بەڕێوەبەرایەتی گشتی نەهێشتنی مادە هۆشبەرەکانی دەزگای ئاسایشی هەرێم لەناوبردنی کۆمەڵێک مادەی هۆشبەری بەشێوەی زانستیانە رادەگەیەنێت.

عەقید کارزان شێرکۆ وتەبێژی دەزگای ئاسایشی هەرێم لە کۆنفرانسێکی رۆژنامەوانیدا رایگەیاند، ئەمڕۆ بە ئامادەبوونی لایەنە پەیوەندیدارەکان ئەو مادە هۆشبەرانەی لە ساڵی 2025 دەستیبەسەردا گیراوە و فەرمانی لەناوبردنی بۆ دەرکراوە ئەمڕۆ بەشێوەیەکی زانستیانە لەناوبرا.

وتیشی، ئەو مادانە لە کۆمەڵێک مادەی جیاواز پێکهاتوون و دەستیان بەسەرداگیراوە، کە پێکهاتبوون لە بڕی( 410 کیلۆ لە جۆری کریستاڵ، 35 کیلۆ تلیاک، 29 کیلۆ حەشیس، سێ کیلۆ رووەکی حەشیش، سێ کیلۆ ماریوانە، یەک کیلۆ هێرۆین، 180 کیلۆ کەپتاگۆن، 32 کیلۆ تۆی شادانە و کۆمەڵێک مادەی تر).

وتەبێژی دەزگای ئاسایشی هەرێم ئاشکرایکرد، لە هەوڵەكانیان بەردەوام دەبن بۆ دەستگیركردنی بازرگانان و بەكارهێنەرانی مادەی هۆشبەر.

بۆ زانیاری زیاتر کلیک لێرە بکە.....

مەزڵوم عەبدی دەڵێت: رێککەوتنەکەیان لەگەڵ دیمەشق باشترین بژاردە بوو، بەڵام ئەگەر رێککەوتن شکست بهێنێت تا کۆتایی شەڕ دەکەن و دەستبەرداری مافەکانیان نابن.

مەزڵوم عەبدی، فەرماندەی گشتیی هێزەکانی سووریای دیموکرات'هەسەدە'، لە چاوپێکەوتنێکی تایبەتدا لەگەڵ کەناڵی "PBS"ـی ئەمریکی، وردەکاریی رێککەوتنی نێوان کورد و حکومەتی ناوەندیی دیمەشقی ئاشکراکرد.

مەزڵوم عەبدی رایگەیاند، رێککەوتنەکەیان لەگەڵ ئەحمەد شەرع سەرۆکی سوریا باشترین بژاردە بووە لەژێر ئەو فشارە سەربازی و ئابورییانەی رووبەڕووی کورد ببووەوە. دەشڵێت؛ ئەمە باشترین رێککەوتن نییە بۆ کورد، بەڵام بۆ بەدیهێنانی سەقامگیری و ئاگربەست پەسەندیان کرد.

مەزڵوم عەبدی جەختیکردەوە، ئامانجی سەرەکییان "ئۆتۆنۆمی"یە، بەڵام بەهۆی بارودۆخی ئێستاوە، دیمەشق تەنها "بەڕێوەبەریی خۆجێی" قبوڵ کردووە. هۆشداریشی دا کە ئەگەر رێککەوتنەکە شکست بهێنێت، تا کۆتایی شەڕ دەکەن و دەستبەرداری ناوچە کوردییەکان نابن.

فەرماندەی هەسەدە هۆشداریدا داعش هێشتا زۆر بەهێزە و دەستی بە شارە گەورەکان گەیشتووە، ئاماژەی بەوەشکرد گواستنەوەی پێنج هەزار و 700 زیندانی مەترسیدار بۆ عیراق داعش لاواز دەکات، بەڵام چۆڵکردنی کەمپی "هۆل" و ونبوونی 10 هەزار ژن و منداڵی داعش مەترسییەکی گەورەیە.

مەزڵوم عەبدی بێئومێدیی خۆی لە هەڵوێستی ئەمریکا نەشاردەوە و رایگەیاند، کاتێک چەکدارانی سوریا هێرشی کردە سەریان، ئەمریکا پارێزگاریی لێ نەکردن، ئێستا خەڵکی ئەوان هەست بەبێ ئومێدییەکی زۆر دەکەن بەرانبەر واشنتۆن.