوازی ژیان
كۆمه‌ڵه‌ی شێرپه‌نجه‌ی ئه‌مریكی ده‌ڵێت 33%ی حاڵه‌ته‌كانی شێرپه‌نجه به‌هۆی خۆراكی ناته‌ندروست، ناچالاكی جه‌سته‌یی و قه‌ڵه‌وین.
ئاژانسی شێرپەنجەی سەر بە رێکخراوی تەندروستیی جیهانی پێشبینیی کردووە، تاوەکو ساڵی 2050 ژمارەی تووشبووان بە شێرپەنجە بەرزببێتەوە بۆ 33 ملیۆن تووشبوو. لە کاتێکدا لە ساڵی 2022 ژمارەی تووشبووان گەیشتبووە 20 ملیۆن کەس.
بەپێی ئاماری وەزارەتی تەندروستی لە ساڵی رابردوودا تەنیا لە پارێزگای سلێمانی، سێ هەزار و 310 کەس بە تووشبووی جۆرە جیاوازەکانی شێرپەنجە دەستنیشانکراون، لەو ژمارەیەشدا 201 یان منداڵ.
هاوسەرۆكی دەم پارتی دەڵێت، دەسەڵات لە بری هەنگاوی باوەڕپێكراو قەیوم دادەنێت، بەوەش گورز لە پرۆسەی ئاشتی دەدات.
تولای حاتەم، ئۆغۆلاری هاوسەرۆكی پارتی یەكسانی و دیموكراسیی گەلان"دەم پارتی"رایگەیاندوە، ئامادەن درێژە بە پرۆسەی ئاشتی بدەن، وەك دەم پارتیش ئامادەن بۆ دانوستان و دیالۆگ، بەڵام هێشتا بەرنامەیەكی چارەسەر لەلایەن دەسەڵاتەوە دیاری نەكراوە، هێشتا هەنگاوێكی ئەرێنی نەهاویشتووە، داوا لە دەسەڵاتی توركیاش دەكات هەنگاوی باوەڕپێكراو بۆ ئەو پرۆسەیە بنێت.
ئاماژەی بۆ ئەوەشكردووە، دەسەڵات لەبری هەنگاوی باوەڕپێكراو و ئەرێنی بنێت، قەیوم لە شارەوانییەكان دادەنێت، بەوەش گورز لە پرۆسەی ئاشتی دەدات، پێویستە دەسەڵات و دەوڵەت هەنگاوی روون بنێن.
سەبارەت بە سوریاش هاوسەرۆكی دەم پارتی دەڵێت، پێویستە سوریایەكی دیموكراتی دابمەزرێنرێت، توركیا و گروپە چەكدارەكان دەستبەجێ هێرشەكانی سەر ڕۆژئاوا و گەلی كورد بوەستێنن.
لەپاش لێدوان و بڕیارە بەردەوامەکانی ترەمپ دژ بە چین و سەپاندنی باج بەسەر هاوردەکردنی کاڵا چینیەکاندا، ئەو وڵاتە لەلای خۆیەوە بە باجدانان لەسەر کاڵا ئەمریکییەکان بەرپەرچی دۆناڵد ترەمپ سەرۆکی ئەمریکا دەداتەوە و بە هەنگاوی "تۆڵە سەندنەوە" ناوی دەبات.
ماڵپەڕی "بی بی سی"بەریتانی بڵاویکردەوە، پەکین ڕایگەیاندووە: کە وەک تۆڵەسەندنەوە 15% باج بەسەر بەرهەمە ئەمریکییە هاوردەکراوەکانی وەک خەڵوز و غازی سروشتی شل دەسەپێنێت و راشیدەگەیەنێت؛ نەوتی خاو، ئامێری کشتوکاڵی، ئۆتۆمبێلی بزوێنەر گەورەش ڕووبەڕووی باجی %10 دەبێتەوە.
ئەم ڕاگەیاندنە دوای ماوەیەکی کەم لە بریارەکانی ترەمپ دێت بۆ سەپاندنی باج بە ڕێژەی 10% لەسەر چین.
كرملن رایدەگەیەنێت، روسیا بەردەوامە لە گفتوگۆكانی لەگەڵ ئیدارەی نوێی سوریا لەبارەی چارەنوسی بنكە سەربازییەكانی لەو وڵاتە.
سەرۆكایەتی روسیا كە بە كرملن ناسراوە لە راگەیەندراوێكدا دەڵێت، گفتوگۆكان چەند تەوەرێك لەخۆدەگرن كە لەنێویاندا چارەنوسی بنكە سەربازییەكانە كە بەلای مۆسكۆوە چارەنووسسازن.
هەفتەی رابردوو میخائیل بۆگدانۆف جێگری وەزیری دەرەوەی روسیا سەردانی سوریای كرد و لەگەڵ ئیدارەی نوێی دیمەشق كۆبووەوە.
روسیا ماوەی چەندین ساڵە بنكەی ئاسمانی حەمیمیم و بنكەی دەریایی لە تەرتوس لە لازقیەی سوریا دامەزراندووە كە لە رێگەیانەوە هاوكاری رژێمی پێشووی بەشار ئەسەدیان دەكرد، بەڵام لە ئێستادا چالاكی ئەو دوو بنكە سەربازییە راگیراوە و چارەنووسیان لە ئیدارەی نوێی سوریا نادیارە.
لە مۆسکۆ تەقینەوەیەک لە ناو ئاسانسوارێکدا رویداو بەهۆیەوە 5 کەس بوونە قوربانی.
ئاژانسەکانی هەواڵی ڕوسیا بە پشتبەستن بە سەرچاوە فەرمییەکانی ئەو وڵاتە بڵاویانکردەوە، بەهۆی تەقینەوەیەکەوە لە مۆسکۆ، کەسێک کوژراوە و چوار کەسیش برینداربوون.
تیمەکانی فریاکەوتن پشتڕاستیان کردەوە کە "ئامێرێکی نەناسراو لەناو ئاسانسواری باڵەخانەیەکدا" لە باکووری ڕۆژئاوای مۆسکۆ تەقیوەتەوە و بەهۆیەوە کەسێک گیانی لەدەستداوە و چواری تریش برینداربوون .
ئاژانسی (تاس)ی روسی لە سەرچاوەیەکی ئەمنییەوە بڵاوی کردووەتەوە؛ "تەقینەوەکە هەوڵی تیرۆرکردنەو لە ناو بریندارەکاندا ئارمێن سارکیسیان، بەرپرسی پێشووی بۆکسینگی ئۆکراینی تێدایە کە دامەزرێنەری هێزێکی شەڕکەرە دژ بە ئۆکراینیا.
لە دوای كەنەدا و مەكسیك، سەرۆكی ئەمریكا هەڕەشەی سەپاندنی باج بەسەر وڵاتانی ئەوروپادا دەكات.
دۆناڵد ترەمپ سەرۆكی ئەمریكا رایگەیاند، ئەمڕۆ لەگەڵ سەركردەكانی كەنەدا و مەكسیك بڕیارەكەی بۆ سەپاندنی باج بەسەر كاڵای ئەو دوو وڵاتەدا تاوتوێ دەكات، وتیشی، بە نیازە هەمان رێكار بەرامبەر وڵاتانی ئەوروپاش بگرێتەبەر.
ترەمپ راشیگەیاند، بڕیاری زیادكردنی باج لەسەر كاڵای كەنەدا و مەكسیك، لێكدانەوەی وردی بۆ كراوە، چونكە ئەوانیش پارەیەكی زۆری واشنتۆن قەرزران و دەبێت قەرزەكانیان بدەنەوە.
پێشتر كۆشكی سپی رایگەیاند، سەرۆكی ئەمریكا باجی بە رێژەی 25% بەسەر ئەو كاڵا و شمەكانەدا سەپاندووە كە لە مەكسیك و كەنەداوە هاوردەی ئەمریكا دەكرێن، جگە لە سەرچاوەكانی وزەی كەنەدا كە 10% باجی لەسەرە، ئەو باجانەش لە 4ی شوباتەوە دەچێتە بواری جێبەجێكردنەوە.
ئەحمەد شەرع سەرۆكی قۆناغی راگوزەری سوریا گەیشتە سعودیە و لەگەڵ محەمەد بن سەلمان شازادەی جێنشینی ئەو وڵاتە كۆبووەوە.
ئەحمەد شەرع سەرۆكی قۆناغی راگوزەری سوریا یەكەم سەردانی رەسمی بۆ سعودیە بوو كە كاریگەریی گەورەی لەسەر پەیوەندییەكانی سوریا و سعودیە هەیە.
محەمەد بن سەلمان شازادەی جێنشینی سعودیە و ئەحمەد شەرع كۆبوونەوە و پێشهاتەكانی سوریا و پلانەكانی چەسپاندنی ئاسایش و سەقامگیری لەو وڵاتە و پەیوەندی نێوان دیمەشق و ریاز و و هەوڵەكانی لابردنی سزاكانی سەر سوریا تاوتوێكران.
ئەوەش لە كاتێكدایە ، لە چەند رۆژی رابردوودا ئەمیر فەیسەڵ بن فەرحان وەزیری دەرەوەی سعودیە سەردانی سوریای كرد و لەگەڵ ئەحمەد شەرع كۆبووەوە، رۆژی پێنج شەمەش شا سەلمان بن عەبدولعەزیز پاشای سعودیە و محەمەد بن سەلمان جێنشینی ئەو وڵاتە پیرۆزباییان لە ئەحمەد شەرع كرد بە بۆنەی هەڵبژاردنی وەك سەرۆكی قۆناغی راگوزەری سوریا.