کوردستان
سەعدی ئەحمەد پیرە، ئەندامی مەکتەبی سیاسیی یەکێتیی نیشتمانیی کوردستان رایدەگەیەنێت، حزبەکەی بەدوای پۆستەوە نییە، بەڵکو داوای "هاوبەشیی راستەقینە" و گۆڕینی شێوازی حوکمڕانی دەکات و هۆشداریش دەداتە پارتی لە دووبارەکردنەوەی هەڵەکانی رابردوو.
لە میانی بەشداریکردنی لە بەرنامەی "پانۆراما"ی کەناڵی کوردسات نیوز، سەعدی ئەحمەد پیرە ئاماژەی بەوە کرد، پێویستە کابینەی داهاتووی حکومەتی هەرێم حکومەتێکی "بنکە فراوان" بێت تا بتوانێت رووبەڕووی ئاڵنگارییەکانی ئەم قۆناغە ببێتەوە.
ئەو ئەندامەی مەکتەبی سیاسی روونیکردەوە، لە بانگەشەی هەڵبژاردندا یەکێتی باسی لەوە نەکردووە کە حکومەت پێکناهێنێت، بەڵکو تێبینییان لەسەر شێوازی بەڕێوەبردن هەبووە، وتیشی: "یەکێتی کێشەی لەگەڵ شێوازی حوکمڕانی هەیە نەک پۆست لە حکومەتی هەرێم".
سەبارەت بە ئەگەرەکانی پێکهێنانی حکومەت بەبێ یەکێتی، پیرە بە راشکاوی وتی: "پارتی پێشتر ئەزموونی پێکهێنانی حکومەتی لەگەڵ بزووتنەوەی گۆڕان تاقیکردەوە و سەرکەوتوو نەبوو، بۆیە ئەگەر ئێستاش بیەوێت بەبێ یەکێتی حکومەت پێکبهێنێت، ئەوا هەمان هەڵە دووبارە دەکاتەوە".
وەزارەتی خوێندنی باڵا و توێژینەوەی زانستی، کردنەوەی دەرگای خوێندنی ماستەری لە کۆریای باشور بۆ فەرمانبەران و مامۆستایانی دامودەزگاکانی حکومەتی هەرێم راگەیاند.
بەپێی راگەیەندراوەکەی وەزارەت، وڵاتی کۆریای باشور لەرێگەی ئاژانسی کۆریا بۆ هاوکاری نێودەوڵەتی (KOICA)، ژمارەیەک کورسی ماستەری لە پێنج بواری جیاوازدا بۆ هەرێمی کوردستان تەرخان کردووە.
ئیمتیازاتەکان:
خاڵی جەوهەریی ئەم سکۆلارشیپە ئەوەیە، کاندیدی سەرکەوتوو لەلایەن وڵاتی کۆریاوە پشتگیریی دارایی تەواو دەکرێت بۆ خەرجییەکانی خوێندن و ژیان، هاوکات لەلایەن وەزارەتی خوێندنی باڵاوە مۆڵەتی خوێندنی پێ دەدرێت بە موچەی بنەڕەتی و دەرماڵە جێگیرەکانەوە.
مەرجەکانی پێشکەشکردن:
-
پێشکەشکار دەبێت فەرمانبەر یان مامۆستا بێت لە دامودەزگاکانی حکومەتی هەرێم.
-
لانی کەم دوو ساڵ خزمەتی هەبێت دوای بەدەستهێنانی دواین بڕوانامە.
-
کۆنمرەی بەکالۆریۆسەکەی لە (65%) کەمتر نەبێت.
-
باشترە تەمەنی لە (40) ساڵ کەمتر بێت.
-
دەبێت بوارەکەی لەگەڵ بڕوانامەی بەکالۆریۆسەکەیدا یەک بگرێتەوە (واتە بەکالۆریۆس و ماستەرەکەی لە هەمان بوار بێت).
چۆنێتی پێشکەشکردن:
خوازیاران دەبێت سەرەتا لە رێگەی ماڵپەڕی کۆیکاوە فۆرم پڕبکەنەوە، دواتر تا رێکەوتی 14ی کانوونی یەکەمی 2025 (14/12/2025)، فۆرمی کۆیکا و بەڵگەنامەکان بە هەردوو شێوەی (هارد کۆپی و سۆفت کۆپی) رادەستی بەڕێوەبەرایەتی پەیوەندییەکانی وەزارەتی خوێندنی باڵا بکەن.
وەزارەتی خوێندنی باڵا ئەم لینکانەی وەک هاوپێچ بۆ هەواڵەکە داناوە:
ئاسایش دەستگیرکردنی تۆمەتباری روداوی تەقەکردنەکەی دوێنێی شاری سلێمانی راگەیاند
تۆمەتباری روداوی تەقەکردنەکەی نیوەڕۆی دوێنێ سلێمانی دەستگیرکرا، ئاسایشی سلێمانیش رایگەیاند، سێ هاوکاری دیکەی تۆمەتبارەکە دەستگیرکراون.
بەهۆی کێشەی کۆمەڵایەتیەوە، نیوەڕۆی دوێنێ 22ـی11ـی2025 لەشاری سلێمانی هاووڵاتییەک تەقە لەئامۆزایەکی دەکات و بەسێ گوللـە برینداری دەکات و هەڵدێت.
بەڕێوەبەرایەتی ئاسایشی پارێزگای سلێمانی رایگەیاند، لەسەر روداوەکە دەستبەجێ بەدواداچوون و لێکۆڵینەوەی دەستپێکرد، هەروەها بەبڕیاری دادوەری لێکۆڵینەوەی ئاسایش تۆمەتباری تەقەکەری روداوەکە و سێ هاوکاری دەستگیرکران.
ئاماژەی بەوەشکرد، لەئێستادا تۆمەتباران بەبڕیاری دادوەری لێکۆڵینەوەی ئاسایش بەماددەی 31/405 دەستگیرکراون و لێکۆڵینەوە لەدۆسیەکانیان بەردەوامە.
بۆبینینی ساتی روداوی تەقەکردنە کلیک لێرە بکە............
جێگری سەرۆکی ئەنجومەنی وەزیرانی هەرێم دەڵێت: بەبێ یەکێتی حکومەتی هەرێم پێکنایەت، ئەو هەڕەشانەی کە دەشکرێت کە بەبێ یەکێتی حکومەت پێکدەهێنردرێت تەنها هەڕەشە و گوڕەشەن.
قوباد تاڵەبانی جێگری سەرۆکی ئەنجومەنی وەزیرانی هەرێم لە لێدوانێکی رۆژنامەوانیدا رایگەیاند، دیدی یەکێتی بۆ عیراقێکی سەربەخۆیە و دەبێت عیراق بەهێز بێت بۆ ئەوەی هەرێمی کوردستان بەهێز بێت.
وتیشی، دەبێت تەواوی لایەنەکان بەشداری لە حکومەتی نوێی عیراق بکەن، بۆ ئەوەی حکومەتێک پێکبهێندرێت کە خزمەت بە هەموو کۆمەڵانی خەڵک بکات بەبێ جیاوازی.
قوباد تاڵەبانی ئاشکراشیکرد، كابینەی داهاتووی عیراق پرسی موچە و نەوتی هەرێم یەكلا دەكاتەوە، دەشڵێت، دەچنە بەغداد بۆ ئەوەی كێشەكان لە رێی یاساوە یەكلا بكەنەوە و هەوڵیش دەدەن بۆ ئەمساڵ هیچ موچەیەك نەفەوتێت.
سەبارەت بە پێکهێنانی حکومەتی هەرێم ئەوەشی خستەڕوو، وەک یەکێتیی نیشتمانیی کوردستان ئامادەن بۆ دەستپێکردنەوەی گفتوگۆکان بۆ پێکهێنانی کابینەی دەیەمی حکومەتی هەرێمی کوردستان، دەشڵێت، ئەو هەڕەشانەی کە دەکرێت بەبێ یەکێتی حکومەت پێکدەهێنردرێت تەنها هەڕەشە و گوڕەشەن.
جێگری سەرۆکی ئەنجومەنی وەزیرانی لە وەڵامی پرسیارێکدا لەبارەی پڕۆژە خزمەتگوزارییەکان لە سلێمانی ئاماژەی بەوەکرد، لە چوار ساڵی رابردوودا پڕۆژەکان لە سلێمانی بە رێژەیەکی بەرچاو زیادی کردووە، هەروەها پڕۆژە خزمەتگوزارییەکان نەوەستاون و ناوەستن.
"سلێمانی لە چەند ساڵی رابردوودا لەسەر ئاستی عیراق لە پلەی یەکەمدا بووە لە جێبەجێکردنی پڕۆژەکان و جوڵەی بازرگانی"، قوباد تاڵەبانی وادەڵێت.
ئەو کەسانەی ناویان بۆ حەجی ساڵی 2026 دەرچووە پێویستە تا رۆژی پێنجشەممە سەردانی نوسینگەکانی حەج و عومرە بکەن.
بەڕێوەبەرایەتی گشتی حەج و عومرەی کوردستان لە راگەیەنراوێکدا ئاشکرایکرد، ئاگاداری هەموو ئەو کەسانە دەکاتەوە کە بۆ حەجی 2026 ناویان لە تیروپشکی حاجیان دەرچووە، بە زووترین کات تا رۆژی پێنجشەممە 27ـی11ـی2025سەردانی نوسینگەکانی حەج و عومرە بکەن لە پارێزگا و ئیدارە سەربەخۆکان، بە مەبەستی تەواوکردنی مامەڵەکانیان و دانانی تێچووی حەج.
ئاماژەی بەوەشکرد، هەر کەسێک لە ئەنجامدانی مامەڵەکانی دوا بکەوێت خۆی بەرپرسیار دەبێت.
حەج و عومرەی کوردستان داواش دەکات، بڕی حەوت ملیۆن و 100 هەزار دینار وەک تێچووی حەج ئامادەبکەن.
ئەوەشی خستەڕوو، پێویستە پاسپۆرتی رەسەن و کۆپییەکی رەنگاوڕەنگ لە پاسپۆرت و کارتی نیشتمانی و کارتی زانیاری لەیەک لاپەڕەدا کۆپی بکرێت، هەروەها وێنەیەکی رەنگاورەنگیان پێبێت.
بەپێی پێشبینییەکانی کەشناسی لە 48 سەعاتی داهاتوودا ئاسمان ساماڵ دەبێت و پلەکانی گەرما روو لە نزمبوونەوە دەکەن.
بەڕێوەبەرایەتی گشتی کەشناسی هەرێم پێشبینییەکانی بۆ ئەمڕۆ و سبەینێ بڵاوکردەوە و رایەگەیاند، ئەمڕۆ ئاسمان ساماڵ دەبێت لەگەڵ هەندێک پەڵە هەور، هاوکات پلەکانی گەرما نزیک دەبێتەوە لەتۆمارکراوەکانی دوێنێ.
ئاماژەی بەوەشکرد، سبەینێ پلەکانی گەرما کەمێک روو لە نزمبوونەوە دەکەن، بە بەراورد بە تۆمارکراوەکانی ئەمڕۆ.
ئەمەش لە کاتێکدایە، کەشناسی عیراق رایگەیاندووە، سبەینێ لە ناوچەکانی هەرێمی کوردستان باران دەبارێت و پلەکانی گەرما نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر : 24 پلەی سیلیزی
سلێمانی : 21 پلەی سیلیزی
دهۆک : 22 پلەی سیلیزی
زاخۆ : 22 پلەی سیلیزی
کەرکوک : 25 پلەی سیلیزی
هەڵەبجە : 20 پلەی سیلیزی
گەرمیان : 26 پلەی سیلیزی
وەزارەتی خوێندنی باڵا و تیژینەوەی زانستی رایگەیاندوە؛ بۆ ساڵی خوێندنی 2026-2027، لە وڵاتی هەنگاریا، 30 دەرفەتی خوێندن 10 ماستەر و 20 دکتۆرا بۆ فێرخوازان و هاووڵاتییانی هەرێم رادەگەیەنێت.
لە راگەیەندراوەکەی وەزارەتی خویندنی باڵادا هاتووە، دەبێت کەسەکە هاووڵاتی هەرێم بێت و خوێندنیش بە زمانی ئینگلیزییە دەبێت، 15ـی1ـی 2026 دوا وادەیە بۆ پێشکەشکردن.
زانیاری زیاتر و دەقی راگەیەندراوەکەی وەزارەتی خوێندنی باڵا؛
وەزارەتى خوێندنى باڵا و توێژینەوەى زانستى زەمالەى خوێندنى ماستەر و دکتۆرا لە وڵاتى هەنگاریا بۆ ساڵى خوێندنى (2026-2027) رادەگەیەنێت، بۆ ئەم مەبەستەش ئەو وڵاتە (30) دەرفەتى خوێندن کە (10 ماستەر و 20 دکتۆرا)یە بۆ فێرخوازان و هاووڵاتیانی هەرێمی کوردستان رادهگهێنێت.
لەم لینکەى خوارەوە وردەکارى زەمالەکە خراوەتەڕوو:
- پێشکەشکار دەبێت هاوڵاتی هەرێمی کوردستان بێت.
- پێشکەشکار ئەگەر فەرمانبەر یان مامۆستا بێت لە دامودەزگاکانی حکومەتی هەرێمی کوردستان، ئەوا دەبێت بە لایەنی کەم دوو ساڵ خزمەتی کرداری هەبێت تا (2026/9/1) لە پاش بەدەستهێنانی دوایین بڕوانامە.
- بۆ کاندیدانی دکتۆرا، سەبارەت بە دەرچوانی بەرنامەی تواناسازی، دەبێت پابەندی ئەو گرێبەستە بن کە پێشتر لەگەڵ وەزارەت واژۆیان کردوە.
- خوێندن لەم زەمالەیە بە زمانی ئینگلیزییە، دەبێت پێشکەشکار بە لایەنی کەم ئاستی زمانی ئینگلیزی (5) IELTS یان هاوتاکەی لە تاقیکردنەوە ستانداردەکانی دیکەی توانستی زمان هەبێت کە بریتین لە (TOEFL IBT, PTE ) وەک خشتەی بەراوردکاری هاوپێچە.
- لەکاتی پێشکەشکردن بەڵگەنامە رەسەنەکان بە وەزارەتەکەمان پێویستە تێستی زمان بەسەرنەچوو بێت.
- ئەو پێشکەشکارانەی دوایین بڕوانامەیان بە زمانی ئینگلیزی خوێندوە، لەکاتی پێشکەشکردنی بەڵگەنامە رەسەنەکان ئەگەر تاقیکردنەوەی ئاستی زمانی ئینگلیزی نەبوو، داواکارییەکەی وەردەگیرێت.
- داواکار دەبێت لە هەمان بواری خۆی داواکاری بۆ خوێندن پێشکەش بکات. (واتا بۆ خوێندنی ماستەر؛ بەکالۆریۆس و ماستەرەکەی لە هەمان بوار بێت هەروەها بۆ خوێندنی دکتۆرا؛ دەبێت ماستەر و دکتۆراکەی هەمان بوار بێت).
- ئەم زەمالەیە پشتگیری مۆڵەتی هاوڕێیەتی هاوسەری ناکات، هەروەها پرۆسێسی وەرگرتنی ڤیزای هاوسەر و منداڵ ناکرێت.
- کاندیدی سەرکەوتوو ئەگەر دامەزراو بێت، ئەوا لە لایەن وەزارەتی پەیوەندیدار تەنیا مۆڵەتی خوێندنی پێدەدرێت؛ واتا بە موچەی بنەڕەتی و دەرماڵە جێگیرەکان.
- لە کاتی داواکردنی بەڵگەنامە رەسەنەکان، ئەگەر داواکار فەرمانبەر یان مامۆستا بوو، دەبێت نوسراوی لاری نەبون لە فەرمانگەکەی خۆیەوە پێشکەش بە وەزارەتەکەمان بکات.
- کاندیدی سەرکەوتوو لەلایەن وڵاتی هەنگاریا، بۆ خوێندنی ماستەر مانگانە بری نزیکەی (110) یۆرۆ و بۆ خوێندنی دکتۆرا مانگانە بری نزیکەی (355 - 460) یۆرۆی وەک دەرماڵەی مانگانە پێدەدرێت، هەروەها بیمەی تەندروستی و کرێی خوێندن و بەشی ناوخۆیی لە زانکۆ بۆ دابیندەکرێت، بەڵام کرێی فڕۆکەی بۆ دابین ناکرێت. (بۆ زیاتر وردەکاری تکایە سەردانی ماڵپەڕی زەمالەکە بکەن).
- دوای دەرچونی ئەنجامی بەرایی لە لایەن هەنگاریاوە، وەزارەتەکەمان لەسەر بنەمایی رێنمایی ژمارە (5) ی سالی 2021 کاندیدەکان هەڵدەبژێرێت.
- ئەگەر کاندیدی سەرکەوتوو پاشگەز بوەوە، یان داوای دواخستنی خوێندنەکەی بکات یا بەردەوام نەبوو لە خوێندن، ئەوا ناوی دەخرێتە لیستی رەش، جارێکی دیکە بۆی نییە داواکاری پێشکەش بە هیچ بەرنامەیەکی خوێندنی باڵا لە ناوخۆ و دەرەوە بکات.
- ئەگەر کاندید پاشگەزبوەوە یان وازی لە خوێندنەکەی هێنا، ئەوا بڕی ئەو کەفالەیەی بەرامبەر خوێندنەکەی لە کاتی مامەڵەی مۆڵەتی خوێندن بۆ ئەوانەی فەرمانبەرن یان دەرکردنی فەرمانی وەزاری پەیوەندیکردن بە خوێندن بۆ ئەوانەی فەرمانبەر نین پێشکەش دەکرێت، لێیان وەردەگیرێت.
- هەر کاتێک کاندید بەڵگەنامەی نادروست پێشکەش بە لایەنی هەنگاریا یان وەزارەت بکات، ئەوا دەخرێتە لیستی رەش و زەمالەکەی هەڵدەوەشێندرێتەوە.
- دوا مۆڵەت بۆ پێشکەشکردن بریتییە لە (2026/1/15).
- ئەو خوازیارانەی دکتۆرا کە پێشتر بۆ خۆیان قبوڵی خوێندنیان وەرگرتوە یان ڕەزامەندی سەرپەرشتیاریان بەدەستهێناوە، هەلی وەرگرتنیان لەم سکۆلەرشیپە زیاترە.
- پێشکەشکردن راستەوخۆ تەنیا لە رێگەی ماڵپەری سەرەکی زەمالەکە (هەنگاریا) دەبێت.
بۆ زانیاری زیاتر و پێشکەشکردن، تکایە سەردانی ئەم لینکە بکەن: www.stipendiumhungaricum.hu
لەبەر ئەوەی پێشکەشکردن راستەوخۆ لەرێگەی ماڵپەری زەمالەکەیە، تا دەرچونی ئەنجامی بەرایی، وەزارەت هیچ فایلی لەبەردەست نییە تا کاری لەسەر بکات، بۆیە تا دەرچونی ئەنجامی زەمالەکە لە ڕێگەی ماڵپەری وەزارەتەکەمان، بە هیچ شێوەیەک سەردانی وەزارەت مەکەن.
بۆ زانیاری تەنها ئەو زانکۆ و پسپۆڕییانەی کە لە سیستەمەکە بۆ فێرخوازانی هەرێمی کوردستان کراوەیە، دەکرێت داواکاری پێشکەش بکرێت.
خشتەی بەراوردکاری زمانى ئینگلیزى؛
https://drive.google.com/.../1NYPglCO0D.../view...
دوای شەش رۆژ لەبێسەروشوێنبونی مەهدی محەمەد، تەمەن 25 ساڵ لە روباری سیرواندا تەرمەکەی دۆزرایەوە.
ئەمڕۆ شەممە، پەیامنێری کوردسات نیوز رایگەیاند، تەرمی مەهدی محەمەدیان لە روباری سیرواندا دۆزیوەتەوە، و تا ئێستا هۆکاری دیارنەمانی و گیانلەدەستدانیشی دیار نییە.
مەهدی محەمەد شەش رۆژ پێش ئێستا لەماڵ هاتە دەرەوە و دواتر بە وتەی بنەماڵەکەی هیچ هەواڵێکی نەبووە و دواین جار لە دیمەنی كامێرای چاودێری لە سنوری خانەقین بینرا بوو.
کەسوکار و هێزە ئەمنییەکان و هێزەکانی پێشمەرگە لە ماوەی ئەو شەس رۆژەدا لە هەوڵی دۆزینەوەیدا بوون.
تا ئێستا کەسوکاری مەهدی هۆکاری ونبوونەکەی نازانن و دۆزینەوەی تەرمی کورەکەشیان لە روباری سیرواندا بوەتە جێی پرسیار، لە دوای زۆزینەوەی ترمەکەشی هیچ لێدوانێکییان نەداوە بۆ میدییاکان.
لە شاری سلێمانی "لوتکەی نیشتمانیی سلێمانی بۆ کارسازی" دەستیپێکرد کە ماوەی دوو رۆژ دەخایەنێت و ئامانجی سەرەکیی کۆکردنەوە و پاڵپشتیکردنی پڕۆژەی گەنجانە.
عەلی عومەر، دامەزرێنەری لوتکەکە لە وتەیەکدا رایگەیاند، بۆ یەکەمجارە لەسەر ئاستی عیراق و هەرێمی کوردستان پڕۆژەیەکی لەو شێوەیە پێشکەش دەکرێت.
وتیشی: "ئامانجمانە پڕۆژەی سەرجەم ئەو بەشداربووانە کۆبکەینەوە کە لەم لوتکەیەدا کار دەکەن، تاوەکو بتوانین پاڵپشتی لە گەنجان بکەین و بیرۆکەکانیان بخەینە سەر کار".
لای خۆیەوە دکتۆر هەڤاڵ ئەبوبەکر، پارێزگاری سلێمانی بەشداری لە لوتکەکەدا کرد و رایگەیاند، دیاریکردنی سلێمانی بۆ ئەنجامدانی ئەم کارە یەکێکە لە بژاردە راستەکان.
پارێزگاری سلێمانی هۆکارەکەی بۆ ئەوە گەڕاندەوە کە "سلێمانی یەکێکە لەو پایتەختانەی بە بڕیاری سیاسی دروستکراوە"، بۆیە شوێنێکی گونجاوە بۆ دەستپێشخەرییە نیشتمانی و کارسازییەکان.
بەڕێوەبەرایەتیی ئاسایشی سلێمانی سەر بە دەزگای ئاسایشی هەرێم رایگەیاند، ئەو کەسەی شەوی رابردوو لە عەلوەی سلێمانی شۆفێرێکی بارهەڵگری کوشت، خۆی رادەست کردووە و بەپێی مادەی 406 لێکۆڵینەوەی لەگەڵ دەکرێت.
بەگوێرەی راگەیەندراوەکەی ئاسایش، رووداوەکە شەوی رابردوو (20ی تشرینی دووەمی 2025) روویداوە. سەرەتا لە رێگەی نێوان کەلار - سلێمانی دەمەقاڵێ لەنێوان دوو شۆفێری بارهەڵگردا دروستبووە.
دوای گەیشتنیان بە عەلوەی سلێمانی، جارێکی تر گرژی کەوتووەتە نێوانیان و یەکێک لە شۆفێرەکان بە "دەرنەفیز" هێرشی کردووەتە سەر ئەوی دیکە و بە سەختی برینداری کردووە، پاش گەیاندنی بە نەخۆشخانە، بەهۆی سەختیی برینەکەیەوە گیانی لەدەستداوە.
ئاسایشی سلێمانی دەڵێت، دوای بەدواداچوون، تۆمەتبارەکە خۆی رادەست کردووە و ئێستا بە بڕیاری دادوەر و بەپێی مادەی 406 لە یاسای سزادان راگیراوە و لێکۆڵینەوە لە دۆسیەکەی بەردەوامە.
بەپێی پێشبینییەکانی کەشناسی، ئاسمان ساماڵ دەبێت و پلەکانی گەرما زیاتر بەرز دەبنەوە.
بەڕێوەبەرایەتی گشتی کەشناسی هەرێم پێشبینییەکانی کەشوهەوای بۆ ئەمڕۆ و سبەینێ بڵاوکردەوە و رایگەیاند، ئەمڕۆ ئاسمان ساماڵ دەبێت، هەروەها پلەکانی گەرما یەک بۆ دوو پلە زیاتر بەرزدەبنەوە بە بەراورد بە تۆمارکراوەکانی دوێنێ.
ئاماژەی بەوەشکرد، سبەینێ شەممە، ئاسمان ساماڵ و پەڵە هەور دەبێت پلەکانی گەرما کەمێک بەرزتر دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر : 24 سیلیزی
سلێمانی : 22 سیلیزی
دهۆک : 22 پلەی سیلیزی
زاخۆ : 23 پلەی سیلیزی
کەرکوک : 25 پلەی سیلیزی
هەڵەبجە : 21 پلەی سیلیزی
گەرمیان : 26 پلەی سیلیزی
دووەم رۆژی فێستیڤاڵی نێودەوڵەتیی گەلاوێژ لە سلێمانی بەردەوامە و تەوەری سەرەکی فێستیڤاڵەکە زیرەکی دەستکرد و کاریگەری لەسەر دنیای روناکبیرییە.
بڕوا بەهادین پەیامنێری کوردسات نیوز رایگەیاند، ئەمڕۆ دووەم رۆژی 28هەمین فێستیڤاڵی نێودەوڵەتیی گەلاوێژ بەڕێوەدەچێت، کەتێیدا بەشداربووان و میوانان لەسەر ئاستی وڵاتانی دەرەوە و ناوچەکە بەشدارییان لە فێستیڤاڵەکە کردووە.
وتیشی، ئەمڕۆ چەندین پانێڵی جۆراوجۆر و خوێندنەوەی شیعر وچەند چالاکییەکی دیکەش ئەنجام دەدرێت.
تەوەری فێستیڤاڵ رۆژی دووەم
پانێڵی یەكەم:
كات10:30-11:30 سەرلەبەیانی
كۆڕگێڕ: د. شیلان فەتحی
خاوەندارێتی هزری دۆزەكانی كۆمەڵ لە تەكنیكەكانی زیرەكی دەستكرددا- د. كازم ئەلمیقدادی
كاریگەری زیرەكی دەستكرد لەسەر ئاستی زمانەوانی و بەكارهێنەران- د. هەیسەم قوتب
ترس لە كۆتایی مرۆڤ: لە ئەدەب و فەلسەفە لەسەردەمی زیرەكی دەستكردا- عەلی بەدر.
رۆژی دووەم- پانێڵی دووەم، كات 11:40-1:00ی دوانیوەڕۆ
كۆڕگێڕ: محەمەد شێخ عوسمان
ڕۆشنبیری نوێ و زیرەكی دەستكرد بۆ پێكهێنانی هۆشیاریی زانینی جیاواز- د. محەمەد كەریم ئەلساعدی.
بەراوردكارییەكی شیكاری: میتۆدی( دانانی میوزیك) لە نێوان هزری مرۆڤ و زیرەكی دەستكرددا- د. ئامانج غازی.
دووبارە هەڵسەنگاندنی پەروەردە و فێركردن لەسەردەمی زیرەكی دەستكرددا- د. ریتا نەجیب نەفاع
زیرەكی دەستكرد لە نێوان ئەفسانە و ڕاستیدا- ئیهاب عەدنان.
رۆژی دووەم- پانێڵی سێیەم كات:3:00-4:30ی پاشنیوەڕۆ
كۆڕگێڕ: جەواد حەیدەری
ئێستا كۆتایی جیهان: زیرەكی دەستكرد، كولتور و خەیاڵی دەروونی- فەرهاد شەمسیان.
زیرەكی دەستكرد، وەرگێڕانی مرۆی و ئامێڕی- مەسعود بابایی
لە فرانكشتاینەوە تا ئالگۆریتم: كارلێكی ئەدەبیات و زیرەكی دەستكرد لە پێناسەكردنەوە چەمگی ئافراندندا- فریشتە حەبیبی
كاریگەری زیرەكی دەستكرد لەسەر هونەری شێوەكاری- د. نیاز عوسمان.
دیداری ( ئەحمەد خەڵەف) بۆ چیرۆك
من كاتژمێرەكەی مەچەكی بووم- كازیوە محەمەد رەسوڵ- سلێمانی
كاتژمێر- نیما حوسەینی- بۆكان
ماسالا دوسا- هێمن حەمە تۆفیق- چەمچەماڵ
لە تیلماسكی شكاوی پەنجەرەیەكەوە- زایەر زەنگەنە- سلێمانی
سرۆدا زێر خەزالێ رەقسەك د ناڤبەرا وەهم و حەقیقەتێ دا زانا واحد رەمەزان- دهۆك
پۆست ئەلزەهایمەر- عەلی حەسەن – كەلار
لە پەنجەرەی پەنابەرێكەوە- جەلال ئەلیاسی- سوید
( ئەم چیرۆكانە لە فێستیڤاڵدا ناخوێندرێنەوە).
دیداری(كەمال غەمبار) بۆ لێكۆڵینەوە
قوباد تاڵەبانی لە رۆژی شەهیدی یەکێتی دەڵێت: یەکێتی دڵۆپ دڵۆپ خوێنی شەهیدان بە دەمارەکانیدا دەگەڕێت و پەیمان نوێ دەکەینەوە، لەگەڵ خوێنی شەهیدەکانمان و کەسوکاری سەربەرزیان کە رێگاکەیان بەرنادەین.
قوباد تاڵەبانی رایگەیاند، رێبازێک کە بە خوێنی گەش و پیرۆزی 27 هەزار شەهید نەخشێندرابێت، بە مانای وشە رێبازی گەل و خاکی کوردستانە. هەربۆیە یەکێتی کە دڵۆپ دڵۆپ خوێنی شەهیدان بە دەمارەکانیدا دەگەڕێت، رانەهاتووە بە کۆڵدان و سەردانەواندن و سەرکەوتن لە چارەنووسیدا نووسراوە.
ئاماژەی بەوەشکرد، لە رۆژی شەهیدی یەکێتیدا پەیمان نوێ دەکەینەوە لەگەڵ خوێنی شەهیدەکانمان و کەسوکاری سەربەرزیان کە رێگاکەیان بەرنادەین و یەکێتی بۆ هەمیشە لە بەرەی داکۆکیکردن لە خەڵک و پاراستنی خاکی کوردستاندا دەمێنێتەوە.
بافڵ جەلال تاڵەبانی سەرۆکی یەکێتی، لە رۆژی شەهیدی یەکێتی پەیامێکی بڵاوکردەوە و دەڵێت: ئێمە خەم و ئازاری چەند ساڵەی کەسوکاری سەربەرزی شەهیدانمان لەیادنەکردووە.
بافڵ جەلال تاڵەبانی سەرۆکی یەکێتیی نیشتمانیی کوردستان رایگەیاند، رۆژی شەهیدی یەکێتی، رۆژی شانازی و هەڵدانەوەی لاپەڕە پڕشنگدارەکانی مێژووی خەباتی کوردایەتیمانە، بۆ ئێمەش ساتی بیرهێنانەوەی ئەو قوربانییانەیە کە رۆڵەکانی یەکێتی بۆ بزووتنەوەی رزگاریخوازی کوردایەتی خوێنی خۆیان کردە خەڵاتی بەدیهێنانی ئامانجە باڵاکانی گەلەکەمان.
ئاماژەی بەوەشکرد، یەکێتی بە شانازییەکی زۆرەوە، ئەمڕۆژە بەرز رادەگرێت و بە شکۆوە یادی هەموو ئەو شەهیدانەمان دەکەینەوە کە بە خوێنی خۆیان کوردستانەکەمانیان گەیاند بە ئەمڕۆ.
سەرۆکی یەکێتی ئەوەشی خستەڕوو، ئێمە خەم و ئازاری چەند ساڵەی کەسوکاری سەربەرزی شەهیدانمان لەیادنەکردووە. هەوڵەکانمان بۆ بوونیادنانی داهاتوویەکی گەشتر و خزمەتکردنی زیاتری خەڵکە خۆشەویستەکەمان، هێمای وەفاداری و دڵسۆزیمانە بۆ شەهیدان و ئەو بەها باڵایانەی رۆحی خۆیان لەپێناودا بەخشیوە.
یەكێتیی نیشتمانیی كوردستان رۆژی لە سێدارەدانی (شیهاب شێخ نوری، ئەنوەر زۆراب و جەعفەر عەبدولواحید)ی كردۆتە رۆژی شەهیدانی یەكێتیی، ئەم سێ سەركردەیە بە دروشمی ( كەم ژیان و كەڵ ژیان) چوونە بەردەم پەتی سێدارە، كە لە زیندانی رژێمی بەعسی دیكتاتۆری دابوون.
21ـی11ـی1976 ئەو سێ سەركردەیەی یەكێتی لەلایەن رژێمی بەعسەوە لە سێدارەدران، ئەم هەواڵە دڵتەزێنە سەرتاسەری كوردستانی خەمبار و تازییە بار كرد، ئازایەتی و (كەم ژیان و كەڵ ژیان) شادروشمی هاوڕێباز و پێشمەرگە بوو، بۆیە ئەم كاروانەی شۆڕشی نوێ بەخوێنی شەهیدان و خەباتی پێشمەرگایەتی و سیاسیەتی سەرۆك مام جەلال و سەركردەكانی بە كەناری ئارامی گەیشت و ئێستا كورد لە باشوور خاوەنی ئەزموون و قەوارەی خۆیەتی كە یەكێتی بەشی شێری سەركەوتنەكانی بەردەكەوێت.
بەپێی تۆماری مەكتەبی شەهیدان و تێكۆشەرانی یەكێتیی نیشتمانیی كوردستان ، یەكێتی خاوەنی زیاتر لە 27 هەزار شەهیدە.
یەكێتی خاوەنی هەزاران داستانی شاخ و زیندانە، كە شاهیدی بۆ تەمەنی ئەم هێزە سیاسییە دەدات كە درێغی نەكردووە لە بەدەستهێنانی مافە رەواكانی گەلی كورد و "خوێنی شەهیدەكانی یەكێتیی" دەدوێن، شەهیدانی زیندوو، شاهیدی دیكەی یەكێتیین لە خەباتی سەختی شاخ و زیندان، كە بە پێیی ئامارەكە" 4150 قارەمان و پێشمەرگەی كەمئەندامبووی سەنگەری یەكێتی هەیە"، كە لە پێناوی خاك و گەلەكەمان بەرانبەر بە رژێمی بەعس و تیرۆریستان برینداربوون.
سەرۆك مام جەلال هەمیشە دەیوت:"ئەوەی بەدەستهاتووە "یەكێتی" خوێنی شەهیدەكانە" بۆیە ئەم رۆژە لە مێژوی یەكێتی و بزووتنەوەی رزگاریخوازی گەلەكەماندا جیاوازە، كە هەمیشە كاروانی خەباتەكەی یەكێتی خوێنی لێچۆڕاوە لەپێناو ئەم نەتەوەو نیشتمانەدا.
شەهید شوناسی یەكێتییە
چەمكی (شەهید) بۆ یەكێتیی نیشتمانیی كوردستان شوناس و مێژوو و سەروەرییە،
چەمكێكی نەگۆڕە لەڕووی پیرۆزی و بایەخی هەموو هەڤاڵێكی یەكێتییەوە، ئەم چەمكە كۆكەرەوەی هەموو جیاوازییەكە لەڕیزەكانی یەكێتیدا، موقەدەسترین چەمكێكە لەمەرتەبەی سەرەوەدایە لەناو یەكێتیدا. ناو و بەهای گەورەی (شەهید) هەمیشە ئامادەییەكی پێشوەختی بووە لە چالاكی و كۆڕو كۆبوونەوەكانی یەكێتیداو پێش هەر وشەو قسەیەكیتر راوەستان لەئاست رۆحی پاكی شەهیدەكاندا بۆخۆی پەیام و قسەی شەهید بووە.
لەم رەوتە قوربانیدەرەدا، هێشتا زۆر نەبوو شۆڕشی نوی و خەباتی یەكێتی دەستی پێكردبوو، كاتیك شەهیدانی سەركردە (شیهاب شێخ نوری، ئەنوەر زۆراب، جەعفەر عەبدولواحید)، كە لە زیندانی بەعسیەكاندا بوون، بێ سڵەمینەوە، چوونە بەردەم پەتی سێدارەو دروشمە مەزنەكەی "كەم ژیان، كەڵ ژیان"یان كردە سەرمەشقی شەهیدبوون وبە ئازایەتیو جوامێریان وزەو تینیان دایەوە بە شۆڕشو بەهەق بوونە سەردەقشكێنانی شەهادەت .
هەر بۆیە رۆژی 21/11ی هەموو ساڵێك لە مێژوی گەلەكەماندا وەك رۆژی شەهیدانی یەكێتیی نیشتمانیی كوردستان تۆماركراوە و ھەموو ساڵێك ئەم یادە حزبی و میللییە دەبێتە بۆنەی دووپاتكردنەوەی بەڵێن و وەفا بۆ رێبازی شەھیدانی كوردایەتی و كوردەواری.
بەپێی داتاکانی ماڵپەڕی شەفافیەت داهاتی نانەوتی ئەم هەفتەیەی سلێمانی زیاتر لە 10 ملیار دیناربووە.
ماڵپەڕی شەفافیەت داهاتی ئەم هەفتەیەی بڵاوکردەوە و بەپێی ئامارەکە، لە رۆژی 15ـی 11 تا 21ـی ئەم مانگە، داهاتی نانەوتی پارێزگاکانی سلێمانی و هەڵەبجە و هەردوو ئیدارە سەربەخۆکانی راپەڕین و گەرمیان، 10 ملیار و 59 ملیۆن و 757 هەزار دینار بووە.
هەر بەپێی داتای ماڵپەڕی شەفافیەت، بە بەراورد بە هەفتەی رابردوو نزیکەی 2 ملیار دینار داهاتی نانەوتی زیاتر بووە.
جێگەی ئاماژەیە، ماڵپەڕی شەفافییەت بۆ داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.