جیهان
سەرۆک کۆماری تورکیا راگەیەنراوێکی لەبارەی گرژییەکانی نێوان ئیسرائیل و سوریاوە بڵاوکردەوە و باس لەوە دەکات، "جیهان لە ئیسرائیل گەورەترە، پێویستە جیهان ئەو تۆپە ئاگرینە بکوژێنێتەوە کە خەریکە دەیسوتێنێت".
رەجەب تەیب ئەردۆغان سەرۆک کۆماری تورکیا رایگەیاندووە، ئیسرائیل گەورەترین هەڕەشەیە بۆسەر یاسا نێودەوڵەتییەکان.
ئاماژەی بەوەشکردووە، "رێگە نادەین سوریا بچێتە نێو ململانێیەکی نوێیەوە".
ئەردۆغان دەشڵێت: جیهان لە ئیسرائیل گەورەترە، پێویستە جیهان قەبارە راستەقینەکەی خۆی بسەلمێنێت و ئەو تۆپە ئاگرینە بکوژێنێتەوە کە خەریکە دەیسوتێنێت.
ئەوەش لە کاتێکدایە، لەدوای 7ی 10ی 2023ـەوە و دوای دەستپێکی شەڕی نێوان حەماس و ئیسرائیل، رۆژ لەدوای رۆژ لەبری کپبوونەوە، ململانێکان قوڵتر بوونەتەوە و پەلیان بۆ وڵاتانی دیکەی رۆژهەڵاتی ناوەڕاستیش هاویشتووە، دوایین روداوەکانیش هێرشی ئیسرائیل بۆسەر سوریا و یەمەن بۆسەر ئیسرائیلە.
وابڕیارە ئەمڕۆ پاشنیوەڕۆ کابینەی ئەمنی ئیسرائیل، بۆ تاوتوێکردنی چۆنیەتی وەڵامدانەوەی هێرشەکانی ئەم بەیانیەی موشەکە بالیستیەکەی حوسییەکان، کۆبوونەوەیەکی بەپەلە ئەنجام دەدات.
بەپێی ڕاپۆرتی "میدڵ ئیست نیوز"، لە دوای هێرشە موشەکیەکەی ئەمڕۆی ئەنسارولڵای یەمەن بۆ سەر فڕۆکەخانەی بن گۆریۆن، کابینەی ئەمنی ئیسرائیل بڕیاری داوە ئەمڕۆ دوای نیوەڕۆ کۆبوونەوەیەک سازبکات بۆ دیاریکردنی شێوازی وەڵامدانەوەی ئەم هێرشانە.
رۆژنامەی "مەعاریف" بە پشت بەستن بە راپۆرتی جەزیرە بڵاویکردەوە، بنیامین نەتانیاهۆ سەرۆک وەزیرانی ئیسرائیل لە میانەی راوێژە ئەمنییەکانی ئەمڕۆدا، سیاسەتە نوێیەکانی پەیوەست بە وەڵامدانەوەی هاویشتنی موشەک لە یەمەنەوە تاوتوێ دەکات.
هاوکات دەزگای رادیۆ و تەلەفزیۆنی ئیسرائیل، بە نپشت بەستن بە سەرچاوەیەکی ئەمنی رایگەیاند: تەل ئەبیب بە توندی وەڵامی بە ئامانجگرتنی فڕۆکەخانەی بن گۆریۆن دەداتەوە.
ئەم سەرچاوەیە بە پشت بەستن بە بەرپرسێکی باڵای ئیسرائیل نووسیوێتی: "دوای بە ئامانجگرتنی فڕۆکەخانەی بن گۆریۆن، چیتر هیچ سنورێک لەبەردەم خۆماندا نابینین".
لە لایەکی ترەوە، کەناڵی 12ـی تەلەفزیۆنی ئیسرائیل رایگەیاند کە فڕۆکەیەکی هێڵی ئاسمانی هیندستان چەند خولەکێک دوای نیشتنەوەی لەسەر فڕگەی فڕۆکەخانەی بن گۆریۆن، بەهۆی هێرشەکەوە راستەوخۆ گەڕاوەتەوە.
وتەبێژی هێزە چەکدارەکانی یەمەن یەحیا سەریع، راگەیاند ناوبراو زیادی کرد: ئەنسارولڵای یەمەن لە درێژەی پشتیوانیکردن لە خەڵکی ستەملێکراوی غەززە و بەرخۆدانی ئەوان، فڕۆکەخانەی بن گۆریۆن لە یافای داگیرکراو کردە ئامانجی هێرشی موشەکی.
موشەکێک لە فڕۆکەخانەی تەل ئەبیب کەوتە خوارەوە و سوپای ئیسرائیل باس لەوە دەکات، موشەکەکە لە یەمەنەوە هەڵدراوە.
سوپای ئیسرائیل رایگەیاند، ئەمڕۆ یەکشەممە، موشەکێک لە ناوەڕاستی ئیسرائیل و لە فڕۆکەخانەی بون گۆریۆنی تەل ئەبیب کەوتە خوارەوە، کە موشەکەکە لە یەمەنەوە هەڵدراوە.
ئاماژەی بەوەشکردووە، هەوڵی رێگریکردن لە کەوتنە خوارەوەی موشەکەکەیان داوە، بەڵام لە کۆتاییدا لە فڕۆکەخانە کەوتووەتە خوارەوە.
لەئێستادا بەهۆی موشەکەکەوە گەشتەکانی فڕۆکەخانەکە بۆماوەیەکی کاتی راگیراوە و زەنگی ئاگادارکردنەوەش لە چەند ناوچەیەکی جیاوازی ئیسرائیلدا لێدەدرێت.
بەپێی هەواڵی میدیا جیهانییەکان، کەوتنەخوارەوەی موشەکەکە زیانی گیانی بەدوای خۆیدا نەهێناوە، بەڵام زیانی بەو شوێنە گەیاندووە کە لێی کەوتووەتە خوارەوە و دوکەڵێکی رەش ئاسمانی فڕۆکەخانەکەی داپۆشیەوە.
Footage from Ben Gurion airport in Tel Aviv shows black smoke rising from an unidentified site following a ballistic missile launch from Yemen. pic.twitter.com/DEEpEgYAKE
— Joe Truzman (@JoeTruzman) May 4, 2025
سەرۆکی روسیا لە چاوپێکەوتنێکی تەلەفزیۆنیدا باس لەوە دەکات، بەوە نییە بە رواڵەت ئارام دەردەکەوێت، هەمیشە حەز دەکات لە کەسێک بدات، بەڵام زاڵ دەبێت بەسەر خۆیدا.
ڤلادیمێر پوتن سەرۆکی روسیا، ئەو سەرۆکەی بە سەرۆکە جیاوازەکە ناسراوە، حەزێکی زۆری بۆ هونەرە جەنگییەکان هەیە و بەردەوام راهێنان دەکات، ڕاوکردن و چوونە دارستانە چڕ و سەختەکان بەشێکە لە خولیاکانی، لە چاوپێکەوتنێکی تەلەفزیۆنیدا باس لە هەندێک لایەنی دیکەی کەسایەتی خۆی دەکات.
پوتن لە چاوپێکەوتنێکی تەلەفزیۆنیدا لەگەڵ بافیل زاروبینی رۆژنامەنووس، لە بەرنامەیەکی بەڵگەنامەییدا بەناوی " روسیا. کرملن. بوتن. 25 ساڵ" باس لەوە دەکات، بە رواڵەت ئارام و لەسەرخۆ دەردەکەوێت، بەڵام لە ناوەوە هەمیشە ئەو هەستەی هەیە کە بیەوێت لە کەسێک بدات.
زاروبین لێی دەپرسێت: هەرگیز هەستت بەوە کردووە کە بتەوێت لە کەسێک بدەیت؟ پوتینیش بە پێکەنینەوە وەڵامی دەداتەوە و دەڵێت: هەمیشە ئەو هەستەم هەیە، بەڵام زاڵ دەبم بەسەر ئەو حەزەمدا.
بڕیارە ئەو بەڵگەنامە فیلمە ئەمڕۆ پەخش بکرێت، کە تیایدا پوتن چەندین نهێنی و راستی لەسەر ژیانی خۆی دەدرکێنێت.
? بوتين يكشف عن رغبته بـ"توجيه ضربة" لكنه يقاوم ذلك
— Sputnik Arabic (@sputnik_ar) May 3, 2025
قال الرئيس الروسي فلاديمير بوتين، خلال مقابلة مع الصحفي بافيل زاروبين، إنه على الرغم من برودة أعصابه الظاهرية، إلا أنه يشعر دائما برغبة في توجيه الضربة.
وأضاف الرئيس بوتين، مازحا خلال رده على سؤال زاروبين حول ما إذا شعر يوما… pic.twitter.com/Dmr6VrG813
سەرەڕای داواكاری بەغداد بۆ دەرهێنانی لە لیستەكە، جارێكی دیكە واشنتۆن داوا لە هاووڵاتییانی وڵاتەكەی دەكات گەشت بۆ عیراق نەكەن.
رۆژنامەی واشنتۆن پۆست بڵاویكردەوە، رۆژی یەكشەممە ئیدارەی ئەمریكا لیستی هۆشداری گەشتی هاووڵاتییانی وڵاتەكەی نوێكردووەتەوە و دوو وڵاتی نوێی بۆ زیادكردووە كە ئەوانیش كۆریای باكور و بوركینا فاسۆن، بەوەش لیستی ئەو وڵاتانەی كە هۆشداری دراوە لە گەشتنەكردن بۆیان گەیشتوەتە 21 وڵات.
هەر بەپێی زانیارییەكانی ئەو رۆژنامەیە، لە لیستەكەدا عیراق هەر وەك خۆی ماوەتەوە، ئەمەش دوای ئەو هەواڵانەی باس لەوە دەكەن كە فوئاد حسێن وەزیری دەرەوە لە گەشتەكەیدا بۆ واشنتۆن، پرسی هۆشداری گەشتی هاووڵاتیانی ئەمریكای بۆ عیراق و كاریگەرییەكانی لەسەر ڕاكێشانی وەبەرهێنەرانی ئەمریكی ورووژاندوە و داوای لێكردون كە بەغداد لەو لیستە دەربهێنن.
میدیای سوریا بڵاویانكردەوە، فڕۆكە جەنگییەكانی هاوپەیمانی نێودەوڵەتی دژی داعش ژێرخانێكی ئابورییان لە رۆژهەڵاتی دێرەزوور كردۆتە ئامانج.
تەلەفیزیۆنی سوریا بڵاویكردەوە، فڕۆكە جەنگیەكانی هاوپەیمانی نێودەوڵەتی دژی داعش ژێرخانێكی ئابوورییان لە دەوروبەری بنكەی كێڵگەی نەوتی عومەر لە رۆژهەڵاتی دێرەزۆر كردووەتە ئامانج.
ئاماژە بەوەشكراوە، ژێرخانەكە پێشتر لە لایەن هێزەكانی ئەمریكا بەكارهێنراوە پێش ئەوەی ئەو بنكەیە چۆڵ بكەن.
پێشتر لێپرسراوانی ئەمریكا رایانگەیاند، لە ناوەڕاستی مانگی رابردوەوە سوپای ئەمریكا دەستیكرد بەكشانەوەی سەدان سەرباز له باكوری رۆژهەڵاتی سوریا و كار بۆ داخستنی سێ بنكه سەربازی خۆی لە كۆی ئەو هەشت بنكەیە دەكات كە لەو وڵاتە هەیەتی.
پێش گەشتەكەی ترەمپ بۆ رۆژهەڵاتی ناوەڕاست، وەزیری بەرگری ئەمریكا بەنیازە سەردانی ئیسرائیل بكات.
ماڵپەڕی ئەكسیۆسی ئەمریكی لە زاری دوو لێپرسراوی ئیسرائیلی بڵاویكردەوە، كە پیت هێگسێت وەزیری بەرگری ئەمریكا، لە 12ی ئایار دەگاتە ئیسرائیل و لەوێ لەگەڵ یسرائیل كاتز هاوتا ئیسرائیلییەكەی و بنیامین ناتانیاهۆ، سەرۆك وەزیرانی ئیسرائیل كۆدەبێتەوە.
دوای ئیسرائیل، هێگسێت گەشتی سعودیە دەكات كە ئەوەش پەیوەندی بە گەشتەكەی ترەمپەوە هەیە بۆ ئەو وڵاتە.
پێشتریش، كارۆلین لیڤیت، وتەبێژی كۆشكی سپی، رایگەیاندبوو كە بڕیارە ترەمپ گەشتێك بۆ ڕۆژهەڵاتی ناوەڕاست دەستپێبكات لە 13 تا 16ی ئایار و وڵاتانی سعودیە و قەتەر و ئیمارات لەخۆ دەگرێت.
ئەمە دووەم گەشتی نێودەوڵەتیی ترەمپ دەبێت لە دوای دەستبەكاربوونی لە 20ی كانوونی دووەم، ئەمەش دوای سەردانەكەی بۆ ڤاتیكان بۆ بەشداریكردن لە پرسەی پاپا فرانسیس.
ئۆکراین ئاگربەرستی کورتخایەن بە شکستخواردوو ناودەبات و زیلینسکیش دەڵێت: ئەو ئاگربەستە یەکێکە لە یارییەکانی پوتن.
ڤۆلۆدیمێر زیلینسکی سەرۆکی ئۆکراین رایگەیاند، ئەو یارییە ناکات کە بە "یارییەکانی ڤلادیمێر پوتین"ی سەرۆکی روسیا وەسفی کردووە سەبارەت بە ئاگربەستی کورتخایەن.
زیلینسکی ئاماژەی بەوەدا کە دۆناڵد ترەمپ سەرۆکی ئەمریکا دوای کۆبوونەوەی رۆما بینینی شتەکانی "کەمێک جیاواز" کرد و راشیگەیاند، مۆسکۆ بەرپرسیارە لە سەلامەتی سەرکردەکانی جیهان کە سەردانی روسیا دەکەن بۆ بەشداریکردن لە ئاهەنگەکانی رۆژی سەرکەوتن بۆ یادکردنەوەی جەنگی جیهانی دووهەم لە 9ی ئایار.
سەرۆکی ئۆکراین ئاشکراشیکرد، نازانین روسیا لەو رۆژەدا چی دەکات، رەنگە چەندین کردەوەی جۆراوجۆر بکەن، وەک ئاگرکەوتنەوە و تەقینەوە، دواتر ئێمە تۆمەتبار بکەن بەوەی لە پشت ئەو روداوەنەوەین".
رۆژی دووشەممەی رابردوو، سەرۆکی روسیا ئاگربەستێکی کاتیی لە پشووە رەسمییەکانی رۆژانی 8 تا 11ی ئایار راگەیاند، هاوکاتە لەگەڵ ئاهەنگ گێڕانەکانی مۆسکۆ بۆ رۆژی سەرکەوتن لە جەنگی جیهانی دووهەمدا.
هاوکات کۆشکی کرملن ئاشکرایکرد: روسیا پێی وایە لایەنی ئۆکراینیش دەبێت بە هەمان شێوە ئاگربەست قبوڵ بکات، ئەگەر لایەنی بەرانبەر ئاگربەست پێشێل بکات، هێزە چەکدارەکانی روسیا وەڵامی شیاو و کاریگەر دەدەنەوە.
گفتوگۆكانی ئەمریكا و ئێران بۆ كاتێكی نادیار دواخران، عەباس عراقچیش جەختدەكاتەوە، تاران هیچ كات دەستبەرداری پیتاندنی یۆرانیۆم نابێت.
دوای هەڕەشەكانی ترەمپ، وەزارەتی دەرەوەی ئەمریكا بەشداریكردنی لە خولی چوارەمی دانوستانەكانی لەگەڵ ئێران هەڵپەسارد و لێپرسراوێكی باڵای ئەو وەزارەتەش بە فۆكس نیوزی راگەیاندووە، خولی چوارەمی دانوستانەكان كە بڕیاربوو ئەمڕۆ لە رۆما بەڕێوەبچێت، بەهۆی هەڕەشە نوێیەكانی ترەمپ لە دژی ئێران هەڵوەشاوەتەوە و هێشتاش هیچ ئاماژەیەكی ترەمپ نییە بۆ دەستپێكردنەوەی دانوستانەكان.
هەر لەو چوارچێوەیەدا ئەنتۆنیۆ گۆتریێش ئەمینداری گشتی نەتەوەیەكگرتووەكان، پەیوەندییەكی تەلەفۆنی لەگەڵ عەباس عراقچی وەزیری دەرەوەی ئێران ئەنجامداو گفتوگۆیان لەبارەی دانوستانەكانی ئێران و ئەمریكا كرد.
عراقچی جەختی كردەوە، ئێران بە مافی خۆی دەزانێت بەردەوام بێت لە پیتاندنی یۆرانیۆم و دەستبەرداری نابێت، وتیشی، متمانەیان بە بە بەڵێنەكانی ئەمریكا كەم بووەتەوە و هەڕەشەكانی ئەمریكاش، چانسی سەركەوتنی دانوستانەكان لەناودەبات.
ئەمریکا هەڕەشەی کشانەوە لە نێوەندگیری نێوان روسیا و ئۆکراین دەکات، ئەگەر هیچ بەرەوەپێشچونێک لە دانوستانەکان بەدی نەهێنرێت.
تامی بروس وتەبێژی وەزارەتی دەرەوەی ئەمریکا رایگەیاند، هەڵوێستی ئێمە سەبارەت بە پرۆسەی ئاشتی لە ئۆکراین نەگۆڕاوە، بەڵام ئەگەر هیچ بەرەوپێشچونێک لە دانوستانەکان بەدی نەهێنرێت ئەوە ئێمە دەکشێینەوە.
ئاماژەی بەوەشکرد، ئێمە واز لە خواستی خۆمان دەهێنین لە پێناو گەیشتن بە ئاگربەست، ئەوەی لە توانایشماندا بێت ئەنجامی دەدەین بۆ کۆتایی هێنان بە ململانێکان لە ئۆکراین.
ئەمەش لە کاتێکدایە وەزیری دەرەوەی ئەمریکا رایگەیاندبوو، سەرەڕای هەندێک پێشکەوتنی ئەم دواییە، ئۆکراین و روسیا دوورن لە گەیشتن بە رێککەوتنی ئاشتی.
بومەلەرزەیەكی بەهێز ناوچە كەناراوییەكانی ئەرژەنتین و باشووری چیللی هەژاند، دەستەی جیۆلۆجی ئەمریكا بڵاویكردەوە، گوڕی بومەلەرزەكە 7.5 پلە بووە بە پلەی رێختەر.
دەسەڵاتدارانی ئەرژەنتین فەرمانی چۆڵكردنی دانیشتوانی شاری پۆرتۆ ئەلمانزایان دەركرد كە روو لە شاخەكان بكەن.
هاوكات دەسەڵاتدارانی هەردوو وڵات هۆشداری روودانی تسۆنامی دەدەن و داواكارن دانیشتوانی كەناراوەكانی شۆشوایا و و لاریۆخا ماگالانێس دەدەن دووربكەونەوە.
بەپێی سەرچاوەكان، بوومەلەرزەكە لە قوڵایی 10 كیلۆمەتر روویداوە، لە زۆربەی شارەكانیش زەنگی ئاگاداركردنەوەی لێدەدرێت.
پێشتر دەزگای نیشتمانیی چیللی بۆ خۆپاراستن و بەرپەرچدانەوەی كارەساتەكان، هۆشداری دابوو بە دانیشتوانی ناوچە كەناراوییەكانی باشووری ماگالانێس و جەمسەری باشووری وڵاتەكە.
هاوكات دەسەڵاتدارانی ئۆشوایای ئەرژەنتین، هەموو جۆرە چالاكییەكی ئاوی و كەشتیوانییان لە كەناڵی بیگل بۆ ماوەی سێ سەعات ڕاگرت، ئەوەش لەترسی تسونامی.
لە هەڵبژاردنە ناوخۆییەكانی ئینگلتەرا پارتی ریفۆرم سەركەوتنی بەدەستهێنا، ئەو پارتە دژی كۆچبەرانن و سەرۆكی شارەوانی لینكۆڵنشایر دەڵێت، پێویستە كۆچبەران لە بری هوتێل لە چادردا نیشتەجێ بكرێن.
رۆژی پێنجشەممە هەڵبژاردنە ناوخۆییەكانی ئینگلتەرا لە چەند شارو شارۆچكەیەك بۆ ژمارەیەك سەرۆك شارەوانی و ئەندامانی ئەنجومەنی شارەوانی و پارێزگاكان و پەرلەمانتارێك بەڕێوەچوو، لەئێستادا ژماردنی دەنگەكان دەستی پێكردووە و پارتی ریفۆرم كە (نایجل فەرەج) سەرۆكایەتی دەكات، یەكەم سەركەوتنی تۆماركرد بە بردنەوەی (سارا پۆچین) وەكو ئەندامی پەرلەمانی ناوچەی رانكۆرن و هێڵسبی.
هەروەها پارتی ریفۆرمی ئینگلتەرا، یەكەم سەرۆكی شارەوانی بردەوە و ئەندریا جێنكینز بە 40 هەزار دەنگ بووە سەرۆكی شارەوانی لینكۆڵنشایر.
هاوكات لە هەڵبژاردنە ناوخۆییەكانی بەریتانیا بێجگە لە هەڵبژاردنی نوێنەرانی شارەوانی و پارێزگاكان، هەڵبژاردن بۆ پەرلەمانتارێكیش لە ناوچەی رانكۆرن هێڵسبی بەڕێوەچوو، ریفۆرم نەیهێشت جارێكی تر لەو ناوچەیەدا پارتی كرێكاران سەركەوتووبێت، بە جیاوازی شەش دەنگ سارا پۆچین لە پارتی ریفۆرم سەركەوت بۆ پەرلەمان و بووە پێنجەم پەرلەمانتاری ریفۆرم.
دواتر سەرۆكی شارەوانی لینكۆڵنشایر رایگەیاند، ئەوانەی بەشێوەیەكی نایاسایی كەناڵی ئینگلیز دەبڕن پێویستە لەبری هوتێل لە چادردا نیشتەجێ بكرێن.
بڕیارە ڕۆژی سێشەممە مارک کارنی سەرۆک وەزیرانی کەنەدا لەگەڵ دۆناڵد ترەمپ سەرۆکی ئەمریکا لە واشنتۆن کۆببێتەوە.
بەپێی سەرچاوە ئاگادارەکان، ئەوە یەکەم کۆبوونەوەیان دەبێت لەوکاتەوەی کارنی لە هەڵبژاردنەکەدا بردویەتیەوە، بەپێی راپۆرتێکی بلومبێرگ بەشێک لە سەرکەوتنەکانی سەرۆک وەزیرانی کەنەدا بەهۆی "پەیامی دژە ترەمپە "
بەپێی راپۆرتەکە، تا ئێستا بە رەسمی کۆبوونەوەی ترەمپ و کارنی رانەگەیەنراوە، بەڵام سەرچاوەکان ئاماژەیان بەوەکردووە، کە رۆژی سێشەممە کۆدەبنەوە.
جێگەی ئاماژەیە، سەرۆک وەزیرانی کەنەدا بە هۆی لێدوانە دژەکانی بەرانبەر ترەمپ توانی سەرکەوتنی گەورە لە هەڵبژاردنەکانی وڵاتەکەی بەدەستبهێنێت.
بەپێی راپۆرتی ماڵپەڕێکی ئەمریکی، بنەماڵە و ئیدارەی دۆناڵد ترەمپ لە ماوەی سەد رۆژی سەرەتای دەسەڵاتدا بە پشت بەستن بە پەیوەندییەکانیان لەگەڵ بازنەکانی دەسەڵات توانیویانە قازانجی دارایی بێوێنە بەدەست بهێنن لە رێگەی کۆمەڵێک پڕۆژەی بازرگانیەوە.
راپۆرتەکە ئاماژە بەوە دەکات کە ئێستا دۆناڵد ترەمپ، کوڕەکانی و هاوبەشەکانیا پێکەوە، زنجیرەیەک پڕۆژەیان دەستپێکردووە کە لەسەر بنەمای بەدەستهێنانی قازانجی بەرز لەگەڵ کۆمپانیا جیهانیەکاندا وەستاوە.
پڕۆژەی دراوی دیجیتاڵی
لە پڕۆژەی World Liberty Financial کە لەلایەن ترەمپەوە پشتگیری دەکرێت، ستیڤ ویتکۆف و کوڕەکانی بەشدارن. ئەم پڕۆژەیە توانیویەتی زیاتر لە 550 ملیۆن دۆلار کۆبکاتەوە لە رێگەی فرۆشتنی تۆکنی دیجیتاڵ بە وەبەرهێنەران لە سەرتاسەری جیهان.
دۆناڵد ترەمپ خۆی پۆستی "بەرگریکاری یەکەمی دراوی دیجیتاڵ" لە کۆمپانیاکەدا بەڕێوە دەبات، هاوکات سیاسەتی ئیدارەکەی وا لێکردووە پشتگیری دراوی دیجیتاڵی بکات، ئەمەش بووەتە هۆی بەرزبوونەوەی بەهای دارایی کۆمپانیاکە.
میم کۆینی فەرمی ترەمپ
نرخی میم کۆینی فەرمی (OFFICIAL TRUMP) لە ماوەی هەفتەی رابردودا بەهۆی ریکلامێکی تایبەتی ماڵپەری ترەمپەوە زیاتر لە%60بەرزبووەتەوە، لە ریکلامەکەدا ماڵپەڕەکە بڵاویکردبووە وە نانخواردنێکی تایبەت بە ئامادەیی ترەمپ بۆ 220کەس لە دەوڵەمەندترین کەسەکان لە بواری دراوە ئەلکترۆنیەکان رێکدەخات و سەرەتا ئاماژەی بەوەدابو کە 25 لە باشترینەکان هەڵدەبژێردرێن بۆ ئەوەی گەشتێکیشیان بەناو کۆشکی سپیدا پێبکرێت، بەڵام دواتر ئەو بەشە لە ماڵپەڕەکە لابرابو.
یانەیەکی تایبەت لە واشنتۆن:
دۆناڵد ترامپ جونیەر و هاوبەشەکانی، لەوانە زاک و ئەلێکس ویتکۆف، خەریکن یانەیەکی تایبەت لە واشنتۆن دروستبکەن، کە نرخی ئەندامبوون تیایدا بە 500 هەزار دۆلار دیاریبکرێت. ئەم یانەیە وەک شوێنێک بانگەشەی بۆ دەکرێت کە بەخشەرە دەوڵەمەندەکان و بازرگانە گەورەکان لەگەڵ دیارترین بەرپرسانی ئیدارەی ترەمپ کۆدەکاتەوە.
پڕۆژەکانی دەرەوەی وڵات
بەپێی رێکخراوی چاودێری ئەخلاقی CREW، پێشبینی دەکرێت لە چوار ساڵی داهاتوودا لانیکەم پەرە بە 19پڕۆژە بە براندی ترەمپ لە دەرەوەی وڵات بدرێن. تەنها لەم هەفتەیەدا، رێکخراوی ترەمپ رێککەوتنێکی بۆ دروستکردنی گۆلفێکی لوکس لە قەتەر راگەیاند.
چالاکییە بازرگانییەکانی دیکە:
دامەزراوەی ترەمپ بەردەوامە لە فرۆشتنی کڵاوی نووسراوی "ترەمپ 2028"، کە ئاماژەیە بۆ بیرکردنەوەی ئەگەری خۆپاڵاوتنی ترەمپ بۆ سێیەم خولی سەرۆکایەتی، کە پێچەوانەی دەستوری ئەمریکایە.
لە ماوەی هەڵمەتی هەڵبژاردنی 2024، ترەمپ بانگەشەی بۆ چەندین بەرهەم کرد وەک کۆپییەکانی کتێبی پیرۆز، پێڵاوی وەرزشی، بۆن و کارتی ئاڵوگۆڕ. هەروەها هەڵمەتی سیاسی بەردەوامە لە پشت بەستن بە فرۆشتنی کەلوپەلی هەڵگری دروشمی "با ئەمریکا دووبارە مەزن بکەینەوە" (MAGA) وەک سەرچاوەیەکی سەرەکی بۆ کۆکردنەوەی بەخشین.
لە راپۆرتەکەی ئەکسیۆس دا هاتووە؛ کە چاودێران و دیموکراتەکان پێیانوایە بنەماڵەی ئاماژەی بەوە داوە کە پێدەچێت خولی دووەمی سەرۆکایەتی ترەمپ زیاتر خولێک بێت بۆ دەوڵەمەند کردنی بنەماڵە و کەسانی چواردەوری لە ئیدارەکەی.
لە پێشهاتێکی گرنگدا لە ناوەندی سیاسی واشنتۆن، میدیا ئەمریکیەکان بڵاویان کردەوە کە دۆناڵد ترەمپ، سەرۆکی ئەمریکا، مایک واڵتز راوێژکاری ئاسایشی نیشتمانی و ئەلێکس وۆنگی جێگرەکەی لە پۆستەکانیان لابردون.
بەپێی ڕاپۆرتی ڕۆژنامەی وۆڵ سترت جۆرناڵ کە رۆژی پێنجشەممە بڵاوکراوەتەوە، لادانی واڵتز لە پۆستەکەی پەیوەندی بە دزەپێکردنی زانیاریی نهێنی سەربازییەوە هەیە.
لەلایەکی دیکەوە، کەناڵی فۆکس نیوز رایگەیاندوە کە جێگری واڵتزیش دەستی لەکار کێشاوەتەوە، هاوکات دۆناڵد ترەمپ ئامادەکاری دەکات بۆ ئەوەی هۆکاری ئەم بڕیارە بۆ هاووڵاتیانی ئەمریکا ئاشکرا بکات.
ئەم پێشهاتە لە کاتێکدایە کە پێشتر مایک واڵتز لە مانگی ئاداری 2025 روبەروی رەخنەی توند بووبۆوە، ئەویش دوای ئەوەی جێفری گۆڵدبێرگ، سەرنووسەری گۆڤاری ئەتڵەنتیک ئاشکرای کرد کە بە هەڵە خراوەتە ناو گرووپچاتێکی "سیگناڵ" کە تێیدا بەرپرسانی پایەبەرزی ئیدارەی ترەمپ زانیاریی هەستیار سەبارەت بە هێرشەکانی سەر حووسییەکانی یەمەنیان ئاڵوگۆڕ کردووە.
سەرچاوەکان باسیان لەوە کردووە کە گرووپچاتەکە بە ناوی "گرووپی بچووکی حووسییەکان" بووە و زانیاریی نهێنیی سەربازی تێدا ئاڵوگۆڕ کراوە. دوای ئەوەی پیت هێگسەس، وەزیری بەرگری و توڵسی گابار، بەڕێوەبەری هەواڵگری نیشتمانی رەتیان کردەوە کە هیچ زانیارییەک لەو گرووپچاتەدا بڵاوکرابێتەوە، گۆڵدبێرگ هەندێک زانیاری گرنگی بڵاوکردەوە، لەوانە کاتی ئەنجامدانی هێرشەکان و ئەو چەکانەی بەکارهێنراون.
ئاژانسی رۆیتەرز لە زاری چەند سەرچاوەیەکەوە رایگەیاند کە ستیڤ ویتکۆف، نێردەی تایبەتی ترەمپ بۆ کاروباری رۆژهەڵاتی ناوەڕاست، یەکێکە لە بژاردەکانی سەرۆکی ئەمریکا بۆ پۆستی راوێژکاری ئاسایشی نیشتمانی.
بەگوێرەی میدیا ئەمریکییەکان، مایک واڵتز لە کۆبوونەوە داخراوەکاندا دانی بەوەدا ناوە کە زانیارییەکانی گۆڵدبێرگ راست بوون، ئەمەش یەکێک بووە لە هۆکارەکانی لادانی لە پۆستەکەی.
مایک واڵتز کێیە؟
مایک واڵتز، سیاسەتمەداری ئەمریکی و ئەندامی پێشووی ئەنجومەنی نوێنەرانی ئەمریکایە لە پارتی کۆماری. لە دوای سەرکەوتنی دۆناڵد ترەمپ لە هەڵبژاردنەکانی ساڵی 2024، وەک راوێژکاری ئاسایشی نیشتمانی دامەزرا. واڵتز پێشتر ئەفسەری سوپای ئەمریکا بووە و خزمەتی لە هێزە تایبەتەکانی ئەمریکا (Green Berets) کردووە.
لە ماوەی کارکردنی لە پۆستی راوێژکاری ئاسایشی نیشتمانی، واڵتز رۆڵێکی گرنگی هەبووە لە داڕشتنی سیاسەتی دەرەوەی ئیدارەی ترەمپ و کاروباری پەیوەندیدار بە ئاسایشی نەتەوەیی ئەمریکا، بەتایبەت سەبارەت بە پەیوەندییەکانی ئەمریکا لەگەڵ چین، روسیا و رۆژهەڵاتی ناوەڕاستدا.
بەپێی هەواڵێکی ئاژانسی ئەکسیۆس پێدەچێت خولی چوارەمی دانوستانەکانی ئەمریکا و ئێران بۆ هەفتەی داهاتوو دوابخرێت.
بەپێی وتەی باراک راڤید، پەیامنێری ئاکسیۆس کە بە پشتبەستن بە سەرچاوە ئاگادارەکان لە ئێکس ئەو هەواڵەی بڵاوکردووەتەوە، ناوبراو رایگەیاندوە: لە ئەنجامدا کۆبوونەوەی E3 لەگەڵ ئێران کە پلانی بۆ دانرابوو سبەینێ بەڕێوەبچێت لە رۆما، دوادەخرێت.