کوردستان
قوباد تاڵەبانی، جێگری سەرۆک وەزیران پێشوازیکرد لە ئەحمەد حەسەن ئەلشەحی، کونسوڵی گشتیی ئیمارات لە هەرێمی کوردستان و پێکەوە گفتوگۆیان کرد لەبارەی روداوی هێرشکردنەسەر کۆرمۆر و پرسی پەیوەندیی ئابووری و بازرگانی نێوان ئیمارات و هەرێمی کوردستان.
ئەمڕۆ پێنج شەممە، قوباد تاڵەبانی لەگەڵ کونسوڵی گشتیی ئیمارات کۆبووەوە، هەردوولا بە توندی ئیدانەی هێرشکردنەسەر سەر کێڵگەی غازی کۆرمۆریان کرد.
جێگری سەرۆک وەزیران هێرشەکەی بە هێرشێکی تیرۆریستی ناوبرد کە ژێرخانی وزە و ئابووری کوردستان و عیراقی کردووەتە ئامانج و دەبێت حکومەتی فیدراڵی بەبێ هیچ جۆرە خەمساردییەک و بە زووترین کات بکەران و ئەوانەشی لە پشتی ئەو هێرشەوەن بۆ رای گشتی ئاشکرا بکات و رووبەڕووی سزای یاساییان بکاتەوە.
قوباد تاڵەبانی ئاماژەی بەوەشدا دەبێت یەکەم هەنگاوی حکومەتی داهاتووی عیراق کۆتاییهێنان بێت بەو گروپ و هێزە چەکدارانەی دەرەوەی دەوڵەت کە ئاسایش و سەقامگیریی سیاسی و ئابوورییان خستووەتە مەترسییەوە.
لە بەشێکی دیکەی کۆبوونەوەکەدا باس لە پەیوەندیی ئابووری و بازرگانی نێوان ئیمارات و هەرێمی کوردستان کرا و
قوباد تاڵەبانی خۆشحاڵی خۆی دەربڕی کە ئیمارات گرنگی بە وەبەرهێنان لە هەرێمی کوردستان دەدات.
راشیگەیاند لە هەرێمی کوردستان دەرفەتی گەورە هەیە بۆ گەشەسەندن لە کەرتە جیاوازەکاندا و حکومەتی هەرێمیش هەموو جۆرە کارئاسانییەک پێشکەشی کۆمپانیا و وەبەرهێنەرانی ئیمارات دەکات.
مارک ساڤایای نێردەی تایبەتی دۆناڵد ترەمپ، رایگەیاندوە گروپە چەکدارەکان کە بە شێوەیەکی نایاسایی لە عیراق چالاکییان هەیە و جێبەجێکاری ئەجیندای بیانین، هێرشەکەی سەر کۆرمۆریان ئەنجام داوە.
مارک ساڤایا لەسەر هێرشەکەی شەوی رابردووی کێڵگەی غازی کۆرمۆر، پەیامێکی لە هەژماری پلاتفۆڕمی کۆمەڵایەتی ئێکس بڵاوکردەوە و تێیدا ئیدانەی هێرشەکە دەکات.
ئاماژەی بەوەشکردوە؛ گروپە چەکدارەکان هێرشەکەیان ئەنجامداوە و داوای لە حکومەتی عیراق کردووە کە بیاندۆزێتەوە و روبەڕووی یاسایان بکاتەوە.
لە بەشێکی دیکەی پەیامەکەدا نوسیویەتی؛ "با رونبێت و بە ئاشکرا دەڵێم لە عیراقێکی تەواو سەروەریدا هیچ شوێنێک بۆ ئەم گرووپانە نابێت".
مارک ساڤایا پشتیوانی خۆشی بۆ هەرێمی کوردستان لە چوارچێوەی عیراقی یەکگرتوودا دووپات کردووەتەوە و رایگەیاندوە؛ بەغداد و هەولێر هان دەدەن بۆ ئەوەی هاوکارییەکانیان لە بواری ئاسایشیدا قوڵتر بکەنەوە و لە نزیکەوە لەگەڵ یەکتر کار بکەن بۆ پاراستنی ژێرخانی ئابووری و وزە.
قوباد تاڵەبانی رایگەیاندوە؛ بە توندی ئیدانەی شێوازی روماڵکردنی کەناڵەکان و هەندێک سۆشیال میدیای ئاراستەکراو و نزیک لە پارتی دەکات کە چەواشەکارانە لەلایەکەوە باس لە یەکڕیزی و یەکگوتاریی کورد دەکەن و لە لایەکی دیکەشەوە رێک بە نەفەسی سەردەمی شەڕی نەگریسی ناوخۆ کار بۆ تێکدانی ئاشتەوایی کۆمەڵایەتی و سیاسی دەکەن.
قوباد تاڵەبانی لەسەر هێرشەکەی سەر کۆرمۆر و شێوازی وماڵکردنی ژمارەیک میدا راگەیەندراوێکی بڵاوکردەوە وتێیدا ئیدانەی ئەو سێوازە روماڵە دەکات.
لە راگەیەندراوکەدا قوباد تاڵەبڤانی رایگەیاندوە؛ بە توندی ئیدانەی شێوازی روماڵکردنی کەناڵەکان و هەندێک سۆشیال میدیای ئاراستەکراو و نزیک لە پارتی دەکات و داواش لە سپۆنسەر و خاوەنەکانیان دەکات لەپێناو بەرژەوەندیی گشتی و نیشتمانیدا کۆتایی بەم شێواز و گوتارە میدیاییە مەترسیدارە بهێنن و سنوورێکیان بۆ دابنێن.
قوباد تاڵەبانی وتوشیەتی؛ دڵنیابن رەنگە چەواشەکاری و میدیای پروپاگەندە بۆ ماوەیەک راستییەکان لێڵ بکات، بەڵام دواجار راستی وەک خۆری درەوشاوە خۆی نیشانی هەمووان دەدات.
لقی سلێمانی سەندیکای رۆژنامەنووسانی کوردستان لەبارەی هێرشەکەی سەر کێڵگەی غازی کۆرمۆر رایگەیاند، ھەندێک میدیاو میدیانۆچکەی نابەرپرس رۆڵی خۆیان گۆڕی لە گەیاندنی راستیەوە بۆ بڵاوکردنەوەی ترس و تۆقاندن و تۆمەت بەخشینەوە.
کاروان ئەنوەر سکرتێری لقی سلێمانی سەندیکای رۆژنامەنووسانی کوردستان رایگەیاند، ھاوکات لەگەڵ بۆردومانکردنی کێڵگەکانی کۆرمۆر و ئەو زەرەرو زیانە زۆرەی بەر یەکەکانی بەرھەمھێنان کەوتن، ھەندێک میدیاو میدیانۆچکەی نابەرپرس رۆڵی خۆیان گۆڕی لە گەیاندنی راستیەوە بۆ بڵاوکردنەوەی ترس و تۆقاندن و تۆمەت بەخشینەوەو پێشێلکردنی کاری میدیا و بینینی رۆڵی لایەنی یاساو دادگاو لێکۆڵەر.
لقی سلێمانی سەندیکای رۆژنامەنووسانی کوردستان، داواکارە وەرگری کورد و تاکی نیشتمان پەروەری ئەم ھەرێمە نەکەونە ژێر کاریگەریی ھەندێک میدیای مەبەستدارو سۆشیاڵ میدیاو قەڵەمچیەکانی.
کاروان ئەنوەر ئاماژەی بەوەشکرد، با لۆژیک و ژیریی و مرۆڤدۆستی پێوەربن بۆ راستیی روداوەکان نەوەک ھەندێک میدیای ژەھرپرژێن.
دەستەی ناوچە کوردستانییەکان لەبارەی سەرژمێرییەوە راگەیەنراوێکی بڵاوکردەوە و ئاماژە بەوەدەکات، هەر جۆرە دەستبردنێک بۆ گۆڕینی ناسنامەو دیموگرافیای شاری کەرکوک و خانەقین و شەنگال و تەواوی ناوچە کوردستانیەکان قبوڵ کراو نیە.
دەستەی ناوچە کوردستانییەکانی دەرەوەی ئیدارەی هەرێم رایگەیاند، دوێنی چوارشەممە وەزارەتی پلاندانانی عیراق دەرئەنجامی سەرژمێری گشتی عیراقی ڕاگەیاند، وەک لای هەموو لایەک روونە بڕیاری هاوبەشی هەردوو وەزارەتی پلاندانانی حکومەتی عیراقی فیدراڵ و حکومەتی هەرێمی کوردستان وابوو ، سەرژمێری ساڵی 1957 بکرێتە بنەمای سەرژمێریەکە لە کەرکوک و ناوچە کوردستانیەکان.
ئەوەشی خستەڕوو، لەو بارەیەوە ئەنجومەنی وەزیرانی عیراق لە کۆبوونەوەی ئاسایی خۆی لە 5ـی11ـی2025 بڕیاریدا پێش راگەیاندنی دەرئەنجامەکانی سەرژمێری گشتی تەواوی ئەو هاووڵاتیانەی لەبەر هەر هۆکارێک ئێستا لە کەرکوک نیشتەجێن و لە خواروو ناوەڕاستی عیراقەوە هاتوون و بەشێک نین لەسەرژمێری 1957 و دۆسیەکانیان بۆ ناوچەکانی خۆیان بگەڕێندرێتەوە ، بـەڵام بەداخەوە هیچ جۆرە پابەندبوونێک بەم بڕیارەوە دیارنییە و ئەوانیش ئەمە بە مەترسییەکی جدی لەسەر ئەو ناوچانە دەبینین و پێچەوانەی بنەما گشتیەکانی مادەی 140ـی دەستورە.
دەستەی ناوچە کوردستانییەکان راشیگەیاند، بێگومان ئەم پێشهاتە نیگەرانیەکانی ئەوانی کرد بە راستی و ئەگەر روونکردنەوەی پێویست و بڕوا پێکراو لەلایەن بەغدادوە نەدرێت بە حکومەتی هەرێم ، ململانێ دەستوریەکانی ئێمە دەگوازێتەوە بۆ قۆناخێکی دژوارتر ، لای هەموو لایەک روونە هەر جۆرە دەستبردنێک بۆ گۆڕینی ناسنامەو دیموگرافیای شاری کەرکوک و خانەقین و شەنگال و تەواوی ناوچە کوردستانیەکان قبوڵ کراو نیە، پێویستە لە دەرەوەی ململانێکان لە هەرێمی کوردستان، حکومەت و کۆی لایەنە سیاسیەکان ئەم رەوشەی بەجدی وەربگرن و کاری بنچینەیمان پاراستنی ناسنامەی کوردستانی بوونی کەرکوک و تەواوی ناوچە کێشەلەسەرەکانی تـر بێت .
وتەبێژی بەنزینخانەکانی سلێمانی دەڵێت: ئێوارەی ئەمڕۆ نرخی هەر سێ جۆرەکەی بەنزین نۆرماڵ، محەسەن و سوپەر، 25 دینار بۆ هەر لیترێک دادەبەزێت.
بەهمەن قادر وتەبێژی بەنزینخانەکانی سلێمانی بە کوردسات نیوزی رایگەیاند، ئێوارەی ئەمڕۆ لە سەعات چوارەوە، بەنزینی سۆپەر لە 1275 دینارەوە دەبێتە 1250 دینار هەروەها موحەسەن لە 1125ـەوە دادەبەزێت بۆ 1100 دینار.
وتیشی، بەنزینی نۆرماڵ لە 925 دینارەوە دەبێتە 900 دینار.
بافڵ جەلال تاڵەبانی سەرۆکی یەکێتی ئیدانی هێرشکردنە سەر کێڵگەی غازی کۆرمۆر دەکات و دەڵێت: وەڵامدانەوەمان بۆ ئەم هێرشە یەکلاکەرەوە و تووند دەبێت.
بافڵ جەلال تاڵەبانی سەرۆکی یەکێتیی نیشتمانیی کوردستان لەبارەی هێرشەکەی سەر کێڵگەی کۆرمۆر راگەیەنراوێکی بڵاوکردەوە و رایگەیاند، هێرشە تیرۆریستییەکەی سەر کێڵگەی غازی کۆرمۆر جێگای قبوڵ نییە و بە توندترین شێوە ئیدانەی دەکەین، ئامانجی هێرشەکە زیانگەیاندنە بە گوزەرانی هاونیشتمانیانمان لە هەرێمی کوردستان و عیراق و تێکدانی سەقامگیری وڵاتەکەمان.
ئاماژەی بەوەشکرد، وەڵامدانەوەمان بۆ ئەم هێرشە یەکلاکەرەوە و تووند دەبێت و هەموو رێکارێکی پێویست بۆ پاراستنی گیانی هاونیشتمانیانمان دەگرینەبەر.
سەرۆکی یەکێتی ئەوەشی خستەڕوو، چەک تەنها دەبێت بەدەست دەوڵەتەوە بێت. ئەو میلیشیایانە کە لە دەرەوەی سەروەری یاسا کاردەکەن یان دەبێت هەڵبوەشێندرێنەوە یان لەناوببرێن.
كونسوڵخانەی بەریتانیا لە هەرێم ئیدانەی هێرشەکردنە سەر كۆرمۆر دەکات و ئاشکرایدەکات، هێرشكردنە سەر هەر ژێرخانێكی بنەڕەتی هەڕەشەیە لە سەقامگیری عیراق و سەلامەتی گەلەكەی.
كونسوڵخانەی بەریتانیا لە راگەیەنراوێکدا بلاویکردەوە، بە توندی ئیدانەی ئەو هێرشە دەكەین كە شەوی رابردوو كرایە سەر كێڵگەی غازی کۆرمۆر، هەروەها هێرشكردنە سەر هەر ژێرخانێكی بنەڕەتی هەڕەشە لە سەقامگیری عیراق و سەلامەتی گەلەكەی دەكات.
ئاماژەی بەوەشکرد، شانشینی یەكگرتوو لەگەڵ هاوبەشە عیراقییەكان وەستاوە و پشتگیری هەوڵەكانی پاراستنی دامەزراوە بنچینەییەكان دەكات.
کێڵگەی غازی کۆرمۆر دەکەوێتە ناحیەی قادرکەرەم لە سنوری قەزای چەمچەماڵ، بە گەورەترین کێڵگەی غازی عیراق و هەرێم دادەنرێت.
کێڵگەی کۆرمۆر لە ساڵی 1928 بۆ 1930 دۆزراوەتەوە پێی وتراوە کێڵگەی ئەنفال و تا ساڵی 1967 سەر بە قەزای خورماتوو بووە، دواتر لە سالی 1987 لە رووی ئیدراییەوە خراوەتە سەر قەزای چەمچەماڵ، لەدوای ساڵی 2003 وە لەژێر دەسەڵاتی هەرێمی کوردستاندایە و بەهۆی گرنگی پێگە ئابوریەکەیەوە تائێستا چەندین جار کێڵگەی کۆرمۆر روبەڕووی هێرشەکان بووتەوە زیانی زۆری گیانی و مادی لێکەوتۆتەوە.
ساڵی 2008 غاز لە کێڵگەی کۆرمۆر بەرهەمێنرا، لە ئێستادا یەکێکە لە گەورەترین کێڵگەی غاز لە رۆژهەڵاتی ناوەڕاست کە کۆمپانیای دانەغازی ئیماراتی کاری تێدا دەکات.
کۆرمۆر کۆمپانیای دانەغازی ئیماراتی و هیلال وەبەرهێنانی تێدا دەکات بەجۆرێک لە% 70 ی پشکەکانی تایبەتە بە دانەغاز جگە لەوەش سێ کۆمپانیای ئەڵمانی و هەنگاری و نەمساوی خاوەنی % 30 پشکەکانی دیکەی کێڵگەکەن.
بەپێی داتاکانی کۆمپانیای دانەغاز کێڵگەی غازی کۆرمۆر رووبەرەکەی دەگاتە 135 کیلۆمەتر چوارگۆشەو یەدەگی غازی سروشتی بەنزیکەی 17 ترلیۆن پێ سێجا دەخەمڵێندرێت، رۆژانە نزیکەی کۆی توانای بەرهەمهێنانی غاز لە کێڵگەکە گەیشتووەتە 750 ملیۆن پێی سێجای ستاندارد لە رۆژێکدا، هەروەها کاردەکرێت بۆ ئەوەی توانای بەرهەمهێنان بگەیەنرێتە یەک ملیار پێ سێجا.
غازی کۆرمۆر لەرێگەی بۆرییەوە دەگوازرێتەوە بۆ وێستگەکانی کارەبای چەمچەماڵ، هەولێر، و بازیان، بەمەش رێژەی %67 کارەبای هەرێمی کوردستان دابین دەکات جگە لەوەش سەرچاوەی سەرەکییە بۆ دابینکردنی غاز بۆ کارگەکانی غازی شل.
کێڵگەی کۆرمۆر توانای دابینکردنی غازی بۆ بەرهەمهێنانی زیاتر لە 4 هەزار مێگاوات کارەبای هەیە و نزیکەی سێ هەزاری مێگاوات کارەبا بۆ پارێزگاکانی هەرێم دەمێنێتەوە، ئەوەی رەوانەی پارێزگاکانی کەرکوک و نەینەوا و سەڵاحەدین دەکرێت.
هاوکات وەزارەتی کارەبای عیراق رایگەیاند، بەهۆی هێرشەکەی سەر کێڵگەی غازی کۆرمۆر هەزار 200 مێگاوات بەرهەمهێنانی کارەبایان کەمیکردووە.
ئەمەش لە کاتێکدایە، درەنگانی دوێنێ شەو بە موشەک هێرشکرایە سەر کێڵگەی غازی کۆرمۆر و بەهۆیەوە بەرهەمهێنانی غاز راگیرا، هەروەها لە هەموو پارێزگاکانی هەرێم کارەبا پچڕا و لە 24 سەعاتەوە بۆ 5 سەعات کەمبووەوە.
جێگری سەرۆکی هەرێمی کوردستان لەبارەی هێرشەکەی سەر کۆرمۆر راگەیەنراوێکی بڵاوکردەوە و دەڵێت: داواکارم لە هێزەکانی هاوپەیمانان کەوا سیستمی بەرگری بۆ ئەم جۆرە هێرشە تیرۆریستیانە دابین بکەن.
جەعفەر شێخ مستەفا جێگری سەرۆکی هەرێمی کوردستان رایگەیاند، بەوپەڕی نیگەرانییەوە و بە توندترین شێوە ئیدانەی ئەو هێرشە لەرزۆک و تیرۆریستییەی سهر كێڵگهى گازى كۆرمۆر دەکات، بۆ هەموو لایەک روونە کە ئامانج لەم کردەوانەدا تێکدانی ئاسایش و سەقامگیریی و لاوازکردنی ژێرخانی ئابوریی هەرێمی کوردستان بەتایبەت و عیراق بە گشتیە.
ئاماژەی بەوەشکرد، لێرەدا بە ئەرکی سەرشانی لایەنە پەیوەندیدارەکان لە دامودەزگا ئەمنییەکانی حکومەتیی عیراقی فیدراڵ و هەرێمی دەزانێت، کەوا شکۆ و سەروەری خاک و نیشتیمان بۆ هەموو لایەک بپارێزن و رێگربن لە دووبارەبوونەوەی ئەم جۆرە هێرش و کردەوە تیکدەرانەدا.
جەعفەر شێخ مستەفا راشیگەیاند، داواکارە لە هێزەکانی هاوپەیمانان کەوا سیستمی بەرگری بۆ ئەم جۆرە هێرشە تیرۆریستیانە دابین بکەن و بەزووترین کاتیش لایەنە ئەمنییەکانی تایبەت بەم پرسە تاوانباران دەستگیر بکەن و رووبەڕووی دادگایان بکەنەوە.
قوباد تاڵەبانی راگەیەنراوێکی سەبارەت بە هێرشەکەی سەر کێڵگەی غازی کۆرمۆر بڵاوکردەوە و رایدەگەیەنێت، چەند بارەبوونەوەی ئەم جۆرە هێرشانە بۆسەر ژێرخانی ئابوریی کوردستان و پەرەسەندنێکی مەترسیدارە و پێویستی بە هەنگاویی کردەییە.
قوباد تاڵەبانی جێگری سەرۆکی ئەنجومەنی وەزیرانی هەرێم رایگەیاند، هێرشکردنەسەر کێڵگەی غازی کۆرمۆر، تاوانێکی تیرۆریستی گەورە و بە ئامانجگرتنی ژیان و گوزەرانی رۆژانەی خەڵک و ژێرخانی ئابوریی کوردستان و هەموو عیراقە، چەند بارەبوونەوەی ئەم جۆرە هێرشانە بۆسەر ژێرخانی ئابووریی کوردستان پەرەسەندنێکی مەترسیدارە و پێویستی بە هەنگاویی کردەییە.
ئاماژەی بەوەشکرد، ئەرکی حکومەتی فیدراڵە بە خێرایی بکەران و ئەوانەی لە پشت ئەم هێرشەوەن بۆ رای گشتی ئاشکرا بکات و رووبەڕووی سزا و لێپرسینەوەی یاساییان بکاتەوە، هەروەها جەخت دەکاتەوە، بەردەوامی ئەم جۆرە هێرشانە لەلایەن گروپ و هێزی دەرەوەی دەوڵەت چیتر قبوڵکراونییە و ناسەقامگیریی سیاسی و ئەمنی لێ دەکەوێتەوە، هەربۆیە هەنگاوی سەرەکیی حکومەتی داهاتووی عیراق دەبێت کۆتاییهێنان بەم رەوشە و سزادان و کۆکردنەوەی گروپ و هێزە چەکدارەکانی دەرەوەی دەوڵەت بێت.
نێچیرڤان بارزانی ئیدانەی هێرشەکەی سەر کێڵگەی غازی کۆرمۆر دەکات و دەڵێت: پێویستە بە زووترین کات ئهنجامدهرانى ئهو تاوانه سزا بدرێن.
نێچیرڤان بارزانی لەراگەیەنراوێکدا ئاشکرایکرد، به توندى ئیدانەی ئهو هێرشه تيرۆرستييه دهكات كه شهوى رابردوو كرايه سهر كێڵگهى كۆرمۆر، ئهو هێرشه دژى ژێرخانی ئابورى و خزمهتگوزارييه گشتييهكانی عیراق و هەرێمى كوردستانه و ههڕهشهيهكى راستهوخۆيه لهسهر ئاسايش و سهقامگيريى وڵات.
ئاماژەی بەوەشکرد، ئهرك و بهرپرسياريهتيى حكومهتى فيدراڵى عیراق و دامهزراوه ئهمنییه پهیوهندیدارهکانه و پێويسته به زووترین كات ههوڵی جدی بدهن و رێكارى پێویست و کاریگهر بگرنهبهر بۆ لێپێچينهوه و سزادانى ئهنجامدهرانى ئهم تاوانه و رێگهگرتن له دووبارهبوونهوهى.
دانەغاز ئاشکرایکرد، بەهۆی هێرشەکەی سەر کێڵگەی کۆرمۆر بەرهەمهێنانی غاز راگیراوە، دەشڵێت؛ بەهەماهەنگی لەگەڵ دەسەڵاتدارانی ناوچەکە لەکاتی خۆیدا زانیاری نوێ دەخەنەڕوو.
کۆمپانیای دانەغازی ئیماراتی 'PJSC'راگەیەنراوێکی لەبارەی هێرشە موشەکیەکەی سەر کێڵگەی کۆرمۆر بڵاوکردەوە و رایگەیاند، هێرشەكەی شەوی رابردوو بە موشەك ئەنجامدراوە و یەكێك لە كۆگاكانی غازی شلی كردووەتە ئامانج.
ئەوەشی خستەڕوو، بەهۆی هێرشەکەوە هیچ زیانێکی گیانی لێنەکەوتووەتەوە و کارمەندانی کۆمپانیاکە سەلامەتن، بەڵام هەناردەكردنی غاز لە كێڵگەی كۆرمۆر راگیراوە.
دانەغاز راشیگەیاند، بەرهەمهێنانی غاز رادەگرن بۆ ئەوەی ئاگرەكە كۆنتڕۆڵ بكرێت و هەڵسەنگاندن بۆ زیانەكان بكرێت.
جەختیشدەکاتەوە، بە هاوئاهەنگی لەگەڵ دەسەڵاتدارانی ناوچەکە، زانیاری نوێ لەکاتی خۆیدا دەخرێتەڕوو.
بەدرۆن هێرشكرایە سەر كێڵگەی كۆرمۆر بەهۆیەوە كارەبا زۆرینەی ناوچەكان پچڕا، فەرماندەیی ئۆپەراسیۆنە هاوبەشەكانیش دەڵێت: ئەوانەی لەپشت ئەم هێرشانەوەن، دەدرێنە دادگا.
پەیامنێری كوردسات نیوز رایگەیاند، درەنگانی شەوی رابردوو، بە درۆن هێرشكرایە سەر كێڵگەی كۆرمۆر، كە بەشی پلانی ئەو كێڵگە كراواتە ئامانج بەهۆیەوە خەزانەی ئێڵ پی چیەكەی تەقییەوەتەوە لە ئەنجامدا ئاگرێگی گەورە كەوتوەتەوە.
هاوكات، وەزارەتی سامانە سروشتییەكان و كارەبای هەرێم لە راگەیەنراوێكی هاوبەشدا رایانگەیاند، بەهۆی هێرشە درۆنیەكەوە بۆ سەر كێڵگەی كۆرمۆر تەواویی هەناردەی غاز بۆ وێستگەكانی كارەبا راگیرا، بەهۆیەوە پێدانی كارەبای نیشتمانی بۆ پێنج سەعات كەمدەبێتەوە، راشیگەیاند، تیمەكانی هەردوو وەزارەتەكە، لەگەڵ كۆمپانیای داناغاز لەسەر هێڵن بۆ بەدواداچوونی لێكەوتەكانی رووداوەكە و ئاسایكردنەوەی بارودۆخەكە.
لای خۆشیەوە، فەرماندەیی ئۆپەراسیۆنە هاوبەشەكانی عیراق رایگەیاند، ئەم هێرشە هەڕەشەی راستەوخۆ بۆ سەر بەرژەوەندییەكانی گەلی عیراق دروست دەكات ئامانج لێیان رێگریكردن و دواخستنی هەوڵەكانە بۆ بەدیهێنانی سەقامگیری ئەمنیی و ئابوری.
راشیگەیاند، ئەو هێرشە كاردانەوەی نەرێنی لەسەر تۆڕی كارەبا بە تایبەتی لە پارێزگاكانی هەولێر و سلێمانی هەیە و زیان بە سامان و سەرچاوەكانی وزەی وڵات دەگەیەنێت، وتیشی، ئەوانەی لەپشت ئەم هێرشانەوەن، دەدرێنە دادگا، رێوشوێنی یاسایی یەكلاكەرەوە بەرانبەر دەگرێتەبەر.
هەردوو وەزارەتی سامانە سروشتییەکان و کارەبای حکومەتی هەرێمی کوردستان رایانگەیاند، بەهۆی هێرشێکی درۆنییەوە بۆ سەر کێڵگەی کۆرمۆر، هەناردەکردنی غاز بۆ وێستگەکانی بەرهەمهێنانی کارەبا بە تەواوی راگیراوە.
لە راگەیەندراوێکی هاوبەشدا ئەو دوو وەزارەتە ئاشکرایانکردووە، هێرشەکە سەعات 11:30ی ئەمشەو رویداوە و بەهۆیەوە گرفت بۆ بەرهەمهێنانی کارەبا دروستبووە.
ئاماژە بەوەش دراوە، لە ئێستادا تیمەکانی هەردوو وەزارەت لەگەڵ کۆمپانیای "دانا غاز" لەسەر هێڵن بۆ بەدواداچوونی لێکەوتەکانی روداوەکە و هەوڵدان بۆ ئاساییکردنەوەی دۆخەکە.
فڕۆکەخانەی نێودەوڵەتیی سلێمانی ئەو دەنگۆیانە رەتدەکاتەوە کە باس لە راگرتنی گەشتەکان دەکەن و رایدەگەیەنێت، گەشتەکان بەپێی خشتەی ئاسایی خۆیان بەردەوامن.
بەشی پەیوەندییە گشتییەکانی فڕۆکەخانەکە لە روونکردنەوەیەکدا ئاماژەی بەوە کردووە، هەواڵی راگرتنی گەشتە ئاسمانییەکان کە لە هەندێک پەیجی "فەیک" بڵاوکراوەتەوە، دورە لە راستییەوە و هیچ گرفتێک لە فڕۆکەخانەکەدا بوونی نییە.
فڕۆکەخانەی سلێمانی دڵنیایی دەداتە گەشتیاران کە گەشتەکان ئاسایین، هاوکات هۆشداریش دەدات کە رێکاری توندی یاسایی بەرامبەر هەر کەس و پەیجێک دەگرنەبەر کە هەواڵی ناڕاست بڵاودەکەنەوە و دڵەڕاوکێ بۆ هاووڵاتیان دروست دەکەن.
ئەم روونکردنەوەیە دوای ئەوە دێت کە ئەمڕۆ چوارشەممە 26-11-2025، بەهۆی گرفتێکی تەکنیکییەوە ماڵپەڕی فڕۆکەخانە لەکارکەوت و ئەوەش بووە هۆی دروستبوونی دەنگۆ.