قوباد تاڵەبانی، جێگری سەرۆکوەزیران پێشوازیکرد لە ستیڤن بیتنەر، کونسوڵی گشتیی ئەمریکا لە هەرێمی کوردستان و لە کۆبوونەوەی نێوانیاندا چەند پرسێکی جێی بایەخی هەردوولا تاوتوێ کران.

لە کۆبوونەوەکەدا ئەمڕۆ لە هەولێر بەڕێوەچوو، جێگری سەرۆکوەزیران ئاماژەیدا بە سەردانی وەفدی دەم پارتی بۆ هەرێمی کوردستان و ئەو پرۆسەی لە تورکیا سەبارەت بە پرسی کورد دەستی پێ کردوە و هیوای خواست ئەمجارەیان پرسی کورد لە تورکیا بە شێوەیەکی ئاشتییانە چارەسەر بکرێت و کۆتایی بە شەڕ و توندوتیژی بهێنرێت.

لە تەوەرێکی دیکەی کۆبوونەوەکەدا باس لە پرسی هەناردەکردنەوەی نەوتی هەرێم و هەمواری یاسای بودجە کرا. لەم چوارچێوەیەدا قوباد تاڵەبانی باسی لەوەکرد کۆبوونەوەکانی نێوان هەرێم و بەغدا بۆ جێبەجێکردنی یاسای بودجە بە شێوەیەکی باش بەڕێوەدەچن، سەبارەت بەپرسی هەناردەکردنەوەی نەوتیش وتی؛ وەفدێکی عێراقی لە هەولێرن و کۆبوونەوەکانیان ئیجابی  بوون و چاوەڕێی ئەنجامی باشین.

لەسەر بێڕێزیکردن بە کەسوکاری ئەنفال فەرمانی دەستگیرکردن بۆ (عومەر مەحمود فەقێ) دەرکرا.

ئەکرەم ساڵح سەرۆکی کۆمەڵەی داکۆکی لە پرسی ئەنفال بە کوردسات نیوزی راگەیاند: "ئەمڕۆ سێشەممە، دادگای کەلار فەرمانی دەستگیرکردنی بۆ (عومەر مەحمود فەقێ) دەرکرد بەهۆکاری ئەوەی لە پارچە ڤیدیۆیەکدا سوکایەتی بە کەسوکاری ئەنفال کردووە و ستایشی سەدام حسێنی کردووە.

ئاماژەی بەوەشدا، "لە دوای دەرچونی بڕیارەکەوە، دادگا رێکارەکان دەگرێتە بەر".

عومەر مەحمەد فەقێ لە چەند رۆژی رابردوودا لە تۆمارێکی ڤیدیۆییدا ستایشی سەدام حسێنی کرد و بێڕێزی بە کەسوکاری ئەنفال کرد، ڤیدیۆکە کاردنەوەی لێکەوتەوە و ئەمڕۆش فەرمانی دەستگیرکردنی بۆدەرکرا. 

قوباد تاڵەبانی دوای کۆبوونەوەی یەکێتی لەگەڵ وەفدی ئیمڕاڵی رایگەیاند، لەبەر رۆشنایی رێبازی مام جەلال یەکێتیی نیشتمانیی کوردستان روانگەیەکی روون و چەسپاوی بۆ چارەسەری پرسی کورد هەیە.

قوباد تاڵەبانی لێپرسراوی مەکتەبی سکرتارییەتی سەرۆک مام جەلال رایگەیاندووە، یەکێتیی نیشتمانیی کوردستان لەبەر رۆشنایی رێبازی سەرۆک مام جەلال روانگەیەکی روون و چەسپاوی هەیە بۆ چۆنییەتی چارەسەرکردنی پرسی کورد لە تورکیا.

ئاماژەی بەوەشکردووە، وەک هەمیشە بە هەموو توانایەوە پشتگیری لە چارەسەری ئاشتییانەی پرسی کورد دەکات و لەم چوارچێوەیەدا هەر ئەرکێکی نەتەوەیی بکەوێتە سەرشانی بە شانازییەوە جێبەجێی دەکات.

قوباد تاڵەبانی ئەوەشی خستووەتە روو، ئەمڕۆ لە کۆبوونەوە لەگەڵ وەفدی ئیمراڵی بە سەرۆکایەتی پەروین بوڵدان و سری سورەیا ئوندەر، بافڵ جەلال تاڵەبانی سەرۆکی یەکێتیی نیشتمانیی کوردستان، پابەندیی یەکێتی بە سیاسەت و روانگەی سەرۆک مام جەلالیان بۆ پشتیوانیکردن لە چارەسەری ئاشتییانەی پرسی کورد لە تورکیا دووپات کردەوە و ئامادەیی یەکێتیان دەربڕی بۆ هەموو جۆرە هاوکاری و پشتیوانییەک لەپێناو چەسپاندنی ئاشتی و دابینکردنی مافەکانی گەلی کورد لە تورکیا.

ئەمڕۆ وەفدی ئیمڕاڵی لە درێژەی سەردانەکەیدا بۆ هەرێم لەگەڵ بافڵ تاڵەبانی و قوباد تاڵەبانی و شاناز ئیبراهیم ئەحمەد کۆبووەوە و سەردانی مەزاری مام جەلالیشیان کرد، پەروین بوڵدانی ئەندامی وەفدەکە لە یاداشتی مەزاری مامدا نووسی، "عەبدوڵا ئۆجەلان رایسپاردین بە کورەکانی مام جەلال بڵێن، پەیوەندییەکی زۆر بەهێزم لەگەڵ مام جەلال هەبوو، ئێمەش شانازی دەکەین کە هەڵگری ئەم نامەیەین".

ئەوەش لە کاتێکدایە، دوای ١٠ ساڵ لە رێگریی دەسەڵاتدارانی توركیا، رۆژی ٢٨ی ١٢ی ساڵی رابردوو، رێگە درا وەفدێكی پەرلەمانتارانی پارتی یەكسانی و دیموكراسی 'دەم پارتی' بۆ دیدار لەگەڵ عەبدوڵا ئۆجەلان بچنە دوورگەی ئیمڕاڵی و لەگەڵیدا کۆببنەوە، کە کۆبوونەوەکەش سێ سەعاتی خایاند دوابەدوای ئەوەش جارێكی دیکە لە مانگی یەکی ئەمساڵدا سەردانی ئیمڕاڵییان کردەوە و لەگەڵ لایەنەکانی تورکیاشدا کۆبوونەوەیان ئەنجامدا و پەیامی ئۆجەلانیان پێگەیاندن.

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە وەفدی ئیمراڵی بە سەرۆکایەتیی خاتوو پەروین بوڵدان و سری سورەییا ئوندەر کرد.

لە دیدارەکەدا کە قوباد تاڵەبانی، ئەندامی مەکتەبی سیاسی ئامادەیبوو، وەفدی ئیمراڵی سڵاو رێز و پەیامی (عەبدوڵا ئۆجەلان)یان گەیاندە بافڵ جەلال تاڵەبانی و بڕیار و سیاسەت و بژاردەکانی خۆشیان لەسەر رووداوە سیاسییەکانی ناوچەکە، پرسی ئاشتی لە تورکیا و گفتوگۆکانیان لەگەڵ عەبدوڵا ئۆجەلان روونکردەوە.

لەبەرامبەردا بافڵ تاڵەبانی، بیروبۆچوونی خۆی و ستراتیژیی یەکێتی لەبارەی قۆناغی نوێی ئاشتی لە تورکیا بە راشکاوانە خستەڕوو و رایگەیاند، پشتگیری و پشتیوانی لەهەر دەستپێشخەرییەک دەکەین کە مافی گەلەکەمان لە تورکیا دەپارێزێت و وەک یەکێتیش هاریکاریی سەرخستنی ئەم هەوڵە مێژووییە دەبین کە بەردی بناغەکەی لە ساڵی (1993) سەرۆک مام جەلال داینا.

هەر لە دیدارەکەدا سەرۆکی یەکێتیی نیشتمانیی کوردستان روونیکردەوە، تاوەکو پرسی کورد چارەسەر نەکرێت ناوچەکە ئاشتی و ئارامی سەرتاسەری بەخۆیەوە نابینێت، وەک وتوشمانە پرسی کورد بە چەک و شەڕ نە چارەسەر دەبێت، نە ئەنجامی دەبێت، چونکە تاکە بژاردە گەڕانەوەیە بۆ گفتوگۆ و دیالۆگی جدی. هیوادارین هەموومان دەربەست و پەرۆشانە کار بۆ سەرخستنی ئەم دەرفەتە مێژووییە بکەین لەسەر بنەمای هاوبەشی و برایەتی و پەرۆشی بۆ بەدیهێنانی ئاشتی و ئارامی.

سەرۆک بافڵ جەلال تاڵەبانی لە بەشێکی تری وتەکانیدا ئاماژەی بۆ ئەوەشکرد، باوەڕمان بە برایەتی و پێکەوەژیانی ئاشتییانە هەیە، هەرگیزیش نابینە هەڕەشە بۆ هیچ وڵاتێکی دراوسێمان و پەرۆشی ئەوەین هەموومان بە برایەتی و ئاشتی بژین، ئەمڕۆش دەستپێشخەر دەبین تاوەکو لەبری هەڕەشە زمانی دیالۆگ زاڵبکەین، دەستی برایەتی بۆ هەموولایەک درێژدەکەین، هیوادارین نیەتێکی جدی هەبێت بۆ پتەوکردنی برایەتی کورد و تورک و سەرخستنی ئەم هەوڵە نیشتمانییە.

کەشناسیی هەرێم پێشبینییەکانی کەشوهەوای راگەیاند و ئاماژەی بەوەکردووە، شەپۆلێکی دیکەی بارانبارین ناوچەکە دەگرێتەوە.

کەشناسیی هەرێم رایگەیاندووە، ئەمڕۆ سێشەممە، ئاسمان ساماڵ دەبێت بە گشتی و پلەکانی گەرما کەمێک بەرز دەبنەوە.

ئاماژەی بەوەشکردووە، سبەینێ چوارشەممە، ئاسمان ساماڵ و پەڵەهەور دەبێت، لە کاتەکانی بەیانى تاوەکو نیوەڕۆ هەور زیاد دەکات و ئاسمان و دەگۆڕێت بۆ نیمچەهەور و لە شەودا بۆ هەورى تەواو، لە کاتەکانى درەنگانى شەو کاریگەرى شەپۆلێکى بارانبارین روو لە ناوچەکە دەکات.

دەشڵێت، خێرایی با لەسەرخۆ و مامناوەند دەبێت و پلەکانی گەرما کەمێک بەرزدەبنەوە بەراورد بە ئەمڕۆ.

بەرزترین پلەکانی گەرمای پێشبینیکراو بە پلەی سیلیزی :

هەولێر: 16 پلەى سیلیزى

سلێمانی: 12 پلەى سیلیزى

دهۆک: 16 پلەى سیلیزى

کەرکوک: 18 پلەى سیلیزى

زاخۆ: 16 پلەى سیلیزى

هەڵەبجە: 11 پلەى سیلیزى

حاجی ئۆمەران: 6 پلەى سیلیزى

سۆران: 13 پلەى سیلیزى

گەرمیان: 18 پلەى سیلیزى

ئەمڕۆ دادگای فیدڕاڵی عیراق لەبارەی سکاڵاکەی سەرۆک کۆمار تایبەت بە موچەی موچەخۆرانی هەرێم کۆدەبێتەوە، کە 10ی ئەم مانگە تۆماری کردبوو.

بڕیارە ئەمڕۆ سێشەممە، دادگای فیدڕاڵی عیراق لەبارەی سکاڵایەکی د. لەتیف رەشید سەرۆک کۆماری عیراق کۆببێتەوە، کە رۆژی 10ی ئەم مانگە لەبارەی موچەی فەرمانبەرانی هەرێمەوە، لەسەر سەرۆک وەزیران و سەرۆکی ئەنجومەنی نوێنەران و وەزیری دارایی عیراق تۆماری کردبوو.

سكاڵاكەی سەرۆك كۆمار لەبارەی موچەی فەرمانبەرانی هەرێم و پابەندكردنی وەزارەتی دارایی عیراقە بە خەرجكردنی موچە کە لە چوار خاڵ پێكهاتووە، کە داوایکردووە، فەرمانێكی وەلائی خێرا دەربکرێت بۆ پابەندكردنی وەزارەتی دارایی عیراق بە خەرجكردنی موچەی فەرمانبەرانی هەرێم.

هاوکات، پابەندكردنی وەزارەتی دارایی عیراق بە خەرجكردنی موچەی فەرمانبەرانی هەرێم بە شێوەیەكی بەردەوام و بەبێ وەستان، هەروەها جێبەجێكردنی بەبانكیكردنی موچە بەپێی رێنماییەكانی بەبانكیكردن، بە جۆرێک هاوشێوەی ئەو رێكارانە بێت كە حكومەتی عیراق دەیگرێتە بەر.

بڕیاربوو دادگای فیدڕاڵی عیراق رۆژی 12ی مانگ لەبارەی ئەو سکاڵایە کۆببێتەوە، بەڵام دانیشتنەکە بۆ ئەمڕۆ سێشەممە، 18ی شوبات دواخرا.

ئەمڕۆ وەفدی ئیمڕاڵی لە سلێمانی كۆبوونەوەكانی سەبارەت بە پرۆسەی ئاشتی دەست پێدەكات، بڕیارە لەگەڵ بافڵ تاڵەبانی و قوباد  تاڵەبانی و شاناز ئیبراهیم ئەحمەد كۆببێتەوە.

وەفدی ئیمڕ‌اڵی كە پێكهاتوون لە سری سورەییا ئۆندەر، پەروین بوڵدان و كاسكین بایندر، هاوسەرۆكی گشتی دەبەپە و ئەندامانی فەرمانگەی یاسایی و وتەبێژی كۆمیسیۆنی پەیوەندییەكانی دەرەوەی دەم پارتی، سەرەتا سەردانی مەزاری سەرۆك مام جەلال دەكەن.

دواتر وەفدەكە بە جیا لەگەڵ بافڵ جەلال تاڵەبانی سەرۆكی یەكێتیی نیشتمانیی كوردستان و قوباد تاڵەبانی و شاناز ئیبراهیم ئەحمەد  كۆدەبێتەوە، بە مەبەستی گفتوگۆكردن لەسەر دەستپێكردنەوەی پرۆسەی ئاشتی لە توركیا و باكوری كوردستان.

ئەوەش لە كاتێكدایە وەفدی ئیمراڵی لە 28ی 12ی 2024 لە زیندانی ئیمڕاڵی سەردانی ئۆجەلانیان كرد، دواتر پەیامی ئۆجەلانیان گەیاندە حزبە سیاسییەكانی توركیا، لە رۆژی 15ی ئەم مانگەش سەردانی هەرێمی كوردستانی كردووە.

قوباد تاڵەبانی جێگری سەرۆک وەزیرانی هەرێم راگەینراوێکی سەبارەت بە رێگریکردن لە جوتیارانی کورد لە ناحیەی سەرگەڕان بڵاوکردەوە رایگەیاند: پێچەوانەی دەستور و یاسا سوپا لە دژی خاوەنە رەسەنەكانی زەوی و زاری سەرگەڕان بەكاردەهێنرێت.

دەقی راگەیەنراوەکە.....

هێشتا مانگێک بەسەر پەسندکردنی یاسای هەڵوەشاندنەوەی بڕیارەکانی ئەنجومەنی سەرکردایەتیی بەعسی هەڵوەشاوە تێپەڕ نەبووە کەچی پێچەوانەی دەستور و یاسا سوپا بەکاردەهێنرێت لە دژی خاوەنە رەسەنەکانی زەویوزاری سەرگەڕان.

ئێمە هەمیشە کارمان کردوە و هاندەربووین بۆ بەهێزکردنی گیانی پێکەوەژیان لە کەرکوک، بەکارهێنانی سوپا و رەفتاری لەم شێوەیە هەنگاوێکی مەترسیدارە و بەردەوامیی پێشێلکاری لەم چەشنە داهاتووی پێکەوەژیان دەخاتە مەترسییەوە.

بە تەواوی پشتگیری جوتیاران دەکەین و بە هاوکاری هەموو لایەنەکان لە کەرکوک هەوڵی چارەسەرکردنی یەکجاری ئەم کێشەیە دەدەین و پێداگری دەکەین لەسەر سزادانی یاسایی سەرپێچیکاران و ئەوانەشی فەرمانیان داوە بە بەکارهێنانی سوپا لە دژی جوتیارانی کورد.

دەزگای ئاسایشی هەرێم دەستگیركردنی هەشت تۆمەتباری بە تۆمەتی خراپ بەكارهێنانی تۆڕە كۆمەڵایەتییەكان راگەیاند.

دەزگای ئاسایشی هەرێم لە راگەیەنراوێكدا ئاماژەی بۆ ئەوەكرد، بەڕێوەبەرایەتی ئاسایشی پارێزگای سلێمانی بە مەبەستی بەرەنگاربوونەوەی بڵاوكراوە نەشیاوەكان و بە بڕیاری داواكاری گشتی، هەشت تۆمەتباری خراپ بەكارهێنانی تۆڕەكۆمەڵایەتییەكانی دەستگیركرد.

راشیگەیاند، تۆمەتباران لە رێگەی گرتە ڤیدیۆیی و لایڤەكانیان بابەتی نەشیاویان بڵاوكردوەتەوە و كاریگەری نەرێنییان لەسەر تاك و خێزان هەبووە.

لە بەشێكی تری راگەیەنراوەكەدا هاتووە، لەسەر داوای هاووڵاتییان بۆ زیاتر پاراستنی بەها كۆمەڵاتییەكان، ئەو تۆمەتبارانە دەستگیركران و رووبەڕوی یاسا كرانەوە.

سبەینێ لیژنەی دارایی ئەنجومەنی نوێنەران لەگەڵ وەزیری دارایی عیراق كۆدەبێتەوە، تایبەت بە موچەی مانگی 12ـی ساڵی رابردووی موچەخۆرانی هەرێم و ناكۆكییە داراییەكانی هەولێر و بەغداد.

پەیامنێری كوردسات نیوز لە بەغداد رایگەیاند، لە كۆبوونەوەكەدا تاوتوێی كێشە و گرفتە داراییەكانی نێوان هەولێر و بەغداد دەكرێت، هاوكات، پرسیار ئاڕاستەی وەزیری دارایی عیراق دەكرێت لەسەر پرسی بە بانكیكردنی موچەی هەرێم و پابەندییەكانی حكومەتی هەرێم لەوبارەیەوە، لەنێویاندا خستنەڕووی داتا و زانیاریی پێویست موچەخۆران بۆ وەزارەتی دارایی عیراق.

ئەوەشی خستەڕوو، لیژنەی دارایی و وەزیری دارایی عیراق بۆ یەكلاییكردنەوەی چارەنوسی موچەی مانگی 12ـی ساڵی رابردووی موچەخۆرانی هەرێم گفتوگۆ دەكەن. پەیامنێری كوردسات نیوز راشیگەیاند، چاوەڕوان دەكرێت لەسەر چارەنووسی موچەی مانگی 12، لیژنەی دارایی لەگەڵ وەزارەتی دارایی هەرێمیش كۆببێتەوە.

وەفدی ئیمڕ‌‌اڵی بۆ گفتوگۆكردن لەسەر پرۆسەی ئاشتی لە توركیا گەیشتە سلێمانی و سبەینێ لەگەڵ سەرۆكی یەكێتیی نیشتمانیی كوردستان كۆدەبێتەوە.

ئێوارەی ئەمڕۆ، وەفدی ئیمڕ‌‌اڵی كە پێكهاتوون لە سری سورەییا ئۆندەر، پەروین بوڵدان و كاسكین بایندر، هاوسەرۆكی گشتی دەبەپە و ئەندامانی فەرمانگەی یاسایی و وتەبێژی كۆمیسیۆنی پەیوەندییەكانی دەرەوەی دەم پارتی گەیشتنە شاری سلێمانی، بە مەبەستی گفتوگۆكردن لەسەر پرۆسەی ئاشتی لە توركیا.

وەفدەكە سبەینێ‌ لەگەڵ بافڵ جەلال تاڵەبانی سەرۆكی یەكێتیی نیشتمانیی كوردستان و لێپرسراوانی یەكێتی كۆدەبنەوە بۆ گفتوگۆكردن لەسەر پەیامی عەبدوڵا ئۆجەلان رێبەری زیندانیكراوی"پەكەكە" و دەستپێكردنەوەی پرۆسەی ئاشتی لە توركیا و باكوری كوردستان.

وەفدی ئیمراڵی لە 28ی 12ی 2024 لە زیندانی ئیمڕاڵی سەردانی ئۆجەلانیان كرد، دواتر پەیامی ئۆجەلانیان گەیاندە حزبە سیاسییەكانی توركیا، لە ئێستاشدا لە هەرێمی كوردستان ئەو پرسە تاوتوێ دەكەن.

مەکتەبی سیاسی یەکێتیی نیشتیمانیی کوردستان سەبارەت بە رێگریکردن لە جوتیارانی کورد لە ناحیەی سەرگەڕان راگەیەنراوێکی بڵاوکردەوە و رایدەگەیەنێت: چارەسەری ململانێكانی زەوی و زار و موڵكداری هەرگیز بە بەكارهێنانی ناڕەوای هێز و پەلاماردانی هاوڵاتیان سەرناگرێت

دەقی راگەینراوەکە:

یەکێتیی نیشتمانیی کوردستان داوا لە حکومەتی ئیتحادی دەکات رێگا لە دەستتێوەردانەکانی هێزەکانی سوپا بگرێت لە کەیسی زەویزاری دێهاتەکانی کەرکوک و دەوروبەری و فەرمان بە یەکەکانی سوپای وڵات بکات پابەندی بەرپرسیارێتیی نیشتمانیی و دەستوری خۆی بێت لە دەستوەرنەدان لە گرفتە ناوخۆییەکانی ناو کۆمەڵگەی عیراقی و پێکهاتەکانی.

یەکێتیی نیشتمانیی پێی وایە  ئیشی سوپا نییە بەشێک بێت لە گرفتە ناوخۆییەکان و چارەسەری ململانێکانی زەویوزار و موڵکداریش  هەرگیز بە بەکارهێنانی ناڕەوای هێز و پەلاماردانی هاوڵاتیان سەرناگرێت و رێگا دروستەکەی چارەسەری ناکۆکی لەسەر موڵکوماڵ نییە.چونکە لایەنگیری  دامەزراوەکانی دەوڵەت ، بەتایبەتیش  سوپا کە ئەرکی پاراستنی سنوورەکانی وڵاتە ،  بۆ هەر  لایەنێک لە هەر ململانێیەکی ناوخۆییدا پێشینەیەکی  مەترسیدارە و پێشێلکردنی دەستوری وڵاتیشە، هەروەک پێشێلکردنی یاسا پەسەندکراوەکانی ئەنجومەنی نوێنەرانیشە کە تازەکیی بڕیارەکانی رژێمی پێشووی بەعسی لەسەر موڵک و زەویوزاری جوتیاران هەڵوەشاندۆتەوە.

ئێمە پێمان وایە دیاردەی خۆهەڵقورتاندنی  هێزەکانی سوپای  لە کێشەی  زەویوزار لە ناوچەیەکی هەستیاری وەکو ناوچە دابڕاوەکانی کەرکوک هیچ ژینگەیەکی تەندروست بۆ بەرقەرارکردنی یاسا و دەستوور دابین ناکات، بەڵکو ئاڵۆزتریشی  دەکات. ئەرکی سەرۆک وەزیرانی حکومەتی ئیئتلافیشە روونتر  ئەم بەرپرسیارێتییە نیشتمانیی و دەستورییە بگرێتە ئەستۆ و بە هیممەتتر لەسەری بێتە جواب.

مەکتەبی سیاسیی

یەکێتیی نیشتمانیی کوردستان

لە ناحیەی سەرگەڕان گرژی لەنێوان جوتیاران و سوپای عیراق درووستبوو.

پەیامنێری کوردستان نیوز رایگەیاند، ئەمڕۆ جارێکی دیکە گرژی لەنێوان جوتیارانی کورد و سوپای عیراق لەسنوری ناحیەی سەرگەڕان دروستبوو، دەشێڵت رێگری لەجوتیاران دەکرێت زەوییەکانیان بکێڵن.

ئاماژەی بەوەشکرد، سوپای عیراق دەیانەوێت دەست بەسەر تراکتۆری جوتیارانی کورد لە ناحیەی سەرگەڕان بگرن، جوتیارانیش رێگری لە سوپای عیراق دەکەن و رووبەروویان وەستاونەتەوە.

لە زانکۆی سلێمانی یەکەمین دیداری زانستیی تایبەت بە ئاسایشی ئەلیكترۆنی بەڕێوەچوو، قوباد تاڵەبانیش دەڵێت، "لەم سەردەمەدا هیچ وڵاتێک، هیچ حکومەتێک، هیچ کۆمپانیایەک، هیچ هاووڵاتییەک پارێزراونییە لە هێرشە جۆراوجۆرە ئەلیکترۆنییەکان"

قوباد تاڵەبانی جێگری سەرۆک وەزیرانی حکومەتی هەرێمی کوردستان لە هەژماری تایبەتی خۆی لە تۆڕی کۆمەڵایەتی فەیسبوک پەیامێکی بڵاوکردووەتەوە و دەڵێت، "ئاسایشی ئەلیکترۆنی بەشێکی گرنگە لە ئاسایشی نیشتمانی هەر وڵاتێک. لەم سەردەمەدا هیچ وڵاتێک، هیچ حکومەتێک، هیچ کۆمپانیایەک، هیچ هاووڵاتییەک پارێزراونییە لە هێرشە جۆراوجۆرە ئەلیکترۆنییەکان، ئەگەر بێتو پلان و ڕێوشوێنی پێشوەختە نەگیرابێتەبەر بۆ پاراستنی ئاسایشی ئەلیکترۆنی".

دەشڵێت، "سوپاس بۆ زانکۆی سلێمانی و رێکخەرانی یەکەمین دیداری زانستی ئاسایشی ئەلیکترۆنی. ئەم جۆرە دیدار و توێژینەوانە بەرچاوڕوونترمان دەکات لە گرتنەبەری ڕێوشوێنی گونجاو بۆ پاراستنی ئاسایشی نیشتمانیمان. هەروەها هاندەرمانە بەرەو بونیادنانی ژێرخانێکی بەهێزی ئەلیکترۆنی تا بتوانین لە سەردەمی دیجیتاڵدا هەم ئاسایشی خۆمان بپارێزین و هەم تەکنەلۆژیا و زیرەکیی دەستکرد بخەینە خزمەت گەشەپێدانی وڵاتەکەمانەوە".

ئەمڕۆ دووشەممە 17ـی 2ـی 2025، یەکەمین دیداری زانستیی تایبەت بە ئاسایشی ئەلیكترۆنی لە زانكۆی سلێمانی بەڕێوەچوو.

 ەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و رایگەیاند، پلەکانی گەرما نزمتر دەبنەوە.

کەشناسیی هەرێم رایگەیاندووە، ئەمڕۆ دووشەممە، ئاسمان نیمچەهەور و لە ناوچە شاخاوییەکانی سنووری رۆژهەڵات هەوری تەواو دەبێت، لەگەڵ کەمێک نمەباران و بەفر لەو ناوچانە، پاشان لە کاتەکانی دوای نیوەڕۆدا کەش بەگشتی سەقامگیر دەبێتەوە.

ئاماژەی بەوەشکردووە، ئەمڕۆ پلەکانی گەرما 1 بۆ 3 پلەی سیلیزی نزم دەبنەوە بەتایبەتی لە ناوچەکانی رۆژهەڵاتی هەرێم.

ئاماژەی بەوەشكردووە، سبەینێ سێشەممە، ئاسمان ساماڵ دەبێت و لەکاتەکانی شەو بۆ نیمچەهەور دەگۆڕێت و پلەکانی گەرما هەر لە نزمیدا دەمێننەوە.

بەرزترین پلەکانی گەرمای پێشبینیکراو بە پلەی سیلیزی :

هەولێر: 18 پلەى سیلیزى

سلێمانی: 14 پلەى سیلیزى

دهۆک: 16 پلەى سیلیزى

کەرکوک: 19 پلەى سیلیزى

زاخۆ: 17 پلەى سیلیزى

هەڵەبجە: 15 پلەى سیلیزى

حاجی ئۆمەران: 1 پلەى سیلیزى

سۆران: 13 پلەى سیلیزى

گەرمیان: 18 پلەى سیلیزى