وەزیری پێشمەرگەی حکومەتی هەرێم بە یاوەری سەردانی فەریق روکن عیسا عوزێر، سەرۆکی ئەرکان و ئەفسەرانی پلە باڵای وەزارەتی پێشمەرگە بەشدارییان لە پرسەی شەهیدان وەیسی ئاخر سەعید و موسا ئەنوەر رەسوڵ و هاوژینەکەی کرد.
 
بەپێی راگەیەندراوێکی وەزارەتی پێشمەرگەی حکومەتی هەرێم: ئەمڕۆ ٨ـی نیسانی ٢٠٢٦، شۆڕش ئیسماعیل، وەزیری پێشمەرگەی حکومەتی هەرێمی کوردستان بە یاوەری فەریق روکن عیسا عوزێر، سەرۆکی ئەرکان و ئەفسەرانی پلە باڵای وەزارەتی پێشمەرگە بەشدارییان کرد لە پرسەی پێشمەرگەی قارەمان شەهید (وەیسی ئاخر سەعید)، کە یەکێک بوو لە بریندارانی هێرشە مووشەکییەکەی ٢٤ی ئادار و دوای ١٥ رۆژ مانەوەی لە نەخۆشخانە، دوێنێ گیانی پاکی بە خاکی پیرۆزی کوردستان سپارد؛ لە نزیکەوە وەزیری پێشمەرگە بە ناوی وەزارەتی پێشمەرگە و هێزی پێشمەرگەی کوردستانەوە، سەرەخۆشی و هاوخەمی قووڵی ئاراستەی خانەوادە کەسوکاری شەهید وەیسی کرد و پێی راگەیاندن، شەهیدبوونی ئەم قارەمانە لەگەڵ پۆلێک لە هاوڕێکانیدا، برینێکی قووڵە، بەڵام شکۆ و سەربەرزییەکی بێ کۆتاییە بۆ نیشتمان و ئێوە و ئێمەش، هەمیشە خۆمان بە قەرزاری خوێنی گەشیان دەزانین
 
لە بەشێکی تری راگەیەندراوەکەدا ئاماژە بەوەدراوە، لە بەشێکی تری سەردانەکەیاندا، وەزیری پێشمەرگە و ستافی باڵای وەزارەتی پێشمەرگە ئامادەی پرسەی هەردوو شەهید (مووسا ئەنوەر رەسوڵ) و هاوژینەکەی بوون، کە بە داخەوە بە شێوەیەکی دڕندانە و دوور لە هەموو بەها مرۆییەکان، لە کردەیەکی تیرۆریستیدا لە گوندەکەی خۆیان شەهید کران؛ وەزیری پێشمەرگە رایگەیاندووە، وەک وەزارەتی پێشمەرگە و هێزی پێشمەرگە و گەلی کوردستان لە پرسەداین، دڵنیاین خوێنی ئەم شەهیدە نەمرانە یەکڕیزیی و کۆدەنگی زیاتر دەبەخشێتە گەلەکەمان و دەمانکاتە قەڵایەکی پۆڵایین بەرامبەر ناحەزان؛ ڕوحی شەهیدان شاد و ئاسوودە بێت، نەمری بۆ گیانی پاکیان.